| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
7. வனபத்த²பரியாயஸுத்தவண்ணனா
7. Vanapatthapariyāyasuttavaṇṇanā
190. வனீயதி விவேககாமேஹி ப⁴ஜீயதி, வனுதே வா தே அத்தஸம்பத்தியா வஸனத்தா²ய யாசந்தோ விய ஹோதீதி வனங், பதிட்ட²ந்தி எத்த² விவேககாமா யதா²தி⁴ப்பேதவிஸேஸாதி⁴க³மேனாதி பத்த²ங், வனேஸு பத்த²ங் க³ஹனட்டா²னே ஸேனாஸனங் வனபத்த²ங். பரியாயதி அத்தனோ ப²லங் பரிக்³க³ஹெத்வா வத்ததீதி பரியாயோ, காரணந்தி ஆஹ ‘‘வனபத்த²பரியாயந்தி வனபத்த²காரண’’ந்தி. வனபத்த²ஞ்ஹி தங் உபனிஸ்ஸாய விஹரதோ உபனிஸ்ஸயகாரணங். தேனாஹ ‘‘வனபத்த²ங் உபனிஸ்ஸாய விஹரதீ’’தி. பரியாயதி தே³ஸேதப்³ப³மத்த²ங் பதிட்ட²பேதீதி பரியாயோ, தே³ஸனா. வனபத்த²ங் ஆரப்³ப⁴ பவத்தா தே³ஸனா வனபத்த²தே³ஸனா, தங், உப⁴யத்தா²பி வனபத்த²க்³க³ஹணங் லக்க²ணமத்தங் கா³மாதீ³னம்பெத்த² காரணபா⁴வஸ்ஸ, தே³ஸனாய விஸயபா⁴வஸ்ஸ ச லப்³ப⁴மானத்தா.
190. Vanīyati vivekakāmehi bhajīyati, vanute vā te attasampattiyā vasanatthāya yācanto viya hotīti vanaṃ, patiṭṭhanti ettha vivekakāmā yathādhippetavisesādhigamenāti patthaṃ, vanesu patthaṃ gahanaṭṭhāne senāsanaṃ vanapatthaṃ. Pariyāyati attano phalaṃ pariggahetvā vattatīti pariyāyo, kāraṇanti āha ‘‘vanapatthapariyāyanti vanapatthakāraṇa’’nti. Vanapatthañhi taṃ upanissāya viharato upanissayakāraṇaṃ. Tenāha ‘‘vanapatthaṃ upanissāya viharatī’’ti. Pariyāyati desetabbamatthaṃ patiṭṭhapetīti pariyāyo, desanā. Vanapatthaṃ ārabbha pavattā desanā vanapatthadesanā, taṃ, ubhayatthāpi vanapatthaggahaṇaṃ lakkhaṇamattaṃ gāmādīnampettha kāraṇabhāvassa, desanāya visayabhāvassa ca labbhamānattā.
191. நிஸ்ஸாயாதி அபஸ்ஸாய, விவேகவாஸஸ்ஸ அபஸ்ஸயங் கத்வாதி அத்தோ². ந உபட்டா²தீதிஆதீ³ஹி தஸ்மிங் வனபத்தே² ஸேனாஸனஸப்பாயாபா⁴வங், உதுபுக்³க³லத⁴ம்மஸ்ஸவனஸப்பாயாபா⁴வம்பி வா த³ஸ்ஸேதி. ஜீவிதஸம்பா⁴ராதி (அ॰ நி॰ டீ॰ 3.9.6) ஜீவிதப்பவத்தியா ஸம்பா⁴ரா பச்சயா. ஸமுதா³னேதப்³பா³தி ஸம்மா ஞாயேன அனவஜ்ஜஉஞ்சா²சரியாதி³னா உத்³த⁴ங் உத்³த⁴ங் ஆனேதப்³பா³ பாபுணிதப்³பா³. தே பன ததா² ஸமுதா³னிதா ஸமாஹடா நாம ஹொந்தீதி ஆஹ ‘‘ஸமாஹரிதப்³பா³’’தி. து³க்கே²ன உப்பஜ்ஜந்தீதி ஸுலபு⁴ப்பாதா³ ந ஹொந்தி. ஏதேன போ⁴ஜனஸப்பாயாதி³அபா⁴வங் த³ஸ்ஸேதி. ரத்திபா⁴க³ங் வா தி³வஸபா⁴க³ங் வாதி பு⁴ம்மத்தே² உபயோக³வசனந்தி ஆஹ ‘‘ரத்திகொட்டா²ஸே வா தி³வஸகொட்டா²ஸே வா’’தி. ரத்திங்யேவ பக்கமிதப்³ப³ங் ஸமணத⁴ம்மஸ்ஸ தத்த² அனிப்ப²ஜ்ஜனதோ.
191.Nissāyāti apassāya, vivekavāsassa apassayaṃ katvāti attho. Na upaṭṭhātītiādīhi tasmiṃ vanapatthe senāsanasappāyābhāvaṃ, utupuggaladhammassavanasappāyābhāvampi vā dasseti. Jīvitasambhārāti (a. ni. ṭī. 3.9.6) jīvitappavattiyā sambhārā paccayā. Samudānetabbāti sammā ñāyena anavajjauñchācariyādinā uddhaṃ uddhaṃ ānetabbā pāpuṇitabbā. Te pana tathā samudānitā samāhaṭā nāma hontīti āha ‘‘samāharitabbā’’ti. Dukkhena uppajjantīti sulabhuppādā na honti. Etena bhojanasappāyādiabhāvaṃ dasseti. Rattibhāgaṃ vā divasabhāgaṃ vāti bhummatthe upayogavacananti āha ‘‘rattikoṭṭhāse vā divasakoṭṭhāse vā’’ti. Rattiṃyeva pakkamitabbaṃ samaṇadhammassa tattha anipphajjanato.
192-3. ஸங்கா²பீதி ‘‘யத³த்த²மஹங் பப்³ப³ஜிதோ, ந மேதங் இத⁴ நிப்ப²ஜ்ஜதி, சீவராதி³ பன ஸமுதா³க³ச்ச²தி, நாஹங் தத³த்த²ங் பப்³ப³ஜிதோ, கிங் மே இத⁴ வாஸேனா’’தி படிஸங்கா²யபி. அனந்தரவாரே ஸங்கா²பீதி ‘‘யத³த்த²மஹங் பப்³ப³ஜிதோ, தங் மே இத⁴ நிப்ப²ஜ்ஜதி, சீவராதி³ பன ந ஸமுதா³க³ச்ச²தி, நாஹங் தத³த்த²ங் பப்³ப³ஜிதோ’’தி படிஸங்கா²யபீதி அத்தோ². தேனாஹ ‘‘ஸமணத⁴ம்மஸ்ஸ நிப்ப²ஜ்ஜனபா⁴வங் ஜானித்வா’’தி.
192-3.Saṅkhāpīti ‘‘yadatthamahaṃ pabbajito, na metaṃ idha nipphajjati, cīvarādi pana samudāgacchati, nāhaṃ tadatthaṃ pabbajito, kiṃ me idha vāsenā’’ti paṭisaṅkhāyapi. Anantaravāre saṅkhāpīti ‘‘yadatthamahaṃ pabbajito, taṃ me idha nipphajjati, cīvarādi pana na samudāgacchati, nāhaṃ tadatthaṃ pabbajito’’ti paṭisaṅkhāyapīti attho. Tenāha ‘‘samaṇadhammassa nipphajjanabhāvaṃ jānitvā’’ti.
195-7. ஸோ புக்³க³லோ அனாபுச்சா² பக்கமிதப்³ப³ங், நானுப³ந்தி⁴தப்³போ³தி ‘‘ஸோ புக்³க³லோ’’தி பத³ஸ்ஸ ‘‘நானுப³ந்தி⁴தப்³போ³’’தி இமினா ஸம்ப³ந்தோ⁴. யஸ்ஸ யேன ஹி ஸம்ப³ந்தோ⁴, தூ³ரட்டே²னபி ஸோ ப⁴வதி . தங் புக்³க³லந்தி ‘‘ஸோ புக்³க³லோ’’தி பச்சத்தவசனங் உபயோக³வஸேன பரிணாமெத்வா தங் புக்³க³லங் அனாபுச்சா² பக்கமிதப்³ப³ந்தி அத்தோ². அத்த²வஸேன ஹி விப⁴த்திவிபரிணாமோதி. தங் ஆபுச்சா² பக்கமிதப்³ப³ந்தி எத்தா²பி ஏஸேவ நயோ. ஆபுச்சா² பக்கமிதப்³ப³ந்தி ச கதஞ்ஞுதகதவேதி³தாய நியோஜனங்.
195-7.Sopuggalo anāpucchā pakkamitabbaṃ, nānubandhitabboti ‘‘so puggalo’’ti padassa ‘‘nānubandhitabbo’’ti iminā sambandho. Yassa yena hi sambandho, dūraṭṭhenapi so bhavati . Taṃ puggalanti ‘‘so puggalo’’ti paccattavacanaṃ upayogavasena pariṇāmetvā taṃ puggalaṃ anāpucchā pakkamitabbanti attho. Atthavasena hi vibhattivipariṇāmoti. Taṃ āpucchā pakkamitabbanti etthāpi eseva nayo. Āpucchā pakkamitabbanti ca kataññutakataveditāya niyojanaṃ.
198. ஏவரூபோதி யங் நிஸ்ஸாய பி⁴க்கு²னோ கு³ணேஹி வுத்³தி⁴யேவ பாடிகங்கா², பச்சயேஹி ச ந பரிஸ்ஸமோ, ஏவரூபோ த³ண்ட³கம்மாதீ³ஹி நிக்³க³ண்ஹாதி சேபி, ந பரிச்சஜிதப்³போ³தி த³ஸ்ஸேதி ‘‘ஸசேபீ’’திஆதி³னா.
198.Evarūpoti yaṃ nissāya bhikkhuno guṇehi vuddhiyeva pāṭikaṅkhā, paccayehi ca na parissamo, evarūpo daṇḍakammādīhi niggaṇhāti cepi, na pariccajitabboti dasseti ‘‘sacepī’’tiādinā.
வனபத்த²பரியாயஸுத்தவண்ணனாய லீனத்த²ப்பகாஸனா ஸமத்தா.
Vanapatthapariyāyasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. வனபத்த²ஸுத்தங் • 7. Vanapatthasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 7. வனபத்த²பரியாயஸுத்தவண்ணனா • 7. Vanapatthapariyāyasuttavaṇṇanā
