| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. வக்கலித்தே²ரஅபதா³னவண்ணனா
2. Vakkalittheraapadānavaṇṇanā
து³தியாபதா³னே இதோ ஸதஸஹஸ்ஸம்ஹீதிஆதி³கங் ஆயஸ்மதோ வக்கலித்தே²ரஸ்ஸ அபதா³னங். அயம்பி தே²ரோ புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதீனக³ரே குலகே³ஹே நிப்³ப³த்தோ விஞ்ஞுதங் பத்தோ ஸத்து² ஸந்திகங் க³ச்ச²ந்தேஹி உபாஸகேஹி ஸத்³தி⁴ங் விஹாரங் க³ந்த்வா பரிஸபரியந்தே டி²தோ த⁴ம்மங் ஸுணந்தோ ஸத்தா²ரா ஏகங் பி⁴க்கு²ங் ஸத்³தா⁴தி⁴முத்தானங் அக்³க³ட்டா²னே ட²பிதங் தி³ஸ்வா ஸயம்பி தங் டா²னந்தரங் பத்தெ²ந்தோ ஸத்தாஹங் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னங் த³த்வா பணிதா⁴னங் அகாஸி. ஸத்தா² தஸ்ஸ அனந்தராயங் தி³ஸ்வா ப்³யாகரி.
Dutiyāpadāne ito satasahassamhītiādikaṃ āyasmato vakkalittherassa apadānaṃ. Ayampi thero purimajinavaresu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare kulagehe nibbatto viññutaṃ patto satthu santikaṃ gacchantehi upāsakehi saddhiṃ vihāraṃ gantvā parisapariyante ṭhito dhammaṃ suṇanto satthārā ekaṃ bhikkhuṃ saddhādhimuttānaṃ aggaṭṭhāne ṭhapitaṃ disvā sayampi taṃ ṭhānantaraṃ patthento sattāhaṃ buddhappamukhassa bhikkhusaṅghassa mahādānaṃ datvā paṇidhānaṃ akāsi. Satthā tassa anantarāyaṃ disvā byākari.
ஸோ யாவஜீவங் குஸலங் கத்வா தே³வமனுஸ்ஸேஸு ஸங்ஸரந்தோ அம்ஹாகங் ப⁴க³வதோ காலே ஸாவத்தி²யங் ப்³ராஹ்மணகுலே நிப்³ப³த்தி, தஸ்ஸ வக்கலீதி நாமங் கரிங்ஸு. தத்த² கலீதி அபராத⁴திலகாளகாதி³தோ³ஸஸ்ஸ அதி⁴வசனங். நித்³த⁴ந்தஸுவண்ணபிண்ட³ஸதி³ஸதாய அபக³தோ ப்³யபக³தோ கலி தோ³ஸோ அஸ்ஸாதி வ-காராக³மங் கத்வா வக்கலீதி வுச்சதி. ஸோ வுத்³தி⁴ப்பத்தோ தயோ வேதே³ உக்³க³ண்ஹித்வா ப்³ராஹ்மணஸிப்பேஸு நிப்ப²த்திங் க³தோ, ஸத்தா²ரங் தி³ஸ்வா ரூபகாயஸம்பத்தித³ஸ்ஸனேன அதித்தோ ஸத்தா²ரா ஸத்³தி⁴ங்யேவ விசரதி. ‘‘அகா³ரமஜ்ஜே² வஸந்தோ நிச்சகாலங் ஸத்து² த³ஸ்ஸனங் ந லபி⁴ஸ்ஸாமீ’’தி ஸத்து² ஸந்திகே பப்³ப³ஜித்வா ட²பெத்வா போ⁴ஜனகாலங் ஸரீரகிச்சகாலஞ்ச ஸேஸகாலே யத்த² டி²தேன ஸக்கா த³ஸப³லங் பஸ்ஸிதுங், தத்த² டி²தோ அஞ்ஞங் கிச்சங் பஹாய ப⁴க³வந்தங் ஓலோகெந்தோயேவ விஹரதி. ஸத்தா² தஸ்ஸ ஞாணபரிபாகங் ஆக³மெந்தோ ப³ஹுகாலங் தஸ்மிங் ரூபத³ஸ்ஸனேனேவ விசரந்தே கிஞ்சி அவத்வா புனேகதி³வஸங் – ‘‘கிங் தே, வக்கலி, இமினா பூதிகாயேன தி³ட்டே²ன? யோ கோ², வக்கலி, த⁴ம்மங் பஸ்ஸதி, ஸோ மங் பஸ்ஸதி; யோ மங் பஸ்ஸதி, ஸோ த⁴ம்மங் பஸ்ஸதி. த⁴ம்மஞ்ஹி, வக்கலி, பஸ்ஸந்தோ மங் பஸ்ஸதீ’’தி (ஸங்॰ நி॰ 3.87) ஆஹ. ஸத்த²ரி ஏவங் வத³ந்தேபி தே²ரோ ஸத்து² த³ஸ்ஸனங் பஹாய அஞ்ஞத்த² க³ந்துங் ந ஸக்கோதி. ததோ ஸத்தா², ‘‘நாயங் பி⁴க்கு² ஸங்வேக³ங் அலபி⁴த்வா பு³ஜ்ஜி²ஸ்ஸதீ’’தி வஸ்ஸூபனாயிகதி³வஸே – ‘‘அபேஹி, வக்கலீ’’தி தே²ரங் பணாமேஸி. ஸோ ஸத்தா²ரா பணாமிதோ ஸத்து² ஸம்முகே² டா²துங் அஸக்கொந்தோ – ‘‘கிங் மய்ஹங் ஜீவிதேன, யோஹங் ஸத்தா²ரங் த³ட்டு²ங் ந லபா⁴மீ’’தி கி³ஜ்ஜ²கூடே பப்³ப³தே பபாதட்டா²னங் அபி⁴ருஹி? ஸத்தா² தஸ்ஸ தங் பவத்திங் ஞத்வா – ‘‘அயங் பி⁴க்கு² மம ஸந்திகா அஸ்ஸாஸங் அலப⁴ந்தோ மக்³க³ப²லானங் உபனிஸ்ஸயங் நாஸெய்யா’’தி அத்தானங் த³ஸ்ஸெத்வா ஓபா⁴ஸங் விஸ்ஸஜ்ஜெந்தோ –
So yāvajīvaṃ kusalaṃ katvā devamanussesu saṃsaranto amhākaṃ bhagavato kāle sāvatthiyaṃ brāhmaṇakule nibbatti, tassa vakkalīti nāmaṃ kariṃsu. Tattha kalīti aparādhatilakāḷakādidosassa adhivacanaṃ. Niddhantasuvaṇṇapiṇḍasadisatāya apagato byapagato kali doso assāti va-kārāgamaṃ katvā vakkalīti vuccati. So vuddhippatto tayo vede uggaṇhitvā brāhmaṇasippesu nipphattiṃ gato, satthāraṃ disvā rūpakāyasampattidassanena atitto satthārā saddhiṃyeva vicarati. ‘‘Agāramajjhe vasanto niccakālaṃ satthu dassanaṃ na labhissāmī’’ti satthu santike pabbajitvā ṭhapetvā bhojanakālaṃ sarīrakiccakālañca sesakāle yattha ṭhitena sakkā dasabalaṃ passituṃ, tattha ṭhito aññaṃ kiccaṃ pahāya bhagavantaṃ olokentoyeva viharati. Satthā tassa ñāṇaparipākaṃ āgamento bahukālaṃ tasmiṃ rūpadassaneneva vicarante kiñci avatvā punekadivasaṃ – ‘‘kiṃ te, vakkali, iminā pūtikāyena diṭṭhena? Yo kho, vakkali, dhammaṃ passati, so maṃ passati; yo maṃ passati, so dhammaṃ passati. Dhammañhi, vakkali, passanto maṃ passatī’’ti (saṃ. ni. 3.87) āha. Satthari evaṃ vadantepi thero satthu dassanaṃ pahāya aññattha gantuṃ na sakkoti. Tato satthā, ‘‘nāyaṃ bhikkhu saṃvegaṃ alabhitvā bujjhissatī’’ti vassūpanāyikadivase – ‘‘apehi, vakkalī’’ti theraṃ paṇāmesi. So satthārā paṇāmito satthu sammukhe ṭhātuṃ asakkonto – ‘‘kiṃ mayhaṃ jīvitena, yohaṃ satthāraṃ daṭṭhuṃ na labhāmī’’ti gijjhakūṭe pabbate papātaṭṭhānaṃ abhiruhi? Satthā tassa taṃ pavattiṃ ñatvā – ‘‘ayaṃ bhikkhu mama santikā assāsaṃ alabhanto maggaphalānaṃ upanissayaṃ nāseyyā’’ti attānaṃ dassetvā obhāsaṃ vissajjento –
‘‘பாமோஜ்ஜப³ஹுலோ பி⁴க்கு², பஸன்னோ பு³த்³த⁴ஸாஸனே;
‘‘Pāmojjabahulo bhikkhu, pasanno buddhasāsane;
அதி⁴க³ச்சே² பத³ங் ஸந்தங், ஸங்கா²ரூபஸமங் ஸுக²’’ந்தி. (த⁴॰ ப॰ 381) –
Adhigacche padaṃ santaṃ, saṅkhārūpasamaṃ sukha’’nti. (dha. pa. 381) –
கா³த²ங் வத்வா ‘‘ஏஹி, வக்கலீ’’தி (த⁴॰ ப॰ அட்ட²॰ 2.381) ஹத்த²ங் பஸாரேஸி. தே²ரோ ‘‘த³ஸப³லோ மே தி³ட்டோ², ‘ஏஹீ’தி அவ்ஹாயனம்பி லத்³த⁴’’ந்தி ப³லவபீதிஸோமனஸ்ஸங் உப்பாதெ³த்வா ‘‘குதோ க³ச்சா²மீ’’தி அத்தனோ க³மனபா⁴வங் அஜானித்வாவ ஸத்து² ஸம்முகே² ஆகாஸே பக்க²ந்தி³த்வா பட²மேன பாதே³ன பப்³ப³தே டி²தோயேவ ஸத்தா²ரா வுத்தகா³தா²யோ ஆவஜ்ஜெந்தோ ஆகாஸேயேவ பீதிங் விக்க²ம்பெ⁴த்வா ஸஹ படிஸம்பி⁴தா³ஹி அரஹத்தங் பாபுணீதி அங்கு³த்தரட்ட²கதா²யங் (அ॰ நி॰ அட்ட²॰ 1.1.208) த⁴ம்மபத³வண்ணனாயஞ்ச (த⁴॰ ப॰ அட்ட²॰ 2.381 வக்கலித்தே²ரவத்து²) ஆக³தங்.
Gāthaṃ vatvā ‘‘ehi, vakkalī’’ti (dha. pa. aṭṭha. 2.381) hatthaṃ pasāresi. Thero ‘‘dasabalo me diṭṭho, ‘ehī’ti avhāyanampi laddha’’nti balavapītisomanassaṃ uppādetvā ‘‘kuto gacchāmī’’ti attano gamanabhāvaṃ ajānitvāva satthu sammukhe ākāse pakkhanditvā paṭhamena pādena pabbate ṭhitoyeva satthārā vuttagāthāyo āvajjento ākāseyeva pītiṃ vikkhambhetvā saha paṭisambhidāhi arahattaṃ pāpuṇīti aṅguttaraṭṭhakathāyaṃ (a. ni. aṭṭha. 1.1.208) dhammapadavaṇṇanāyañca (dha. pa. aṭṭha. 2.381 vakkalittheravatthu) āgataṃ.
இத⁴ பன ஏவங் வேதி³தப்³ப³ங் – ‘‘கிங் தே, வக்கலீ’’திஆதி³னா ஸத்தா²ரா ஓவதி³தோ கி³ஜ்ஜ²கூடே விஹரந்தோ விபஸ்ஸனங் பட்ட²பேஸி, தஸ்ஸ ஸத்³தா⁴ய ப³லவபா⁴வதோ ஏவ விபஸ்ஸனா வீதி²ங் ந ஓதரதி? ப⁴க³வா தங் ஞத்வா கம்மட்டா²னங் ஸோதெ⁴த்வா அதா³ஸி. ஸோ புன விபஸ்ஸனங் மத்த²கங் பாபேதுங் நாஸக்கி²யேவ. அத²ஸ்ஸ ஆஹாரவேகல்லேன வாதாபா³தோ⁴ உப்பஜ்ஜி, தங் வாதாபா³தே⁴ன பீளியமானங் ஞத்வா ப⁴க³வா தத்த² க³ந்த்வா புச்ச²ந்தோ –
Idha pana evaṃ veditabbaṃ – ‘‘kiṃ te, vakkalī’’tiādinā satthārā ovadito gijjhakūṭe viharanto vipassanaṃ paṭṭhapesi, tassa saddhāya balavabhāvato eva vipassanā vīthiṃ na otarati? Bhagavā taṃ ñatvā kammaṭṭhānaṃ sodhetvā adāsi. So puna vipassanaṃ matthakaṃ pāpetuṃ nāsakkhiyeva. Athassa āhāravekallena vātābādho uppajji, taṃ vātābādhena pīḷiyamānaṃ ñatvā bhagavā tattha gantvā pucchanto –
‘‘வாதரோகா³பி⁴னீதோ த்வங், விஹரங் கானநே வனே;
‘‘Vātarogābhinīto tvaṃ, viharaṃ kānane vane;
பவித்³த⁴கோ³சரே லூகே², கத²ங் பி⁴க்கு² கரிஸ்ஸஸீ’’தி. (தே²ரகா³॰ 350) –
Paviddhagocare lūkhe, kathaṃ bhikkhu karissasī’’ti. (theragā. 350) –
ஆஹ. தங் ஸுத்வா தே²ரோ –
Āha. Taṃ sutvā thero –
‘‘பீதிஸுகே²ன விபுலேன, ப²ரமானோ ஸமுஸ்ஸயங்;
‘‘Pītisukhena vipulena, pharamāno samussayaṃ;
லூக²ம்பி அபி⁴ஸம்பொ⁴ந்தோ, விஹரிஸ்ஸாமி கானநே.
Lūkhampi abhisambhonto, viharissāmi kānane.
‘‘பா⁴வெந்தோ ஸதிபட்டா²னே, இந்த்³ரியானி ப³லானி ச;
‘‘Bhāvento satipaṭṭhāne, indriyāni balāni ca;
பொ³ஜ்ஜ²ங்கா³னி ச பா⁴வெந்தோ, விஹரிஸ்ஸாமி கானநே.
Bojjhaṅgāni ca bhāvento, viharissāmi kānane.
‘‘ஆரத்³த⁴வீரியே பஹிதத்தே, நிச்சங் த³ள்ஹபரக்கமே;
‘‘Āraddhavīriye pahitatte, niccaṃ daḷhaparakkame;
ஸமக்³கே³ ஸஹிதே தி³ஸ்வா, விஹரிஸ்ஸாமி கானநே.
Samagge sahite disvā, viharissāmi kānane.
‘‘அனுஸ்ஸரந்தோ ஸம்பு³த்³த⁴ங், அக்³க³ங் த³ந்தங் ஸமாஹிதங்;
‘‘Anussaranto sambuddhaṃ, aggaṃ dantaṃ samāhitaṃ;
அதந்தி³தோ ரத்திந்தி³வங், விஹரிஸ்ஸாமி கானநே’’தி. (தே²ரகா³॰ 351-354) –
Atandito rattindivaṃ, viharissāmi kānane’’ti. (theragā. 351-354) –
சதஸ்ஸோ கா³தா²யோ அபா⁴ஸி. தாஸங் அத்தோ² தே²ரகா³தா²வண்ணனாயங் (தே²ரகா³॰ அட்ட²॰ 2.351-354) வுத்தோயேவ. ஏவங் தே²ரோ விபஸ்ஸனங் உஸ்ஸுக்காபெத்வா அரஹத்தங் பாபுணி.
Catasso gāthāyo abhāsi. Tāsaṃ attho theragāthāvaṇṇanāyaṃ (theragā. aṭṭha. 2.351-354) vuttoyeva. Evaṃ thero vipassanaṃ ussukkāpetvā arahattaṃ pāpuṇi.
28. ஸோ அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ இதோ ஸதஸஹஸ்ஸம்ஹீதிஆதி³மாஹ. தத்த² இதோதி ககுஸந்தா⁴தீ³னங் உப்பன்னப⁴த்³த³கப்பதோ ஹெட்டா² கப்பஸதஸஹஸ்ஸமத்த²கேதி அத்தோ².
28. So arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento ito satasahassamhītiādimāha. Tattha itoti kakusandhādīnaṃ uppannabhaddakappato heṭṭhā kappasatasahassamatthaketi attho.
29. பது³மாகாரவத³னோதி ஸுபுப்பி²தபது³மஸஸ்ஸிரீகமுகோ². பது³மபத்தக்கோ²தி ஸேதபது³மபுப்ப²பண்ணஸதி³ஸஅக்கீ²தி அத்தோ².
29.Padumākāravadanoti supupphitapadumasassirīkamukho. Padumapattakkhoti setapadumapupphapaṇṇasadisaakkhīti attho.
30. பது³முத்தரக³ந்தோ⁴வாதி பது³மக³ந்த⁴முகோ²தி அத்தோ².
30.Padumuttaragandhovāti padumagandhamukhoti attho.
31. அந்தா⁴னங் நயனூபமோதி சக்கு²விரஹிதானங் ஸத்தானங் நயனஸதி³ஸோ, த⁴ம்மதே³ஸனாய ஸப்³ப³ஸத்தானங் பஞ்ஞாசக்கா²தி³சக்கு²தா³யகோதி அத்தோ². ஸந்தவேஸோதி ஸந்தஸபா⁴வோ ஸந்தஇரியாபதோ². கு³ணனிதீ⁴தி கு³ணானங் நிதி⁴, ஸப்³ப³கு³ணக³ணானங் நிதா⁴னட்டா²னபூ⁴தோதி அத்தோ². கருணாமதிஆகரோதி ஸாதூ⁴னங் சித்தகம்பனஸங்கா²தாய கருணாய ச அத்தா²னத்த²மினநபரிச்சி²ன்னமதியா ச ஆகரோ ஆதா⁴ரபூ⁴தோ.
31.Andhānaṃnayanūpamoti cakkhuvirahitānaṃ sattānaṃ nayanasadiso, dhammadesanāya sabbasattānaṃ paññācakkhādicakkhudāyakoti attho. Santavesoti santasabhāvo santairiyāpatho. Guṇanidhīti guṇānaṃ nidhi, sabbaguṇagaṇānaṃ nidhānaṭṭhānabhūtoti attho. Karuṇāmatiākaroti sādhūnaṃ cittakampanasaṅkhātāya karuṇāya ca atthānatthaminanaparicchinnamatiyā ca ākaro ādhārabhūto.
32. ப்³ரஹ்மாஸுரஸுரச்சிதோதி ப்³ரஹ்மேஹி ச அஸுரேஹி ச தே³வேஹி ச அச்சிதோ பூஜிதோதி அத்தோ².
32.Brahmāsurasuraccitoti brahmehi ca asurehi ca devehi ca accito pūjitoti attho.
33. மது⁴ரேன ருதேன சாதி கரவீகருதமது⁴ரேன ஸத்³தே³ன ஸகலங் ஜனங் ரஞ்ஜயந்தீதி ஸம்ப³ந்தோ⁴. ஸந்த²வீ ஸாவகங் ஸகந்தி அத்தனோ ஸாவகங் மது⁴ரத⁴ம்மதே³ஸனாய ஸந்த²வீ, து²திங் அகாஸீதி அத்தோ².
33.Madhurena rutena cāti karavīkarutamadhurena saddena sakalaṃ janaṃ rañjayantīti sambandho. Santhavī sāvakaṃ sakanti attano sāvakaṃ madhuradhammadesanāya santhavī, thutiṃ akāsīti attho.
34. ஸத்³தா⁴தி⁴முத்தோதி ஸத்³த³ஹனஸத்³தா⁴ய ஸாஸனே அதி⁴முத்தோ பதிட்டி²தோதி அத்தோ². மம த³ஸ்ஸனலாலஸோதி மய்ஹங் த³ஸ்ஸனே ப்³யாவடோ தப்பரோ.
34.Saddhādhimuttoti saddahanasaddhāya sāsane adhimutto patiṭṭhitoti attho. Mama dassanalālasoti mayhaṃ dassane byāvaṭo tapparo.
35. தங் டா²னமபி⁴ரோசயிந்தி தங் ஸத்³தா⁴தி⁴முத்தட்டா²னந்தரங் அபி⁴ரோசயிங், இச்சி²ங் பத்தே²ஸிந்தி அத்தோ².
35.Taṃṭhānamabhirocayinti taṃ saddhādhimuttaṭṭhānantaraṃ abhirocayiṃ, icchiṃ patthesinti attho.
40. பீதமட்ட²னிவாஸனந்தி ஸிலிட்ட²ஸுவண்ணவண்ணவத்தே² நிவத்த²ந்தி அத்தோ². ஹேமயஞ்ஞோபசிதங்க³ந்தி ஸுவண்ணபாமங்க³லக்³கி³தக³த்தந்தி அத்தோ².
40.Pītamaṭṭhanivāsananti siliṭṭhasuvaṇṇavaṇṇavatthe nivatthanti attho. Hemayaññopacitaṅganti suvaṇṇapāmaṅgalaggitagattanti attho.
47-48. நோனீதஸுகு²மாலங் மந்தி நவனீதமிவ முது³தலுணஹத்த²பாத³ங். ஜாதபல்லவகோமலந்தி அஸோகபல்லவபத்தகோமலமிவ முது³கந்தி அத்தோ². பிஸாசீப⁴யதஜ்ஜிதாதி ததா³ ஏவங்பூ⁴தங் குமாரங் மங் அஞ்ஞா பிஸாசீ ஏகா ரக்க²ஸீ ப⁴யேன தஜ்ஜேஸி பி⁴ங்ஸாபேஸீதி அத்தோ². ததா³ மஹேஸிஸ்ஸ ஸம்மாஸம்பு³த்³த⁴ஸ்ஸ பாத³மூலே மங் ஸாயேஸுங் நிபஜ்ஜாபேஸுங். தீ³னமானஸா பீ⁴தசித்தா மம மாதாபிதரோ இமங் தா³ரகங் தே த³தா³ம, இமஸ்ஸ ஸரணங் பதிட்டா² ஹோது நாத² நாயகாதி ஸம்ப³ந்தோ⁴.
47-48.Nonītasukhumālaṃ manti navanītamiva mudutaluṇahatthapādaṃ. Jātapallavakomalanti asokapallavapattakomalamiva mudukanti attho. Pisācībhayatajjitāti tadā evaṃbhūtaṃ kumāraṃ maṃ aññā pisācī ekā rakkhasī bhayena tajjesi bhiṃsāpesīti attho. Tadā mahesissa sammāsambuddhassa pādamūle maṃ sāyesuṃ nipajjāpesuṃ. Dīnamānasā bhītacittā mama mātāpitaro imaṃ dārakaṃ te dadāma, imassa saraṇaṃ patiṭṭhā hotu nātha nāyakāti sambandho.
49. ததா³ படிக்³க³ஹி ஸோ மந்தி ஸோ ப⁴க³வா ததா³ தஸ்மிங் மம மாதுயா தி³ன்னகாலே ஜாலினா ஜாலயுத்தேன ஸங்கா²லகேன சக்கலக்க²ணாதீ³ஹி லக்கி²தேன முது³கோமலபாணினா முது³கேன விஸுத்³தே⁴ன ஹத்த²தலேன மங் அக்³க³ஹேஸீதி அத்தோ².
49.Tadā paṭiggahi so manti so bhagavā tadā tasmiṃ mama mātuyā dinnakāle jālinā jālayuttena saṅkhālakena cakkalakkhaṇādīhi lakkhitena mudukomalapāṇinā mudukena visuddhena hatthatalena maṃ aggahesīti attho.
52. ஸப்³ப³பாரமிஸம்பூ⁴தந்தி ஸப்³பே³ஹி தா³னபாரமிதாதீ³ஹி ஸம்பூ⁴தங் ஜாதங். நீலக்கி²னயனங் வரங் புஞ்ஞஸம்பா⁴ரஜங் உத்தமனீலஅக்கி²வந்தங். ஸப்³ப³ஸுபா⁴கிண்ணங் ஸப்³பே³ன ஸுபே⁴ன வண்ணேன ஸண்டா²னேன ஆகிண்ணங் க³ஹனீபூ⁴தங் ரூபங் ப⁴க³வதோ ஹத்த²பாத³ஸீஸாதி³ரூபங் தி³ஸ்வாதி அத்தோ², தித்திங் அபத்தோ விஹராமி அஹந்தி ஸம்ப³ந்தோ⁴.
52.Sabbapāramisambhūtanti sabbehi dānapāramitādīhi sambhūtaṃ jātaṃ. Nīlakkhinayanaṃ varaṃ puññasambhārajaṃ uttamanīlaakkhivantaṃ. Sabbasubhākiṇṇaṃ sabbena subhena vaṇṇena saṇṭhānena ākiṇṇaṃ gahanībhūtaṃ rūpaṃ bhagavato hatthapādasīsādirūpaṃ disvāti attho, tittiṃ apatto viharāmi ahanti sambandho.
61. ததா³ மங் சரணந்தகோ³தி தஸ்மிங் மய்ஹங் அரஹத்தங் பத்தகாலே ஸீலாதி³பன்னரஸன்னங் சரணத⁴ம்மானங் அந்தகோ³, பரியோஸானப்பத்தோ பரிபூரகாரீதி அத்தோ². ‘‘மரணந்தகோ³’’திபி பாடோ². தஸ்ஸ மரணஸ்ஸ அந்தங் நிப்³பா³னங் பத்தோதி அத்தோ². ஸத்³தா⁴தி⁴முத்தானங் அக்³க³ங் பஞ்ஞபேஸீதி ஸம்ப³ந்தோ⁴. அத² ஸத்தா² பி⁴க்கு²ஸங்க⁴மஜ்ஜே² நிஸின்னோ ‘‘ஏதத³க்³க³ங், பி⁴க்க²வே, மம ஸாவகானங் ஸத்³தா⁴தி⁴முத்தானங் யதி³த³ங், வக்கலீ’’தி (அ॰ நி॰ 1.198, 208) மங் ஏதத³க்³க³ட்டா²னே ட²பேஸீதி வுத்தங் ஹோதி. ஸேஸங் ஸுவிஞ்ஞெய்யமேவாதி.
61.Tadā maṃ caraṇantagoti tasmiṃ mayhaṃ arahattaṃ pattakāle sīlādipannarasannaṃ caraṇadhammānaṃ antago, pariyosānappatto paripūrakārīti attho. ‘‘Maraṇantago’’tipi pāṭho. Tassa maraṇassa antaṃ nibbānaṃ pattoti attho. Saddhādhimuttānaṃ aggaṃ paññapesīti sambandho. Atha satthā bhikkhusaṅghamajjhe nisinno ‘‘etadaggaṃ, bhikkhave, mama sāvakānaṃ saddhādhimuttānaṃ yadidaṃ, vakkalī’’ti (a. ni. 1.198, 208) maṃ etadaggaṭṭhāne ṭhapesīti vuttaṃ hoti. Sesaṃ suviññeyyamevāti.
வக்கலித்தே²ரஅபதா³னவண்ணனா ஸமத்தா.
Vakkalittheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. வக்கலித்தே²ரஅபதா³னங் • 2. Vakkalittheraapadānaṃ
