| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೭. ವನಪತ್ಥಪರಿಯಾಯಸುತ್ತವಣ್ಣನಾ
7. Vanapatthapariyāyasuttavaṇṇanā
೧೯೦. ಏವಂ ಮೇ ಸುತನ್ತಿ ವನಪತ್ಥಪರಿಯಾಯಂ। ತತ್ಥ ವನಪತ್ಥಪರಿಯಾಯನ್ತಿ ವನಪತ್ಥಕಾರಣಂ, ವನಪತ್ಥದೇಸನಂ ವಾ।
190.Evaṃme sutanti vanapatthapariyāyaṃ. Tattha vanapatthapariyāyanti vanapatthakāraṇaṃ, vanapatthadesanaṃ vā.
೧೯೧. ವನಪತ್ಥಂ ಉಪನಿಸ್ಸಾಯ ವಿಹರತೀತಿ ಮನುಸ್ಸೂಪಚಾರಾತಿಕ್ಕನ್ತಂ ವನಸಣ್ಡಸೇನಾಸನಂ ನಿಸ್ಸಾಯ ಸಮಣಧಮ್ಮಂ ಕರೋನ್ತೋ ವಿಹರತಿ। ಅನುಪಟ್ಠಿತಾತಿಆದೀಸು ಪುಬ್ಬೇ ಅನುಪಟ್ಠಿತಾ ಸತಿ ತಂ ಉಪನಿಸ್ಸಾಯ ವಿಹರತೋಪಿ ನ ಉಪಟ್ಠಾತಿ, ಪುಬ್ಬೇ ಅಸಮಾಹಿತಂ ಚಿತ್ತಂ ನ ಸಮಾಧಿಯತಿ, ಪುಬ್ಬೇ ಅಪರಿಕ್ಖೀಣಾ ಆಸವಾ ನ ಪರಿಕ್ಖಯಂ ಗಚ್ಛನ್ತಿ, ಪುಬ್ಬೇ ಅನನುಪ್ಪತ್ತಂ ಅನುತ್ತರಂ ಯೋಗಕ್ಖೇಮಸಙ್ಖಾತಂ ಅರಹತ್ತಞ್ಚ ನ ಪಾಪುಣಾತೀತಿ ಅತ್ಥೋ। ಜೀವಿತಪರಿಕ್ಖಾರಾತಿ ಜೀವಿತಸಮ್ಭಾರಾ। ಸಮುದಾನೇತಬ್ಬಾತಿ ಸಮಾಹರಿತಬ್ಬಾ। ಕಸಿರೇನ ಸಮುದಾಗಚ್ಛನ್ತೀತಿ ದುಕ್ಖೇನ ಉಪ್ಪಜ್ಜನ್ತಿ। ರತ್ತಿಭಾಗಂ ವಾ ದಿವಸಭಾಗಂ ವಾತಿ ರತ್ತಿಕೋಟ್ಠಾಸೇ ವಾ ದಿವಸಕೋಟ್ಠಾಸೇ ವಾ। ಏತ್ಥ ಚ ರತ್ತಿಭಾಗೇ ಪಟಿಸಞ್ಚಿಕ್ಖಮಾನೇನ ಞತ್ವಾ ರತ್ತಿಂಯೇವ ಪಕ್ಕಮಿತಬ್ಬಂ, ರತ್ತಿಂ ಚಣ್ಡವಾಳಾದೀನಂ ಪರಿಬನ್ಧೇ ಸತಿ ಅರುಣುಗ್ಗಮನಂ ಆಗಮೇತಬ್ಬಂ। ದಿವಸಭಾಗೇ ಞತ್ವಾ ದಿವಾವ ಪಕ್ಕಮಿತಬ್ಬಂ, ದಿವಾ ಪರಿಬನ್ಧೇ ಸತಿ ಸೂರಿಯತ್ಥಙ್ಗಮನಂ ಆಗಮೇತಬ್ಬಂ।
191.Vanapatthaṃ upanissāya viharatīti manussūpacārātikkantaṃ vanasaṇḍasenāsanaṃ nissāya samaṇadhammaṃ karonto viharati. Anupaṭṭhitātiādīsu pubbe anupaṭṭhitā sati taṃ upanissāya viharatopi na upaṭṭhāti, pubbe asamāhitaṃ cittaṃ na samādhiyati, pubbe aparikkhīṇā āsavā na parikkhayaṃ gacchanti, pubbe ananuppattaṃ anuttaraṃ yogakkhemasaṅkhātaṃ arahattañca na pāpuṇātīti attho. Jīvitaparikkhārāti jīvitasambhārā. Samudānetabbāti samāharitabbā. Kasirena samudāgacchantīti dukkhena uppajjanti. Rattibhāgaṃ vā divasabhāgaṃ vāti rattikoṭṭhāse vā divasakoṭṭhāse vā. Ettha ca rattibhāge paṭisañcikkhamānena ñatvā rattiṃyeva pakkamitabbaṃ, rattiṃ caṇḍavāḷādīnaṃ paribandhe sati aruṇuggamanaṃ āgametabbaṃ. Divasabhāge ñatvā divāva pakkamitabbaṃ, divā paribandhe sati sūriyatthaṅgamanaṃ āgametabbaṃ.
೧೯೨. ಸಙ್ಖಾಪೀತಿ ಏವಂ ಸಮಣಧಮ್ಮಸ್ಸ ಅನಿಪ್ಫಜ್ಜನಭಾವಂ ಜಾನಿತ್ವಾ। ಅನನ್ತರವಾರೇ ಪನ ಸಙ್ಖಾಪೀತಿ ಏವಂ ಸಮಣಧಮ್ಮಸ್ಸ ನಿಪ್ಫಜ್ಜನಭಾವಂ ಜಾನಿತ್ವಾ।
192.Saṅkhāpīti evaṃ samaṇadhammassa anipphajjanabhāvaṃ jānitvā. Anantaravāre pana saṅkhāpīti evaṃ samaṇadhammassa nipphajjanabhāvaṃ jānitvā.
೧೯೪. ಯಾವಜೀವನ್ತಿ ಯಾವ ಜೀವಿತಂ ಪವತ್ತತಿ, ತಾವ ವತ್ಥಬ್ಬಮೇವ।
194.Yāvajīvanti yāva jīvitaṃ pavattati, tāva vatthabbameva.
೧೯೫. ಸೋ ಪುಗ್ಗಲೋತಿ ಪದಸ್ಸ ನಾನುಬನ್ಧಿತಬ್ಬೋತಿ ಇಮಿನಾ ಸಮ್ಬನ್ಧೋ। ಅನಾಪುಚ್ಛಾತಿ ಇಧ ಪನ ತಂ ಪುಗ್ಗಲಂ ಅನಾಪುಚ್ಛಾ ಪಕ್ಕಮಿತಬ್ಬನ್ತಿ ಅತ್ಥೋ।
195.So puggaloti padassa nānubandhitabboti iminā sambandho. Anāpucchāti idha pana taṃ puggalaṃ anāpucchā pakkamitabbanti attho.
೧೯೭. ಸಙ್ಖಾಪೀತಿ ಏವಂ ಸಮಣಧಮ್ಮಸ್ಸ ಅನಿಪ್ಫಜ್ಜನಭಾವಂ ಞತ್ವಾ ಸೋ ಪುಗ್ಗಲೋ ನಾನುಬನ್ಧಿತಬ್ಬೋ, ತಂ ಆಪುಚ್ಛಾ ಪಕ್ಕಮಿತಬ್ಬಂ।
197.Saṅkhāpīti evaṃ samaṇadhammassa anipphajjanabhāvaṃ ñatvā so puggalo nānubandhitabbo, taṃ āpucchā pakkamitabbaṃ.
೧೯೮. ಅಪಿ ಪನುಜ್ಜಮಾನೇನಾಪೀತಿ ಅಪಿ ನಿಕ್ಕಡ್ಢೀಯಮಾನೇನಾಪಿ। ಏವರೂಪೋ ಹಿ ಪುಗ್ಗಲೋ ಸಚೇಪಿ ದಾರುಕಲಾಪಸತಂ ವಾ ಉದಕಘಟಸತಂ ವಾ ವಾಲಿಕಮ್ಬಣಸತಂ ವಾ ದಣ್ಡಂ ಆಹರಾಪೇತಿ, ಮಾ ಇಧ ವಸೀತಿ ನಿಕ್ಕಡ್ಢಾಪೇತಿ ವಾ, ತಂ ತಂ ಖಮಾಪೇತ್ವಾ ಯಾವಜೀವಂ ವತ್ಥಬ್ಬಮೇವಾತಿ।
198.Apipanujjamānenāpīti api nikkaḍḍhīyamānenāpi. Evarūpo hi puggalo sacepi dārukalāpasataṃ vā udakaghaṭasataṃ vā vālikambaṇasataṃ vā daṇḍaṃ āharāpeti, mā idha vasīti nikkaḍḍhāpeti vā, taṃ taṃ khamāpetvā yāvajīvaṃ vatthabbamevāti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ವನಪತ್ಥಪರಿಯಾಯಸುತ್ತವಣ್ಣನಾ ನಿಟ್ಠಿತಾ।
Vanapatthapariyāyasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೭. ವನಪತ್ಥಸುತ್ತಂ • 7. Vanapatthasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೭. ವನಪತ್ಥಪರಿಯಾಯಸುತ್ತವಣ್ಣನಾ • 7. Vanapatthapariyāyasuttavaṇṇanā
