| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. வம்மிகஸுத்தவண்ணனா
3. Vammikasuttavaṇṇanā
249. பியவசனந்தி பியஸமுதா³சாரோ. விஞ்ஞுஜாதிகா ஹி பரங் பியேன ஸமுதா³சரந்தா ‘‘ப⁴வ’’ந்தி வா, ‘‘தே³வானங் பியோ’’தி வா, ‘‘ஆயஸ்மா’’தி வா ஸமுதா³சரந்தி, தஸ்மா ஸம்முகா² ஸம்போ³த⁴னவஸேன ‘‘ஆவுஸோ’’தி, திரொக்க²ங் ‘‘ஆயஸ்மா’’தி அயம்பி ஸமுதா³சாரோ. மஹாகஸ்ஸபஉருவேலகஸ்ஸபாத³யோ அஞ்ஞேபி கஸ்ஸபனாமகா அத்தீ²தி ‘‘கதரஸ்ஸ கஸ்ஸபஸ்ஸா’’தி புச்ச²ந்தி. ரஞ்ஞாதி கோஸலரஞ்ஞா. ‘‘ஸஞ்ஜானிங்ஸூ’’தி ஸங்கே²பதோ வுத்தமத்த²ங் விவரிதுங் ‘‘அயங் பனா’’திஆதி³ ஆரத்³த⁴ங். அஸ்ஸாதி குமாரகஸ்ஸபஸ்ஸ, ‘‘ஸஞ்ஜானிங்ஸூ’’தி வுத்தஸஞ்ஜானநஸ்ஸ வா. புஞ்ஞானி கரொந்தோதி கப்பஸதஸஹஸ்ஸங் தே³வேஸு ச மனுஸ்ஸேஸு ச நிப்³ப³த்தித்வா தா³னாதீ³னி புஞ்ஞானி பா⁴வெந்தோ. ஓஸக்கந்தேதி பரிஹாயமானே. பட²மந்தி குமாரிகாகாலே. ஸத்தா² உபாலித்தே²ரங் படிச்சா²பேஸி தங் அதி⁴கரணங் வினயகம்மேனேவஸ்ஸா பி⁴க்கு²னியா பப்³ப³ஜ்ஜாய அரோக³பா⁴வங்.
249.Piyavacananti piyasamudācāro. Viññujātikā hi paraṃ piyena samudācarantā ‘‘bhava’’nti vā, ‘‘devānaṃ piyo’’ti vā, ‘‘āyasmā’’ti vā samudācaranti, tasmā sammukhā sambodhanavasena ‘‘āvuso’’ti, tirokkhaṃ ‘‘āyasmā’’ti ayampi samudācāro. Mahākassapauruvelakassapādayo aññepi kassapanāmakā atthīti ‘‘katarassa kassapassā’’ti pucchanti. Raññāti kosalaraññā. ‘‘Sañjāniṃsū’’ti saṅkhepato vuttamatthaṃ vivarituṃ ‘‘ayaṃ panā’’tiādi āraddhaṃ. Assāti kumārakassapassa, ‘‘sañjāniṃsū’’ti vuttasañjānanassa vā. Puññāni karontoti kappasatasahassaṃ devesu ca manussesu ca nibbattitvā dānādīni puññāni bhāvento. Osakkanteti parihāyamāne. Paṭhamanti kumārikākāle. Satthā upālittheraṃ paṭicchāpesi taṃ adhikaraṇaṃ vinayakammenevassā bhikkhuniyā pabbajjāya arogabhāvaṃ.
பஞ்ஞத்திவிபா⁴வனாதி ‘‘அந்த⁴வன’’ந்த்வேவ பஞ்ஞாயமானஸ்ஸ விபா⁴வனா. ஓலீயதீதி ஸங்குசதி ஸணிகங் வத்ததி. பா⁴ணகோதி ஸரபா⁴ணகோ. யங் அத்தி², தங் க³ஹெத்வாதி இதா³னி பரியேஸிதப்³ப³ட்டா²னங் நத்தி², யதா²க³தங் பன யங் அத்தி², தங் க³ஹெத்வா. ப³லவகு³ணேதி அதி⁴மத்தகு³ணே. கஸ்ஸபப⁴க³வதோ காலே நிருள்ஹஸமஞ்ஞாவஸேன வசனஸந்ததியா அவிச்சே²தே³ன ச இமஸ்மிம்பி பு³த்³து⁴ப்பாதே³ தங் ‘‘அந்த⁴வன’’ந்த்வேவ பஞ்ஞாயித்த², உபரூபரிவட்³ட⁴மானாய பத²வியா உபரி ருக்க²க³ச்சா²தீ³ஸு ஸஞ்ஜாயந்தேஸுபீதி. ஸெக்க²படிபத³ந்தி ஸெக்க²பா⁴வாவஹங் விஸுத்³தி⁴படிபத்திங்.
Paññattivibhāvanāti ‘‘andhavana’’ntveva paññāyamānassa vibhāvanā. Olīyatīti saṅkucati saṇikaṃ vattati. Bhāṇakoti sarabhāṇako. Yaṃ atthi, taṃ gahetvāti idāni pariyesitabbaṭṭhānaṃ natthi, yathāgataṃ pana yaṃ atthi, taṃ gahetvā. Balavaguṇeti adhimattaguṇe. Kassapabhagavato kāle niruḷhasamaññāvasena vacanasantatiyā avicchedena ca imasmimpi buddhuppāde taṃ ‘‘andhavana’’ntveva paññāyittha, uparūparivaḍḍhamānāya pathaviyā upari rukkhagacchādīsu sañjāyantesupīti. Sekkhapaṭipadanti sekkhabhāvāvahaṃ visuddhipaṭipattiṃ.
அஞ்ஞதர-ஸத்³தோ³ அபாகடே விய பாகடேபி வத்ததி ஏக-ஸத்³தே³ன ஸமானத்த²த்தாதி த³ஸ்ஸேதுங் ‘‘அபி⁴ஜானாதீ’’திஆதி³ வுத்தங். ப⁴யபே⁴ரவத³ஸ்ஸிதம்பி அபி⁴க்கந்த-ஸத்³த³ஸ்ஸ அத்து²த்³தா⁴ரங் இத⁴ த³ஸ்ஸெந்தோ ஏவங் ஹெட்டா² தத்த² தத்த² கதா அத்த²ஸங்வண்ணனா பரதோ தஸ்மிங் தஸ்மிங் ஸுத்தபதே³ஸே யதா²ரஹங் வத்தப்³பா³தி நயத³ஸ்ஸனங் கரோதி. கஞ்சனஸன்னிப⁴த்தசதா ஸுவண்ணவண்ணக்³க³ஹணேன க³ஹிதாதி அதி⁴ப்பாயேனாஹ ‘‘ச²விய’’ந்தி. ச²விக³தா பன வண்ணதா⁴து ஏவ ‘‘ஸுவண்ணவண்ணோ’’தி எத்த² வண்ணக்³க³ஹணேன க³ஹிதாதி அபரே. வண்ணீயதி கித்தீயதி உக்³கோ⁴ஸனந்தி வண்ணோ, து²தி. வண்ணீயதி அஸங்கரதோ வவத்த²பீயதீதி வண்ணோ, குலவக்³கோ³. வண்ணீயதி ப²லங் ஏதேன யதா²ஸபா⁴வதோ விபா⁴வீயதீதி வண்ணோ, காரணங். வண்ணனங் தீ³க⁴ரஸ்ஸாதி³வஸேன ஸண்ட²ஹனந்தி வண்ணோ, ஸண்டா²னங். வண்ணீயதி அணுமஹந்தாதி³வஸேன பமீயதீதி வண்ணோ, பமாணங். வண்ணேதி விகாரமாபஜ்ஜமானங் ஹத³யங்க³தபா⁴வங் பகாஸேதீதி வண்ணோ, ரூபாயதனங். ஏவங் தேன தேன பவத்தினிமித்தேன வண்ண-ஸத்³த³ஸ்ஸ தஸ்மிங் தஸ்மிங் அத்தே² பவத்தி வேதி³தப்³பா³.
Aññatara-saddo apākaṭe viya pākaṭepi vattati eka-saddena samānatthattāti dassetuṃ ‘‘abhijānātī’’tiādi vuttaṃ. Bhayabheravadassitampi abhikkanta-saddassa atthuddhāraṃ idha dassento evaṃ heṭṭhā tattha tattha katā atthasaṃvaṇṇanā parato tasmiṃ tasmiṃ suttapadese yathārahaṃ vattabbāti nayadassanaṃ karoti. Kañcanasannibhattacatā suvaṇṇavaṇṇaggahaṇena gahitāti adhippāyenāha ‘‘chaviya’’nti. Chavigatā pana vaṇṇadhātu eva ‘‘suvaṇṇavaṇṇo’’ti ettha vaṇṇaggahaṇena gahitāti apare. Vaṇṇīyati kittīyati ugghosananti vaṇṇo, thuti. Vaṇṇīyati asaṅkarato vavatthapīyatīti vaṇṇo, kulavaggo. Vaṇṇīyati phalaṃ etena yathāsabhāvato vibhāvīyatīti vaṇṇo, kāraṇaṃ. Vaṇṇanaṃ dīgharassādivasena saṇṭhahananti vaṇṇo, saṇṭhānaṃ. Vaṇṇīyati aṇumahantādivasena pamīyatīti vaṇṇo, pamāṇaṃ. Vaṇṇeti vikāramāpajjamānaṃ hadayaṅgatabhāvaṃ pakāsetīti vaṇṇo, rūpāyatanaṃ. Evaṃ tena tena pavattinimittena vaṇṇa-saddassa tasmiṃ tasmiṃ atthe pavatti veditabbā.
அனவஸேஸத்தங் ஸகலதா கேவலதா. கேவலகப்பாதி எத்த² கேசி ஈஸங் அஸமத்தா கேவலா கேவலகப்பாதி வத³ந்தி, ஏவங் ஸதி அனவஸேஸத்தோ² ஏவ கேவல-ஸத்³தோ³ ஸியா. அனத்த²ந்தரேன பன கப்ப-ஸத்³தே³ன பத³வட்³ட⁴னங் கத்வா கேவலா ஏவ கேவலகப்பா. ததா² வா கப்பனீயத்தா பஞ்ஞபேதப்³ப³த்தா கேவலகப்பா. யேபு⁴ய்யதா ப³ஹுலபா⁴வோ. அப்³யாமிஸ்ஸதா விஜாதியேன அஸங்கரோ ஸுத்³த⁴தா. அனதிரேகதா தங்மத்ததா விஸேஸாபா⁴வோ. கேவலகப்பந்தி கேவலங் த³ள்ஹங் கத்வாதி அத்தோ². கேவலங் வுச்சதி நிப்³பா³னங் ஸப்³ப³ஸங்க²தவிவித்தத்தா. தேனாஹ ‘‘விஸங்யோகா³தி³அனேகத்தோ²’’தி. கேவலங் ஏதஸ்ஸ அதி⁴க³தங் அத்தீ²தி கேவலீ, ஸச்சி²கதனிரோதோ⁴ கீ²ணாஸவோ.
Anavasesattaṃ sakalatā kevalatā. Kevalakappāti ettha keci īsaṃ asamattā kevalā kevalakappāti vadanti, evaṃ sati anavasesattho eva kevala-saddo siyā. Anatthantarena pana kappa-saddena padavaḍḍhanaṃ katvā kevalā eva kevalakappā. Tathā vā kappanīyattā paññapetabbattā kevalakappā. Yebhuyyatā bahulabhāvo. Abyāmissatā vijātiyena asaṅkaro suddhatā. Anatirekatā taṃmattatā visesābhāvo. Kevalakappanti kevalaṃ daḷhaṃ katvāti attho. Kevalaṃ vuccati nibbānaṃ sabbasaṅkhatavivittattā. Tenāha ‘‘visaṃyogādianekattho’’ti. Kevalaṃ etassa adhigataṃ atthīti kevalī, sacchikatanirodho khīṇāsavo.
கப்ப-ஸத்³தோ³ பனாயங் ஸஉபஸக்³கோ³ அனுபஸக்³கோ³ சாதி அதி⁴ப்பாயேன ஓகப்பனீயபதே³ லப்³ப⁴மானங் ஓகப்பஸத்³த³மத்தங் நித³ஸ்ஸேதி, அஞ்ஞதா² கப்ப-ஸத்³த³ஸ்ஸ அத்து²த்³தா⁴ரே ஓகப்பனீயபத³ங் அனித³ஸ்ஸனமேவ ஸியா. ஸமணகப்பேஹீதி வினயஸித்³தே⁴ஹி ஸமணவோஹாரேஹி. நிச்சகப்பந்தி நிச்சகாலங். பஞ்ஞத்தீதி நாமங். நாமஞ்ஹேதங் தஸ்ஸ ஆயஸ்மதோ, யதி³த³ங் கப்போதி. கப்பிதகேஸமஸ்ஸூதி கத்தரிகாய சே²தி³தகேஸமஸ்ஸு. த்³வங்கு³லகப்போதி மஜ்ஜ²ன்ஹிகவேலாய வீதிக்கந்தாய த்³வங்கு³லதாவிகப்போ. லேஸோதி அபதே³ஸோ. அனவஸேஸங் ப²ரிதுங் ஸமத்த²ஸ்ஸபி ஓபா⁴ஸஸ்ஸ கேனசி காரணேன ஏகதே³ஸப²ரணம்பி ஸியா, அயங் பன ஸப்³ப³ஸோவ ப²ரீதி த³ஸ்ஸேதுங் ஸமந்தத்தோ² கப்ப-ஸத்³தோ³ க³ஹிதோதி ஆஹ ‘‘அனவஸேஸங் ஸமந்ததோ’’தி.
Kappa-saddo panāyaṃ saupasaggo anupasaggo cāti adhippāyena okappanīyapade labbhamānaṃ okappasaddamattaṃ nidasseti, aññathā kappa-saddassa atthuddhāre okappanīyapadaṃ anidassanameva siyā. Samaṇakappehīti vinayasiddhehi samaṇavohārehi. Niccakappanti niccakālaṃ. Paññattīti nāmaṃ. Nāmañhetaṃ tassa āyasmato, yadidaṃ kappoti. Kappitakesamassūti kattarikāya cheditakesamassu. Dvaṅgulakappoti majjhanhikavelāya vītikkantāya dvaṅgulatāvikappo. Lesoti apadeso. Anavasesaṃ pharituṃ samatthassapi obhāsassa kenaci kāraṇena ekadesapharaṇampi siyā, ayaṃ pana sabbasova pharīti dassetuṃ samantattho kappa-saddo gahitoti āha ‘‘anavasesaṃ samantato’’ti.
ஸமணஸஞ்ஞாஸமுதா³சாரேனாதி ‘‘அஹங் ஸமணோ’’தி ஏவங் உப்பன்னஸஞ்ஞாஸமுட்டி²தேன ஸமுதா³சாரேன, தன்னிமித்தேன வா தப்³போ³ஹாரேன. புப்³ப³யோகே³தி புப்³ப³யோக³கதா²யங். பபஞ்சோ ஏஸாதி ஏஸோ தும்ஹேஸு ஆக³தேஸு யதா²பவத்தோ படிஸந்தா²ரோ கதா²ஸமுதா³சாரோ ச அம்ஹாகங் பபஞ்சோ. எத்தகம்பி அகத்வா ஸமணத⁴ம்மமேவ கரோமாதி அதி⁴ப்பாயோ.
Samaṇasaññāsamudācārenāti ‘‘ahaṃ samaṇo’’ti evaṃ uppannasaññāsamuṭṭhitena samudācārena, tannimittena vā tabbohārena. Pubbayogeti pubbayogakathāyaṃ. Papañco esāti eso tumhesu āgatesu yathāpavatto paṭisanthāro kathāsamudācāro ca amhākaṃ papañco. Ettakampi akatvā samaṇadhammameva karomāti adhippāyo.
அரியபூ⁴மிங் பத்தோதி அனாகா³மிப²லங் அதி⁴க³தோ. பக்குஸாதிகுலபுத்தங் ஸந்தா⁴ய வத³தி. விப⁴ஜித்வாதி விபா⁴க³ங் கத்வா. துரிதாலபனவஸேனாதி துரிதங் ஆலபனவஸேன. தேன து³ல்லபோ⁴ அயங் ஸமணோ, தஸ்மா ஸீக⁴மஸ்ஸ பஞ்ஹோ கதே²தப்³போ³, இமினா ச ஸீக⁴ங் க³ந்த்வா ஸத்தா² புச்சி²தப்³போ³தி துரிதங் ஆலபீதி த³ஸ்ஸேதி. ‘‘யதா² வா’’திஆதி³னா பன வசனாலங்காரவஸேன த்³விக்க²த்துங் ஆலபதி. ஏவமாஹாதி ‘‘பி⁴க்கு² பி⁴க்கூ²’’தி ஏவங் த்³விக்க²த்துங் அவோச.
Ariyabhūmiṃ pattoti anāgāmiphalaṃ adhigato. Pakkusātikulaputtaṃ sandhāya vadati. Vibhajitvāti vibhāgaṃ katvā. Turitālapanavasenāti turitaṃ ālapanavasena. Tena dullabho ayaṃ samaṇo, tasmā sīghamassa pañho kathetabbo, iminā ca sīghaṃ gantvā satthā pucchitabboti turitaṃ ālapīti dasseti. ‘‘Yathā vā’’tiādinā pana vacanālaṅkāravasena dvikkhattuṃ ālapati. Evamāhāti ‘‘bhikkhu bhikkhū’’ti evaṃ dvikkhattuṃ avoca.
வம்மிகபரியாயேன கரஜகாயங் பச்சக்க²ங் கத்வா த³ஸ்ஸெந்தீ தே³வதா ‘‘அயங் வம்மிகோ’’தி ஆஹ. தாய பன பா⁴வத்த²ஸ்ஸ அபா⁴ஸிதத்தா ஸத்³த³த்த²மேவ த³ஸ்ஸெந்தோ ‘‘புரதோ டி²தங்…பே॰… அயந்தி ஆஹா’’தி அவோச. ஸேஸேஸுபி ஏஸேவ நயோ. மண்டூ³கந்தி த²லமண்டூ³கங். ஸோ ஹி உத்³து⁴மாயிகாதி வுச்சதி, ந உத³கமண்டூ³கோ. தஸ்ஸ நிவாஸதோ வாதோ மா கோ² பா³த⁴யித்தா²தி ‘‘உபரிவாததோ அபக³ம்மா’’தி வுத்தங். கத²ங் பனாயங் தே³வதா இமினா நீஹாரேன இமே பஞ்ஹே தே²ரஸ்ஸ ஆசிக்கீ²தி? கேசி தாவ ஆஹு – யதா²ஸுதமத்த²ங் உபமாபா⁴வேன க³ஹெத்வா அத்தனோ படிபா⁴னேன உபமெய்யத்த²ங் மனஸா சிந்தெத்வா தங் ப⁴க³வாவ இமஸ்ஸ ஆசிக்கி²ஸ்ஸதி. ஸா ச தே³ஸனா அத்தா²ய ஹிதாய ஸுகா²ய ஹோதீதி ‘‘அயங் வம்மிகோ’’திஆதி³னா உபமாவஸேனேவ பன்னரஸ பஞ்ஹே தே²ரஸ்ஸ ஆசிக்கி². கஸ்ஸபஸம்மாஸம்பு³த்³த⁴காலே கிர பா³ராணஸியங் ஏகோ ஸெட்டி² அட்³டோ⁴ மஹத்³த⁴னோ மஹந்தங் நிதா⁴னங் நித³ஹித்வா பலிகா⁴தி³ஆகாரானி கானிசிபி லங்கா³னி தத்த² ட²பேஸி. ஸோ மரணகாலே அத்தனோ ஸஹாயஸ்ஸ ப்³ராஹ்மணஸ்ஸ ஆரோசேஸி – ‘‘இமஸ்மிங் டா²னே மயா நிதா⁴னங் நித³ஹிதங், தங் மம புத்தஸ்ஸ விஞ்ஞுதங் பத்தஸ்ஸ த³ஸ்ஸேதீ’’தி வத்வா காலமகாஸி. ப்³ராஹ்மணோ ஸஹாயகபுத்தஸ்ஸ விஞ்ஞுதங் பத்தகாலே தங் டா²னங் த³ஸ்ஸேஸி. ஸோ நிக²னித்வா ஸப்³ப³பச்சா² நாக³ங் பஸ்ஸி, நாகோ³ அத்தனோ புத்தங் தி³ஸ்வா ‘‘ஸுகே²னேவ த⁴னங் க³ண்ஹதூ’’தி அபக³ச்சி². ஸ்வாயமத்தோ² ததா³ லோகே பாகடோ ஜாதோ. அயங் பன தே³வதா ததா³ பா³ராணஸியங் க³ஹபதிகுலே நிப்³ப³த்தித்வா விஞ்ஞுதங் பத்தோ ஸத்த²ரி பரினிப்³பு³தே உரங் த³த்வா ஸாஸனே பப்³ப³ஜிதோ பஞ்சஹி ஸஹாயகபி⁴க்கூ²ஹி ஸத்³தி⁴ங் ஸமணத⁴ம்மமகாஸி. யே ஸந்தா⁴ய வுத்தங் ‘‘பஞ்ச பி⁴க்கூ² நிஸ்ஸேணிங் ப³ந்தி⁴த்வா’’திஆதி³. தேன வுத்தங் ‘‘யதா²ஸுதமத்த²ங் உபமாபா⁴வேன க³ஹெத்வா’’திஆதி³. அபரே பன ‘‘தே³வதா அத்தனோ படிபா⁴னேன இமே பஞ்ஹே ஏவங் அபி⁴ஸங்க²ரித்வா தே²ரஸ்ஸ ஆசிக்கீ²’’தி வத³ந்தி. தே³வபுத்தே நிஸ்ஸக்கங் தே³வபுத்தபஞ்ஹத்தா தஸ்ஸ அத்த²ஸ்ஸ.
Vammikapariyāyena karajakāyaṃ paccakkhaṃ katvā dassentī devatā ‘‘ayaṃ vammiko’’ti āha. Tāya pana bhāvatthassa abhāsitattā saddatthameva dassento ‘‘purato ṭhitaṃ…pe… ayanti āhā’’ti avoca. Sesesupi eseva nayo. Maṇḍūkanti thalamaṇḍūkaṃ. So hi uddhumāyikāti vuccati, na udakamaṇḍūko. Tassa nivāsato vāto mā kho bādhayitthāti ‘‘uparivātato apagammā’’ti vuttaṃ. Kathaṃ panāyaṃ devatā iminā nīhārena ime pañhe therassa ācikkhīti? Keci tāva āhu – yathāsutamatthaṃ upamābhāvena gahetvā attano paṭibhānena upameyyatthaṃ manasā cintetvā taṃ bhagavāva imassa ācikkhissati. Sā ca desanā atthāya hitāya sukhāya hotīti ‘‘ayaṃ vammiko’’tiādinā upamāvaseneva pannarasa pañhe therassa ācikkhi. Kassapasammāsambuddhakāle kira bārāṇasiyaṃ eko seṭṭhi aḍḍho mahaddhano mahantaṃ nidhānaṃ nidahitvā palighādiākārāni kānicipi laṅgāni tattha ṭhapesi. So maraṇakāle attano sahāyassa brāhmaṇassa ārocesi – ‘‘imasmiṃ ṭhāne mayā nidhānaṃ nidahitaṃ, taṃ mama puttassa viññutaṃ pattassa dassetī’’ti vatvā kālamakāsi. Brāhmaṇo sahāyakaputtassa viññutaṃ pattakāle taṃ ṭhānaṃ dassesi. So nikhanitvā sabbapacchā nāgaṃ passi, nāgo attano puttaṃ disvā ‘‘sukheneva dhanaṃ gaṇhatū’’ti apagacchi. Svāyamattho tadā loke pākaṭo jāto. Ayaṃ pana devatā tadā bārāṇasiyaṃ gahapatikule nibbattitvā viññutaṃ patto satthari parinibbute uraṃ datvā sāsane pabbajito pañcahi sahāyakabhikkhūhi saddhiṃ samaṇadhammamakāsi. Ye sandhāya vuttaṃ ‘‘pañca bhikkhū nisseṇiṃ bandhitvā’’tiādi. Tena vuttaṃ ‘‘yathāsutamatthaṃ upamābhāvena gahetvā’’tiādi. Apare pana ‘‘devatā attano paṭibhānena ime pañhe evaṃ abhisaṅkharitvā therassa ācikkhī’’ti vadanti. Devaputte nissakkaṃ devaputtapañhattā tassa atthassa.
251. சதூஹி மஹாபூ⁴தேஹி நிப்³ப³த்தோதி சாதுமஹாபூ⁴திகோ. தேனாஹ ‘‘சதுமஹாபூ⁴தமயஸ்ஸா’’தி. வமதி உக்³கி³ரந்தோ விய ஹோதீதி அத்தோ². வந்தகோதி உச்ச²ட்³ட³கோ. வந்துஸ்ஸயோதி உபசிகாஹி வந்தஸ்ஸ மத்திகாபிண்ட³ஸ்ஸ உஸ்ஸயபூ⁴தோ. வந்தஸினேஹஸம்ப³த்³தோ⁴தி வந்தேன கே²ளஸினேஹேன ஸம்பிண்டி³தோ. அஸுசிகலிமலங் வமதீதி எத்த² முகா²தீ³ஹி பாணகானங் நிக்³க³மனதோ பாணகே வமதீதி அயம்பி அத்தோ² லப்³ப⁴தேவ. அரியேஹி வந்தகோதி காயபா⁴வஸாமஞ்ஞேன வுத்தங். து³க்க²ஸச்சபரிஞ்ஞாய வா ஸப்³ப³ஸ்ஸபி தேபூ⁴மகத⁴ம்மஜாதஸ்ஸ பரிஞ்ஞாதத்தா ஸப்³போ³பி காயோ அரியேஹி ச²ந்த³ராக³ப்பஹானேன வந்தோ ஏவ. தங் ஸப்³ப³ந்தி யேஹி தீஹி அட்டி²ஸதேஹி உஸ்ஸிதோ, யேஹி ந்ஹாரூஹி ஸம்ப³த்³தோ⁴, யேஹி மங்ஸேஹி அவலித்தோ, யேன அல்லசம்மேன பரியோனத்³தோ⁴, யாய ச²வியா ரஞ்ஜிதோ, தங் அட்டி²ஆதி³ஸப்³ப³ங் அச்சந்தமேவ ஜிகு³ச்சி²த்வா விரத்ததாயவந்தமேவ. ‘‘யதா² சா’’திஆதி³னா வத்தப்³போ³பமதோபி வம்மிகோ விய வம்மிகோதி இமமத்த²ங் த³ஸ்ஸேதி.
251. Catūhi mahābhūtehi nibbattoti cātumahābhūtiko. Tenāha ‘‘catumahābhūtamayassā’’ti. Vamati uggiranto viya hotīti attho. Vantakoti ucchaḍḍako. Vantussayoti upacikāhi vantassa mattikāpiṇḍassa ussayabhūto. Vantasinehasambaddhoti vantena kheḷasinehena sampiṇḍito. Asucikalimalaṃ vamatīti ettha mukhādīhi pāṇakānaṃ niggamanato pāṇake vamatīti ayampi attho labbhateva. Ariyehi vantakoti kāyabhāvasāmaññena vuttaṃ. Dukkhasaccapariññāya vā sabbassapi tebhūmakadhammajātassa pariññātattā sabbopi kāyo ariyehi chandarāgappahānena vanto eva. Taṃ sabbanti yehi tīhi aṭṭhisatehi ussito, yehi nhārūhi sambaddho, yehi maṃsehi avalitto, yena allacammena pariyonaddho, yāya chaviyā rañjito, taṃ aṭṭhiādisabbaṃ accantameva jigucchitvā virattatāyavantameva. ‘‘Yathā cā’’tiādinā vattabbopamatopi vammiko viya vammikoti imamatthaṃ dasseti.
ஸம்ப⁴வதி ஏதஸ்மாதி ஸம்ப⁴வோ, மாதாபெத்திகோ ஸம்ப⁴வோ ஏதஸ்ஸாதி மாதாபெத்திகஸம்ப⁴வோ. தஸ்ஸ. உபசியதி ஏதேனாதி உபசயோ’ ஓத³னகும்மாஸங் உபசயோ ஏதஸ்ஸாதி ஓத³னகும்மாஸூபசயோ. தஸ்ஸ. அது⁴வஸபா⁴வதாய அனிச்சத⁴ம்மஸ்ஸ, ஸேத³கூ³த²-பித்த-ஸெம்ஹாதி³-தா⁴துக்கோ²ப⁴-க³ருபா⁴வது³க்³க³ந்தா⁴னங் வினோத³னாய உச்சா²தே³தப்³ப³த⁴ம்மஸ்ஸ, பரிதோ ஸம்பா³ஹனேன பரிமத்³தி³தப்³ப³த⁴ம்மஸ்ஸ, க²ணே க²ணே பி⁴ஜ்ஜனஸபா⁴வதாய பே⁴த³னத⁴ம்மஸ்ஸ, ததோ ஏவ விகிரணஸபா⁴வதாய வித்³த⁴ங்ஸனத⁴ம்மஸ்ஸாதி த⁴ம்ம-ஸத்³தோ³ பச்சேகங் யோஜேதப்³போ³. தனுவிலேபனேனாதி காயாவலேபனேன உச்சா²த³னவிலேபனேன. அங்க³பச்சங்கா³பா³த⁴வினோத³னத்தா²யாதி தாதி³ஸஸமுட்டா²ன-ஸரீரவிகாரவிக³மாய. யஸ்மா ஸுக்கஸோணிதங் ஆஹாரோ, உச்சா²த³னங் பரிமத்³த³னஞ்ச யதா²ரஹங் உப்பாத³ஸ்ஸ, வுட்³டி⁴யா ச பச்சயோ, தஸ்மா ஆஹ ‘‘மாதாபெத்திக…பே॰… கதி²தோ’’தி. உச்சாவசபா⁴வோதி யதா²ரஹங் யோஜேதப்³போ³ – ஓத³னகும்மாஸூபசய-உச்சா²த³னபரிமத்³த³னக்³க³ஹணேஹி உச்சபா⁴வோ, வட்³டீ⁴. மாதாபெத்திகஸம்ப⁴வக்³க³ஹணேன ஸமுத³யோ. இதரேஹி அவசபா⁴வோ, பரிஹானி, அத்த²ங்க³மோ பகாஸிதோ. அங்க³பச்சங்கா³னங் ஸண்ட²பனம்பி ஹி வட்டபச்சயத்தா வட்டந்தி.
Sambhavati etasmāti sambhavo, mātāpettiko sambhavo etassāti mātāpettikasambhavo. Tassa. Upaciyati etenāti upacayo’ odanakummāsaṃ upacayo etassāti odanakummāsūpacayo. Tassa. Adhuvasabhāvatāya aniccadhammassa, sedagūtha-pitta-semhādi-dhātukkhobha-garubhāvaduggandhānaṃ vinodanāya ucchādetabbadhammassa, parito sambāhanena parimadditabbadhammassa, khaṇe khaṇe bhijjanasabhāvatāya bhedanadhammassa, tato eva vikiraṇasabhāvatāya viddhaṃsanadhammassāti dhamma-saddo paccekaṃ yojetabbo. Tanuvilepanenāti kāyāvalepanena ucchādanavilepanena. Aṅgapaccaṅgābādhavinodanatthāyāti tādisasamuṭṭhāna-sarīravikāravigamāya. Yasmā sukkasoṇitaṃ āhāro, ucchādanaṃ parimaddanañca yathārahaṃ uppādassa, vuḍḍhiyā ca paccayo, tasmā āha ‘‘mātāpettika…pe… kathito’’ti. Uccāvacabhāvoti yathārahaṃ yojetabbo – odanakummāsūpacaya-ucchādanaparimaddanaggahaṇehi uccabhāvo, vaḍḍhī. Mātāpettikasambhavaggahaṇena samudayo. Itarehi avacabhāvo, parihāni, atthaṅgamo pakāsito. Aṅgapaccaṅgānaṃ saṇṭhapanampi hi vaṭṭapaccayattā vaṭṭanti.
கோதோ⁴ தூ⁴மோதி எத்த² தூ⁴மபரியாயேன கோத⁴ஸ்ஸ வுத்தத்தா தூ⁴ம-ஸத்³தோ³ கோதே⁴ வத்ததீதி வுத்தங் ‘‘தூ⁴மோ விய தூ⁴மோ’’தி. ப⁴ஸ்மனீதி ப⁴ஸ்மங். மோஸவஜ்ஜந்தி முஸாவாதோ³. தூ⁴மோ ஏவ தூ⁴மாயிதங். இச்சா² தூ⁴மாயிதங் ஏதிஸ்ஸாதி இச்சா²தூ⁴மாயிதா, பஜா. இச்சா²தூ⁴மாயிதஸத்³த³ஸ்ஸ தண்ஹாய வுத்தி வுத்தனயோ ஏவ. தூ⁴மாயந்தோதி விதக்கஸந்தாபேன ஸங்தப்பெந்தோ, விதக்கெந்தோதி அத்தோ². பலிபோதி து³க்கரமஹாகத்³த³மங். திமூலந்தி தீஹி மூலேஹி பதிட்டி²தங் விய அசலங் பவத்தந்தி வுத்தங். ரஜோ ச தூ⁴மோ ச மயா பகாஸிதாதி ரஜஸபா⁴வகரணட்டே²ன ‘‘ரஜோ’’தி ச தூ⁴மஸபா⁴வகரணட்டே²ன ‘‘தூ⁴மோ’’தி ச மயா பகாஸிதா. பகதிதூ⁴மோ விய அக்³கி³ஸ்ஸ கிலேஸக்³கி³ஜாலஸ்ஸ பஞ்ஞாணபா⁴வதோ. த⁴ம்மதே³ஸனாதூ⁴மோ ஞாணக்³கி³ஸந்தீ⁴பனஸ்ஸ புப்³ப³ங்க³மபா⁴வதோ. அயங் ரத்திங் தூ⁴மாயனாதி யா தி³வா கத்தப்³ப³கம்மந்தே உத்³தி³ஸ்ஸ ரத்தியங் அனுவிதக்கனா, அயங் ரத்திங் தூ⁴மாயனா.
Kodho dhūmoti ettha dhūmapariyāyena kodhassa vuttattā dhūma-saddo kodhe vattatīti vuttaṃ ‘‘dhūmo viya dhūmo’’ti. Bhasmanīti bhasmaṃ. Mosavajjanti musāvādo. Dhūmo eva dhūmāyitaṃ. Icchā dhūmāyitaṃ etissāti icchādhūmāyitā, pajā. Icchādhūmāyitasaddassa taṇhāya vutti vuttanayo eva. Dhūmāyantoti vitakkasantāpena saṃtappento, vitakkentoti attho. Palipoti dukkaramahākaddamaṃ. Timūlanti tīhi mūlehi patiṭṭhitaṃ viya acalaṃ pavattanti vuttaṃ. Rajo ca dhūmo ca mayā pakāsitāti rajasabhāvakaraṇaṭṭhena ‘‘rajo’’ti ca dhūmasabhāvakaraṇaṭṭhena ‘‘dhūmo’’ti ca mayā pakāsitā. Pakatidhūmo viya aggissa kilesaggijālassa paññāṇabhāvato. Dhammadesanādhūmo ñāṇaggisandhīpanassa pubbaṅgamabhāvato. Ayaṃ rattiṃ dhūmāyanāti yā divā kattabbakammante uddissa rattiyaṃ anuvitakkanā, ayaṃ rattiṃ dhūmāyanā.
ஸத்தன்னங் த⁴ம்மானந்தி இத³ங் ஸுத்தே (சூளனி॰ மெத்தகூ³மாணவபுச்சா²னித்³தே³ஸ 28) ஆக³தனயேன வுத்தங். ஸுத்தஞ்ச ததா² ஆராத⁴னவேனெய்யஜ்ஜா²ஸயவஸேன. ததே³கட்ட²தாய வா தத³ஞ்ஞகிலேஸானங். ஸுந்த³ரபஞ்ஞோதி ஞாததீரணபஹானபரிஞ்ஞாய பஞ்ஞாய ஸுந்த³ரபஞ்ஞோ.
Sattannaṃ dhammānanti idaṃ sutte (cūḷani. mettagūmāṇavapucchāniddesa 28) āgatanayena vuttaṃ. Suttañca tathā ārādhanaveneyyajjhāsayavasena. Tadekaṭṭhatāya vā tadaññakilesānaṃ. Sundarapaññoti ñātatīraṇapahānapariññāya paññāya sundarapañño.
ஏதந்தி ‘‘ஸத்த²’’ந்தி ஏதங் அதி⁴வசனங் ஸங்கிலேஸத⁴ம்மானங் ஸஸனதோ ஸமுச்சி²ந்த³னதோ. ந்தி வீரியங். பஞ்ஞாக³திகமேவ பஞ்ஞாய ஹிதஸ்ஸேவ அதி⁴ப்பேதத்தா. லோகியாய பஞ்ஞாய ஆரம்ப⁴காலே லோகியவீரியங் க³ஹேதப்³ப³ங், லோகுத்தராய பஞ்ஞாய பவத்திக்க²ணே லோகுத்தரவீரியங் க³ஹேதப்³ப³ந்தி யோஜனா. அத்த²தீ³பனாதி உபமெய்யத்த²தீ³பனீ உபமா.
Etanti ‘‘sattha’’nti etaṃ adhivacanaṃ saṃkilesadhammānaṃ sasanato samucchindanato. Nti vīriyaṃ. Paññāgatikameva paññāya hitasseva adhippetattā. Lokiyāya paññāya ārambhakāle lokiyavīriyaṃ gahetabbaṃ, lokuttarāya paññāya pavattikkhaṇe lokuttaravīriyaṃ gahetabbanti yojanā. Atthadīpanāti upameyyatthadīpanī upamā.
கா³மதோதி அத்தனோ வஸனகா³மதோ. மந்தேதி ஆத²ப்³ப³னமந்தே. தே ஹி ப்³ராஹ்மணா அரஞ்ஞே ஏவ வாசெந்தி ‘‘மா அஞ்ஞே அஸ்ஸோஸு’’ந்தி. ததா² அகாஸீதி சத்தாரோ கொட்டா²ஸே அகாஸி. ஏவமெத்த² வம்மிகபஞ்ஹஸ்ஸேவ வஸேன உபமா ஆக³தா, ஸேஸானங் வஸேன ஹெட்டா² வுத்தனயேன வேதி³தப்³பா³.
Gāmatoti attano vasanagāmato. Manteti āthabbanamante. Te hi brāhmaṇā araññe eva vācenti ‘‘mā aññe assosu’’nti. Tathā akāsīti cattāro koṭṭhāse akāsi. Evamettha vammikapañhasseva vasena upamā āgatā, sesānaṃ vasena heṭṭhā vuttanayena veditabbā.
லங்க³னட்டே²ன நிவாரணட்டே²ன லங்கீ³, பலிகோ⁴. ஞாணமுகே²தி விபஸ்ஸனாஞாணவீதி²யங். பததீதி பவத்ததி. கம்மட்டா²னஉக்³க³ஹபரிபுச்சா²வஸேனாதி சதுஸச்சகம்மட்டா²னஸ்ஸ உக்³க³ண்ஹனேன தஸ்ஸ அத்த²பரிபுச்சா²வஸேன சேவ விபஸ்ஸனாஸங்கா²த-அத்த²வினிச்ச²ய-பரிபுச்சா²வஸேன ச. ஸப்³ப³ஸோ ஞாதுங் இச்சா² ஹி பரிபுச்சா². விபஸ்ஸனா ச அனிச்சாதி³தோ ஸப்³ப³தேபூ⁴மகத⁴ம்மானங் ஞாதுங் இச்ச²தி. ஏவங் விபஸ்ஸனாவஸேன அவிஜ்ஜாபஹானமாஹ, உபரிகத்தப்³ப³ஸப்³பா⁴வதோ ந தாவ மக்³க³வஸேன.
Laṅganaṭṭhena nivāraṇaṭṭhena laṅgī, paligho. Ñāṇamukheti vipassanāñāṇavīthiyaṃ. Patatīti pavattati. Kammaṭṭhānauggahaparipucchāvasenāti catusaccakammaṭṭhānassa uggaṇhanena tassa atthaparipucchāvasena ceva vipassanāsaṅkhāta-atthavinicchaya-paripucchāvasena ca. Sabbaso ñātuṃ icchā hi paripucchā. Vipassanā ca aniccādito sabbatebhūmakadhammānaṃ ñātuṃ icchati. Evaṃ vipassanāvasena avijjāpahānamāha, uparikattabbasabbhāvato na tāva maggavasena.
வல்லிஅந்தரே வாதி வா-ஸத்³தோ³ பங்ஸுஅந்தரே வா மத்திகந்தரே வாதி அவுத்தவிகப்பத்தோ². சித்தாவிலமத்தகோவாதி சித்தக்கோ²ப⁴மத்தகோவ. அனிக்³க³ஹிதோதி படிஸங்கா²னப³லேன அனிவாரிதோ. முக²விகுலனங் முக²ஸங்கோசோ. ஹனுஸஞ்சோபனங் பாபேதி அந்தோஜப்பனாவத்தா²யங். தி³ஸா விலோகனங் பாபேதி யத்த² பா³தே⁴தப்³போ³ டி²தோ, தங்த³ஸ்ஸனத்த²ங் நிவாரகபரிவாரணத்த²ங். த³ண்ட³ஸத்தா²பி⁴னிபாதந்தி த³ண்ட³ஸத்தா²னங் பரஸ்ஸ உபரி நிபாதனாவத்த²ங். யேன கோதே⁴ன அனிக்³க³ஹிதேன மாதாதி³கங் அகா⁴தேதப்³ப³ங் உக்³கா⁴தெத்வா ‘‘அயுத்தங் வத மயா கத’’ந்தி அத்தானம்பி ஹனதி, தங் ஸந்தா⁴யேதங் வுத்தங் ‘‘பரகா⁴தனம்பி அத்தகா⁴தனம்பி பாபேதீ’’தி. யேன வா பரஸ்ஸ ஹஞ்ஞமானஸ்ஸ வஸேன கா⁴தகோபி கா⁴தனங் பாபுணாதி, தாதி³ஸஸ்ஸ வஸேனாயமத்தோ² வேதி³தப்³போ³. கோத⁴ஸாமஞ்ஞேன ஹேதங் வுத்தங் ‘‘பரங் கா⁴தெத்வா அத்தானங் கா⁴தேதீ’’தி. பரமுஸ்ஸத³க³தோதி பரமுக்கங்ஸக³தோ. த³ள்ஹங் பரிஸ்ஸயமாவஹதாய கோதோ⁴வ கோதூ⁴பாயாஸோ. தேனாஹ ‘‘ப³லவப்பத்தோ’’திஆதி³.
Valliantare vāti vā-saddo paṃsuantare vā mattikantare vāti avuttavikappattho. Cittāvilamattakovāti cittakkhobhamattakova. Aniggahitoti paṭisaṅkhānabalena anivārito. Mukhavikulanaṃ mukhasaṅkoco. Hanusañcopanaṃ pāpeti antojappanāvatthāyaṃ. Disā vilokanaṃ pāpeti yattha bādhetabbo ṭhito, taṃdassanatthaṃ nivārakaparivāraṇatthaṃ. Daṇḍasatthābhinipātanti daṇḍasatthānaṃ parassa upari nipātanāvatthaṃ. Yena kodhena aniggahitena mātādikaṃ aghātetabbaṃ ugghātetvā ‘‘ayuttaṃ vata mayā kata’’nti attānampi hanati, taṃ sandhāyetaṃ vuttaṃ ‘‘paraghātanampi attaghātanampi pāpetī’’ti. Yena vā parassa haññamānassa vasena ghātakopi ghātanaṃ pāpuṇāti, tādisassa vasenāyamattho veditabbo. Kodhasāmaññena hetaṃ vuttaṃ ‘‘paraṃ ghātetvā attānaṃ ghātetī’’ti. Paramussadagatoti paramukkaṃsagato. Daḷhaṃ parissayamāvahatāya kodhova kodhūpāyāso. Tenāha ‘‘balavappatto’’tiādi.
த்³வேதா⁴பத²ஸமா ஹோதி அப்படிபத்திஹேதுபா⁴வதோ.
Dvedhāpathasamāhoti appaṭipattihetubhāvato.
குஸலத⁴ம்மோ ந திட்ட²தி நீவரணேஹி நிவாரிதபரமத்தா. ஸமத²புப்³ப³ங்க³மங் விபஸ்ஸனங் பா⁴வயதோ பட²மங் ஸமதே²ன நீவரணவிக்க²ம்ப⁴னங் ஹோதி, விபஸ்ஸனா பன தத³ங்க³வஸேனேவ தானி நீஹரதீதி வுத்தங் ‘‘விக்க²ம்ப⁴னதத³ங்க³வஸேனா’’தி.
Kusaladhammo na tiṭṭhati nīvaraṇehi nivāritaparamattā. Samathapubbaṅgamaṃ vipassanaṃ bhāvayato paṭhamaṃ samathena nīvaraṇavikkhambhanaṃ hoti, vipassanā pana tadaṅgavaseneva tāni nīharatīti vuttaṃ ‘‘vikkhambhanatadaṅgavasenā’’ti.
‘‘கும்மோவ அங்கா³னி ஸகே கபாலே’’திஆதீ³ஸு (ஸங்॰ நி॰ 1.17) கும்மஸ்ஸ அங்க³பா⁴வேன விஸேஸதோ பாத³ஸீஸானி ஏவ வுச்சந்தீதி ஆஹ ‘‘பஞ்சேவ அங்கா³னி ஹொந்தீ’’தி. விபஸ்ஸனாசாரஸ்ஸ வுச்சமானத்தா அதி⁴காரதோ ஸம்மஸனீயானமேவ த⁴ம்மானங் இத⁴ க³ஹணந்தி ‘‘ஸப்³பே³பி ஸங்க²தா த⁴ம்மா’’தி விஸேஸங் கத்வாவ வுத்தங். தேனாஹ ப⁴க³வா ‘‘பஞ்சன்னேதங் உபாதா³னக்க²ந்தா⁴னங் அதி⁴வசன’’ந்தி.
‘‘Kummova aṅgāni sake kapāle’’tiādīsu (saṃ. ni. 1.17) kummassa aṅgabhāvena visesato pādasīsāni eva vuccantīti āha ‘‘pañceva aṅgāni hontī’’ti. Vipassanācārassa vuccamānattā adhikārato sammasanīyānameva dhammānaṃ idha gahaṇanti ‘‘sabbepi saṅkhatā dhammā’’ti visesaṃ katvāva vuttaṃ. Tenāha bhagavā ‘‘pañcannetaṃ upādānakkhandhānaṃ adhivacana’’nti.
ஸுனந்தி கொட்டந்தி எத்தா²தி ஸூனா, அதி⁴குட்டனந்தி ஆஹ ‘‘ஸூனாய உபரீ’’தி. அஸினாதி மங்ஸகந்தனேன. கா⁴தியமானாதி ஹஞ்ஞமானா விபா³தி⁴யமானா. வத்து²காமானங் உபரி கத்வாதி வத்து²காமேஸு ட²பெத்வா தே அச்சாதா⁴னங் கத்வா. கந்திதாதி சி²ந்தி³தா. கொட்டிதாதி பி³லஸோ விப⁴ஜிதா. ச²ந்த³ராக³ப்பஹானந்தி ச²ந்த³ராக³ஸ்ஸ விக்க²ம்ப⁴னப்பஹானங்.
Sunanti koṭṭanti etthāti sūnā, adhikuṭṭananti āha ‘‘sūnāya uparī’’ti. Asināti maṃsakantanena. Ghātiyamānāti haññamānā vibādhiyamānā. Vatthukāmānaṃ upari katvāti vatthukāmesu ṭhapetvā te accādhānaṃ katvā. Kantitāti chinditā. Koṭṭitāti bilaso vibhajitā. Chandarāgappahānanti chandarāgassa vikkhambhanappahānaṃ.
ஸம்மத்தாதி முச்சி²தா ஸம்மூள்ஹா. நந்தீ³ராக³ங் உபக³ம்ம வட்டங் வட்³டெ⁴ந்தீதி ஸம்மூள்ஹத்தா ஏவஆதீ³னவங் அபஸ்ஸந்தா நந்தீ³ராக³ஸ்ஸ ஆரம்மணங் உபக³ந்த்வா தங் பரிப்³ரூஹெந்தி. நந்தீ³ராக³ப³த்³தா⁴தி நந்தீ³ராகே³ லக்³க³த்தா தேன ப³த்³தா⁴. வட்டே லக்³க³ந்தீதி தேபூ⁴மகே வட்டே ஸஜ்ஜந்தி. தத்த² ஸஜ்ஜத்தா ஏவ து³க்க²ங் பத்வாபி ந உக்கண்ட²ந்தி ந நிப்³பி³ந்த³ந்தி. இத⁴ அனவஸேஸப்பஹானங் அதி⁴ப்பேதந்தி ஆஹ ‘‘சதுத்த²மக்³கே³ன நந்தீ³ராக³ப்பஹானங் கதி²த’’ந்தி.
Sammattāti mucchitā sammūḷhā. Nandīrāgaṃ upagamma vaṭṭaṃ vaḍḍhentīti sammūḷhattā evaādīnavaṃ apassantā nandīrāgassa ārammaṇaṃ upagantvā taṃ paribrūhenti. Nandīrāgabaddhāti nandīrāge laggattā tena baddhā. Vaṭṭe laggantīti tebhūmake vaṭṭe sajjanti. Tattha sajjattā eva dukkhaṃ patvāpi na ukkaṇṭhanti na nibbindanti. Idha anavasesappahānaṃ adhippetanti āha ‘‘catutthamaggena nandīrāgappahānaṃ kathita’’nti.
அனங்க³ணஸுத்தே (ம॰ நி॰ அட்ட²॰ 1.63) பகாஸிதோ ஏவ ‘‘ச²ந்தா³தீ³ஹி ந க³ச்ச²ந்தீ’’திஆதி³னா. ‘‘பு³த்³தோ⁴ ஸோ ப⁴க³வா’’திஆதி³ ‘‘நமோ கரோஹீ’’தி (ம॰ நி॰ 1.249, 251) வுத்தனமக்காரஸ்ஸ கரணாகாரத³ஸ்ஸனங். போ³தா⁴யாதி சதுஸச்சஸம்போ³தா⁴ய. ததா² த³மத²ஸமத²தரணபரினிப்³பா³னானி அரியமக்³க³வஸேன வேதி³தப்³பா³னி. ஸமத²பரினிப்³பா³னானி பன அனுபாதி³ஸேஸவஸேனபி யோஜேதப்³பா³னி. கம்மட்டா²னங் அஹோஸீதி விபஸ்ஸனாகம்மட்டா²னங் அஹோஸி. ஏதஸ்ஸ பஞ்ஹஸ்ஸாதி ஏதஸ்ஸ பன்னரஸமஸ்ஸ பஞ்ஹஸ்ஸ அத்தோ². ஏவங் இதரேஸுபி வத்தப்³ப³ங் விபஸ்ஸனாகம்மட்டா²னங் கீ²ணாஸவகு³ணேஹி மத்த²கங் பாபெந்தோ யதா²னுஸந்தி⁴னாவ தே³ஸனங் நிட்ட²பேஸி, ந புச்சி²தானுஸந்தி⁴னாதி அதி⁴ப்பாயோ. நனு ச புச்சா²வஸேனாயங் தே³ஸனா ஆரத்³தா⁴தி? ஸச்சங் ஆரத்³தா⁴, ஏவங் பன ‘‘புச்சா²வஸிகோ நிக்கே²போ’’தி வத்தப்³ப³ங், ந ‘‘புச்சா²னுஸந்தி⁴வஸேன நிட்ட²பிதா’’தி. அந்தரபுச்சா²வஸேன தே³ஸனாய அபரிவத்திதத்தா ஆரம்பா⁴னுரூபமேவ பன தே³ஸனா நிட்ட²பிதா.
Anaṅgaṇasutte (ma. ni. aṭṭha. 1.63) pakāsito eva ‘‘chandādīhi na gacchantī’’tiādinā. ‘‘Buddho so bhagavā’’tiādi ‘‘namo karohī’’ti (ma. ni. 1.249, 251) vuttanamakkārassa karaṇākāradassanaṃ. Bodhāyāti catusaccasambodhāya. Tathā damathasamathataraṇaparinibbānāni ariyamaggavasena veditabbāni. Samathaparinibbānāni pana anupādisesavasenapi yojetabbāni. Kammaṭṭhānaṃ ahosīti vipassanākammaṭṭhānaṃ ahosi. Etassa pañhassāti etassa pannarasamassa pañhassa attho. Evaṃ itaresupi vattabbaṃ vipassanākammaṭṭhānaṃ khīṇāsavaguṇehi matthakaṃ pāpento yathānusandhināva desanaṃ niṭṭhapesi, na pucchitānusandhināti adhippāyo. Nanu ca pucchāvasenāyaṃ desanā āraddhāti? Saccaṃ āraddhā, evaṃ pana ‘‘pucchāvasiko nikkhepo’’ti vattabbaṃ, na ‘‘pucchānusandhivasena niṭṭhapitā’’ti. Antarapucchāvasena desanāya aparivattitattā ārambhānurūpameva pana desanā niṭṭhapitā.
வம்மிகஸுத்தவண்ணனாய லீனத்த²ப்பகாஸனா ஸமத்தா.
Vammikasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. வம்மிகஸுத்தங் • 3. Vammikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. வம்மிகஸுத்தவண்ணனா • 3. Vammikasuttavaṇṇanā
