| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१२. वङ्गीससुत्तं
12. Vaṅgīsasuttaṃ
‘‘कावेय्यमत्ता विचरिम्ह पुब्बे, गामा गामं पुरा पुरं।
‘‘Kāveyyamattā vicarimha pubbe, gāmā gāmaṃ purā puraṃ;
अथद्दसाम सम्बुद्धं, सद्धा नो उपपज्जथ॥
Athaddasāma sambuddhaṃ, saddhā no upapajjatha.
तस्साहं धम्मं सुत्वान, पब्बजिं अनगारियं॥
Tassāhaṃ dhammaṃ sutvāna, pabbajiṃ anagāriyaṃ.
‘‘बहुन्नं वत अत्थाय, बोधिं अज्झगमा मुनि।
‘‘Bahunnaṃ vata atthāya, bodhiṃ ajjhagamā muni;
भिक्खूनं भिक्खुनीनञ्च, ये नियामगतद्दसा॥
Bhikkhūnaṃ bhikkhunīnañca, ye niyāmagataddasā.
‘‘स्वागतं वत मे आसि, मम बुद्धस्स सन्तिके।
‘‘Svāgataṃ vata me āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
‘‘पुब्बेनिवासं जानामि, दिब्बचक्खुं विसोधितं।
‘‘Pubbenivāsaṃ jānāmi, dibbacakkhuṃ visodhitaṃ;
तेविज्जो इद्धिपत्तोम्हि, चेतोपरियायकोविदो’’ति॥
Tevijjo iddhipattomhi, cetopariyāyakovido’’ti.
वङ्गीससंयुत्तं समत्तं।
Vaṅgīsasaṃyuttaṃ samattaṃ.
तस्सुद्दानं –
Tassuddānaṃ –
निक्खन्तं अरति चेव, पेसला अतिमञ्ञना।
Nikkhantaṃ arati ceva, pesalā atimaññanā;
आनन्देन सुभासिता, सारिपुत्तपवारणा।
Ānandena subhāsitā, sāriputtapavāraṇā;
परोसहस्सं कोण्डञ्ञो, मोग्गल्लानेन गग्गरा।
Parosahassaṃ koṇḍañño, moggallānena gaggarā;
वङ्गीसेन द्वादसाति॥
Vaṅgīsena dvādasāti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १२. वङ्गीससुत्तवण्णना • 12. Vaṅgīsasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १२. वङ्गीससुत्तवण्णना • 12. Vaṅgīsasuttavaṇṇanā
