| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. வனவச்ச²த்தே²ரஅபதா³னவண்ணனா
9. Vanavacchattheraapadānavaṇṇanā
நவமாபதா³னே இமம்ஹி ப⁴த்³த³கே கப்பேதிஆதி³கங் ஆயஸ்மதோ வனவச்ச²த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ கஸ்ஸபஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்வா ஸத்து² த⁴ம்மதே³ஸனங் ஸுத்வா ஸத்³தா⁴ஜாதோ பப்³ப³ஜித்வா பரிஸுத்³த⁴ங் ப்³ரஹ்மசரியங் சரித்வா ததோ சுதோ தே³வலோகே நிப்³ப³த்தோ, ததோ சுதோ அரஞ்ஞாயதனே பி⁴க்கூ²னங் ஸமீபே கபோதயோனியங் நிப்³ப³த்தோ. தேஸு மெத்தசித்தோ த⁴ம்மங் ஸுத்வா ததோ சுதோ தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ கபிலவத்து²ஸ்மிங் ப்³ராஹ்மணகுலே நிப்³ப³த்தி. தஸ்ஸ மாதுகுச்சி²க³தகாலேயேவ மாது தோ³ஹளோ உத³பாதி³ வனே வஸிதுங் வனே விஜாயிதுங் . ததோ இச்சா²னுரூபவஸேன வனே வஸந்தியா க³ப்³ப⁴வுட்டா²னங் அஹோஸி. க³ப்³ப⁴தோ நிக்க²ந்தஞ்ச நங் காஸாவக²ண்டே³ன படிக்³க³ஹேஸுங். ததா³ போ³தி⁴ஸத்தஸ்ஸ உப்பன்னகாலோ, ராஜா தங் குமாரங் ஆஹராபெத்வா ஸஹேவ போஸேஸி. அத² போ³தி⁴ஸத்தோ மஹாபி⁴னிக்க²மனங் நிக்க²மித்வா பப்³ப³ஜித்வா ச²ப்³ப³ஸானி து³க்கரகாரிகங் கத்வா பு³த்³தே⁴ ஜாதே ஸோ மஹாகஸ்ஸபஸ்ஸ ஸந்திகங் க³ந்த்வா தஸ்ஸோவாதே³ பஸன்னோ தஸ்ஸ ஸந்திகா பு³த்³து⁴ப்பாத³பா⁴வங் ஸுத்வா ஸத்து² ஸந்திகங் க³ந்த்வா த⁴ம்மங் ஸுத்வா பப்³ப³ஜித்வா நசிரஸ்ஸேவ ச²ளபி⁴ஞ்ஞோ அரஹா அஹோஸி.
Navamāpadāne imamhi bhaddake kappetiādikaṃ āyasmato vanavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapassa bhagavato kāle kulagehe nibbatto viññutaṃ patvā satthu dhammadesanaṃ sutvā saddhājāto pabbajitvā parisuddhaṃ brahmacariyaṃ caritvā tato cuto devaloke nibbatto, tato cuto araññāyatane bhikkhūnaṃ samīpe kapotayoniyaṃ nibbatto. Tesu mettacitto dhammaṃ sutvā tato cuto devamanussesu saṃsaranto imasmiṃ buddhuppāde kapilavatthusmiṃ brāhmaṇakule nibbatti. Tassa mātukucchigatakāleyeva mātu dohaḷo udapādi vane vasituṃ vane vijāyituṃ . Tato icchānurūpavasena vane vasantiyā gabbhavuṭṭhānaṃ ahosi. Gabbhato nikkhantañca naṃ kāsāvakhaṇḍena paṭiggahesuṃ. Tadā bodhisattassa uppannakālo, rājā taṃ kumāraṃ āharāpetvā saheva posesi. Atha bodhisatto mahābhinikkhamanaṃ nikkhamitvā pabbajitvā chabbasāni dukkarakārikaṃ katvā buddhe jāte so mahākassapassa santikaṃ gantvā tassovāde pasanno tassa santikā buddhuppādabhāvaṃ sutvā satthu santikaṃ gantvā dhammaṃ sutvā pabbajitvā nacirasseva chaḷabhiñño arahā ahosi.
251. ஸோ அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ இமம்ஹி ப⁴த்³த³கே கப்பேதிஆதி³மாஹ. தத்த² ப்³ரஹ்மப³ந்து⁴ மஹாயஸோதி எத்த² ப்³ராஹ்மணானங் ப³ந்து⁴ ஞாதகோதி ப்³ராஹ்மணப³ந்தூ⁴தி வத்தப்³பே³ கா³தா²ப³ந்த⁴ஸுக²த்த²ங் ‘‘ப்³ரஹ்மப³ந்தூ⁴’’தி வுத்தந்தி வேதி³தப்³ப³ங். லோகத்தயப்³யாபகயஸத்தா மஹாயஸோ. ஸேஸங் ஸப்³ப³ங் ஸுவிஞ்ஞெய்யமேவாதி.
251. So arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento imamhi bhaddake kappetiādimāha. Tattha brahmabandhu mahāyasoti ettha brāhmaṇānaṃ bandhu ñātakoti brāhmaṇabandhūti vattabbe gāthābandhasukhatthaṃ ‘‘brahmabandhū’’ti vuttanti veditabbaṃ. Lokattayabyāpakayasattā mahāyaso. Sesaṃ sabbaṃ suviññeyyamevāti.
வனவச்ச²த்தே²ரஅபதா³னவண்ணனா ஸமத்தா.
Vanavacchattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. வனவச்ச²த்தே²ரஅபதா³னங் • 9. Vanavacchattheraapadānaṃ
