| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
5. වක්‌කලිසුත්‌තවණ්‌ණනා
5. Vakkalisuttavaṇṇanā
87. නගරමජ්‌ඣෙ මහාආබාධො උප්‌පජ්‌ජීති නගරමජ්‌ඣෙන ආගච්‌ඡන්‌තො කම්‌මසමුට්‌ඨානො මහන්‌තො ආබාධො උප්‌පජ්‌ජති. සමන්‌තතො අධොසීති සබ්‌බභාගෙන පරිප්‌ඵන්‌දි. ඉරියාපථං යාපෙතුන්‌ති සයනනිසජ්‌ජාදිභෙදං ඉරියාපථං පවත්‌තෙතුං. නිවත්‌තන්‌තීති ඔසක්‌කන්‌ති, පරිහායන්‌තීති අත්‌ථො. අධිගච්‌ඡන්‌තීති වඩ්‌ඪන්‌ති. සත්‌ථු ගුණසරීරං නාම නවවිධලොකුත්‌තරධම්‌මාධිගමමූලන්‌ති කත්‌වා වුත්‌තං ‘‘නවවිධො හි…පෙ.… කායො නාමා’’ති, යථා සත්‌තානං කායො පටිසන්‌ධිමූලකො.
87.Nagaramajjhe mahāābādho uppajjīti nagaramajjhena āgacchanto kammasamuṭṭhāno mahanto ābādho uppajjati. Samantato adhosīti sabbabhāgena paripphandi. Iriyāpathaṃ yāpetunti sayananisajjādibhedaṃ iriyāpathaṃ pavattetuṃ. Nivattantīti osakkanti, parihāyantīti attho. Adhigacchantīti vaḍḍhanti. Satthu guṇasarīraṃ nāma navavidhalokuttaradhammādhigamamūlanti katvā vuttaṃ ‘‘navavidho hi…pe… kāyo nāmā’’ti, yathā sattānaṃ kāyo paṭisandhimūlako.
කාළසිලායං කතවිහාරො කාළසිලාවිහාරො. මග්‌ගවිමොක්‌ඛත්‌ථායාති අග්‌ගමග්‌ගවිමොක්‌ඛාධිගමාය. දෙවතාති සුද්‌ධාවාසදෙවතා. අලාමකං නාම පුථුජ්‌ජනකාලකිරියාය අභාවතො. තෙනාහ ‘‘ථෙරො කිරා’’තිආදි . එකං ද්‌වෙ ඤාණානීති එකං ද්‌වෙ පච්‌චවෙක්‌ඛණඤාණානි සභාවතො අවස්‌සං උප්‌පජ්‌ජන්‌ති, අයං ධම්‌මතා. මග්‌ගඵලනිබ්‌බානපච්‌චවෙක්‌ඛණානි තංතංමග්‌ගවුට්‌ඨානෙ උප්‌පජ්‌ජන්‌ති එව. එකං ද්‌වෙති වචනං උප්‌පන්‌නභාවදස්‌සනත්‌ථං වුත්‌තං.
Kāḷasilāyaṃ katavihāro kāḷasilāvihāro. Maggavimokkhatthāyāti aggamaggavimokkhādhigamāya. Devatāti suddhāvāsadevatā. Alāmakaṃ nāma puthujjanakālakiriyāya abhāvato. Tenāha ‘‘thero kirā’’tiādi . Ekaṃ dve ñāṇānīti ekaṃ dve paccavekkhaṇañāṇāni sabhāvato avassaṃ uppajjanti, ayaṃ dhammatā. Maggaphalanibbānapaccavekkhaṇāni taṃtaṃmaggavuṭṭhāne uppajjanti eva. Ekaṃ dveti vacanaṃ uppannabhāvadassanatthaṃ vuttaṃ.
ධූමායනභාවො ධූමාකාරතා, තථා තිමිරායනභාවො.
Dhūmāyanabhāvo dhūmākāratā, tathā timirāyanabhāvo.
වක්‌කලිසුත්‌තවණ්‌ණනා නිට්‌ඨිතා.
Vakkalisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 5. වක්‌කලිසුත්‌තං • 5. Vakkalisuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. වක්‌කලිසුත්‌තවණ්‌ණනා • 5. Vakkalisuttavaṇṇanā
