| Library / Tipiṭaka / তিপিটক • Tipiṭaka / অপদানপাল়ি • Apadānapāḷi |
৯. ৰনৰচ্ছত্থেরঅপদানং
9. Vanavacchattheraapadānaṃ
২৫১.
251.
‘‘ইমম্হি ভদ্দকে কপ্পে, ব্রহ্মবন্ধু মহাযসো।
‘‘Imamhi bhaddake kappe, brahmabandhu mahāyaso;
কস্সপো নাম গোত্তেন, উপ্পজ্জি ৰদতং ৰরো॥
Kassapo nāma gottena, uppajji vadataṃ varo.
২৫২.
252.
‘‘তদাহং পব্বজিত্ৰান, তস্স বুদ্ধস্স সাসনে।
‘‘Tadāhaṃ pabbajitvāna, tassa buddhassa sāsane;
যাৰজীৰং চরিত্ৰান, ব্রহ্মচারং ততো চুতো॥
Yāvajīvaṃ caritvāna, brahmacāraṃ tato cuto.
২৫৩.
253.
‘‘তেন কম্মেন সুকতেন, চেতনাপণিধীহি চ।
‘‘Tena kammena sukatena, cetanāpaṇidhīhi ca;
জহিত্ৰা মানুসং দেহং, তাৰতিংসমগচ্ছহং॥
Jahitvā mānusaṃ dehaṃ, tāvatiṃsamagacchahaṃ.
২৫৪.
254.
‘‘ততো চুতো অরঞ্ঞম্হি, কপোতো আসহং তহিং।
‘‘Tato cuto araññamhi, kapoto āsahaṃ tahiṃ;
ৰসতে গুণসম্পন্নো, ভিক্খু ঝানরতো সদা॥
Vasate guṇasampanno, bhikkhu jhānarato sadā.
২৫৫.
255.
‘‘মেত্তচিত্তো কারুণিকো, সদা পমুদিতাননো।
‘‘Mettacitto kāruṇiko, sadā pamuditānano;
উপেক্খকো মহাৰীরো, অপ্পমঞ্ঞাসু কোৰিদো॥
Upekkhako mahāvīro, appamaññāsu kovido.
২৫৬.
256.
‘‘ৰিনীৰরণসঙ্কপ্পে, সব্বসত্তহিতাসযে।
‘‘Vinīvaraṇasaṅkappe, sabbasattahitāsaye;
ৰিসট্ঠো নচিরেনাসিং, তস্মিং সুগতসাৰকে॥
Visaṭṭho nacirenāsiṃ, tasmiṃ sugatasāvake.
২৫৭.
257.
‘‘উপেচ্চ পাদমূলম্হি, নিসিন্নস্স তদাস্সমে।
‘‘Upecca pādamūlamhi, nisinnassa tadāssame;
কদাচি সামিসং দেতি, ধম্মং দেসেসি চেকদা॥
Kadāci sāmisaṃ deti, dhammaṃ desesi cekadā.
২৫৮.
258.
‘‘তদা ৰিপুলপেমেন, উপাসিত্ৰা জিনত্রজং।
‘‘Tadā vipulapemena, upāsitvā jinatrajaṃ;
ততো চুতো গতো সগ্গং, পৰাসো সঘরং যথা॥
Tato cuto gato saggaṃ, pavāso sagharaṃ yathā.
২৫৯.
259.
‘‘সগ্গা চুতো মনুস্সেসু, নিব্বত্তো পুঞ্ঞকম্মুনা।
‘‘Saggā cuto manussesu, nibbatto puññakammunā;
অগারং ছড্ডযিত্ৰান, পব্বজিং বহুসো অহং॥
Agāraṃ chaḍḍayitvāna, pabbajiṃ bahuso ahaṃ.
২৬০.
260.
‘‘সমণো তাপসো ৰিপ্পো, পরিব্বজো তথেৰহং।
‘‘Samaṇo tāpaso vippo, paribbajo tathevahaṃ;
হুত্ৰা ৰসিং অরঞ্ঞম্হি, অনেকসতসো অহং॥
Hutvā vasiṃ araññamhi, anekasataso ahaṃ.
২৬১.
261.
‘‘পচ্ছিমে চ ভৰে দানি, রম্মে কপিলৰত্থৰে।
‘‘Pacchime ca bhave dāni, ramme kapilavatthave;
ৰচ্ছগোত্তো দিজো তস্স, জাযায অহমোক্কমিং॥
Vacchagotto dijo tassa, jāyāya ahamokkamiṃ.
২৬২.
262.
‘‘মাতু মে দোহল়ো আসি, তিরোকুচ্ছিগতস্স মে।
‘‘Mātu me dohaḷo āsi, tirokucchigatassa me;
জাযমানসমীপম্হি, ৰনৰাসায নিচ্ছযো॥
Jāyamānasamīpamhi, vanavāsāya nicchayo.
২৬৩.
263.
‘‘ততো মে অজনী মাতা, রমণীযে ৰনন্তরে।
‘‘Tato me ajanī mātā, ramaṇīye vanantare;
গব্ভতো নিক্খমন্তং মং, কাসাযেন পটিগ্গহুং॥
Gabbhato nikkhamantaṃ maṃ, kāsāyena paṭiggahuṃ.
২৬৪.
264.
‘‘ততো কুমারো সিদ্ধত্থো, জাতো সক্যকুলদ্ধজো।
‘‘Tato kumāro siddhattho, jāto sakyakuladdhajo;
তস্স মিত্তো পিযো আসিং, সংৰিসট্ঠো সুমানিযো॥
Tassa mitto piyo āsiṃ, saṃvisaṭṭho sumāniyo.
২৬৫.
265.
‘‘সত্তসারেভিনিক্খন্তে, ওহায ৰিপুলং যসং।
‘‘Sattasārebhinikkhante, ohāya vipulaṃ yasaṃ;
অহম্পি পব্বজিত্ৰান, হিমৰন্তমুপাগমিং॥
Ahampi pabbajitvāna, himavantamupāgamiṃ.
২৬৬.
266.
‘‘ৰনালযং ভাৰনীযং, কস্সপং ধুতৰাদিকং।
‘‘Vanālayaṃ bhāvanīyaṃ, kassapaṃ dhutavādikaṃ;
দিস্ৰা সুত্ৰা জিনুপ্পাদং, উপেসিং নরসারথিং॥
Disvā sutvā jinuppādaṃ, upesiṃ narasārathiṃ.
২৬৭.
267.
‘‘সো মে ধম্মমদেসেসি, সব্বত্থং সম্পকাসযং।
‘‘So me dhammamadesesi, sabbatthaṃ sampakāsayaṃ;
২৬৮.
268.
অহো সুলদ্ধলাভোম্হি, সুমিত্তেনানুকম্পিতো॥
Aho suladdhalābhomhi, sumittenānukampito.
২৬৯.
269.
‘‘কিলেসা ঝাপিতা ময্হং…পে॰… ৰিহরামি অনাসৰো॥
‘‘Kilesā jhāpitā mayhaṃ…pe… viharāmi anāsavo.
২৭০.
270.
‘‘স্ৰাগতং ৰত মে আসি…পে॰… কতং বুদ্ধস্স সাসনং॥
‘‘Svāgataṃ vata me āsi…pe… kataṃ buddhassa sāsanaṃ.
২৭১.
271.
‘‘পটিসম্ভিদা চতস্সো…পে॰… কতং বুদ্ধস্স সাসনং’’॥
‘‘Paṭisambhidā catasso…pe… kataṃ buddhassa sāsanaṃ’’.
ইত্থং সুদং আযস্মা ৰনৰচ্ছো থেরো ইমা গাথাযো
Itthaṃ sudaṃ āyasmā vanavaccho thero imā gāthāyo
অভাসিত্থাতি।
Abhāsitthāti.
ৰনৰচ্ছত্থেরস্সাপদানং নৰমং।
Vanavacchattherassāpadānaṃ navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / অপদান-অট্ঠকথা • Apadāna-aṭṭhakathā / ৯. ৰনৰচ্ছত্থেরঅপদানৰণ্ণনা • 9. Vanavacchattheraapadānavaṇṇanā
