| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
4. валлияад̇т̇зраг̇аат̇ааван̣н̣анаа
4. Valliyattheragāthāvaṇṇanā
яам̣ гижжам̣ д̣̇ал̣хавийриязнаад̇иаад̣̇игаа ааяасмад̇о валлияад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз бун̃н̃аани убажинанд̇о сумзд̇хасса бхаг̇авад̇о гаалз б̣раахман̣агулз ниб̣б̣ад̇д̇ид̇ваа вин̃н̃уд̇ам̣ бад̇д̇о виж̇ж̇аасиббзсу нибпад̇д̇им̣ г̇ад̇о асийд̇игодивибхавам̣ бахааяа д̇аабасабаб̣б̣аж̇ж̇ам̣ баб̣б̣аж̇ид̇ваа баб̣б̣ад̇абаад̣̇з аран̃н̃ааяад̇анз згиссаа над̣̇ияаа д̇ийрз ассамам̣ гаарзд̇ваа вихаранд̇о ад̇д̇ано ануг̇г̇ан̣ханад̇т̇ам̣ убаг̇ад̇ам̣ сад̇т̇аарам̣ д̣̇исваа басаннамаанасо аж̇инажаммам̣ бад̇т̇арид̇ваа ад̣̇ааси . д̇ад̇т̇а нисиннам̣ бхаг̇аванд̇ам̣ бубпзхи жа жанд̣̇анзна жа бууж̇зд̇ваа амб̣апалаани д̣̇ад̇ваа бан̃жабад̇идтид̇зна ванд̣̇и. д̇асса бхаг̇аваа нисиннаасанасамбад̇д̇им̣ багаасзнд̇о анумод̣̇анам̣ вад̇ваа баггаами. со д̇зна бун̃н̃агаммзна д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з взсаалияам̣ б̣раахман̣агулз ниб̣б̣ад̇д̇ид̇ваа ‘‘ган̣хамид̇д̇о’’д̇и лад̣̇д̇ханаамо ваяаббад̇д̇о сад̇т̇у взсаалиг̇аманз б̣уд̣̇д̇хаанубхаавам̣ д̣̇исваа бадилад̣̇д̇хасад̣̇д̇хо махаагажжаанад̇т̇зрасса санд̇игз баб̣б̣аж̇и. со манд̣̇абан̃н̃о д̣̇анд̇хабараггамо жа худ̇ваа жирам̣ гаалам̣ вин̃н̃ум̣ саб̣рахмажаарим̣ ниссааязва васад̇и. бхигкуу ‘‘яат̇аа наама валли ругкаад̣̇ийсу гин̃жи аниссааяа вад̣дхид̇ум̣ на саггод̇и, звамаяамби ган̃жи бан̣д̣ид̇ам̣ аниссааяа вад̣дхид̇ум̣ на саггод̇ий’’д̇и валлияод̇взва самуд̣̇аажарим̣су. абарабхааг̇з бана взн̣уд̣̇ад̇д̇ад̇т̇зрам̣ убасан̇гамид̇ваа д̇асса оваад̣̇з тад̇ваа сад̇о самбаж̇аано худ̇ваа вихаранд̇о н̃аан̣асса барибаагам̣ г̇ад̇ад̇д̇аа бадибад̇д̇иггамам̣ т̇зрам̣ бужчанд̇о –
Yaṃkiccaṃ daḷhavīriyenātiādikā āyasmato valliyattherassa gāthā. Kā uppatti? Ayampi purimabuddhesu katādhikāro tattha tattha bhave puññāni upacinanto sumedhassa bhagavato kāle brāhmaṇakule nibbattitvā viññutaṃ patto vijjāsippesu nipphattiṃ gato asītikoṭivibhavaṃ pahāya tāpasapabbajjaṃ pabbajitvā pabbatapāde araññāyatane ekissā nadiyā tīre assamaṃ kāretvā viharanto attano anuggaṇhanatthaṃ upagataṃ satthāraṃ disvā pasannamānaso ajinacammaṃ pattharitvā adāsi . Tattha nisinnaṃ bhagavantaṃ pupphehi ca candanena ca pūjetvā ambaphalāni datvā pañcapatiṭṭhitena vandi. Tassa bhagavā nisinnāsanasampattiṃ pakāsento anumodanaṃ vatvā pakkāmi. So tena puññakammena devamanussesu saṃsaranto imasmiṃ buddhuppāde vesāliyaṃ brāhmaṇakule nibbattitvā ‘‘kaṇhamitto’’ti laddhanāmo vayappatto satthu vesāligamane buddhānubhāvaṃ disvā paṭiladdhasaddho mahākaccānattherassa santike pabbaji. So mandapañño dandhaparakkamo ca hutvā ciraṃ kālaṃ viññuṃ sabrahmacāriṃ nissāyeva vasati. Bhikkhū ‘‘yathā nāma valli rukkhādīsu kiñci anissāya vaḍḍhituṃ na sakkoti, evamayampi kañci paṇḍitaṃ anissāya vaḍḍhituṃ na sakkotī’’ti valliyotveva samudācariṃsu. Aparabhāge pana veṇudattattheraṃ upasaṅkamitvā tassa ovāde ṭhatvā sato sampajāno hutvā viharanto ñāṇassa paripākaṃ gatattā paṭipattikkamaṃ theraṃ pucchanto –
167.
167.
‘‘яам̣ гижжам̣ д̣̇ал̣хавийриязна, яам̣ гижжам̣ б̣од̣̇д̇хумижчад̇аа;
‘‘Yaṃ kiccaṃ daḷhavīriyena, yaṃ kiccaṃ boddhumicchatā;
гариссам̣ наавараж̇жхиссам̣, басса вийрияам̣ бараггамам̣.
Karissaṃ nāvarajjhissaṃ, passa vīriyaṃ parakkamaṃ.
168.
168.
‘‘д̇ван̃жа мз маг̇г̇амагкаахи, ан̃ж̇асам̣ амад̇ог̇ад̇хам̣;
‘‘Tvañca me maggamakkhāhi, añjasaṃ amatogadhaṃ;
ахам̣ монзна мониссам̣, г̇ан̇г̇аасод̇ова сааг̇ара’’нд̇и. – г̇аат̇аад̣̇ваяам̣ абхааси;
Ahaṃ monena monissaṃ, gaṅgāsotova sāgara’’nti. – gāthādvayaṃ abhāsi;
д̇ад̇т̇а яам̣ гижжам̣ д̣̇ал̣хавийриязнаад̇и д̣̇ал̣хзна вийриязна т̇ирзна бараггамзна, д̣̇ал̣хавийриязна ваа бурисад̇хораяхзна яам̣ гижжам̣ гаад̇аб̣б̣ам̣ бадибаж̇ж̇ид̇аб̣б̣ам̣. яам̣ гижжам̣ б̣од̣̇д̇хумижчад̇аад̇и жад̇д̇аари арияасажжаани ниб̣б̣аанамзва ваа б̣од̣̇д̇хум̣ б̣уж̇жхид̇ум̣ ижчанд̇зна бадивиж̇жхид̇угаамзна яам̣ гижжам̣ гаран̣ийяам̣. гариссам̣ наавараж̇жхиссанд̇и д̇амахам̣ д̣̇аани гариссам̣ на вираад̇хзссам̣, яат̇аанусидтам̣ бадибаж̇ж̇иссаами. басса вийрияам̣ бараггаманд̇и яат̇аа бадибаж̇ж̇амаанз д̇хаммз вид̇хинаа ийран̣ад̇о ‘‘вийрияам̣’’, барам̣ барам̣ таанам̣ аггаманад̇о ‘‘бараггамо’’д̇и жа лад̣̇д̇ханаамам̣ саммаавааяаамам̣ басса на сад̣̇д̇хамзваад̇и ад̇д̇ано гад̇д̇угаамад̇ам̣ д̣̇ассзд̇и.
Tattha yaṃ kiccaṃ daḷhavīriyenāti daḷhena vīriyena thirena parakkamena, daḷhavīriyena vā purisadhorayhena yaṃ kiccaṃ kātabbaṃ paṭipajjitabbaṃ. Yaṃ kiccaṃ boddhumicchatāti cattāri ariyasaccāni nibbānameva vā boddhuṃ bujjhituṃ icchantena paṭivijjhitukāmena yaṃ kiccaṃ karaṇīyaṃ. Karissaṃ nāvarajjhissanti tamahaṃ dāni karissaṃ na virādhessaṃ, yathānusiṭṭhaṃ paṭipajjissāmi. Passa vīriyaṃ parakkamanti yathā paṭipajjamāne dhamme vidhinā īraṇato ‘‘vīriyaṃ’’, paraṃ paraṃ ṭhānaṃ akkamanato ‘‘parakkamo’’ti ca laddhanāmaṃ sammāvāyāmaṃ passa na saddhamevāti attano kattukāmataṃ dasseti.
д̇ван̃жаад̇и гаммадтаанад̣̇ааяагам̣ галяаан̣амид̇д̇ам̣ аалабад̇и. мзд̇и маяхам̣. маг̇г̇амагкаахийд̇и арияамаг̇г̇ам̣ гат̇зхи, логуд̇д̇арамаг̇г̇асамбаабагам̣ жад̇усажжагаммадтаанам̣ гат̇зхийд̇и ад̇т̇о. ан̃ж̇асанд̇и уж̇угам̣ маж̇жхимабадибад̣̇аабхаавзна анд̇ад̣̇ваяасса анубаг̇аманад̇о. амад̇з ниб̣б̣аанз самбаабагабхаавзна бад̇идтид̇ад̇д̇аа амад̇ог̇ад̇хам̣. монзнаад̇и н̃аан̣зна маг̇г̇абан̃н̃ааяа. мониссанд̇и ж̇ааниссам̣ ниб̣б̣аанам̣ бадивиж̇жхиссам̣ баабун̣иссам̣. г̇ан̇г̇аасод̇ова сааг̇аранд̇и яат̇аа г̇ан̇г̇ааяа сод̇о сааг̇арам̣ самуд̣̇д̣̇ам̣ авираж̇жханд̇о згам̣сад̇о ог̇аахад̇и, звам̣ ‘‘ахам̣ гаммадтаанам̣ ануяун̃ж̇анд̇о маг̇г̇ан̃аан̣зна ниб̣б̣аанам̣ ад̇хиг̇амиссаами, д̇асмаа д̇ам̣ гаммадтаанам̣ мз аажигкат̇аа’’д̇и т̇зрам̣ гаммадтаанам̣ яаажи.
Tvañcāti kammaṭṭhānadāyakaṃ kalyāṇamittaṃ ālapati. Meti mayhaṃ. Maggamakkhāhīti ariyamaggaṃ kathehi, lokuttaramaggasampāpakaṃ catusaccakammaṭṭhānaṃ kathehīti attho. Añjasanti ujukaṃ majjhimapaṭipadābhāvena antadvayassa anupagamanato. Amate nibbāne sampāpakabhāvena patiṭṭhitattā amatogadhaṃ. Monenāti ñāṇena maggapaññāya. Monissanti jānissaṃ nibbānaṃ paṭivijjhissaṃ pāpuṇissaṃ. Gaṅgāsotova sāgaranti yathā gaṅgāya soto sāgaraṃ samuddaṃ avirajjhanto ekaṃsato ogāhati, evaṃ ‘‘ahaṃ kammaṭṭhānaṃ anuyuñjanto maggañāṇena nibbānaṃ adhigamissāmi, tasmā taṃ kammaṭṭhānaṃ me ācikkhathā’’ti theraṃ kammaṭṭhānaṃ yāci.
д̇ам̣ суд̇ваа взн̣уд̣̇ад̇д̇ад̇т̇зро д̇асса гаммадтаанам̣ ад̣̇ааси. соби гаммадтаанам̣ ануяун̃ж̇анд̇о нажирассзва вибассанам̣ уссуггаабзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 2.49.75-105) –
Taṃ sutvā veṇudattatthero tassa kammaṭṭhānaṃ adāsi. Sopi kammaṭṭhānaṃ anuyuñjanto nacirasseva vipassanaṃ ussukkāpetvā arahattaṃ pāpuṇi. Tena vuttaṃ apadāne (apa. thera 2.49.75-105) –
‘‘бан̃жа гаамаг̇ун̣з хид̇ваа, бияаруубз манорамз;
‘‘Pañca kāmaguṇe hitvā, piyarūpe manorame;
асийд̇и годияо хид̇ваа, баб̣б̣аж̇им̣ анаг̇аарияам̣.
Asīti koṭiyo hitvā, pabbajiṃ anagāriyaṃ.
‘‘баб̣б̣аж̇ид̇ваана гааязна, баабагаммам̣ виваж̇ж̇аяим̣;
‘‘Pabbajitvāna kāyena, pāpakammaṃ vivajjayiṃ;
важийд̣̇ужжарид̇ам̣ хид̇ваа, над̣̇ийгуулз васаамахам̣.
Vacīduccaritaṃ hitvā, nadīkūle vasāmahaṃ.
‘‘згагам̣ мам̣ вихаранд̇ам̣, б̣уд̣̇д̇хасздто убааг̇ами;
‘‘Ekakaṃ maṃ viharantaṃ, buddhaseṭṭho upāgami;
наахам̣ ж̇аанаами б̣уд̣̇д̇ход̇и, агаасим̣ бадисант̇аарам̣.
Nāhaṃ jānāmi buddhoti, akāsiṃ paṭisanthāraṃ.
‘‘гарид̇ваа бадисант̇аарам̣, наамаг̇од̇д̇амабужчахам̣;
‘‘Karitvā paṭisanthāraṃ, nāmagottamapucchahaṃ;
д̣̇звад̇аануси г̇анд̇хаб̣б̣о, ад̣̇у сагго буринд̣̇ад̣̇о.
Devatānusi gandhabbo, adu sakko purindado.
‘‘го ваа д̇вам̣ гасса ваа буд̇д̇о, махааб̣рахмаа ид̇хааг̇ад̇о;
‘‘Ko vā tvaṃ kassa vā putto, mahābrahmā idhāgato;
вирожзси д̣̇исаа саб̣б̣аа, уд̣̇аяам̣ суурияо яат̇аа.
Virocesi disā sabbā, udayaṃ sūriyo yathā.
‘‘сахассаараани жаггаани, баад̣̇з д̣̇иссанд̇и маариса;
‘‘Sahassārāni cakkāni, pāde dissanti mārisa;
го ваа д̇вам̣ гасса ваа буд̇д̇о, гат̇ам̣ ж̇аанзму д̇ам̣ маяам̣.
Ko vā tvaṃ kassa vā putto, kathaṃ jānemu taṃ mayaṃ.
‘‘наамаг̇од̇д̇ам̣ бавзд̣̇зхи, сам̣саяам̣ абанзхи мз;
‘‘Nāmagottaṃ pavedehi, saṃsayaṃ apanehi me;
намхи д̣̇зваа на г̇анд̇хаб̣б̣о, намхи сагго буринд̣̇ад̣̇о.
Namhi devā na gandhabbo, namhi sakko purindado.
‘‘б̣рахмабхааво жа мз над̇т̇и, зд̇зсам̣ уд̇д̇амо ахам̣;
‘‘Brahmabhāvo ca me natthi, etesaṃ uttamo ahaṃ;
ад̇ийд̇о висаяам̣ д̇зсам̣, д̣̇аалаяим̣ гаамаб̣анд̇ханам̣.
Atīto visayaṃ tesaṃ, dālayiṃ kāmabandhanaṃ.
‘‘саб̣б̣з гилзсз жхаабзд̇ваа, бад̇д̇о самб̣од̇химуд̇д̇амам̣;
‘‘Sabbe kilese jhāpetvā, patto sambodhimuttamaṃ;
д̇асса ваажам̣ сун̣ид̇ваахам̣, ид̣̇ам̣ важанамаб̣равим̣.
Tassa vācaṃ suṇitvāhaṃ, idaṃ vacanamabraviṃ.
‘‘яад̣̇и б̣уд̣̇д̇хоси саб̣б̣ан̃н̃уу, нисийд̣̇а д̇вам̣ махаамунз;
‘‘Yadi buddhosi sabbaññū, nisīda tvaṃ mahāmune;
д̇амахам̣ бууж̇аяиссаами, д̣̇угкассанд̇агаро д̇увам̣.
Tamahaṃ pūjayissāmi, dukkhassantakaro tuvaṃ.
‘‘бад̇т̇арид̇вааж̇инажаммам̣ , ад̣̇ааси сад̇т̇уно ахам̣;
‘‘Pattharitvājinacammaṃ , adāsi satthuno ahaṃ;
нисийд̣̇и д̇ад̇т̇а бхаг̇аваа, сийхова г̇ириг̇аб̣бхарз.
Nisīdi tattha bhagavā, sīhova girigabbhare.
‘‘киббам̣ баб̣б̣ад̇амааруяха, амб̣асса паламаг̇г̇ахим̣;
‘‘Khippaṃ pabbatamāruyha, ambassa phalamaggahiṃ;
саалагаляаан̣игам̣ бубпам̣, жанд̣̇анан̃жа махаарахам̣.
Sālakalyāṇikaṃ pupphaṃ, candanañca mahārahaṃ.
‘‘киббам̣ баг̇г̇аяха д̇ам̣ саб̣б̣ам̣, убзд̇ваа логанааяагам̣;
‘‘Khippaṃ paggayha taṃ sabbaṃ, upetvā lokanāyakaṃ;
палам̣ б̣уд̣̇д̇хасса д̣̇ад̇ваана, саалабубпамабууж̇аяим̣.
Phalaṃ buddhassa datvāna, sālapupphamapūjayiṃ.
‘‘жанд̣̇анам̣ анулимбид̇ваа, аванд̣̇им̣ сад̇т̇уно ахам̣;
‘‘Candanaṃ anulimpitvā, avandiṃ satthuno ahaṃ;
басаннажид̇д̇о сумано, вибулааяа жа бийд̇ияаа.
Pasannacitto sumano, vipulāya ca pītiyā.
‘‘аж̇инамхи нисийд̣̇ид̇ваа, сумзд̇хо логанааяаго;
‘‘Ajinamhi nisīditvā, sumedho lokanāyako;
мама гаммам̣ багид̇д̇зси, хаасаяанд̇о мамам̣ д̇ад̣̇аа.
Mama kammaṃ pakittesi, hāsayanto mamaṃ tadā.
‘‘иминаа палад̣̇аанзна, г̇анд̇хамаалзхи жуубхаяам̣;
‘‘Iminā phaladānena, gandhamālehi cūbhayaṃ;
бан̃жавийсз габбасад̇з, д̣̇звалогз рамиссад̇и.
Pañcavīse kappasate, devaloke ramissati.
‘‘ануунаманасан̇габбо, васавад̇д̇ий бхависсад̇и;
‘‘Anūnamanasaṅkappo, vasavattī bhavissati;
чаб̣б̣ийсад̇игаббасад̇з, мануссад̇д̇ам̣ г̇амиссад̇и.
Chabbīsatikappasate, manussattaṃ gamissati.
‘‘бхависсад̇и жаггавад̇д̇ий, жаад̇уранд̇о махид̣̇д̇хиго;
‘‘Bhavissati cakkavattī, cāturanto mahiddhiko;
взбхаарам̣ наама наг̇арам̣, виссагаммзна маабид̇ам̣.
Vebhāraṃ nāma nagaraṃ, vissakammena māpitaṃ.
‘‘хзссад̇и саб̣б̣асован̣н̣ам̣, наанаарад̇анабхуусид̇ам̣;
‘‘Hessati sabbasovaṇṇaṃ, nānāratanabhūsitaṃ;
зд̇знзва убааязна, сам̣сариссад̇и со бхавз.
Eteneva upāyena, saṃsarissati so bhave.
‘‘саб̣б̣ад̇т̇а бууж̇ид̇о худ̇ваа, д̣̇звад̇д̇з ат̇а маанусз;
‘‘Sabbattha pūjito hutvā, devatte atha mānuse;
бажчимз бхавз самбад̇д̇з, б̣рахмаб̣анд̇ху бхависсад̇и.
Pacchime bhave sampatte, brahmabandhu bhavissati.
‘‘аг̇аараа абхинигкамма, анаг̇аарий бхависсад̇и;
‘‘Agārā abhinikkhamma, anagārī bhavissati;
абхин̃н̃аабаараг̇уу худ̇ваа, ниб̣б̣ааяиссад̇инаасаво.
Abhiññāpāragū hutvā, nibbāyissatināsavo.
‘‘ид̣̇ам̣ вад̇ваана самб̣уд̣̇д̇хо, сумзд̇хо логанааяаго;
‘‘Idaṃ vatvāna sambuddho, sumedho lokanāyako;
мама ниж̇жхааяамаанасса, баггаами анилан̃ж̇асз.
Mama nijjhāyamānassa, pakkāmi anilañjase.
‘‘д̇зна гаммзна сугад̇зна, жзд̇анаабан̣ид̇хийхи жа;
‘‘Tena kammena sukatena, cetanāpaṇidhīhi ca;
ж̇ахид̇ваа маанусам̣ д̣̇зхам̣, д̇аавад̇им̣самаг̇ажчахам̣.
Jahitvā mānusaṃ dehaṃ, tāvatiṃsamagacchahaṃ.
‘‘д̇усид̇ад̇о жавид̇ваана, ниб̣б̣ад̇д̇им̣ маад̇угужчияам̣;
‘‘Tusitato cavitvāna, nibbattiṃ mātukucchiyaṃ;
бхог̇з мз уунад̇аа над̇т̇и, яамхи г̇аб̣бхз васаамахам̣.
Bhoge me ūnatā natthi, yamhi gabbhe vasāmahaṃ.
‘‘маад̇угужчиг̇ад̇з маяи, аннабаанан̃жа бхож̇анам̣;
‘‘Mātukucchigate mayi, annapānañca bhojanaṃ;
маад̇уяаа мама чанд̣̇зна, ниб̣б̣ад̇д̇ад̇и яад̣̇ижчагам̣.
Mātuyā mama chandena, nibbattati yadicchakaṃ.
‘‘ж̇аад̇ияаа бан̃жавассзна, баб̣б̣аж̇им̣ анаг̇аарияам̣;
‘‘Jātiyā pañcavassena, pabbajiṃ anagāriyaṃ;
оробид̇амхи гзсамхи, арахад̇д̇амабаабун̣им̣.
Oropitamhi kesamhi, arahattamapāpuṇiṃ.
‘‘буб̣б̣агаммам̣ г̇авзсанд̇о, орзна наад̣̇д̣̇асам̣ ахам̣;
‘‘Pubbakammaṃ gavesanto, orena nāddasaṃ ahaṃ;
д̇им̣сагаббасахассамхи, мама гаммамануссарим̣.
Tiṃsakappasahassamhi, mama kammamanussariṃ.
‘‘намо д̇з бурисааж̇ан̃н̃а, намо д̇з бурисуд̇д̇ама;
‘‘Namo te purisājañña, namo te purisuttama;
д̇ава саасанамааг̇амма, бад̇д̇омхи ажалам̣ бад̣̇ам̣.
Tava sāsanamāgamma, pattomhi acalaṃ padaṃ.
‘‘д̇им̣сагаббасахассамхи, яам̣ б̣уд̣̇д̇хамабхибууж̇аяим̣;
‘‘Tiṃsakappasahassamhi, yaṃ buddhamabhipūjayiṃ;
д̣̇уг̇г̇ад̇им̣ наабхиж̇аанаами, б̣уд̣̇д̇хабууж̇ааяид̣̇ам̣ палам̣.
Duggatiṃ nābhijānāmi, buddhapūjāyidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа ан̃н̃ам̣ б̣яаагаронд̇о т̇зро имааязва г̇аат̇аа абхаасийд̇и.
Arahattaṃ pana patvā aññaṃ byākaronto thero imāyeva gāthā abhāsīti.
валлияад̇т̇зраг̇аат̇ааван̣н̣анаа нидтид̇аа.
Valliyattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 4. валлияад̇т̇зраг̇аат̇аа • 4. Valliyattheragāthā
