| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១១. វលាហកសំយុត្តវណ្ណនា
11. Valāhakasaṃyuttavaṇṇanā
៥៥០-៦០៦. លោកំ វាលេន្តា សំវរន្តា ឆាទេន្តា អហន្តិ បរិយេសន្តីតិ វលាហា, ទេវបុត្តា។ តេសំ សមូហោ វលាហកទេវកាយោតិ អាហ ‘‘វលាហកកាយិកា’’តិអាទិ។ សីតករណវលាហកាតិ សីតហរណវលាហកា។ សេសបទេសូតិ ឧណ្ហវលាហកាទិបទេសុ។ ឯសេវ នយោតិ ‘‘ឧណ្ហករណវលាហកា’’តិអាទិនា អត្ថោ វេទិតព្ពោ។ ចិត្តដ្ឋបនន្តិ ‘‘សីតំ ហោតូ’’តិ ឯវំ ចិត្តស្ស ឧប្បាទនំ។ វស្សានេតិ វស្សកាលេ។ ឧតុសមុដ្ឋានមេវាតិ បាកតិកសីតមេវាតិ អត្ថោ។ ឧណ្ហេបីតិ ឧណ្ហកាលេ។ អព្ភមណ្ឌបោតិ មណ្ឌបសទិសអព្ភបដលវិតានមាហ។ អព្ភំ ឧប្បជ្ជតីតិ តហំ តហំ បដលំ ឧដ្ឋហតិ។ អព្ភេយេវាតិ អព្ភកាលេ ឯវ, វស្សានេតិ អត្ថោ។ អតិអព្ភន្តិ សតបដលសហស្សបដលំ ហុត្វា អព្ភុដ្ឋានំ។ ចិត្តវេសាខមាសេសូតិ វសន្តកាលំ សន្ធាយាហ។ តទា ហិ វិទ្ធោ វិគតវលាហកោ ទេវោ ភវិតុំ យុត្តោ។ ឧត្តរទក្ខិណាទីតិ អាទិ-សទ្ទេន បច្ឆិមវាតាទិំ សង្គណ្ហាតិ។ បកតិវាតោតិ បកតិយា សភាវេន វាយនកវាតោ។ តំ ឧតុសមុដ្ឋានមេវាតិ អាហារូបជីវីនំ សត្តានំ សាធារណកម្មូបនិស្សយឧតុសមុដ្ឋានមេវ។ ឯស នយោ ឧតុសមុដ្ឋានសីតុណ្ហវាតេសុបិ។ តម្បិ ហិ អាហារូបជីវីនំ សត្តានំ សាធារណកម្មូបនិស្សយមេវាតិ។
550-606. Lokaṃ vālentā saṃvarantā chādentā ahanti pariyesantīti valāhā, devaputtā. Tesaṃ samūho valāhakadevakāyoti āha ‘‘valāhakakāyikā’’tiādi. Sītakaraṇavalāhakāti sītaharaṇavalāhakā. Sesapadesūti uṇhavalāhakādipadesu. Eseva nayoti ‘‘uṇhakaraṇavalāhakā’’tiādinā attho veditabbo. Cittaṭṭhapananti ‘‘sītaṃ hotū’’ti evaṃ cittassa uppādanaṃ. Vassāneti vassakāle. Utusamuṭṭhānamevāti pākatikasītamevāti attho. Uṇhepīti uṇhakāle. Abbhamaṇḍapoti maṇḍapasadisaabbhapaṭalavitānamāha. Abbhaṃ uppajjatīti tahaṃ tahaṃ paṭalaṃ uṭṭhahati. Abbheyevāti abbhakāle eva, vassāneti attho. Atiabbhanti satapaṭalasahassapaṭalaṃ hutvā abbhuṭṭhānaṃ. Cittavesākhamāsesūti vasantakālaṃ sandhāyāha. Tadā hi viddho vigatavalāhako devo bhavituṃ yutto. Uttaradakkhiṇādīti ādi-saddena pacchimavātādiṃ saṅgaṇhāti. Pakativātoti pakatiyā sabhāvena vāyanakavāto. Taṃ utusamuṭṭhānamevāti āhārūpajīvīnaṃ sattānaṃ sādhāraṇakammūpanissayautusamuṭṭhānameva. Esa nayo utusamuṭṭhānasītuṇhavātesupi. Tampi hi āhārūpajīvīnaṃ sattānaṃ sādhāraṇakammūpanissayamevāti.
គីតន្តិ មេឃគីតំ។ សច្ចកិរិយាយាតិ តាទិសានំ បុរិសវិសេសានំ សច្ចាធិដ្ឋានេន។ ឥទ្ធិពលេនាតិ ឥទ្ធិមន្តានំ ឥទ្ធិអានុភាវេន។ វិនាសមេឃេនាតិ កប្បវិនាសកមេឃេន។ អញ្ញេនបិ កណ្ហបាបិកសត្តានំ បាបកម្មបច្ចយា ឧប្បន្នវិនាសមេឃេន វុដ្ឋេន សោ សោ ទេសោ វិនស្សតេវ។
Gītanti meghagītaṃ. Saccakiriyāyāti tādisānaṃ purisavisesānaṃ saccādhiṭṭhānena. Iddhibalenāti iddhimantānaṃ iddhiānubhāvena. Vināsameghenāti kappavināsakameghena. Aññenapi kaṇhapāpikasattānaṃ pāpakammapaccayā uppannavināsameghena vuṭṭhena so so deso vinassateva.
វលាហកសំយុត្តវណ្ណនា និដ្ឋិតា។
Valāhakasaṃyuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
១. សុទ្ធិកសុត្តំ • 1. Suddhikasuttaṃ
២. សុចរិតសុត្តំ • 2. Sucaritasuttaṃ
៣-១២. សីតវលាហកទានូបការសុត្តទសកំ • 3-12. Sītavalāhakadānūpakārasuttadasakaṃ
១៣-៥២. ឧណ្ហវលាហកទានូបការសុត្តចាលីសកំ • 13-52. Uṇhavalāhakadānūpakārasuttacālīsakaṃ
៥៣. សីតវលាហកសុត្តំ • 53. Sītavalāhakasuttaṃ
៥៤. ឧណ្ហវលាហកសុត្តំ • 54. Uṇhavalāhakasuttaṃ
៥៥. អព្ភវលាហកសុត្តំ • 55. Abbhavalāhakasuttaṃ
៥៦. វាតវលាហកសុត្តំ • 56. Vātavalāhakasuttaṃ
៥៧. វស្សវលាហកសុត្តំ • 57. Vassavalāhakasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១១. វលាហកសំយុត្តវណ្ណនា • 11. Valāhakasaṃyuttavaṇṇanā
