| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৭. ৰনপত্থসুত্তং
7. Vanapatthasuttaṃ
১৯০. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘ৰনপত্থপরিযাযং ৰো, ভিক্খৰে, দেসেস্সামি, তং সুণাথ, সাধুকং মনসিকরোথ, ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
190. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘vanapatthapariyāyaṃ vo, bhikkhave, desessāmi, taṃ suṇātha, sādhukaṃ manasikarotha, bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
১৯১. ‘‘ইধ, ভিক্খৰে, ভিক্খু অঞ্ঞতরং ৰনপত্থং উপনিস্সায ৰিহরতি। তস্স তং ৰনপত্থং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং ৰনপত্থং উপনিস্সায ৰিহরামি, তস্স মে ইমং ৰনপত্থং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তী’তি। তেন, ভিক্খৰে, ভিক্খুনা রত্তিভাগং ৰা দিৰসভাগং ৰা তম্হা ৰনপত্থা পক্কমিতব্বং, ন ৰত্থব্বং।
191. ‘‘Idha, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi, tassa me imaṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchantī’ti. Tena, bhikkhave, bhikkhunā rattibhāgaṃ vā divasabhāgaṃ vā tamhā vanapatthā pakkamitabbaṃ, na vatthabbaṃ.
১৯২. ‘‘ইধ পন, ভিক্খৰে, ভিক্খু অঞ্ঞতরং ৰনপত্থং উপনিস্সায ৰিহরতি। তস্স তং ৰনপত্থং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তি। তেন , ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং ৰনপত্থং উপনিস্সায ৰিহরামি। তস্স মে ইমং ৰনপত্থং উপনিস্সায ৰিহরতো অনুপট্ঠিতা চেৰ সতি ন উপট্ঠাতি অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তি। ন খো পনাহং চীৰরহেতু অগারস্মা অনগারিযং পব্বজিতো ন পিণ্ডপাতহেতু…পে॰… ন সেনাসনহেতু…পে॰… ন গিলানপ্পচ্চযভেসজ্জপরিক্খারহেতু অগারস্মা অনগারিযং পব্বজিতো। অথ চ পন মে ইমং ৰনপত্থং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণামী’তি। তেন, ভিক্খৰে, ভিক্খুনা সঙ্খাপি তম্হা ৰনপত্থা পক্কমিতব্বং, ন ৰত্থব্বং।
192. ‘‘Idha pana, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Tena , bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi. Tassa me imaṃ vanapatthaṃ upanissāya viharato anupaṭṭhitā ceva sati na upaṭṭhāti asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Na kho panāhaṃ cīvarahetu agārasmā anagāriyaṃ pabbajito na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito. Atha ca pana me imaṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmī’ti. Tena, bhikkhave, bhikkhunā saṅkhāpi tamhā vanapatthā pakkamitabbaṃ, na vatthabbaṃ.
১৯৩. ‘‘ইধ পন, ভিক্খৰে, ভিক্খু অঞ্ঞতরং ৰনপত্থং উপনিস্সায ৰিহরতি। তস্স তং ৰনপত্থং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা, তে কসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং ৰনপত্থং উপনিস্সায ৰিহরামি। তস্স মে ইমং ৰনপত্থং উপনিস্সায ৰিহরতো অনুপট্ঠিতা চেৰ সতি উপট্ঠাতি অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তি। ন খো পনাহং চীৰরহেতু অগারস্মা অনগারিযং পব্বজিতো, ন পিণ্ডপাতহেতু…পে॰… ন সেনাসনহেতু…পে॰… ন গিলানপ্পচ্চযভেসজ্জপরিক্খারহেতু অগারস্মা অনগারিযং পব্বজিতো । অথ চ পন মে ইমং ৰনপত্থং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণামী’তি। তেন, ভিক্খৰে, ভিক্খুনা সঙ্খাপি তস্মিং ৰনপত্থে ৰত্থব্বং, ন পক্কমিতব্বং।
193. ‘‘Idha pana, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā, te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi. Tassa me imaṃ vanapatthaṃ upanissāya viharato anupaṭṭhitā ceva sati upaṭṭhāti asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Na kho panāhaṃ cīvarahetu agārasmā anagāriyaṃ pabbajito, na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito . Atha ca pana me imaṃ vanapatthaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmī’ti. Tena, bhikkhave, bhikkhunā saṅkhāpi tasmiṃ vanapatthe vatthabbaṃ, na pakkamitabbaṃ.
১৯৪. ‘‘ইধ পন, ভিক্খৰে, ভিক্খু অঞ্ঞতরং ৰনপত্থং উপনিস্সায ৰিহরতি। তস্স তং ৰনপত্থং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং ৰনপত্থং উপনিস্সায ৰিহরামি। তস্স মে ইমং ৰনপত্থং উপনিস্সায ৰিহরতো অনুপট্ঠিতা চেৰ সতি উপট্ঠাতি অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তী’তি । তেন, ভিক্খৰে, ভিক্খুনা যাৰজীৰম্পি তস্মিং ৰনপত্থে ৰত্থব্বং, ন পক্কমিতব্বং।
194. ‘‘Idha pana, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi. Tassa me imaṃ vanapatthaṃ upanissāya viharato anupaṭṭhitā ceva sati upaṭṭhāti asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchantī’ti . Tena, bhikkhave, bhikkhunā yāvajīvampi tasmiṃ vanapatthe vatthabbaṃ, na pakkamitabbaṃ.
১৯৫. ‘‘ইধ, ভিক্খৰে, ভিক্খু অঞ্ঞতরং গামং উপনিস্সায ৰিহরতি …পে॰… অঞ্ঞতরং নিগমং উপনিস্সায ৰিহরতি…পে॰… অঞ্ঞতরং নগরং উপনিস্সায ৰিহরতি…পে॰… অঞ্ঞতরং জনপদং উপনিস্সায ৰিহরতি…পে॰… অঞ্ঞতরং পুগ্গলং উপনিস্সায ৰিহরতি। তস্স তং পুগ্গলং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৰিহরামি। তস্স মে ইমং পুগ্গলং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তী’তি। তেন, ভিক্খৰে, ভিক্খুনা রত্তিভাগং ৰা দিৰসভাগং ৰা সো পুগ্গলো অনাপুচ্ছা পক্কমিতব্বং, নানুবন্ধিতব্বো।
195. ‘‘Idha, bhikkhave, bhikkhu aññataraṃ gāmaṃ upanissāya viharati …pe… aññataraṃ nigamaṃ upanissāya viharati…pe… aññataraṃ nagaraṃ upanissāya viharati…pe… aññataraṃ janapadaṃ upanissāya viharati…pe… aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi. Tassa me imaṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchantī’ti. Tena, bhikkhave, bhikkhunā rattibhāgaṃ vā divasabhāgaṃ vā so puggalo anāpucchā pakkamitabbaṃ, nānubandhitabbo.
১৯৬. ‘‘ইধ পন, ভিক্খৰে, ভিক্খু অঞ্ঞতরং পুগ্গলং উপনিস্সায ৰিহরতি। তস্স তং পুগ্গলং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা, তে অপ্পকসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৰিহরামি। তস্স মে ইমং পুগ্গলং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তি। ন খো পনাহং চীৰরহেতু অগারস্মা অনগারিযং পব্বজিতো, ন পিণ্ডপাতহেতু…পে॰… ন সেনাসনহেতু…পে॰… ন গিলানপ্পচ্চযভেসজ্জপরিক্খারহেতু অগারস্মা অনগারিযং পব্বজিতো। অথ চ পন মে ইমং পুগ্গলং উপনিস্সায ৰিহরতো অনুপট্ঠিতা চেৰ সতি ন উপট্ঠাতি, অসমাহিতঞ্চ চিত্তং ন সমাধিযতি, অপরিক্খীণা চ আসৰা ন পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং নানুপাপুণামী’তি। তেন, ভিক্খৰে, ভিক্খুনা সঙ্খাপি সো পুগ্গলো আপুচ্ছা পক্কমিতব্বং, নানুবন্ধিতব্বো।
196. ‘‘Idha pana, bhikkhave, bhikkhu aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā, te appakasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi. Tassa me imaṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Na kho panāhaṃ cīvarahetu agārasmā anagāriyaṃ pabbajito, na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito. Atha ca pana me imaṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmī’ti. Tena, bhikkhave, bhikkhunā saṅkhāpi so puggalo āpucchā pakkamitabbaṃ, nānubandhitabbo.
১৯৭. ‘‘ইধ পন, ভিক্খৰে, ভিক্খু অঞ্ঞতরং পুগ্গলং উপনিস্সায ৰিহরতি। তস্স তং পুগ্গলং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৰিহরামি। তস্স মে ইমং পুগ্গলং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে কসিরেন সমুদাগচ্ছন্তি। ন খো পনাহং চীৰরহেতু অগারস্মা অনগারিযং পব্বজিতো, ন পিণ্ডপাতহেতু…পে॰… ন সেনাসনহেতু…পে॰… ন গিলানপ্পচ্চযভেসজ্জপরিক্খারহেতু অগারস্মা অনগারিযং পব্বজিতো। অথ চ পন মে ইমং পুগ্গলং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণামী’তি। তেন, ভিক্খৰে, ভিক্খুনা সঙ্খাপি সো পুগ্গলো অনুবন্ধিতব্বো, ন পক্কমিতব্বং।
197. ‘‘Idha pana, bhikkhave, bhikkhu aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi. Tassa me imaṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Na kho panāhaṃ cīvarahetu agārasmā anagāriyaṃ pabbajito, na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito. Atha ca pana me imaṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmī’ti. Tena, bhikkhave, bhikkhunā saṅkhāpi so puggalo anubandhitabbo, na pakkamitabbaṃ.
১৯৮. ‘‘ইধ পন, ভিক্খৰে, ভিক্খু অঞ্ঞতরং পুগ্গলং উপনিস্সায ৰিহরতি। তস্স তং পুগ্গলং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি , অননুপ্পত্তঞ্চ অনুত্তরং যোগক্খেমং অনুপাপুণাতি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তি। তেন, ভিক্খৰে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৰিহরামি । তস্স মে ইমং পুগ্গলং উপনিস্সায ৰিহরতো অনুপট্ঠিতা চেৰ সতি উপট্ঠাতি, অসমাহিতঞ্চ চিত্তং সমাধিযতি, অপরিক্খীণা চ আসৰা পরিক্খযং গচ্ছন্তি, অননুপ্পত্তঞ্চ অনুত্তরং যোগক্খেমং অনুপাপুণামি। যে চ খো ইমে পব্বজিতেন জীৰিতপরিক্খারা সমুদানেতব্বা – চীৰরপিণ্ডপাতসেনাসনগিলানপ্পচ্চযভেসজ্জপরিক্খারা – তে অপ্পকসিরেন সমুদাগচ্ছন্তী’তি। তেন, ভিক্খৰে, ভিক্খুনা যাৰজীৰম্পি সো পুগ্গলো অনুবন্ধিতব্বো, ন পক্কমিতব্বং, অপি পনুজ্জমানেনপী’’তি 1।
198. ‘‘Idha pana, bhikkhave, bhikkhu aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti , ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi . Tassa me imaṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchantī’ti. Tena, bhikkhave, bhikkhunā yāvajīvampi so puggalo anubandhitabbo, na pakkamitabbaṃ, api panujjamānenapī’’ti 2.
ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি।
Idamavoca bhagavā. Attamanā te bhikkhū bhagavato bhāsitaṃ abhinandunti.
ৰনপত্থসুত্তং নিট্ঠিতং সত্তমং।
Vanapatthasuttaṃ niṭṭhitaṃ sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. ৰনপত্থপরিযাযসুত্তৰণ্ণনা • 7. Vanapatthapariyāyasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. ৰনপত্থপরিযাযসুত্তৰণ্ণনা • 7. Vanapatthapariyāyasuttavaṇṇanā
