| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
7. වනකම්‌මිකසුත්‌තවණ්‌ණනා
7. Vanakammikasuttavaṇṇanā
203. වනකම්‌මෙ නියුත්‌තො, කිරියමානෙන වනකම්‌මං එතස්‌ස අත්‌ථීති වනකම්‌මිකො. ඉමස්‌මිං වනසණ්‌ඩෙති ඉමස්‌මිං එවංමහන්‌තෙ වනසණ්‌ඩෙ. න මෙ වනස්‌මිං කරණීයමත්‌ථි යථා, ‘‘බ්‍රාහ්‌මණ, තුය්‌හ’’න්‌ති අධිප්‌පායො. ඉතරං පන යං මහාකිලෙසවනං, තං මග්‌ගඤාණඵරසුනා සමාධිමයසිලායං සුනිසිතෙන සබ්‌බසො උච්‌ඡින්‌නමූලං, තතො එව නිබ්‌බනථො නික්‌කිලෙසගහනො. විවෙකාභිරතියා එකකො අභිරතො පටිපක්‌ඛවිගමෙන. තෙනාහ ‘‘අරතිං…පෙ.… ජහිත්‌වා’’ති.
203. Vanakamme niyutto, kiriyamānena vanakammaṃ etassa atthīti vanakammiko. Imasmiṃ vanasaṇḍeti imasmiṃ evaṃmahante vanasaṇḍe. Na me vanasmiṃ karaṇīyamatthi yathā, ‘‘brāhmaṇa, tuyha’’nti adhippāyo. Itaraṃ pana yaṃ mahākilesavanaṃ, taṃ maggañāṇapharasunā samādhimayasilāyaṃ sunisitena sabbaso ucchinnamūlaṃ, tato eva nibbanatho nikkilesagahano. Vivekābhiratiyā ekako abhirato paṭipakkhavigamena. Tenāha ‘‘aratiṃ…pe… jahitvā’’ti.
වනකම්‌මිකසුත්‌තවණ්‌ණනා නිට්‌ඨිතා.
Vanakammikasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. නවකම්‌මිකසුත්‌තං • 7. Navakammikasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. නවකම්‌මිකසුත්‌තවණ්‌ණනා • 7. Navakammikasuttavaṇṇanā
