| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၁. ဝလာဟကသံယုတ္တဝဏ္ဏနာ
11. Valāhakasaṃyuttavaṇṇanā
၅၅၀-၆၀၆. ဝလာဟကသံယုတ္တေ ဝလာဟကကာယိကာတိ ဝလာဟကနာမကေ ဒေဝကာယေ ဥပ္ပန္နာ အာကာသစာရိကဒေဝာ။ သီတဝလာဟကာတိ သီတကရဏဝလာဟကာ။ သေသပဒေသုပိ ဧသေဝ နယော။ စေတောပဏိဓိမန္ဝာယာတိ စိတ္တဋ္ဌပနံ အာဂမ္မ။ သီတံ ဟောတီတိ ယံ ဝသ္သာနေ ဝာ ဟေမန္တေ ဝာ သီတံ ဟောတိ, တံ ဥတုသမုဋ္ဌာနမေဝ။ ယံ ပန သီတေပိ အတိသီတံ, ဂိမ္ဟေ စ ဥပ္ပန္နံ သီတံ, တံ ဒေဝတာနုဘာဝေန နိဗ္ဗတ္တံ သီတံ နာမ။ ဥဏ္ဟံ ဟောတီတိ ယံ ဂိမ္ဟာနေ ဥဏ္ဟံ, တံ ဥတုသမုဋ္ဌာနိကံ ပာကတိကမေဝ။ ယံ ပန ဥဏ္ဟေပိ အတိဥဏ္ဟံ, သီတကာလေ စ ဥပ္ပန္နံ ဥဏ္ဟံ, တံ ဒေဝတာနုဘာဝေန နိဗ္ဗတ္တံ ဥဏ္ဟံ နာမ။ အဗ္ဘံ ဟောတီတိ အဗ္ဘမဏ္ဍပော ဟောတိ။ ဣဓာပိ ယံ ဝသ္သာနေ စ သိသိရေ စ အဗ္ဘံ ဥပ္ပဇ္ဇတိ, တံ ဥတုသမုဋ္ဌာနိကံ ပာကတိကမေဝ။ ယံ ပန အဗ္ဘေယေဝ အတိအဗ္ဘံ, သတ္တသတ္တာဟမ္ပိ စန္ဒသူရိယေ ဆာဒေတ္ဝာ ဧကန္ဓကာရံ ကရောတိ, ယဉ္စ စိတ္တဝေသာခမာသေသု အဗ္ဘံ, တံ ဒေဝတာနုဘာဝေန ဥပ္ပန္နံ အဗ္ဘံ နာမ။ ဝာတော ဟောတီတိ ယော တသ္မိံ တသ္မိံ ဥတုမ္ဟိ ဥတ္တရဒက္ခိဏာဒိပကတိဝာတော ဟောတိ, အယံ ဥတုသမုဋ္ဌာနောဝ။ ယောပိ ပန ရုက္ခက္ခန္ဓာဒိပဒာလနော အတိဝာတော နာမ အတ္ထိ, အယဉ္စေဝ, ယော စ အညောပိ အကာလဝာတော, အယံ ဒေဝတာနုဘာဝနိဗ္ဗတ္တော နာမ။ ဒေဝော ဝသ္သတီတိ ယံ ဝသ္သိကေ စတ္တာရော မာသေ ဝသ္သံ, တံ ဥတုသမုဋ္ဌာနမေဝ။ ယံ ပန ဝသ္သေယေဝ အတိဝသ္သံ, ယဉ္စ စိတ္တဝေသာခမာသေသု ဝသ္သံ, တံ ဒေဝတာနုဘာဝနိဗ္ဗတ္တံ နာမ။
550-606. Valāhakasaṃyutte valāhakakāyikāti valāhakanāmake devakāye uppannā ākāsacārikadevā. Sītavalāhakāti sītakaraṇavalāhakā. Sesapadesupi eseva nayo. Cetopaṇidhimanvāyāti cittaṭṭhapanaṃ āgamma. Sītaṃ hotīti yaṃ vassāne vā hemante vā sītaṃ hoti, taṃ utusamuṭṭhānameva. Yaṃ pana sītepi atisītaṃ, gimhe ca uppannaṃ sītaṃ, taṃ devatānubhāvena nibbattaṃ sītaṃ nāma. Uṇhaṃ hotīti yaṃ gimhāne uṇhaṃ, taṃ utusamuṭṭhānikaṃ pākatikameva. Yaṃ pana uṇhepi atiuṇhaṃ, sītakāle ca uppannaṃ uṇhaṃ, taṃ devatānubhāvena nibbattaṃ uṇhaṃ nāma. Abbhaṃ hotīti abbhamaṇḍapo hoti. Idhāpi yaṃ vassāne ca sisire ca abbhaṃ uppajjati, taṃ utusamuṭṭhānikaṃ pākatikameva. Yaṃ pana abbheyeva atiabbhaṃ, sattasattāhampi candasūriye chādetvā ekandhakāraṃ karoti, yañca cittavesākhamāsesu abbhaṃ, taṃ devatānubhāvena uppannaṃ abbhaṃ nāma. Vāto hotīti yo tasmiṃ tasmiṃ utumhi uttaradakkhiṇādipakativāto hoti, ayaṃ utusamuṭṭhānova. Yopi pana rukkhakkhandhādipadālano ativāto nāma atthi, ayañceva, yo ca aññopi akālavāto, ayaṃ devatānubhāvanibbatto nāma. Devo vassatīti yaṃ vassike cattāro māse vassaṃ, taṃ utusamuṭṭhānameva. Yaṃ pana vasseyeva ativassaṃ, yañca cittavesākhamāsesu vassaṃ, taṃ devatānubhāvanibbattaṃ nāma.
တတ္ရိဒံ ဝတ္ထု – ဧကော ကိရ ဝသ္သဝလာဟကဒေဝပုတ္တော တလကူဋကဝာသိ ခီဏာသဝတ္ထေရသ္သ သန္တိကံ ဂန္တ္ဝာ ဝန္ဒိတ္ဝာ အဋ္ဌာသိ။ ထေရော ‘‘ကောသိ တ္ဝ’’န္တိ ပုစ္ဆိ။ ‘‘အဟံ, ဘန္တေ, ဝသ္သဝလာဟကဒေဝပုတ္တော’’တိ။ ‘‘တုမ္ဟာကံ ကိရ စိတ္တေန ဒေဝော ဝသ္သတီ’’တိ? ‘‘အာမ, ဘန္တေ’’တိ။ ‘‘ပသ္သိတုကာမာ မယ’’န္တိ ။ ‘‘တေမိသ္သထ, ဘန္တေ’’တိ။ ‘‘မေဃသီသံ ဝာ ဂဇ္ဇိတံ ဝာ န ပညာယတိ, ကထံ တေမိသ္သာမာ’’တိ? ‘‘ဘန္တေ, အမ္ဟာကံစိတ္တေန ဒေဝော ဝသ္သတိ, တုမ္ဟေ ပဏ္ဏသာလံ ပဝိသထာ’’တိ ။ ‘‘သာဓု ဒေဝပုတ္တာ’’တိ သော ပာဒေ ဓောဝိတ္ဝာ ပဏ္ဏသာလံ ပာဝိသိ။ ဒေဝပုတ္တော တသ္မိံ ပဝိသန္တေယေဝ ဧကံ ဂီတံ ဂာယိတ္ဝာ ဟတ္ထံ ဥက္ခိပိ။ သမန္တာ တိယောဇနဋ္ဌာနံ ဧကမေဃံ အဟောသိ။ ထေရော အဒ္ဓတိန္တော ပဏ္ဏသာလံ ပဝိဋ္ဌောတိ။ အပိစ ဒေဝော နာမေသ အဋ္ဌဟိ ကာရဏေဟိ ဝသ္သတိ နာဂာနုဘာဝေန သုပဏ္ဏာနုဘာဝေန ဒေဝတာနုဘာဝေန သစ္စကိရိယာယ ဥတုသမုဋ္ဌာနေန မာရာဝဋ္ဋနေန ဣဒ္ဓိဗလေန ဝိနာသမေဃေနာတိ။
Tatridaṃ vatthu – eko kira vassavalāhakadevaputto talakūṭakavāsi khīṇāsavattherassa santikaṃ gantvā vanditvā aṭṭhāsi. Thero ‘‘kosi tva’’nti pucchi. ‘‘Ahaṃ, bhante, vassavalāhakadevaputto’’ti. ‘‘Tumhākaṃ kira cittena devo vassatī’’ti? ‘‘Āma, bhante’’ti. ‘‘Passitukāmā maya’’nti . ‘‘Temissatha, bhante’’ti. ‘‘Meghasīsaṃ vā gajjitaṃ vā na paññāyati, kathaṃ temissāmā’’ti? ‘‘Bhante, amhākaṃcittena devo vassati, tumhe paṇṇasālaṃ pavisathā’’ti . ‘‘Sādhu devaputtā’’ti so pāde dhovitvā paṇṇasālaṃ pāvisi. Devaputto tasmiṃ pavisanteyeva ekaṃ gītaṃ gāyitvā hatthaṃ ukkhipi. Samantā tiyojanaṭṭhānaṃ ekameghaṃ ahosi. Thero addhatinto paṇṇasālaṃ paviṭṭhoti. Apica devo nāmesa aṭṭhahi kāraṇehi vassati nāgānubhāvena supaṇṇānubhāvena devatānubhāvena saccakiriyāya utusamuṭṭhānena mārāvaṭṭanena iddhibalena vināsameghenāti.
ဝလာဟကသံယုတ္တဝဏ္ဏနာ နိဋ္ဌိတာ။
Valāhakasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၁. သုဒ္ဓိကသုတ္တံ • 1. Suddhikasuttaṃ
၂. သုစရိတသုတ္တံ • 2. Sucaritasuttaṃ
၃-၁၂. သီတဝလာဟကဒာနူပကာရသုတ္တဒသကံ • 3-12. Sītavalāhakadānūpakārasuttadasakaṃ
၁၃-၅၂. ဥဏ္ဟဝလာဟကဒာနူပကာရသုတ္တစာလီသကံ • 13-52. Uṇhavalāhakadānūpakārasuttacālīsakaṃ
၅၃. သီတဝလာဟကသုတ္တံ • 53. Sītavalāhakasuttaṃ
၅၄. ဥဏ္ဟဝလာဟကသုတ္တံ • 54. Uṇhavalāhakasuttaṃ
၅၅. အဗ္ဘဝလာဟကသုတ္တံ • 55. Abbhavalāhakasuttaṃ
၅၆. ဝာတဝလာဟကသုတ္တံ • 56. Vātavalāhakasuttaṃ
၅၇. ဝသ္သဝလာဟကသုတ္တံ • 57. Vassavalāhakasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၁. ဝလာဟကသံယုတ္တဝဏ္ဏနာ • 11. Valāhakasaṃyuttavaṇṇanā
