| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၉. ဝနဝစ္ဆတ္ထေရအပဒာနဝဏ္ဏနာ
9. Vanavacchattheraapadānavaṇṇanā
နဝမာပဒာနေ ဣမမ္ဟိ ဘဒ္ဒကေ ကပ္ပေတိအာဒိကံ အာယသ္မတော ဝနဝစ္ဆတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ကသ္သပသ္သ ဘဂဝတော ကာလေ ကုလဂေဟေ နိဗ္ဗတ္တော ဝိညုတံ ပတ္ဝာ သတ္ထု ဓမ္မဒေသနံ သုတ္ဝာ သဒ္ဓာဇာတော ပဗ္ဗဇိတ္ဝာ ပရိသုဒ္ဓံ ဗ္ရဟ္မစရိယံ စရိတ္ဝာ တတော စုတော ဒေဝလောကေ နိဗ္ဗတ္တော, တတော စုတော အရညာယတနေ ဘိက္ခူနံ သမီပေ ကပောတယောနိယံ နိဗ္ဗတ္တော။ တေသု မေတ္တစိတ္တော ဓမ္မံ သုတ္ဝာ တတော စုတော ဒေဝမနုသ္သေသု သံသရန္တော ဣမသ္မိံ ဗုဒ္ဓုပ္ပာဒေ ကပိလဝတ္ထုသ္မိံ ဗ္ရာဟ္မဏကုလေ နိဗ္ဗတ္တိ။ တသ္သ မာတုကုစ္ဆိဂတကာလေယေဝ မာတု ဒောဟဠော ဥဒပာဒိ ဝနေ ဝသိတုံ ဝနေ ဝိဇာယိတုံ ။ တတော ဣစ္ဆာနုရူပဝသေန ဝနေ ဝသန္တိယာ ဂဗ္ဘဝုဋ္ဌာနံ အဟောသိ။ ဂဗ္ဘတော နိက္ခန္တဉ္စ နံ ကာသာဝခဏ္ဍေန ပဋိဂ္ဂဟေသုံ။ တဒာ ဗောဓိသတ္တသ္သ ဥပ္ပန္နကာလော, ရာဇာ တံ ကုမာရံ အာဟရာပေတ္ဝာ သဟေဝ ပောသေသိ။ အထ ဗောဓိသတ္တော မဟာဘိနိက္ခမနံ နိက္ခမိတ္ဝာ ပဗ္ဗဇိတ္ဝာ ဆဗ္ဗသာနိ ဒုက္ကရကာရိကံ ကတ္ဝာ ဗုဒ္ဓေ ဇာတေ သော မဟာကသ္သပသ္သ သန္တိကံ ဂန္တ္ဝာ တသ္သောဝာဒေ ပသန္နော တသ္သ သန္တိကာ ဗုဒ္ဓုပ္ပာဒဘာဝံ သုတ္ဝာ သတ္ထု သန္တိကံ ဂန္တ္ဝာ ဓမ္မံ သုတ္ဝာ ပဗ္ဗဇိတ္ဝာ နစိရသ္သေဝ ဆဠဘိညော အရဟာ အဟောသိ။
Navamāpadāne imamhi bhaddake kappetiādikaṃ āyasmato vanavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapassa bhagavato kāle kulagehe nibbatto viññutaṃ patvā satthu dhammadesanaṃ sutvā saddhājāto pabbajitvā parisuddhaṃ brahmacariyaṃ caritvā tato cuto devaloke nibbatto, tato cuto araññāyatane bhikkhūnaṃ samīpe kapotayoniyaṃ nibbatto. Tesu mettacitto dhammaṃ sutvā tato cuto devamanussesu saṃsaranto imasmiṃ buddhuppāde kapilavatthusmiṃ brāhmaṇakule nibbatti. Tassa mātukucchigatakāleyeva mātu dohaḷo udapādi vane vasituṃ vane vijāyituṃ . Tato icchānurūpavasena vane vasantiyā gabbhavuṭṭhānaṃ ahosi. Gabbhato nikkhantañca naṃ kāsāvakhaṇḍena paṭiggahesuṃ. Tadā bodhisattassa uppannakālo, rājā taṃ kumāraṃ āharāpetvā saheva posesi. Atha bodhisatto mahābhinikkhamanaṃ nikkhamitvā pabbajitvā chabbasāni dukkarakārikaṃ katvā buddhe jāte so mahākassapassa santikaṃ gantvā tassovāde pasanno tassa santikā buddhuppādabhāvaṃ sutvā satthu santikaṃ gantvā dhammaṃ sutvā pabbajitvā nacirasseva chaḷabhiñño arahā ahosi.
၂၅၁. သော အရဟတ္တံ ပတ္ဝာ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဣမမ္ဟိ ဘဒ္ဒကေ ကပ္ပေတိအာဒိမာဟ။ တတ္ထ ဗ္ရဟ္မဗန္ဓု မဟာယသောတိ ဧတ္ထ ဗ္ရာဟ္မဏာနံ ဗန္ဓု ဉာတကောတိ ဗ္ရာဟ္မဏဗန္ဓူတိ ဝတ္တဗ္ဗေ ဂာထာဗန္ဓသုခတ္ထံ ‘‘ဗ္ရဟ္မဗန္ဓူ’’တိ ဝုတ္တန္တိ ဝေဒိတဗ္ဗံ။ လောကတ္တယဗ္ယာပကယသတ္တာ မဟာယသော။ သေသံ သဗ္ဗံ သုဝိညေယ္ယမေဝာတိ။
251. So arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento imamhi bhaddake kappetiādimāha. Tattha brahmabandhu mahāyasoti ettha brāhmaṇānaṃ bandhu ñātakoti brāhmaṇabandhūti vattabbe gāthābandhasukhatthaṃ ‘‘brahmabandhū’’ti vuttanti veditabbaṃ. Lokattayabyāpakayasattā mahāyaso. Sesaṃ sabbaṃ suviññeyyamevāti.
ဝနဝစ္ဆတ္ထေရအပဒာနဝဏ္ဏနာ သမတ္တာ။
Vanavacchattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၉. ဝနဝစ္ဆတ္ထေရအပဒာနံ • 9. Vanavacchattheraapadānaṃ
