| Library / Tipiṭaka / තිපිටක • Tipiṭaka / අපදානපාළි • Apadānapāḷi |
6. වල්‌ලිඵලදායකත්‌ථෙරඅපදානං
6. Valliphaladāyakattheraapadānaṃ
31.
31.
‘‘සබ්‌බෙ ජනා සමාගම්‌ම, අගමිංසු වනං තදා;
‘‘Sabbe janā samāgamma, agamiṃsu vanaṃ tadā;
ඵලමන්‌වෙසමානා තෙ, අලභිංසු ඵලං තදා.
Phalamanvesamānā te, alabhiṃsu phalaṃ tadā.
32.
32.
‘‘තත්‌ථද්‌දසාසිං සම්‌බුද්‌ධං, සයම්‌භුං අපරාජිතං;
‘‘Tatthaddasāsiṃ sambuddhaṃ, sayambhuṃ aparājitaṃ;
පසන්‌නචිත්‌තො සුමනො, වල්‌ලිඵලමදාසහං.
Pasannacitto sumano, valliphalamadāsahaṃ.
33.
33.
‘‘එකත්‌තිංසෙ ඉතො කප්‌පෙ, යං ඵලමදදිං තදා;
‘‘Ekattiṃse ito kappe, yaṃ phalamadadiṃ tadā;
දුග්‌ගතිං නාභිජානාමි, ඵලදානස්‌සිදං ඵලං.
Duggatiṃ nābhijānāmi, phaladānassidaṃ phalaṃ.
34.
34.
‘‘කිලෙසා ඣාපිතා මය්‌හං…පෙ.… විහරාමි අනාසවො.
‘‘Kilesā jhāpitā mayhaṃ…pe… viharāmi anāsavo.
35.
35.
‘‘ස්‌වාගතං වත මෙ ආසි…පෙ.… කතං බුද්‌ධස්‌ස සාසනං.
‘‘Svāgataṃ vata me āsi…pe… kataṃ buddhassa sāsanaṃ.
36.
36.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා වල්‌ලිඵලදායකො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā valliphaladāyako thero imā gāthāyo abhāsitthāti.
වල්‌ලිඵලදායකත්‌ථෙරස්‌සාපදානං ඡට්‌ඨං.
Valliphaladāyakattherassāpadānaṃ chaṭṭhaṃ.
