| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[196] 6. валаахагассаж̇аад̇агаван̣н̣анаа
[196] 6. Valāhakassajātakavaṇṇanā
яз на гааханд̇и оваад̣̇анд̇и ид̣̇ам̣ сад̇т̇аа ж̇зд̇аванз вихаранд̇о згам̣ угган̣тид̇абхигкум̣ аараб̣бха гат̇зси. со хи бхигку сад̇т̇аараа ‘‘сажжам̣ гира д̇вам̣, бхигку, угган̣тид̇осий’’д̇и будто ‘‘сажжа’’нд̇и вад̇ваа ‘‘гим̣ гааран̣аа’’д̇и вуд̇д̇з ‘‘згам̣ алан̇гад̇ам̣ маад̇уг̇аамам̣ д̣̇исваа гилзсавасзнаа’’д̇и ааха. ат̇а нам̣ сад̇т̇аа ‘‘ид̇т̇ияо наамзд̇аа бхигку ад̇д̇ано руубасад̣̇д̣̇аг̇анд̇харасаподтаб̣б̣зхи жзва ид̇т̇игуд̇д̇авилаасзхи жа бурисз балобхзд̇ваа ад̇д̇ано васз гад̇ваа васам̣ убаг̇ад̇абхаавам̣ н̃ад̇ваа сийлавинаасан̃жзва д̇ханавинаасан̃жа баабанадтзна ‘яагкинияо’д̇и вужжанд̇и. буб̣б̣зби хи яагкинияо ид̇т̇игуд̇д̇зна згам̣ бурисасад̇т̇ам̣ убасан̇гамид̇ваа ваан̣иж̇з балобхзд̇ваа ад̇д̇ано васз гад̇ваа буна ан̃н̃з бурисз д̣̇исваа д̇з саб̣б̣зби ж̇ийвид̇агкаяам̣ баабзд̇ваа убхохи ханугабассзхи лохид̇зна баг̇гхаранд̇зна мукам̣ буураабзд̇ваа каад̣̇им̣суу’’д̇и вад̇ваа ад̇ийд̇ам̣ аахари.
Ye na kāhanti ovādanti idaṃ satthā jetavane viharanto ekaṃ ukkaṇṭhitabhikkhuṃ ārabbha kathesi. So hi bhikkhu satthārā ‘‘saccaṃ kira tvaṃ, bhikkhu, ukkaṇṭhitosī’’ti puṭṭho ‘‘sacca’’nti vatvā ‘‘kiṃ kāraṇā’’ti vutte ‘‘ekaṃ alaṅkataṃ mātugāmaṃ disvā kilesavasenā’’ti āha. Atha naṃ satthā ‘‘itthiyo nāmetā bhikkhu attano rūpasaddagandharasaphoṭṭhabbehi ceva itthikuttavilāsehi ca purise palobhetvā attano vase katvā vasaṃ upagatabhāvaṃ ñatvā sīlavināsañceva dhanavināsañca pāpanaṭṭhena ‘yakkhiniyo’ti vuccanti. Pubbepi hi yakkhiniyo itthikuttena ekaṃ purisasatthaṃ upasaṅkamitvā vāṇije palobhetvā attano vase katvā puna aññe purise disvā te sabbepi jīvitakkhayaṃ pāpetvā ubhohi hanukapassehi lohitena paggharantena mukhaṃ pūrāpetvā khādiṃsū’’ti vatvā atītaṃ āhari.
ад̇ийд̇з д̇амб̣абан̣н̣ид̣̇ийбз сирийсавад̇т̇у наама яагканаг̇арам̣ ахоси, д̇ад̇т̇а яагкинияо васим̣су. д̇аа бхиннанааваанам̣ ваан̣иж̇аанам̣ ааг̇ад̇агаалз алан̇гад̇абадияад̇д̇аа каад̣̇анийяабхож̇анийяам̣ г̇аахаабзд̇ваа д̣̇аасиг̇ан̣абаривуд̇аа д̣̇аарагз ан̇гзнаад̣̇ааяа ваан̣иж̇з убасан̇гаманд̇и. д̇зсам̣ ‘‘мануссааваасам̣ ааг̇ад̇амхаа’’д̇и сан̃ж̇аананад̇т̇ам̣ д̇ад̇т̇а д̇ад̇т̇а гасиг̇орагкаад̣̇ийни гаронд̇з мануссз г̇ог̇ан̣з сунакзд̇и звамаад̣̇ийни д̣̇ассзнд̇и, ваан̣иж̇аанам̣ санд̇игам̣ г̇анд̇ваа ‘‘имам̣ яааг̇ум̣ биват̇а, бхад̇д̇ам̣ бхун̃ж̇ат̇а, каад̣̇анийяам̣ каад̣̇ат̇аа’’д̇и вад̣̇анд̇и. ваан̣иж̇аа аж̇аананд̇аа д̇аахи д̣̇иннам̣ барибхун̃ж̇анд̇и. ат̇а д̇зсам̣ каад̣̇ид̇ваа бхун̃ж̇ид̇ваа бивид̇ваа виссамид̇агаалз бадисант̇аарам̣ гаронд̇и, ‘‘д̇умхз гад̇т̇а ваасигаа, гуд̇о ааг̇ад̇аа, гахам̣ г̇ажчиссат̇а, гзна гаммзна ид̇хааг̇ад̇ад̇т̇аа’’д̇и бужчанд̇и. ‘‘бхиннанааваа худ̇ваа ид̇хааг̇ад̇амхаа’’д̇и вуд̇д̇з ‘‘саад̇ху, аяяаа, амхаагамби саамигаанам̣ наавам̣ абхирухид̇ваа г̇ад̇аанам̣ д̇ийн̣и сам̣важчараани ад̇игганд̇аани, д̇з мад̇аа бхависсанд̇и; д̇умхзби ваан̣иж̇ааязва, маяам̣ д̇умхаагам̣ баад̣̇абарижааригаа бхависсаамаа’’д̇и вад̇ваа д̇з ваан̣иж̇з ид̇т̇игуд̇д̇ахаавабхаававилаасзхи балобхзд̇ваа яагканаг̇арам̣ нзд̇ваа сажз батамаг̇ахид̇аа мануссаа ад̇т̇и, д̇з д̣̇звасан̇калигааяа б̣анд̇хид̇ваа гааран̣агхарз багкибанд̇и , ад̇д̇ано васанадтаанз бхиннанаавз мануссз алабханд̇ияо бана барад̇о галяаан̣им̣ орад̇о нааг̇ад̣̇ийбанд̇и звам̣ самуд̣̇д̣̇ад̇ийрам̣ анусан̃жаранд̇и. аяам̣ д̇аасам̣ д̇хаммад̇аа.
Atīte tambapaṇṇidīpe sirīsavatthu nāma yakkhanagaraṃ ahosi, tattha yakkhiniyo vasiṃsu. Tā bhinnanāvānaṃ vāṇijānaṃ āgatakāle alaṅkatapaṭiyattā khādanīyabhojanīyaṃ gāhāpetvā dāsigaṇaparivutā dārake aṅkenādāya vāṇije upasaṅkamanti. Tesaṃ ‘‘manussāvāsaṃ āgatamhā’’ti sañjānanatthaṃ tattha tattha kasigorakkhādīni karonte manusse gogaṇe sunakheti evamādīni dassenti, vāṇijānaṃ santikaṃ gantvā ‘‘imaṃ yāguṃ pivatha, bhattaṃ bhuñjatha, khādanīyaṃ khādathā’’ti vadanti. Vāṇijā ajānantā tāhi dinnaṃ paribhuñjanti. Atha tesaṃ khāditvā bhuñjitvā pivitvā vissamitakāle paṭisanthāraṃ karonti, ‘‘tumhe kattha vāsikā, kuto āgatā, kahaṃ gacchissatha, kena kammena idhāgatatthā’’ti pucchanti. ‘‘Bhinnanāvā hutvā idhāgatamhā’’ti vutte ‘‘sādhu, ayyā, amhākampi sāmikānaṃ nāvaṃ abhiruhitvā gatānaṃ tīṇi saṃvaccharāni atikkantāni, te matā bhavissanti; tumhepi vāṇijāyeva, mayaṃ tumhākaṃ pādaparicārikā bhavissāmā’’ti vatvā te vāṇije itthikuttahāvabhāvavilāsehi palobhetvā yakkhanagaraṃ netvā sace paṭhamagahitā manussā atthi, te devasaṅkhalikāya bandhitvā kāraṇaghare pakkhipanti , attano vasanaṭṭhāne bhinnanāve manusse alabhantiyo pana parato kalyāṇiṃ orato nāgadīpanti evaṃ samuddatīraṃ anusañcaranti. Ayaṃ tāsaṃ dhammatā.
ат̇згад̣̇ивасам̣ бан̃жасад̇аа бхиннанааваа ваан̣иж̇аа д̇аасам̣ наг̇арасамийбз уд̇д̇арим̣су. д̇аа д̇зсам̣ санд̇игам̣ г̇анд̇ваа балобхзд̇ваа яагканаг̇арам̣ нзд̇ваа батамам̣ г̇ахид̇з мануссз д̣̇звасан̇калигааяа б̣анд̇хид̇ваа гааран̣агхарз багкибид̇ваа ж̇здтаяагкиний ж̇здтагаваан̣иж̇ам̣, сзсаа сзсзд̇и д̇аа бан̃жасад̇аа яагкинияо д̇з бан̃жасад̇з ваан̣иж̇з ад̇д̇ано саамигз агам̣су. ат̇а саа ж̇здтаяагкиний рад̇д̇ибхааг̇з ваан̣иж̇з нид̣̇д̣̇ам̣ убаг̇ад̇з удтааяа г̇анд̇ваа гааран̣агхарз мануссз маарзд̇ваа мам̣сам̣ каад̣̇ид̇ваа ааг̇ажчад̇и, сзсааби д̇ат̇зва гаронд̇и. ж̇здтаяагкинияаа мануссамам̣сам̣ каад̣̇ид̇ваа ааг̇ад̇агаалз сарийрам̣ сийд̇алам̣ ход̇и. ж̇здтаваан̣иж̇о бариг̇г̇ан̣ханд̇о д̇ассаа яагкинибхаавам̣ н̃ад̇ваа ‘‘имаа бан̃жасад̇аа яагкинияо бхависсанд̇и, амхзхи балааяид̇ум̣ ваддад̇ий’’д̇и бунад̣̇ивасз баад̇ова мукад̇хованад̇т̇ааяа г̇анд̇ваа сзсаваан̣иж̇аанам̣ аарожзси – ‘‘имаа яагкинияо, на мануссид̇т̇ияо, ан̃н̃зсам̣ бхиннанааваанам̣ ааг̇ад̇агаалз д̇з саамигз гад̇ваа амхзби каад̣̇иссанд̇и, зт̇а ид̇о балааяиссаамаа’’д̇и д̇зсу бан̃жасад̇зсу ад̣дхад̇зяяасад̇аа ‘‘на маяам̣ зд̇аа виж̇ахид̇ум̣ сагкиссаама, д̇умхз г̇ажчат̇а, маяам̣ на балааяиссаамаа’’д̇и аахам̣су. ж̇здтаваан̣иж̇о ад̇д̇ано важанагаарз ад̣дхад̇зяяасад̇з г̇ахзд̇ваа д̇аасам̣ бхийд̇о балааяи.
Athekadivasaṃ pañcasatā bhinnanāvā vāṇijā tāsaṃ nagarasamīpe uttariṃsu. Tā tesaṃ santikaṃ gantvā palobhetvā yakkhanagaraṃ netvā paṭhamaṃ gahite manusse devasaṅkhalikāya bandhitvā kāraṇaghare pakkhipitvā jeṭṭhayakkhinī jeṭṭhakavāṇijaṃ, sesā seseti tā pañcasatā yakkhiniyo te pañcasate vāṇije attano sāmike akaṃsu. Atha sā jeṭṭhayakkhinī rattibhāge vāṇije niddaṃ upagate uṭṭhāya gantvā kāraṇaghare manusse māretvā maṃsaṃ khāditvā āgacchati, sesāpi tatheva karonti. Jeṭṭhayakkhiniyā manussamaṃsaṃ khāditvā āgatakāle sarīraṃ sītalaṃ hoti. Jeṭṭhavāṇijo pariggaṇhanto tassā yakkhinibhāvaṃ ñatvā ‘‘imā pañcasatā yakkhiniyo bhavissanti, amhehi palāyituṃ vaṭṭatī’’ti punadivase pātova mukhadhovanatthāya gantvā sesavāṇijānaṃ ārocesi – ‘‘imā yakkhiniyo, na manussitthiyo, aññesaṃ bhinnanāvānaṃ āgatakāle te sāmike katvā amhepi khādissanti, etha ito palāyissāmā’’ti tesu pañcasatesu aḍḍhateyyasatā ‘‘na mayaṃ etā vijahituṃ sakkhissāma, tumhe gacchatha, mayaṃ na palāyissāmā’’ti āhaṃsu. Jeṭṭhavāṇijo attano vacanakāre aḍḍhateyyasate gahetvā tāsaṃ bhīto palāyi.
д̇асмим̣ бана гаалз б̣од̇хисад̇д̇о валаахагассаяонияам̣ ниб̣б̣ад̇д̇и, саб̣б̣асзд̇о гаал̣асийсо мун̃ж̇агзсо ид̣̇д̇химаа взхаасан̇г̇амо ахоси. со химаванд̇ад̇о аагаасз уббад̇ид̇ваа д̇амб̣абан̣н̣ид̣̇ийбам̣ г̇анд̇ваа д̇ад̇т̇а д̇амб̣абан̣н̣исарз баллалз саяам̣ж̇аад̇асаалим̣ каад̣̇ид̇ваа г̇ажчад̇и. звам̣ г̇ажчанд̇о жа ‘‘ж̇анабад̣̇ам̣ г̇анд̇угаамаа ад̇т̇ий’’д̇и д̇игкад̇д̇ум̣ гарун̣аабарибхаавид̇ам̣ маанусим̣ ваажам̣ бхаасад̇и. д̇з б̣од̇хисад̇д̇асса важанам̣ суд̇ваа убасан̇гамид̇ваа ан̃ж̇алим̣ баг̇г̇аяха ‘‘саами, маяам̣ ж̇анабад̣̇ам̣ г̇амиссаамаа’’д̇и аахам̣су. д̇зна хи маяхам̣ бидтим̣ абхирухат̇аад̇и. аббзгажжз абхирухим̣су, д̇зсу згажжз ваалад̇хим̣ г̇ан̣хим̣су, згажжз ан̃ж̇алим̣ баг̇г̇ахзд̇ваа адтам̣суязва. б̣од̇хисад̇д̇о анд̇амасо ан̃ж̇алим̣ баг̇г̇ахзд̇ваа тид̇з саб̣б̣зби д̇з ад̣дхад̇зяяасад̇з ваан̣иж̇з ад̇д̇ано аанубхаавзна ж̇анабад̣̇ам̣ нзд̇ваа сагасагадтаанзсу бад̇идтабзд̇ваа ад̇д̇ано васанадтаанам̣ ааг̇амааси. д̇ааби ко яагкинияо ан̃н̃зсам̣ ааг̇ад̇агаалз д̇ад̇т̇а охийнагз ад̣дхад̇зяяасад̇з мануссз вад̇хид̇ваа каад̣̇им̣су.
Tasmiṃ pana kāle bodhisatto valāhakassayoniyaṃ nibbatti, sabbaseto kāḷasīso muñjakeso iddhimā vehāsaṅgamo ahosi. So himavantato ākāse uppatitvā tambapaṇṇidīpaṃ gantvā tattha tambapaṇṇisare pallale sayaṃjātasāliṃ khāditvā gacchati. Evaṃ gacchanto ca ‘‘janapadaṃ gantukāmā atthī’’ti tikkhattuṃ karuṇāparibhāvitaṃ mānusiṃ vācaṃ bhāsati. Te bodhisattassa vacanaṃ sutvā upasaṅkamitvā añjaliṃ paggayha ‘‘sāmi, mayaṃ janapadaṃ gamissāmā’’ti āhaṃsu. Tena hi mayhaṃ piṭṭhiṃ abhiruhathāti. Appekacce abhiruhiṃsu, tesu ekacce vāladhiṃ gaṇhiṃsu, ekacce añjaliṃ paggahetvā aṭṭhaṃsuyeva. Bodhisatto antamaso añjaliṃ paggahetvā ṭhite sabbepi te aḍḍhateyyasate vāṇije attano ānubhāvena janapadaṃ netvā sakasakaṭṭhānesu patiṭṭhapetvā attano vasanaṭṭhānaṃ āgamāsi. Tāpi kho yakkhiniyo aññesaṃ āgatakāle tattha ohīnake aḍḍhateyyasate manusse vadhitvā khādiṃsu.
сад̇т̇аа бхигкуу ааманд̇зд̇ваа ‘‘бхигкавз, яат̇аа д̇з яагкинийнам̣ васам̣ г̇ад̇аа ваан̣иж̇аа ж̇ийвид̇агкаяам̣ бад̇д̇аа, валаахагассарааж̇асса важанагараа ваан̣иж̇аа сагасагадтаанзсу бад̇идтид̇аа, звамзва б̣уд̣̇д̇хаанам̣ оваад̣̇ам̣ агаронд̇аа бхигкууби бхигкунияоби убаасагааби убаасигааяоби жад̇уусу абааязсу бан̃жавид̇хаб̣анд̇ханагаммагаран̣адтаанаад̣̇ийсу махаад̣̇угкам̣ баабун̣анд̇и. оваад̣̇агараа бана д̇иссо гуласамбад̇д̇ияо жа ча гаамасаг̇г̇з вийсад̇и б̣рахмалогзд̇и имаани жа таанаани бад̇ваа амад̇амахааниб̣б̣аанам̣ сажчигад̇ваа маханд̇ам̣ сукам̣ анубхаванд̇ий’’д̇и вад̇ваа абхисамб̣уд̣̇д̇хо худ̇ваа имаа г̇аат̇аа авожа –
Satthā bhikkhū āmantetvā ‘‘bhikkhave, yathā te yakkhinīnaṃ vasaṃ gatā vāṇijā jīvitakkhayaṃ pattā, valāhakassarājassa vacanakarā vāṇijā sakasakaṭṭhānesu patiṭṭhitā, evameva buddhānaṃ ovādaṃ akarontā bhikkhūpi bhikkhuniyopi upāsakāpi upāsikāyopi catūsu apāyesu pañcavidhabandhanakammakaraṇaṭṭhānādīsu mahādukkhaṃ pāpuṇanti. Ovādakarā pana tisso kulasampattiyo ca cha kāmasagge vīsati brahmaloketi imāni ca ṭhānāni patvā amatamahānibbānaṃ sacchikatvā mahantaṃ sukhaṃ anubhavantī’’ti vatvā abhisambuddho hutvā imā gāthā avoca –
91.
91.
‘‘яз на гааханд̇и оваад̣̇ам̣, нараа б̣уд̣̇д̇хзна д̣̇зсид̇ам̣;
‘‘Ye na kāhanti ovādaṃ, narā buddhena desitaṃ;
б̣яасанам̣ д̇з г̇амиссанд̇и, рагкасийхива ваан̣иж̇аа.
Byasanaṃ te gamissanti, rakkhasīhiva vāṇijā.
92.
92.
‘‘яз жа гааханд̇и оваад̣̇ам̣, нараа б̣уд̣̇д̇хзна д̣̇зсид̇ам̣;
‘‘Ye ca kāhanti ovādaṃ, narā buddhena desitaṃ;
сод̇т̇им̣ баарам̣ г̇амиссанд̇и, валаахзнзва ваан̣иж̇аа’’д̇и.
Sotthiṃ pāraṃ gamissanti, valāheneva vāṇijā’’ti.
д̇ад̇т̇а яз на гааханд̇ийд̇и яз на гариссанд̇и. б̣яасанам̣ д̇з г̇амиссанд̇ийд̇и д̇з махаавинаасам̣ баабун̣иссанд̇и. рагкасийхива ваан̣иж̇аад̇и рагкасийхи балобхид̇аваан̣иж̇аа вияа. сод̇т̇им̣ баарам̣ г̇амиссанд̇ийд̇и ананд̇арааязна ниб̣б̣аанам̣ баабун̣иссанд̇и. валаахзнзва ваан̣иж̇аад̇и валаахзнзва ‘‘ааг̇ажчат̇аа’’д̇и вуд̇д̇аа д̇асса важанагараа ваан̣иж̇аа вияа. яат̇аа хи д̇з самуд̣̇д̣̇абаарам̣ г̇анд̇ваа сагасагадтаанам̣ аг̇амам̣су, звам̣ б̣уд̣̇д̇хаанам̣ оваад̣̇агараа сам̣саарабаарам̣ ниб̣б̣аанам̣ г̇ажчанд̇ийд̇и амад̇амахааниб̣б̣аанзна д̇хаммад̣̇зсанааяа гуудам̣ г̇ан̣хи.
Tattha ye na kāhantīti ye na karissanti. Byasanaṃ te gamissantīti te mahāvināsaṃ pāpuṇissanti. Rakkhasīhiva vāṇijāti rakkhasīhi palobhitavāṇijā viya. Sotthiṃ pāraṃ gamissantīti anantarāyena nibbānaṃ pāpuṇissanti. Valāheneva vāṇijāti valāheneva ‘‘āgacchathā’’ti vuttā tassa vacanakarā vāṇijā viya. Yathā hi te samuddapāraṃ gantvā sakasakaṭṭhānaṃ agamaṃsu, evaṃ buddhānaṃ ovādakarā saṃsārapāraṃ nibbānaṃ gacchantīti amatamahānibbānena dhammadesanāya kūṭaṃ gaṇhi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси – сажжабарияосаанз угган̣тид̇абхигку сод̇аабад̇д̇ипалз бад̇идтахи, ан̃н̃зби б̣ахуу сод̇аабад̇д̇ипаласагад̣̇ааг̇аамипалаанааг̇аамипалаарахад̇д̇апалаани баабун̣им̣су. ‘‘д̇ад̣̇аа валаахагассарааж̇асса важанагараа ад̣дхад̇зяяасад̇аа ваан̣иж̇аа б̣уд̣̇д̇хабарисаа ахзсум̣, валаахагассарааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi – saccapariyosāne ukkaṇṭhitabhikkhu sotāpattiphale patiṭṭhahi, aññepi bahū sotāpattiphalasakadāgāmiphalaanāgāmiphalaarahattaphalāni pāpuṇiṃsu. ‘‘Tadā valāhakassarājassa vacanakarā aḍḍhateyyasatā vāṇijā buddhaparisā ahesuṃ, valāhakassarājā pana ahameva ahosi’’nti.
валаахагассаж̇аад̇агаван̣н̣анаа чадтаа.
Valāhakassajātakavaṇṇanā chaṭṭhā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 196. валаахагассаж̇аад̇агам̣ • 196. Valāhakassajātakaṃ
