| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. ဝံသင္ဂပဉ္ဟော
7. Vaṃsaṅgapañho
၇. ‘‘ဘန္တေ နာဂသေန, ‘ဝံသသ္သ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဝံသော ယတ္ထ ဝာတော, တတ္ထ အနုလောမေတိ, နာညတ္ထမနုဓာဝတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ယံ ဗုဒ္ဓေန ဘဂဝတာ ဘာသိတံ နဝင္ဂံ သတ္ထု သာသနံ, တံ အနုလောမယိတ္ဝာ ကပ္ပိယေ အနဝဇ္ဇေ ဌတ္ဝာ သမဏဓမ္မံ ယေဝ ပရိယေသိတဗ္ဗံ။ ဣဒံ, မဟာရာဇ, ဝံသသ္သ ဧကံ အင္ဂံ ဂဟေတဗ္ဗံ။ ဘာသိတမ္ပေတံ မဟာရာဇ ထေရေန ရာဟုလေန –
7. ‘‘Bhante nāgasena, ‘vaṃsassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, vaṃso yattha vāto, tattha anulometi, nāññatthamanudhāvati, evameva kho, mahārāja, yoginā yogāvacarena yaṃ buddhena bhagavatā bhāsitaṃ navaṅgaṃ satthu sāsanaṃ, taṃ anulomayitvā kappiye anavajje ṭhatvā samaṇadhammaṃ yeva pariyesitabbaṃ. Idaṃ, mahārāja, vaṃsassa ekaṃ aṅgaṃ gahetabbaṃ. Bhāsitampetaṃ mahārāja therena rāhulena –
‘‘‘နဝင္ဂံ ဗုဒ္ဓဝစနံ၊ အနုလောမေတ္ဝာန သဗ္ဗဒာ။
‘‘‘Navaṅgaṃ buddhavacanaṃ, anulometvāna sabbadā;
ကပ္ပိယေ အနဝဇ္ဇသ္မိံ၊ ဌတ္ဝာပာယံ သမုတ္တရိ’’’န္တိ။
Kappiye anavajjasmiṃ, ṭhatvāpāyaṃ samuttari’’’nti.
ဝံသင္ဂပဉ္ဟော သတ္တမော။
Vaṃsaṅgapañho sattamo.
