| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
12. ван̇г̇ийсасуд̇д̇аван̣н̣анаа
12. Vaṅgīsasuttavaṇṇanā
220. д̣̇ваад̣̇асамз ааяасмаад̇и бияаважанам̣. ван̇г̇ийсод̇и д̇асса т̇зрасса наамам̣. со гира буб̣б̣з бад̣̇умуд̇д̇арагаалз бадибхаанасамбаннам̣ саавагам̣ д̣̇исваа д̣̇аанам̣ д̣̇ад̇ваа бад̇т̇анам̣ гад̇ваа габбасад̇асахассам̣ баарамияо буурзд̇ваа амхаагам̣ бхаг̇авад̇о гаалз сагалаж̇амб̣уд̣̇ийбз ваад̣̇агаамад̇ааяа ж̇амб̣усаакам̣ барихарид̇ваа згзна бариб̣б̣ааж̇агзна сад̣̇д̇хим̣ ваад̣̇ам̣ гад̇ваа ваад̣̇з ж̇аяабарааж̇аяаанубхаавзна д̇знзва бариб̣б̣ааж̇агзна сад̣̇д̇хим̣ сам̣ваасам̣ габбзд̇ваа васамаанааяа згиссаа бариб̣б̣ааж̇игааяа гужчимхи ниб̣б̣ад̇д̇о ваяам̣ ааг̇амма маад̇ид̇о бан̃жаваад̣̇асад̇аани, бид̇ид̇о бан̃жаваад̣̇асад̇аанийд̇и ваад̣̇асахассам̣ уг̇г̇ан̣хид̇ваа вижарад̇и. зган̃жа виж̇ж̇ам̣ ж̇аанаад̇и, яам̣ виж̇ж̇ам̣ бариж̇аббид̇ваа мад̇аанам̣ сийсам̣ ан̇г̇улияаа бахарид̇ваа – ‘‘асугадтаанз ниб̣б̣ад̇д̇о’’д̇и ж̇аанаад̇и. со анубуб̣б̣зна г̇ааманиг̇амаад̣̇ийсу вижаранд̇о бан̃жахи маан̣авагасад̇зхи сад̣̇д̇хим̣ саавад̇т̇им̣ ануббад̇д̇о наг̇арад̣̇ваарз саалааяа нисийд̣̇ад̇и.
220. Dvādasame āyasmāti piyavacanaṃ. Vaṅgīsoti tassa therassa nāmaṃ. So kira pubbe padumuttarakāle paṭibhānasampannaṃ sāvakaṃ disvā dānaṃ datvā patthanaṃ katvā kappasatasahassaṃ pāramiyo pūretvā amhākaṃ bhagavato kāle sakalajambudīpe vādakāmatāya jambusākhaṃ pariharitvā ekena paribbājakena saddhiṃ vādaṃ katvā vāde jayaparājayānubhāvena teneva paribbājakena saddhiṃ saṃvāsaṃ kappetvā vasamānāya ekissā paribbājikāya kucchimhi nibbatto vayaṃ āgamma mātito pañcavādasatāni, pitito pañcavādasatānīti vādasahassaṃ uggaṇhitvā vicarati. Ekañca vijjaṃ jānāti, yaṃ vijjaṃ parijappitvā matānaṃ sīsaṃ aṅguliyā paharitvā – ‘‘asukaṭṭhāne nibbatto’’ti jānāti. So anupubbena gāmanigamādīsu vicaranto pañcahi māṇavakasatehi saddhiṃ sāvatthiṃ anuppatto nagaradvāre sālāya nisīdati.
д̇ад̣̇аа жа наг̇араваасино бурзбхад̇д̇ам̣ д̣̇аанам̣ д̣̇ад̇ваа бажчаабхад̇д̇ам̣ суд̣̇д̇худ̇д̇араасан̇г̇аа г̇анд̇хамаалаад̣̇ихад̇т̇аа д̇хаммассаванааяа вихаарам̣ г̇ажчанд̇и. маан̣аво д̣̇исваа, ‘‘гахам̣ г̇ажчат̇аа’’д̇и? бужчи. д̇з ‘‘д̣̇асаб̣аласса санд̇игам̣ д̇хаммассаванааяаа’’д̇и аахам̣су. соби сабаривааро д̇зхи сад̣̇д̇хим̣ г̇анд̇ваа бадисант̇аарам̣ гад̇ваа згаманд̇ам̣ адтааси. ат̇а нам̣ бхаг̇аваа ааха – ‘‘ван̇г̇ийса, бхад̣̇д̣̇агам̣ гира сиббам̣ ж̇аанаасий’’д̇и. ‘‘бхо г̇од̇ама, ахам̣ б̣ахусиббам̣ ж̇аанаами. д̇умхз гад̇арам̣ санд̇хааяа вад̣̇ат̇аа’’д̇и? чавад̣̇уусагасиббанд̇и. аама, бхо г̇од̇амаад̇и. ат̇асса бхаг̇аваа ад̇д̇ано аанубхаавзна нираяз ниб̣б̣ад̇д̇асса сийсам̣ д̣̇ассзд̇ваа, ‘‘ван̇г̇ийса, аяам̣ гахам̣ ниб̣б̣ад̇д̇о’’д̇и бужчи. со манд̇ам̣ ж̇аббид̇ваа ан̇г̇улияаа бахарид̇ваа ‘‘нираяз’’д̇и ааха. ‘‘саад̇ху, ван̇г̇ийса, сугат̇ид̇а’’нд̇и д̣̇звалогз ниб̣б̣ад̇д̇асса сийсам̣ д̣̇ассзси. д̇амби со д̇ат̇зва б̣яаагааси. ат̇асса кийн̣аасавасса сийсам̣ д̣̇ассзси. со бунаббунам̣ манд̇ам̣ баривад̇д̇зд̇вааби ан̇г̇улияаа бахарид̇вааби ниб̣б̣ад̇д̇адтаанам̣ на бассад̇и.
Tadā ca nagaravāsino purebhattaṃ dānaṃ datvā pacchābhattaṃ suddhuttarāsaṅgā gandhamālādihatthā dhammassavanāya vihāraṃ gacchanti. Māṇavo disvā, ‘‘kahaṃ gacchathā’’ti? Pucchi. Te ‘‘dasabalassa santikaṃ dhammassavanāyā’’ti āhaṃsu. Sopi saparivāro tehi saddhiṃ gantvā paṭisanthāraṃ katvā ekamantaṃ aṭṭhāsi. Atha naṃ bhagavā āha – ‘‘vaṅgīsa, bhaddakaṃ kira sippaṃ jānāsī’’ti. ‘‘Bho gotama, ahaṃ bahusippaṃ jānāmi. Tumhe kataraṃ sandhāya vadathā’’ti? Chavadūsakasippanti. Āma, bho gotamāti. Athassa bhagavā attano ānubhāvena niraye nibbattassa sīsaṃ dassetvā, ‘‘vaṅgīsa, ayaṃ kahaṃ nibbatto’’ti pucchi. So mantaṃ jappitvā aṅguliyā paharitvā ‘‘niraye’’ti āha. ‘‘Sādhu, vaṅgīsa, sukathita’’nti devaloke nibbattassa sīsaṃ dassesi. Tampi so tatheva byākāsi. Athassa khīṇāsavassa sīsaṃ dassesi. So punappunaṃ mantaṃ parivattetvāpi aṅguliyā paharitvāpi nibbattaṭṭhānaṃ na passati.
ат̇а нам̣ бхаг̇аваа ‘‘гиламаси, ван̇г̇ийсаа’’д̇и ааха? аама бхо, г̇од̇амаад̇и. бунаббунам̣ убад̇хаарзхийд̇и. д̇ат̇аа гаронд̇оби ад̣̇исваа, ‘‘д̇умхз, бхо г̇од̇ама, ж̇аанаат̇аа’’д̇и ааха. аама, ван̇г̇ийса, мам̣ ниссааяа жзса г̇ад̇о, ахамасса г̇ад̇им̣ ж̇аанаамийд̇и. манд̇зна ж̇аанааси, бхо г̇од̇амаад̇и? аама, ван̇г̇ийса, згзна манд̇знзва ж̇аанаамийд̇и. бхо г̇од̇ама, маяхам̣ манд̇зна имам̣ манд̇ам̣ д̣̇зт̇аад̇и. амуулиго, ван̇г̇ийса, маяхам̣ манд̇од̇и. д̣̇зт̇а, бхо г̇од̇амаад̇и. на саггаа маяхам̣ санд̇игз абаб̣б̣аж̇ид̇асса д̣̇аад̇унд̇и. со анд̇зваасигз ааманд̇зси – ‘‘д̇аад̇аа саман̣о г̇од̇амо ад̇ирзгасиббам̣ ж̇аанаад̇и, ахам̣ имасса санд̇игз баб̣б̣аж̇ид̇ваа сиббам̣ г̇ан̣хаами, д̇ад̇о сагалаж̇амб̣уд̣̇ийбз амхзхи б̣ахуд̇арам̣ ж̇аананд̇о наама на бхависсад̇и. д̇умхз яаава ахам̣ ааг̇ажчаами, д̇аава анугган̣тид̇ваа вижарат̇аа’’д̇и д̇з уяяож̇зд̇ваа ‘‘баб̣б̣ааж̇зт̇а ма’’нд̇и ааха. сад̇т̇аа ниг̇род̇хагаббасса бадибаад̣̇зси. т̇зро д̇ам̣ ад̇д̇ано васанадтаанам̣ нзд̇ваа баб̣б̣ааж̇зси. со баб̣б̣аж̇ид̇ваа сад̇т̇у санд̇игам̣ ааг̇амма ванд̣̇ид̇ваа тид̇о ‘‘сиббам̣ д̣̇зт̇аа’’д̇и яаажи. ван̇г̇ийса, д̇умхз сиббам̣ г̇ан̣ханд̇аа алон̣абхож̇анат̇ан̣д̣иласзяяаад̣̇ийхи баригаммам̣ гад̇ваа г̇ан̣хат̇а, имассааби сиббасса баригаммам̣ ад̇т̇и, д̇ам̣ д̇аава гарохийд̇и. саад̇ху, бханд̇зд̇и. ат̇асса сад̇т̇аа д̣̇вад̇д̇им̣саагаарагаммадтаанам̣ аажигки. со д̇ам̣ ануломабадиломам̣ манасигаронд̇о вибассанам̣ вад̣дхзд̇ваа ануггамзна арахад̇д̇ам̣ баабун̣и.
Atha naṃ bhagavā ‘‘kilamasi, vaṅgīsā’’ti āha? Āma bho, gotamāti. Punappunaṃ upadhārehīti. Tathā karontopi adisvā, ‘‘tumhe, bho gotama, jānāthā’’ti āha. Āma, vaṅgīsa, maṃ nissāya cesa gato, ahamassa gatiṃ jānāmīti. Mantena jānāsi, bho gotamāti? Āma, vaṅgīsa, ekena manteneva jānāmīti. Bho gotama, mayhaṃ mantena imaṃ mantaṃ dethāti. Amūliko, vaṅgīsa, mayhaṃ mantoti. Detha, bho gotamāti. Na sakkā mayhaṃ santike apabbajitassa dātunti. So antevāsike āmantesi – ‘‘tātā samaṇo gotamo atirekasippaṃ jānāti, ahaṃ imassa santike pabbajitvā sippaṃ gaṇhāmi, tato sakalajambudīpe amhehi bahutaraṃ jānanto nāma na bhavissati. Tumhe yāva ahaṃ āgacchāmi, tāva anukkaṇṭhitvā vicarathā’’ti te uyyojetvā ‘‘pabbājetha ma’’nti āha. Satthā nigrodhakappassa paṭipādesi. Thero taṃ attano vasanaṭṭhānaṃ netvā pabbājesi. So pabbajitvā satthu santikaṃ āgamma vanditvā ṭhito ‘‘sippaṃ dethā’’ti yāci. Vaṅgīsa, tumhe sippaṃ gaṇhantā aloṇabhojanathaṇḍilaseyyādīhi parikammaṃ katvā gaṇhatha, imassāpi sippassa parikammaṃ atthi, taṃ tāva karohīti. Sādhu, bhanteti. Athassa satthā dvattiṃsākārakammaṭṭhānaṃ ācikkhi. So taṃ anulomapaṭilomaṃ manasikaronto vipassanaṃ vaḍḍhetvā anukkamena arahattaṃ pāpuṇi.
вимуд̇д̇исукам̣ бадисам̣взд̣̇ийд̇и звам̣ арахад̇д̇ам̣ бад̇ваа вимуд̇д̇исукам̣ бадисам̣взд̣̇знд̇о. гаавзяяамад̇д̇аад̇и гаавзяязна габ̣б̣агаран̣зна мад̇д̇аа. канд̇хааяад̇анад̇хаад̇уяод̇и имаани канд̇хаад̣̇ийни багаасзнд̇о д̇хаммам̣ д̣̇зсзси. яз нияаамаг̇ад̇ад̣̇д̣̇асаад̇и яз нияаамаг̇ад̇аа жзва нияаамад̣̇ассаад̇и жа. свааг̇ад̇анд̇и суааг̇аманам̣. ид̣̇д̇хибад̇д̇омхийд̇и иминаа ид̣̇д̇хивид̇хан̃аан̣ам̣ г̇ахид̇ам̣. жзд̇обарияааяаговид̣̇од̇и иминаа жзд̇обарияан̃аан̣ам̣. д̣̇иб̣б̣асод̇ам̣ бана авуд̇д̇амби г̇ахид̇амзва ход̇и. звам̣ ча абхин̃н̃аабад̇д̇о зсо махаасаавагод̇и взд̣̇ид̇аб̣б̣о. д̣̇ваад̣̇асамам̣.
Vimuttisukhaṃ paṭisaṃvedīti evaṃ arahattaṃ patvā vimuttisukhaṃ paṭisaṃvedento. Kāveyyamattāti kāveyyena kabbakaraṇena mattā. Khandhāyatanadhātuyoti imāni khandhādīni pakāsento dhammaṃ desesi. Ye niyāmagataddasāti ye niyāmagatā ceva niyāmadassāti ca. Svāgatanti suāgamanaṃ. Iddhipattomhīti iminā iddhividhañāṇaṃ gahitaṃ. Cetopariyāyakovidoti iminā cetopariyañāṇaṃ. Dibbasotaṃ pana avuttampi gahitameva hoti. Evaṃ cha abhiññāpatto eso mahāsāvakoti veditabbo. Dvādasamaṃ.
ид̇и саарад̇т̇аббагаасинияаа
Iti sāratthappakāsiniyā
сам̣яуд̇д̇анигааяа-адтагат̇ааяа
Saṃyuttanikāya-aṭṭhakathāya
ван̇г̇ийсасам̣яуд̇д̇аван̣н̣анаа нидтид̇аа.
Vaṅgīsasaṃyuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 12. ван̇г̇ийсасуд̇д̇ам̣ • 12. Vaṅgīsasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 12. ван̇г̇ийсасуд̇д̇аван̣н̣анаа • 12. Vaṅgīsasuttavaṇṇanā
