| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
7. වනරොපසුත්‌තවණ්‌ණනා
7. Vanaropasuttavaṇṇanā
47. සත්‌තමෙ ධම්‌මට්‌ඨා සීලසම්‌පන්‌නාති කෙ ධම්‌මට්‌ඨා, කෙ සීලසම්‌පන්‌නාති පුච්‌ඡති. භගවා ඉමං පඤ්‌හං ථාවරවත්‌ථුනා දීපෙන්‌තො ආරාමරොපාතිආදිමාහ. තත්‌ථ ආරාමරොපාති පුප්‌ඵාරාමඵලාරාමරොපකා. වනරොපාති සයංජාතෙ අරොපිමවනෙ සීමං පරික්‌ඛිපිත්‌වා චෙතියබොධිචඞ්‌කමනමණ්‌ඩපකුටිලෙණරත්‌තිට්‌ඨානදිවාට්‌ඨානානං කාරකා ඡායූපගෙ රුක්‌ඛෙ රොපෙත්‌වා දදමානාපි වනරොපායෙව නාම. සෙතුකාරකාති විසමෙ සෙතුං කරොන්‌ති, උදකෙ නාවං පටියාදෙන්‌ති . පපන්‌ති පානීයදානසාලං. උදපානන්‌ති යංකිඤ්‌චි පොක්‌ඛරණීතළාකාදිං. උපස්‌සයන්‌ති වාසාගාරං. ‘‘උපාසය’’න්‌තිපි පාඨො.
47. Sattame dhammaṭṭhā sīlasampannāti ke dhammaṭṭhā, ke sīlasampannāti pucchati. Bhagavā imaṃ pañhaṃ thāvaravatthunā dīpento ārāmaropātiādimāha. Tattha ārāmaropāti pupphārāmaphalārāmaropakā. Vanaropāti sayaṃjāte aropimavane sīmaṃ parikkhipitvā cetiyabodhicaṅkamanamaṇḍapakuṭileṇarattiṭṭhānadivāṭṭhānānaṃ kārakā chāyūpage rukkhe ropetvā dadamānāpi vanaropāyeva nāma. Setukārakāti visame setuṃ karonti, udake nāvaṃ paṭiyādenti . Papanti pānīyadānasālaṃ. Udapānanti yaṃkiñci pokkharaṇītaḷākādiṃ. Upassayanti vāsāgāraṃ. ‘‘Upāsaya’’ntipi pāṭho.
සදා පුඤ්‌ඤං පවඩ්‌ඪතීති න අකුසලවිතක්‌කං වා විතක්‌කෙන්‌තස්‌ස නිද්‌දායන්‌තස්‌ස වා පවඩ්‌ඪති. යදා යදා පන අනුස්‌සරති, තදා තදා තස්‌ස වඩ්‌ඪති. ඉමමත්‌ථං සන්‌ධාය ‘‘සදා පුඤ්‌ඤං පවඩ්‌ඪතී’’ති වුත්‌තං. ධම්‌මට්‌ඨා සීලසම්‌පන්‌නාති තස්‌මිං ධම්‌මෙ ඨිතත්‌තා තෙනපි සීලෙන සම්‌පන්‌නත්‌තා ධම්‌මට්‌ඨා සීලසම්‌පන්‌නා. අථ වා එවරූපානි පුඤ්‌ඤානි කරොන්‌තානං දස කුසලා ධම්‌මා පූරෙන්‌ති, තෙසු ඨිතත්‌තා ධම්‌මට්‌ඨා. තෙනෙව ච සීලෙන සම්‌පන්‌නත්‌තා සීලසම්‌පන්‌නාති. සත්‌තමං.
Sadā puññaṃ pavaḍḍhatīti na akusalavitakkaṃ vā vitakkentassa niddāyantassa vā pavaḍḍhati. Yadā yadā pana anussarati, tadā tadā tassa vaḍḍhati. Imamatthaṃ sandhāya ‘‘sadā puññaṃ pavaḍḍhatī’’ti vuttaṃ. Dhammaṭṭhā sīlasampannāti tasmiṃ dhamme ṭhitattā tenapi sīlena sampannattā dhammaṭṭhā sīlasampannā. Atha vā evarūpāni puññāni karontānaṃ dasa kusalā dhammā pūrenti, tesu ṭhitattā dhammaṭṭhā. Teneva ca sīlena sampannattā sīlasampannāti. Sattamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. වනරොපසුත්‌තං • 7. Vanaropasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. වනරොපසුත්‌තවණ්‌ණනා • 7. Vanaropasuttavaṇṇanā
