| Library / Tipiṭaka / திபிடக • Tipiṭaka / விமானவத்து²-அட்ட²கதா² • Vimānavatthu-aṭṭhakathā |
11. வந்த³னவிமானவண்ணனா
11. Vandanavimānavaṇṇanā
அபி⁴க்கந்தேன வண்ணேனாதி வந்த³னவிமானங். தஸ்ஸ கா உப்பத்தி? ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன ஸமயேன ஸம்ப³ஹுலா பி⁴க்கூ² அஞ்ஞதரஸ்மிங் கா³மகாவாஸே வஸ்ஸங் வஸித்வா வுத்த²வஸ்ஸா பவாரெத்வா ஸேனாஸனங் படிஸாமெத்வா பத்தசீவரமாதா³ய ஸாவத்தி²ங் உத்³தி³ஸ்ஸ ப⁴க³வந்தங் த³ஸ்ஸனத்தா²ய க³ச்ச²ந்தா அஞ்ஞதரஸ்ஸ கா³மஸ்ஸ மஜ்ஜே²ன அதிக்கமந்தி. தத்த² அஞ்ஞதரா இத்தீ² தே பி⁴க்கூ² தி³ஸ்வா பஸன்னசித்தா ஸஞ்ஜாதகா³ரவப³ஹுமானா பஞ்சபதிட்டி²தேன வந்தி³த்வா ஸிரஸ்மிங் அஞ்ஜலிங் பக்³க³ய்ஹ யாவ த³ஸ்ஸனூபசாரா பஸாத³ஸொம்மானி அக்கீ²னி உம்மீலெத்வா ஓலோகெந்தீ அட்டா²ஸி . ஸா அபரேன ஸமயேன காலங் கத்வா தாவதிங்ஸேஸு நிப்³ப³த்தி. அத² நங் தத்த² தி³ப்³ப³ஸம்பத்திங் அனுப⁴வந்திங் ஆயஸ்மா மஹாமொக்³க³ல்லானோ இமாஹி கா³தா²ஹி படிபுச்சி² –
Abhikkantenavaṇṇenāti vandanavimānaṃ. Tassa kā uppatti? Bhagavā sāvatthiyaṃ viharati jetavane anāthapiṇḍikassa ārāme. Tena samayena sambahulā bhikkhū aññatarasmiṃ gāmakāvāse vassaṃ vasitvā vutthavassā pavāretvā senāsanaṃ paṭisāmetvā pattacīvaramādāya sāvatthiṃ uddissa bhagavantaṃ dassanatthāya gacchantā aññatarassa gāmassa majjhena atikkamanti. Tattha aññatarā itthī te bhikkhū disvā pasannacittā sañjātagāravabahumānā pañcapatiṭṭhitena vanditvā sirasmiṃ añjaliṃ paggayha yāva dassanūpacārā pasādasommāni akkhīni ummīletvā olokentī aṭṭhāsi . Sā aparena samayena kālaṃ katvā tāvatiṃsesu nibbatti. Atha naṃ tattha dibbasampattiṃ anubhavantiṃ āyasmā mahāmoggallāno imāhi gāthāhi paṭipucchi –
819. ‘‘அபி⁴க்கந்தேன வண்ணேன…பே॰…வண்ணோ ச தே ஸப்³ப³தி³ஸா பபா⁴ஸதீ’’தி.
819. ‘‘Abhikkantena vaṇṇena…pe…vaṇṇo ca te sabbadisā pabhāsatī’’ti.
822. ‘‘ஸா தே³வதா அத்தமனா…பே॰… யஸ்ஸ கம்மஸ்ஸித³ங் ப²லங்’’.
822. ‘‘Sā devatā attamanā…pe… yassa kammassidaṃ phalaṃ’’.
823.
823.
‘‘அஹங் மனுஸ்ஸேஸு மனுஸ்ஸபூ⁴தா, தி³ஸ்வான ஸமணே ஸீலவந்தே;
‘‘Ahaṃ manussesu manussabhūtā, disvāna samaṇe sīlavante;
பாதா³னி வந்தி³த்வா மனங் பஸாத³யிங், வித்தா சஹங் அஞ்ஜலிகங் அகாஸிங்.
Pādāni vanditvā manaṃ pasādayiṃ, vittā cahaṃ añjalikaṃ akāsiṃ.
824.
824.
‘‘தேன மேதாதி³ஸோ வண்ணோ…பே॰…வண்ணோ ச மே ஸப்³ப³தி³ஸா பபா⁴ஸதீ’’தி. –
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
இமாஹி கா³தா²ஹி ப்³யாகாஸி.
Imāhi gāthāhi byākāsi.
823. தத்த² ஸமணேதி ஸமிதபாபே. ஸீலவந்தேதி ஸீலகு³ணயுத்தே. மனங் பஸாத³யிந்தி ‘‘ஸாது⁴ரூபா வதிமே அய்யா த⁴ம்மசாரினோ ஸமசாரினோ ப்³ரஹ்மசாரினோ’’தி தேஸங் கு³ணே ஆரப்³ப⁴ சித்தங் பஸாதே³ஸிங். வித்தா சஹங் அஞ்ஜலிகங் அகாஸிந்தி துட்டா² ஸோமனஸ்ஸஜாதா அஹங் வந்தி³ங். பேஸலானங் பி⁴க்கூ²னங் பஸாத³விகஸிதானி அக்கீ²னி உம்மீலெத்வா த³ஸ்ஸனமத்தம்பி இமேஸங் ஸத்தானங் ப³ஹூபகாரங், பகே³வ வந்த³னாதி. தேனாஹ ‘‘தேன மேதாதி³ஸோ வண்ணோ’’திஆதி³. ஸேஸங் வுத்தனயமேவ.
823. Tattha samaṇeti samitapāpe. Sīlavanteti sīlaguṇayutte. Manaṃ pasādayinti ‘‘sādhurūpā vatime ayyā dhammacārino samacārino brahmacārino’’ti tesaṃ guṇe ārabbha cittaṃ pasādesiṃ. Vittā cahaṃ añjalikaṃ akāsinti tuṭṭhā somanassajātā ahaṃ vandiṃ. Pesalānaṃ bhikkhūnaṃ pasādavikasitāni akkhīni ummīletvā dassanamattampi imesaṃ sattānaṃ bahūpakāraṃ, pageva vandanāti. Tenāha ‘‘tena metādiso vaṇṇo’’tiādi. Sesaṃ vuttanayameva.
வந்த³னவிமானவண்ணனா நிட்டி²தா.
Vandanavimānavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / விமானவத்து²பாளி • Vimānavatthupāḷi / 11. வந்த³னவிமானவத்து² • 11. Vandanavimānavatthu
