| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৭. ৰনপত্থপরিযাযসুত্তৰণ্ণনা
7. Vanapatthapariyāyasuttavaṇṇanā
১৯০. এৰং মে সুতন্তি ৰনপত্থপরিযাযং। তত্থ ৰনপত্থপরিযাযন্তি ৰনপত্থকারণং, ৰনপত্থদেসনং ৰা।
190.Evaṃme sutanti vanapatthapariyāyaṃ. Tattha vanapatthapariyāyanti vanapatthakāraṇaṃ, vanapatthadesanaṃ vā.
১৯১. ৰনপত্থং উপনিস্সায ৰিহরতীতি মনুস্সূপচারাতিক্কন্তং ৰনসণ্ডসেনাসনং নিস্সায সমণধম্মং করোন্তো ৰিহরতি। অনুপট্ঠিতাতিআদীসু পুব্বে অনুপট্ঠিতা সতি তং উপনিস্সায ৰিহরতোপি ন উপট্ঠাতি, পুব্বে অসমাহিতং চিত্তং ন সমাধিযতি, পুব্বে অপরিক্খীণা আসৰা ন পরিক্খযং গচ্ছন্তি, পুব্বে অননুপ্পত্তং অনুত্তরং যোগক্খেমসঙ্খাতং অরহত্তঞ্চ ন পাপুণাতীতি অত্থো। জীৰিতপরিক্খারাতি জীৰিতসম্ভারা। সমুদানেতব্বাতি সমাহরিতব্বা। কসিরেন সমুদাগচ্ছন্তীতি দুক্খেন উপ্পজ্জন্তি। রত্তিভাগং ৰা দিৰসভাগং ৰাতি রত্তিকোট্ঠাসে ৰা দিৰসকোট্ঠাসে ৰা। এত্থ চ রত্তিভাগে পটিসঞ্চিক্খমানেন ঞত্ৰা রত্তিংযেৰ পক্কমিতব্বং, রত্তিং চণ্ডৰাল়াদীনং পরিবন্ধে সতি অরুণুগ্গমনং আগমেতব্বং। দিৰসভাগে ঞত্ৰা দিৰাৰ পক্কমিতব্বং, দিৰা পরিবন্ধে সতি সূরিযত্থঙ্গমনং আগমেতব্বং।
191.Vanapatthaṃ upanissāya viharatīti manussūpacārātikkantaṃ vanasaṇḍasenāsanaṃ nissāya samaṇadhammaṃ karonto viharati. Anupaṭṭhitātiādīsu pubbe anupaṭṭhitā sati taṃ upanissāya viharatopi na upaṭṭhāti, pubbe asamāhitaṃ cittaṃ na samādhiyati, pubbe aparikkhīṇā āsavā na parikkhayaṃ gacchanti, pubbe ananuppattaṃ anuttaraṃ yogakkhemasaṅkhātaṃ arahattañca na pāpuṇātīti attho. Jīvitaparikkhārāti jīvitasambhārā. Samudānetabbāti samāharitabbā. Kasirena samudāgacchantīti dukkhena uppajjanti. Rattibhāgaṃ vā divasabhāgaṃ vāti rattikoṭṭhāse vā divasakoṭṭhāse vā. Ettha ca rattibhāge paṭisañcikkhamānena ñatvā rattiṃyeva pakkamitabbaṃ, rattiṃ caṇḍavāḷādīnaṃ paribandhe sati aruṇuggamanaṃ āgametabbaṃ. Divasabhāge ñatvā divāva pakkamitabbaṃ, divā paribandhe sati sūriyatthaṅgamanaṃ āgametabbaṃ.
১৯২. সঙ্খাপীতি এৰং সমণধম্মস্স অনিপ্ফজ্জনভাৰং জানিত্ৰা। অনন্তরৰারে পন সঙ্খাপীতি এৰং সমণধম্মস্স নিপ্ফজ্জনভাৰং জানিত্ৰা।
192.Saṅkhāpīti evaṃ samaṇadhammassa anipphajjanabhāvaṃ jānitvā. Anantaravāre pana saṅkhāpīti evaṃ samaṇadhammassa nipphajjanabhāvaṃ jānitvā.
১৯৪. যাৰজীৰন্তি যাৰ জীৰিতং পৰত্ততি, তাৰ ৰত্থব্বমেৰ।
194.Yāvajīvanti yāva jīvitaṃ pavattati, tāva vatthabbameva.
১৯৫. সো পুগ্গলোতি পদস্স নানুবন্ধিতব্বোতি ইমিনা সম্বন্ধো। অনাপুচ্ছাতি ইধ পন তং পুগ্গলং অনাপুচ্ছা পক্কমিতব্বন্তি অত্থো।
195.So puggaloti padassa nānubandhitabboti iminā sambandho. Anāpucchāti idha pana taṃ puggalaṃ anāpucchā pakkamitabbanti attho.
১৯৭. সঙ্খাপীতি এৰং সমণধম্মস্স অনিপ্ফজ্জনভাৰং ঞত্ৰা সো পুগ্গলো নানুবন্ধিতব্বো, তং আপুচ্ছা পক্কমিতব্বং।
197.Saṅkhāpīti evaṃ samaṇadhammassa anipphajjanabhāvaṃ ñatvā so puggalo nānubandhitabbo, taṃ āpucchā pakkamitabbaṃ.
১৯৮. অপি পনুজ্জমানেনাপীতি অপি নিক্কড্ঢীযমানেনাপি। এৰরূপো হি পুগ্গলো সচেপি দারুকলাপসতং ৰা উদকঘটসতং ৰা ৰালিকম্বণসতং ৰা দণ্ডং আহরাপেতি, মা ইধ ৰসীতি নিক্কড্ঢাপেতি ৰা, তং তং খমাপেত্ৰা যাৰজীৰং ৰত্থব্বমেৰাতি।
198.Apipanujjamānenāpīti api nikkaḍḍhīyamānenāpi. Evarūpo hi puggalo sacepi dārukalāpasataṃ vā udakaghaṭasataṃ vā vālikambaṇasataṃ vā daṇḍaṃ āharāpeti, mā idha vasīti nikkaḍḍhāpeti vā, taṃ taṃ khamāpetvā yāvajīvaṃ vatthabbamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
ৰনপত্থপরিযাযসুত্তৰণ্ণনা নিট্ঠিতা।
Vanapatthapariyāyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. ৰনপত্থসুত্তং • 7. Vanapatthasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. ৰনপত্থপরিযাযসুত্তৰণ্ণনা • 7. Vanapatthapariyāyasuttavaṇṇanā
