| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
11. வலாஹகஸங்யுத்தவண்ணனா
11. Valāhakasaṃyuttavaṇṇanā
550-606. வலாஹகஸங்யுத்தே வலாஹககாயிகாதி வலாஹகனாமகே தே³வகாயே உப்பன்னா ஆகாஸசாரிகதே³வா. ஸீதவலாஹகாதி ஸீதகரணவலாஹகா. ஸேஸபதே³ஸுபி ஏஸேவ நயோ. சேதோபணிதி⁴மன்வாயாதி சித்தட்ட²பனங் ஆக³ம்ம. ஸீதங் ஹோதீதி யங் வஸ்ஸானே வா ஹேமந்தே வா ஸீதங் ஹோதி, தங் உதுஸமுட்டா²னமேவ. யங் பன ஸீதேபி அதிஸீதங், கி³ம்ஹே ச உப்பன்னங் ஸீதங், தங் தே³வதானுபா⁴வேன நிப்³ப³த்தங் ஸீதங் நாம. உண்ஹங் ஹோதீதி யங் கி³ம்ஹானே உண்ஹங், தங் உதுஸமுட்டா²னிகங் பாகதிகமேவ. யங் பன உண்ஹேபி அதிஉண்ஹங், ஸீதகாலே ச உப்பன்னங் உண்ஹங், தங் தே³வதானுபா⁴வேன நிப்³ப³த்தங் உண்ஹங் நாம. அப்³ப⁴ங் ஹோதீதி அப்³ப⁴மண்ட³போ ஹோதி. இதா⁴பி யங் வஸ்ஸானே ச ஸிஸிரே ச அப்³ப⁴ங் உப்பஜ்ஜதி, தங் உதுஸமுட்டா²னிகங் பாகதிகமேவ. யங் பன அப்³பே⁴யேவ அதிஅப்³ப⁴ங், ஸத்தஸத்தாஹம்பி சந்த³ஸூரியே சா²தெ³த்வா ஏகந்த⁴காரங் கரோதி, யஞ்ச சித்தவேஸாக²மாஸேஸு அப்³ப⁴ங், தங் தே³வதானுபா⁴வேன உப்பன்னங் அப்³ப⁴ங் நாம. வாதோ ஹோதீதி யோ தஸ்மிங் தஸ்மிங் உதும்ஹி உத்தரத³க்கி²ணாதி³பகதிவாதோ ஹோதி, அயங் உதுஸமுட்டா²னோவ. யோபி பன ருக்க²க்க²ந்தா⁴தி³பதா³லனோ அதிவாதோ நாம அத்தி², அயஞ்சேவ, யோ ச அஞ்ஞோபி அகாலவாதோ, அயங் தே³வதானுபா⁴வனிப்³ப³த்தோ நாம. தே³வோ வஸ்ஸதீதி யங் வஸ்ஸிகே சத்தாரோ மாஸே வஸ்ஸங், தங் உதுஸமுட்டா²னமேவ. யங் பன வஸ்ஸேயேவ அதிவஸ்ஸங், யஞ்ச சித்தவேஸாக²மாஸேஸு வஸ்ஸங், தங் தே³வதானுபா⁴வனிப்³ப³த்தங் நாம.
550-606. Valāhakasaṃyutte valāhakakāyikāti valāhakanāmake devakāye uppannā ākāsacārikadevā. Sītavalāhakāti sītakaraṇavalāhakā. Sesapadesupi eseva nayo. Cetopaṇidhimanvāyāti cittaṭṭhapanaṃ āgamma. Sītaṃ hotīti yaṃ vassāne vā hemante vā sītaṃ hoti, taṃ utusamuṭṭhānameva. Yaṃ pana sītepi atisītaṃ, gimhe ca uppannaṃ sītaṃ, taṃ devatānubhāvena nibbattaṃ sītaṃ nāma. Uṇhaṃ hotīti yaṃ gimhāne uṇhaṃ, taṃ utusamuṭṭhānikaṃ pākatikameva. Yaṃ pana uṇhepi atiuṇhaṃ, sītakāle ca uppannaṃ uṇhaṃ, taṃ devatānubhāvena nibbattaṃ uṇhaṃ nāma. Abbhaṃ hotīti abbhamaṇḍapo hoti. Idhāpi yaṃ vassāne ca sisire ca abbhaṃ uppajjati, taṃ utusamuṭṭhānikaṃ pākatikameva. Yaṃ pana abbheyeva atiabbhaṃ, sattasattāhampi candasūriye chādetvā ekandhakāraṃ karoti, yañca cittavesākhamāsesu abbhaṃ, taṃ devatānubhāvena uppannaṃ abbhaṃ nāma. Vāto hotīti yo tasmiṃ tasmiṃ utumhi uttaradakkhiṇādipakativāto hoti, ayaṃ utusamuṭṭhānova. Yopi pana rukkhakkhandhādipadālano ativāto nāma atthi, ayañceva, yo ca aññopi akālavāto, ayaṃ devatānubhāvanibbatto nāma. Devo vassatīti yaṃ vassike cattāro māse vassaṃ, taṃ utusamuṭṭhānameva. Yaṃ pana vasseyeva ativassaṃ, yañca cittavesākhamāsesu vassaṃ, taṃ devatānubhāvanibbattaṃ nāma.
தத்ரித³ங் வத்து² – ஏகோ கிர வஸ்ஸவலாஹகதே³வபுத்தோ தலகூடகவாஸி கீ²ணாஸவத்தே²ரஸ்ஸ ஸந்திகங் க³ந்த்வா வந்தி³த்வா அட்டா²ஸி. தே²ரோ ‘‘கோஸி த்வ’’ந்தி புச்சி². ‘‘அஹங், ப⁴ந்தே, வஸ்ஸவலாஹகதே³வபுத்தோ’’தி. ‘‘தும்ஹாகங் கிர சித்தேன தே³வோ வஸ்ஸதீ’’தி? ‘‘ஆம, ப⁴ந்தே’’தி. ‘‘பஸ்ஸிதுகாமா மய’’ந்தி . ‘‘தேமிஸ்ஸத², ப⁴ந்தே’’தி. ‘‘மேக⁴ஸீஸங் வா க³ஜ்ஜிதங் வா ந பஞ்ஞாயதி, கத²ங் தேமிஸ்ஸாமா’’தி? ‘‘ப⁴ந்தே, அம்ஹாகங்சித்தேன தே³வோ வஸ்ஸதி, தும்ஹே பண்ணஸாலங் பவிஸதா²’’தி . ‘‘ஸாது⁴ தே³வபுத்தா’’தி ஸோ பாதே³ தோ⁴வித்வா பண்ணஸாலங் பாவிஸி. தே³வபுத்தோ தஸ்மிங் பவிஸந்தேயேவ ஏகங் கீ³தங் கா³யித்வா ஹத்த²ங் உக்கி²பி. ஸமந்தா தியோஜனட்டா²னங் ஏகமேக⁴ங் அஹோஸி. தே²ரோ அத்³த⁴திந்தோ பண்ணஸாலங் பவிட்டோ²தி. அபிச தே³வோ நாமேஸ அட்ட²ஹி காரணேஹி வஸ்ஸதி நாகா³னுபா⁴வேன ஸுபண்ணானுபா⁴வேன தே³வதானுபா⁴வேன ஸச்சகிரியாய உதுஸமுட்டா²னேன மாராவட்டனேன இத்³தி⁴ப³லேன வினாஸமேகே⁴னாதி.
Tatridaṃ vatthu – eko kira vassavalāhakadevaputto talakūṭakavāsi khīṇāsavattherassa santikaṃ gantvā vanditvā aṭṭhāsi. Thero ‘‘kosi tva’’nti pucchi. ‘‘Ahaṃ, bhante, vassavalāhakadevaputto’’ti. ‘‘Tumhākaṃ kira cittena devo vassatī’’ti? ‘‘Āma, bhante’’ti. ‘‘Passitukāmā maya’’nti . ‘‘Temissatha, bhante’’ti. ‘‘Meghasīsaṃ vā gajjitaṃ vā na paññāyati, kathaṃ temissāmā’’ti? ‘‘Bhante, amhākaṃcittena devo vassati, tumhe paṇṇasālaṃ pavisathā’’ti . ‘‘Sādhu devaputtā’’ti so pāde dhovitvā paṇṇasālaṃ pāvisi. Devaputto tasmiṃ pavisanteyeva ekaṃ gītaṃ gāyitvā hatthaṃ ukkhipi. Samantā tiyojanaṭṭhānaṃ ekameghaṃ ahosi. Thero addhatinto paṇṇasālaṃ paviṭṭhoti. Apica devo nāmesa aṭṭhahi kāraṇehi vassati nāgānubhāvena supaṇṇānubhāvena devatānubhāvena saccakiriyāya utusamuṭṭhānena mārāvaṭṭanena iddhibalena vināsameghenāti.
வலாஹகஸங்யுத்தவண்ணனா நிட்டி²தா.
Valāhakasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. ஸுத்³தி⁴கஸுத்தங் • 1. Suddhikasuttaṃ
2. ஸுசரிதஸுத்தங் • 2. Sucaritasuttaṃ
3-12. ஸீதவலாஹகதா³னூபகாரஸுத்தத³ஸகங் • 3-12. Sītavalāhakadānūpakārasuttadasakaṃ
13-52. உண்ஹவலாஹகதா³னூபகாரஸுத்தசாலீஸகங் • 13-52. Uṇhavalāhakadānūpakārasuttacālīsakaṃ
53. ஸீதவலாஹகஸுத்தங் • 53. Sītavalāhakasuttaṃ
54. உண்ஹவலாஹகஸுத்தங் • 54. Uṇhavalāhakasuttaṃ
55. அப்³ப⁴வலாஹகஸுத்தங் • 55. Abbhavalāhakasuttaṃ
56. வாதவலாஹகஸுத்தங் • 56. Vātavalāhakasuttaṃ
57. வஸ்ஸவலாஹகஸுத்தங் • 57. Vassavalāhakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 11. வலாஹகஸங்யுத்தவண்ணனா • 11. Valāhakasaṃyuttavaṇṇanā
