| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. वनवच्छत्थेरअपदानं
9. Vanavacchattheraapadānaṃ
२५१.
251.
‘‘इमम्हि भद्दके कप्पे, ब्रह्मबन्धु महायसो।
‘‘Imamhi bhaddake kappe, brahmabandhu mahāyaso;
कस्सपो नाम गोत्तेन, उप्पज्जि वदतं वरो॥
Kassapo nāma gottena, uppajji vadataṃ varo.
२५२.
252.
‘‘तदाहं पब्बजित्वान, तस्स बुद्धस्स सासने।
‘‘Tadāhaṃ pabbajitvāna, tassa buddhassa sāsane;
यावजीवं चरित्वान, ब्रह्मचारं ततो चुतो॥
Yāvajīvaṃ caritvāna, brahmacāraṃ tato cuto.
२५३.
253.
‘‘तेन कम्मेन सुकतेन, चेतनापणिधीहि च।
‘‘Tena kammena sukatena, cetanāpaṇidhīhi ca;
जहित्वा मानुसं देहं, तावतिंसमगच्छहं॥
Jahitvā mānusaṃ dehaṃ, tāvatiṃsamagacchahaṃ.
२५४.
254.
‘‘ततो चुतो अरञ्ञम्हि, कपोतो आसहं तहिं।
‘‘Tato cuto araññamhi, kapoto āsahaṃ tahiṃ;
वसते गुणसम्पन्नो, भिक्खु झानरतो सदा॥
Vasate guṇasampanno, bhikkhu jhānarato sadā.
२५५.
255.
‘‘मेत्तचित्तो कारुणिको, सदा पमुदिताननो।
‘‘Mettacitto kāruṇiko, sadā pamuditānano;
उपेक्खको महावीरो, अप्पमञ्ञासु कोविदो॥
Upekkhako mahāvīro, appamaññāsu kovido.
२५६.
256.
‘‘विनीवरणसङ्कप्पे, सब्बसत्तहितासये।
‘‘Vinīvaraṇasaṅkappe, sabbasattahitāsaye;
विसट्ठो नचिरेनासिं, तस्मिं सुगतसावके॥
Visaṭṭho nacirenāsiṃ, tasmiṃ sugatasāvake.
२५७.
257.
‘‘उपेच्च पादमूलम्हि, निसिन्नस्स तदास्समे।
‘‘Upecca pādamūlamhi, nisinnassa tadāssame;
कदाचि सामिसं देति, धम्मं देसेसि चेकदा॥
Kadāci sāmisaṃ deti, dhammaṃ desesi cekadā.
२५८.
258.
‘‘तदा विपुलपेमेन, उपासित्वा जिनत्रजं।
‘‘Tadā vipulapemena, upāsitvā jinatrajaṃ;
ततो चुतो गतो सग्गं, पवासो सघरं यथा॥
Tato cuto gato saggaṃ, pavāso sagharaṃ yathā.
२५९.
259.
‘‘सग्गा चुतो मनुस्सेसु, निब्बत्तो पुञ्ञकम्मुना।
‘‘Saggā cuto manussesu, nibbatto puññakammunā;
अगारं छड्डयित्वान, पब्बजिं बहुसो अहं॥
Agāraṃ chaḍḍayitvāna, pabbajiṃ bahuso ahaṃ.
२६०.
260.
‘‘समणो तापसो विप्पो, परिब्बजो तथेवहं।
‘‘Samaṇo tāpaso vippo, paribbajo tathevahaṃ;
हुत्वा वसिं अरञ्ञम्हि, अनेकसतसो अहं॥
Hutvā vasiṃ araññamhi, anekasataso ahaṃ.
२६१.
261.
‘‘पच्छिमे च भवे दानि, रम्मे कपिलवत्थवे।
‘‘Pacchime ca bhave dāni, ramme kapilavatthave;
वच्छगोत्तो दिजो तस्स, जायाय अहमोक्कमिं॥
Vacchagotto dijo tassa, jāyāya ahamokkamiṃ.
२६२.
262.
‘‘मातु मे दोहळो आसि, तिरोकुच्छिगतस्स मे।
‘‘Mātu me dohaḷo āsi, tirokucchigatassa me;
जायमानसमीपम्हि, वनवासाय निच्छयो॥
Jāyamānasamīpamhi, vanavāsāya nicchayo.
२६३.
263.
‘‘ततो मे अजनी माता, रमणीये वनन्तरे।
‘‘Tato me ajanī mātā, ramaṇīye vanantare;
गब्भतो निक्खमन्तं मं, कासायेन पटिग्गहुं॥
Gabbhato nikkhamantaṃ maṃ, kāsāyena paṭiggahuṃ.
२६४.
264.
‘‘ततो कुमारो सिद्धत्थो, जातो सक्यकुलद्धजो।
‘‘Tato kumāro siddhattho, jāto sakyakuladdhajo;
तस्स मित्तो पियो आसिं, संविसट्ठो सुमानियो॥
Tassa mitto piyo āsiṃ, saṃvisaṭṭho sumāniyo.
२६५.
265.
‘‘सत्तसारेभिनिक्खन्ते, ओहाय विपुलं यसं।
‘‘Sattasārebhinikkhante, ohāya vipulaṃ yasaṃ;
अहम्पि पब्बजित्वान, हिमवन्तमुपागमिं॥
Ahampi pabbajitvāna, himavantamupāgamiṃ.
२६६.
266.
‘‘वनालयं भावनीयं, कस्सपं धुतवादिकं।
‘‘Vanālayaṃ bhāvanīyaṃ, kassapaṃ dhutavādikaṃ;
दिस्वा सुत्वा जिनुप्पादं, उपेसिं नरसारथिं॥
Disvā sutvā jinuppādaṃ, upesiṃ narasārathiṃ.
२६७.
267.
‘‘सो मे धम्ममदेसेसि, सब्बत्थं सम्पकासयं।
‘‘So me dhammamadesesi, sabbatthaṃ sampakāsayaṃ;
२६८.
268.
अहो सुलद्धलाभोम्हि, सुमित्तेनानुकम्पितो॥
Aho suladdhalābhomhi, sumittenānukampito.
२६९.
269.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
२७०.
270.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
२७१.
271.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा वनवच्छो थेरो इमा गाथायो
Itthaṃ sudaṃ āyasmā vanavaccho thero imā gāthāyo
अभासित्थाति।
Abhāsitthāti.
वनवच्छत्थेरस्सापदानं नवमं।
Vanavacchattherassāpadānaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ९. वनवच्छत्थेरअपदानवण्णना • 9. Vanavacchattheraapadānavaṇṇanā
