| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৩. ৰম্মিকসুত্তং
3. Vammikasuttaṃ
২৪৯. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা কুমারকস্সপো অন্ধৰনে ৰিহরতি। অথ খো অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং অন্ধৰনং ওভাসেত্ৰা যেনাযস্মা কুমারকস্সপো তেনুপসঙ্কমি; উপসঙ্কমিত্ৰা একমন্তং অট্ঠাসি। একমন্তং ঠিতা খো সা দেৰতা আযস্মন্তং কুমারকস্সপং এতদৰোচ –
249. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā kumārakassapo andhavane viharati. Atha kho aññatarā devatā abhikkantāya rattiyā abhikkantavaṇṇā kevalakappaṃ andhavanaṃ obhāsetvā yenāyasmā kumārakassapo tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhitā kho sā devatā āyasmantaṃ kumārakassapaṃ etadavoca –
‘‘ভিক্খু ভিক্খু, অযং ৰম্মিকো 1 রত্তিং ধূমাযতি, দিৰা পজ্জলতি। ব্রাহ্মণো এৰমাহ – ‘অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস লঙ্গিং ‘লঙ্গী, ভদন্তে’তি। ব্রাহ্মণো এৰমাহ – ‘উক্খিপ লঙ্গিং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস উদ্ধুমাযিকং। ‘উদ্ধুমাযিকা, ভদন্তে’তি। ব্রাহ্মণো এৰমাহ – ‘উক্খিপ উদ্ধুমাযিকং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস দ্ৰিধাপথং। ‘দ্ৰিধাপথো, ভদন্তে’তি। ব্রাহ্মণো এৰমাহ – ‘উক্খিপ দ্ৰিধাপথং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস চঙ্গৰারং 2। ‘চঙ্গৰারো, ভদন্তে’তি। ব্রাহ্মণো এৰমাহ – ‘উক্খিপ চঙ্গৰারং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস কুম্মং। ‘কুম্মো , ভদন্তে’তি। ব্রাহ্মণো এৰমাহ – ‘উক্খিপ কুম্মং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস অসিসূনং। ‘অসিসূনা, ভদন্তে’তি। ব্রাহ্মণো এৰমাহ – ‘উক্খিপ অসিসূনং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস মংসপেসিং। ‘মংসপেসি, ভদন্তে’তি। ব্রাহ্মণো এৰমাহ – ‘উক্খিপ মংসপেসিং; অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায অদ্দস নাগং। ‘নাগো, ভদন্তে’তি। ব্রাহ্মণো এৰমাহ – ‘তিট্ঠতু নাগো, মা নাগং ঘট্টেসি; নমো করোহি নাগস্সা’’’তি।
‘‘Bhikkhu bhikkhu, ayaṃ vammiko 3 rattiṃ dhūmāyati, divā pajjalati. Brāhmaṇo evamāha – ‘abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa laṅgiṃ ‘laṅgī, bhadante’ti. Brāhmaṇo evamāha – ‘ukkhipa laṅgiṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa uddhumāyikaṃ. ‘Uddhumāyikā, bhadante’ti. Brāhmaṇo evamāha – ‘ukkhipa uddhumāyikaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa dvidhāpathaṃ. ‘Dvidhāpatho, bhadante’ti. Brāhmaṇo evamāha – ‘ukkhipa dvidhāpathaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa caṅgavāraṃ 4. ‘Caṅgavāro, bhadante’ti. Brāhmaṇo evamāha – ‘ukkhipa caṅgavāraṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa kummaṃ. ‘Kummo , bhadante’ti. Brāhmaṇo evamāha – ‘ukkhipa kummaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa asisūnaṃ. ‘Asisūnā, bhadante’ti. Brāhmaṇo evamāha – ‘ukkhipa asisūnaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa maṃsapesiṃ. ‘Maṃsapesi, bhadante’ti. Brāhmaṇo evamāha – ‘ukkhipa maṃsapesiṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa nāgaṃ. ‘Nāgo, bhadante’ti. Brāhmaṇo evamāha – ‘tiṭṭhatu nāgo, mā nāgaṃ ghaṭṭesi; namo karohi nāgassā’’’ti.
‘‘ইমে খো ত্ৰং, ভিক্খু, পঞ্হে ভগৰন্তং উপসঙ্কমিত্ৰা পুচ্ছেয্যাসি, যথা চ তে ভগৰা ব্যাকরোতি তথা নং ধারেয্যাসি। নাহং তং, ভিক্খু, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায, যো ইমেসং পঞ্হানং ৰেয্যাকরণেন চিত্তং আরাধেয্য অঞ্ঞত্র তথাগতেন ৰা, তথাগতসাৰকেন ৰা, ইতো ৰা পন সুত্ৰা’’তি – ইদমৰোচ সা দেৰতা। ইদং ৰত্ৰা তত্থেৰন্তরধাযি।
‘‘Ime kho tvaṃ, bhikkhu, pañhe bhagavantaṃ upasaṅkamitvā puccheyyāsi, yathā ca te bhagavā byākaroti tathā naṃ dhāreyyāsi. Nāhaṃ taṃ, bhikkhu, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo imesaṃ pañhānaṃ veyyākaraṇena cittaṃ ārādheyya aññatra tathāgatena vā, tathāgatasāvakena vā, ito vā pana sutvā’’ti – idamavoca sā devatā. Idaṃ vatvā tatthevantaradhāyi.
২৫০. অথ খো আযস্মা কুমারকস্সপো তস্সা রত্তিযা অচ্চযেন যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা কুমারকস্সপো ভগৰন্তং এতদৰোচ – ‘‘ইমং, ভন্তে, রত্তিং অঞ্ঞতরা দেৰতা অভিক্কন্তায রত্তিযা অভিক্কন্তৰণ্ণা কেৰলকপ্পং অন্ধৰনং ওভাসেত্ৰা যেনাহং তেনুপসঙ্কমি; উপসঙ্কমিত্ৰা একমন্তং অট্ঠাসি। একমন্তং ঠিতা খো, ভন্তে, সা দেৰতা মং এতদৰোচ – ‘ভিক্খু ভিক্খু, অযং ৰম্মিকো রত্তিং ধূমাযতি, দিৰা পজ্জলতি’। ব্রাহ্মণো এৰমাহ – ‘অভিক্খণ, সুমেধ, সত্থং আদাযা’তি। অভিক্খণন্তো সুমেধো সত্থং আদায…পে॰… ইতো ৰা পন সুত্ৰাতি। ইদমৰোচ, ভন্তে, সা দেৰতা। ইদং ৰত্ৰা তত্থেৰন্তরধাযি। ‘কো নু খো, ভন্তে, ৰম্মিকো, কা রত্তিং ধূমাযনা, কা দিৰা পজ্জলনা, কো ব্রাহ্মণো, কো সুমেধো, কিং সত্থং, কিং অভিক্খণং, কা লঙ্গী, কা উদ্ধুমাযিকা, কো দ্ৰিধাপথো, কিং চঙ্গৰারং, কো কুম্মো, কা অসিসূনা , কা মংসপেসি, কো নাগো’’’তি?
250. Atha kho āyasmā kumārakassapo tassā rattiyā accayena yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kumārakassapo bhagavantaṃ etadavoca – ‘‘imaṃ, bhante, rattiṃ aññatarā devatā abhikkantāya rattiyā abhikkantavaṇṇā kevalakappaṃ andhavanaṃ obhāsetvā yenāhaṃ tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhitā kho, bhante, sā devatā maṃ etadavoca – ‘bhikkhu bhikkhu, ayaṃ vammiko rattiṃ dhūmāyati, divā pajjalati’. Brāhmaṇo evamāha – ‘abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya…pe… ito vā pana sutvāti. Idamavoca, bhante, sā devatā. Idaṃ vatvā tatthevantaradhāyi. ‘Ko nu kho, bhante, vammiko, kā rattiṃ dhūmāyanā, kā divā pajjalanā, ko brāhmaṇo, ko sumedho, kiṃ satthaṃ, kiṃ abhikkhaṇaṃ, kā laṅgī, kā uddhumāyikā, ko dvidhāpatho, kiṃ caṅgavāraṃ, ko kummo, kā asisūnā , kā maṃsapesi, ko nāgo’’’ti?
২৫১. ‘‘‘ৰম্মিকো’তি খো, ভিক্খু, ইমস্সেতং চাতুমহাভূতিকস্স 5 কাযস্স অধিৰচনং, মাতাপেত্তিকসম্ভৰস্স ওদনকুম্মাসূপচযস্স অনিচ্চুচ্ছাদন-পরিমদ্দনভেদন-ৰিদ্ধংসন-ধম্মস্স।
251. ‘‘‘Vammiko’ti kho, bhikkhu, imassetaṃ cātumahābhūtikassa 6 kāyassa adhivacanaṃ, mātāpettikasambhavassa odanakummāsūpacayassa aniccucchādana-parimaddanabhedana-viddhaṃsana-dhammassa.
‘‘‘ব্রাহ্মণো’তি খো, ভিক্খু, তথাগতস্সেতং অধিৰচনং অরহতো সম্মাসম্বুদ্ধস্স। ‘সুমেধো’তি খো ভিক্খু সেক্খস্সেতং ভিক্খুনো অধিৰচনং।
‘‘‘Brāhmaṇo’ti kho, bhikkhu, tathāgatassetaṃ adhivacanaṃ arahato sammāsambuddhassa. ‘Sumedho’ti kho bhikkhu sekkhassetaṃ bhikkhuno adhivacanaṃ.
‘‘‘সত্থ’ন্তি খো, ভিক্খু, অরিযাযেতং পঞ্ঞায অধিৰচনং। ‘অভিক্খণ’ন্তি খো, ভিক্খু, ৰীরিযারম্ভস্সেতং অধিৰচনং।
‘‘‘Sattha’nti kho, bhikkhu, ariyāyetaṃ paññāya adhivacanaṃ. ‘Abhikkhaṇa’nti kho, bhikkhu, vīriyārambhassetaṃ adhivacanaṃ.
‘‘‘লঙ্গী’তি খো, ভিক্খু, অৰিজ্জাযেতং অধিৰচনং। উক্খিপ লঙ্গিং, পজহ অৰিজ্জং; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Laṅgī’ti kho, bhikkhu, avijjāyetaṃ adhivacanaṃ. Ukkhipa laṅgiṃ, pajaha avijjaṃ; abhikkhaṇa, sumedha, satthaṃ ādāyāti ayametassa attho.
‘‘‘উদ্ধুমাযিকা’তি খো, ভিক্খু, কোধূপাযাসস্সেতং অধিৰচনং। উক্খিপ উদ্ধুমাযিকং, পজহ কোধূপাযাসং; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Uddhumāyikā’ti kho, bhikkhu, kodhūpāyāsassetaṃ adhivacanaṃ. Ukkhipa uddhumāyikaṃ, pajaha kodhūpāyāsaṃ; abhikkhaṇa, sumedha, satthaṃ ādāyāti ayametassa attho.
‘‘‘দ্ৰিধাপথো’তি খো, ভিক্খু, ৰিচিকিচ্ছাযেতং অধিৰচনং। উক্খিপ দ্ৰিধাপথং, পজহ ৰিচিকিচ্ছং; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Dvidhāpatho’ti kho, bhikkhu, vicikicchāyetaṃ adhivacanaṃ. Ukkhipa dvidhāpathaṃ, pajaha vicikicchaṃ; abhikkhaṇa, sumedha, satthaṃ ādāyāti ayametassa attho.
‘‘‘চঙ্গৰার’ন্তি খো, ভিক্খু, পঞ্চন্নেতং নীৰরণানং অধিৰচনং, সেয্যথিদং – কামচ্ছন্দনীৰরণস্স, ব্যাপাদনীৰরণস্স, থীনমিদ্ধনীৰরণস্স, উদ্ধচ্চকুক্কুচ্চনীৰরণস্স, ৰিচিকিচ্ছানীৰরণস্স। উক্খিপ চঙ্গৰারং, পজহ পঞ্চ নীৰরণে ; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Caṅgavāra’nti kho, bhikkhu, pañcannetaṃ nīvaraṇānaṃ adhivacanaṃ, seyyathidaṃ – kāmacchandanīvaraṇassa, byāpādanīvaraṇassa, thīnamiddhanīvaraṇassa, uddhaccakukkuccanīvaraṇassa, vicikicchānīvaraṇassa. Ukkhipa caṅgavāraṃ, pajaha pañca nīvaraṇe ; abhikkhaṇa, sumedha, satthaṃ ādāyāti ayametassa attho.
‘‘‘কুম্মো’তি খো, ভিক্খু, পঞ্চন্নেতং উপাদানক্খন্ধানং অধিৰচনং, সেয্যথিদং – রূপুপাদানক্খন্ধস্স, ৰেদনুপাদানক্খন্ধস্স, সঞ্ঞুপাদানক্খন্ধস্স, সঙ্খারুপাদানক্খন্ধস্স, ৰিঞ্ঞাণুপাদানক্খন্ধস্স। উক্খিপ কুম্মং, পজহ পঞ্চুপাদানক্খন্ধে; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Kummo’ti kho, bhikkhu, pañcannetaṃ upādānakkhandhānaṃ adhivacanaṃ, seyyathidaṃ – rūpupādānakkhandhassa, vedanupādānakkhandhassa, saññupādānakkhandhassa, saṅkhārupādānakkhandhassa, viññāṇupādānakkhandhassa. Ukkhipa kummaṃ, pajaha pañcupādānakkhandhe; abhikkhaṇa, sumedha, satthaṃ ādāyāti ayametassa attho.
‘‘‘অসিসূনা’তি খো, ভিক্খু, পঞ্চন্নেতং কামগুণানং অধিৰচনং – চক্খুৰিঞ্ঞেয্যানং রূপানং ইট্ঠানং কন্তানং মনাপানং পিযরূপানং কামূপসংহিতানং রজনীযানং, সোতৰিঞ্ঞেয্যানং সদ্দানং…পে॰… ঘানৰিঞ্ঞেয্যানং গন্ধানং…পে॰… জিৰ্হাৰিঞ্ঞেয্যানং রসানং…পে॰… কাযৰিঞ্ঞেয্যানং ফোট্ঠব্বানং ইট্ঠানং কন্তানং মনাপানং পিযরূপানং কামূপসংহিতানং রজনীযানং। উক্খিপ অসিসূনং, পজহ পঞ্চ কামগুণে; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Asisūnā’ti kho, bhikkhu, pañcannetaṃ kāmaguṇānaṃ adhivacanaṃ – cakkhuviññeyyānaṃ rūpānaṃ iṭṭhānaṃ kantānaṃ manāpānaṃ piyarūpānaṃ kāmūpasaṃhitānaṃ rajanīyānaṃ, sotaviññeyyānaṃ saddānaṃ…pe… ghānaviññeyyānaṃ gandhānaṃ…pe… jivhāviññeyyānaṃ rasānaṃ…pe… kāyaviññeyyānaṃ phoṭṭhabbānaṃ iṭṭhānaṃ kantānaṃ manāpānaṃ piyarūpānaṃ kāmūpasaṃhitānaṃ rajanīyānaṃ. Ukkhipa asisūnaṃ, pajaha pañca kāmaguṇe; abhikkhaṇa, sumedha, satthaṃ ādāyāti ayametassa attho.
‘‘‘মংসপেসী’তি খো, ভিক্খু, নন্দীরাগস্সেতং অধিৰচনং। উক্খিপ মংসপেসিং, পজহ নন্দীরাগং; অভিক্খণ, সুমেধ, সত্থং আদাযাতি অযমেতস্স অত্থো।
‘‘‘Maṃsapesī’ti kho, bhikkhu, nandīrāgassetaṃ adhivacanaṃ. Ukkhipa maṃsapesiṃ, pajaha nandīrāgaṃ; abhikkhaṇa, sumedha, satthaṃ ādāyāti ayametassa attho.
‘‘‘নাগো’তি খো, ভিক্খু, খীণাসৰস্সেতং ভিক্খুনো অধিৰচনং। তিট্ঠতু নাগো, মা নাগং ঘট্টেসি; নমো করোহি নাগস্সাতি অযমেতস্স অত্থো’’তি।
‘‘‘Nāgo’ti kho, bhikkhu, khīṇāsavassetaṃ bhikkhuno adhivacanaṃ. Tiṭṭhatu nāgo, mā nāgaṃ ghaṭṭesi; namo karohi nāgassāti ayametassa attho’’ti.
ইদমৰোচ ভগৰা। অত্তমনো আযস্মা কুমারকস্সপো ভগৰতো ভাসিতং অভিনন্দীতি।
Idamavoca bhagavā. Attamano āyasmā kumārakassapo bhagavato bhāsitaṃ abhinandīti.
ৰম্মিকসুত্তং নিট্ঠিতং ততিযং।
Vammikasuttaṃ niṭṭhitaṃ tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৩. ৰম্মিকসুত্তৰণ্ণনা • 3. Vammikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৩. ৰম্মিকসুত্তৰণ্ণনা • 3. Vammikasuttavaṇṇanā
