| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya |
༧. ཝནཔཏྠསུཏྟཾ
7. Vanapatthasuttaṃ
༡༩༠. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ – ‘‘ཝནཔཏྠཔརིཡཱཡཾ ཝོ, བྷིཀྑཝེ, དེསེསྶཱམི, ཏཾ སུཎཱཐ, སཱདྷུཀཾ མནསིཀརོཐ, བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
190. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘vanapatthapariyāyaṃ vo, bhikkhave, desessāmi, taṃ suṇātha, sādhukaṃ manasikarotha, bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
༡༩༡. ‘‘ཨིདྷ, བྷིཀྑཝེ, བྷིཀྑུ ཨཉྙཏརཾ ཝནཔཏྠཾ ཨུཔནིསྶཱཡ ཝིཧརཏི། ཏསྶ ཏཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ ཝནཔཏྠཾ ཨུཔནིསྶཱཡ ཝིཧརཱམི, ཏསྶ མེ ཨིམཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟཱི’ཏི། ཏེན, བྷིཀྑཝེ, བྷིཀྑུནཱ རཏྟིབྷཱགཾ ཝཱ དིཝསབྷཱགཾ ཝཱ ཏམྷཱ ཝནཔཏྠཱ པཀྐམིཏབྦཾ, ན ཝཏྠབྦཾ།
191. ‘‘Idha, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi, tassa me imaṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchantī’ti. Tena, bhikkhave, bhikkhunā rattibhāgaṃ vā divasabhāgaṃ vā tamhā vanapatthā pakkamitabbaṃ, na vatthabbaṃ.
༡༩༢. ‘‘ཨིདྷ པན, བྷིཀྑཝེ, བྷིཀྑུ ཨཉྙཏརཾ ཝནཔཏྠཾ ཨུཔནིསྶཱཡ ཝིཧརཏི། ཏསྶ ཏཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟི། ཏེན , བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ ཝནཔཏྠཾ ཨུཔནིསྶཱཡ ཝིཧརཱམི། ཏསྶ མེ ཨིམཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟི། ན ཁོ པནཱཧཾ ཙཱིཝརཧེཏུ ཨགཱརསྨཱ ཨནགཱརིཡཾ པབྦཛིཏོ ན པིཎྜཔཱཏཧེཏུ…པེ॰… ན སེནཱསནཧེཏུ…པེ॰… ན གིལཱནཔྤཙྩཡབྷེསཛྫཔརིཀྑཱརཧེཏུ ཨགཱརསྨཱ ཨནགཱརིཡཾ པབྦཛིཏོ། ཨཐ ཙ པན མེ ཨིམཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱམཱི’ཏི། ཏེན, བྷིཀྑཝེ, བྷིཀྑུནཱ སངྑཱཔི ཏམྷཱ ཝནཔཏྠཱ པཀྐམིཏབྦཾ, ན ཝཏྠབྦཾ།
192. ‘‘Idha pana, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Tena , bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi. Tassa me imaṃ vanapatthaṃ upanissāya viharato anupaṭṭhitā ceva sati na upaṭṭhāti asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Na kho panāhaṃ cīvarahetu agārasmā anagāriyaṃ pabbajito na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito. Atha ca pana me imaṃ vanapatthaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmī’ti. Tena, bhikkhave, bhikkhunā saṅkhāpi tamhā vanapatthā pakkamitabbaṃ, na vatthabbaṃ.
༡༩༣. ‘‘ཨིདྷ པན, བྷིཀྑཝེ, བྷིཀྑུ ཨཉྙཏརཾ ཝནཔཏྠཾ ཨུཔནིསྶཱཡ ཝིཧརཏི། ཏསྶ ཏཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ, ཏེ ཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ ཝནཔཏྠཾ ཨུཔནིསྶཱཡ ཝིཧརཱམི། ཏསྶ མེ ཨིམཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟི། ན ཁོ པནཱཧཾ ཙཱིཝརཧེཏུ ཨགཱརསྨཱ ཨནགཱརིཡཾ པབྦཛིཏོ, ན པིཎྜཔཱཏཧེཏུ…པེ॰… ན སེནཱསནཧེཏུ…པེ॰… ན གིལཱནཔྤཙྩཡབྷེསཛྫཔརིཀྑཱརཧེཏུ ཨགཱརསྨཱ ཨནགཱརིཡཾ པབྦཛིཏོ ། ཨཐ ཙ པན མེ ཨིམཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱམཱི’ཏི། ཏེན, བྷིཀྑཝེ, བྷིཀྑུནཱ སངྑཱཔི ཏསྨིཾ ཝནཔཏྠེ ཝཏྠབྦཾ, ན པཀྐམིཏབྦཾ།
193. ‘‘Idha pana, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā, te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi. Tassa me imaṃ vanapatthaṃ upanissāya viharato anupaṭṭhitā ceva sati upaṭṭhāti asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Na kho panāhaṃ cīvarahetu agārasmā anagāriyaṃ pabbajito, na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito . Atha ca pana me imaṃ vanapatthaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmī’ti. Tena, bhikkhave, bhikkhunā saṅkhāpi tasmiṃ vanapatthe vatthabbaṃ, na pakkamitabbaṃ.
༡༩༤. ‘‘ཨིདྷ པན, བྷིཀྑཝེ, བྷིཀྑུ ཨཉྙཏརཾ ཝནཔཏྠཾ ཨུཔནིསྶཱཡ ཝིཧརཏི། ཏསྶ ཏཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ ཝནཔཏྠཾ ཨུཔནིསྶཱཡ ཝིཧརཱམི། ཏསྶ མེ ཨིམཾ ཝནཔཏྠཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟཱི’ཏི ། ཏེན, བྷིཀྑཝེ, བྷིཀྑུནཱ ཡཱཝཛཱིཝམྤི ཏསྨིཾ ཝནཔཏྠེ ཝཏྠབྦཾ, ན པཀྐམིཏབྦཾ།
194. ‘‘Idha pana, bhikkhave, bhikkhu aññataraṃ vanapatthaṃ upanissāya viharati. Tassa taṃ vanapatthaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ vanapatthaṃ upanissāya viharāmi. Tassa me imaṃ vanapatthaṃ upanissāya viharato anupaṭṭhitā ceva sati upaṭṭhāti asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchantī’ti . Tena, bhikkhave, bhikkhunā yāvajīvampi tasmiṃ vanapatthe vatthabbaṃ, na pakkamitabbaṃ.
༡༩༥. ‘‘ཨིདྷ, བྷིཀྑཝེ, བྷིཀྑུ ཨཉྙཏརཾ གཱམཾ ཨུཔནིསྶཱཡ ཝིཧརཏི …པེ॰… ཨཉྙཏརཾ ནིགམཾ ཨུཔནིསྶཱཡ ཝིཧརཏི…པེ॰… ཨཉྙཏརཾ ནགརཾ ཨུཔནིསྶཱཡ ཝིཧརཏི…པེ॰… ཨཉྙཏརཾ ཛནཔདཾ ཨུཔནིསྶཱཡ ཝིཧརཏི…པེ॰… ཨཉྙཏརཾ པུགྒལཾ ཨུཔནིསྶཱཡ ཝིཧརཏི། ཏསྶ ཏཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ པུགྒལཾ ཨུཔནིསྶཱཡ ཝིཧརཱམི། ཏསྶ མེ ཨིམཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟཱི’ཏི། ཏེན, བྷིཀྑཝེ, བྷིཀྑུནཱ རཏྟིབྷཱགཾ ཝཱ དིཝསབྷཱགཾ ཝཱ སོ པུགྒལོ ཨནཱཔུཙྪཱ པཀྐམིཏབྦཾ, ནཱནུབནྡྷིཏབྦོ།
195. ‘‘Idha, bhikkhave, bhikkhu aññataraṃ gāmaṃ upanissāya viharati …pe… aññataraṃ nigamaṃ upanissāya viharati…pe… aññataraṃ nagaraṃ upanissāya viharati…pe… aññataraṃ janapadaṃ upanissāya viharati…pe… aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi. Tassa me imaṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchantī’ti. Tena, bhikkhave, bhikkhunā rattibhāgaṃ vā divasabhāgaṃ vā so puggalo anāpucchā pakkamitabbaṃ, nānubandhitabbo.
༡༩༦. ‘‘ཨིདྷ པན, བྷིཀྑཝེ, བྷིཀྑུ ཨཉྙཏརཾ པུགྒལཾ ཨུཔནིསྶཱཡ ཝིཧརཏི། ཏསྶ ཏཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ, ཏེ ཨཔྤཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ པུགྒལཾ ཨུཔནིསྶཱཡ ཝིཧརཱམི། ཏསྶ མེ ཨིམཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟི། ན ཁོ པནཱཧཾ ཙཱིཝརཧེཏུ ཨགཱརསྨཱ ཨནགཱརིཡཾ པབྦཛིཏོ, ན པིཎྜཔཱཏཧེཏུ…པེ॰… ན སེནཱསནཧེཏུ…པེ॰… ན གིལཱནཔྤཙྩཡབྷེསཛྫཔརིཀྑཱརཧེཏུ ཨགཱརསྨཱ ཨནགཱརིཡཾ པབྦཛིཏོ། ཨཐ ཙ པན མེ ཨིམཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ན ཨུཔཊྛཱཏི, ཨསམཱཧིཏཉྩ ཙིཏྟཾ ན སམཱདྷིཡཏི, ཨཔརིཀྑཱིཎཱ ཙ ཨཱསཝཱ ན པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ནཱནུཔཱཔུཎཱམཱི’ཏི། ཏེན, བྷིཀྑཝེ, བྷིཀྑུནཱ སངྑཱཔི སོ པུགྒལོ ཨཱཔུཙྪཱ པཀྐམིཏབྦཾ, ནཱནུབནྡྷིཏབྦོ།
196. ‘‘Idha pana, bhikkhave, bhikkhu aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā, te appakasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi. Tassa me imaṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Na kho panāhaṃ cīvarahetu agārasmā anagāriyaṃ pabbajito, na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito. Atha ca pana me imaṃ puggalaṃ upanissāya viharato anupaṭṭhitā ceva sati na upaṭṭhāti, asamāhitañca cittaṃ na samādhiyati, aparikkhīṇā ca āsavā na parikkhayaṃ gacchanti, ananuppattañca anuttaraṃ yogakkhemaṃ nānupāpuṇāmī’ti. Tena, bhikkhave, bhikkhunā saṅkhāpi so puggalo āpucchā pakkamitabbaṃ, nānubandhitabbo.
༡༩༧. ‘‘ཨིདྷ པན, བྷིཀྑཝེ, བྷིཀྑུ ཨཉྙཏརཾ པུགྒལཾ ཨུཔནིསྶཱཡ ཝིཧརཏི། ཏསྶ ཏཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ པུགྒལཾ ཨུཔནིསྶཱཡ ཝིཧརཱམི། ཏསྶ མེ ཨིམཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཀསིརེན སམུདཱགཙྪནྟི། ན ཁོ པནཱཧཾ ཙཱིཝརཧེཏུ ཨགཱརསྨཱ ཨནགཱརིཡཾ པབྦཛིཏོ, ན པིཎྜཔཱཏཧེཏུ…པེ॰… ན སེནཱསནཧེཏུ…པེ॰… ན གིལཱནཔྤཙྩཡབྷེསཛྫཔརིཀྑཱརཧེཏུ ཨགཱརསྨཱ ཨནགཱརིཡཾ པབྦཛིཏོ། ཨཐ ཙ པན མེ ཨིམཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱམཱི’ཏི། ཏེན, བྷིཀྑཝེ, བྷིཀྑུནཱ སངྑཱཔི སོ པུགྒལོ ཨནུབནྡྷིཏབྦོ, ན པཀྐམིཏབྦཾ།
197. ‘‘Idha pana, bhikkhave, bhikkhu aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi. Tassa me imaṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te kasirena samudāgacchanti. Na kho panāhaṃ cīvarahetu agārasmā anagāriyaṃ pabbajito, na piṇḍapātahetu…pe… na senāsanahetu…pe… na gilānappaccayabhesajjaparikkhārahetu agārasmā anagāriyaṃ pabbajito. Atha ca pana me imaṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmī’ti. Tena, bhikkhave, bhikkhunā saṅkhāpi so puggalo anubandhitabbo, na pakkamitabbaṃ.
༡༩༨. ‘‘ཨིདྷ པན, བྷིཀྑཝེ, བྷིཀྑུ ཨཉྙཏརཾ པུགྒལཾ ཨུཔནིསྶཱཡ ཝིཧརཏི། ཏསྶ ཏཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི , ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱཏི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟི། ཏེན, བྷིཀྑཝེ, བྷིཀྑུནཱ ཨིཏི པཊིསཉྩིཀྑིཏབྦཾ – ‘ཨཧཾ ཁོ ཨིམཾ པུགྒལཾ ཨུཔནིསྶཱཡ ཝིཧརཱམི ། ཏསྶ མེ ཨིམཾ པུགྒལཾ ཨུཔནིསྶཱཡ ཝིཧརཏོ ཨནུཔཊྛིཏཱ ཙེཝ སཏི ཨུཔཊྛཱཏི, ཨསམཱཧིཏཉྩ ཙིཏྟཾ སམཱདྷིཡཏི, ཨཔརིཀྑཱིཎཱ ཙ ཨཱསཝཱ པརིཀྑཡཾ གཙྪནྟི, ཨནནུཔྤཏྟཉྩ ཨནུཏྟརཾ ཡོགཀྑེམཾ ཨནུཔཱཔུཎཱམི། ཡེ ཙ ཁོ ཨིམེ པབྦཛིཏེན ཛཱིཝིཏཔརིཀྑཱརཱ སམུདཱནེཏབྦཱ – ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ – ཏེ ཨཔྤཀསིརེན སམུདཱགཙྪནྟཱི’ཏི། ཏེན, བྷིཀྑཝེ, བྷིཀྑུནཱ ཡཱཝཛཱིཝམྤི སོ པུགྒལོ ཨནུབནྡྷིཏབྦོ, ན པཀྐམིཏབྦཾ, ཨཔི པནུཛྫམཱནེནཔཱི’’ཏི 1།
198. ‘‘Idha pana, bhikkhave, bhikkhu aññataraṃ puggalaṃ upanissāya viharati. Tassa taṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti , ananuppattañca anuttaraṃ yogakkhemaṃ anupāpuṇāti. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchanti. Tena, bhikkhave, bhikkhunā iti paṭisañcikkhitabbaṃ – ‘ahaṃ kho imaṃ puggalaṃ upanissāya viharāmi . Tassa me imaṃ puggalaṃ upanissāya viharato anupaṭṭhitā ceva sati upaṭṭhāti, asamāhitañca cittaṃ samādhiyati, aparikkhīṇā ca āsavā parikkhayaṃ gacchanti, ananuppattañca anuttaraṃ yogakkhemaṃ anupāpuṇāmi. Ye ca kho ime pabbajitena jīvitaparikkhārā samudānetabbā – cīvarapiṇḍapātasenāsanagilānappaccayabhesajjaparikkhārā – te appakasirena samudāgacchantī’ti. Tena, bhikkhave, bhikkhunā yāvajīvampi so puggalo anubandhitabbo, na pakkamitabbaṃ, api panujjamānenapī’’ti 2.
ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།
Idamavoca bhagavā. Attamanā te bhikkhū bhagavato bhāsitaṃ abhinandunti.
ཝནཔཏྠསུཏྟཾ ནིཊྛིཏཾ སཏྟམཾ།
Vanapatthasuttaṃ niṭṭhitaṃ sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༧. ཝནཔཏྠཔརིཡཱཡསུཏྟཝཎྞནཱ • 7. Vanapatthapariyāyasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༧. ཝནཔཏྠཔརིཡཱཡསུཏྟཝཎྞནཱ • 7. Vanapatthapariyāyasuttavaṇṇanā
