| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
७. वंसङ्गपञ्हो
7. Vaṃsaṅgapañho
७. ‘‘भन्ते नागसेन, ‘वंसस्स एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, वंसो यत्थ वातो, तत्थ अनुलोमेति, नाञ्ञत्थमनुधावति, एवमेव खो, महाराज, योगिना योगावचरेन यं बुद्धेन भगवता भासितं नवङ्गं सत्थु सासनं, तं अनुलोमयित्वा कप्पिये अनवज्जे ठत्वा समणधम्मं येव परियेसितब्बं। इदं, महाराज, वंसस्स एकं अङ्गं गहेतब्बं। भासितम्पेतं महाराज थेरेन राहुलेन –
7. ‘‘Bhante nāgasena, ‘vaṃsassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vaṃso yattha vāto, tattha anulometi, nāññatthamanudhāvati, evameva kho, mahārāja, yoginā yogāvacarena yaṃ buddhena bhagavatā bhāsitaṃ navaṅgaṃ satthu sāsanaṃ, taṃ anulomayitvā kappiye anavajje ṭhatvā samaṇadhammaṃ yeva pariyesitabbaṃ. Idaṃ, mahārāja, vaṃsassa ekaṃ aṅgaṃ gahetabbaṃ. Bhāsitampetaṃ mahārāja therena rāhulena –
‘‘‘नवङ्गं बुद्धवचनं, अनुलोमेत्वान सब्बदा।
‘‘‘Navaṅgaṃ buddhavacanaṃ, anulometvāna sabbadā;
कप्पिये अनवज्जस्मिं, ठत्वापायं समुत्तरि’’’न्ति॥
Kappiye anavajjasmiṃ, ṭhatvāpāyaṃ samuttari’’’nti.
वंसङ्गपञ्हो सत्तमो।
Vaṃsaṅgapañho sattamo.
