| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
3. ваммигасуд̇д̇ам̣
3. Vammikasuttaṃ
249. звам̣ мз суд̇ам̣ – згам̣ самаяам̣ бхаг̇аваа саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз. д̇зна ко бана самаязна ааяасмаа гумаарагассабо анд̇хаванз вихарад̇и. ат̇а ко ан̃н̃ад̇араа д̣̇звад̇аа абхигганд̇ааяа рад̇д̇ияаа абхигганд̇аван̣н̣аа гзвалагаббам̣ анд̇хаванам̣ обхаасзд̇ваа язнааяасмаа гумаарагассабо д̇знубасан̇гами; убасан̇гамид̇ваа згаманд̇ам̣ адтааси. згаманд̇ам̣ тид̇аа ко саа д̣̇звад̇аа ааяасманд̇ам̣ гумаарагассабам̣ зд̇ад̣̇авожа –
249. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā kumārakassapo andhavane viharati. Atha kho aññatarā devatā abhikkantāya rattiyā abhikkantavaṇṇā kevalakappaṃ andhavanaṃ obhāsetvā yenāyasmā kumārakassapo tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhitā kho sā devatā āyasmantaṃ kumārakassapaṃ etadavoca –
‘‘бхигку бхигку, аяам̣ ваммиго 1 рад̇д̇им̣ д̇хуумааяад̇и, д̣̇иваа баж̇ж̇алад̇и. б̣раахман̣о звамааха – ‘абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса лан̇г̇им̣ ‘лан̇г̇ий, бхад̣̇анд̇з’д̇и. б̣раахман̣о звамааха – ‘угкиба лан̇г̇им̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса уд̣̇д̇хумааяигам̣. ‘уд̣̇д̇хумааяигаа, бхад̣̇анд̇з’д̇и. б̣раахман̣о звамааха – ‘угкиба уд̣̇д̇хумааяигам̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса д̣̇вид̇хаабат̇ам̣. ‘д̣̇вид̇хаабат̇о, бхад̣̇анд̇з’д̇и. б̣раахман̣о звамааха – ‘угкиба д̣̇вид̇хаабат̇ам̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса жан̇г̇аваарам̣ 2. ‘жан̇г̇авааро, бхад̣̇анд̇з’д̇и. б̣раахман̣о звамааха – ‘угкиба жан̇г̇аваарам̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса гуммам̣. ‘гуммо , бхад̣̇анд̇з’д̇и. б̣раахман̣о звамааха – ‘угкиба гуммам̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса асисуунам̣. ‘асисуунаа, бхад̣̇анд̇з’д̇и. б̣раахман̣о звамааха – ‘угкиба асисуунам̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса мам̣сабзсим̣. ‘мам̣сабзси, бхад̣̇анд̇з’д̇и. б̣раахман̣о звамааха – ‘угкиба мам̣сабзсим̣; абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа ад̣̇д̣̇аса нааг̇ам̣. ‘нааг̇о, бхад̣̇анд̇з’д̇и. б̣раахман̣о звамааха – ‘д̇идтад̇у нааг̇о, маа нааг̇ам̣ гхаддзси; намо гарохи нааг̇ассаа’’’д̇и.
‘‘Bhikkhu bhikkhu, ayaṃ vammiko 3 rattiṃ dhūmāyati, divā pajjalati. Brāhmaṇo evamāha – ‘abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa laṅgiṃ ‘laṅgī, bhadante’ti. Brāhmaṇo evamāha – ‘ukkhipa laṅgiṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa uddhumāyikaṃ. ‘Uddhumāyikā, bhadante’ti. Brāhmaṇo evamāha – ‘ukkhipa uddhumāyikaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa dvidhāpathaṃ. ‘Dvidhāpatho, bhadante’ti. Brāhmaṇo evamāha – ‘ukkhipa dvidhāpathaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa caṅgavāraṃ 4. ‘Caṅgavāro, bhadante’ti. Brāhmaṇo evamāha – ‘ukkhipa caṅgavāraṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa kummaṃ. ‘Kummo , bhadante’ti. Brāhmaṇo evamāha – ‘ukkhipa kummaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa asisūnaṃ. ‘Asisūnā, bhadante’ti. Brāhmaṇo evamāha – ‘ukkhipa asisūnaṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa maṃsapesiṃ. ‘Maṃsapesi, bhadante’ti. Brāhmaṇo evamāha – ‘ukkhipa maṃsapesiṃ; abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya addasa nāgaṃ. ‘Nāgo, bhadante’ti. Brāhmaṇo evamāha – ‘tiṭṭhatu nāgo, mā nāgaṃ ghaṭṭesi; namo karohi nāgassā’’’ti.
‘‘имз ко д̇вам̣, бхигку, бан̃хз бхаг̇аванд̇ам̣ убасан̇гамид̇ваа бужчзяяааси, яат̇аа жа д̇з бхаг̇аваа б̣яаагарод̇и д̇ат̇аа нам̣ д̇хаарзяяааси. наахам̣ д̇ам̣, бхигку, бассаами сад̣̇звагз логз самаарагз саб̣рахмагз сассаман̣аб̣раахман̣ияаа баж̇ааяа сад̣̇звамануссааяа, яо имзсам̣ бан̃хаанам̣ взяяаагаран̣зна жид̇д̇ам̣ аараад̇хзяяа ан̃н̃ад̇ра д̇ат̇ааг̇ад̇зна ваа, д̇ат̇ааг̇ад̇асаавагзна ваа, ид̇о ваа бана суд̇ваа’’д̇и – ид̣̇амавожа саа д̣̇звад̇аа. ид̣̇ам̣ вад̇ваа д̇ад̇т̇званд̇арад̇хааяи.
‘‘Ime kho tvaṃ, bhikkhu, pañhe bhagavantaṃ upasaṅkamitvā puccheyyāsi, yathā ca te bhagavā byākaroti tathā naṃ dhāreyyāsi. Nāhaṃ taṃ, bhikkhu, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo imesaṃ pañhānaṃ veyyākaraṇena cittaṃ ārādheyya aññatra tathāgatena vā, tathāgatasāvakena vā, ito vā pana sutvā’’ti – idamavoca sā devatā. Idaṃ vatvā tatthevantaradhāyi.
250. ат̇а ко ааяасмаа гумаарагассабо д̇ассаа рад̇д̇ияаа ажжаязна язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко ааяасмаа гумаарагассабо бхаг̇аванд̇ам̣ зд̇ад̣̇авожа – ‘‘имам̣, бханд̇з, рад̇д̇им̣ ан̃н̃ад̇араа д̣̇звад̇аа абхигганд̇ааяа рад̇д̇ияаа абхигганд̇аван̣н̣аа гзвалагаббам̣ анд̇хаванам̣ обхаасзд̇ваа язнаахам̣ д̇знубасан̇гами; убасан̇гамид̇ваа згаманд̇ам̣ адтааси. згаманд̇ам̣ тид̇аа ко, бханд̇з, саа д̣̇звад̇аа мам̣ зд̇ад̣̇авожа – ‘бхигку бхигку, аяам̣ ваммиго рад̇д̇им̣ д̇хуумааяад̇и, д̣̇иваа баж̇ж̇алад̇и’. б̣раахман̣о звамааха – ‘абхигкан̣а, сумзд̇ха, сад̇т̇ам̣ аад̣̇ааяаа’д̇и. абхигкан̣анд̇о сумзд̇хо сад̇т̇ам̣ аад̣̇ааяа…бз… ид̇о ваа бана суд̇ваад̇и. ид̣̇амавожа, бханд̇з, саа д̣̇звад̇аа. ид̣̇ам̣ вад̇ваа д̇ад̇т̇званд̇арад̇хааяи. ‘го ну ко, бханд̇з, ваммиго, гаа рад̇д̇им̣ д̇хуумааяанаа, гаа д̣̇иваа баж̇ж̇аланаа, го б̣раахман̣о, го сумзд̇хо, гим̣ сад̇т̇ам̣, гим̣ абхигкан̣ам̣, гаа лан̇г̇ий, гаа уд̣̇д̇хумааяигаа, го д̣̇вид̇хаабат̇о, гим̣ жан̇г̇аваарам̣, го гуммо, гаа асисуунаа , гаа мам̣сабзси, го нааг̇о’’’д̇и?
250. Atha kho āyasmā kumārakassapo tassā rattiyā accayena yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā kumārakassapo bhagavantaṃ etadavoca – ‘‘imaṃ, bhante, rattiṃ aññatarā devatā abhikkantāya rattiyā abhikkantavaṇṇā kevalakappaṃ andhavanaṃ obhāsetvā yenāhaṃ tenupasaṅkami; upasaṅkamitvā ekamantaṃ aṭṭhāsi. Ekamantaṃ ṭhitā kho, bhante, sā devatā maṃ etadavoca – ‘bhikkhu bhikkhu, ayaṃ vammiko rattiṃ dhūmāyati, divā pajjalati’. Brāhmaṇo evamāha – ‘abhikkhaṇa, sumedha, satthaṃ ādāyā’ti. Abhikkhaṇanto sumedho satthaṃ ādāya…pe… ito vā pana sutvāti. Idamavoca, bhante, sā devatā. Idaṃ vatvā tatthevantaradhāyi. ‘Ko nu kho, bhante, vammiko, kā rattiṃ dhūmāyanā, kā divā pajjalanā, ko brāhmaṇo, ko sumedho, kiṃ satthaṃ, kiṃ abhikkhaṇaṃ, kā laṅgī, kā uddhumāyikā, ko dvidhāpatho, kiṃ caṅgavāraṃ, ko kummo, kā asisūnā , kā maṃsapesi, ko nāgo’’’ti?
251. ‘‘‘ваммиго’д̇и ко, бхигку, имассзд̇ам̣ жаад̇умахаабхууд̇игасса 5 гааяасса ад̇хиважанам̣, маад̇аабзд̇д̇игасамбхавасса од̣̇анагуммаасуубажаяасса анижжужчаад̣̇ана-баримад̣̇д̣̇анабхзд̣̇ана-вид̣̇д̇хам̣сана-д̇хаммасса.
251. ‘‘‘Vammiko’ti kho, bhikkhu, imassetaṃ cātumahābhūtikassa 6 kāyassa adhivacanaṃ, mātāpettikasambhavassa odanakummāsūpacayassa aniccucchādana-parimaddanabhedana-viddhaṃsana-dhammassa.
‘‘‘б̣раахман̣о’д̇и ко, бхигку, д̇ат̇ааг̇ад̇ассзд̇ам̣ ад̇хиважанам̣ арахад̇о саммаасамб̣уд̣̇д̇хасса. ‘сумзд̇хо’д̇и ко бхигку сзгкассзд̇ам̣ бхигкуно ад̇хиважанам̣.
‘‘‘Brāhmaṇo’ti kho, bhikkhu, tathāgatassetaṃ adhivacanaṃ arahato sammāsambuddhassa. ‘Sumedho’ti kho bhikkhu sekkhassetaṃ bhikkhuno adhivacanaṃ.
‘‘‘сад̇т̇а’нд̇и ко, бхигку, арияааязд̇ам̣ бан̃н̃ааяа ад̇хиважанам̣. ‘абхигкан̣а’нд̇и ко, бхигку, вийрияаарамбхассзд̇ам̣ ад̇хиважанам̣.
‘‘‘Sattha’nti kho, bhikkhu, ariyāyetaṃ paññāya adhivacanaṃ. ‘Abhikkhaṇa’nti kho, bhikkhu, vīriyārambhassetaṃ adhivacanaṃ.
‘‘‘лан̇г̇ий’д̇и ко, бхигку, авиж̇ж̇ааязд̇ам̣ ад̇хиважанам̣. угкиба лан̇г̇им̣, баж̇аха авиж̇ж̇ам̣; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Laṅgī’ti kho, bhikkhu, avijjāyetaṃ adhivacanaṃ. Ukkhipa laṅgiṃ, pajaha avijjaṃ; abhikkhaṇa, sumedha, satthaṃ ādāyāti ayametassa attho.
‘‘‘уд̣̇д̇хумааяигаа’д̇и ко, бхигку, год̇хуубааяаасассзд̇ам̣ ад̇хиважанам̣. угкиба уд̣̇д̇хумааяигам̣, баж̇аха год̇хуубааяаасам̣; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Uddhumāyikā’ti kho, bhikkhu, kodhūpāyāsassetaṃ adhivacanaṃ. Ukkhipa uddhumāyikaṃ, pajaha kodhūpāyāsaṃ; abhikkhaṇa, sumedha, satthaṃ ādāyāti ayametassa attho.
‘‘‘д̣̇вид̇хаабат̇о’д̇и ко, бхигку, вижигижчааязд̇ам̣ ад̇хиважанам̣. угкиба д̣̇вид̇хаабат̇ам̣, баж̇аха вижигижчам̣; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Dvidhāpatho’ti kho, bhikkhu, vicikicchāyetaṃ adhivacanaṃ. Ukkhipa dvidhāpathaṃ, pajaha vicikicchaṃ; abhikkhaṇa, sumedha, satthaṃ ādāyāti ayametassa attho.
‘‘‘жан̇г̇аваара’нд̇и ко, бхигку, бан̃жаннзд̇ам̣ нийваран̣аанам̣ ад̇хиважанам̣, сзяяат̇ид̣̇ам̣ – гаамажчанд̣̇анийваран̣асса, б̣яаабаад̣̇анийваран̣асса, т̇ийнамид̣̇д̇ханийваран̣асса, уд̣̇д̇хажжагуггужжанийваран̣асса, вижигижчаанийваран̣асса. угкиба жан̇г̇аваарам̣, баж̇аха бан̃жа нийваран̣з ; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Caṅgavāra’nti kho, bhikkhu, pañcannetaṃ nīvaraṇānaṃ adhivacanaṃ, seyyathidaṃ – kāmacchandanīvaraṇassa, byāpādanīvaraṇassa, thīnamiddhanīvaraṇassa, uddhaccakukkuccanīvaraṇassa, vicikicchānīvaraṇassa. Ukkhipa caṅgavāraṃ, pajaha pañca nīvaraṇe ; abhikkhaṇa, sumedha, satthaṃ ādāyāti ayametassa attho.
‘‘‘гуммо’д̇и ко, бхигку, бан̃жаннзд̇ам̣ убаад̣̇аанагканд̇хаанам̣ ад̇хиважанам̣, сзяяат̇ид̣̇ам̣ – руубубаад̣̇аанагканд̇хасса, взд̣̇анубаад̣̇аанагканд̇хасса, сан̃н̃убаад̣̇аанагканд̇хасса, сан̇каарубаад̣̇аанагканд̇хасса, вин̃н̃аан̣убаад̣̇аанагканд̇хасса. угкиба гуммам̣, баж̇аха бан̃жубаад̣̇аанагканд̇хз; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Kummo’ti kho, bhikkhu, pañcannetaṃ upādānakkhandhānaṃ adhivacanaṃ, seyyathidaṃ – rūpupādānakkhandhassa, vedanupādānakkhandhassa, saññupādānakkhandhassa, saṅkhārupādānakkhandhassa, viññāṇupādānakkhandhassa. Ukkhipa kummaṃ, pajaha pañcupādānakkhandhe; abhikkhaṇa, sumedha, satthaṃ ādāyāti ayametassa attho.
‘‘‘асисуунаа’д̇и ко, бхигку, бан̃жаннзд̇ам̣ гаамаг̇ун̣аанам̣ ад̇хиважанам̣ – жагкувин̃н̃зяяаанам̣ руубаанам̣ идтаанам̣ ганд̇аанам̣ манаабаанам̣ бияаруубаанам̣ гаамуубасам̣хид̇аанам̣ раж̇анийяаанам̣, сод̇авин̃н̃зяяаанам̣ сад̣̇д̣̇аанам̣…бз… гхаанавин̃н̃зяяаанам̣ г̇анд̇хаанам̣…бз… ж̇ивхаавин̃н̃зяяаанам̣ расаанам̣…бз… гааяавин̃н̃зяяаанам̣ подтаб̣б̣аанам̣ идтаанам̣ ганд̇аанам̣ манаабаанам̣ бияаруубаанам̣ гаамуубасам̣хид̇аанам̣ раж̇анийяаанам̣. угкиба асисуунам̣, баж̇аха бан̃жа гаамаг̇ун̣з; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Asisūnā’ti kho, bhikkhu, pañcannetaṃ kāmaguṇānaṃ adhivacanaṃ – cakkhuviññeyyānaṃ rūpānaṃ iṭṭhānaṃ kantānaṃ manāpānaṃ piyarūpānaṃ kāmūpasaṃhitānaṃ rajanīyānaṃ, sotaviññeyyānaṃ saddānaṃ…pe… ghānaviññeyyānaṃ gandhānaṃ…pe… jivhāviññeyyānaṃ rasānaṃ…pe… kāyaviññeyyānaṃ phoṭṭhabbānaṃ iṭṭhānaṃ kantānaṃ manāpānaṃ piyarūpānaṃ kāmūpasaṃhitānaṃ rajanīyānaṃ. Ukkhipa asisūnaṃ, pajaha pañca kāmaguṇe; abhikkhaṇa, sumedha, satthaṃ ādāyāti ayametassa attho.
‘‘‘мам̣сабзсий’д̇и ко, бхигку, нанд̣̇ийрааг̇ассзд̇ам̣ ад̇хиважанам̣. угкиба мам̣сабзсим̣, баж̇аха нанд̣̇ийрааг̇ам̣; абхигкан̣а, сумзд̇ха, сад̇т̇ам̣ аад̣̇ааяаад̇и аяамзд̇асса ад̇т̇о.
‘‘‘Maṃsapesī’ti kho, bhikkhu, nandīrāgassetaṃ adhivacanaṃ. Ukkhipa maṃsapesiṃ, pajaha nandīrāgaṃ; abhikkhaṇa, sumedha, satthaṃ ādāyāti ayametassa attho.
‘‘‘нааг̇о’д̇и ко, бхигку, кийн̣аасавассзд̇ам̣ бхигкуно ад̇хиважанам̣. д̇идтад̇у нааг̇о, маа нааг̇ам̣ гхаддзси; намо гарохи нааг̇ассаад̇и аяамзд̇асса ад̇т̇о’’д̇и.
‘‘‘Nāgo’ti kho, bhikkhu, khīṇāsavassetaṃ bhikkhuno adhivacanaṃ. Tiṭṭhatu nāgo, mā nāgaṃ ghaṭṭesi; namo karohi nāgassāti ayametassa attho’’ti.
ид̣̇амавожа бхаг̇аваа. ад̇д̇амано ааяасмаа гумаарагассабо бхаг̇авад̇о бхаасид̇ам̣ абхинанд̣̇ийд̇и.
Idamavoca bhagavā. Attamano āyasmā kumārakassapo bhagavato bhāsitaṃ abhinandīti.
ваммигасуд̇д̇ам̣ нидтид̇ам̣ д̇ад̇ияам̣.
Vammikasuttaṃ niṭṭhitaṃ tatiyaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 3. ваммигасуд̇д̇аван̣н̣анаа • 3. Vammikasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 3. ваммигасуд̇д̇аван̣н̣анаа • 3. Vammikasuttavaṇṇanā
