| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৭. ৰনপত্থপরিযাযসুত্তৰণ্ণনা
7. Vanapatthapariyāyasuttavaṇṇanā
১৯০. ৰনীযতি ৰিৰেককামেহি ভজীযতি, ৰনুতে ৰা তে অত্তসম্পত্তিযা ৰসনত্থায যাচন্তো ৰিয হোতীতি ৰনং, পতিট্ঠন্তি এত্থ ৰিৰেককামা যথাধিপ্পেতৰিসেসাধিগমেনাতি পত্থং, ৰনেসু পত্থং গহনট্ঠানে সেনাসনং ৰনপত্থং। পরিযাযতি অত্তনো ফলং পরিগ্গহেত্ৰা ৰত্ততীতি পরিযাযো, কারণন্তি আহ ‘‘ৰনপত্থপরিযাযন্তি ৰনপত্থকারণ’’ন্তি। ৰনপত্থঞ্হি তং উপনিস্সায ৰিহরতো উপনিস্সযকারণং। তেনাহ ‘‘ৰনপত্থং উপনিস্সায ৰিহরতী’’তি। পরিযাযতি দেসেতব্বমত্থং পতিট্ঠপেতীতি পরিযাযো, দেসনা। ৰনপত্থং আরব্ভ পৰত্তা দেসনা ৰনপত্থদেসনা, তং, উভযত্থাপি ৰনপত্থগ্গহণং লক্খণমত্তং গামাদীনম্পেত্থ কারণভাৰস্স, দেসনায ৰিসযভাৰস্স চ লব্ভমানত্তা।
190. Vanīyati vivekakāmehi bhajīyati, vanute vā te attasampattiyā vasanatthāya yācanto viya hotīti vanaṃ, patiṭṭhanti ettha vivekakāmā yathādhippetavisesādhigamenāti patthaṃ, vanesu patthaṃ gahanaṭṭhāne senāsanaṃ vanapatthaṃ. Pariyāyati attano phalaṃ pariggahetvā vattatīti pariyāyo, kāraṇanti āha ‘‘vanapatthapariyāyanti vanapatthakāraṇa’’nti. Vanapatthañhi taṃ upanissāya viharato upanissayakāraṇaṃ. Tenāha ‘‘vanapatthaṃ upanissāya viharatī’’ti. Pariyāyati desetabbamatthaṃ patiṭṭhapetīti pariyāyo, desanā. Vanapatthaṃ ārabbha pavattā desanā vanapatthadesanā, taṃ, ubhayatthāpi vanapatthaggahaṇaṃ lakkhaṇamattaṃ gāmādīnampettha kāraṇabhāvassa, desanāya visayabhāvassa ca labbhamānattā.
১৯১. নিস্সাযাতি অপস্সায, ৰিৰেকৰাসস্স অপস্সযং কত্ৰাতি অত্থো। ন উপট্ঠাতীতিআদীহি তস্মিং ৰনপত্থে সেনাসনসপ্পাযাভাৰং, উতুপুগ্গলধম্মস্সৰনসপ্পাযাভাৰম্পি ৰা দস্সেতি। জীৰিতসম্ভারাতি (অ॰ নি॰ টী॰ ৩.৯.৬) জীৰিতপ্পৰত্তিযা সম্ভারা পচ্চযা। সমুদানেতব্বাতি সম্মা ঞাযেন অনৰজ্জউঞ্ছাচরিযাদিনা উদ্ধং উদ্ধং আনেতব্বা পাপুণিতব্বা। তে পন তথা সমুদানিতা সমাহটা নাম হোন্তীতি আহ ‘‘সমাহরিতব্বা’’তি। দুক্খেন উপ্পজ্জন্তীতি সুলভুপ্পাদা ন হোন্তি। এতেন ভোজনসপ্পাযাদিঅভাৰং দস্সেতি। রত্তিভাগং ৰা দিৰসভাগং ৰাতি ভুম্মত্থে উপযোগৰচনন্তি আহ ‘‘রত্তিকোট্ঠাসে ৰা দিৰসকোট্ঠাসে ৰা’’তি। রত্তিংযেৰ পক্কমিতব্বং সমণধম্মস্স তত্থ অনিপ্ফজ্জনতো।
191.Nissāyāti apassāya, vivekavāsassa apassayaṃ katvāti attho. Na upaṭṭhātītiādīhi tasmiṃ vanapatthe senāsanasappāyābhāvaṃ, utupuggaladhammassavanasappāyābhāvampi vā dasseti. Jīvitasambhārāti (a. ni. ṭī. 3.9.6) jīvitappavattiyā sambhārā paccayā. Samudānetabbāti sammā ñāyena anavajjauñchācariyādinā uddhaṃ uddhaṃ ānetabbā pāpuṇitabbā. Te pana tathā samudānitā samāhaṭā nāma hontīti āha ‘‘samāharitabbā’’ti. Dukkhena uppajjantīti sulabhuppādā na honti. Etena bhojanasappāyādiabhāvaṃ dasseti. Rattibhāgaṃ vā divasabhāgaṃ vāti bhummatthe upayogavacananti āha ‘‘rattikoṭṭhāse vā divasakoṭṭhāse vā’’ti. Rattiṃyeva pakkamitabbaṃ samaṇadhammassa tattha anipphajjanato.
১৯২-৩. সঙ্খাপীতি ‘‘যদত্থমহং পব্বজিতো, ন মেতং ইধ নিপ্ফজ্জতি, চীৰরাদি পন সমুদাগচ্ছতি, নাহং তদত্থং পব্বজিতো, কিং মে ইধ ৰাসেনা’’তি পটিসঙ্খাযপি। অনন্তরৰারে সঙ্খাপীতি ‘‘যদত্থমহং পব্বজিতো, তং মে ইধ নিপ্ফজ্জতি, চীৰরাদি পন ন সমুদাগচ্ছতি, নাহং তদত্থং পব্বজিতো’’তি পটিসঙ্খাযপীতি অত্থো। তেনাহ ‘‘সমণধম্মস্স নিপ্ফজ্জনভাৰং জানিত্ৰা’’তি।
192-3.Saṅkhāpīti ‘‘yadatthamahaṃ pabbajito, na metaṃ idha nipphajjati, cīvarādi pana samudāgacchati, nāhaṃ tadatthaṃ pabbajito, kiṃ me idha vāsenā’’ti paṭisaṅkhāyapi. Anantaravāre saṅkhāpīti ‘‘yadatthamahaṃ pabbajito, taṃ me idha nipphajjati, cīvarādi pana na samudāgacchati, nāhaṃ tadatthaṃ pabbajito’’ti paṭisaṅkhāyapīti attho. Tenāha ‘‘samaṇadhammassa nipphajjanabhāvaṃ jānitvā’’ti.
১৯৫-৭. সো পুগ্গলো অনাপুচ্ছা পক্কমিতব্বং, নানুবন্ধিতব্বোতি ‘‘সো পুগ্গলো’’তি পদস্স ‘‘নানুবন্ধিতব্বো’’তি ইমিনা সম্বন্ধো। যস্স যেন হি সম্বন্ধো, দূরট্ঠেনপি সো ভৰতি । তং পুগ্গলন্তি ‘‘সো পুগ্গলো’’তি পচ্চত্তৰচনং উপযোগৰসেন পরিণামেত্ৰা তং পুগ্গলং অনাপুচ্ছা পক্কমিতব্বন্তি অত্থো। অত্থৰসেন হি ৰিভত্তিৰিপরিণামোতি। তং আপুচ্ছা পক্কমিতব্বন্তি এত্থাপি এসেৰ নযো। আপুচ্ছা পক্কমিতব্বন্তি চ কতঞ্ঞুতকতৰেদিতায নিযোজনং।
195-7.Sopuggalo anāpucchā pakkamitabbaṃ, nānubandhitabboti ‘‘so puggalo’’ti padassa ‘‘nānubandhitabbo’’ti iminā sambandho. Yassa yena hi sambandho, dūraṭṭhenapi so bhavati . Taṃ puggalanti ‘‘so puggalo’’ti paccattavacanaṃ upayogavasena pariṇāmetvā taṃ puggalaṃ anāpucchā pakkamitabbanti attho. Atthavasena hi vibhattivipariṇāmoti. Taṃ āpucchā pakkamitabbanti etthāpi eseva nayo. Āpucchā pakkamitabbanti ca kataññutakataveditāya niyojanaṃ.
১৯৮. এৰরূপোতি যং নিস্সায ভিক্খুনো গুণেহি ৰুদ্ধিযেৰ পাটিকঙ্খা, পচ্চযেহি চ ন পরিস্সমো, এৰরূপো দণ্ডকম্মাদীহি নিগ্গণ্হাতি চেপি, ন পরিচ্চজিতব্বোতি দস্সেতি ‘‘সচেপী’’তিআদিনা।
198.Evarūpoti yaṃ nissāya bhikkhuno guṇehi vuddhiyeva pāṭikaṅkhā, paccayehi ca na parissamo, evarūpo daṇḍakammādīhi niggaṇhāti cepi, na pariccajitabboti dasseti ‘‘sacepī’’tiādinā.
ৰনপত্থপরিযাযসুত্তৰণ্ণনায লীনত্থপ্পকাসনা সমত্তা।
Vanapatthapariyāyasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. ৰনপত্থসুত্তং • 7. Vanapatthasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. ৰনপত্থপরিযাযসুত্তৰণ্ণনা • 7. Vanapatthapariyāyasuttavaṇṇanā
