| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
7. වනරොපසුත්‌තවණ්‌ණනා
7. Vanaropasuttavaṇṇanā
47. කෙසන්‌ති සාමිවසෙන වුත්‌තකසද්‌දො ‘‘ධම්‌මට්‌ඨා සීලසම්‌පන්‌නා’’ති එත්‌ථ පච්‌චත්‌තබහුවචනවසෙන පරිණාමෙතබ්‌බො. අත්‌ථවසෙන හි විභත්‌තිවිපරිණාමො. කෙ ජනාති එත්‌ථ වා වුත්‌තකෙසද්‌දො සීහවිලොකනනයෙන ආනෙත්‌වා යොජෙතබ්‌බොති ආහ ‘‘කෙ ධම්‌මට්‌ඨා, කෙ සීලසම්‌පන්‌නා’’ති? පුච්‌ඡතීති ඉමිනා තත්‌ථ කාරණමාහ. ඵලාදිසම්‌පත්‌තියා ආරමන්‌ති එත්‌ථ සත්‌තාති ආරාමො. ආරාමෙ රොපෙන්‌ති නිප්‌ඵාදෙන්‌තීති ආරාමරොපා. වනීයති ඡායාසම්‌පත්‌තියා භජීයතීති වනං. තත්‌ථ යං උපවනලක්‌ඛණං වනං, තං ආරාමග්‌ගහණෙනෙව ගහිතන්‌ති තපොවනලක්‌ඛණං, තං දස්‌සෙන්‌තො ‘‘සීමං පරික්‌ඛිපිත්‌වා’’තිආදිමාහ. විසමෙති උදකචික්‌ඛල්‌ලෙන විසමෙ පදෙසෙ. පානීයං පිවන්‌ති එත්‌ථාති පපා, තං පපං. උදකං පීයති එත්‌ථාති වා පපා. තළාකාදීති ආදි-සද්‌දෙන මාතිකං සඞ්‌ගණ්‌හාති.
47.Kesanti sāmivasena vuttakasaddo ‘‘dhammaṭṭhā sīlasampannā’’ti ettha paccattabahuvacanavasena pariṇāmetabbo. Atthavasena hi vibhattivipariṇāmo. Ke janāti ettha vā vuttakesaddo sīhavilokananayena ānetvā yojetabboti āha ‘‘ke dhammaṭṭhā, ke sīlasampannā’’ti? Pucchatīti iminā tattha kāraṇamāha. Phalādisampattiyā āramanti ettha sattāti ārāmo. Ārāme ropenti nipphādentīti ārāmaropā. Vanīyati chāyāsampattiyā bhajīyatīti vanaṃ. Tattha yaṃ upavanalakkhaṇaṃ vanaṃ, taṃ ārāmaggahaṇeneva gahitanti tapovanalakkhaṇaṃ, taṃ dassento ‘‘sīmaṃ parikkhipitvā’’tiādimāha. Visameti udakacikkhallena visame padese. Pānīyaṃ pivanti etthāti papā, taṃ papaṃ. Udakaṃ pīyati etthāti vā papā. Taḷākādīti ādi-saddena mātikaṃ saṅgaṇhāti.
ඉමමත්‌ථං සන්‌ධායාති ඉමිනා කම්‌මප්‌පථප්‌පත්‌තං පටික්‌ඛිපති. අත්‌තනා කතඤ්‌හි පුඤ්‌ඤං අනුස්‌සරතො තං ආරබ්‌භ බහුං පුඤ්‌ඤං පසවති, න පන යථා කතං පුඤ්‌ඤං සයමෙව පවඩ්‌ඪති. තස්‌මිං ධම්‌මෙ ඨිතත්‌තාති තස්‌මිං ආරාමරොපනාදිධම්‌මෙ පතිට්‌ඨිතත්‌තා. තෙනපි සීලෙන සම්‌පන්‌නත්‌තාති තෙන යථාවුත්‌තධම්‌මෙ කතසීලෙ ඨත්‌වා චිණ්‌ණෙන තදඤ්‌ඤෙනපි කායවාචසිකසංවරලක්‌ඛණෙන සීලෙන සමන්‌නාගතත්‌තා. දස කුසලා ධම්‌මා පූරෙන්‌ති දුච්‌චරිතපරිවජ්‌ජනතො. සෙසං වුත්‌තනයමෙව.
Imamatthaṃsandhāyāti iminā kammappathappattaṃ paṭikkhipati. Attanā katañhi puññaṃ anussarato taṃ ārabbha bahuṃ puññaṃ pasavati, na pana yathā kataṃ puññaṃ sayameva pavaḍḍhati. Tasmiṃ dhamme ṭhitattāti tasmiṃ ārāmaropanādidhamme patiṭṭhitattā. Tenapi sīlena sampannattāti tena yathāvuttadhamme katasīle ṭhatvā ciṇṇena tadaññenapi kāyavācasikasaṃvaralakkhaṇena sīlena samannāgatattā. Dasa kusalā dhammā pūrenti duccaritaparivajjanato. Sesaṃ vuttanayameva.
වනරොපසුත්‌තවණ්‌ණනා නිට්‌ඨිතා.
Vanaropasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 7. වනරොපසුත්‌තං • 7. Vanaropasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. වනරොපසුත්‌තවණ්‌ණනා • 7. Vanaropasuttavaṇṇanā
