| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. வனரோபஸுத்தவண்ணனா
7. Vanaropasuttavaṇṇanā
47. ஸத்தமே த⁴ம்மட்டா² ஸீலஸம்பன்னாதி கே த⁴ம்மட்டா², கே ஸீலஸம்பன்னாதி புச்ச²தி. ப⁴க³வா இமங் பஞ்ஹங் தா²வரவத்து²னா தீ³பெந்தோ ஆராமரோபாதிஆதி³மாஹ. தத்த² ஆராமரோபாதி புப்பா²ராமப²லாராமரோபகா. வனரோபாதி ஸயங்ஜாதே அரோபிமவனே ஸீமங் பரிக்கி²பித்வா சேதியபோ³தி⁴சங்கமனமண்ட³பகுடிலேணரத்திட்டா²னதி³வாட்டா²னானங் காரகா சா²யூபகே³ ருக்கே² ரோபெத்வா த³த³மானாபி வனரோபாயேவ நாம. ஸேதுகாரகாதி விஸமே ஸேதுங் கரொந்தி, உத³கே நாவங் படியாதெ³ந்தி . பபந்தி பானீயதா³னஸாலங். உத³பானந்தி யங்கிஞ்சி பொக்க²ரணீதளாகாதி³ங். உபஸ்ஸயந்தி வாஸாகா³ரங். ‘‘உபாஸய’’ந்திபி பாடோ².
47. Sattame dhammaṭṭhā sīlasampannāti ke dhammaṭṭhā, ke sīlasampannāti pucchati. Bhagavā imaṃ pañhaṃ thāvaravatthunā dīpento ārāmaropātiādimāha. Tattha ārāmaropāti pupphārāmaphalārāmaropakā. Vanaropāti sayaṃjāte aropimavane sīmaṃ parikkhipitvā cetiyabodhicaṅkamanamaṇḍapakuṭileṇarattiṭṭhānadivāṭṭhānānaṃ kārakā chāyūpage rukkhe ropetvā dadamānāpi vanaropāyeva nāma. Setukārakāti visame setuṃ karonti, udake nāvaṃ paṭiyādenti . Papanti pānīyadānasālaṃ. Udapānanti yaṃkiñci pokkharaṇītaḷākādiṃ. Upassayanti vāsāgāraṃ. ‘‘Upāsaya’’ntipi pāṭho.
ஸதா³ புஞ்ஞங் பவட்³ட⁴தீதி ந அகுஸலவிதக்கங் வா விதக்கெந்தஸ்ஸ நித்³தா³யந்தஸ்ஸ வா பவட்³ட⁴தி. யதா³ யதா³ பன அனுஸ்ஸரதி, ததா³ ததா³ தஸ்ஸ வட்³ட⁴தி. இமமத்த²ங் ஸந்தா⁴ய ‘‘ஸதா³ புஞ்ஞங் பவட்³ட⁴தீ’’தி வுத்தங். த⁴ம்மட்டா² ஸீலஸம்பன்னாதி தஸ்மிங் த⁴ம்மே டி²தத்தா தேனபி ஸீலேன ஸம்பன்னத்தா த⁴ம்மட்டா² ஸீலஸம்பன்னா. அத² வா ஏவரூபானி புஞ்ஞானி கரொந்தானங் த³ஸ குஸலா த⁴ம்மா பூரெந்தி, தேஸு டி²தத்தா த⁴ம்மட்டா². தேனேவ ச ஸீலேன ஸம்பன்னத்தா ஸீலஸம்பன்னாதி. ஸத்தமங்.
Sadā puññaṃ pavaḍḍhatīti na akusalavitakkaṃ vā vitakkentassa niddāyantassa vā pavaḍḍhati. Yadā yadā pana anussarati, tadā tadā tassa vaḍḍhati. Imamatthaṃ sandhāya ‘‘sadā puññaṃ pavaḍḍhatī’’ti vuttaṃ. Dhammaṭṭhā sīlasampannāti tasmiṃ dhamme ṭhitattā tenapi sīlena sampannattā dhammaṭṭhā sīlasampannā. Atha vā evarūpāni puññāni karontānaṃ dasa kusalā dhammā pūrenti, tesu ṭhitattā dhammaṭṭhā. Teneva ca sīlena sampannattā sīlasampannāti. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. வனரோபஸுத்தங் • 7. Vanaropasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. வனரோபஸுத்தவண்ணனா • 7. Vanaropasuttavaṇṇanā
