| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. වනවච්‌ඡත්‌ථෙරඅපදානවණ්‌ණනා
9. Vanavacchattheraapadānavaṇṇanā
නවමාපදානෙ ඉමම්‌හි භද්‌දකෙ කප්‌පෙතිආදිකං ආයස්‌මතො වනවච්‌ඡත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො කස්‌සපස්‌ස භගවතො කාලෙ කුලගෙහෙ නිබ්‌බත්‌තො විඤ්‌ඤුතං පත්‌වා සත්‌ථු ධම්‌මදෙසනං සුත්‌වා සද්‌ධාජාතො පබ්‌බජිත්‌වා පරිසුද්‌ධං බ්‍රහ්‌මචරියං චරිත්‌වා තතො චුතො දෙවලොකෙ නිබ්‌බත්‌තො, තතො චුතො අරඤ්‌ඤායතනෙ භික්‌ඛූනං සමීපෙ කපොතයොනියං නිබ්‌බත්‌තො. තෙසු මෙත්‌තචිත්‌තො ධම්‌මං සුත්‌වා තතො චුතො දෙවමනුස්‌සෙසු සංසරන්‌තො ඉමස්‌මිං බුද්‌ධුප්‌පාදෙ කපිලවත්‌ථුස්‌මිං බ්‍රාහ්‌මණකුලෙ නිබ්‌බත්‌ති. තස්‌ස මාතුකුච්‌ඡිගතකාලෙයෙව මාතු දොහළො උදපාදි වනෙ වසිතුං වනෙ විජායිතුං . තතො ඉච්‌ඡානුරූපවසෙන වනෙ වසන්‌තියා ගබ්‌භවුට්‌ඨානං අහොසි. ගබ්‌භතො නික්‌ඛන්‌තඤ්‌ච නං කාසාවඛණ්‌ඩෙන පටිග්‌ගහෙසුං. තදා බොධිසත්‌තස්‌ස උප්‌පන්‌නකාලො, රාජා තං කුමාරං ආහරාපෙත්‌වා සහෙව පොසෙසි. අථ බොධිසත්‌තො මහාභිනික්‌ඛමනං නික්‌ඛමිත්‌වා පබ්‌බජිත්‌වා ඡබ්‌බසානි දුක්‌කරකාරිකං කත්‌වා බුද්‌ධෙ ජාතෙ සො මහාකස්‌සපස්‌ස සන්‌තිකං ගන්‌ත්‌වා තස්‌සොවාදෙ පසන්‌නො තස්‌ස සන්‌තිකා බුද්‌ධුප්‌පාදභාවං සුත්‌වා සත්‌ථු සන්‌තිකං ගන්‌ත්‌වා ධම්‌මං සුත්‌වා පබ්‌බජිත්‌වා නචිරස්‌සෙව ඡළභිඤ්‌ඤො අරහා අහොසි.
Navamāpadāne imamhi bhaddake kappetiādikaṃ āyasmato vanavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapassa bhagavato kāle kulagehe nibbatto viññutaṃ patvā satthu dhammadesanaṃ sutvā saddhājāto pabbajitvā parisuddhaṃ brahmacariyaṃ caritvā tato cuto devaloke nibbatto, tato cuto araññāyatane bhikkhūnaṃ samīpe kapotayoniyaṃ nibbatto. Tesu mettacitto dhammaṃ sutvā tato cuto devamanussesu saṃsaranto imasmiṃ buddhuppāde kapilavatthusmiṃ brāhmaṇakule nibbatti. Tassa mātukucchigatakāleyeva mātu dohaḷo udapādi vane vasituṃ vane vijāyituṃ . Tato icchānurūpavasena vane vasantiyā gabbhavuṭṭhānaṃ ahosi. Gabbhato nikkhantañca naṃ kāsāvakhaṇḍena paṭiggahesuṃ. Tadā bodhisattassa uppannakālo, rājā taṃ kumāraṃ āharāpetvā saheva posesi. Atha bodhisatto mahābhinikkhamanaṃ nikkhamitvā pabbajitvā chabbasāni dukkarakārikaṃ katvā buddhe jāte so mahākassapassa santikaṃ gantvā tassovāde pasanno tassa santikā buddhuppādabhāvaṃ sutvā satthu santikaṃ gantvā dhammaṃ sutvā pabbajitvā nacirasseva chaḷabhiñño arahā ahosi.
251. සො අරහත්‌තං පත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො ඉමම්‌හි භද්‌දකෙ කප්‌පෙතිආදිමාහ. තත්‌ථ බ්‍රහ්‌මබන්‌ධු මහායසොති එත්‌ථ බ්‍රාහ්‌මණානං බන්‌ධු ඤාතකොති බ්‍රාහ්‌මණබන්‌ධූති වත්‌තබ්‌බෙ ගාථාබන්‌ධසුඛත්‌ථං ‘‘බ්‍රහ්‌මබන්‌ධූ’’ති වුත්‌තන්‌ති වෙදිතබ්‌බං. ලොකත්‌තයබ්‍යාපකයසත්‌තා මහායසො. සෙසං සබ්‌බං සුවිඤ්‌ඤෙය්‍යමෙවාති.
251. So arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento imamhi bhaddake kappetiādimāha. Tattha brahmabandhu mahāyasoti ettha brāhmaṇānaṃ bandhu ñātakoti brāhmaṇabandhūti vattabbe gāthābandhasukhatthaṃ ‘‘brahmabandhū’’ti vuttanti veditabbaṃ. Lokattayabyāpakayasattā mahāyaso. Sesaṃ sabbaṃ suviññeyyamevāti.
වනවච්‌ඡත්‌ථෙරඅපදානවණ්‌ණනා සමත්‌තා.
Vanavacchattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. වනවච්‌ඡත්‌ථෙරඅපදානං • 9. Vanavacchattheraapadānaṃ
