| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๗. วนโรปสุตฺตวณฺณนา
7. Vanaropasuttavaṇṇanā
๔๗. สตฺตเม ธมฺมฎฺฐา สีลสมฺปนฺนาติ เก ธมฺมฎฺฐา, เก สีลสมฺปนฺนาติ ปุจฺฉติฯ ภควา อิมํ ปญฺหํ ถาวรวตฺถุนา ทีเปโนฺต อารามโรปาติอาทิมาหฯ ตตฺถ อารามโรปาติ ปุปฺผารามผลารามโรปกาฯ วนโรปาติ สยํชาเต อโรปิมวเน สีมํ ปริกฺขิปิตฺวา เจติยโพธิจงฺกมนมณฺฑปกุฎิเลณรตฺติฎฺฐานทิวาฎฺฐานานํ การกา ฉายูปเค รุเกฺข โรเปตฺวา ททมานาปิ วนโรปาเยว นามฯ เสตุการกาติ วิสเม เสตุํ กโรนฺติ, อุทเก นาวํ ปฎิยาเทนฺติ ฯ ปปนฺติ ปานียทานสาลํฯ อุทปานนฺติ ยํกิญฺจิ โปกฺขรณีตฬากาทิํฯ อุปสฺสยนฺติ วาสาคารํฯ ‘‘อุปาสย’’นฺติปิ ปาโฐฯ
47. Sattame dhammaṭṭhā sīlasampannāti ke dhammaṭṭhā, ke sīlasampannāti pucchati. Bhagavā imaṃ pañhaṃ thāvaravatthunā dīpento ārāmaropātiādimāha. Tattha ārāmaropāti pupphārāmaphalārāmaropakā. Vanaropāti sayaṃjāte aropimavane sīmaṃ parikkhipitvā cetiyabodhicaṅkamanamaṇḍapakuṭileṇarattiṭṭhānadivāṭṭhānānaṃ kārakā chāyūpage rukkhe ropetvā dadamānāpi vanaropāyeva nāma. Setukārakāti visame setuṃ karonti, udake nāvaṃ paṭiyādenti . Papanti pānīyadānasālaṃ. Udapānanti yaṃkiñci pokkharaṇītaḷākādiṃ. Upassayanti vāsāgāraṃ. ‘‘Upāsaya’’ntipi pāṭho.
สทา ปุญฺญํ ปวฑฺฒตีติ น อกุสลวิตกฺกํ วา วิตเกฺกนฺตสฺส นิทฺทายนฺตสฺส วา ปวฑฺฒติฯ ยทา ยทา ปน อนุสฺสรติ, ตทา ตทา ตสฺส วฑฺฒติฯ อิมมตฺถํ สนฺธาย ‘‘สทา ปุญฺญํ ปวฑฺฒตี’’ติ วุตฺตํฯ ธมฺมฎฺฐา สีลสมฺปนฺนาติ ตสฺมิํ ธเมฺม ฐิตตฺตา เตนปิ สีเลน สมฺปนฺนตฺตา ธมฺมฎฺฐา สีลสมฺปนฺนาฯ อถ วา เอวรูปานิ ปุญฺญานิ กโรนฺตานํ ทส กุสลา ธมฺมา ปูเรนฺติ, เตสุ ฐิตตฺตา ธมฺมฎฺฐาฯ เตเนว จ สีเลน สมฺปนฺนตฺตา สีลสมฺปนฺนาติฯ สตฺตมํฯ
Sadā puññaṃ pavaḍḍhatīti na akusalavitakkaṃ vā vitakkentassa niddāyantassa vā pavaḍḍhati. Yadā yadā pana anussarati, tadā tadā tassa vaḍḍhati. Imamatthaṃ sandhāya ‘‘sadā puññaṃ pavaḍḍhatī’’ti vuttaṃ. Dhammaṭṭhā sīlasampannāti tasmiṃ dhamme ṭhitattā tenapi sīlena sampannattā dhammaṭṭhā sīlasampannā. Atha vā evarūpāni puññāni karontānaṃ dasa kusalā dhammā pūrenti, tesu ṭhitattā dhammaṭṭhā. Teneva ca sīlena sampannattā sīlasampannāti. Sattamaṃ.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๗. วนโรปสุตฺตํ • 7. Vanaropasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๗. วนโรปสุตฺตวณฺณนา • 7. Vanaropasuttavaṇṇanā
