Library / Tipiṭaka / ཏིཔིཊཀ • Tipiṭaka / ཐེརགཱཐཱ-ཨཊྛཀཐཱ • Theragāthā-aṭṭhakathā

    ༢༡. མཧཱནིཔཱཏོ

    21. Mahānipāto

    ༡. ཝངྒཱིསཏྠེརགཱཐཱཝཎྞནཱ

    1. Vaṅgīsattheragāthāvaṇṇanā

    སཏྟཏིནིཔཱཏེ ནིཀྑནྟཾ ཝཏ མཾ སནྟནྟིཨཱདིཀཱ ཨཱཡསྨཏོ ཝངྒཱིསཏྠེརསྶ གཱཐཱ། ཀཱ ཨུཔྤཏྟི? ཨཡཾ ཀིར པདུམུཏྟརབུདྡྷཀཱལེ ཧཾསཝཏཱིནགརེ མཧཱབྷོགཀུལེ ནིབྦཏྟོ, པུརིམནཡེནེཝ ཝིཧཱརཾ གནྟྭཱ དྷམྨཾ སུཎནྟོ སཏྠཱརཾ ཨེཀཾ བྷིཀྑུཾ པཊིབྷཱནཝནྟཱནཾ ཨགྒཊྛཱནེ ཋཔེནྟཾ དིསྭཱ སཏྠུ ཨདྷིཀཱརཀམྨཾ ཀཏྭཱ – ‘‘ཨཧམྤི ཨནཱགཏེ པཊིབྷཱནཝནྟཱནཾ ཨགྒོ བྷཝེཡྻ’’ནྟི པཏྠནཾ ཀཏྭཱ, སཏྠཱརཱ བྱཱཀཏོ ཡཱཝཛཱིཝཾ ཀུསལཾ ཀཏྭཱ དེཝམནུསྶེསུ སཾསརནྟོ ཨིམསྨིཾ བུདྡྷུཔྤཱདེ སཱཝཏྠིཡཾ བྲཱཧྨཎཀུལེ ནིབྦཏྟིཏྭཱ ཝངྒཱིསོཏི ལདྡྷནཱམོ ཏཡོ བེདེ ཨུགྒཎྷནྟོ ཨཱཙརིཡཾ ཨཱརཱདྷེཏྭཱ, ཚཝསཱིསམནྟཾ ནཱམ སིཀྑིཏྭཱ ཚཝསཱིསཾ ནཁེན ཨཱཀོཊེཏྭཱ ‘‘ཨཡཾ སཏྟོ ཨསུཀཡོནིཡཾ ནིབྦཏྟོ’’ཏི ཛཱནཱཏི།

    Sattatinipāte nikkhantaṃ vata maṃ santantiādikā āyasmato vaṅgīsattherassa gāthā. Kā uppatti? Ayaṃ kira padumuttarabuddhakāle haṃsavatīnagare mahābhogakule nibbatto, purimanayeneva vihāraṃ gantvā dhammaṃ suṇanto satthāraṃ ekaṃ bhikkhuṃ paṭibhānavantānaṃ aggaṭṭhāne ṭhapentaṃ disvā satthu adhikārakammaṃ katvā – ‘‘ahampi anāgate paṭibhānavantānaṃ aggo bhaveyya’’nti patthanaṃ katvā, satthārā byākato yāvajīvaṃ kusalaṃ katvā devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbattitvā vaṅgīsoti laddhanāmo tayo bede uggaṇhanto ācariyaṃ ārādhetvā, chavasīsamantaṃ nāma sikkhitvā chavasīsaṃ nakhena ākoṭetvā ‘‘ayaṃ satto asukayoniyaṃ nibbatto’’ti jānāti.

    བྲཱཧྨཎཱ ‘‘ཨཡཾ ཨམྷཱཀཾ ཛཱིཝིཏམགྒོ’’ཏི ཉཏྭཱ ཝངྒཱིསཾ གཧེཏྭཱ པཊིཙྪནྣཡཱནེ ནིསཱིདཱཔེཏྭཱ གཱམནིགམརཱཛདྷཱནིཡོ ཝིཙརནྟི། ཝངྒཱིསོཔི ཏིཝསྶམཏྠཀེ མཏཱནམྤི སཱིསཾ ཨཱཧརཱཔེཏྭཱ ནཁེན ཨཱཀོཊེཏྭཱ ‘‘ཨཡཾ སཏྟོ ཨསུཀཡོནིཡཾ ནིབྦཏྟོ’’ཏི ཝཏྭཱ མཧཱཛནསྶ ཀངྑཙྪེདནཏྠཾ ཏེ ཏེ ཛནེ ཨཱཝཱཧེཏྭཱ ཨཏྟནོ ཨཏྟནོ གཏིཾ ཀཐཱཔེཏི། ཏེན ཏསྨིཾ མཧཱཛནོ ཨབྷིཔྤསཱིདཏི། སོ ཏཾ ནིསྶཱཡ མཧཱཛནསྶ ཧཏྠཏོ སཏམྤི སཧསྶམྤི ལབྷཏཱིཏི། བྲཱཧྨཎཱ ཝངྒཱིསམཱདཱཡ ཡཐཱརུཙིཾ ཝིཙརིཏྭཱ པུན སཱཝཏྠིཾ ཨགམཾསུ། ཝངྒཱིསོ སཏྠུ གུཎེ སུཏྭཱ སཏྠཱརཾ ཨུཔསངྐམིཏུཀཱམོ ཨཧོསི། བྲཱཧྨཎཱ ‘‘སམཎོ གོཏམོ མཱཡཱཡ ཏཾ ཨཱཝཊྚེསྶཏཱི’’ཏི པཊིཀྑིཔིཾསུ། ཝངྒཱིསོ ཏེསཾ ཝཙནཾ ཨནཱདིཡིཏྭཱ སཏྠུ སནྟིཀཾ གནྟྭཱ མདྷུརཔཊིསནྠཱརཾ ཀཏྭཱ ཨེཀམནྟཾ ནིསཱིདི།

    Brāhmaṇā ‘‘ayaṃ amhākaṃ jīvitamaggo’’ti ñatvā vaṅgīsaṃ gahetvā paṭicchannayāne nisīdāpetvā gāmanigamarājadhāniyo vicaranti. Vaṅgīsopi tivassamatthake matānampi sīsaṃ āharāpetvā nakhena ākoṭetvā ‘‘ayaṃ satto asukayoniyaṃ nibbatto’’ti vatvā mahājanassa kaṅkhacchedanatthaṃ te te jane āvāhetvā attano attano gatiṃ kathāpeti. Tena tasmiṃ mahājano abhippasīdati. So taṃ nissāya mahājanassa hatthato satampi sahassampi labhatīti. Brāhmaṇā vaṅgīsamādāya yathāruciṃ vicaritvā puna sāvatthiṃ agamaṃsu. Vaṅgīso satthu guṇe sutvā satthāraṃ upasaṅkamitukāmo ahosi. Brāhmaṇā ‘‘samaṇo gotamo māyāya taṃ āvaṭṭessatī’’ti paṭikkhipiṃsu. Vaṅgīso tesaṃ vacanaṃ anādiyitvā satthu santikaṃ gantvā madhurapaṭisanthāraṃ katvā ekamantaṃ nisīdi.

    ཏཾ སཏྠཱ པུཙྪི – ‘‘ཝངྒཱིས, ཀིཉྩི སིཔྤཾ ཛཱནཱསཱི’’ཏི? ‘‘ཨཱམ, བྷོ གོཏམ, ཚཝསཱིསམནྟཾ ནཱམ ཛཱནཱམི། ཏེན ཏིཝསྶམཏྠཀེ མཏཱནམྤི སཱིསཾ ནཁེན ཨཱཀོཊེཏྭཱ ནིབྦཏྟཊྛཱནཾ ཛཱནཱམཱི’’ཏི། སཏྠཱ ཏསྶ ཨེཀཾ ནིརཡེ ནིབྦཏྟསྶ སཱིསཾ དསྶེསི, ཨེཀཾ མནུསྶེསུ , ཨེཀཾ དེཝེསུ, ཨེཀཾ པརིནིབྦུཏསྶ སཱིསཾ དསྶེསི། སོ པཋམཾ སཱིསཾ ཨཱཀོཊེཏྭཱ, ‘‘བྷོ གོཏམ, ཨཡཾ སཏྟོ ནིརཡེ ནིབྦཏྟོ’’ཏི ཨཱཧ། ‘‘སཱདྷུ, ཝངྒཱིས, སུཊྛུ ཏཡཱ དིཊྛཾ། ཨཡཾ སཏྟོ ཀུཧིཾ ནིབྦཏྟོ’’ཏི པུཙྪི། ‘‘མནུསྶལོཀེ’’ཏི། ‘‘ཨཡཾ ཀུཧི’’ནྟི? ‘‘དེཝལོཀེ’’ཏི ཏིཎྞནྣམྤི ནིབྦཏྟཊྛཱནཾ ཀཐེསི། པརིནིབྦུཏསྶ པན སཱིསཾ ནཁེན ཨཱཀོཊེནྟོ ནེཝ ཨནྟཾ ན ཀོཊིཾ པསྶི། ཨཐ ནཾ སཏྠཱ ‘‘ན སཀྐོསི ཝངྒཱིསཱ’’ཏི པུཙྪི། ‘‘ཨུཔཔརིཀྑཱམི ཏཱཝཱ’’ཏི པུནཔྤུནཾ པརིཝཏྟེཏྭཱ ཨཱཀོཊེནྟོཔི བཱཧིརཀམནྟེན ཁཱིཎཱསཝསྶ གཏིཾ ཀཐཾ ཛཱནིསྶཏི, ཨཐསྶ མཏྠཀཏོ སེདོ མུཙྩི། སོ ལཛྫིཏྭཱ ཏུཎྷཱིབྷཱུཏོ ཨཊྛཱསི། ཨཐ ནཾ སཏྠཱ – ‘‘ཀིལམསི, ཝངྒཱིསཱ’’ཏི ཨཱཧ། ‘‘ཨཱམ, བྷོ གོཏམ, ཨིམསྶ ཨུཔྤནྣཊྛཱནཾ ཛཱནིཏུཾ ན སཀྐོམི, སཙེ ཏུམྷེ ཛཱནཱཐ, ཀཐེཐཱ’’ཏི། ‘‘ཝངྒཱིས, ཨཧཾ ཨེཏམྤི ཛཱནཱམི, ཨིཏོ ཨུཏྟརིཏརམྤི ཛཱནཱམཱི’’ཏི ཝཏྭཱ –

    Taṃ satthā pucchi – ‘‘vaṅgīsa, kiñci sippaṃ jānāsī’’ti? ‘‘Āma, bho gotama, chavasīsamantaṃ nāma jānāmi. Tena tivassamatthake matānampi sīsaṃ nakhena ākoṭetvā nibbattaṭṭhānaṃ jānāmī’’ti. Satthā tassa ekaṃ niraye nibbattassa sīsaṃ dassesi, ekaṃ manussesu , ekaṃ devesu, ekaṃ parinibbutassa sīsaṃ dassesi. So paṭhamaṃ sīsaṃ ākoṭetvā, ‘‘bho gotama, ayaṃ satto niraye nibbatto’’ti āha. ‘‘Sādhu, vaṅgīsa, suṭṭhu tayā diṭṭhaṃ. Ayaṃ satto kuhiṃ nibbatto’’ti pucchi. ‘‘Manussaloke’’ti. ‘‘Ayaṃ kuhi’’nti? ‘‘Devaloke’’ti tiṇṇannampi nibbattaṭṭhānaṃ kathesi. Parinibbutassa pana sīsaṃ nakhena ākoṭento neva antaṃ na koṭiṃ passi. Atha naṃ satthā ‘‘na sakkosi vaṅgīsā’’ti pucchi. ‘‘Upaparikkhāmi tāvā’’ti punappunaṃ parivattetvā ākoṭentopi bāhirakamantena khīṇāsavassa gatiṃ kathaṃ jānissati, athassa matthakato sedo mucci. So lajjitvā tuṇhībhūto aṭṭhāsi. Atha naṃ satthā – ‘‘kilamasi, vaṅgīsā’’ti āha. ‘‘Āma, bho gotama, imassa uppannaṭṭhānaṃ jānituṃ na sakkomi, sace tumhe jānātha, kathethā’’ti. ‘‘Vaṅgīsa, ahaṃ etampi jānāmi, ito uttaritarampi jānāmī’’ti vatvā –

    ‘‘ཙུཏིཾ ཡོ ཝེདི སཏྟཱནཾ, ཨུཔཔཏྟིཉྩ སབྦསོ།

    ‘‘Cutiṃ yo vedi sattānaṃ, upapattiñca sabbaso;

    ཨསཏྟཾ སུགཏཾ བུདྡྷཾ, ཏམཧཾ བྲཱུམི བྲཱཧྨཎཾ༎

    Asattaṃ sugataṃ buddhaṃ, tamahaṃ brūmi brāhmaṇaṃ.

    ‘‘ཡསྶ གཏིཾ ན ཛཱནནྟི, དེཝཱ གནྡྷབྦམཱནུསཱ།

    ‘‘Yassa gatiṃ na jānanti, devā gandhabbamānusā;

    ཁཱིཎཱསཝཾ ཨརཧནྟཾ, ཏམཧཾ བྲཱུམི བྲཱཧྨཎ’’ནྟི༎ (དྷ॰ པ॰ ༤༡༩-༤༢༠; སུ॰ ནི॰ ༦༤༨-༦༤༩) –

    Khīṇāsavaṃ arahantaṃ, tamahaṃ brūmi brāhmaṇa’’nti. (dha. pa. 419-420; su. ni. 648-649) –

    ཨིམཱ དྭེ གཱཐཱ ཨབྷཱསི། ཝངྒཱིསོ ‘‘ཏེན ཧི, བྷོ གོཏམ, ཏཾ ཝིཛྫཾ མེ དེཐཱ’’ཏི ཨཔཙིཏིཾ དསྶེཏྭཱ སཏྠུ སནྟིཀེ ནིསཱིདི། སཏྠཱ ‘‘ཨམྷེཧི སམཱནལིངྒསྶ དེམཱ’’ཏི ཨཱཧ། ཝངྒཱིསོ ‘‘ཡཾཀིཉྩི ཀཏྭཱ མཡཱ ཨིམཾ མནྟཾ གཧེཏུཾ ཝཊྚཏཱི’’ཏི བྲཱཧྨཎེ ཨཱཧ – ‘‘ཏུམྷེ མཡི པབྦཛནྟེ མཱ ཙིནྟཡིཏྠ, ཨཧཾ མནྟཾ ཨུགྒཎྷིཏྭཱ སཀལཛམྦུདཱིཔེ ཛེཊྛཀོ བྷཝིསྶཱམི, ཏུམྷཱཀམྤི ཏེན བྷདྡཀམེཝ བྷཝིསྶཏཱི’’ཏི མནྟཏྠཱཡ སཏྠུསནྟིཀཾ ཨུཔསངྐམིཏྭཱ པབྦཛྫཾ ཡཱཙི། ཏདཱ ཙ ཐེརོ ནིགྲོདྷཀཔྤོ བྷགཝཏོ སནྟིཀེ ཋིཏོ ཧོཏི, ཏཾ བྷགཝཱ ཨཱཎཱཔེསི – ‘‘ནིགྲོདྷཀཔྤ, ཨིམཾ པབྦཱཛེཧཱི’’ཏི། སོ སཏྠུ ཨཱཎཱཡ ཏཾ པབྦཱཛེསི། ཨཐསྶ སཏྠཱ ‘‘མནྟཔརིཝཱརཾ ཏཱཝ ཨུགྒཎྷཱཧཱི’’ཏི དྭཏྟིཾསཱཀཱརཀམྨཊྛཱནཾ ཝིཔསྶནཱཀམྨཊྛཱནཉྩ ཨཱཙིཀྑི། སོ དྭཏྟིཾསཱཀཱརཾ སཛ྄ཛྷཱཡནྟོཝ ཝིཔསྶནཾ པཊྛཔེསི། བྲཱཧྨཎཱ ཝངྒཱིསཾ ཨུཔསངྐམིཏྭཱ ‘‘ཀིཾ, བྷོ ཝངྒཱིས, སམཎསྨ གོཏམསྶ སནྟིཀེ སིཔྤཾ སིཀྑིཏ’’ནྟི པུཙྪིཾསུ། ‘‘ཀིཾ སིཔྤསིཀྑནེན, གཙྪཐ ཏུམྷེ, ན མཡ྄ཧཾ ཏུམྷེཧི ཀཏྟབྦཀིཙྩ’’ནྟི། བྲཱཧྨཎཱ ‘‘ཏྭམྤི དཱནི སམཎསྶ གོཏམསྶ ཝསཾ ཨཱཔནྣོ, མཱཡཱཡ ཨཱཝཊྚིཏོ, ཀིཾ མཡཾ ཏཝ སནྟིཀེ ཀརིསྶཱམཱ’’ཏི ཨཱགཏམགྒེནེཝ པཀྐམིཾསུ། ཝངྒཱིསཏྠེརོ ཝིཔསྶནཾ ཝཌྜྷེཏྭཱ ཨརཧཏྟཾ སཙྪཱཀཱསི། ཏེན ཝུཏྟཾ ཨཔདཱནེ (ཨཔ॰ ཐེར ༢.༥༥.༩༦-༡༤༢) –

    Imā dve gāthā abhāsi. Vaṅgīso ‘‘tena hi, bho gotama, taṃ vijjaṃ me dethā’’ti apacitiṃ dassetvā satthu santike nisīdi. Satthā ‘‘amhehi samānaliṅgassa demā’’ti āha. Vaṅgīso ‘‘yaṃkiñci katvā mayā imaṃ mantaṃ gahetuṃ vaṭṭatī’’ti brāhmaṇe āha – ‘‘tumhe mayi pabbajante mā cintayittha, ahaṃ mantaṃ uggaṇhitvā sakalajambudīpe jeṭṭhako bhavissāmi, tumhākampi tena bhaddakameva bhavissatī’’ti mantatthāya satthusantikaṃ upasaṅkamitvā pabbajjaṃ yāci. Tadā ca thero nigrodhakappo bhagavato santike ṭhito hoti, taṃ bhagavā āṇāpesi – ‘‘nigrodhakappa, imaṃ pabbājehī’’ti. So satthu āṇāya taṃ pabbājesi. Athassa satthā ‘‘mantaparivāraṃ tāva uggaṇhāhī’’ti dvattiṃsākārakammaṭṭhānaṃ vipassanākammaṭṭhānañca ācikkhi. So dvattiṃsākāraṃ sajjhāyantova vipassanaṃ paṭṭhapesi. Brāhmaṇā vaṅgīsaṃ upasaṅkamitvā ‘‘kiṃ, bho vaṅgīsa, samaṇasma gotamassa santike sippaṃ sikkhita’’nti pucchiṃsu. ‘‘Kiṃ sippasikkhanena, gacchatha tumhe, na mayhaṃ tumhehi kattabbakicca’’nti. Brāhmaṇā ‘‘tvampi dāni samaṇassa gotamassa vasaṃ āpanno, māyāya āvaṭṭito, kiṃ mayaṃ tava santike karissāmā’’ti āgatamaggeneva pakkamiṃsu. Vaṅgīsatthero vipassanaṃ vaḍḍhetvā arahattaṃ sacchākāsi. Tena vuttaṃ apadāne (apa. thera 2.55.96-142) –

    ‘‘པདུམུཏྟརོ ནཱམ ཛིནོ, སབྦདྷམྨེསུ ཙཀྑུམཱ།

    ‘‘Padumuttaro nāma jino, sabbadhammesu cakkhumā;

    ཨིཏོ སཏསཧསྶམྷི, ཀཔྤེ ཨུཔྤཛྫི ནཱཡཀོ༎

    Ito satasahassamhi, kappe uppajji nāyako.

    ‘‘ཡཐཱཔི སཱགརེ ཨཱུམི, གགནེ ཝིཡ ཏཱརཀཱ།

    ‘‘Yathāpi sāgare ūmi, gagane viya tārakā;

    ཨེཝཾ པཱཝཙནཾ ཏསྶ, ཨརཧནྟེཧི ཙིཏྟིཏཾ༎

    Evaṃ pāvacanaṃ tassa, arahantehi cittitaṃ.

    ‘‘སདེཝཱསུརནཱགེཧི, མནུཛེཧི པུརཀྑཏོ།

    ‘‘Sadevāsuranāgehi, manujehi purakkhato;

    སམཎབྲཱཧྨཎཱཀིཎྞེ, ཛནམཛ྄ཛྷེ ཛིནུཏྟམོ༎

    Samaṇabrāhmaṇākiṇṇe, janamajjhe jinuttamo.

    ‘‘པབྷཱཧི ཨནུརཉྫནྟོ, ལོཀེ ལོཀནྟགཱུ ཛིནོ།

    ‘‘Pabhāhi anurañjanto, loke lokantagū jino;

    ཝཙནེན ཝིབོདྷེནྟོ, ཝེནེཡྻཔདུམཱནི སོ༎

    Vacanena vibodhento, veneyyapadumāni so.

    ‘‘ཝེསཱརཛྫེཧི སམྤནྣོ, ཙཏཱུཧི པུརིསུཏྟམོ།

    ‘‘Vesārajjehi sampanno, catūhi purisuttamo;

    པཧཱིནབྷཡསཱརཛྫོ, ཁེམཔྤཏྟོ ཝིསཱརདོ༎

    Pahīnabhayasārajjo, khemappatto visārado.

    ‘‘ཨཱསབྷཾ པཝརཾ ཋཱནཾ, བུདྡྷབྷཱུམིཉྩ ཀེཝལཾ།

    ‘‘Āsabhaṃ pavaraṃ ṭhānaṃ, buddhabhūmiñca kevalaṃ;

    པཊིཛཱནཱཏི ལོཀགྒོ, ནཏྠི སཉྩོདཀོ ཀྭཙི༎

    Paṭijānāti lokaggo, natthi sañcodako kvaci.

    ‘‘སཱིཧནཱདམསམྦྷཱིཏཾ, ནདཏོ ཏསྶ ཏཱདིནོ།

    ‘‘Sīhanādamasambhītaṃ, nadato tassa tādino;

    དེཝཱ ནརོ ཝཱ བྲཧྨཱ ཝཱ, པཊིཝཏྟཱ ན ཝིཛྫཏི༎

    Devā naro vā brahmā vā, paṭivattā na vijjati.

    ‘‘དེསེནྟོ པཝརཾ དྷམྨཾ, སནྟཱརེནྟོ སདེཝཀཾ།

    ‘‘Desento pavaraṃ dhammaṃ, santārento sadevakaṃ;

    དྷམྨཙཀྐཾ པཝཏྟེཏི, པརིསཱསུ ཝིསཱརདོ༎

    Dhammacakkaṃ pavatteti, parisāsu visārado.

    ‘‘པཊིབྷཱནཝཏཾ ཨགྒཾ, སཱཝཀཾ སཱདྷུསམྨཏཾ།

    ‘‘Paṭibhānavataṃ aggaṃ, sāvakaṃ sādhusammataṃ;

    གུཎཾ བཧུཾ པཀིཏྟེཏྭཱ, ཨེཏདགྒེ ཋཔེསི ཏཾ༎

    Guṇaṃ bahuṃ pakittetvā, etadagge ṭhapesi taṃ.

    ‘‘ཏདཱཧཾ ཧཾསཝཏིཡཾ, བྲཱཧྨཎོ སཱདྷུསམྨཏོ།

    ‘‘Tadāhaṃ haṃsavatiyaṃ, brāhmaṇo sādhusammato;

    སབྦཝེདཝིདཱུ ཛཱཏོ, ཝཱགཱིསོ ཝཱདིསཱུདནོ༎

    Sabbavedavidū jāto, vāgīso vādisūdano.

    ‘‘ཨུཔེཙྩ ཏཾ མཧཱཝཱིརཾ, སུཏྭཱཧཾ དྷམྨདེསནཾ།

    ‘‘Upecca taṃ mahāvīraṃ, sutvāhaṃ dhammadesanaṃ;

    པཱིཏིཝརཾ པཊིལབྷིཾ, སཱཝཀསྶ གུཎེ རཏོ༎

    Pītivaraṃ paṭilabhiṃ, sāvakassa guṇe rato.

    ‘‘ནིམནྟེཏྭཱཝ སུགཏཾ, སསངྒྷཾ ལོཀནནྡནཾ།

    ‘‘Nimantetvāva sugataṃ, sasaṅghaṃ lokanandanaṃ;

    སཏྟཱཧཾ བྷོཛཡིཏྭཱཧཾ, དུསྶེཧཙྪཱདཡིཾ ཏདཱ༎

    Sattāhaṃ bhojayitvāhaṃ, dussehacchādayiṃ tadā.

    ‘‘ནིཔཙྩ སིརསཱ པཱདེ, ཀཏོཀཱསོ ཀཏཉྫལཱི།

    ‘‘Nipacca sirasā pāde, katokāso katañjalī;

    ཨེཀམནྟཾ ཋིཏོ ཧཊྛོ, སནྠཝིཾ ཛིནམུཏྟམཾ༎

    Ekamantaṃ ṭhito haṭṭho, santhaviṃ jinamuttamaṃ.

    ‘‘ནམོ ཏེ ཝཱདིམདྡན, ནམོ ཏེ ཨིསིསཏྟམ།

    ‘‘Namo te vādimaddana, namo te isisattama;

    ནམོ ཏེ སབྦལོཀགྒ, ནམོ ཏེ ཨབྷཡཾ ཀར༎

    Namo te sabbalokagga, namo te abhayaṃ kara.

    ‘‘ནམོ ཏེ མཱརམཐན, ནམོ ཏེ དིཊྛིསཱུདན།

    ‘‘Namo te māramathana, namo te diṭṭhisūdana;

    ནམོ ཏེ སནྟིསུཁད, ནམོ ཏེ སརཎཾ ཀར༎

    Namo te santisukhada, namo te saraṇaṃ kara.

    ‘‘ཨནཱཐཱནཾ བྷཝཾ ནཱཐོ, བྷཱིཏཱནཾ ཨབྷཡཔྤདོ།

    ‘‘Anāthānaṃ bhavaṃ nātho, bhītānaṃ abhayappado;

    ཝིསྶཱམབྷཱུམི སནྟཱནཾ, སརཎཾ སརཎེསིནཾ༎

    Vissāmabhūmi santānaṃ, saraṇaṃ saraṇesinaṃ.

    ‘‘ཨེཝམཱདཱིཧི སམྦུདྡྷཾ, སནྠཝིཏྭཱ མཧཱགུཎཾ།

    ‘‘Evamādīhi sambuddhaṃ, santhavitvā mahāguṇaṃ;

    ཨཝོཙཾ ཝཱདིསཱུདསྶ, གཏིཾ པཔྤོམི བྷིཀྑུནོ༎

    Avocaṃ vādisūdassa, gatiṃ pappomi bhikkhuno.

    ‘‘ཏདཱ ཨཝོཙ བྷགཝཱ, ཨནནྟཔཊིབྷཱནཝཱ།

    ‘‘Tadā avoca bhagavā, anantapaṭibhānavā;

    ཡོ སོ བུདྡྷཾ ཨབྷོཛེསི, སཏྟཱཧཾ སཧསཱཝཀཾ༎

    Yo so buddhaṃ abhojesi, sattāhaṃ sahasāvakaṃ.

    ‘‘གུཎཉྩ མེ པཀིཏྟེསི, པསནྣོ སེཧི པཱཎིབྷི།

    ‘‘Guṇañca me pakittesi, pasanno sehi pāṇibhi;

    ཨེསོ པཏྠཡཏེ ཋཱནཾ, ཝཱདིསཱུདསྶ བྷིཀྑུནོ༎

    Eso patthayate ṭhānaṃ, vādisūdassa bhikkhuno.

    ‘‘ཨནཱགཏམྷི ཨདྡྷཱནེ, ལཙྪསེ ཏཾ མནོརཐཾ།

    ‘‘Anāgatamhi addhāne, lacchase taṃ manorathaṃ;

    དེཝམཱནུསསམྤཏྟིཾ, ཨནུབྷོཏྭཱ ཨནཔྤཀཾ༎

    Devamānusasampattiṃ, anubhotvā anappakaṃ.

    ‘‘སཏསཧསྶིཏོ ཀཔྤེ, ཨོཀྐཱཀཀུལསམྦྷཝོ།

    ‘‘Satasahassito kappe, okkākakulasambhavo;

    གོཏམོ ནཱམ གོཏྟེན, སཏྠཱ ལོཀེ བྷཝིསྶཏི༎

    Gotamo nāma gottena, satthā loke bhavissati.

    ‘‘ཏསྶ དྷམྨེསུ དཱཡཱདོ, ཨོརསོ དྷམྨནིམྨིཏོ།

    ‘‘Tassa dhammesu dāyādo, oraso dhammanimmito;

    ཝངྒཱིསོ ནཱམ ནཱམེན, ཧེསྶཏི སཏྠུ སཱཝཀོ༎

    Vaṅgīso nāma nāmena, hessati satthu sāvako.

    ‘‘ཏཾ སུཏྭཱ མུདིཏོ ཧུཏྭཱ, ཡཱཝཛཱིཝཾ ཏདཱ ཛིནཾ།

    ‘‘Taṃ sutvā mudito hutvā, yāvajīvaṃ tadā jinaṃ;

    པཙྩཡེཧི ཨུཔཊྛཱསིཾ, མེཏྟཙིཏྟོ ཏཐཱགཏཾ༎

    Paccayehi upaṭṭhāsiṃ, mettacitto tathāgataṃ.

    ‘‘ཏེན ཀམྨེན སུཀཏེན, ཙེཏནཱཔཎིདྷཱིཧི ཙ།

    ‘‘Tena kammena sukatena, cetanāpaṇidhīhi ca;

    ཛཧིཏྭཱ མཱནུསཾ དེཧཾ, ཏུསིཏཾ ཨགམཱསཧཾ༎

    Jahitvā mānusaṃ dehaṃ, tusitaṃ agamāsahaṃ.

    ‘‘པཙྪིམེ ཙ བྷཝེ དཱནི, ཛཱཏོ ཝིཔྤཀུལེ ཨཧཾ།

    ‘‘Pacchime ca bhave dāni, jāto vippakule ahaṃ;

    པཙྩཱཛཱཏོ ཡདཱ ཨཱསིཾ, ཛཱཏིཡཱ སཏྟཝསྶིཀོ༎

    Paccājāto yadā āsiṃ, jātiyā sattavassiko.

    ‘‘སབྦཝེདཝིདཱུ ཛཱཏོ, ཝཱདསཏྠཝིསཱརདོ།

    ‘‘Sabbavedavidū jāto, vādasatthavisārado;

    ཝཱདིསྶརོ ཙིཏྟཀཐཱི, པརཝཱདཔྤམདྡནོ༎

    Vādissaro cittakathī, paravādappamaddano.

    ‘‘ཝངྒེ ཛཱཏོཏི ཝངྒཱིསོ, ཝཙནེ ཨིསྶརོཏི ཝཱ།

    ‘‘Vaṅge jātoti vaṅgīso, vacane issaroti vā;

    ཝངྒཱིསོ ཨིཏི མེ ནཱམཾ, ཨབྷཝཱི ལོཀསམྨཏཾ༎

    Vaṅgīso iti me nāmaṃ, abhavī lokasammataṃ.

    ‘‘ཡདཱཧཾ ཝིཉྙུཏཾ པཏྟོ, ཋིཏོ པཋམཡོབྦནེ།

    ‘‘Yadāhaṃ viññutaṃ patto, ṭhito paṭhamayobbane;

    ཏདཱ རཱཛགཧེ རམྨེ, སཱརིཔུཏྟམཧདྡསཾ༎

    Tadā rājagahe ramme, sāriputtamahaddasaṃ.

    ‘‘པིཎྜཱཡ ཝིཙརནྟཾ ཏཾ, པཏྟཔཱཎིཾ སུསཾཝུཏཾ།

    ‘‘Piṇḍāya vicarantaṃ taṃ, pattapāṇiṃ susaṃvutaṃ;

    ཨལོལཀྑིཾ མིཏབྷཱཎིཾ, ཡུགམཏྟཾ ནིདཀྑིཏཾ༎

    Alolakkhiṃ mitabhāṇiṃ, yugamattaṃ nidakkhitaṃ.

    ‘‘ཏཾ དིསྭཱ ཝིམྷིཏོ ཧུཏྭཱ, ཨཝོཙཾ མམནུཙྪཝཾ།

    ‘‘Taṃ disvā vimhito hutvā, avocaṃ mamanucchavaṃ;

    ཀཎིཀཱརཾཝ ནིཙིཏཾ, ཙིཏྟཾ གཱཐཱཔདཾ ཨཧཾ༎

    Kaṇikāraṃva nicitaṃ, cittaṃ gāthāpadaṃ ahaṃ.

    ‘‘ཨཱཙིཀྑི སོ མེ སཏྠཱརཾ, སམྦུདྡྷཾ ལོཀནཱཡཀཾ།

    ‘‘Ācikkhi so me satthāraṃ, sambuddhaṃ lokanāyakaṃ;

    ཏདཱ སོ པཎྜིཏོ ཝཱིརོ, ཨུཏྟརིཾ སམཝོཙ མེ༎

    Tadā so paṇḍito vīro, uttariṃ samavoca me.

    ‘‘ཝིརཱགསཾཧིཏཾ ཝཱཀྱཾ, ཀཏྭཱ དུདྡསམུཏྟམཾ།

    ‘‘Virāgasaṃhitaṃ vākyaṃ, katvā duddasamuttamaṃ;

    ཝིཙིཏྟཔཊིབྷཱནེཧི, ཏོསིཏོ ཏེན ཏཱདིནཱ༎

    Vicittapaṭibhānehi, tosito tena tādinā.

    ‘‘ནིཔཙྩ སིརསཱ པཱདེ, པབྦཱཛེཧཱིཏི མཾ བྲཝི།

    ‘‘Nipacca sirasā pāde, pabbājehīti maṃ bravi;

    ཏཏོ མཾ ས མཧཱཔཉྙོ, བུདྡྷསེཊྛམུཔཱནཡི༎

    Tato maṃ sa mahāpañño, buddhaseṭṭhamupānayi.

    ‘‘ནིཔཙྩ སིརསཱ པཱདེ, ནིསཱིདིཾ སཏྠུ སནྟིཀེ།

    ‘‘Nipacca sirasā pāde, nisīdiṃ satthu santike;

    མམཱཧ ཝདཏཾ སེཊྛོ, ཀཙྩི ཝངྒཱིས ཛཱནཱསི༎

    Mamāha vadataṃ seṭṭho, kacci vaṅgīsa jānāsi.

    ‘‘ཀིཉྩི སིཔྤནྟི ཏསྶཱཧཾ, ཛཱནཱམཱིཏི ཙ ཨབྲཝིཾ།

    ‘‘Kiñci sippanti tassāhaṃ, jānāmīti ca abraviṃ;

    མཏསཱིསཾ ཝནཙྪུདྡྷཾ, ཨཔི བཱརསཝསྶིཀཾ།

    Matasīsaṃ vanacchuddhaṃ, api bārasavassikaṃ;

    ཏཝ ཝིཛྫཱཝིསེསེན, སཙེ སཀྐོསི ཝཱཙཡ༎

    Tava vijjāvisesena, sace sakkosi vācaya.

    ‘‘ཨཱམོཏི མེ པཊིཉྙཱཏེ, ཏཱིཎི སཱིསཱནི དསྶཡི།

    ‘‘Āmoti me paṭiññāte, tīṇi sīsāni dassayi;

    ནིརཡནརདེཝེསུ, ཨུཔཔནྣེ ཨཝཱཙཡིཾ༎

    Nirayanaradevesu, upapanne avācayiṃ.

    ‘‘ཏདཱ ཁཱིཎཱསཝསྶེཝ, སཱིསཾ དསྶེསི ནཱཡཀོ།

    ‘‘Tadā khīṇāsavasseva, sīsaṃ dassesi nāyako;

    ཏཏོཧཾ ཝིཧཏཱརབྦྷོ, པབྦཛྫཾ སམཡཱཙིསཾ༎

    Tatohaṃ vihatārabbho, pabbajjaṃ samayācisaṃ.

    ‘‘པབྦཛིཏྭཱན སུགཏཾ, སནྠཝཱམི ཏཧིཾ ཏཧིཾ།

    ‘‘Pabbajitvāna sugataṃ, santhavāmi tahiṃ tahiṃ;

    ཏཏོ མཾ ཀབྦཝིཏྟོསི, ཨུཛ྄ཛྷཱཡནྟིཧ བྷིཀྑཝོ༎

    Tato maṃ kabbavittosi, ujjhāyantiha bhikkhavo.

    ‘‘ཏཏོ ཝཱིམཾསནཏྠཾ མེ, ཨཱཧ བུདྡྷོ ཝིནཱཡཀོ།

    ‘‘Tato vīmaṃsanatthaṃ me, āha buddho vināyako;

    ཏཀྐིཀཱ པནིམཱ གཱཐཱ, ཋཱནསོ པཊིབྷནྟི ཏཾ༎

    Takkikā panimā gāthā, ṭhānaso paṭibhanti taṃ.

    ‘‘ན ཀབྦཝིཏྟོཧཾ ཝཱིར, ཋཱནསོ པཊིབྷནྟི མཾ།

    ‘‘Na kabbavittohaṃ vīra, ṭhānaso paṭibhanti maṃ;

    ཏེན ཧི དཱནི ཝངྒཱིས, ཋཱནསོ སནྠཝཱཧི མཾ༎

    Tena hi dāni vaṅgīsa, ṭhānaso santhavāhi maṃ.

    ‘‘ཏདཱཧཾ སནྠཝིཾ ཝཱིརཾ, གཱཐཱཧི ཨིསིསཏྟམཾ།

    ‘‘Tadāhaṃ santhaviṃ vīraṃ, gāthāhi isisattamaṃ;

    ཋཱནསོ མེ ཏདཱ ཏུཊྛོ, ཛིནོ ཨགྒེ ཋཔེསི མཾ༎

    Ṭhānaso me tadā tuṭṭho, jino agge ṭhapesi maṃ.

    ‘‘པཊིབྷཱནེན ཙིཏྟེན, ཨཉྙེསམཏིམཉྙཧཾ།

    ‘‘Paṭibhānena cittena, aññesamatimaññahaṃ;

    པེསལེ ཏེན སཾཝིགྒོ, ཨརཧཏྟམཔཱཔུཎིཾ༎

    Pesale tena saṃviggo, arahattamapāpuṇiṃ.

    ‘‘པཊིབྷཱནཝཏཾ ཨགྒོ, ཨཉྙོ ཀོཙི ན ཝིཛྫཏི།

    ‘‘Paṭibhānavataṃ aggo, añño koci na vijjati;

    ཡཐཱཡཾ བྷིཀྑུ ཝངྒཱིསོ, ཨེཝཾ དྷཱརེཐ བྷིཀྑཝོ༎

    Yathāyaṃ bhikkhu vaṅgīso, evaṃ dhāretha bhikkhavo.

    ‘‘སཏསཧསྶེ ཀཏཾ ཀམྨཾ, ཕལཾ དསྶེསི མེ ཨིདྷ།

    ‘‘Satasahasse kataṃ kammaṃ, phalaṃ dassesi me idha;

    སུམུཏྟོ སརཝེགོཝ, ཀིལེསེ ཛྷཱཔཡིཾ མམ༎

    Sumutto saravegova, kilese jhāpayiṃ mama.

    ‘‘ཀིལེསཱ ཛྷཱཔིཏཱ མཡ྄ཧཾ, བྷཝཱ སབྦེ སམཱུཧཏཱ།

    ‘‘Kilesā jhāpitā mayhaṃ, bhavā sabbe samūhatā;

    ནཱགོཝ བནྡྷནཾ ཚེཏྭཱ, ཝིཧརཱམི ཨནཱསཝོ༎

    Nāgova bandhanaṃ chetvā, viharāmi anāsavo.

    ‘‘སྭཱགཏཾ ཝཏ མེ ཨཱསི, བུདྡྷསེཊྛསྶ སནྟིཀེ།

    ‘‘Svāgataṃ vata me āsi, buddhaseṭṭhassa santike;

    ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ༎

    Tisso vijjā anuppattā, kataṃ buddhassa sāsanaṃ.

    ‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ།

    ‘‘Paṭisambhidā catasso, vimokkhāpi ca aṭṭhime;

    ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསན’’ནྟི༎

    Chaḷabhiññā sacchikatā, kataṃ buddhassa sāsana’’nti.

    ཨརཧཱ པན ཧུཏྭཱ ཐེརོ སཏྠུ སནྟིཀཾ གཙྪནྟོ ཙཀྑུཔཐཏོ པཊྛཱཡ ཙནྡེན, སཱུརིཡེན, ཨཱཀཱསེན, མཧཱསམུདྡེན, སིནེརུནཱ པབྦཏརཱཛེན, སཱིཧེན མིགརཉྙཱ, ཧཏྠིནཱགེནཱཏི ཏེན ཏེན སདྡྷིཾ ཨུཔམེནྟོ ཨནེཀེཧི པདསཏེཧི སཏྠཱརཾ ཝཎྞེནྟོཝ ཨུཔགཙྪཏི། ཏེན ཏཾ སཏྠཱ སངྒྷམཛ྄ཛྷེ ནིསིནྣོ པཊིབྷཱནཝནྟཱནཾ ཨགྒཊྛཱནེ ཋཔེསི། ཨཐ ཐེརེན ཨརཧཏྟཔྤཏྟིཏོ པུབྦེ ཙ པཙྪཱ ཙ ཏཾ ཏཾ ཙིཏྟཾ ཨཱགམྨ བྷཱསིཏཱ། ཐེརཾ ཨུདྡིསྶ ཨཱནནྡཏྠེརཱདཱིཧི བྷཱསིཏཱ ཙ –

    Arahā pana hutvā thero satthu santikaṃ gacchanto cakkhupathato paṭṭhāya candena, sūriyena, ākāsena, mahāsamuddena, sinerunā pabbatarājena, sīhena migaraññā, hatthināgenāti tena tena saddhiṃ upamento anekehi padasatehi satthāraṃ vaṇṇentova upagacchati. Tena taṃ satthā saṅghamajjhe nisinno paṭibhānavantānaṃ aggaṭṭhāne ṭhapesi. Atha therena arahattappattito pubbe ca pacchā ca taṃ taṃ cittaṃ āgamma bhāsitā. Theraṃ uddissa ānandattherādīhi bhāsitā ca –

    ༡༢༡༨.

    1218.

    ‘‘ནིཀྑནྟཾ ཝཏ མཾ སནྟཾ, ཨགཱརསྨཱནགཱརིཡཾ།

    ‘‘Nikkhantaṃ vata maṃ santaṃ, agārasmānagāriyaṃ;

    ཝིཏཀྐཱ ཨུཔདྷཱཝནྟི, པགབྦྷཱ ཀཎྷཏོ ཨིམེ༎

    Vitakkā upadhāvanti, pagabbhā kaṇhato ime.

    ༡༢༡༩.

    1219.

    ‘‘ཨུགྒཔུཏྟཱ མཧིསྶཱསཱ, སིཀྑིཏཱ དལ༹ྷདྷམྨིནོ།

    ‘‘Uggaputtā mahissāsā, sikkhitā daḷhadhammino;

    སམནྟཱ པརིཀིརེཡྻུཾ, སཧསྶཾ ཨཔལཱཡིནཾ༎

    Samantā parikireyyuṃ, sahassaṃ apalāyinaṃ.

    ༡༢༢༠.

    1220.

    ‘‘སཙེཔི ཨེཏྟཀཱ བྷིཡྻོ, ཨཱགམིསྶནྟི ཨིཏྠིཡོ།

    ‘‘Sacepi ettakā bhiyyo, āgamissanti itthiyo;

    ནེཝ མཾ བྱཱདྷཡིསྶནྟི, དྷམྨེ སམྷི པཏིཊྛིཏོ༎

    Neva maṃ byādhayissanti, dhamme samhi patiṭṭhito.

    ༡༢༢༡.

    1221.

    ‘‘སཀྑཱི ཧི མེ སུཏཾ ཨེཏཾ, བུདྡྷསྶཱདིཙྩབནྡྷུནོ།

    ‘‘Sakkhī hi me sutaṃ etaṃ, buddhassādiccabandhuno;

    ནིབྦཱནགམནཾ མགྒཾ, ཏཏྠ མེ ནིརཏོ མནོ༎

    Nibbānagamanaṃ maggaṃ, tattha me nirato mano.

    ༡༢༢༢.

    1222.

    ‘‘ཨེཝཉྩེ མཾ ཝིཧརནྟཾ, པཱཔིམ ཨུཔགཙྪསི།

    ‘‘Evañce maṃ viharantaṃ, pāpima upagacchasi;

    ཏཐཱ མཙྩུ ཀརིསྶཱམི, ན མེ མགྒམྤི དཀྑསི༎

    Tathā maccu karissāmi, na me maggampi dakkhasi.

    ༡༢༢༣.

    1223.

    ‘‘ཨརཏིཉྩ རཏིཉྩ པཧཱཡ, སབྦསོ གེཧསིཏཉྩ ཝིཏཀྐཾ།

    ‘‘Aratiñca ratiñca pahāya, sabbaso gehasitañca vitakkaṃ;

    ཝནཐཾ ན ཀརེཡྻ ཀུཧིཉྩི, ནིབྦནཐོ ཨཝནཐོ ས བྷིཀྑུ༎

    Vanathaṃ na kareyya kuhiñci, nibbanatho avanatho sa bhikkhu.

    ༡༢༢༤.

    1224.

    ‘‘ཡམིདྷ པཐཝིཉྩ ཝེཧཱསཾ, རཱུཔགཏཾ ཛགཏོགདྷཾ ཀིཉྩི།

    ‘‘Yamidha pathaviñca vehāsaṃ, rūpagataṃ jagatogadhaṃ kiñci;

    པརིཛཱིཡཏི སབྦམནིཙྩཾ, ཨེཝཾ སམེཙྩ ཙརནྟི མུཏཏྟཱ༎

    Parijīyati sabbamaniccaṃ, evaṃ samecca caranti mutattā.

    ༡༢༢༥.

    1225.

    ‘‘ཨུཔདྷཱིསུ ཛནཱ གདྷིཏཱསེ, དིཊྛསུཏེ པཊིགྷེ ཙ མུཏེ ཙ།

    ‘‘Upadhīsu janā gadhitāse, diṭṭhasute paṭighe ca mute ca;

    ཨེཏྠ ཝིནོདཡ ཚནྡམནེཛོ, ཡོ ཧེཏྠ ན ལིམྤཏི མུནི ཏམཱཧུ༎

    Ettha vinodaya chandamanejo, yo hettha na limpati muni tamāhu.

    ༡༢༢༦.

    1226.

    ‘‘ཨཐ སཊྛིསིཏཱ སཝིཏཀྐཱ, པུཐུཛྫནཏཱཡ ཨདྷམྨཱ ནིཝིཊྛཱ།

    ‘‘Atha saṭṭhisitā savitakkā, puthujjanatāya adhammā niviṭṭhā;

    ན ཙ ཝགྒགཏསྶ ཀུཧིཉྩི, ནོ པན དུཊྛུལླགཱཧཱི ས བྷིཀྑུ༎

    Na ca vaggagatassa kuhiñci, no pana duṭṭhullagāhī sa bhikkhu.

    ༡༢༢༧.

    1227.

    ‘‘དབྦོ ཙིརརཏྟསམཱཧིཏོ, ཨཀུཧཀོ ནིཔཀོ ཨཔིཧཱལུ།

    ‘‘Dabbo cirarattasamāhito, akuhako nipako apihālu;

    སནྟཾ པདཾ ཨཛ྄ཛྷགམཱ མུནི, པཊིཙྩ པརིནིབྦུཏོ ཀངྑཏི ཀཱལཾ༎

    Santaṃ padaṃ ajjhagamā muni, paṭicca parinibbuto kaṅkhati kālaṃ.

    ༡༢༢༨.

    1228.

    ‘‘མཱནཾ པཛཧསྶུ གོཏམ, མཱནཔཐཉྩ ཛཧསྶུ ཨསེསཾ།

    ‘‘Mānaṃ pajahassu gotama, mānapathañca jahassu asesaṃ;

    མཱནཔཐམྷི ས མུཙྪིཏོ, ཝིཔྤཊིསཱརཱིཧུཝཱ ཙིརརཏྟཾ༎

    Mānapathamhi sa mucchito, vippaṭisārīhuvā cirarattaṃ.

    ༡༢༢༩.

    1229.

    ‘‘མཀྑེན མཀྑིཏཱ པཛཱ, མཱནཧཏཱ ནིརཡཾ པཔཏནྟི།

    ‘‘Makkhena makkhitā pajā, mānahatā nirayaṃ papatanti;

    སོཙནྟི ཛནཱ ཙིརརཏྟཾ, མཱནཧཏཱ ནིརཡཾ ཨུཔཔནྣཱ༎

    Socanti janā cirarattaṃ, mānahatā nirayaṃ upapannā.

    ༡༢༣༠.

    1230.

    ‘‘ན ཧི སོཙཏི བྷིཀྑུ ཀདཱཙི, མགྒཛིནོ སམྨཱ པཊིཔནྣོ།

    ‘‘Na hi socati bhikkhu kadāci, maggajino sammā paṭipanno;

    ཀིཏྟིཉྩ སུཁཉྩཱནུབྷོཏི, དྷམྨདསོཏི ཏམཱཧུ ཏཐཏྟཾ༎

    Kittiñca sukhañcānubhoti, dhammadasoti tamāhu tathattaṃ.

    ༡༢༣༡.

    1231.

    ‘‘ཏསྨཱ ཨཁིལོ ཨིདྷ པདྷཱནཝཱ, ནཱིཝརཎཱནི པཧཱཡ ཝིསུདྡྷོ།

    ‘‘Tasmā akhilo idha padhānavā, nīvaraṇāni pahāya visuddho;

    མཱནཉྩ པཧཱཡ ཨསེསཾ, ཝིཛྫཱཡནྟཀརོ སམིཏཱཝཱི༎

    Mānañca pahāya asesaṃ, vijjāyantakaro samitāvī.

    ༡༢༣༢.

    1232.

    ‘‘ཀཱམརཱགེན ཌཡ྄ཧཱམི, ཙིཏྟཾ མེ པརིཌཡ྄ཧཏི།

    ‘‘Kāmarāgena ḍayhāmi, cittaṃ me pariḍayhati;

    སཱདྷུ ནིབྦཱཔནཾ བྲཱུཧི, ཨནུཀམྤཱཡ གོཏམ༎

    Sādhu nibbāpanaṃ brūhi, anukampāya gotama.

    ༡༢༣༣.

    1233.

    ‘‘སཉྙཱཡ ཝིཔརིཡེསཱ, ཙིཏྟཾ ཏེ པརིཌཡ྄ཧཏི།

    ‘‘Saññāya vipariyesā, cittaṃ te pariḍayhati;

    ནིམིཏྟཾ པརིཝཛྫེཧི, སུབྷཾ རཱགཱུཔསཾཧིཏཾ༎

    Nimittaṃ parivajjehi, subhaṃ rāgūpasaṃhitaṃ.

    ༡༢༣༤.

    1234.

    ‘‘ཨསུབྷཱཡ ཙིཏྟཾ བྷཱཝེཧི, ཨེཀགྒཾ སུསམཱཧིཏཾ།

    ‘‘Asubhāya cittaṃ bhāvehi, ekaggaṃ susamāhitaṃ;

    སཏི ཀཱཡགཏཱ ཏྱཏྠུ, ནིབྦིདཱབཧུལོ བྷཝ༎

    Sati kāyagatā tyatthu, nibbidābahulo bhava.

    ༡༢༣༥.

    1235.

    ‘‘ཨནིམིཏྟཉྩ བྷཱཝེཧི, མཱནཱནུསཡམུཛྫཧ།

    ‘‘Animittañca bhāvehi, mānānusayamujjaha;

    ཏཏོ མཱནཱབྷིསམཡཱ, ཨུཔསནྟོ ཙརིསྶསི༎

    Tato mānābhisamayā, upasanto carissasi.

    ༡༢༣༦.

    1236.

    ‘‘ཏམེཝ ཝཱཙཾ བྷཱསེཡྻ, ཡཱཡཏྟཱནཾ ན ཏཱཔཡེ།

    ‘‘Tameva vācaṃ bhāseyya, yāyattānaṃ na tāpaye;

    པརེ ཙ ན ཝིཧིཾསེཡྻ, སཱ ཝེ ཝཱཙཱ སུབྷཱསིཏཱ༎

    Pare ca na vihiṃseyya, sā ve vācā subhāsitā.

    ༡༢༣༧.

    1237.

    ‘‘པིཡཝཱཙམེཝ བྷཱསེཡྻ, ཡཱ ཝཱཙཱ པཊིནནྡིཏཱ།

    ‘‘Piyavācameva bhāseyya, yā vācā paṭinanditā;

    ཡཾ ཨནཱདཱཡ པཱཔཱནི, པརེསཾ བྷཱསཏེ པིཡཾ༎

    Yaṃ anādāya pāpāni, paresaṃ bhāsate piyaṃ.

    ༡༢༣༨.

    1238.

    ‘‘སཙྩཾ ཝེ ཨམཏཱ ཝཱཙཱ, ཨེས དྷམྨོ སནནྟནོ།

    ‘‘Saccaṃ ve amatā vācā, esa dhammo sanantano;

    སཙྩེ ཨཏྠེ ཙ དྷམྨེ ཙ, ཨཱཧུ སནྟོ པཏིཊྛིཏཱ༎

    Sacce atthe ca dhamme ca, āhu santo patiṭṭhitā.

    ༡༢༣༩.

    1239.

    ‘‘ཡཾ བུདྡྷོ བྷཱསཏི ཝཱཙཾ, ཁེམཾ ནིབྦཱནཔཏྟིཡཱ།

    ‘‘Yaṃ buddho bhāsati vācaṃ, khemaṃ nibbānapattiyā;

    དུཀྑསྶནྟཀིརིཡཱཡ, སཱ ཝེ ཝཱཙཱནམུཏྟམཱ༎

    Dukkhassantakiriyāya, sā ve vācānamuttamā.

    ༡༢༤༠.

    1240.

    ‘‘གམྦྷཱིརཔཉྙོ མེདྷཱཝཱི, མགྒཱམགྒསྶ ཀོཝིདོ།

    ‘‘Gambhīrapañño medhāvī, maggāmaggassa kovido;

    སཱརིཔུཏྟོ མཧཱཔཉྙོ, དྷམྨཾ དེསེཏི བྷིཀྑུནཾ༎

    Sāriputto mahāpañño, dhammaṃ deseti bhikkhunaṃ.

    ༡༢༤༡.

    1241.

    ‘‘སཾཁིཏྟེནཔི དེསེཏི, ཝིཏྠཱརེནཔི བྷཱསཏི།

    ‘‘Saṃkhittenapi deseti, vitthārenapi bhāsati;

    སཱལིཀཱཡིཝ ནིགྒྷོསོ, པཊིབྷཱནཾ ཨུདིཡྻཏི༎

    Sālikāyiva nigghoso, paṭibhānaṃ udiyyati.

    ༡༢༤༢.

    1242.

    ‘‘ཏསྶ ཏཾ དེསཡནྟསྶ, སུཎནྟི མདྷུརཾ གིརཾ།

    ‘‘Tassa taṃ desayantassa, suṇanti madhuraṃ giraṃ;

    སརེན རཛནཱིཡེན, སཝནཱིཡེན ཝགྒུནཱ།

    Sarena rajanīyena, savanīyena vaggunā;

    ཨུདགྒཙིཏྟཱ མུདིཏཱ, སོཏཾ ཨོདྷེནྟི བྷིཀྑཝོ༎

    Udaggacittā muditā, sotaṃ odhenti bhikkhavo.

    ༡༢༤༣.

    1243.

    ‘‘ཨཛྫ པནྣརསེ ཝིསུདྡྷིཡཱ, བྷིཀྑཱུ པཉྩསཏཱ སམཱགཏཱ།

    ‘‘Ajja pannarase visuddhiyā, bhikkhū pañcasatā samāgatā;

    སཾཡོཛནབནྡྷནཙྪིདཱ, ཨནཱིགྷཱ ཁཱིཎཔུནབྦྷཝཱ ཨིསཱི༎

    Saṃyojanabandhanacchidā, anīghā khīṇapunabbhavā isī.

    ༡༢༤༤.

    1244.

    ‘‘ཙཀྐཝཏྟཱི ཡཐཱ རཱཛཱ, ཨམཙྩཔརིཝཱརིཏོ།

    ‘‘Cakkavattī yathā rājā, amaccaparivārito;

    སམནྟཱ ཨནུཔརིཡེཏི, སཱགརནྟཾ མཧིཾ ཨིམཾ༎

    Samantā anupariyeti, sāgarantaṃ mahiṃ imaṃ.

    ༡༢༤༥.

    1245.

    ‘‘ཨེཝཾ ཝིཛིཏསངྒཱམཾ, སཏྠཝཱཧཾ ཨནུཏྟརཾ།

    ‘‘Evaṃ vijitasaṅgāmaṃ, satthavāhaṃ anuttaraṃ;

    སཱཝཀཱ པཡིརུཔཱསནྟི, ཏེཝིཛྫཱ མཙྩུཧཱཡིནོ༎

    Sāvakā payirupāsanti, tevijjā maccuhāyino.

    ༡༢༤༦.

    1246.

    ‘‘སབྦེ བྷགཝཏོ པུཏྟཱ, པལཱཔེཏྠ ན ཝིཛྫཏི།

    ‘‘Sabbe bhagavato puttā, palāpettha na vijjati;

    ཏཎྷཱསལླསྶ ཧནྟཱརཾ, ཝནྡེ ཨཱདིཙྩབནྡྷུནཾ༎

    Taṇhāsallassa hantāraṃ, vande ādiccabandhunaṃ.

    ༡༢༤༧.

    1247.

    ‘‘པརོསཧསྶཾ བྷིཀྑཱུནཾ, སུགཏཾ པཡིརུཔཱསཏི།

    ‘‘Parosahassaṃ bhikkhūnaṃ, sugataṃ payirupāsati;

    དེསེནྟཾ ཝིརཛཾ དྷམྨཾ, ནིབྦཱནཾ ཨཀུཏོབྷཡཾ༎

    Desentaṃ virajaṃ dhammaṃ, nibbānaṃ akutobhayaṃ.

    ༡༢༤༨.

    1248.

    ‘‘སུཎནྟི དྷམྨཾ ཝིམལཾ, སམྨཱསམྦུདྡྷདེསིཏཾ།

    ‘‘Suṇanti dhammaṃ vimalaṃ, sammāsambuddhadesitaṃ;

    སོབྷཏི ཝཏ སམྦུདྡྷོ, བྷིཀྑུསངྒྷཔུརཀྑཏོ༎

    Sobhati vata sambuddho, bhikkhusaṅghapurakkhato.

    ༡༢༤༩.

    1249.

    ‘‘ནཱགནཱམོསི བྷགཝཱ, ཨིསཱིནཾ ཨིསིསཏྟམོ།

    ‘‘Nāganāmosi bhagavā, isīnaṃ isisattamo;

    མཧཱམེགྷོཝ ཧུཏྭཱན, སཱཝཀེ ཨབྷིཝསྶསི༎

    Mahāmeghova hutvāna, sāvake abhivassasi.

    ༡༢༥༠.

    1250.

    ‘‘དིཝཱ ཝིཧཱརཱ ནིཀྑམྨ, སཏྠུདསྶནཀམྱཏཱ།

    ‘‘Divā vihārā nikkhamma, satthudassanakamyatā;

    སཱཝཀོ ཏེ མཧཱཝཱིར, པཱདེ ཝནྡཏི ཝངྒིསོ༎

    Sāvako te mahāvīra, pāde vandati vaṅgiso.

    ༡༢༥༡.

    1251.

    ‘‘ཨུམྨགྒཔཐཾ མཱརསྶ, ཨབྷིབྷུཡྻ ཙརཏི པབྷིཛྫ ཁཱིལཱནི།

    ‘‘Ummaggapathaṃ mārassa, abhibhuyya carati pabhijja khīlāni;

    ཏཾ པསྶཐ བནྡྷཔམུཉྩ ཀརཾ, ཨསིཏཾཝ བྷཱགསོ པཝིབྷཛྫ༎

    Taṃ passatha bandhapamuñca karaṃ, asitaṃva bhāgaso pavibhajja.

    ༡༢༥༢.

    1252.

    ‘‘ཨོགྷསྶ ཧི ནིཏརཎཏྠཾ, ཨནེཀཝིཧིཏཾ མགྒཾ ཨཀྑཱསི།

    ‘‘Oghassa hi nitaraṇatthaṃ, anekavihitaṃ maggaṃ akkhāsi;

    ཏསྨིཉྩ ཨམཏེ ཨཀྑཱཏེ, དྷམྨདསཱ ཋིཏཱ ཨསཾཧཱིརཱ༎

    Tasmiñca amate akkhāte, dhammadasā ṭhitā asaṃhīrā.

    ༡༢༥༣.

    1253.

    ‘‘པཛྫོཏཀརོ ཨཏིཝིཛ྄ཛྷ, སབྦཋིཏཱིནཾ ཨཏིཀྐམམདྡས།

    ‘‘Pajjotakaro ativijjha, sabbaṭhitīnaṃ atikkamamaddasa;

    ཉཏྭཱ ཙ སཙྪིཀཏྭཱ ཙ, ཨགྒཾ སོ དེསཡི དསདྡྷཱནཾ༎

    Ñatvā ca sacchikatvā ca, aggaṃ so desayi dasaddhānaṃ.

    ༡༢༥༤.

    1254.

    ‘‘ཨེཝཾ སུདེསིཏེ དྷམྨེ, ཀོ པམཱདོ ཝིཛཱནཏཾ དྷམྨཾ།

    ‘‘Evaṃ sudesite dhamme, ko pamādo vijānataṃ dhammaṃ;

    ཏསྨཱ ཧི ཏསྶ བྷགཝཏོ སཱསནེ, ཨཔྤམཏྟོ སདཱ ནམསྶམནུསིཀྑེ༎

    Tasmā hi tassa bhagavato sāsane, appamatto sadā namassamanusikkhe.

    ༡༢༥༥.

    1255.

    ‘‘བུདྡྷཱནུབུདྡྷོ ཡོ ཐེརོ, ཀོཎྜཉྙོ ཏིབྦནིཀྐམོ།

    ‘‘Buddhānubuddho yo thero, koṇḍañño tibbanikkamo;

    ལཱབྷཱི སུཁཝིཧཱརཱནཾ, ཝིཝེཀཱནཾ ཨབྷིཎྷསོ༎

    Lābhī sukhavihārānaṃ, vivekānaṃ abhiṇhaso.

    ༡༢༥༦.

    1256.

    ‘‘ཡཾ སཱཝཀེན པཏྟབྦཾ, སཏྠུ སཱསནཀཱརིནཱ།

    ‘‘Yaṃ sāvakena pattabbaṃ, satthu sāsanakārinā;

    སབྦསྶ ཏཾ ཨནུཔྤཏྟཾ, ཨཔྤམཏྟསྶ སིཀྑཏོ༎

    Sabbassa taṃ anuppattaṃ, appamattassa sikkhato.

    ༡༢༥༧.

    1257.

    ‘‘མཧཱནུབྷཱཝོ ཏེཝིཛྫོ, ཙེཏོཔརིཡཀོཝིདོ།

    ‘‘Mahānubhāvo tevijjo, cetopariyakovido;

    ཀོཎྜཉྙོ བུདྡྷདཱཡཱདོ, པཱདེ ཝནྡཏི སཏྠུནོ༎

    Koṇḍañño buddhadāyādo, pāde vandati satthuno.

    ༡༢༥༨.

    1258.

    ‘‘ནགསྶ པསྶེ ཨཱསཱིནཾ, མུནིཾ དུཀྑསྶ པཱརགུཾ།

    ‘‘Nagassa passe āsīnaṃ, muniṃ dukkhassa pāraguṃ;

    སཱཝཀཱ པཡིརུཔཱསནྟི, ཏེཝིཛྫཱ མཙྩུཧཱཡིནོ༎

    Sāvakā payirupāsanti, tevijjā maccuhāyino.

    ༡༢༥༩.

    1259.

    ‘‘ཙེཏསཱ ཨནུཔརིཡེཏི, མོགྒལླཱནོ མཧིདྡྷིཀོ།

    ‘‘Cetasā anupariyeti, moggallāno mahiddhiko;

    ཙིཏྟཾ ནེསཾ སམནྭེསཾ, ཝིཔྤམུཏྟཾ ནིརཱུཔདྷིཾ༎

    Cittaṃ nesaṃ samanvesaṃ, vippamuttaṃ nirūpadhiṃ.

    ༡༢༦༠.

    1260.

    ‘‘ཨེཝཾ སབྦངྒསམྤནྣཾ, མུནིཾ དུཀྑསྶ པཱརགུཾ།

    ‘‘Evaṃ sabbaṅgasampannaṃ, muniṃ dukkhassa pāraguṃ;

    ཨནེཀཱཀཱརསམྤནྣཾ, པཡིརུཔཱསནྟི གོཏམཾ༎

    Anekākārasampannaṃ, payirupāsanti gotamaṃ.

    ༡༢༦༡.

    1261.

    ‘‘ཙནྡོ ཡཐཱ ཝིགཏཝལཱཧཀེ ནབྷེ, ཝིརོཙཏི ཝཱིཏམལོཝ བྷཱཎུམཱ།

    ‘‘Cando yathā vigatavalāhake nabhe, virocati vītamalova bhāṇumā;

    ཨེཝམྤི ཨངྒཱིརས ཏྭཾ མཧཱམུནི, ཨཏིརོཙསི ཡསསཱ སབྦལོཀཾ༎

    Evampi aṅgīrasa tvaṃ mahāmuni, atirocasi yasasā sabbalokaṃ.

    ༡༢༦༢.

    1262.

    ‘‘ཀཱཝེཡྻམཏྟཱ ཝིཙརིམྷ པུབྦེ, གཱམཱ གཱམཾ པུརཱ པུརཾ།

    ‘‘Kāveyyamattā vicarimha pubbe, gāmā gāmaṃ purā puraṃ;

    ཨཐདྡསཱམ སམྦུདྡྷཾ, སབྦདྷམྨཱན པཱརགུཾ༎

    Athaddasāma sambuddhaṃ, sabbadhammāna pāraguṃ.

    ༡༢༦༣.

    1263.

    ‘‘སོ མེ དྷམྨམདེསེསི, མུནི དུཀྑསྶ པཱརགཱུ།

    ‘‘So me dhammamadesesi, muni dukkhassa pāragū;

    དྷམྨཾ སུཏྭཱ པསཱིདིམྷ, སདྡྷཱ ནོ ཨུདཔཛྫཐ༎

    Dhammaṃ sutvā pasīdimha, saddhā no udapajjatha.

    ༡༢༦༤.

    1264.

    ‘‘ཏསྶཱཧཾ ཝཙནཾ སུཏྭཱ, ཁནྡྷེ ཨཱཡཏནཱནི ཙ།

    ‘‘Tassāhaṃ vacanaṃ sutvā, khandhe āyatanāni ca;

    དྷཱཏུཡོ ཙ ཝིདིཏྭཱན, པབྦཛིཾ ཨནགཱརིཡཾ༎

    Dhātuyo ca viditvāna, pabbajiṃ anagāriyaṃ.

    ༡༢༦༥.

    1265.

    ‘‘བཧཱུནཾ ཝཏ ཨཏྠཱཡ, ཨུཔྤཛྫནྟི ཏཐཱགཏཱ།

    ‘‘Bahūnaṃ vata atthāya, uppajjanti tathāgatā;

    ཨིཏྠཱིནཾ པུརིསཱནཉྩ, ཡེ ཏེ སཱསནཀཱརཀཱ༎

    Itthīnaṃ purisānañca, ye te sāsanakārakā.

    ༡༢༦༦.

    1266.

    ‘‘ཏེསཾ ཁོ ཝཏ ཨཏྠཱཡ, བོདྷིམཛ྄ཛྷགམཱ མུནི།

    ‘‘Tesaṃ kho vata atthāya, bodhimajjhagamā muni;

    བྷིཀྑཱུནཾ བྷིཀྑུནཱིནཉྩ, ཡེ ནིཡཱམགཏདྡསཱ༎

    Bhikkhūnaṃ bhikkhunīnañca, ye niyāmagataddasā.

    ༡༢༦༧.

    1267.

    ‘‘སུདེསིཏཱ ཙཀྑུམཏཱ, བུདྡྷེནཱདིཙྩབནྡྷུནཱ།

    ‘‘Sudesitā cakkhumatā, buddhenādiccabandhunā;

    ཙཏྟཱརི ཨརིཡསཙྩཱནི, ཨནུཀམྤཱཡ པཱཎིནཾ༎

    Cattāri ariyasaccāni, anukampāya pāṇinaṃ.

    ༡༢༦༨.

    1268.

    ‘‘དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ།

    ‘‘Dukkhaṃ dukkhasamuppādaṃ, dukkhassa ca atikkamaṃ;

    ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ༎

    Ariyaṃ caṭṭhaṅgikaṃ maggaṃ, dukkhūpasamagāminaṃ.

    ༡༢༦༩.

    1269.

    ‘‘ཨེཝམེཏེ ཏཐཱ ཝུཏྟཱ, དིཊྛཱ མེ ཏེ ཡཐཱ ཏཐཱ།

    ‘‘Evamete tathā vuttā, diṭṭhā me te yathā tathā;

    སདཏྠོ མེ ཨནུཔྤཏྟོ, ཀཏཾ བུདྡྷསྶ སཱསནཾ༎

    Sadattho me anuppatto, kataṃ buddhassa sāsanaṃ.

    ༡༢༧༠.

    1270.

    ‘‘སྭཱགཏཾ ཝཏ མེ ཨཱསི, མམ བུདྡྷསྶ སནྟིཀེ།

    ‘‘Svāgataṃ vata me āsi, mama buddhassa santike;

    སུཝིབྷཏྟེསུ དྷམྨེསུ, ཡཾ སེཊྛཾ ཏདུཔཱགམིཾ༎

    Suvibhattesu dhammesu, yaṃ seṭṭhaṃ tadupāgamiṃ.

    ༡༢༧༡.

    1271.

    ‘‘ཨབྷིཉྙཱཔཱརམིཔྤཏྟོ, སོཏདྷཱཏུ ཝིསོདྷིཏཱ།

    ‘‘Abhiññāpāramippatto, sotadhātu visodhitā;

    ཏེཝིཛྫོ ཨིདྡྷིཔཏྟོམྷི, ཙེཏོཔརིཡཀོཝིདོ༎

    Tevijjo iddhipattomhi, cetopariyakovido.

    ༡༢༧༢.

    1272.

    ‘‘པུཙྪཱམི སཏྠཱརམནོམཔཉྙཾ, དིཊྛེཝ དྷམྨེ ཡོ ཝིཙིཀིཙྪཱནཾ ཚེཏྟཱ།

    ‘‘Pucchāmi satthāramanomapaññaṃ, diṭṭheva dhamme yo vicikicchānaṃ chettā;

    ཨགྒཱལ༹ཝེ ཀཱལམཀཱསི བྷིཀྑུ, ཉཱཏོ ཡསསྶཱི ཨབྷིནིབྦུཏཏྟོ༎

    Aggāḷave kālamakāsi bhikkhu, ñāto yasassī abhinibbutatto.

    ༡༢༧༣.

    1273.

    ‘‘ནིགྲོདྷཀཔྤོ ཨིཏི ཏསྶ ནཱམཾ, ཏཡཱ ཀཏཾ བྷགཝཱ བྲཱཧྨཎསྶ།

    ‘‘Nigrodhakappo iti tassa nāmaṃ, tayā kataṃ bhagavā brāhmaṇassa;

    སོ ཏཾ ནམསྶཾ ཨཙརི མུཏྱཔེཁོ, ཨཱརདྡྷཝཱིརིཡོ དལ༹ྷདྷམྨདསྶཱི༎

    So taṃ namassaṃ acari mutyapekho, āraddhavīriyo daḷhadhammadassī.

    ༡༢༧༤.

    1274.

    ‘‘ཏཾ སཱཝཀཾ སཀྐ མཡམྤི སབྦེ, ཨཉྙཱཏུམིཙྪཱམ སམནྟཙཀྑུ།

    ‘‘Taṃ sāvakaṃ sakka mayampi sabbe, aññātumicchāma samantacakkhu;

    སམཝཊྛིཏཱ ནོ སཝནཱཡ སོཏཱ, ཏུཝཾ ནོ སཏྠཱ ཏྭམནུཏྟརོསི༎

    Samavaṭṭhitā no savanāya sotā, tuvaṃ no satthā tvamanuttarosi.

    ༡༢༧༥.

    1275.

    ‘‘ཚིནྡ ནོ ཝིཙིཀིཙྪཾ བྲཱུཧི མེཏཾ, པརིནིབྦུཏཾ ཝེདཡ བྷཱུརིཔཉྙ།

    ‘‘Chinda no vicikicchaṃ brūhi metaṃ, parinibbutaṃ vedaya bhūripañña;

    མཛ྄ཛྷེཝ ནོ བྷཱས སམནྟཙཀྑུ, སཀྐོཝ དེཝཱན སཧསྶནེཏྟོ༎

    Majjheva no bhāsa samantacakkhu, sakkova devāna sahassanetto.

    ༡༢༧༦.

    1276.

    ‘‘ཡེ ཀེཙི གནྠཱ ཨིདྷ མོཧམགྒཱ, ཨཉྙཱཎཔཀྑཱ ཝིཙིཀིཙྪཋཱནཱ།

    ‘‘Ye keci ganthā idha mohamaggā, aññāṇapakkhā vicikicchaṭhānā;

    ཏཐཱགཏཾ པཏྭཱ ན ཏེ བྷཝནྟི, ཙཀྑུཉྷི ཨེཏཾ པརམཾ ནརཱནཾ༎

    Tathāgataṃ patvā na te bhavanti, cakkhuñhi etaṃ paramaṃ narānaṃ.

    ༡༢༧༧.

    1277.

    ‘‘ནོ ཙེ ཧི ཛཱཏུ པུརིསོ ཀིལེསེ, ཝཱཏོ ཡཐཱ ཨབྦྷགྷནཾ ཝིཧཱནེ།

    ‘‘No ce hi jātu puriso kilese, vāto yathā abbhaghanaṃ vihāne;

    ཏམོཝསྶ ནིཝུཏོ སབྦལོཀོ, ཛོཏིམནྟོཔི ན པབྷཱསེཡྻུཾ༎

    Tamovassa nivuto sabbaloko, jotimantopi na pabhāseyyuṃ.

    ༡༢༧༨.

    1278.

    ‘‘དྷཱིརཱ ཙ པཛྫོཏཀརཱ བྷཝནྟི, ཏཾ ཏཾ ཨཧཾ ཝཱིར ཏཐེཝ མཉྙེ།

    ‘‘Dhīrā ca pajjotakarā bhavanti, taṃ taṃ ahaṃ vīra tatheva maññe;

    ཝིཔསྶིནཾ ཛཱནམུཔཱགམིམྷ, པརིསཱསུ ནོ ཨཱཝིཀརོཧི ཀཔྤཾ༎

    Vipassinaṃ jānamupāgamimha, parisāsu no āvikarohi kappaṃ.

    ༡༢༧༩.

    1279.

    ‘‘ཁིཔྤཾ གིརཾ ཨེརཡ ཝགྒུ ཝགྒུཾ, ཧཾསོཝ པགྒཡ྄ཧ སཎིཀཾ ནིཀཱུཛ།

    ‘‘Khippaṃ giraṃ eraya vaggu vagguṃ, haṃsova paggayha saṇikaṃ nikūja;

    བིནྡུསྶརེན སུཝིཀཔྤིཏེན, སབྦེཝ ཏེ ཨུཛྫུགཏཱ སུཎོམ༎

    Bindussarena suvikappitena, sabbeva te ujjugatā suṇoma.

    ༡༢༨༠.

    1280.

    ‘‘པཧཱིནཛཱཏིམརཎཾ ཨསེསཾ, ནིགྒཡ྄ཧ དྷོནཾ ཝདེསྶཱམི དྷམྨཾ།

    ‘‘Pahīnajātimaraṇaṃ asesaṃ, niggayha dhonaṃ vadessāmi dhammaṃ;

    ན ཀཱམཀཱརོ ཧི པུཐུཛྫནཱནཾ, སངྑེཡྻཀཱརོ ཙ ཏཐཱགཏཱནཾ༎

    Na kāmakāro hi puthujjanānaṃ, saṅkheyyakāro ca tathāgatānaṃ.

    ༡༢༨༡.

    1281.

    ‘‘སམྤནྣཝེཡྻཱཀརཎཾ ཏཝེདཾ, སམུཛྫུཔཉྙསྶ སམུགྒཧཱིཏཾ།

    ‘‘Sampannaveyyākaraṇaṃ tavedaṃ, samujjupaññassa samuggahītaṃ;

    ཨཡམཉྫལི པཙྪིམོ སུཔྤཎཱམིཏོ, མཱ མོཧཡཱི ཛཱནམནོམཔཉྙ༎

    Ayamañjali pacchimo suppaṇāmito, mā mohayī jānamanomapañña.

    ༡༢༨༢.

    1282.

    ‘‘པརོཔརཾ ཨརིཡདྷམྨཾ ཝིདིཏྭཱ, མཱ མོཧཡཱི ཛཱནམནོམཝཱིརིཡ།

    ‘‘Paroparaṃ ariyadhammaṃ viditvā, mā mohayī jānamanomavīriya;

    ཝཱརིཾ ཡཐཱ གྷམྨནི གྷམྨཏཏྟོ, ཝཱཙཱབྷིཀངྑཱམི སུཏཾ པཝསྶ༎

    Vāriṃ yathā ghammani ghammatatto, vācābhikaṅkhāmi sutaṃ pavassa.

    ༡༢༨༣.

    1283.

    ‘‘ཡདཏྠིཀཾ བྲཧྨཙརིཡཾ ཨཙརཱི, ཀཔྤཱཡནོ ཀཙྩིསྶཏཾ ཨམོགྷཾ།

    ‘‘Yadatthikaṃ brahmacariyaṃ acarī, kappāyano kaccissataṃ amoghaṃ;

    ནིབྦཱཡི སོ ཨཱདུ སཨུཔཱདིསེསོ, ཡཐཱ ཝིམུཏྟོ ཨཧུ ཏཾ སུཎོམ༎

    Nibbāyi so ādu saupādiseso, yathā vimutto ahu taṃ suṇoma.

    ༡༢༨༤.

    1284.

    ‘‘ཨཙྪེཙྪི ཏཎྷཾ ཨིདྷ ནཱམརཱུཔེ, (ཨིཏི བྷགཝཱ,)

    ‘‘Acchecchi taṇhaṃ idha nāmarūpe, (iti bhagavā,)

    ཀཎྷསྶ སོཏཾ དཱིགྷརཏྟཱནུསཡིཏཾ།

    Kaṇhassa sotaṃ dīgharattānusayitaṃ;

    ཨཏཱརི ཛཱཏིཾ མརཎཾ ཨསེསཾ, ཨིཙྩབྲཝི བྷགཝཱ པཉྩསེཊྛོ༎

    Atāri jātiṃ maraṇaṃ asesaṃ, iccabravi bhagavā pañcaseṭṭho.

    ༡༢༨༥.

    1285.

    ‘‘ཨེས སུཏྭཱ པསཱིདཱམི, ཝཙོ ཏེ ཨིསིསཏྟམ།

    ‘‘Esa sutvā pasīdāmi, vaco te isisattama;

    ཨམོགྷཾ ཀིར མེ པུཊྛཾ, ན མཾ ཝཉྩེསི བྲཱཧྨཎོ༎

    Amoghaṃ kira me puṭṭhaṃ, na maṃ vañcesi brāhmaṇo.

    ༡༢༨༦.

    1286.

    ‘‘ཡཐཱ ཝཱདཱི ཏཐཱ ཀཱརཱི, ཨཧུ བུདྡྷསྶ སཱཝཀོ།

    ‘‘Yathā vādī tathā kārī, ahu buddhassa sāvako;

    ཨཙྪེཙྪི མཙྩུནོ ཛཱལཾ, ཏཏཾ མཱཡཱཝིནོ དལ༹ྷཾ༎

    Acchecchi maccuno jālaṃ, tataṃ māyāvino daḷhaṃ.

    ༡༢༨༧.

    1287.

    ‘‘ཨདྡས བྷགཝཱ ཨཱདིཾ, ཨུཔཱདཱནསྶ ཀཔྤིཡོ།

    ‘‘Addasa bhagavā ādiṃ, upādānassa kappiyo;

    ཨཙྩགཱ ཝཏ ཀཔྤཱནོ, མཙྩུདྷེཡྻཾ སུདུཏྟརཾ༎

    Accagā vata kappāno, maccudheyyaṃ suduttaraṃ.

    ༡༢༨༨.

    1288.

    ‘‘ཏཾ དེཝདེཝཾ ཝནྡཱམི, པུཏྟཾ ཏེ དྭིཔདུཏྟམ།

    ‘‘Taṃ devadevaṃ vandāmi, puttaṃ te dvipaduttama;

    ཨནུཛཱཏཾ མཧཱཝཱིརཾ, ནཱགཾ ནཱགསྶ ཨོརས’’ནྟི༎ –

    Anujātaṃ mahāvīraṃ, nāgaṃ nāgassa orasa’’nti. –

    ཨིམཱ གཱཐཱ སངྒཱིཏིཀཱལེ ཨེཀཛ྄ཛྷཾ ཀཏྭཱ སངྒཧཾ ཨཱརོཔིཏཱ། ཏཏྠ ‘‘ནིཀྑནྟཾ ཝཏ མཾ སནྟ’’ནྟིཨཱདཡོ པཉྩ གཱཐཱ ཨཱཡསྨཱ ཝངྒཱིསོ ནཝོ ཨཙིརཔབྦཛིཏོ ཧུཏྭཱ ཝིཧཱརཾ ཨུཔགཏཱ ཨལངྐཏཔཊིཡཏྟཱ སམྦཧུལཱ ཨིཏྠིཡོ དིསྭཱ ཨུཔྤནྣརཱགོ ཏཾ ཝིནོདེནྟོ ཨབྷཱསི།

    Imā gāthā saṅgītikāle ekajjhaṃ katvā saṅgahaṃ āropitā. Tattha ‘‘nikkhantaṃ vata maṃ santa’’ntiādayo pañca gāthā āyasmā vaṅgīso navo acirapabbajito hutvā vihāraṃ upagatā alaṅkatapaṭiyattā sambahulā itthiyo disvā uppannarāgo taṃ vinodento abhāsi.

    ཏཏྠ ནིཀྑནྟཾ ཝཏ མཾ སནྟཾ, ཨགཱརསྨཱནགཱརིཡནྟི ཨགཱརཏོ ནིཀྑནྟཾ ཨནགཱརིཡཾ པབྦཛིཏཾ མཾ སམཱནཾ། ཝིཏཀྐཱཏི ཀཱམཝིཏཀྐཱདཡོ པཱཔཝིཏཀྐཱ། ཨུཔདྷཱཝནྟཱིཏི མམ ཙིཏྟཾ ཨུཔགཙྪནྟི། པགབྦྷཱཏི པཱགབྦྷིཡཡུཏྟཱ ཝསིནོ། ‘‘ཨཡཾ གེཧཏོ ནིཀྑམིཏྭཱ པབྦཛིཏོ, ནཡིམཾ ཨནུདྡྷཾསིཏུཾ ཡུཏྟ’’ནྟི ཨེཝཾ ཨཔརིཧཱརཏོ ནིལླཛྫཱ། ཀཎྷཏོཏི ཀཱལ༹ཏོ, ལཱམཀབྷཱཝཏོཏི ཨཏྠོ། ཨིམེཏི ཏེསཾ ཨཏྟནོ པཙྩཀྑཏཱ ཝུཏྟཱ།

    Tattha nikkhantaṃ vata maṃ santaṃ, agārasmānagāriyanti agārato nikkhantaṃ anagāriyaṃ pabbajitaṃ maṃ samānaṃ. Vitakkāti kāmavitakkādayo pāpavitakkā. Upadhāvantīti mama cittaṃ upagacchanti. Pagabbhāti pāgabbhiyayuttā vasino. ‘‘Ayaṃ gehato nikkhamitvā pabbajito, nayimaṃ anuddhaṃsituṃ yutta’’nti evaṃ aparihārato nillajjā. Kaṇhatoti kāḷato, lāmakabhāvatoti attho. Imeti tesaṃ attano paccakkhatā vuttā.

    ཨསུདྡྷཛཱིཝིནོ པརིཝཱརཡུཏྟཱ མནུསྶཱ ཨུགྒཀིཙྩཏཱཡ ‘‘ཨུགྒཱ’’ཏི ཝུཙྩནྟི, ཏེསཾ པུཏྟཱ ཨུགྒཔུཏྟཱ། མཧིསྶཱསཱཏི མཧཱཨིསྶཱསཱ། སིཀྑིཏཱཏི དྭཱདས ཝསྶཱནི ཨཱཙརིཡཀུལེ ཨུགྒཧིཏསིཔྤཱ། དལ༹ྷདྷམྨིནོཏི, དལ༹ྷདྷནུནོ ། དལ༹ྷདྷནུ ནཱམ དྭིསཧསྶཐཱམཾ ཝུཙྩཏི། དྭིསཧསྶཐཱམནྟི, ཙ ཡསྶ ཨཱརོཔིཏསྶ ཛིཡཱཡ བནྡྷོ ལོཧསཱིསཱདཱིནཾ བྷཱརོ དཎྜེ གཧེཏྭཱ ཡཱཝ ཀཎྜཔམཱཎཱ ནབྷཾ ཨུཀྑིཏྟསྶ པཐཝིཏོ མུཙྩཏི། སམནྟཱ པརིཀིརེཡྻུནྟི སམནྟཏོ ཀཎྜེ ཁིཔེཡྻུཾ། ཀིཏྟཀཱཏི ཙེ ཨཱཧ ‘‘སཧསྶཾ ཨཔལཱཡིན’’ནྟི། ཡུདྡྷེ ཨཔརཾ མུཁཱནཾ སཧསྶམཏྟཱནཾ། ཨིདཾ ཝུཏྟཾ ཧོཏི – སིཀྑིཏཱ ཀཏཧཏྠཱ ཨུགྒཱ དལ༹ྷདྷནུནོ མཧིསྶཱསཱ ཨུགྒཔུཏྟཱ སཧསྶམཏྟཱ ཀདཱཙིཔི ཡུདྡྷེ པརཱཛཡཾ ཨཔཏྟཱ ཨཔྤམཏྟཱ སམནྟཏོ ཋཏྭཱ ཐམྦྷཾ ཨུཔནིསྶཱཡ སཙེཔི ཝསྶེཡྻུཾ། ཏཱདིསེཧིཔི ཨིསྶཱསསཧསྶེཧི སམནྟཱ སརེ པརིཀིརཱིཡནྟེ སུསིཀྑིཏོ པུརིསོ དཎྜཾ གཧེཏྭཱ སབྦེ སརེ ཨཏྟནོ སརཱིརེ ཨཔཏམཱནེ ཀཏྭཱ པཱདམཱུལེ པཱཏེཡྻ། ཏཏྠ ཨེཀོཔི ཨིསྶཱསོ དྭེ སརེ ཨེཀཏོ ཁིཔནྟོ ནཱམ ནཏྠི། ཨིཏྠིཡོ པན རཱུཔཱརམྨཎཱདིཝསེན པཉྩ པཉྩ སརེ ཨེཀཏོ ཁིཔནྟི, ཨེཝཾ ཁིཔནྟིཡོ། ཨེཏྟཀཱ བྷིཡྻོཏི ཨིམཱཧི ཨིཏྠཱིཧི བྷིཡྻོཔི བཧཱུ ཨིཏྠིཡོ ཨཏྟནོ ཨིཏྠིཀུཏྟཧཱསབྷཱཝཱདིཏོ ཝིདྷཾསེནྟི།

    Asuddhajīvino parivārayuttā manussā uggakiccatāya ‘‘uggā’’ti vuccanti, tesaṃ puttā uggaputtā. Mahissāsāti mahāissāsā. Sikkhitāti dvādasa vassāni ācariyakule uggahitasippā. Daḷhadhamminoti, daḷhadhanuno . Daḷhadhanu nāma dvisahassathāmaṃ vuccati. Dvisahassathāmanti, ca yassa āropitassa jiyāya bandho lohasīsādīnaṃ bhāro daṇḍe gahetvā yāva kaṇḍapamāṇā nabhaṃ ukkhittassa pathavito muccati. Samantā parikireyyunti samantato kaṇḍe khipeyyuṃ. Kittakāti ce āha ‘‘sahassaṃ apalāyina’’nti. Yuddhe aparaṃ mukhānaṃ sahassamattānaṃ. Idaṃ vuttaṃ hoti – sikkhitā katahatthā uggā daḷhadhanuno mahissāsā uggaputtā sahassamattā kadācipi yuddhe parājayaṃ apattā appamattā samantato ṭhatvā thambhaṃ upanissāya sacepi vasseyyuṃ. Tādisehipi issāsasahassehi samantā sare parikirīyante susikkhito puriso daṇḍaṃ gahetvā sabbe sare attano sarīre apatamāne katvā pādamūle pāteyya. Tattha ekopi issāso dve sare ekato khipanto nāma natthi. Itthiyo pana rūpārammaṇādivasena pañca pañca sare ekato khipanti, evaṃ khipantiyo. Ettakā bhiyyoti imāhi itthīhi bhiyyopi bahū itthiyo attano itthikuttahāsabhāvādito vidhaṃsenti.

    སཀྑཱི ཧི མེ སུཏཾ ཨེཏནྟི སམྨུཁཱ མཡཱ ཨེཏཾ སུཏཾ། ནིབྦཱནགམནཾ མགྒནྟི ལིངྒཝིཔལླཱསེན ཝུཏྟཾ, ནིབྦཱནགཱམིམགྒོཏི ཨཏྠོ, ཝིཔསྶནཾ སནྡྷཱཡཱཧ། ཏཏྠ མེ ནིརཏོ མནོཏི ཏསྨིཾ ཝིཔསྶནཱམགྒེ མཡ྄ཧཾ ཙིཏྟཾ ནིརཏཾ།

    Sakkhī hi me sutaṃ etanti sammukhā mayā etaṃ sutaṃ. Nibbānagamanaṃ magganti liṅgavipallāsena vuttaṃ, nibbānagāmimaggoti attho, vipassanaṃ sandhāyāha. Tattha me nirato manoti tasmiṃ vipassanāmagge mayhaṃ cittaṃ nirataṃ.

    ཨེཝཉྩེ མཾ ཝིཧརནྟནྟི ཨེཝཾ ཨནིཙྩཨསུབྷཛ྄ཛྷཱནབྷཱཝནཱཡ ཙ ཝིཔསྶནཱབྷཱཝནཱཡ ཙ ཝིཧརནྟཾ མཾ། པཱཔིམཱཏི ཀིལེསམཱརཾ ཨཱལཔཏི། ཏཐཱ མཙྩུ ཀརིསྶཱམི, ན མེ མགྒམྤི དཀྑསཱིཏི མཡཱ ཀཏཾ མགྒམྤི ཡཐཱ ན པསྶསི, ཏཐཱ མཙྩུ ཨནྟཾ ཀརིསྶཱམཱིཏི ཡོཛནཱ།

    Evañcemaṃ viharantanti evaṃ aniccaasubhajjhānabhāvanāya ca vipassanābhāvanāya ca viharantaṃ maṃ. Pāpimāti kilesamāraṃ ālapati. Tathā maccu karissāmi, na me maggampi dakkhasīti mayā kataṃ maggampi yathā na passasi, tathā maccu antaṃ karissāmīti yojanā.

    ཨརཏིཉྩཱཏིཨཱདིཀཱ པཉྩ གཱཐཱ ཨཏྟནོ སནྟཱནེ ཨུཔྤནྣེ ཨརཏིཨཱདིཀེ ཝིནོདེནྟེན ཝུཏྟཱ། ཏཏྠ ཨརཏིནྟི ཨདྷིཀུསལེསུ དྷམྨེསུ པནྟསེནཱསནེསུ ཙ ཨུཀྐཎྛནཾ། རཏིནྟི པཉྩཀཱམགུཎརཏིཾ། པཧཱཡཱཏི པཛཧིཏྭཱ། སབྦསོ གེཧསིཏཉྩ ཝིཏཀྐནྟི, གེཧནིསྶིཏཾ པུཏྟདཱརཱདིཔཊིསཾཡུཏྟཾ ཉཱཏིཝིཏཀྐཱདིཉྩ མིཙྪཱཝིཏཀྐཾ ཨནཝསེསཏོ པཧཱཡ། ཝནཐཾ ན ཀརེཡྻ ཀུཧིཉྩཱིཏི ཨཛ྄ཛྷཏྟིཀབཱཧིརཔྤབྷེདེ སབྦསྨིཾ ཝཏྠུསྨིཾ ཏཎྷཾ ན ཀརེཡྻཾ། ནིབྦནཐོ ཨཝནཐོ ས བྷིཀྑཱུཏི ཡོ ཧི སབྦེན སབྦཾ ནིཏྟཎྷོ , ཏཏོ ཨེཝ ཀཏྠཙིཔི ནནྡིཡཱ ཨབྷཱཝཏོ ཨཝནཐོ, སོ བྷིཀྑུ ནཱམ སཾསཱརེ བྷཡསྶ སམྨདེཝ ཨིཀྑཎཏཱཡ བྷིནྣཀིལེསཏཱཡ ཙཱཏི ཨཏྠོ།

    Aratiñcātiādikā pañca gāthā attano santāne uppanne aratiādike vinodentena vuttā. Tattha aratinti adhikusalesu dhammesu pantasenāsanesu ca ukkaṇṭhanaṃ. Ratinti pañcakāmaguṇaratiṃ. Pahāyāti pajahitvā. Sabbaso gehasitañca vitakkanti, gehanissitaṃ puttadārādipaṭisaṃyuttaṃ ñātivitakkādiñca micchāvitakkaṃ anavasesato pahāya. Vanathaṃ na kareyya kuhiñcīti ajjhattikabāhirappabhede sabbasmiṃ vatthusmiṃ taṇhaṃ na kareyyaṃ. Nibbanatho avanatho sa bhikkhūti yo hi sabbena sabbaṃ nittaṇho , tato eva katthacipi nandiyā abhāvato avanatho, so bhikkhu nāma saṃsāre bhayassa sammadeva ikkhaṇatāya bhinnakilesatāya cāti attho.

    ཡམིདྷ པཐཝིཉྩ ཝེཧཱསཾ, རཱུཔགཏཾ ཛགཏོགདྷཾ ཀིཉྩཱིཏི ཡཾཀིཉྩི ཨིདྷ པཐཝཱིགཏཾ བྷཱུམིནིསྶིཏཾ ཝེཧཱསཾ ཝེཧཱསཊྛཾ དེཝལོཀནིསྶིཏཾ རཱུཔགཏཾ རཱུཔཛཱཏཾ རུཔྤནསབྷཱཝཾ ཛགཏོགདྷཾ ལོཀིཀཾ བྷཝཏྟཡཔརིཡཱཔནྣཾ སངྑཏཾ། པརིཛཱིཡཏི སབྦམནིཙྩནྟི སབྦཾ ཏཾ ཛརཱབྷིབྷཱུཏཾ, ཏཏོ ཨེཝ ཨནིཙྩཾ ཏཏོ ཨེཝ དུཀྑཾ ཨནཏྟཱཏི ཨེཝཾ ཏིལཀྑཎཱརོཔནཾ ཨཱཧ། ཨཡཾ ཐེརསྶ མཧཱཝིཔསྶནཱཏི ཝདནྟི། ཨེཝཾ སམེཙྩ ཙརནྟི མུཏཏྟཱཏི ཨེཝཾ སམེཙྩ ཨབྷིསམེཙྩ ཝིཔསྶནཱཔཉྙཱསཧིཏཱཡ མགྒཔཉྙཱཡ པཊིཝིཛ྄ཛྷིཏྭཱ མུཏཏྟཱ པརིཉྙཱཏཏྟབྷཱཝཱ པཎྜིཏཱ ཙརནྟི ཝིཧརནྟི།

    Yamidha pathaviñca vehāsaṃ, rūpagataṃ jagatogadhaṃ kiñcīti yaṃkiñci idha pathavīgataṃ bhūminissitaṃ vehāsaṃ vehāsaṭṭhaṃ devalokanissitaṃ rūpagataṃ rūpajātaṃ ruppanasabhāvaṃ jagatogadhaṃ lokikaṃ bhavattayapariyāpannaṃ saṅkhataṃ. Parijīyati sabbamaniccanti sabbaṃ taṃ jarābhibhūtaṃ, tato eva aniccaṃ tato eva dukkhaṃ anattāti evaṃ tilakkhaṇāropanaṃ āha. Ayaṃ therassa mahāvipassanāti vadanti. Evaṃ samecca caranti mutattāti evaṃ samecca abhisamecca vipassanāpaññāsahitāya maggapaññāya paṭivijjhitvā mutattā pariññātattabhāvā paṇḍitā caranti viharanti.

    ཨུཔདྷཱིསཱུཏི ཁནྡྷཱུཔདྷིཨཱདཱིསུ། ཛནཱཏི ཨནྡྷཔུཐུཛྫནཱ། གདྷིཏཱསེཏི པཊིབདྡྷཙིཏྟཱ། ཨེཏྠ ཧི ཝིསེསཏོ ཀཱམགུཎཱུཔདྷཱིསུ ཚནྡོ ཨཔནེཏབྦོཏི དསྶེནྟོ ཨཱཧ དིཊྛསུཏེ པཊིགྷེ ཙ མུཏེ ཙཱཏི། དིཊྛསུཏེཏི དིཊྛེ ཙེཝ སུཏེ ཙ, རཱུཔསདྡེསཱུཏི ཨཏྠོ། པཊིགྷེཏི གྷཊྚནཱིཡེ ཕོཊྛབྦེ། མུཏེཏི ཝུཏྟཱཝསེསེ མུཏེ, གནྡྷརསེསཱུཏི ཝུཏྟཾ ཧོཏི། སཱརཏྠཔཀཱསནིཡཾ (སཾ॰ ནི॰ ཨཊྛ॰ ༡.༡.༢༡༠) ‘‘པཊིགྷཔདེན གནྡྷརསཱ གཧིཏཱ, མུཏཔདེན ཕོཊྛབྦཱརམྨཎ’’ནྟི ཝུཏྟཾ། ཨེཏྠ ཝིནོདཡ ཚནྡམནེཛོཏི ཨེཏསྨིཾ དིཊྛཱདིབྷེདེ པཉྩཀཱམགུཎེ ཀཱམཙྪནྡཾ ཝིནོདེཧི, ཏཐཱ སཏི སབྦཏྠ ཨནེཛོ ཨཝིཀཔྤོ བྷཝསི། ཡོ ཧེཏྠ ན ལིམྤཏི མུནི ཏམཱཧཱུཏི ཡོ ཧི ཨེཏྠ ཀཱམགུཎེ ཏཎྷཱལེཔེན ན ལིམྤཏི, ཏཾ མོནེཡྻདྷམྨཊྛཏོ ‘‘མུནཱི’’ཏི པཎྜིཏཱ ཝདནྟི། ‘‘ཨཐ སཊྛིསིཏཱ’’ཏི པཱལཱི༹ཏི ཨདྷིཔྤཱཡེན ཀེཙི ‘‘སཊྛིདྷམྨཱརམྨཎནིསྶིཏཱ’’ཏི ཨཏྠཾ ཝདནྟི། ‘‘ཨཊྛསཊྛིསིཏཱ སཝིཏཀྐཱ’’ཏི པན པཱལི༹, ཨཔྤཀཉྷི ཨཱུནཾ ཨདྷིཀཾ ཝཱ ན གཎནཱུཔགཾ ཧོཏཱིཏི། ཨཊྛསཊྛིསིཏཱཏི དྭཱསཊྛིདིཊྛིགཏསནྣིསྶིཏཱ མིཙྪཱཝིཏཀྐཱཏི ཨཏྠོཏི ཀེཙི ཝདནྟི། དིཊྛིགཏིཀཱ ཙ སཏྟཱཝཱསཱབྷཱཝལདྡྷིཾ ཨཛ྄ཛྷཱུཔགཏཱཏི ཨདྷིཙྩསམུཔྤནྣཝཱདཾ ཋཔེཏྭཱ ཨིཏརེསཾ ཝསེན ‘‘ཨཐ སཊྛིསིཏཱ སཝིཏཀྐཱ’’ཏི ཝུཏྟཾ། ཡཐཱ ཧི ཏཎྷཱལེཔཱབྷཱཝེན བྷིཀྑཱུཏི ཝུཙྩཏི, ཨེཝཾ དིཊྛིལེཔཱབྷཱཝེནཔཱིཏི དསྶེཏུཾ ‘‘ཨཐ སཊྛིསིཏཱ’’ཏིཨཱདི ཝུཏྟཾ། པུཐུཛྫནཏཱཡ ཨདྷམྨཱ ནིཝིཊྛཱཏི ཏེ པན མིཙྪཱཝིཏཀྐཱ ནིཙྩཱདིགཱཧཝསེན ཨདྷམྨཱ དྷམྨཏོ ཨཔེཏཱ པུཐུཛྫནཏཱཡཾ ཨནྡྷབཱལེ ནིཝིཊྛཱ ཨབྷིནིཝིཊྛཱ། ན ཙ ཝགྒགཏསྶ ཀུཧིཉྩཱིཏི ཡཏྠ ཀཏྠཙི ཝཏྠུསྨིཾ སསྶཏཝཱདཱདིམིཙྪཱདིཊྛིཝགྒགཏོ, ཏཾལདྡྷིཀོ ན ཙ ཨསྶ བྷཝེཡྻ། ཨཊྛཀཐཱཡཾ (སཾ॰ ནི॰ ཨཊྛ॰ ༡.༡.༢༡༠) པན ‘‘ཨཐ སཊྛིསིཏཱ སཝིཏཀྐཱ, པུཐཱུ ཛནཏཱཡ ཨདྷམྨཱ ནིཝིཊྛཱ’’ཏི པདཾ ཨུདྡྷརིཏྭཱ ཨཐ ཚ ཨཱརམྨཎནིསྶིཏཱ པུཐཱུ ཨདྷམྨཝིཏཀྐཱ ཛནཏཱཡ ནིཝིཊྛཱཏི ཝུཏྟཾ། ཏཐཱ ན ཙ ཝགྒགཏསྶ ཀུཧིཉྩཱིཏི ཏེསཾ ཝསེན ན ཀཏྠཙི ཀིལེསཝགྒགཏོ བྷཝེཡྻཱཏི ཙ ཝུཏྟཾ། ནོ པན དུཊྛུལླགཱཧཱི ས བྷིཀྑཱུཏི ཡོ ཀིལེསེཧི དཱུསིཏཏྟཱ ཨཏིཝིཡ དུཊྛུལླཏཱ ཙ དུཊྛུལླཱནཾ མིཙྪཱཝཱདཱནཾ གཎྷནསཱིལོ ཙ ནོ ཨསྶ ནོ བྷཝེཡྻ, སོ བྷིཀྑུ ནཱམ ཧོཏཱིཏི།

    Upadhīsūti khandhūpadhiādīsu. Janāti andhaputhujjanā. Gadhitāseti paṭibaddhacittā. Ettha hi visesato kāmaguṇūpadhīsu chando apanetabboti dassento āha diṭṭhasute paṭighe ca mute cāti. Diṭṭhasuteti diṭṭhe ceva sute ca, rūpasaddesūti attho. Paṭigheti ghaṭṭanīye phoṭṭhabbe. Muteti vuttāvasese mute, gandharasesūti vuttaṃ hoti. Sāratthapakāsaniyaṃ (saṃ. ni. aṭṭha. 1.1.210) ‘‘paṭighapadena gandharasā gahitā, mutapadena phoṭṭhabbārammaṇa’’nti vuttaṃ. Ettha vinodaya chandamanejoti etasmiṃ diṭṭhādibhede pañcakāmaguṇe kāmacchandaṃ vinodehi, tathā sati sabbattha anejo avikappo bhavasi. Yo hettha na limpati muni tamāhūti yo hi ettha kāmaguṇe taṇhālepena na limpati, taṃ moneyyadhammaṭṭhato ‘‘munī’’ti paṇḍitā vadanti. ‘‘Atha saṭṭhisitā’’ti pāḷīti adhippāyena keci ‘‘saṭṭhidhammārammaṇanissitā’’ti atthaṃ vadanti. ‘‘Aṭṭhasaṭṭhisitā savitakkā’’ti pana pāḷi, appakañhi ūnaṃ adhikaṃ vā na gaṇanūpagaṃ hotīti. Aṭṭhasaṭṭhisitāti dvāsaṭṭhidiṭṭhigatasannissitā micchāvitakkāti atthoti keci vadanti. Diṭṭhigatikā ca sattāvāsābhāvaladdhiṃ ajjhūpagatāti adhiccasamuppannavādaṃ ṭhapetvā itaresaṃ vasena ‘‘atha saṭṭhisitā savitakkā’’ti vuttaṃ. Yathā hi taṇhālepābhāvena bhikkhūti vuccati, evaṃ diṭṭhilepābhāvenapīti dassetuṃ ‘‘atha saṭṭhisitā’’tiādi vuttaṃ. Puthujjanatāya adhammāniviṭṭhāti te pana micchāvitakkā niccādigāhavasena adhammā dhammato apetā puthujjanatāyaṃ andhabāle niviṭṭhā abhiniviṭṭhā. Na ca vaggagatassa kuhiñcīti yattha katthaci vatthusmiṃ sassatavādādimicchādiṭṭhivaggagato, taṃladdhiko na ca assa bhaveyya. Aṭṭhakathāyaṃ (saṃ. ni. aṭṭha. 1.1.210) pana ‘‘atha saṭṭhisitā savitakkā, puthū janatāya adhammā niviṭṭhā’’ti padaṃ uddharitvā atha cha ārammaṇanissitā puthū adhammavitakkā janatāya niviṭṭhāti vuttaṃ. Tathā na ca vaggagatassa kuhiñcīti tesaṃ vasena na katthaci kilesavaggagato bhaveyyāti ca vuttaṃ. No pana duṭṭhullagāhī sa bhikkhūti yo kilesehi dūsitattā ativiya duṭṭhullatā ca duṭṭhullānaṃ micchāvādānaṃ gaṇhanasīlo ca no assa no bhaveyya, so bhikkhu nāma hotīti.

    དབྦོཏི དབྦཛཱཏིཀོ པཎྜིཏོ། ཙིརརཏྟསམཱཧིཏོཏི ཙིརཀཱལཏོ པཊྛཱཡ སམཱཧིཏོ། ཨཀུཧཀོཏི ཀོཧཉྙརཧིཏོ ཨསཋོ ཨམཱཡཱཝཱི། ནིཔཀོཏི ནིཔུཎོ ཚེཀོ། ཨཔིཧཱལཱུཏི ནིཏྟཎྷོ། སནྟཾ པདཾ ཨཛ྄ཛྷགམཱཏི, ནིབྦཱནཾ ཨདྷིགཏོ། མོནེཡྻདྷམྨསམནྣཱགཏཏོ མུནི། པརིནིབྦུཏོཏི ཨཱརམྨཎཀརཎཝསེན ནིབྦཱནཾ པཊིཙྩ སཨུཔཱདིསེསཱཡ ནིབྦཱནདྷཱཏུཡཱ པརིནིབྦུཏོ། ཀངྑཏི ཀཱལནྟི ཨིདཱནི ཨནུཔཱདིསེསནིབྦཱནཏྠཱཡ ཀཱལཾ ཨཱགམེཏི། ན ཏསྶ ཀིཉྩི ཀརཎཱིཡཾ ཨཏྠི, ཡཐཱ ཨེདིསོ བྷཝིསྶཏི, ཏཐཱ ཨཏྟཱནཾ སམྤཱདེཏཱིཏི ཨདྷིཔྤཱཡོ།

    Dabboti dabbajātiko paṇḍito. Cirarattasamāhitoti cirakālato paṭṭhāya samāhito. Akuhakoti kohaññarahito asaṭho amāyāvī. Nipakoti nipuṇo cheko. Apihālūti nittaṇho. Santaṃ padaṃ ajjhagamāti, nibbānaṃ adhigato. Moneyyadhammasamannāgatato muni. Parinibbutoti ārammaṇakaraṇavasena nibbānaṃ paṭicca saupādisesāya nibbānadhātuyā parinibbuto. Kaṅkhati kālanti idāni anupādisesanibbānatthāya kālaṃ āgameti. Na tassa kiñci karaṇīyaṃ atthi, yathā ediso bhavissati, tathā attānaṃ sampādetīti adhippāyo.

    མཱནཾ པཛཧསྶཱུཏིཨཱདཡོ ཙཏསྶོ གཱཐཱ པཊིབྷཱནསམྤཏྟིཾ ནིསྶཱཡ ཨཏྟནོ པཝཏྟམཱནཾ མཱནཾ ཝིནོདེནྟེན ཝུཏྟཱ། ཏཏྠ མཱནཾ པཛཧསྶཱུཏི སེཡྻམཱནཱདིནཝཝིདྷཾ མཱནཾ པརིཙྩཛ། གོཏམཱཏི གོཏམགོཏྟསྶ བྷགཝཏོ སཱཝཀཏྟཱ ཨཏྟཱནཾ གོཏམགོཏྟཾ ཀཏྭཱ ཨཱལཔཏི། མཱནཔཐནྟི མཱནསྶ པཝཏྟིཊྛཱནབྷཱུཏཾ ཨཡོནིསོམནསིཀཱརཔརིཀྑིཏྟཾ ཛཱཏིཨཱདིཾ ཏཔྤཊིབདྡྷཀིལེསཔྤཧཱནེན ཛཧསྶུ པཛཧ། ཨསེསནྟི སབྦམེཝ། མཱནཔཐམྷི ས མུཙྪིཏོཏི མཱནཝཏྠུནིམིཏྟཾ མུཙྪཾ ཨཱཔནྣོ། ཝིཔྤཊིསཱརཱིཧུཝཱ ཙིརརཏྟནྟི ཨིམསྨིཾ མཱནཔཐཱནུཡོགཀྑཎེ ཝཱིཏིཝཏྟེ པུབྦེཝ ཨརཧཏྟཾ པཱཔུཎིསྶ, ‘‘ནཊྛོཧམསྨཱི’’ཏི ཝིཔྤཊིསཱརཱི ཨཧུཝཱ ཨཧོསི།

    Mānaṃ pajahassūtiādayo catasso gāthā paṭibhānasampattiṃ nissāya attano pavattamānaṃ mānaṃ vinodentena vuttā. Tattha mānaṃ pajahassūti seyyamānādinavavidhaṃ mānaṃ pariccaja. Gotamāti gotamagottassa bhagavato sāvakattā attānaṃ gotamagottaṃ katvā ālapati. Mānapathanti mānassa pavattiṭṭhānabhūtaṃ ayonisomanasikāraparikkhittaṃ jātiādiṃ tappaṭibaddhakilesappahānena jahassu pajaha. Asesanti sabbameva. Mānapathamhi sa mucchitoti mānavatthunimittaṃ mucchaṃ āpanno. Vippaṭisārīhuvā cirarattanti imasmiṃ mānapathānuyogakkhaṇe vītivatte pubbeva arahattaṃ pāpuṇissa, ‘‘naṭṭhohamasmī’’ti vippaṭisārī ahuvā ahosi.

    མཀྑེན མཀྑིཏཱ པཛཱཏི སཱུརཱདིནཱ ཨཏྟཱནཾ ཨུཀྐཾསེཏྭཱ པརེ ཝམྦྷེཏྭཱ པརགུཎམཀྑནལཀྑཎེན མཀྑེན པིསིཏཏྟཱ མཀྑཱི། པུགྒལོ ཧི ཡཐཱ ཡཐཱ པརེསཾ གུཎེ མཀྑེཏི, ཏཐཱ ཏཐཱ ཨཏྟནོ གུཎེ པུཉྫཏི ནིརཱཀརོཏི ནཱམ། མཱནཧཏཱཏི མཱནེན ཧཏགུཎཱ། ནིརཡཾ པཔཏནྟཱིཏི ནིརཡཾ ཨུཔཔཛྫནྟི།

    Makkhenamakkhitā pajāti sūrādinā attānaṃ ukkaṃsetvā pare vambhetvā paraguṇamakkhanalakkhaṇena makkhena pisitattā makkhī. Puggalo hi yathā yathā paresaṃ guṇe makkheti, tathā tathā attano guṇe puñjati nirākaroti nāma. Mānahatāti mānena hataguṇā. Nirayaṃ papatantīti nirayaṃ upapajjanti.

    མགྒཛིནོཏི མགྒེན ཝིཛིཏཀིལེསོ། ཀིཏྟིཉྩ སུཁཉྩཱཏི ཝིཉྙཱུཧི པསཾསིཏཉྩ ཀཱཡིཀཙེཏསིཀསུཁཉྩ ཨནུབྷོཏཱིཏི པཊིལབྷཏི། དྷམྨདསོཏི ཏམཱཧུ ཏཐཏྟནྟི ཏཾ ཏཐབྷཱཝཾ སམྨཱཔཊིཔནྣཾ ཡཱཐཱཝཏོ དྷམྨདསྶཱིཏི པཎྜིཏཱ ཨཱཧུ།

    Maggajinoti maggena vijitakileso. Kittiñca sukhañcāti viññūhi pasaṃsitañca kāyikacetasikasukhañca anubhotīti paṭilabhati. Dhammadasoti tamāhu tathattanti taṃ tathabhāvaṃ sammāpaṭipannaṃ yāthāvato dhammadassīti paṇḍitā āhu.

    ཨཁིལོཏི པཉྩཙེཏོཁིལརཧིཏོ། པདྷཱནཝཱཏི སམྨཔྤདྷཱནཝཱིརིཡསམྤནྣོ། ཝིསུདྡྷོཏི ནཱིཝརཎསངྑཱཏཝལཱཧཀཱཔགམེན ཝིསུདྡྷམཱནསོ ། ཨསེསནྟི ནཝཝིདྷམྤི མཱནཾ ཨགྒམགྒེན པཛཧིཏྭཱ། ཝིཛྫཱཡནྟཀརོ སམིཏཱཝཱིཏི སབྦསོ སམིཏཀིལེསོ ཏིཝིདྷཱཡ ཝིཛྫཱཡ པརིཡོསཱནཔྤཏྟོ ཧོཏཱིཏི ཨཏྟཱནཾ ཨོཝདཏི།

    Akhiloti pañcacetokhilarahito. Padhānavāti sammappadhānavīriyasampanno. Visuddhoti nīvaraṇasaṅkhātavalāhakāpagamena visuddhamānaso . Asesanti navavidhampi mānaṃ aggamaggena pajahitvā. Vijjāyantakaro samitāvīti sabbaso samitakileso tividhāya vijjāya pariyosānappatto hotīti attānaṃ ovadati.

    ཨཐེཀདིཝསཾ ཨཱཡསྨཱ ཨཱནནྡོ ཨཉྙཏརེན རཱཛམཧཱམཏྟེན ནིམནྟིཏོ པུབྦཎྷསམཡཾ ཏསྶ གེཧཾ གནྟྭཱ པཉྙཏྟེ ཨཱསནེ ནིསཱིདི ཨཱཡསྨཏཱ ཝངྒཱིསེན པཙྪཱསམཎེན། ཨཐ ཏསྨིཾ གེཧེ ཨིཏྠིཡོ སབྦཱལངྐཱརཔཊིམཎྜིཏཱ ཐེརཾ ཨུཔསངྐམིཏྭཱ, ཝནྡིཏྭཱ པཉྷཾ པུཙྪནྟི, དྷམྨཾ སུཎནྟི། ཨཐཱཡསྨཏོ ཝངྒཱིསསྶ ནཝཔབྦཛིཏསྶ ཨཱརམྨཎཾ པརིགྒཧེཏུཾ ཨསཀྐོནྟསྶ ཝིསབྷཱགཱརམྨཎེ རཱགོ ཨུཔྤཛྫི། སོ སདྡྷོ ཨུཛུཛཱཏིཀོ ཀུལཔུཏྟོ ‘‘ཨཡཾ མེ རཱགོ ཝཌྜྷིཏྭཱ དིཊྛདྷམྨིཀཾ སམྤརཱཡིཀམྤི ཨཏྠཾ ནཱསེཡྻཱ’’ཏི ཙིནྟེཏྭཱ ཡཐཱནིསིནྣོཝ ཐེརསྶ ཨཏྟནོ པཝཏྟིཾ ཨཱཝིཀརོནྟོ ‘‘ཀཱམརཱགེནཱ’’ཏི གཱཐམཱཧ། ཏཏྠ ཡདིཔི ཀིལེསརཛྫནཔརིལཱ༹ཧོ ཀཱཡམྤི བཱདྷཏི, ཙིཏྟཾ པན བཱདྷེནྟོ ཙིརཏརཾ བཱདྷེཏཱིཏི དསྶེཏུཾ ‘‘ཀཱམརཱགེན ཌཡ྄ཧཱམཱི’’ཏི ཝཏྭཱ ‘‘ཙིཏྟཾ མེ པརིཌཡ྄ཧཏཱི’’ཏི ཝུཏྟཾ། ནིབྦཱཔནནྟི རཱགནིབྦཱཔནཀཱརཎཾ རཱགཔརིལཱ༹ཧསྶ ནིབྦཱཔནསམཏྠཾ ཨོཝཱདཾ ཀརོཧཱིཏི ཨཏྠོ།

    Athekadivasaṃ āyasmā ānando aññatarena rājamahāmattena nimantito pubbaṇhasamayaṃ tassa gehaṃ gantvā paññatte āsane nisīdi āyasmatā vaṅgīsena pacchāsamaṇena. Atha tasmiṃ gehe itthiyo sabbālaṅkārapaṭimaṇḍitā theraṃ upasaṅkamitvā, vanditvā pañhaṃ pucchanti, dhammaṃ suṇanti. Athāyasmato vaṅgīsassa navapabbajitassa ārammaṇaṃ pariggahetuṃ asakkontassa visabhāgārammaṇe rāgo uppajji. So saddho ujujātiko kulaputto ‘‘ayaṃ me rāgo vaḍḍhitvā diṭṭhadhammikaṃ samparāyikampi atthaṃ nāseyyā’’ti cintetvā yathānisinnova therassa attano pavattiṃ āvikaronto ‘‘kāmarāgenā’’ti gāthamāha. Tattha yadipi kilesarajjanapariḷāho kāyampi bādhati, cittaṃ pana bādhento cirataraṃ bādhetīti dassetuṃ ‘‘kāmarāgena ḍayhāmī’’ti vatvā ‘‘cittaṃ me pariḍayhatī’’ti vuttaṃ. Nibbāpananti rāganibbāpanakāraṇaṃ rāgapariḷāhassa nibbāpanasamatthaṃ ovādaṃ karohīti attho.

    སཉྙཱཡ ཝིཔརིཡེསཱཏིཨཱདིཀཱ གཱཐཱ ཏེན ཡཱཙིཏེན ཨཱཡསྨཏཱ ཨཱནནྡེན ཝུཏྟཱ། ཝིཔརིཡེསཱཏི ཝིཔལླཱསེན ཨསུབྷེ སུབྷནྟི པཝཏྟེན ཝིཔརཱིཏགྒཱཧེན། ནིམིཏྟནྟི ཀིལེསཛནཀནིམིཏྟཾ། པརིཝཛྫེཧཱིཏི པརིབྦཛ། སུབྷཾ རཱགཱུཔསཾཧིཏནྟི རཱགཝཌྜྷནཱརམྨཎཾ སུབྷཾ པརིཝཛྫེནྟོ ཨསུབྷསཉྙཱཡ པརིཝཛྫེཡྻ, སབྦཏྠ ཨནབྷིརཏིསཉྙཱཡ། ཏསྨཱ ཏདུབྷཡམྤི དསྶེནྟོ ‘‘ཨསུབྷཱཡཱ’’ཏིཨཱདིམཱཧ།

    Saññāya vipariyesātiādikā gāthā tena yācitena āyasmatā ānandena vuttā. Vipariyesāti vipallāsena asubhe subhanti pavattena viparītaggāhena. Nimittanti kilesajanakanimittaṃ. Parivajjehīti paribbaja. Subhaṃ rāgūpasaṃhitanti rāgavaḍḍhanārammaṇaṃ subhaṃ parivajjento asubhasaññāya parivajjeyya, sabbattha anabhiratisaññāya. Tasmā tadubhayampi dassento ‘‘asubhāyā’’tiādimāha.

    ཏཏྠ ཨསུབྷཱཡཱཏི ཨསུབྷཱནུཔསྶནཱཡ། ཙིཏྟཾ བྷཱཝེཧི ཨེཀགྒཾ སུསམཱཧིཏནྟི ཨཏྟནོ ཙིཏྟཝིཀྑེཔཱབྷཱཝེན ཨེཀགྒཾ ཨཱརམྨཎེསུ སུསམཱཧིཏཾ ཨཔྤིཏཾ ཀཏྭཱ བྷཱཝེཧི ཏཝ ཨསུབྷཱནུཔསྶནཾ སུཀརཾ ཨཀྑཱམཱིཏི། སཏི ཀཱཡགཏཱ ཏྱཏྠཱུཏི ཝུཏྟཀཱཡགཏཱསཏིབྷཱཝནཱ ཏཡཱ བྷཱཝིཏཱ བཧུལཱིཀཏཱ ཧོཏཱུཏི ཨཏྠོ། ནིབྦིདཱབཧུལོ བྷཝཱཏི ཨཏྟབྷཱཝེ སབྦསྨིཉྩ ནིབྦེདབཧུལོ ཧོཧི།

    Tattha asubhāyāti asubhānupassanāya. Cittaṃ bhāvehi ekaggaṃ susamāhitanti attano cittavikkhepābhāvena ekaggaṃ ārammaṇesu susamāhitaṃ appitaṃ katvā bhāvehi tava asubhānupassanaṃ sukaraṃ akkhāmīti. Sati kāyagatā tyatthūti vuttakāyagatāsatibhāvanā tayā bhāvitā bahulīkatā hotūti attho. Nibbidābahulo bhavāti attabhāve sabbasmiñca nibbedabahulo hohi.

    ཨནིམིཏྟཉྩ བྷཱཝེཧཱིཏི ནིཙྩནིམིཏྟཱདཱིནཾ ཨུགྒྷཱཊནེན ཝིསེསཏོ ཨནིཙྩཱནུཔསྶནཱ ཨནིམིཏྟཱ ནཱམ, ཏཏོ མཱནཱནུསཡམུཛྫཧཱཏི ཏཾ བྷཱཝེནྟོ མགྒཔཊིཔཱཊིཡཱ ཨགྒམགྒཱདྷིགམེན མཱནཱནུསཡཾ སམུཙྪིནྡ། མཱནཱབྷིསམཡཱཏི མཱནསྶ དསྶནཱབྷིསམཡཱ ཙེཝ པཧཱནཱབྷིསམཡཱ ཙ། ཨུཔསནྟོཏི སབྦསོ རཱགཱདཱིནཾ སནྟཏཱཡ ཨུཔསནྟོ ཙརིསྶསི ཝིཧརིསྶསཱིཏི ཨཏྠོ།

    Animittañca bhāvehīti niccanimittādīnaṃ ugghāṭanena visesato aniccānupassanā animittā nāma, tato mānānusayamujjahāti taṃ bhāvento maggapaṭipāṭiyā aggamaggādhigamena mānānusayaṃ samucchinda. Mānābhisamayāti mānassa dassanābhisamayā ceva pahānābhisamayā ca. Upasantoti sabbaso rāgādīnaṃ santatāya upasanto carissasi viharissasīti attho.

    ཏམེཝ ཝཱཙནྟིཨཱདིཀཱ ཙཏསྶོ གཱཐཱ བྷགཝཏཱ སུབྷཱསིཏསུཏྟེ (སཾ॰ ནི॰ ༡.༢༡༣) དེསིཏེ སོམནསྶཛཱཏེན ཐེརེན བྷགཝནྟཾ སམྨུཁཱ ཨབྷིཏྠཝནྟེན ཝུཏྟཱ། ཡཱཡཏྟཱནཾ ན ཏཱཔཡེཏི ཡཱཡ ཝཱཙཱཡ ཧེཏུབྷཱུཏཱཡ ཨཏྟཱནཾ ཝིཔྤཊིསཱརེན ན ཏཱཔེཡྻ ན ཝིཧེཋེཡྻ། པརེ ཙ ན ཝིཧིཾསེཡྻཱཏི པརེ ཙ པརེཧི བྷིནྡནྟོ ན བཱདྷེཡྻ། སཱ ཝེ ཝཱཙཱ སུབྷཱསིཏཱཏི སཱ ཝཱཙཱ ཨེཀཾསེན སུབྷཱསིཏཱ ནཱམ, ཏསྨཱ ཏམེཝ ཝཱཙཾ བྷཱསེཡྻཱཏི ཡོཛནཱ། ཨིམཱཡ གཱཐཱཡ ཨཔིསུཎཝཱཙཱཝསེན བྷགཝནྟཾ ཐོམེཏི།

    Tameva vācantiādikā catasso gāthā bhagavatā subhāsitasutte (saṃ. ni. 1.213) desite somanassajātena therena bhagavantaṃ sammukhā abhitthavantena vuttā. Yāyattānaṃ na tāpayeti yāya vācāya hetubhūtāya attānaṃ vippaṭisārena na tāpeyya na viheṭheyya. Pare ca na vihiṃseyyāti pare ca parehi bhindanto na bādheyya. Sā ve vācā subhāsitāti sā vācā ekaṃsena subhāsitā nāma, tasmā tameva vācaṃ bhāseyyāti yojanā. Imāya gāthāya apisuṇavācāvasena bhagavantaṃ thometi.

    པཊིནནྡིཏཱཏི པཊིམུཁབྷཱཝེན ནནྡིཏཱ པིཡཱཡིཏཱ སམྤཏི ཨཱཡཏིཉྩ སུཎནྟེཧི སམྤཊིཙྪིཏཱ། ཡཾ ཨནཱདཱཡཱཏི ཡཾ ཝཱཙཾ བྷཱསནྟོ པཱཔཱནི པརེསཾ ཨཔྤིཡཱནི ཨནིཊྛཱནི ཕརུསཝཙནཱནི ཨནཱདཱཡ ཨགྒཧེཏྭཱ ཨཏྠབྱཉྫནམདྷུརཾ པིཡམེཝ དཱིཔེཏི། ཏམེཝ པིཡཝཱཙཾ བྷཱསེཡྻཱཏི པིཡཝཱཙཱཝསེན ཨབྷིཏྠཝི།

    Paṭinanditāti paṭimukhabhāvena nanditā piyāyitā sampati āyatiñca suṇantehi sampaṭicchitā. Yaṃ anādāyāti yaṃ vācaṃ bhāsanto pāpāni paresaṃ appiyāni aniṭṭhāni pharusavacanāni anādāya aggahetvā atthabyañjanamadhuraṃ piyameva dīpeti. Tameva piyavācaṃ bhāseyyāti piyavācāvasena abhitthavi.

    ཨམཏཱཏི སཱདྷུབྷཱཝེན ཨམཏསདིསཱ། ཝུཏྟཉྷེཏཾ – ‘‘སཙྩཾ ཧཝེ སཱདྷུཏརཾ རསཱན’’ནྟི (སཾ॰ ནི॰ ༡.༧༣)། ནིབྦཱནཱམཏཔཙྩཡཏྟཱ ཝཱ ཨམཏཱ། ཨེས དྷམྨོ སནནྟནོཏི ཡཱ ཨཡཾ སཙྩཝཱཙཱ ནཱམ, ཨེས པོརཱཎོ དྷམྨོ ཙརིཡཱ པཝེཎི། ཨིདམེཝ ཧི པོརཱཎཱནཾ ཨཱཙིཎྞཾ ཡཾ ཏེ ན ཨལིཀཾ བྷཱསིཾསུ། ཏེནཱཧ – ‘‘སཙྩེ ཨཏྠེ ཙ དྷམྨེ ཙ, ཨཱཧུ སནྟོ པཏིཊྛིཏཱ’’ཏི། ཏཏྠ སཙྩེ པཏིཊྛིཏཏྟཱ ཨེཝ ཨཏྟནོ ཙ པརེསཉྩ ཨཏྠེ པཏིཊྛིཏཱ, ཨཏྠེ པཏིཊྛིཏཏྟཱ ཨེཝ དྷམྨེ པཏིཊྛིཏཱ ཧོནྟཱིཏི ཝེདིཏབྦཱ། སཙྩཝིསེསནམེཝ ཝཱ ཨེཏཾ། ཨིདཉྷི ཝུཏྟཾ ཧོཏི – སཙྩེ པཏིཊྛིཏཱ། ཀཱིདིསེ? ཨཏྠེ ཙ དྷམྨེ ཙ, ཡཾ པརེསཾ ཨཏྠཏོ ཨནཔེཏཏྟཱ ཨཏྠཾ ཨནུཔརོདྷཀརཾ, དྷམྨཏོ ཨནཔེཏཏྟཱ དྷམྨཾ དྷམྨིཀམེཝ ཨཏྠཾ སཱདྷེཏཱིཏི། ཨིམཱཡ གཱཐཱཡ སཙྩཝཱཙཱཝསེན ཨབྷིཏྠཝི། ཁེམནྟི ཨབྷཡཾ ནིརུཔདྡཝཾ། ཀེན ཀཱརཎེནཱཏི ཙེ? ནིབྦཱནཔཏྟིཡཱ དུཀྑསྶནྟཀིརིཡཱཡ, ཡསྨཱ ཀིལེསནིབྦཱནཾ པཱཔེཏི, ཝཊྚདུཀྑསྶ ཙ ཨནྟཀིརིཡཱཡ སཾཝཊྚཏི, ཏསྨཱ ཁེམནྟི ཨཏྠོ། ཨཐ ཝཱ ཡཾ བུདྡྷོ ནིབྦཱནཔཏྟིཡཱ ཝཱ དུཀྑསྶནྟཀིརིཡཱཡ ཝཱཏི དྭིནྣཾ ནིབྦཱནདྷཱཏཱུནཾ ཨཏྠཱཡ ཁེམམགྒཔྤཀཱསནཏོ ཁེམཾ ཝཱཙཾ བྷཱསཏི། སཱ ཝེ ཝཱཙཱནམུཏྟམཱཏི སཱ ཝཱཙཱ སབྦཝཱཙཱནཾ སེཊྛཱཏི ཨེཝམེཏྠ ཨཏྠོ དཊྛབྦོ། ཨིམཱཡ གཱཐཱཡ མནྟཱཝཙནཝསེན བྷགཝནྟཾ ཨབྷིཏྠཝནྟོ ཨརཧཏྟནིཀཱུཊེན ཐོམནཾ པརིཡོསཱཔེཏི།

    Amatāti sādhubhāvena amatasadisā. Vuttañhetaṃ – ‘‘saccaṃ have sādhutaraṃ rasāna’’nti (saṃ. ni. 1.73). Nibbānāmatapaccayattā vā amatā. Esa dhammo sanantanoti yā ayaṃ saccavācā nāma, esa porāṇo dhammo cariyā paveṇi. Idameva hi porāṇānaṃ āciṇṇaṃ yaṃ te na alikaṃ bhāsiṃsu. Tenāha – ‘‘sacce atthe ca dhamme ca, āhu santo patiṭṭhitā’’ti. Tattha sacce patiṭṭhitattā eva attano ca paresañca atthe patiṭṭhitā, atthe patiṭṭhitattā eva dhamme patiṭṭhitā hontīti veditabbā. Saccavisesanameva vā etaṃ. Idañhi vuttaṃ hoti – sacce patiṭṭhitā. Kīdise? Atthe ca dhamme ca, yaṃ paresaṃ atthato anapetattā atthaṃ anuparodhakaraṃ, dhammato anapetattā dhammaṃ dhammikameva atthaṃ sādhetīti. Imāya gāthāya saccavācāvasena abhitthavi. Khemanti abhayaṃ nirupaddavaṃ. Kena kāraṇenāti ce? Nibbānapattiyā dukkhassantakiriyāya, yasmā kilesanibbānaṃ pāpeti, vaṭṭadukkhassa ca antakiriyāya saṃvaṭṭati, tasmā khemanti attho. Atha vā yaṃ buddho nibbānapattiyā vā dukkhassantakiriyāya vāti dvinnaṃ nibbānadhātūnaṃ atthāya khemamaggappakāsanato khemaṃ vācaṃ bhāsati. Sā ve vācānamuttamāti sā vācā sabbavācānaṃ seṭṭhāti evamettha attho daṭṭhabbo. Imāya gāthāya mantāvacanavasena bhagavantaṃ abhitthavanto arahattanikūṭena thomanaṃ pariyosāpeti.

    གམྦྷཱིརཔཉྙོཏི ཏིསྶོ གཱཐཱ ཨཱཡསྨཏོ སཱརིཔུཏྟཏྠེརསྶ པསཾསནཝསེན ཝུཏྟཱ། ཏཏྠ གམྦྷཱིརཔཉྙོཏི གམྦྷཱིརེསུ ཁནྡྷཱཡཏནཱདཱིསུ པཝཏྟཱཡ ནིཔུཎཱཡ པཉྙཱཡ སམནྣཱགཏཏྟཱ གམྦྷཱིརཔཉྙོ། མེདྷཱསངྑཱཏཱཡ དྷམྨོཛཔཉྙཱཡ སམནྣཱགཏཏྟཱ མེདྷཱཝཱི། ‘‘ཨཡཾ དུགྒཏིཡཱ མགྒོ, ཨཡཾ སུགཏིཡཱ མགྒོ, ཨཡཾ ནིབྦཱནསྶ མགྒོ’’ཏི ཨེཝཾ མགྒེ ཙ ཨམགྒེ ཙ ཀོཝིདཏཱཡ མགྒཱམགྒསྶ ཀོཝིདོ། མཧཏིཡཱ སཱཝཀཔཱརམཱིཉཱཎསྶ མཏྠཀཾ པཏྟཱཡ པཉྙཱཡ ཝསེན མཧཱཔཉྙོ། དྷམྨཾ དེསེཏི བྷིཀྑུནནྟི སམྨདེཝ པཝཏྟིཾ ནིཝཏྟིཾ ཝིབྷཱཝེནྟོ བྷིཀྑཱུནཾ དྷམྨཾ དེསེཏི། ཏསྶཱ པན དེསནཱཡ པཝཏྟིཨཱཀཱརཾ དསྶེཏུཾ ‘‘སཾཁིཏྟེནཔཱི’’ཏིཨཱདི ཝུཏྟཾ།

    Gambhīrapaññoti tisso gāthā āyasmato sāriputtattherassa pasaṃsanavasena vuttā. Tattha gambhīrapaññoti gambhīresu khandhāyatanādīsu pavattāya nipuṇāya paññāya samannāgatattā gambhīrapañño. Medhāsaṅkhātāya dhammojapaññāya samannāgatattā medhāvī. ‘‘Ayaṃ duggatiyā maggo, ayaṃ sugatiyā maggo, ayaṃ nibbānassa maggo’’ti evaṃ magge ca amagge ca kovidatāya maggāmaggassa kovido. Mahatiyā sāvakapāramīñāṇassa matthakaṃ pattāya paññāya vasena mahāpañño. Dhammaṃ deseti bhikkhunanti sammadeva pavattiṃ nivattiṃ vibhāvento bhikkhūnaṃ dhammaṃ deseti. Tassā pana desanāya pavattiākāraṃ dassetuṃ ‘‘saṃkhittenapī’’tiādi vuttaṃ.

    ཏཏྠ སཾཁིཏྟེནཔཱིཏི ‘‘ཙཏྟཱརིམཱནི, ཨཱཝུསོ, ཨརིཡསཙྩཱནི། ཀཏམཱནི ཙཏྟཱརི? དུཀྑཾ ཨརིཡསཙྩཾ…པེ॰… ཨིམཱནི ཁོ, ཨཱཝུསོ, ཙཏྟཱརི ཨརིཡསཙྩཱནི, ཏསྨཱ ཏིཧཱཝུསོ, ཨིདཾ དུཀྑནྟི ཡོགོ ཀརཎཱིཡོ’’ཏི ཨེཝཾ སཾཁིཏྟེནཔི དེསེཏི། ‘‘ཀཏམཉྩཱཝུསོ, དུཀྑཾ ཨརིཡསཙྩཾ? ཛཱཏིཔི དུཀྑཱ’’ཏིཨཱདིནཱ (མ॰ ནི॰ ༣.༣༧༢-༣༧༣) ནཡེན ཏཱནེཝ ཝིབྷཛནྟོ ཝིཏྠཱརེནཔི བྷཱསཏི། ཁནྡྷཱདིདེསནཱསུཔི ཨེསེཝ ནཡོ། སཱལིཀཱཡིཝ ནིགྒྷོསོཏི ཡཐཱ མདྷུརཾ ཨམྦཔཀྐཾ སཱཡིཏྭཱ པཀྑེཧི ཝཱཏཾ དཏྭཱ མདྷུརརཝཾ ནིཙྪཱརེནྟིཡཱ སཱལིཀཱཡ ནིགྒྷོསོ, ཨེཝཾ ཐེརསྶ དྷམྨཾ ཀཐེནྟསྶ མདྷུརོ ནིགྒྷོསོ ཧོཏི། དྷམྨསེནཱཔཏིསྶ ཧི པིཏྟཱདཱིནཾ ཝསེན ཨཔལིབུདྡྷཝཙནཾ ཧོཏི, ཨཡདཎྜེན པཧཊཀཾསཐཱལཀོ ཝིཡ སདྡོ ནིཙྪརཏི། པཊིབྷཱནཾ ཨུདིཡྻཏཱིཏི ཀཐེཏུཀམྱཏཱཡ སཏི སམུདྡཏོ ཝཱིཙིཡོ ཝིཡ ཨུཔརཱུཔརི ཨནནྟཾ པཊིབྷཱནཾ ཨུཊྛཧཏི།

    Tattha saṃkhittenapīti ‘‘cattārimāni, āvuso, ariyasaccāni. Katamāni cattāri? Dukkhaṃ ariyasaccaṃ…pe… imāni kho, āvuso, cattāri ariyasaccāni, tasmā tihāvuso, idaṃ dukkhanti yogo karaṇīyo’’ti evaṃ saṃkhittenapi deseti. ‘‘Katamañcāvuso, dukkhaṃ ariyasaccaṃ? Jātipi dukkhā’’tiādinā (ma. ni. 3.372-373) nayena tāneva vibhajanto vitthārenapi bhāsati. Khandhādidesanāsupi eseva nayo. Sālikāyiva nigghosoti yathā madhuraṃ ambapakkaṃ sāyitvā pakkhehi vātaṃ datvā madhuraravaṃ nicchārentiyā sālikāya nigghoso, evaṃ therassa dhammaṃ kathentassa madhuro nigghoso hoti. Dhammasenāpatissa hi pittādīnaṃ vasena apalibuddhavacanaṃ hoti, ayadaṇḍena pahaṭakaṃsathālako viya saddo niccharati. Paṭibhānaṃ udiyyatīti kathetukamyatāya sati samuddato vīciyo viya uparūpari anantaṃ paṭibhānaṃ uṭṭhahati.

    ཏསྶཱཏི དྷམྨསེནཱཔཏིསྶ། ཏནྟི དྷམྨཾ དེསེནྟསྶ། སུཎནྟཱིཏི ཡཾ ནོ ཐེརོ ཀཐེཏི, ཏཾ ནོ སོསྶཱམཱཏི ཨཱདརཛཱཏཱ སུཎནྟི། མདྷུརནྟི ཨིཊྛཾ། རཛནཱིཡེནཱཏི ཀནྟེན། སཝནཱིཡེནཱཏི ཀཎྞསུཁེན། ཝགྒུནཱཏི མཊྛེན མནོཧརེན། ཨུདགྒཙིཏྟཱཏི ཨོདགྱཔཱིཏིཡཱ ཝསེན ཨུདགྒཙིཏྟཱ ཨལཱིནཙིཏྟཱ། མུདིཏཱཏི ཨཱམོདིཏཱ པཱམོཛྫེན སམནྣཱགཏཱ། ཨོདྷེནྟཱིཏི ཨཝདཧནྟི ཨཉྙཱཡ ཙིཏྟཾ ཨུཔཊྛཔེནྟཱ སོཏཾ ཨུཔནེནྟི།

    Tassāti dhammasenāpatissa. Tanti dhammaṃ desentassa. Suṇantīti yaṃ no thero katheti, taṃ no sossāmāti ādarajātā suṇanti. Madhuranti iṭṭhaṃ. Rajanīyenāti kantena. Savanīyenāti kaṇṇasukhena. Vaggunāti maṭṭhena manoharena. Udaggacittāti odagyapītiyā vasena udaggacittā alīnacittā. Muditāti āmoditā pāmojjena samannāgatā. Odhentīti avadahanti aññāya cittaṃ upaṭṭhapentā sotaṃ upanenti.

    ཨཛྫ པནྣརསེཏིཨཱདིཀཱ ཙཏསྶོ གཱཐཱ པཝཱརཎཱསུཏྟནྟདེསནཱཡ (སཾ॰ ནི॰ ༡.༢༡༥) སཏྠཱརཾ མཧཱབྷིཀྑུསངྒྷཔརིཝུཏཾ ནིསིནྣཾ དིསྭཱ ཐོམེནྟེན ཝུཏྟཱ། ཏཏྠ པནྣརསེཏི ཡསྨིཉྷི སམཡེ བྷགཝཱ པུབྦཱརཱམེ ནིསཱིདནྟོ སཱཡནྷསམཡེ སམྤཏྟཔརིསཱཡ ཀཱལཡུཏྟཾ སམཡཡུཏྟཾ དྷམྨཾ དེསེཏྭཱ, ཨུདཀཀོཊྛཀེ གཏྟཱནི པརིསིཉྩིཏྭཱ, ཝཏྠནིཝསནོ ཨེཀཾསཾ སུགཏམཧཱཙཱིཝརཾ ཀཏྭཱ, མིགཱརམཱཏུཔཱསཱདེ མཛ྄ཛྷིམཐམྦྷཾ ནིསྶཱཡ པཉྙཏྟཝརབུདྡྷཱསནེ ནིསཱིདིཏྭཱ, སམནྟཏོ ནིསིནྣཾ བྷིཀྑུསངྒྷཾ ཨནུཝིལོཀེཏྭཱ ཏདཧུཔོསཐེ པཝཱརཎཱདིཝསེ ནིསིནྣོ ཧོཏི, ཨིམསྨིཾ པནྣརསཱིཨུཔོསཐེཏི ཨཏྠོ། ཝིསུདྡྷིཡཱཏི ཝིསུདྡྷཏྠཱཡ ཝིསུདྡྷིཔཝཱརཎཱཡ། བྷིཀྑཱུ པཉྩསཏཱ སམཱགཏཱཏི , པཉྩསཏམཏྟཱ བྷིཀྑཱུ སཏྠཱརཾ པརིཝཱརེཏྭཱ ནིསཛྫཝསེན ཙེཝ ཨཛ྄ཛྷཱསཡཝསེན ཙ སམཱགཏཱ། ཏེ ཙ སཾཡོཛནབནྡྷནཙྪིདཱཏི སཾཡོཛནསངྑཱཏེ སནྟཱནསྶ བནྡྷནབྷཱུཏེ ཀིལེསེ ཚིནྡིཏྭཱ ཋིཏཱ། ཏཏོ ཨེཝ ཨནཱིགྷཱ ཁཱིཎཔུནབྦྷཝཱ ཨིསཱིཏི ཀིལེསདུཀྑཱབྷཱཝེན ནིདུཀྑཱ ཁཱིཎཔུནབྦྷཝཱ, ཨསེཀྑཱནཾ སཱིལཀྑནྡྷཱདཱིནཾ ཨེསིཏབྷཱཝེན ཨིསཱིཏི།

    Ajjapannarasetiādikā catasso gāthā pavāraṇāsuttantadesanāya (saṃ. ni. 1.215) satthāraṃ mahābhikkhusaṅghaparivutaṃ nisinnaṃ disvā thomentena vuttā. Tattha pannaraseti yasmiñhi samaye bhagavā pubbārāme nisīdanto sāyanhasamaye sampattaparisāya kālayuttaṃ samayayuttaṃ dhammaṃ desetvā, udakakoṭṭhake gattāni parisiñcitvā, vatthanivasano ekaṃsaṃ sugatamahācīvaraṃ katvā, migāramātupāsāde majjhimathambhaṃ nissāya paññattavarabuddhāsane nisīditvā, samantato nisinnaṃ bhikkhusaṅghaṃ anuviloketvā tadahuposathe pavāraṇādivase nisinno hoti, imasmiṃ pannarasīuposatheti attho. Visuddhiyāti visuddhatthāya visuddhipavāraṇāya. Bhikkhū pañcasatā samāgatāti , pañcasatamattā bhikkhū satthāraṃ parivāretvā nisajjavasena ceva ajjhāsayavasena ca samāgatā. Te ca saṃyojanabandhanacchidāti saṃyojanasaṅkhāte santānassa bandhanabhūte kilese chinditvā ṭhitā. Tato eva anīghā khīṇapunabbhavā isīti kilesadukkhābhāvena nidukkhā khīṇapunabbhavā, asekkhānaṃ sīlakkhandhādīnaṃ esitabhāvena isīti.

    ཝིཛིཏསངྒཱམནྟི ཝིཛིཏཀིལེསསངྒཱམཏྟཱ ཝིཛིཏམཱརབལཏྟཱ ཝིཛིཏསངྒཱམཾ། སཏྠཝཱཧནྟི ཨཊྛངྒིཀེ ཨརིཡམགྒརཐེ ཨཱརོཔེཏྭཱ ཝེནེཡྻསཏྟེ ཝཱཧེཏི སཾསཱརཀནྟཱརཏོ ཨུཏྟཱརེཏཱིཏི བྷགཝཱ སཏྠཝཱཧོ། ཏེནཱཧ བྲཧྨཱ སཧམྤཏི ‘‘ཨུཊྛེཧི, ཝཱིར, ཝིཛིཏསངྒཱམ, སཏྠཝཱཧཱ’’ཏི (མཧཱཝ॰ ༨; མ॰ ནི॰ ༡.༢༨༢), ཏཾ སཏྠཝཱཧཾ ཨནུཏྟརཾ སཏྠཱརཾ སཱཝཀཱ པཡིརུཔཱསནྟི། ཏེཝིཛྫཱ མཙྩུཧཱཡིནོཏི ཨེཝརཱུཔེཧི སཱཝཀེཧི པརིཝཱརིཏོ ཙཀྐཝཏྟི ཝིཡ རཱཛཱ ཨམཙྩཔརིཝཱརིཏོ ཛནཔདཙཱརིཀཝསེན སམནྟཱ ཨནུཔརིཡེཏཱིཏི ཡོཛནཱ།

    Vijitasaṅgāmanti vijitakilesasaṅgāmattā vijitamārabalattā vijitasaṅgāmaṃ. Satthavāhanti aṭṭhaṅgike ariyamaggarathe āropetvā veneyyasatte vāheti saṃsārakantārato uttāretīti bhagavā satthavāho. Tenāha brahmā sahampati ‘‘uṭṭhehi, vīra, vijitasaṅgāma, satthavāhā’’ti (mahāva. 8; ma. ni. 1.282), taṃ satthavāhaṃ anuttaraṃ satthāraṃ sāvakā payirupāsanti. Tevijjā maccuhāyinoti evarūpehi sāvakehi parivārito cakkavatti viya rājā amaccaparivārito janapadacārikavasena samantā anupariyetīti yojanā.

    པལཱཔོཏི ཏུཙྪོ ཨནྟོསཱརརཧིཏོ, སཱིལརཧིཏོཏི ཨཏྠོ། ཝནྡེ ཨཱདིཙྩབནྡྷུནནྟི ཨཱདིཙྩབནྡྷུཾ སཏྠཱརཾ དསབལཾ ཝནྡཱམཱིཏི ཝདཏི།

    Palāpoti tuccho antosārarahito, sīlarahitoti attho. Vande ādiccabandhunanti ādiccabandhuṃ satthāraṃ dasabalaṃ vandāmīti vadati.

    པརོསཧསྶནྟིཨཱདིཀཱ ཙཏསྶོ གཱཐཱ ནིབྦཱནཔཊིསཾཡུཏྟཱཡ དྷམྨིཡཱ ཀཐཱཡ བྷིཀྑཱུནཾ དྷམྨཾ དེསེནྟཾ བྷགཝནྟཾ ཐོམེནྟེན ཝུཏྟཱ། ཏཏྠ པརོསཧསྶནྟི ཨཏིརེཀསཧསྶཾ, ཨཌྜྷཏེལ༹སཱནི བྷིཀྑུསཧསྶཱནི སནྡྷཱཡ ཝུཏྟཾ། ཨཀུཏོབྷཡནྟི ནིབྦཱནེ ཀུཏོཙིཔི བྷཡཾ ནཏྠི། ནིབྦཱནཾ པཏྟསྶ ཙ ཀུཏོཙིཔི བྷཡཾ ནཏྠཱིཏི ནིབྦཱནཾ ཨཀུཏོབྷཡཾ ནཱམ།

    Parosahassantiādikā catasso gāthā nibbānapaṭisaṃyuttāya dhammiyā kathāya bhikkhūnaṃ dhammaṃ desentaṃ bhagavantaṃ thomentena vuttā. Tattha parosahassanti atirekasahassaṃ, aḍḍhateḷasāni bhikkhusahassāni sandhāya vuttaṃ. Akutobhayanti nibbāne kutocipi bhayaṃ natthi. Nibbānaṃ pattassa ca kutocipi bhayaṃ natthīti nibbānaṃ akutobhayaṃ nāma.

    ‘‘ཨཱགུཾ ན ཀརོཏཱི’’ཏིཨཱདིནཱ (སུ॰ ནི॰ ༥༢༧) ཝུཏྟཀཱརཎེཧི བྷགཝཱ ནཱགོཏི ཝུཙྩཏཱིཏི ནཱགནཱམོསི བྷགཝཱཏི། ཨིསཱིནཾ ཨིསིསཏྟམོཏི སཱཝཀཔཙྩེཀབུདྡྷཨིསཱིནཾ ཨུཏྟམོ ཨིསི, ཝིཔསྶཱིསམྨཱསམྦུདྡྷཏོ པཊྛཱཡ ཨིསཱིནཾ ཝཱ སཏྟམཀོ ཨིསི། མཧཱམེགྷོཝཱཏི ཙཱཏུདྡཱིཔིཀམཧཱམེགྷོ ཝིཡ ཧུཏྭཱ།

    ‘‘Āguṃ na karotī’’tiādinā (su. ni. 527) vuttakāraṇehi bhagavā nāgoti vuccatīti nāganāmosi bhagavāti. Isīnaṃ isisattamoti sāvakapaccekabuddhaisīnaṃ uttamo isi, vipassīsammāsambuddhato paṭṭhāya isīnaṃ vā sattamako isi. Mahāmeghovāti cātuddīpikamahāmegho viya hutvā.

    དིཝཱ ཝིཧཱརཱཏི པཊིསལླཱནཊྛཱནཏོ། སཱཝཀོ ཏེ, མཧཱཝཱིར, པཱདེ ཝནྡཏི ཝངྒཱིསོཏི ཨིདཾ ཐེརོ ཨརཧཏྟཾ པཏྭཱ ཨཏྟནོ ཝིསེསཱདྷིགམཾ པཀཱསེནྟོ ཝདཏི།

    Divā vihārāti paṭisallānaṭṭhānato. Sāvako te, mahāvīra, pāde vandati vaṅgīsoti idaṃ thero arahattaṃ patvā attano visesādhigamaṃ pakāsento vadati.

    ཨུམྨགྒཔཐནྟིཨཱདིཀཱ ཙཏསྶོ གཱཐཱ བྷགཝཏཱ ‘‘ཀིཾ ནུ ཏེ, ཝངྒཱིས, ཨིམཱ གཱཐཱཡོ པུབྦེ པརིཝིཏཀྐིཏཱ, ཨུདཱཧུ ཋཱནསོ ཙེཏཱ པཊིབྷནྟཱི’’ཏི པུཙྪིཏེན ཋཱནསོ པཊིབྷནྟཱིཏི དསྶེནྟེན ཝུཏྟཱ། ཀསྨཱ པནེཝཾ ཏཾ བྷགཝཱ ཨཝོཙ? སངྒྷམཛ྄ཛྷེ ཀིར ཀཐཱ ཨུདཔཱདི – ‘‘ཝངྒཱིསཏྠེརོ ཝིསྶཊྛགནྠོ ནེཝ ཨུདྡེསེན, ན པརིཔུཙྪཱཡ, ན ཡོནིསོམནསིཀཱརེན ཀམྨཾ ཀརོཏི། གཱཐཾ བནྡྷནྟོ ཝཎྞཔདཱནི ཀརོནྟོ ཝིཙརཏཱི’’ཏི། ཨཐ བྷགཝཱ ‘‘ཨིམེ བྷིཀྑཱུ ཝངྒཱིསསྶ པཊིབྷཱནསམྤཏྟིཾ ན ཛཱནནྟི, ཨཧམསྶ པཊིབྷཱནསམྤཏྟིཾ ཛཱནཱཔེསྶཱམཱི’’ཏི ཙིནྟེཏྭཱ ‘‘ཀིཾ ནུ ཁོ, ཝངྒཱིསཱ’’ཏིཨཱདིནཱ པུཙྪཏི། ཨུམྨགྒཔཐནྟི ཨནེཀཱནི ཀིལེསུཔྤཛྫནཔཐཱནི། ཝཊྚཔྤསུཏཔཐཏཱཡ ཧི པཐནྟི ཝུཏྟཾ། པབྷིཛྫ ཁཱིལཱནཱིཏི རཱགཱདིཁཱིལཱནི པཉྩ བྷིནྡིཏྭཱ ཙརསི། ཏཾ པསྶཐཱཏི ཨེཝཾ ཨབྷིབྷུཡྻ ཙ ཚིནྡིཏྭཱ ཙ ཙརནྟཾ བུདྡྷཾ པསྶཐ། བནྡྷཔམུཉྩཀརནྟི བནྡྷནམོཙནཀརཾ། ཨསིཏནྟི ཨནིསྶིཏཾ། བྷཱགསོ པཊིབྷཛྫཱཏི སཏིཔཊྛཱནཱདིཀོཊྛཱསཏོ དྷམྨཾ པཊིབྷཛྫནཱིཡཾ ཀཏྭཱ། པཝིབྷཛྫཱཏིཔི པཱཋོ། ཨུདྡེསཱདིཀོཊྛཱསཏོ པཀཱརེན ཝིབྷཛིཏྭཱ ཝིབྷཛིཏྭཱ དྷམྨཾ དེསེཏཱིཏི ཨཏྠོ།

    Ummaggapathantiādikā catasso gāthā bhagavatā ‘‘kiṃ nu te, vaṅgīsa, imā gāthāyo pubbe parivitakkitā, udāhu ṭhānaso cetā paṭibhantī’’ti pucchitena ṭhānaso paṭibhantīti dassentena vuttā. Kasmā panevaṃ taṃ bhagavā avoca? Saṅghamajjhe kira kathā udapādi – ‘‘vaṅgīsatthero vissaṭṭhagantho neva uddesena, na paripucchāya, na yonisomanasikārena kammaṃ karoti. Gāthaṃ bandhanto vaṇṇapadāni karonto vicaratī’’ti. Atha bhagavā ‘‘ime bhikkhū vaṅgīsassa paṭibhānasampattiṃ na jānanti, ahamassa paṭibhānasampattiṃ jānāpessāmī’’ti cintetvā ‘‘kiṃ nu kho, vaṅgīsā’’tiādinā pucchati. Ummaggapathanti anekāni kilesuppajjanapathāni. Vaṭṭappasutapathatāya hi pathanti vuttaṃ. Pabhijja khīlānīti rāgādikhīlāni pañca bhinditvā carasi. Taṃ passathāti evaṃ abhibhuyya ca chinditvā ca carantaṃ buddhaṃ passatha. Bandhapamuñcakaranti bandhanamocanakaraṃ. Asitanti anissitaṃ. Bhāgaso paṭibhajjāti satipaṭṭhānādikoṭṭhāsato dhammaṃ paṭibhajjanīyaṃ katvā. Pavibhajjātipi pāṭho. Uddesādikoṭṭhāsato pakārena vibhajitvā vibhajitvā dhammaṃ desetīti attho.

    ཨོགྷསྶཱཏི ཀཱམཱདིཙཏུརོགྷསྶ། ཨནེཀཝིཧིཏནྟི སཏིཔཊྛཱནཱདིཝསེན ཨནེཀཝིདྷཾ ཨཊྛཏིཾསཱཡ ཝཱ ཀམྨཊྛཱནཱནཾ ཝསེན ཨནེཀཔྤཀཱརཾ ཨམཏཱཝཧཾ མགྒཾ ཨཀྑཱསི ཨབྷཱསི། ཏསྨིཉྩ ཨམཏེ ཨཀྑཱཏེཏི ཏསྨིཾ ཏེན ཨཀྑཱཏེ ཨམཏེ ཨམཏཱཝཧེ། དྷམྨདསཱཏི དྷམྨསྶ པསྶིཏཱརོ། ཋིཏཱ ཨསཾཧཱིརཱཏི ཀེནཙི ཨསཾཧཱརིཡཱ ཧུཏྭཱ པཏིཊྛིཏཱ། ཨཏིཝིཛ྄ཛྷཱཏི ཨཏིཝིཛ྄ཛྷིཏྭཱ། སབྦཊྛིཏཱིནནྟི སབྦེསཾ དིཊྛིཊྛཱནཱནཾ ཝིཉྙཱཎཊྛིཏཱིནཾ ཝཱ། ཨཏིཀྐམམདྡསཱཏི ཨཏིཀྐམབྷཱུཏཾ ནིབྦཱནཾ ཨདྡས། ཨགྒནྟི ཨུཏྟམཾ དྷམྨཾ། ཨགྒེཏི ཝཱ པཱཋོ, པཋམཏརནྟི ཨཏྠོ། དསདྡྷཱནནྟི པཉྩཝགྒིཡཱནཾ ཨགྒཾ དྷམྨཾ, ཨགྒེ ཝཱ ཨཱདིཏོ དེསཡཱིཏི ཨཏྠོ།

    Oghassāti kāmādicaturoghassa. Anekavihitanti satipaṭṭhānādivasena anekavidhaṃ aṭṭhatiṃsāya vā kammaṭṭhānānaṃ vasena anekappakāraṃ amatāvahaṃ maggaṃ akkhāsi abhāsi. Tasmiñca amate akkhāteti tasmiṃ tena akkhāte amate amatāvahe. Dhammadasāti dhammassa passitāro. Ṭhitā asaṃhīrāti kenaci asaṃhāriyā hutvā patiṭṭhitā. Ativijjhāti ativijjhitvā. Sabbaṭṭhitīnanti sabbesaṃ diṭṭhiṭṭhānānaṃ viññāṇaṭṭhitīnaṃ vā. Atikkamamaddasāti atikkamabhūtaṃ nibbānaṃ addasa. Agganti uttamaṃ dhammaṃ. Aggeti vā pāṭho, paṭhamataranti attho. Dasaddhānanti pañcavaggiyānaṃ aggaṃ dhammaṃ, agge vā ādito desayīti attho.

    ཏསྨཱཏི ཡསྨཱ ‘‘ཨེས དྷམྨོ སུདེསིཏོ’’ཏི ཛཱནནྟེན པམཱདོ ན ཀཱཏབྦོ, ཏསྨཱ ཨནུསིཀྑེཏི ཏིསྶོ སིཀྑཱ ཝིཔསྶནཱཔཊིཔཱཊིཡཱ མགྒཔཊིཔཱཊིཡཱ ཙ སིཀྑེཡྻ།

    Tasmāti yasmā ‘‘esa dhammo sudesito’’ti jānantena pamādo na kātabbo, tasmā anusikkheti tisso sikkhā vipassanāpaṭipāṭiyā maggapaṭipāṭiyā ca sikkheyya.

    བུདྡྷཱནུབུདྡྷོཏིཨཱདིཀཱ ཏིསྶོ གཱཐཱ ཨཱཡསྨཏོ ཨཉྙཱཏཀོཎྜཉྙཏྠེརསྶ ཐོམནཝསེན ཝུཏྟཱ། ཏཏྠ བུདྡྷཱནུབུདྡྷོཏི བུདྡྷཱནཾ ཨནུབུདྡྷོ ། བུདྡྷཱ ཧི པཋམཾ ཙཏྟཱརི སཙྩཱནི བུཛ྄ཛྷིཾསུ, པཙྪཱ ཐེརོ སབྦཔཋམཾ, ཏསྨཱ བུདྡྷཱནུབུདྡྷོཏི། ཐིརེཧི སཱིལཀྑནྡྷཱདཱིཧི སམནྣཱགཏཏྟཱ ཐེརོ, ཨཀུཔྤདྷམྨོཏི ཨཏྠོ། ཏིབྦནིཀྐམོཏི དལ༹ྷཝཱིརིཡོ། སུཁཝིཧཱརཱནནྟི དིཊྛདྷམྨསུཁཝིཧཱརཱནཾ། ཝིཝེཀཱནནྟི ཏིཎྞམྤི ཝིཝེཀཱནཾ། སབྦསྶ ཏནྟི ཡཾ སབྦསཱཝཀེན པཏྟབྦཾ, ཨསྶ ཨནེན ཏཾ ཨནུཔྤཏྟཾ། ཨཔྤམཏྟསྶ སིཀྑཏོཏི ཨཔྤམཏྟེན ཧུཏྭཱ སིཀྑནྟེན།

    Buddhānubuddhotiādikā tisso gāthā āyasmato aññātakoṇḍaññattherassa thomanavasena vuttā. Tattha buddhānubuddhoti buddhānaṃ anubuddho . Buddhā hi paṭhamaṃ cattāri saccāni bujjhiṃsu, pacchā thero sabbapaṭhamaṃ, tasmā buddhānubuddhoti. Thirehi sīlakkhandhādīhi samannāgatattā thero, akuppadhammoti attho. Tibbanikkamoti daḷhavīriyo. Sukhavihārānanti diṭṭhadhammasukhavihārānaṃ. Vivekānanti tiṇṇampi vivekānaṃ. Sabbassa tanti yaṃ sabbasāvakena pattabbaṃ, assa anena taṃ anuppattaṃ. Appamattassa sikkhatoti appamattena hutvā sikkhantena.

    ཏེཝིཛྫོ ཙེཏོཔརིཡཀོཝིདོཏི ཚསུ ཨབྷིཉྙཱསུ ཙཏསྶོ ཝདཏི, ཨིཏརཱ དྭེ ཡདིཔི ན ཝུཏྟཱ, ཐེརོ པན ཚལ༹བྷིཉྙོཝ། ཡསྨཱ ཐེརཾ ཧིམཝནྟེ ཚདྡནྟདཧཏོ ཨཱགནྟྭཱ བྷགཝཏི པརམནིཔཙྩཀཱརཾ དསྶེཏྭཱ, ཝནྡནྟཾ དིསྭཱ པསནྣམཱནསེན བྷགཝཏོ སམྨུཁཱ ཐེརཾ ཨབྷིཏྠཝནྟེན ཨིམཱ གཱཐཱ ཝུཏྟཱ, ཏསྨཱ ‘‘ཀོཎྜཉྙོ བུདྡྷདཱཡཱདོ, པཱདེ ཝནྡཏི སཏྠུནོ’’ཏི ཝུཏྟཾ།

    Tevijjocetopariyakovidoti chasu abhiññāsu catasso vadati, itarā dve yadipi na vuttā, thero pana chaḷabhiññova. Yasmā theraṃ himavante chaddantadahato āgantvā bhagavati paramanipaccakāraṃ dassetvā, vandantaṃ disvā pasannamānasena bhagavato sammukhā theraṃ abhitthavantena imā gāthā vuttā, tasmā ‘‘koṇḍañño buddhadāyādo, pāde vandati satthuno’’ti vuttaṃ.

    ནགསྶ པསྶེཏིཨཱདིཀཱ ཏིསྶོ གཱཐཱ པཉྩཧི བྷིཀྑུསཏེཧི སདྡྷིཾ སབྦེཧེཝ ཨརཧནྟེཧི བྷགཝཏི ཀཱལ༹སིལཱཡཾ ཝིཧརནྟེ ཨཱཡསྨཱ མཧཱམོགྒལླཱནོ ཏེསཾ བྷིཀྑཱུནཾ ཙིཏྟཾ སམནྭེསནྟོ ཨརཧཏྟཕལཝིམུཏྟིཾ པསྶིཏྠ། ཏཾ དིསྭཱ ཨཱཡསྨཱ ཝངྒཱིསོ བྷགཝནྟཾ ཐེརེ ཙ ཨབྷིཏྠཝནྟོ ཨབྷཱསི། ཏཏྠ ནགསྶ པསྶེཏི ཨིསིགིལིཔབྦཏསྶ པསྶེ ཀཱལ༹སིལཱཡཾ། ཨཱསཱིནནྟི ནིསིནྣཾ།

    Nagassa passetiādikā tisso gāthā pañcahi bhikkhusatehi saddhiṃ sabbeheva arahantehi bhagavati kāḷasilāyaṃ viharante āyasmā mahāmoggallāno tesaṃ bhikkhūnaṃ cittaṃ samanvesanto arahattaphalavimuttiṃ passittha. Taṃ disvā āyasmā vaṅgīso bhagavantaṃ there ca abhitthavanto abhāsi. Tattha nagassa passeti isigilipabbatassa passe kāḷasilāyaṃ. Āsīnanti nisinnaṃ.

    ཙེཏསཱཏི ཨཏྟནོ ཙེཏོཔརིཡཉཱཎེན། ཙིཏྟཾ ནེསཾ སམནྭེསནྟི ཏེསཾ ཁཱིཎཱསཝབྷིཀྑཱུནཾ ཙིཏྟཾ སམནྭེསནྟོ། ཨནུཔརིཡེཏཱིཏི ཨནུཀྐམེན པརིཙྪིནྡཏི།

    Cetasāti attano cetopariyañāṇena. Cittaṃ nesaṃ samanvesanti tesaṃ khīṇāsavabhikkhūnaṃ cittaṃ samanvesanto. Anupariyetīti anukkamena paricchindati.

    ཨེཝཾ སབྦངྒསམྤནྣཾ ‘‘མུནིཾ དུཀྑསྶ པཱརགུ’’ནྟི ཝུཏྟཱཡ སཏྠུསམྤཏྟིཡཱ ཙེཝ ‘‘ཏེཝིཛྫཱ མཙྩུཧཱཡིནོ’’ཏི ཝུཏྟཱཡ སཱཝཀསམྤཏྟིཡཱ ཙཱཏི སབྦེཧི ཨངྒེཧི སམྤནྣཾ སམནྣཱགཏཾ། མུནིནྟི ཧི ཨིམིནཱ པདེན མོནསངྑཱཏེན ཉཱཎེན སཏྠུ ཨནཝསེསཉེཡྻཱཝབོདྷོ ཝུཏྟོཏི ཨནཱཝརཎཉཱཎེན དསབལཉཱཎཱདཱིནཾ སངྒཧོ ཀཏོ ཧོཏི, ཏེནསྶ ཉཱཎསམྤདཾ དསྶེཏི། དུཀྑསྶ པཱརགུནྟི ཨིམིནཱ པཧཱནསམྤདཾ། ཏདུབྷཡེན ཙ སཏྠུ ཨཱནུབྷཱཝསམྤདཱདཡོ དསྶིཏཱ ཧོནྟི། ཏེཝིཛྫཱ མཙྩུཧཱཡིནོཏི ཨིམིནཱ སཱཝཀཱནཾ ཉཱཎསམྤཏྟིདཱིཔནེན ཙ ནིབྦཱནདྷཱཏུཡཱ ཨདྷིགམདཱིཔནེན ཙ པདདྭཡེན སཏྠུསཱཝཀསམྤཏྟི དསྶིཏཱ ཧོཏི། ཏཐཱ ཧི ཡཐཱཝུཏྟམཏྠཾ པཱཀཊཏརཾ ཀཱཏུཾ ‘‘མུནིཾ དུཀྑསྶ པཱརགུཾ། ཨནེཀཱཀཱརསམྤནྣཾ, པཡིརུཔཱསནྟི གོཏམ’’ནྟི ཝུཏྟཾ། ཏཏྠ ཨནེཀཱཀཱརསམྤནྣནྟི ཨནེཀེཧི ཨཱཀཱརེཧི སམྤནྣཾ, ཨནེཀཱཀཱརགུཎསམནྣཱགཏནྟི ཨཏྠོ།

    Evaṃ sabbaṅgasampannaṃ ‘‘muniṃ dukkhassa pāragu’’nti vuttāya satthusampattiyā ceva ‘‘tevijjā maccuhāyino’’ti vuttāya sāvakasampattiyā cāti sabbehi aṅgehi sampannaṃ samannāgataṃ. Muninti hi iminā padena monasaṅkhātena ñāṇena satthu anavasesañeyyāvabodho vuttoti anāvaraṇañāṇena dasabalañāṇādīnaṃ saṅgaho kato hoti, tenassa ñāṇasampadaṃ dasseti. Dukkhassa pāragunti iminā pahānasampadaṃ. Tadubhayena ca satthu ānubhāvasampadādayo dassitā honti. Tevijjā maccuhāyinoti iminā sāvakānaṃ ñāṇasampattidīpanena ca nibbānadhātuyā adhigamadīpanena ca padadvayena satthusāvakasampatti dassitā hoti. Tathā hi yathāvuttamatthaṃ pākaṭataraṃ kātuṃ ‘‘muniṃ dukkhassa pāraguṃ. Anekākārasampannaṃ, payirupāsanti gotama’’nti vuttaṃ. Tattha anekākārasampannanti anekehi ākārehi sampannaṃ, anekākāraguṇasamannāgatanti attho.

    ཙནྡོ ཡཐཱཏི གཱཐཱ བྷགཝནྟཾ ཙམྤཱནགརེ གགྒརཱཡ པོཀྑརཎིཡཱ ཏཱིརེ མཧཏཱ བྷིཀྑུསངྒྷེན ཨནེཀེཧི ཙ དེཝནཱགསཧསྶེཧི པརིཝུཏཾ ཨཏྟནོ ཝཎྞེན ཙ ཡསསཱ ཙ ཝིརོཙམཱནཾ དིསྭཱ སོམནསྶཛཱཏེན ཨབྷིཏྠཝནྟེན ཝུཏྟཱ། ཏཏྠ ཙནྡོ ཡཐཱ ཝིགཏཝལཱཧཀེ ནབྷེཏི ཡཐཱ སརདསམཡེ ཨཔགཏཝལཱཧཀེ ཝལཱཧཀསདིསེན ཨཉྙེན ཙ མཧིཀཱདིནཱ ཨུཔཀྐིལེསེན ཝིམུཏྟེ ཨཱཀཱསེ པུཎྞཙནྡོ ཝིརོཙཏི, ཝཱིཏམལོཝ བྷཱཎུམཱཏི ཏེནེཝ ཝལཱཧཀཱདིཨུཔཀྐིལེསཝིགམེན ཝིགཏམལོ བྷཱཎུམཱ སཱུརིཡོ ཡཐཱ ཝིརོཙཏི། ཨེཝམྤི, ཨངྒཱིརས, ཏྭནྟི ཨེཝཾ ཨངྒེཧི ནིཙྪརཎཛུཏཱིཧི ཛུཏིམནྟ ཏྭམྤི མཧཱམུནི བྷགཝཱ, ཨཏིརོཙསི ཨཏྟནོ ཡསསཱ སདེཝཀཾ ལོཀཾ ཨཏིཀྐམིཏྭཱ ཝིརོཙསཱིཏི།

    Candoyathāti gāthā bhagavantaṃ campānagare gaggarāya pokkharaṇiyā tīre mahatā bhikkhusaṅghena anekehi ca devanāgasahassehi parivutaṃ attano vaṇṇena ca yasasā ca virocamānaṃ disvā somanassajātena abhitthavantena vuttā. Tattha cando yathā vigatavalāhake nabheti yathā saradasamaye apagatavalāhake valāhakasadisena aññena ca mahikādinā upakkilesena vimutte ākāse puṇṇacando virocati, vītamalova bhāṇumāti teneva valāhakādiupakkilesavigamena vigatamalo bhāṇumā sūriyo yathā virocati. Evampi, aṅgīrasa, tvanti evaṃ aṅgehi niccharaṇajutīhi jutimanta tvampi mahāmuni bhagavā, atirocasi attano yasasā sadevakaṃ lokaṃ atikkamitvā virocasīti.

    ཀཱཝེཡྻམཏྟཱཏིཨཱདིཀཱ དས གཱཐཱ ཨརཧཏྟཾ པཏྭཱ ཨཏྟནོ པཊིཔཏྟིཾ པཙྩཝེཀྑིཏྭཱ སཏྠུ ཨཏྟནོ ཙ གུཎེ ཝིབྷཱཝེནྟེན ཝུཏྟཱ། ཏཏྠ ཀཱཝེཡྻམཏྟཱཏི ཀཱཝེཡྻེན ཀབྦཀརཎེན མཏྟཱ མཱནིཏཱ སམྦྷཱཝིཏཱ གུཎོདཡཾ ཨཱཔནྣཱ། ཨདྡསཱམཱཏི ཨདྡསིམྷཱ།

    Kāveyyamattātiādikā dasa gāthā arahattaṃ patvā attano paṭipattiṃ paccavekkhitvā satthu attano ca guṇe vibhāventena vuttā. Tattha kāveyyamattāti kāveyyena kabbakaraṇena mattā mānitā sambhāvitā guṇodayaṃ āpannā. Addasāmāti addasimhā.

    ཨདྡྷཱ ནོ ཨུདཔཛྫཐཱཏི རཏནཏྟཡཾ ཨདྡྷཱ ཨམྷཱཀཾ ཨུཔཀཱརཏྠཱཡ ཨུཔྤཛྫི།

    Addhā no udapajjathāti ratanattayaṃ addhā amhākaṃ upakāratthāya uppajji.

    ཝཙནནྟི སཙྩཔཊིསཾཡུཏྟཾ དྷམྨཀཐཾ། ཁནྡྷེ ཨཱཡཏནཱནི ཙ དྷཱཏུཡོ ཙཱཏི པཉྩཀྑནྡྷེ དྭཱདསཱཡཏནཱནི, ཨཊྛཱརས དྷཱཏུཡོ ཙ། ཨིམསྨིཾ ཋཱནེ ཁནྡྷཱདིཀཐཱ ཝཏྟབྦཱ། སཱ ཝིསུདྡྷིམགྒེ (ཝིསུདྡྷི॰ ༢.༤༢༡ ཨཱདཡོ) ཝིཏྠཱརིཏཱ ཨེཝཱཏི ཏཏྠ ཝུཏྟནཡེནེཝ ཝེདིཏབྦཱ། ཝིདིཏྭཱནཱཏི རཱུཔཱདིཝིབྷཱགཱདིཏོ ཨནིཙྩཏཱདིཏོ ཙ པུབྦབྷཱགཉཱཎེན ཛཱནིཏྭཱ།

    Vacananti saccapaṭisaṃyuttaṃ dhammakathaṃ. Khandhe āyatanāni ca dhātuyo cāti pañcakkhandhe dvādasāyatanāni, aṭṭhārasa dhātuyo ca. Imasmiṃ ṭhāne khandhādikathā vattabbā. Sā visuddhimagge (visuddhi. 2.421 ādayo) vitthāritā evāti tattha vuttanayeneva veditabbā. Viditvānāti rūpādivibhāgādito aniccatādito ca pubbabhāgañāṇena jānitvā.

    ཡེ ཏེ སཱསནཀཱརཀཱཏི ཡེ ཏེ སཏྟཱ ཏཐཱགཏཱནཾ སཱསནཀཱརཀཱ, ཏེསཾ བཧཱུནཾ ཨཏྠཱཡ ཝཏ ཨུཔྤཛྫནྟི ཏཐཱགཏཱ།

    Ye te sāsanakārakāti ye te sattā tathāgatānaṃ sāsanakārakā, tesaṃ bahūnaṃ atthāya vata uppajjanti tathāgatā.

    ཡེ ནིཡཱམགཏདྡསཱཏི ནིཡཱམོ ཨེཝ ནིཡཱམགཏཾ, ཡེ བྷིཀྑཱུ བྷིཀྑུནིཡོ ཙ སམྨཏྟནིཡཱམཾ ཨདྡསཾསུ ཨདྷིགཙྪིཾསུ། ཏེསཾ ཨཏྠཱཡ ཝཏ བོདྷིཾ སམྨཱསམྦོདྷིཾ ཨཛ྄ཛྷགམཱ, མུནི བྷགཝཱཏི ཡོཛནཱ།

    Yeniyāmagataddasāti niyāmo eva niyāmagataṃ, ye bhikkhū bhikkhuniyo ca sammattaniyāmaṃ addasaṃsu adhigacchiṃsu. Tesaṃ atthāya vata bodhiṃ sammāsambodhiṃ ajjhagamā, muni bhagavāti yojanā.

    སུདེསིཏཱཏི ཝེནེཡྻཛ྄ཛྷཱསཡཱནུརཱུཔཾ སངྑེཔཏོ ཝིཏྠཱརཏོ ཙ སུཊྛུ དེསིཏཱ། ཙཀྑུམཏཱཏི པཉྩཧི ཙཀྑཱུཧི ཙཀྑུམཏཱ། ཨཏྟཧིཏཀཱམེཧི ཨརཎཱིཡཱནི ཀརཎཱིཡཱནི ཨརིཡབྷཱཝཀརཱནི, ཨརིཡསྶ ཝཱ བྷགཝཏོ སཙྩཱནཱིཏི ཨརིཡསཙྩཱནི། དུཀྑནྟིཨཱདི ཏེསཾ ཨརིཡསཙྩཱནཾ སརཱུཔདསྶནཾ ། ཨིམསྨིཾ ཋཱནེ ཨརིཡསཙྩཀཐཱ ཝཏྟབྦཱ, སཱ སབྦཱཀཱརཏོ ཝིསུདྡྷིམགྒེ (ཝིསུདྡྷི॰ ༢.༥༢༩ ཨཱདཡོ) ཝིཏྠཱརིཏཱཏི ཏཏྠ ཝུཏྟནཡེནེཝ ཝེདིཏབྦཱ། ཨེཝམེཏེ ཏཐཱཏི ཨེཏེ དུཀྑཱདཡོ ཨརིཡསཙྩདྷམྨཱ ཨེཝཾ དུཀྑཱདིཔྤཀཱརེན ཏཐཱ ཨཝིཏཐཱ ཨནཉྙཐཱ། ཝུཏྟཱ དིཊྛཱ མེ ཏེ ཡཐཱ ཏཐཱཏི ཡཐཱ སཏྠཱརཱ ཝུཏྟཱ, ཏཐཱ མཡཱ དིཊྛཱ, ཨརིཡམགྒཉཱཎེན པཊིཝིདྡྷཏྟཱ ཨེཝཾ ཏེསཾ། སདཏྠོ མེ ཨནུཔྤཏྟོ ཨརཧཏྟཾ མཡཱ སཙྪིཀཏཾ། ཏཏོ ཙ ཀཏཾ བུདྡྷསྶ བྷགཝཏོ སཱསནཾ ཨོཝཱདཱནུསིཊྛིཡཾ ཨནུཔཏིཊྛོ།

    Sudesitāti veneyyajjhāsayānurūpaṃ saṅkhepato vitthārato ca suṭṭhu desitā. Cakkhumatāti pañcahi cakkhūhi cakkhumatā. Attahitakāmehi araṇīyāni karaṇīyāni ariyabhāvakarāni, ariyassa vā bhagavato saccānīti ariyasaccāni. Dukkhantiādi tesaṃ ariyasaccānaṃ sarūpadassanaṃ . Imasmiṃ ṭhāne ariyasaccakathā vattabbā, sā sabbākārato visuddhimagge (visuddhi. 2.529 ādayo) vitthāritāti tattha vuttanayeneva veditabbā. Evamete tathāti ete dukkhādayo ariyasaccadhammā evaṃ dukkhādippakārena tathā avitathā anaññathā. Vuttā diṭṭhā me te yathā tathāti yathā satthārā vuttā, tathā mayā diṭṭhā, ariyamaggañāṇena paṭividdhattā evaṃ tesaṃ. Sadattho me anuppatto arahattaṃ mayā sacchikataṃ. Tato ca kataṃ buddhassa bhagavato sāsanaṃ ovādānusiṭṭhiyaṃ anupatiṭṭho.

    སྭཱགཏཾ ཝཏ མེ ཨཱསཱིཏི སུཨཱགམནཾ ཝཏ མེ ཨཧོསི། མམ བུདྡྷསྶ སནྟིཀེཏི མམ སམྦུདྡྷསྶ བྷགཝཏོ སནྟིཀེ སམཱིཔེ།

    Svāgataṃ vata me āsīti suāgamanaṃ vata me ahosi. Mama buddhassa santiketi mama sambuddhassa bhagavato santike samīpe.

    ཨབྷིཉྙཱཔཱརམིཔྤཏྟོཏི ཚནྣམྤི ཨབྷིཉྙཱནཾ པཱརམིཾ, ཨུཀྐཾསཾ ཨདྷིགཏོ། ཨིམིནཱ ཧི པདེན ཝུཏྟམེཝཏྠཾ ཝིཝརིཏུཾ ‘‘སོཏདྷཱཏུ ཝིསོདྷིཏཱ’’ཏིཨཱདི ཝུཏྟཾ།

    Abhiññāpāramippattoti channampi abhiññānaṃ pāramiṃ, ukkaṃsaṃ adhigato. Iminā hi padena vuttamevatthaṃ vivarituṃ ‘‘sotadhātu visodhitā’’tiādi vuttaṃ.

    པུཙྪཱམི སཏྠཱརནྟིཨཱདིཀཱ དྭཱདས གཱཐཱ ཨཏྟནོ ཨུཔཛ྄ཛྷཱཡསྶ པརིནིབྦུཏབྷཱཝཾ པུཙྪནྟེན ཝུཏྟཱ། ཨཱཡསྨཏོ ནིགྲོདྷཀཔྤཏྠེརསྶ ཧི པརིནིབྦཱནཀཱལེ ཨཱཡསྨཱ ཝངྒཱིསོ ཨསམྨུཁཱ ཨཧོསི། དིཊྛཔུབྦཉྩ ཏེན ཏསྶ ཧཏྠཀུཀྐུཙྩཱདི, པུབྦཝཱསནཱཝསེན ཧི ཏཱདིསཉྩ ཨཱཡསྨཏོ པིལིནྡཝཙྪསྶ ཝསལཝཱདེན སམུདཱཙཱརོ ཝིཡ ཁཱིཎཱསཝཱནམྤི ཧོཏིཡེཝ། ཏེན ‘‘པརིནིབྦུཏོ ནུ ཁོ མེ ཨུཔཛ྄ཛྷཱཡོ, ཨུདཱཧུ ནོ’’ཏི ཨུཔྤནྣཔརིཝིཏཀྐོ སཏྠཱརཾ པུཙྪི། ཏེན ཝུཏྟཾ – ‘‘ཨུཔཛ྄ཛྷཱཡསྶ པརིནིབྦུཏབྷཱཝཾ པུཙྪནྟེན ཝུཏྟཱ’’ཏི། ཏཏྠ སཏྠཱརནྟི དིཊྛདྷམྨིཀཱདཱིཧི ཝེནེཡྻཱནཾ ཨནུསཱསཀཾ། ཨནོམཔཉྙནྟི ཨོམཾ ཝུཙྩཏི པརིཏྟཾ ལཱམཀཾ། ན ཨོམཔཉྙཾ ཨནོམཔཉྙཾ, མཧཱཔཉྙནྟི ཨཏྠོ། དིཊྛེཝ དྷམྨེཏི པཙྩཀྑམེཝ, ཨིམསྨིཾཡེཝ ཨཏྟབྷཱཝེཏི ཨཏྠོ། ཝིཙིཀིཙྪཱནནྟི སཾསཡཱནཾ ཨེཝརཱུཔཱནཾ ཝཱ པརིཝིཏཀྐཱནཾ ཚེཏྟཱ། ཨགྒཱལ༹ཝེཏི ཨགྒཱལ༹ཝཙེཏིཡསངྑཱཏེ ཝིཧཱརེ། ཉཱཏོཏི པཱཀཊོ། ཡསསྶཱིཏི ལཱབྷསཀྐཱརསམྤནྣོ། ཨབྷིནིབྦུཏཏྟོཏི ཨུཔསནྟསབྷཱཝོ ཨཔརིཌཡ྄ཧམཱནཙིཏྟོ།

    Pucchāmi satthārantiādikā dvādasa gāthā attano upajjhāyassa parinibbutabhāvaṃ pucchantena vuttā. Āyasmato nigrodhakappattherassa hi parinibbānakāle āyasmā vaṅgīso asammukhā ahosi. Diṭṭhapubbañca tena tassa hatthakukkuccādi, pubbavāsanāvasena hi tādisañca āyasmato pilindavacchassa vasalavādena samudācāro viya khīṇāsavānampi hotiyeva. Tena ‘‘parinibbuto nu kho me upajjhāyo, udāhu no’’ti uppannaparivitakko satthāraṃ pucchi. Tena vuttaṃ – ‘‘upajjhāyassa parinibbutabhāvaṃ pucchantena vuttā’’ti. Tattha satthāranti diṭṭhadhammikādīhi veneyyānaṃ anusāsakaṃ. Anomapaññanti omaṃ vuccati parittaṃ lāmakaṃ. Na omapaññaṃ anomapaññaṃ, mahāpaññanti attho. Diṭṭheva dhammeti paccakkhameva, imasmiṃyeva attabhāveti attho. Vicikicchānanti saṃsayānaṃ evarūpānaṃ vā parivitakkānaṃ chettā. Aggāḷaveti aggāḷavacetiyasaṅkhāte vihāre. Ñātoti pākaṭo. Yasassīti lābhasakkārasampanno. Abhinibbutattoti upasantasabhāvo apariḍayhamānacitto.

    ཏཡཱ ཀཏནྟི ཏཱདིསེ ཚཱཡཱསམྤནྣེ ནིགྲོདྷརུཀྑམཱུལེ ནིསིནྣཏྟཱ ‘‘ནིགྲོདྷཀཔྤོ’’ཏི ཏཡཱ ཀཏཾ ནཱམཾ། ཨིཏི སོ ཡཐཱ ཨཏྟནཱ ཨུཔལཀྑིཏཾ ཏཐཱ ཝདཏི། བྷགཝཱ པན ན ནིསིནྣཏྟཱ ཨེཝ ཏཾ ཏཐཱ ཨཱལཔཏི, ཨཔི ཙ ཁོ ཏཏྠ ཨརཧཏྟཾ པཏྟཏྟཱཔི། བྲཱཧྨཎསྶཱཏི ཛཱཏིཾ སནྡྷཱཡ ཝདཏི། སོ ཀིར བྲཱཧྨཎམཧཱསཱལཀུལཱ པབྦཛིཏོ། ནམསྶཾ ཨཙརིནྟི ནམསྶམཱནོ ཝིཧཱསིཾ། མུཏྱཔེཁོཏི ནིབྦཱནེ པཏིཊྛིཏོ།

    Tayā katanti tādise chāyāsampanne nigrodharukkhamūle nisinnattā ‘‘nigrodhakappo’’ti tayā kataṃ nāmaṃ. Iti so yathā attanā upalakkhitaṃ tathā vadati. Bhagavā pana na nisinnattā eva taṃ tathā ālapati, api ca kho tattha arahattaṃ pattattāpi. Brāhmaṇassāti jātiṃ sandhāya vadati. So kira brāhmaṇamahāsālakulā pabbajito. Namassaṃ acarinti namassamāno vihāsiṃ. Mutyapekhoti nibbāne patiṭṭhito.

    དལ༹ྷདྷམྨདསྶཱིཏི བྷགཝནྟཾ ཨཱལཔཏི། དལ༹ྷདྷམྨཉྷི ནིབྦཱནཾ ཨབྷིཛྫནཊྛེན, ཏཉྩ བྷགཝཱ པསྶི དསྶེསི ཙ།

    Daḷhadhammadassīti bhagavantaṃ ālapati. Daḷhadhammañhi nibbānaṃ abhijjanaṭṭhena, tañca bhagavā passi dassesi ca.

    སཀྐཱཏིཔི བྷགཝནྟམེཝ ཀུལནཱམེན ཨཱལཔཏི། མཡམྤི སབྦེཏི, ནིརཝསེསཔརིསཾ སངྒཎྷིཏྭཱ ཨཏྟཱནཾ དསྶེནྟོ ཝདཏི། སམནྟཙཀྑཱུཏིཔི བྷགཝནྟམེཝ སབྦཉྙུཏཉྙཱཎེན ཨཱལཔཏི། སམཝཊྛིཏཱཏི སམྨཱ ཨཝཊྛིཏཱ, ཨཱབྷོགཾ ཀཏྭཱ ཋིཏཱ། ནོཏི ཨམྷཱཀཾ། སཝནཱཡཱཏི ཨིམསྶ པཉྷསྶ ཝེཡྻཱཀརཎཾ སཝནཏྠཱཡ། སོཏཱཏི སོཏདྷཱཏུཡཱ། ཏུཝཾ ནོ སཏྠཱ ཏྭམནུཏྟརོསཱིཏི ཐུཏིཝཙནཝསེན ཝདཏི།

    Sakkātipi bhagavantameva kulanāmena ālapati. Mayampi sabbeti, niravasesaparisaṃ saṅgaṇhitvā attānaṃ dassento vadati. Samantacakkhūtipi bhagavantameva sabbaññutaññāṇena ālapati. Samavaṭṭhitāti sammā avaṭṭhitā, ābhogaṃ katvā ṭhitā. Noti amhākaṃ. Savanāyāti imassa pañhassa veyyākaraṇaṃ savanatthāya. Sotāti sotadhātuyā. Tuvaṃ no satthā tvamanuttarosīti thutivacanavasena vadati.

    ཚིནྡ ནོ ཝིཙིཀིཙྪནྟི ཝིཙིཀིཙྪཱཔཊིརཱུཔཀཾ ཏཾ པརིཝིཏཀྐཾ སནྡྷཱཡཱཧ། ཨཀུསལཝིཙིཀིཙྪཱཡ པན ཐེརོ ནིབྦིཙིཀིཙྪོཝ། བྲཱུཧི མེཏནྟི བྲཱུཧི མེ ཨེཏཾ། ཡཾ མཡཱ ཡཱཙིཏོསི ‘‘ཏཾ སཱཝཀཾ, སཀྐ, མཡམྤི སབྦེ ཨཉྙཱཏུམིཙྪཱམཱ’’ཏི ཡཱཙིཏོཝ, ཏཾ བྲཱཧྨཎཾ པརིནིབྦུཏཾ ཝེདཡ བྷཱུརིཔཉྙ། མཛ྄ཛྷེཝ ནོ བྷཱསཱ’’ཏི པརིནིབྦུཏཾ ཛཱནིཏྭཱ མཧཱཔཉྙ བྷགཝཱ མཛ྄ཛྷེཝ ཨམྷཱཀཾ སབྦེསཾ བྷཱས, ཡཐཱ སབྦེ མཡཾ ཛཱནེཡྻཱམ། སཀྐོཝ དེཝཱན སཧསྶནེཏྟོཏི , ཨིདཾ པན ཐུཏིཝཙནམེཝ། ཨཔིཙེཏྠ ཨཡམདྷིཔྤཱཡོ – ཡཐཱ སཀྐོ སཧསྶནེཏྟོ དེཝཱནཾ མཛ྄ཛྷེ ཏེཧི སཀྐཙྩཾ སམྤཊིཙྪིཏཝཙནཾ བྷཱསཏི, ཨེཝཾ ཨམྷཱཀཾ མཛ྄ཛྷེ ཨམྷེཧི སམྤཊིཙྪིཏཝཙནཾ བྷཱསཱཏི།

    Chinda no vicikicchanti vicikicchāpaṭirūpakaṃ taṃ parivitakkaṃ sandhāyāha. Akusalavicikicchāya pana thero nibbicikicchova. Brūhi metanti brūhi me etaṃ. Yaṃ mayā yācitosi ‘‘taṃ sāvakaṃ, sakka, mayampi sabbe aññātumicchāmā’’ti yācitova, taṃ brāhmaṇaṃ parinibbutaṃ vedaya bhūripañña. Majjheva no bhāsā’’ti parinibbutaṃ jānitvā mahāpañña bhagavā majjheva amhākaṃ sabbesaṃ bhāsa, yathā sabbe mayaṃ jāneyyāma. Sakkova devāna sahassanettoti , idaṃ pana thutivacanameva. Apicettha ayamadhippāyo – yathā sakko sahassanetto devānaṃ majjhe tehi sakkaccaṃ sampaṭicchitavacanaṃ bhāsati, evaṃ amhākaṃ majjhe amhehi sampaṭicchitavacanaṃ bhāsāti.

    ཡེ ཀེཙཱིཏི ཨིམམྤི གཱཐཾ བྷགཝནྟཾ ཐུནནྟོ ཝཏྟུཀཱམཏཾ ཛནེཏུཾ བྷཎཏི། ཏསྶཏྠོ – ཡེ ཀེཙི ཨབྷིཛ྄ཛྷཱདཡོ གནྠཱ, ཏེསཾ ཨཔྤཧཱནེ སཏི མོཧཝིཙིཀིཙྪཱནཾ པཧཱནཱབྷཱཝཏོ མོཧམགྒཱཏི ཙ, ཨཉྙཱཎཔཀྑཱཏི ཙ, ཝིཙིཀིཙྪཋཱནཱཏི ཙ ཝུཙྩནྟི། སབྦེ ཏེ ཏཐཱགཏཾ པཏྭཱ ཏཐཱགཏསྶ དེསནཱབལེན ཝིདྡྷཾསིཏཱ བྷཝནྟི, ནསྶནྟི། ཀིཾཀཱརཎནྟི? ཙཀྑུཉྷི ཨེཏཾ པརམཾ ནརཱནཾ, ཡསྨཱ ཏཐཱགཏོ སབྦགནྠཝིདྷམནེན པཉྙཱཙཀྑུཛནནཏོ ནརཱནཾ པརམཾ ཙཀྑུནྟི ཝུཏྟཾ ཧོཏི།

    Ye kecīti imampi gāthaṃ bhagavantaṃ thunanto vattukāmataṃ janetuṃ bhaṇati. Tassattho – ye keci abhijjhādayo ganthā, tesaṃ appahāne sati mohavicikicchānaṃ pahānābhāvato mohamaggāti ca, aññāṇapakkhāti ca, vicikicchaṭhānāti ca vuccanti. Sabbe te tathāgataṃ patvā tathāgatassa desanābalena viddhaṃsitā bhavanti, nassanti. Kiṃkāraṇanti? Cakkhuñhi etaṃ paramaṃ narānaṃ, yasmā tathāgato sabbaganthavidhamanena paññācakkhujananato narānaṃ paramaṃ cakkhunti vuttaṃ hoti.

    ནོ ཙེ ཧི ཛཱཏཱུཏི ཨིམམྤི གཱཐཾ ཐུནནྟོ ཨེཝ ཝཏྟུཀཱམཏཾ ཛནེནྟོ བྷཎཏི། ཏཏྠ ཛཱཏཱུཏི ཨེཀཾསཝཙནཾ། པུརིསོཏི བྷགཝནྟཾ སནྡྷཱཡཱཧ། ཛོཏིམནྟོཏི པཉྙཱཛོཏིསམྤནྣཱ སཱརིཔུཏྟཱདཡོ། ཨིདཾ ཝུཏྟཾ ཧོཏི – ཡདི བྷགཝཱ པུརཏྠིམཱདིབྷེདོ ཝཱཏོ ཝིཡ ཨབྦྷགྷནཾ དེསནཱཝེགེན ཀིལེསེ ཝིཧནེཡྻ, ཏཏོ ཡཐཱ ཨབྦྷགྷནནིཝུཏོ ལོཀོ ཏམོཝ ཧོཏི ཨེཀནྡྷཀཱརོ, ཨེཝཾ སབྦོཔི ལོཀོ ཨཉྙཱཎནིཝུཏོ ཏམོཝ སིཡཱ། ཡེ ཙཱཔི ཨིམེ ཨིདཱནི ཛོཏིམནྟོ ཁཱཡནྟི སཱརིཔུཏྟཱདཡོ, ཏེཔི ན བྷཱསེཡྻུཾ, ན དཱིཔེཡྻུནྟི།

    No ce hi jātūti imampi gāthaṃ thunanto eva vattukāmataṃ janento bhaṇati. Tattha jātūti ekaṃsavacanaṃ. Purisoti bhagavantaṃ sandhāyāha. Jotimantoti paññājotisampannā sāriputtādayo. Idaṃ vuttaṃ hoti – yadi bhagavā puratthimādibhedo vāto viya abbhaghanaṃ desanāvegena kilese vihaneyya, tato yathā abbhaghananivuto loko tamova hoti ekandhakāro, evaṃ sabbopi loko aññāṇanivuto tamova siyā. Ye cāpi ime idāni jotimanto khāyanti sāriputtādayo, tepi na bhāseyyuṃ, na dīpeyyunti.

    དྷཱིརཱ ཙཱཏི ཨིམམྤི གཱཐཾ པུརིམནཡེནེཝཱཧ། ཏསྶཏྠོ – དྷཱིརཱ ཙ པཎྜིཏཔུརིསཱ, པཛྫོཏཀརཱ བྷཝནྟི པཉྙཱཔཛྫོཏཾ ཨུཔྤཱདེནྟི། ཏཾ ཏསྨཱ ཨཧཾ ཏཾ ཝཱིར པདྷཱནཝཱིརིཡསམནྣཱགཏ བྷགཝཱ, ཏཐེཝ མཉྙེ དྷཱིརོ པཛྫོཏཀརོཏྭེཝ མཉྙཱམི། མཡམྤི ཝིཔསྶིནཾ སབྦདྷམྨེ ཡཐཱབྷཱུཏཾ པསྶནྟཾ བྷགཝནྟཾ ཛཱནནྟཱ ཨེཝ ཨུཔཱགམིམྷཱ། ཏསྨཱ ‘‘པརིསཱསུ ནོ ཨཱཝིཀརོཧི ཀཔྤཾ པརིནིབྦུཏོཝ ཡཐཱ ནིགྲོདྷཀཔྤཾ ཨཱཝིཀརོཧི པཀཱསེཧཱི’’ཏི།

    Dhīrā cāti imampi gāthaṃ purimanayenevāha. Tassattho – dhīrā ca paṇḍitapurisā, pajjotakarā bhavanti paññāpajjotaṃ uppādenti. Taṃ tasmā ahaṃ taṃ vīra padhānavīriyasamannāgata bhagavā, tatheva maññe dhīro pajjotakarotveva maññāmi. Mayampi vipassinaṃ sabbadhamme yathābhūtaṃ passantaṃ bhagavantaṃ jānantā eva upāgamimhā. Tasmā ‘‘parisāsu no āvikarohi kappaṃ parinibbutova yathā nigrodhakappaṃ āvikarohi pakāsehī’’ti.

    ཁིཔྤནྟི ཨིམམྤི གཱཐཾ པུརིམནཡེནེཝ ཨཱཧ། ཏསྶཏྠོ – བྷགཝཱ ཁིཔྤཾ གིརཾ ཨེརཡ ཝགྒུ ཝགྒུཾ ཨཙིརཱཡམཱནོ ཝཱཙཾ བྷཱས ཝགྒུ མནོཧརཾ། ཧཾསོཝ ཡཐཱ སུཝཎྞཧཾསོ གོཙརཾ པརིགྒཎྷནྟོ ཛཱཏསྶརཝནསཎྜཾ དིསྭཱ གཱིཝཾ པགྒཡ྄ཧ པཀྑེ ཨུདྡྷུནིཏྭཱ ཧཊྛཏུཊྛོ སཎིཀཾ ཨཏརམཱནོ ཝགྒུཾ ནིཀཱུཛཏི གིརཾ ནིཙྪཱརེཏི, ཨེཝམེཝཾ ཏྭཾ སཎིཀཾ ནིཀཱུཛ ཨིམིནཱ མཧཱཔུརིསལཀྑཎཉྙཏརེན བིནྡུསྶརེན སུཊྛུ ཝིཀཔྤིཏེན ཨབྷིསངྑཏེན, ཨེཏེ མཡཾ སབྦེ ཨུཛུགཏཱ ཨཝིཀྑིཏྟམཱནསཱ ཧུཏྭཱ ཏཝ ནིཀཱུཛཾ སུཎོམཱཏི།

    Khippanti imampi gāthaṃ purimanayeneva āha. Tassattho – bhagavā khippaṃ giraṃ eraya vaggu vagguṃ acirāyamāno vācaṃ bhāsa vaggu manoharaṃ. Haṃsova yathā suvaṇṇahaṃso gocaraṃ pariggaṇhanto jātassaravanasaṇḍaṃ disvā gīvaṃ paggayha pakkhe uddhunitvā haṭṭhatuṭṭho saṇikaṃ ataramāno vagguṃ nikūjati giraṃ nicchāreti, evamevaṃ tvaṃ saṇikaṃ nikūja iminā mahāpurisalakkhaṇaññatarena bindussarena suṭṭhu vikappitena abhisaṅkhatena, ete mayaṃ sabbe ujugatā avikkhittamānasā hutvā tava nikūjaṃ suṇomāti.

    པཧཱིནཛཱཏིམརཎནྟི , ཨིདམྤི པུརིམནཡེནེཝ ཨཱཧ། ཏཏྠ ན སིསྶཏཱིཏི ཨསེསོ, ཏཾ ཨསེསཾ, སོཏཱཔནྣཱདཡོ ཝིཡ ཀིཉྩི ཨསེསེཏྭཱ པཧཱིནཛཱཏིམརཎནྟི ཝུཏྟཾ ཧོཏི། ནིགྒཡ྄ཧཱཏི ནིབནྡྷིཏྭཱ, དྷོནནྟི དྷུཏསབྦཔཱཔཾ། ཝདེསྶཱམཱིཏི ཀཐཱཔེསྶཱམི དྷམྨཾ། ན ཀཱམཀཱརོ ཧོཧི པུཐུཛྫནཱནནྟི པུཐུཛྫནསེཀྑཱདཱིནཾ ཏིཝིདྷཱནཾ ཛནཱནཾ ཀཱམཀཱརོ ནཏྠི, ཏེ ཡཾ ཨིཙྪནྟི ཉཱཏུཾ ཝཱ ཝཏྟུཾ ཝཱ, ཏཾ ན སཀྐོནྟི། སངྑེཡྻཀཱརོ ཙ ཏཐཱགཏཱནནྟི ཏཐཱགཏཱནཾ པན ཝཱིམཾསཀཱརོ པཉྙཱཔུབྦངྒམཀིརིཡཱ, ཏེ ཡཾ ཨིཙྪནྟི ཉཱཏུཾ ཝཱ ཝཏྟུཾ ཝཱ, ཏཾ སཀྐོནྟིཡེཝཱཏི ཨདྷིཔྤཱཡོ།

    Pahīnajātimaraṇanti , idampi purimanayeneva āha. Tattha na sissatīti aseso, taṃ asesaṃ, sotāpannādayo viya kiñci asesetvā pahīnajātimaraṇanti vuttaṃ hoti. Niggayhāti nibandhitvā, dhonanti dhutasabbapāpaṃ. Vadessāmīti kathāpessāmi dhammaṃ. Na kāmakāro hohi puthujjanānanti puthujjanasekkhādīnaṃ tividhānaṃ janānaṃ kāmakāro natthi, te yaṃ icchanti ñātuṃ vā vattuṃ vā, taṃ na sakkonti. Saṅkheyyakāro ca tathāgatānanti tathāgatānaṃ pana vīmaṃsakāro paññāpubbaṅgamakiriyā, te yaṃ icchanti ñātuṃ vā vattuṃ vā, taṃ sakkontiyevāti adhippāyo.

    ཨིདཱནི ཏཾ སངྑེཡྻཀཱརཾ པཀཱསེནྟོ ‘‘སམྤནྣཝེཡྻཱཀརཎ’’ནྟི གཱཐམཱཧ། ཏསྶཏྠོ – ཏཐཱ ཧི ཏཝ བྷགཝཱ ཨིདཾ སམུཛྫུཔཉྙསྶ སབྦཏྠ ཨཔྤཊིཧཏབྷཱཝེན ཨུཛུགཏཔཉྙསྶ སམྨདེཝ ཝུཏྟཾ པཝཏྟིཏཾ སམྤནྣཝེཡྻཱཀརཎཾ ‘‘སནྟཏིམཧཱམཏྟོ སཏྟཏཱལམཏྟཾ ཨབྦྷུགྒནྟྭཱ པརིནིབྦཱཡིསྶཏི, སུཔྤབུདྡྷོ སཀྐོ སཏྟམེ དིཝསེ པཐཝིཾ པཝིསིསྶཏཱི’’ཏི ཨེཝམཱདིཾ སམུགྒཧིཏཾ སམྨདེཝ ཨུགྒཧིཏཾ ཨཝིཔརཱིཏཾ དིཊྛཾ, པུན སུཊྛུཏརཾ ཨཉྫལིཾ པཎཱམེཏྭཱ ཨཱཧ། ཨཡམཉྫལི པཙྪིམོ སུཔྤཎཱམིཏོཏི ཨཡཾ ཨཔརོཔི ཨཉྫལི སུཊྛུཏརཾ པཎཱམིཏོ། མཱ མོཧཡཱི ཛཱནནྟི མཱ ནོ ཨཝཙནེན མོཧཡི, ཛཱནནྟོ ཏསྶ གཏིཾ། ཨནོམཔཉྙཱཏི བྷགཝནྟཾ ཨཱལཔཏི།

    Idāni taṃ saṅkheyyakāraṃ pakāsento ‘‘sampannaveyyākaraṇa’’nti gāthamāha. Tassattho – tathā hi tava bhagavā idaṃ samujjupaññassa sabbattha appaṭihatabhāvena ujugatapaññassa sammadeva vuttaṃ pavattitaṃ sampannaveyyākaraṇaṃ ‘‘santatimahāmatto sattatālamattaṃ abbhuggantvā parinibbāyissati, suppabuddho sakko sattame divase pathaviṃ pavisissatī’’ti evamādiṃ samuggahitaṃ sammadeva uggahitaṃ aviparītaṃ diṭṭhaṃ, puna suṭṭhutaraṃ añjaliṃ paṇāmetvā āha. Ayamañjali pacchimo suppaṇāmitoti ayaṃ aparopi añjali suṭṭhutaraṃ paṇāmito. Mā mohayī jānanti mā no avacanena mohayi, jānanto tassa gatiṃ. Anomapaññāti bhagavantaṃ ālapati.

    པརོཔརནྟི ཨིམཾ པན གཱཐཾ ཨཔརེནཔི པརིཡཱཡེན ཨམོཧནམེཝ ཡཱཙནྟོ ཨཱཧ། ཏཏྠ པརོཔརནྟི ལོཀུཏྟརལོཀིཡཝསེན སུནྡརཱསུནྡརཾ དཱུརེ སནྟིཀེ ཝཱ། ཨརིཡདྷམྨནྟི ཙཏུསཙྩདྷམྨཾ། ཝིདིཏྭཱཏི པཊིཝིཛ྄ཛྷིཏྭཱ། ཛཱནནྟི སབྦཾ ཉེཡྻདྷམྨཾ ཛཱནནྟོ། ཝཱཙཱབྷིཀངྑཱམཱིཏི ཡཐཱ གྷམྨནི གྷམྨཀཱལེ ཨུཎྷཱབྷིཏཏྟོ པུརིསོ ཀིལནྟོ ཏསིཏོ ཝཱརིཾ, ཨེཝཾ ཏེ ཝཱཙཾ ཨབྷིཀངྑཱམི། སུཏཾ པཝསྶཱཏི སུཏསངྑཱཏཾ སདྡཱཡཏནཾ པཝསྶ པགྒྷར མུཉྩ པཝཏྟ། ‘‘སུཏསྶ ཝསྶཱ’’ཏིཔི པཱལི༹། ཝུཏྟཔཀཱརསྶ སདྡཱཡཏནསྶ ཝུཊྛིཾ ཝསྶཱཏི ཨཏྠོ།

    Paroparanti imaṃ pana gāthaṃ aparenapi pariyāyena amohanameva yācanto āha. Tattha paroparanti lokuttaralokiyavasena sundarāsundaraṃ dūre santike vā. Ariyadhammanti catusaccadhammaṃ. Viditvāti paṭivijjhitvā. Jānanti sabbaṃ ñeyyadhammaṃ jānanto. Vācābhikaṅkhāmīti yathā ghammani ghammakāle uṇhābhitatto puriso kilanto tasito vāriṃ, evaṃ te vācaṃ abhikaṅkhāmi. Sutaṃ pavassāti sutasaṅkhātaṃ saddāyatanaṃ pavassa pagghara muñca pavatta. ‘‘Sutassa vassā’’tipi pāḷi. Vuttapakārassa saddāyatanassa vuṭṭhiṃ vassāti attho.

    ཨིདཱནི ཡཱདིསཾ ཝཱཙཾ ཨབྷིཀངྑཏི, ཏཾ པཀཱསེནྟོ ‘‘ཡདཏྠིཀ’’ནྟི གཱཐམཱཧ། ཏཏྠ ཀཔྤཱཡནོཏི ཀཔྤམེཝ པཱུཛཱཝསེན ཝདཏི། ཡཐཱ ཝིམུཏྟོཏི ‘‘ཀིཾ ཨནུཔཱདིསེསཱཡ ནིབྦཱནདྷཱཏུཡཱ ཡཐཱ ཨསེཀྑོ, ཨུདཱཧུ སཨུཔཱདིསེསཱཡ ཡཐཱ སེཀྑོ’’ཏི ཝཱ པུཙྪཏི། སེསམེཏྠ པཱཀཊམེཝ།

    Idāni yādisaṃ vācaṃ abhikaṅkhati, taṃ pakāsento ‘‘yadatthika’’nti gāthamāha. Tattha kappāyanoti kappameva pūjāvasena vadati. Yathā vimuttoti ‘‘kiṃ anupādisesāya nibbānadhātuyā yathā asekkho, udāhu saupādisesāya yathā sekkho’’ti vā pucchati. Sesamettha pākaṭameva.

    ཨེཝཾ དྭཱདསཧི གཱཐཱཧི ཡཱཙིཏོ བྷགཝཱ ཏཾ ཝིཡཱཀརོནྟོ ‘‘ཨཙྪེཙྪཱི’’ཏིཨཱདིམཱཧ། ཏཏྠ ཨཙྪེཙྪི ཏཎྷཾ ཨིདྷ ནཱམརཱུཔེ (ཨིཏི བྷགཝཱ) ཀཎྷསྶ སོཏཾ དཱིགྷརཏྟཱནུསཡིཏནྟི ཨིམསྨིཾ ནཱམརཱུཔེ ཀཱམཏཎྷཱདིབྷེདཱ ཏཎྷཱ དཱིགྷརཏྟཾ ཨཔྤཧཱིནཊྛེན ཨནུསཡིཏཱ ཀཎྷནཱམཀསྶ མཱརསྶ སོཏནྟིཔི ཝུཙྩཏི། ཏཾ ཀཎྷསྶ སོཏམུཏཾ དཱིགྷརཏྟཱནུསཡིཏཾ ཨིདྷ ནཱམརཱུཔེ ཏཎྷཾ ཀཔྤཱཡནོ ཚིནྡི། ཨིཏི བྷགཝཱཏི ཨིདཾ པན སངྒཱིཏིཀཱརཱནཾ ཝཙནཾ། ཨཏཱརི ཛཱཏིཾ མརཎཾ ཨསེསནྟི སོ ཏཾ ཏཎྷཾ ཚེཏྭཱ ཨསེསཾ ཛཱཏིམརཎཾ ཨཏརི ཨནུཔཱདིསེསཱཡ པརིནིབྦཱཡཱིཏི དསྶེཏི, ཨིཙྩབྲཝི བྷགཝཱ པཉྩསེཊྛོཏི ཨཱཡསྨཏཱ ཝངྒཱིསེན པུཊྛོ བྷགཝཱ ཨེཝཾ ཨཝོཙ པཉྩཧི སདྡྷཱདཱིཧི ཨིནྡྲིཡེཧི ཨནཉྙསཱདྷཱརཎེཧི ཙཀྑཱུཧི ཝཱ སེཊྛོ། ཨཐ ཝཱ པཉྩསེཊྛོཏི པཉྩཧི སཱིལཱདཱིཧི དྷམྨཀྑནྡྷེཧི, པཉྩཧི ཝཱ ཧེཏུསམྤདཱདཱིཧི སེཊྛོ ཨུཏྟམོ པཝརོཏི སངྒཱིཏིཀཱརཱནམེཝིདམྤི ཝཙནཾ།

    Evaṃ dvādasahi gāthāhi yācito bhagavā taṃ viyākaronto ‘‘acchecchī’’tiādimāha. Tattha acchecchi taṇhaṃ idha nāmarūpe (iti bhagavā) kaṇhassa sotaṃ dīgharattānusayitanti imasmiṃ nāmarūpe kāmataṇhādibhedā taṇhā dīgharattaṃ appahīnaṭṭhena anusayitā kaṇhanāmakassa mārassa sotantipi vuccati. Taṃ kaṇhassa sotamutaṃ dīgharattānusayitaṃ idha nāmarūpe taṇhaṃ kappāyano chindi. Iti bhagavāti idaṃ pana saṅgītikārānaṃ vacanaṃ. Atāri jātiṃ maraṇaṃ asesanti so taṃ taṇhaṃ chetvā asesaṃ jātimaraṇaṃ atari anupādisesāya parinibbāyīti dasseti, iccabravi bhagavā pañcaseṭṭhoti āyasmatā vaṅgīsena puṭṭho bhagavā evaṃ avoca pañcahi saddhādīhi indriyehi anaññasādhāraṇehi cakkhūhi vā seṭṭho. Atha vā pañcaseṭṭhoti pañcahi sīlādīhi dhammakkhandhehi, pañcahi vā hetusampadādīhi seṭṭho uttamo pavaroti saṅgītikārānamevidampi vacanaṃ.

    ཨེཝཾ ཝུཏྟེ བྷགཝཏོ བྷཱསིཏཾ ཨབྷིནནྡམཱནསོ ཨཱཡསྨཱ ཝངྒཱིསོ ‘‘ཨེས སུཏྭཱ’’ཏིཨཱདིཀཱ གཱཐཱཡོ ཨཱཧ། ཏཏྠ པཋམགཱཐཱཡཾ ན མཾ ཝཉྩེསཱིཏི ཡསྨཱ པརིནིབྦུཏོ, ཏསྨཱ ཏསྶ པརིནིབྦུཏབྷཱཝཾ ཨིཙྪནྟཾ མཾ ན ཝཉྩེསི, ན ཝིསཾཝཱདེསཱིཏི ཨཏྠོ། སེསཾ པཱཀཊམེཝ།

    Evaṃ vutte bhagavato bhāsitaṃ abhinandamānaso āyasmā vaṅgīso ‘‘esa sutvā’’tiādikā gāthāyo āha. Tattha paṭhamagāthāyaṃ na maṃ vañcesīti yasmā parinibbuto, tasmā tassa parinibbutabhāvaṃ icchantaṃ maṃ na vañcesi, na visaṃvādesīti attho. Sesaṃ pākaṭameva.

    དུཏིཡགཱཐཱཡཾ ཡསྨཱ མུཏྱཔེཁོ ཝིཧཱསི, ཏསྨཱ ཏཾ སནྡྷཱཡཱཧ ‘‘ཡཐཱ ཝཱདཱི ཏཐཱ ཀཱརཱི, ཨཧུ བུདྡྷསྶ སཱཝཀོ’’ཏི། མཙྩུནོ ཛཱལཾ ཏཏ’’ནྟི ཏེབྷཱུམཀཝཊྚེ ཝིཏྠཏཾ མཱརསྶ ཏཎྷཱཛཱལཾ། མཱཡཱཝིནོཏི བཧུམཱཡསྶ། ‘‘ཏཐཱ མཱཡཱཝིནོ’’ཏིཔི ཀེཙི པཋནྟི, ཏེསཾ ཡོ ཨནེཀཱཧི མཱཡཱཧི ཨནེཀཀྑཏྟུཾ བྷགཝནྟཾ ཨུཔསངྐམི། ཏསྶ ཏཐཱ མཱཡཱཝིནོཏི ཨདྷིཔྤཱཡོ།

    Dutiyagāthāyaṃ yasmā mutyapekho vihāsi, tasmā taṃ sandhāyāha ‘‘yathā vādī tathā kārī, ahu buddhassa sāvako’’ti. Maccuno jālaṃ tata’’nti tebhūmakavaṭṭe vitthataṃ mārassa taṇhājālaṃ. Māyāvinoti bahumāyassa. ‘‘Tathā māyāvino’’tipi keci paṭhanti, tesaṃ yo anekāhi māyāhi anekakkhattuṃ bhagavantaṃ upasaṅkami. Tassa tathā māyāvinoti adhippāyo.

    ཏཏིཡགཱཐཱཡ ཨཱདིནྟི མཱུལཀཱརཎཾ། ཨུཔཱདཱནསྶཱཏི ཝཊྚསྶ། ཝཊྚཾ དལ༹ྷེཧི ཀམྨཀིལེསེཧི ཨུཔཱདཱཏབྦཊྛེན ‘‘ཨུཔཱདཱན’’ནྟི ཝུཏྟཾ། ཏསྶ ཨུཔཱདཱནསྶ ཨཱདིཾ ཨཝིཛྫཱཏཎྷཱདིབྷེདཾ ཀཱརཎཾ ཉཱཎཙཀྑུནཱ ཨདྡས། ཀཔྤོ ཀཔྤིཡོཏི ཨེཝཾ ཝཏྟུཾ ཝཊྚཏི བྷགཝཱཏི ཨདྷིཔྤཱཡེན ཝདཏི། ཨཙྩགཱ ཝཏཱཏི ཨཏིཀྐནྟོ ཝཏ། མཙྩུདྷེཡྻནྟི མཙྩུ ཨེཏྠ དྷིཡྻཏཱིཏི མཙྩུདྷེཡྻཾ, ཏེབྷཱུམཀཝཊྚཾ སུདུཏྟརཾ ཨཙྩགཱ ཝཏཱཏི ཝེདཛཱཏོ ཝདཏི།

    Tatiyagāthāya ādinti mūlakāraṇaṃ. Upādānassāti vaṭṭassa. Vaṭṭaṃ daḷhehi kammakilesehi upādātabbaṭṭhena ‘‘upādāna’’nti vuttaṃ. Tassa upādānassa ādiṃ avijjātaṇhādibhedaṃ kāraṇaṃ ñāṇacakkhunā addasa. Kappo kappiyoti evaṃ vattuṃ vaṭṭati bhagavāti adhippāyena vadati. Accagā vatāti atikkanto vata. Maccudheyyanti maccu ettha dhiyyatīti maccudheyyaṃ, tebhūmakavaṭṭaṃ suduttaraṃ accagā vatāti vedajāto vadati.

    ཨིདཱནི སཏྠརི ཨཏྟནོ ཨུཔཛ྄ཛྷཱཡེ ཙ པསནྣམཱནསོ པསནྣཱཀཱརཾ ཝིབྷཱཝེནྟོ ‘‘ཏཾ དེཝདེཝ’’ནྟི ཨོསཱནགཱཐམཱཧ། ཏཏྠ ཏཾ དེཝདེཝཾ ཝནྡཱམཱིཏི སམྨུཏིདེཝོ, ཨུཔཔཏྟིདེཝོ, ཝིསུདྡྷིདེཝོཏི ཏེསཾ སབྦེསམྤི དེཝཱནཾ ཨུཏྟམདེཝཏཱཡ དེཝདེཝཾ དྭིཔདུཏྟམ བྷགཝཱ ཏཾ ཝནྡཱམི། ན ཀེཝལཾ ཏཾཡེཝ, ཨཐ ཁོ ཏཝ སཙྩཱབྷིསམྦོདྷིཡཱ ཨནུདྷམྨཛཱཏཏྟཱ ཨནུཛཱཏཾ, མཱརཝིཛཡེན མཧཱཝཱིརིཡཏཱཡ མཧཱཝཱིརཾ, ཨཱགུཨཀརཎཱདིཨཏྠེན ནཱགཾ ཏཝ ཨུརེ ཝཱཡཱམཛནིཏཛཱཏིཏཱཡ ཨོརསཾ པུཏྟཾ ནིགྲོདྷཀཔྤཉྩ ཝནྡཱམི།

    Idāni satthari attano upajjhāye ca pasannamānaso pasannākāraṃ vibhāvento ‘‘taṃ devadeva’’nti osānagāthamāha. Tattha taṃ devadevaṃ vandāmīti sammutidevo, upapattidevo, visuddhidevoti tesaṃ sabbesampi devānaṃ uttamadevatāya devadevaṃ dvipaduttama bhagavā taṃ vandāmi. Na kevalaṃ taṃyeva, atha kho tava saccābhisambodhiyā anudhammajātattā anujātaṃ, māravijayena mahāvīriyatāya mahāvīraṃ, āguakaraṇādiatthena nāgaṃ tava ure vāyāmajanitajātitāya orasaṃ puttaṃ nigrodhakappañca vandāmi.

    ཨེཝམེཏེ སུབྷཱུཏིཨཱདཡོ ཝངྒཱིསཔརིཡོསཱནཱ དྭིསཏཾ ཙཏུསཊྛི ཙ མཧཱཐེརཱ ཨིདྷ པཱལི༹ཡཾ ཨཱརཱུལ༹ྷཱ, ཏེ སབྦེ ཡཐཱ སམྨཱསམྦུདྡྷསྶ སཱཝཀབྷཱཝེན ཨེཀཝིདྷཱ། ཏཐཱ ཨསེཀྑབྷཱཝེན, ཨུཀྑིཏྟཔལིགྷཏཱཡ སཾཀིཎྞཔརིཀྑཏཱཡ, ཨབྦུལ༹ྷེསིཀཏཱཡ, ནིརགྒལ༹ཏཱཡ, པནྣདྡྷཛཏཱཡ, པནྣབྷཱརཏཱཡ, ཝིསཾཡུཏྟཏཱཡ, དསསུ ཨརིཡཝཱསེསུ ཝུཊྛཝཱསཏཱཡ ཙ། ཏཐཱ ཧི ཏེ པཉྩངྒཝིཔྤཧཱིནཱ, ཚལ༹ངྒསམནྣཱགཏཱ, ཨེཀཱརཀྑཱ, ཙཏུརཱཔསྶེནཱ, པནུཎྞཔཙྩེཀསཙྩཱ, སམཝཡསཊྛེསནཱ, ཨནཱཝིལསངྐཔྤཱ, པསྶདྡྷཀཱཡསངྑཱརཱ, སུཝིམུཏྟཙིཏྟཱ, སུཝིམུཏྟཔཉྙཱ ཙ (ཨ॰ ནི॰ ༡༠.༡༩)། ཨིཏི ཨེཝམཱདིནཱ ནཡེན ཨེཀཝིདྷཱ།

    Evamete subhūtiādayo vaṅgīsapariyosānā dvisataṃ catusaṭṭhi ca mahātherā idha pāḷiyaṃ ārūḷhā, te sabbe yathā sammāsambuddhassa sāvakabhāvena ekavidhā. Tathā asekkhabhāvena, ukkhittapalighatāya saṃkiṇṇaparikkhatāya, abbuḷhesikatāya, niraggaḷatāya, pannaddhajatāya, pannabhāratāya, visaṃyuttatāya, dasasu ariyavāsesu vuṭṭhavāsatāya ca. Tathā hi te pañcaṅgavippahīnā, chaḷaṅgasamannāgatā, ekārakkhā, caturāpassenā, panuṇṇapaccekasaccā, samavayasaṭṭhesanā, anāvilasaṅkappā, passaddhakāyasaṅkhārā, suvimuttacittā, suvimuttapaññā ca (a. ni. 10.19). Iti evamādinā nayena ekavidhā.

    ཨེཧིབྷིཀྑུབྷཱཝེན ཨུཔསམྤནྣཱ, ན ཨེཧིབྷིཀྑུབྷཱཝེན ཨུཔསམྤནྣཱཏི དུཝིདྷཱ། ཏཏྠ ཨཉྙཱསི ཀོཎྜཉྙཔྤམུཁཱ པཉྩཝགྒིཡཏྠེརཱ, ཡསཏྠེརོ, ཏསྶ སཧཱཡབྷཱུཏཱ ཝིམལོ སུབཱཧུ པུཎྞཛི གཝམྤཏཱིཏི ཙཏྟཱརོ, ཨཔརེཔི ཏསྶ སཧཱཡབྷཱུཏཱ པཉྩཔཉྙཱས, ཏིཾས བྷདྡཝགྒིཡཱ, ཨུརུཝེལཀསྶཔཔྤམུཁཱ སཧསྶཔུརཱཎཛཊིལཱ, དྭེ ཨགྒསཱཝཀཱ, ཏེསཾ པརིཝཱརབྷཱུཏཱ ཨཌྜྷཏེརསསཏཱ པརིབྦཱཛཀཱ, ཙོརོ ཨངྒུལིམཱལཏྠེརོཏི སབྦེ སཧསྶཾ པཉྙཱསཱདྷིཀཱནི ཏཱིཎི སཏཱནི ཙ ཧོནྟི། ཏེནེཏཾ ཝུཙྩཏི –

    Ehibhikkhubhāvena upasampannā, na ehibhikkhubhāvena upasampannāti duvidhā. Tattha aññāsi koṇḍaññappamukhā pañcavaggiyattherā, yasatthero, tassa sahāyabhūtā vimalo subāhu puṇṇaji gavampatīti cattāro, aparepi tassa sahāyabhūtā pañcapaññāsa, tiṃsa bhaddavaggiyā, uruvelakassapappamukhā sahassapurāṇajaṭilā, dve aggasāvakā, tesaṃ parivārabhūtā aḍḍhaterasasatā paribbājakā, coro aṅgulimālattheroti sabbe sahassaṃ paññāsādhikāni tīṇi satāni ca honti. Tenetaṃ vuccati –

    ‘‘སཏཏྟཡཾ སཧསྶཉྩ, པཉྙཱསཉྩ པུནཱཔརེ།

    ‘‘Satattayaṃ sahassañca, paññāsañca punāpare;

    ཨེཏེ ཐེརཱ མཧཱཔཉྙཱ, སབྦེཝ ཨེཧིབྷིཀྑུཀཱ’’ཏི༎

    Ete therā mahāpaññā, sabbeva ehibhikkhukā’’ti.

    ན ཀེཝལཉྩ ཨེཏེ ཨེཝ, ཨཐ ཁོ ཨཉྙེཔི བཧཱུ སནྟི། སེཡྻཐིདཾ – སེལོ བྲཱཧྨཎོ, ཏསྶ ཨནྟེཝཱསིཀབྷཱུཏཱ ཏིསཏབྲཱཧྨཎཱ, མཧཱཀཔྤིནོ, ཏསྶ པརིཝཱརབྷཱུཏཾ པུརིསསཧསྶཾ, སུདྡྷོདནམཧཱརཱཛེན པེསིཏཱ ཀཔིལཝཏྠུཝཱསིནོ དསསཧསྶཔུརིསཱ, མཧཱབཱཝརིཡབྲཱཧྨཎསྶ ཨནྟེཝཱསིཀབྷཱུཏཱ ཨཛིཏཱདཡོ སོལ༹ས སཧསྶཔརིམཱཎཱཏི། ཨེཝཾ ཝུཏྟཏོ ཨཉྙེ ན ཨེཧིབྷིཀྑུབྷཱཝེན ཨུཔསམྤདཱ, ཏེ པན སརཎགམནཱུཔསམྤདཱ, ཨོཝཱདཔཊིགྒཧཎཱུཔསམྤདཱ, པཉྷཱབྱཱཀརཎཱུཔསམྤདཱ, ཉཏྟིཙཏུཏྠཀམྨཱུཔསམྤདཱཏི ཨིམེཧི ཙཏཱུཧི ཨཱཀཱརེཧི ལདྡྷཱུཔསམྤདཱ། ཨཱདིཏོ ཧི ཨེཧིབྷིཀྑུབྷཱཝཱུཔགཏཱ ཐེརཱ, ཏེསཾ བྷགཝཱ པབྦཛྫཾ ཝིཡ ཏཱིཧི སརཎགམནེཧེཝ ཨུཔསམྤདམྤི ཨནུཉྙཱསི, ཨཡཾ སརཎགམནཱུཔསམྤདཱ། ཡཱ པན –

    Na kevalañca ete eva, atha kho aññepi bahū santi. Seyyathidaṃ – selo brāhmaṇo, tassa antevāsikabhūtā tisatabrāhmaṇā, mahākappino, tassa parivārabhūtaṃ purisasahassaṃ, suddhodanamahārājena pesitā kapilavatthuvāsino dasasahassapurisā, mahābāvariyabrāhmaṇassa antevāsikabhūtā ajitādayo soḷasa sahassaparimāṇāti. Evaṃ vuttato aññe na ehibhikkhubhāvena upasampadā, te pana saraṇagamanūpasampadā, ovādapaṭiggahaṇūpasampadā, pañhābyākaraṇūpasampadā, ñatticatutthakammūpasampadāti imehi catūhi ākārehi laddhūpasampadā. Ādito hi ehibhikkhubhāvūpagatā therā, tesaṃ bhagavā pabbajjaṃ viya tīhi saraṇagamaneheva upasampadampi anuññāsi, ayaṃ saraṇagamanūpasampadā. Yā pana –

    ‘‘ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ – ‘ཏིབྦཾ མེ ཧིརོཏྟཔྤཾ, པཙྩུཔཊྛིཏཾ བྷཝིསྶཏི ཐེརེསུ ནཝེསུ མཛ྄ཛྷིམེསཱུ’ཏི, ཨེཝཾ ཧི ཏེ, ཀསྶཔ, སིཀྑིཏབྦཾ། ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ – ‘ཡཾཀིཉྩི དྷམྨཾ སུཎིསྶཱམི ཀུསལཱུཔསཾཧིཏཾ, སབྦཾ ཏཾ ཨཊྛིཾ ཀཏྭཱ མནསི ཀརིཏྭཱ སབྦཙེཏསཱ སམནྣཱཧརིཏྭཱ ཨོཧིཏསོཏོ དྷམྨཾ སུཎིསྶཱམཱི’ཏི, ཨེཝཉྷི ཏེ, ཀསྶཔ, སིཀྑིཏབྦཾ། ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ – ‘སཱཏསཧགཏཱ ཙ མེ ཀཱཡགཏཱ སཏི ན ཝིཛཧིསྶཏཱི’ཏི, ཨེཝཉྷི ཏེ, ཀསྶཔ, སིཀྑིཏབྦ’’ནྟི (སཾ॰ ནི॰ ༢.༡༥༤)།

    ‘‘Tasmātiha te, kassapa, evaṃ sikkhitabbaṃ – ‘tibbaṃ me hirottappaṃ, paccupaṭṭhitaṃ bhavissati theresu navesu majjhimesū’ti, evaṃ hi te, kassapa, sikkhitabbaṃ. Tasmātiha te, kassapa, evaṃ sikkhitabbaṃ – ‘yaṃkiñci dhammaṃ suṇissāmi kusalūpasaṃhitaṃ, sabbaṃ taṃ aṭṭhiṃ katvā manasi karitvā sabbacetasā samannāharitvā ohitasoto dhammaṃ suṇissāmī’ti, evañhi te, kassapa, sikkhitabbaṃ. Tasmātiha te, kassapa, evaṃ sikkhitabbaṃ – ‘sātasahagatā ca me kāyagatā sati na vijahissatī’ti, evañhi te, kassapa, sikkhitabba’’nti (saṃ. ni. 2.154).

    ཨིམསྶ ཨོཝཱདསྶ པཊིགྒཧཎེན མཧཱཀསྶཔཏྠེརསྶ ཨནུཉྙཱཏཨུཔསམྤདཱ, ཨཡཾ ཨོཝཱདཔཊིགྒཧཎཱུཔསམྤདཱ ནཱམ། ཡཱ པུབྦཱརཱམེ ཙངྐམནྟེན བྷགཝཏཱ ‘‘ཨུདྡྷུམཱཏཀསཉྙཱཏི ཝཱ སོཔཱཀ ‘རཱུཔསཉྙཱ’ཏི ཝཱ ཨིམེ དྷམྨཱ ནཱནཏྠཱ ནཱནཱབྱཉྫནཱ, ཨུདཱཧུ ཨེཀཏྠཱ བྱཉྫནམེཝ ནཱན’’ནྟིཨཱདིནཱ ཨསུབྷནིསྶིཏེསུ པཉྷེསུ པུཙྪིཏེསུ བྷགཝནྟཾ ཨུཔསངྐམནྟེན སཏྟཝསྶིཀེན སོཔཱཀསཱམཎེརེན ‘‘ཨུདྡྷུམཱཏཀསཉྙཱཏི ཝཱ བྷགཝཱ ‘རཱུཔསཉྙཱ’ཏི ཝཱ ཨིམེ དྷམྨཱ ཨེཀཏྠཱ, བྱཉྫནམེཝ ནཱན’’ནྟིཨཱདིནཱ ཝིསྶཛྫིཏེསུ ‘‘ཨིམིནཱ སབྦཉྙུཏཉྙཱཎེན སདྡྷིཾ སཾསནྡིཏྭཱ ཨིམེ པཉྷཱ བྱཱཀཏཱ’’ཏི ཨཱརདྡྷཙིཏྟེན བྷགཝཏཱ ཨནུཉྙཱཏཨུཔསམྤདཱ། ཨཡཾ པཉྷཱབྱཱཀརཎཱུཔསམྤདཱ ནཱམ། ཉཏྟིཙཏུཏྠཀམྨཱུཔསམྤདཱ པཱཀཊཱཝ།

    Imassa ovādassa paṭiggahaṇena mahākassapattherassa anuññātaupasampadā, ayaṃ ovādapaṭiggahaṇūpasampadā nāma. Yā pubbārāme caṅkamantena bhagavatā ‘‘uddhumātakasaññāti vā sopāka ‘rūpasaññā’ti vā ime dhammā nānatthā nānābyañjanā, udāhu ekatthā byañjanameva nāna’’ntiādinā asubhanissitesu pañhesu pucchitesu bhagavantaṃ upasaṅkamantena sattavassikena sopākasāmaṇerena ‘‘uddhumātakasaññāti vā bhagavā ‘rūpasaññā’ti vā ime dhammā ekatthā, byañjanameva nāna’’ntiādinā vissajjitesu ‘‘iminā sabbaññutaññāṇena saddhiṃ saṃsanditvā ime pañhā byākatā’’ti āraddhacittena bhagavatā anuññātaupasampadā. Ayaṃ pañhābyākaraṇūpasampadā nāma. Ñatticatutthakammūpasampadā pākaṭāva.

    ཡཐཱ ཨེཧིབྷིཀྑུབྷཱཝེན ཨུཔསམྤདཱ, ན ཨེཧིབྷིཀྑུབྷཱཝེན ཨུཔསམྤདཱཏི དུཝིདྷཱ, ཨེཝཾ སམྨུཁཱཔརམྨུཁཱབྷེདཏོཔི དུཝིདྷཱ། ཡེ ཧི སཏྠུ དྷརམཱནཀཱལེ ཨརིཡཱཡ ཛཱཏིཡཱ ཛཱཏཱ, ཏེ ཨཉྙཱསིཀོཎྜཉྙཱདཡོ སམྨུཁསཱཝཀཱ ནཱམ། ཡེ པན བྷགཝཏོ པརིནིབྦཱནཏོ པཙྪཱ ཨདྷིགཏཝིསེསཱ, ཏེ སཏིཔི སཏྠུ དྷམྨསརཱིརསྶ པཙྩཀྑབྷཱཝེ སཏྠུ སརཱིརསྶ ཨཔཙྩཀྑབྷཱཝཏོ པརམྨུཁསཱཝཀཱ ནཱམ།

    Yathā ehibhikkhubhāvena upasampadā, na ehibhikkhubhāvena upasampadāti duvidhā, evaṃ sammukhāparammukhābhedatopi duvidhā. Ye hi satthu dharamānakāle ariyāya jātiyā jātā, te aññāsikoṇḍaññādayo sammukhasāvakā nāma. Ye pana bhagavato parinibbānato pacchā adhigatavisesā, te satipi satthu dhammasarīrassa paccakkhabhāve satthu sarīrassa apaccakkhabhāvato parammukhasāvakā nāma.

    ཏཐཱ ཨུབྷཏོབྷཱགཝིམུཏྟཔཉྙཱཝིམུཏྟཏཱཝསེན, ཨིདྷ པཱལི༹ཡཾ ཨཱགཏཱ པན ཨུབྷཏོབྷཱགཝིམུཏྟཱ ཨེཝཱཏི ཝེདིཏབྦཱ། ཝུཏྟཉྷེཏཾ ཨཔདཱནེ (ཨཔ॰ ཐེར ༢.༥༥.༡༤༢) –

    Tathā ubhatobhāgavimuttapaññāvimuttatāvasena, idha pāḷiyaṃ āgatā pana ubhatobhāgavimuttā evāti veditabbā. Vuttañhetaṃ apadāne (apa. thera 2.55.142) –

    ‘‘ཝིམོཀྑཱཔི ཙ ཨཊྛིམེ, ཚལ༹བྷིཉྙཱ སཙྪིཀཏཱ’’ཏི༎

    ‘‘Vimokkhāpi ca aṭṭhime, chaḷabhiññā sacchikatā’’ti.

    ཏཐཱ སཱཔདཱནཱནཔདཱནབྷེདཏོ, ཡེསཉྷི པུརིམེསུ སམྨཱསམྦུདྡྷེསུ པཙྩེཀབུདྡྷབུདྡྷསཱཝཀེསུཔི པུཉྙཀིརིཡཱཝསེན པཝཏྟིཏཾ སཱཝཀཔཱརམིཏཱསངྑཱཏཾ ཨཏྠི ཨཔདཱནཾ, ཏེ སཱཔདཱནཱ, སེཡྻཐཱཔི ཨཔདཱནཔཱལི༹ཡཾ ཨཱགཏཱ ཐེརཱ། ཡེསཾ པན ཏཾ ནཏྠི, ཏེ ཨནཔདཱནཱ།

    Tathā sāpadānānapadānabhedato, yesañhi purimesu sammāsambuddhesu paccekabuddhabuddhasāvakesupi puññakiriyāvasena pavattitaṃ sāvakapāramitāsaṅkhātaṃ atthi apadānaṃ, te sāpadānā, seyyathāpi apadānapāḷiyaṃ āgatā therā. Yesaṃ pana taṃ natthi, te anapadānā.

    ཀིཾ པན སབྦེན སབྦཾ པུབྦཧེཏུསམྤཏྟིཡཱ ཝིནཱ སཙྩཱབྷིསམྦོདྷོ སམྦྷཝཏཱིཏི? ན སམྦྷཝཏི། ན ཧི ཨུཔནིསྶཡསམྤཏྟིརཧིཏསྶ ཨརིཡམགྒཱདྷིགམོ ཨཏྠི, ཏསྶ སུདུཀྐརདུརབྷིསམྦྷཝསབྷཱཝཏོ། ཡཐཱཧ ‘‘ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ དུཀྐརཏརཾ ཝཱ དུརབྷིསམྦྷཝཏརཾ ཝཱ’’ཏིཨཱདི (སཾ॰ ནི॰ ༥.༡༡༡༥)། ཡདི ཨེཝཾ ཀསྨཱ ཝུཏྟཾ – ‘‘ཡེསཾ པན ཏཾ ནཏྠི, ཏེ ཨནཔདཱནཱ’’ཏི? ནཡིདམེཝཾ དཊྛབྦཾ ‘‘ཡེ སབྦེན སབྦཾ ཨུཔནིསྶཡསམྤཏྟིརཧིཏཱ, ཏེ ཨནཔདཱནཱ’’ཏི ཏཱདིསཱནཾ ཨིདྷ ཨནདྷིཔྤེཏཏྟཱ། ཡེསཾ པན ཨཏིཨུཀྐཾསགཏཾ ཨཔདཱནཾ ནཏྠི, ཏེ ཨིདྷ ‘‘ཨནཔདཱནཱ’’ཏི ཝུཏྟཱ, ན སབྦེན སབྦཾ ཨུཔནིསྶཡརཧིཏཱཡེཝ ། ཏཐཱ ཧི ཨིམེ སཏྟཱ བུདྡྷུཔྤཱདེསུ ཨཙྪརིཡཱཙིནྟེཡྻགུཎཝིབྷཱུཏིཝིཏྠཏཾ བུདྡྷཱནཾ ཨཱནུབྷཱཝཾ པསྶནྟཱ ཙཏུཔྤམཱཎིཀསྶ ལོཀསྶ སབྦཐཱཔི པསཱདཱཝཧཏྟཱ སཏྠརི སདྡྷཾ པཊིལབྷནྟི། ཏཐཱ སདྡྷམྨསྶཝནེན, སཱཝཀཱནཾ སམྨཱཔཊིཔཏྟིདསྶནེན, ཀདཱཙི མཧཱབོདྷིསཏྟཱནཾ སམྨཱསམྦོདྷིཡཱ ཙིཏྟཱབྷིནཱིཧཱརདསྶནེན, ཏེསཾ སནྟིཀེ ཨོཝཱདཱནུསཱསནཔཊིལཱབྷེན ཙ སདྡྷམྨེ སདྡྷཾ པཊིལབྷནྟི, ཏེ ཏཏྠ པཊིལདྡྷསདྡྷཱ ཡདིཔི སཾསཱརེ ནིབྦཱནེ ཙ ཨཱདཱིནཝཱནིསཾསེ པསྶནྟི, མཧཱརཛཀྑཏཱཡ པན ཡོགཀྑེམཾ ཨནབྷིསམྦྷུནནྟཱ ཨནྟརནྟརཱ ཝིཝཊྚཱུཔནིསྶཡཾ ཀུསལབཱིཛཾ ཨཏྟནོ སནྟཱནེ རོཔེནྟིཡེཝ སཔྤུརིསཱུཔནིསྶཡསྶ བཧཱུཀཱརབྷཱཝཏོ། ཏེནཱཧ (བུ॰ ཝཾ॰ ༢.༧༢-༧༤) –

    Kiṃ pana sabbena sabbaṃ pubbahetusampattiyā vinā saccābhisambodho sambhavatīti? Na sambhavati. Na hi upanissayasampattirahitassa ariyamaggādhigamo atthi, tassa sudukkaradurabhisambhavasabhāvato. Yathāha ‘‘taṃ kiṃ maññatha, bhikkhave, katamaṃ nu kho dukkarataraṃ vā durabhisambhavataraṃ vā’’tiādi (saṃ. ni. 5.1115). Yadi evaṃ kasmā vuttaṃ – ‘‘yesaṃ pana taṃ natthi, te anapadānā’’ti? Nayidamevaṃ daṭṭhabbaṃ ‘‘ye sabbena sabbaṃ upanissayasampattirahitā, te anapadānā’’ti tādisānaṃ idha anadhippetattā. Yesaṃ pana atiukkaṃsagataṃ apadānaṃ natthi, te idha ‘‘anapadānā’’ti vuttā, na sabbena sabbaṃ upanissayarahitāyeva . Tathā hi ime sattā buddhuppādesu acchariyācinteyyaguṇavibhūtivitthataṃ buddhānaṃ ānubhāvaṃ passantā catuppamāṇikassa lokassa sabbathāpi pasādāvahattā satthari saddhaṃ paṭilabhanti. Tathā saddhammassavanena, sāvakānaṃ sammāpaṭipattidassanena, kadāci mahābodhisattānaṃ sammāsambodhiyā cittābhinīhāradassanena, tesaṃ santike ovādānusāsanapaṭilābhena ca saddhamme saddhaṃ paṭilabhanti, te tattha paṭiladdhasaddhā yadipi saṃsāre nibbāne ca ādīnavānisaṃse passanti, mahārajakkhatāya pana yogakkhemaṃ anabhisambhunantā antarantarā vivaṭṭūpanissayaṃ kusalabījaṃ attano santāne ropentiyeva sappurisūpanissayassa bahūkārabhāvato. Tenāha (bu. vaṃ. 2.72-74) –

    ‘‘ཡདིམསྶ ལོཀནཱཐསྶ, ཝིརཛ྄ཛྷིསྶཱམ སཱསནཾ།

    ‘‘Yadimassa lokanāthassa, virajjhissāma sāsanaṃ;

    ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ༎

    Anāgatamhi addhāne, hessāma sammukhā imaṃ.

    ‘‘ཡཐཱ མནུསྶཱ ནདིཾ ཏརནྟཱ, པཊིཏིཏྠཾ ཝིརཛ྄ཛྷིཡ།

    ‘‘Yathā manussā nadiṃ tarantā, paṭititthaṃ virajjhiya;

    ཧེཊྛཱཏིཏྠེ གཧེཏྭཱན, ཨུཏྟརནྟི མཧཱནདིཾ༎

    Heṭṭhātitthe gahetvāna, uttaranti mahānadiṃ.

    ‘‘ཨེཝམེཝ མཡཾ སབྦེ, ཡདི མུཉྩཱམིམཾ ཛིནཾ།

    ‘‘Evameva mayaṃ sabbe, yadi muñcāmimaṃ jinaṃ;

    ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམ’’ནྟི༎

    Anāgatamhi addhāne, hessāma sammukhā ima’’nti.

    ཨེཝཾ ཝིཝཊྚཾ ཨུདྡིསྶ ཨུཔྤཱདིཏཀུསལཙིཏྟཾ སཏསཧསྶཱདྷིཀཙཏུཨསངྑྱེཡྻཀཱལནྟརེ ཝིམོཀྑཱདྷིགམསྶ ཨུཔནིསྶཡོ ན ཧོཏཱིཏི ན སཀྐཱ ཝཏྟུཾ། པགེཝ པཏྠནཱཝསེན ཨདྷིཀཱརཾ ཀཏྭཱ པཝཏྟིཏཾ། ཨེཝཾ དུཝིདྷཱཔེཏེ།

    Evaṃ vivaṭṭaṃ uddissa uppāditakusalacittaṃ satasahassādhikacatuasaṅkhyeyyakālantare vimokkhādhigamassa upanissayo na hotīti na sakkā vattuṃ. Pageva patthanāvasena adhikāraṃ katvā pavattitaṃ. Evaṃ duvidhāpete.

    ཨགྒསཱཝཀཱ, མཧཱསཱཝཀཱ, པཀཏིསཱཝཀཱཏི ཏིཝིདྷཱ། ཏེསུ ཨཱཡསྨཱ ཨཉྙཱསིཀོཎྜཉྙོ, ཝཔྤོ, བྷདྡིཡོ, མཧཱནཱམོ, ཨསྶཛི, ནཱལཀོ, ཡསོ, ཝིམལོ, སུབཱཧུ, པུཎྞཛི, གཝམྤཏི, ཨུརུཝེལཀསྶཔོ, ནདཱིཀསྶཔོ, གཡཱཀསྶཔོ, སཱརིཔུཏྟོ, མཧཱམོགྒལླཱནོ, མཧཱཀསྶཔོ, མཧཱཀཙྩཱཡནོ, མཧཱཀོཊྛིཀོ, མཧཱཀཔྤིནོ, མཧཱཙུནྡོ, ཨནུརུདྡྷོ, ཀངྑཱརེཝཏོ, ཨཱནནྡོ, ནནྡཀོ, བྷགུ, ནནྡོ, ཀིམིལོ, བྷདྡིཡོ, རཱཧུལོ, སཱིཝལི, ཨུཔཱལི , དབྦོ, ཨུཔསེནོ, ཁདིརཝནིཡརེཝཏོ, པུཎྞོ མནྟཱཎིཔུཏྟོ, པུཎྞོ སུནཱཔརནྟཀོ, སོཎོ ཀུཊིཀཎྞོ, སོཎོ ཀོལི༹ཝཱིསོ, རཱདྷོ, སུབྷཱུཏི, ཨངྒུལིམཱལོ, ཝཀྐལི, ཀཱལུ༹དཱཡཱི, མཧཱཨུདཱཡཱི, པིལིནྡཝཙྪོ, སོབྷིཏོ, ཀུམཱརཀསྶཔོ, རཊྛཔཱལོ , ཝངྒཱིསོ, སབྷིཡོ, སེལོ, ཨུཔཝཱནོ, མེགྷིཡོ, སཱགཏོ, ནཱགིཏོ, ལཀུཎྜཀབྷདྡིཡོ, པིཎྜོལབྷཱརདྭཱཛོ, མཧཱཔནྠཀོ, ཙཱུལ༹པནྠཀོ, བཱཀུལོ, ཀུཎྜདྷཱནོ, དཱརུཙཱིརིཡོ, ཡསོཛོ, ཨཛིཏོ, ཏིསྶམེཏྟེཡྻོ, པུཎྞཀོ, མེཏྟགཱུ, དྷོཏཀོ, ཨུཔསིཝོ, ནནྡོ, ཧེམཀོ, ཏོདེཡྻོ, ཀཔྤོ, ཛཏུཀཎྞི, བྷདྲཱཝུདྷོ, ཨུདཡོ, པོསཱལོ, མོགྷརཱཛཱ, པིངྒིཡོཏི ཨེཏེ ཨསཱིཏིམཧཱསཱཝཀཱ ནཱམ།

    Aggasāvakā, mahāsāvakā, pakatisāvakāti tividhā. Tesu āyasmā aññāsikoṇḍañño, vappo, bhaddiyo, mahānāmo, assaji, nālako, yaso, vimalo, subāhu, puṇṇaji, gavampati, uruvelakassapo, nadīkassapo, gayākassapo, sāriputto, mahāmoggallāno, mahākassapo, mahākaccāyano, mahākoṭṭhiko, mahākappino, mahācundo, anuruddho, kaṅkhārevato, ānando, nandako, bhagu, nando, kimilo, bhaddiyo, rāhulo, sīvali, upāli , dabbo, upaseno, khadiravaniyarevato, puṇṇo mantāṇiputto, puṇṇo sunāparantako, soṇo kuṭikaṇṇo, soṇo koḷivīso, rādho, subhūti, aṅgulimālo, vakkali, kāḷudāyī, mahāudāyī, pilindavaccho, sobhito, kumārakassapo, raṭṭhapālo, vaṅgīso, sabhiyo, selo, upavāno, meghiyo, sāgato, nāgito, lakuṇḍakabhaddiyo, piṇḍolabhāradvājo, mahāpanthako, cūḷapanthako, bākulo, kuṇḍadhāno, dārucīriyo, yasojo, ajito, tissametteyyo, puṇṇako, mettagū, dhotako, upasivo, nando, hemako, todeyyo, kappo, jatukaṇṇi, bhadrāvudho, udayo, posālo, mogharājā, piṅgiyoti ete asītimahāsāvakā nāma.

    ཀསྨཱ པན ཏེ ཨེཝ ཐེརཱ ‘‘མཧཱསཱཝཀཱ’’ཏི ཝུཙྩནྟཱིཏི? ཨབྷིནཱིཧཱརསྶ མཧནྟབྷཱཝཏོ། ཏཐཱ ཧི དྭེ ཨགྒསཱཝཀཱཔི མཧཱསཱཝཀེསུ ཨནྟོགདྷཱ། ཏེ ཧི སཱཝཀཔཱརམཱིཉཱཎསྶ མཏྠཀཔྤཏྟིཡཱ སཱཝཀེསུ ཨགྒདྷམྨཱདྷིགམེན ཨགྒཊྛཱནེ ཋིཏཱཔི ཨབྷིནཱིཧཱརམཧནྟཏཱསཱམཉྙེན ‘‘མཧཱསཱཝཀཱ’’ཏིཔི ཝུཙྩནྟི། ཨིཏརེ པན པཀཏིསཱཝཀེཧི སཱཏིསཡམཧཱབྷིནཱིཧཱརཱ། ཏཐཱ ཧི ཏེ པདུམུཏྟརསྶ བྷགཝཏོ ཀཱལེ ཀཏཔཎིདྷཱནཱ། ཏཏོ ཨེཝ སཱཏིསཡཾ ཨབྷིཉྙཱསམཱཔཏྟཱིསུ ཝསིནོ པབྷིནྣཔཊིསམྦྷིདཱ ཙ། ཀཱམཾ སབྦེཔི ཨརཧནྟོ སཱིལཝིསུདྡྷིཨཱདིཀེ སམྤཱདེཏྭཱ ཙཏཱུསུ སཏིཔཊྛཱནེསུ པཏིཊྛིཏཙིཏྟཱ སཏྟ བོཛ྄ཛྷངྒེ ཡཐཱབྷཱུཏཾ བྷཱཝེཏྭཱ མགྒཔཊིཔཱཊིཡཱ ཨནཝསེསཏོ ཀིལེསེ ཁེཔེཏྭཱ ཨགྒཕལེ པཏིཊྛཧནྟི, ཏཐཱཔི ཡཐཱ སདྡྷཱཝིམུཏྟཏོ དིཊྛིཔྤཏྟསྶ, པཉྙཱཝིམུཏྟཏོ ཙ ཨུབྷཏོབྷཱགཝིམུཏྟསྶ པུབྦབྷཱགབྷཱཝནཱཝིསེསོ ཨདྡྷཱ ཨིཙྪིཏོ ཝིསེསོ, ཨེཝཾ ཨབྷིནཱིཧཱརམཧནྟཏཱཔུབྦཡོགམཧནྟཏཱཧི ཨཏྟསནྟཱནེ སཱཏིསཡགུཎཝིསེསསྶ ནིཔྥཱདིཏཏྟཱ སཱིལཱདིགུཎེཧི མཧནྟཱ སཱཝཀཱཏི མཧཱསཱཝཀཱ། ཏེསུཡེཝ པན ཡེ བོདྷིཔཀྑིཡདྷམྨེསུ པཱམོཀྑབྷཱཝེན དྷུརབྷཱུཏཱནཾ སམྨཱདིཊྛིསམྨཱསམཱདྷཱིནཾ སཱཏིསཡཀིཙྩནྟརབྷཱཝནིཔྥཏྟིཡཱ ཀཱརཎབྷཱུཏཱཡ ཏཛྫཱབྷིནཱིཧཱརཱབྷིནིཧཏཱཡ སཀྐཙྩཾ ནིརནྟརཾ ཙིརཀཱལཾ སམཱཧིཏཱཡ སམྨཱཔཊིཔཏྟིཡཱ ཡཐཱཀྐམཾ པཉྙཱཡ སམཱདྷིསྨིཉྩ ཨུཀྐཾསཔཱརམིཔྤཏྟིཡཱ སཝིསེསཾ སབྦགུཎེཧི ཨགྒབྷཱཝེ ཋིཏཱ། ཏེ སཱརིཔུཏྟམོགྒལླཱནཱ སཏིཔི མཧཱསཱཝཀཏྟེ སཱཝཀཔཱརམིཡཱ མཏྠཀེ སབྦསཱཝཀཱནཾ ཨགྒབྷཱཝེ ཋིཏཏྟཱ ཨབྷིནཱིཧཱརམཧནྟབྷཱཝཏོ, པུབྦཡོགམཧནྟབྷཱཝཏོ ཙ ‘‘ཨགྒསཱཝཀཱ’’ཨིཙྩེཝ ཝུཙྩནྟི། ཡེ པན ཨརིཡསཱཝཀཱ ཨགྒསཱཝཀཱ ཝིཡ ཙ མཧཱསཱཝཀཱ ཝིཡ ཙ ན པརིམིཏཱཝ, ཨཐ ཁོ ཨནེཀསཏཱ ཨནེཀསཧསྶཱ, ཏེ པཀཏིསཱཝཀཱ། ཨིདྷ པཱལི༹ཡཾ ཨཱརཱུལ༹ྷཱ པན པརིམིཏཱཝ གཱཐཱཝསེན པརིགྒཧིཏཏྟཱ། ཏཐཱཔི མཧཱསཱཝཀེསུཔི ཀེཙི ཨིདྷ པཱལི༹ཡཾ ནཱརཱུལ༹ྷཱ།

    Kasmā pana te eva therā ‘‘mahāsāvakā’’ti vuccantīti? Abhinīhārassa mahantabhāvato. Tathā hi dve aggasāvakāpi mahāsāvakesu antogadhā. Te hi sāvakapāramīñāṇassa matthakappattiyā sāvakesu aggadhammādhigamena aggaṭṭhāne ṭhitāpi abhinīhāramahantatāsāmaññena ‘‘mahāsāvakā’’tipi vuccanti. Itare pana pakatisāvakehi sātisayamahābhinīhārā. Tathā hi te padumuttarassa bhagavato kāle katapaṇidhānā. Tato eva sātisayaṃ abhiññāsamāpattīsu vasino pabhinnapaṭisambhidā ca. Kāmaṃ sabbepi arahanto sīlavisuddhiādike sampādetvā catūsu satipaṭṭhānesu patiṭṭhitacittā satta bojjhaṅge yathābhūtaṃ bhāvetvā maggapaṭipāṭiyā anavasesato kilese khepetvā aggaphale patiṭṭhahanti, tathāpi yathā saddhāvimuttato diṭṭhippattassa, paññāvimuttato ca ubhatobhāgavimuttassa pubbabhāgabhāvanāviseso addhā icchito viseso, evaṃ abhinīhāramahantatāpubbayogamahantatāhi attasantāne sātisayaguṇavisesassa nipphāditattā sīlādiguṇehi mahantā sāvakāti mahāsāvakā. Tesuyeva pana ye bodhipakkhiyadhammesu pāmokkhabhāvena dhurabhūtānaṃ sammādiṭṭhisammāsamādhīnaṃ sātisayakiccantarabhāvanipphattiyā kāraṇabhūtāya tajjābhinīhārābhinihatāya sakkaccaṃ nirantaraṃ cirakālaṃ samāhitāya sammāpaṭipattiyā yathākkamaṃ paññāya samādhismiñca ukkaṃsapāramippattiyā savisesaṃ sabbaguṇehi aggabhāve ṭhitā. Te sāriputtamoggallānā satipi mahāsāvakatte sāvakapāramiyā matthake sabbasāvakānaṃ aggabhāve ṭhitattā abhinīhāramahantabhāvato, pubbayogamahantabhāvato ca ‘‘aggasāvakā’’icceva vuccanti. Ye pana ariyasāvakā aggasāvakā viya ca mahāsāvakā viya ca na parimitāva, atha kho anekasatā anekasahassā, te pakatisāvakā. Idha pāḷiyaṃ ārūḷhā pana parimitāva gāthāvasena pariggahitattā. Tathāpi mahāsāvakesupi keci idha pāḷiyaṃ nārūḷhā.

    ཨེཝཾ ཏིཝིདྷཱཔི ཏེ ཨནིམིཏྟཝིམོཀྑཱདིབྷེདཏོ ཏིཝིདྷཱ, ཝིམོཀྑསམདྷིགམཝསེནཔི ཏིཝིདྷཱ། ཏཡོ ཧི ཨིམེ ཝིམོཀྑཱ སུཉྙཏོ ཝིམོཀྑོ, ཨནིམིཏྟོ ཝིམོཀྑོ, ཨཔྤཎིཧིཏོ ཝིམོཀྑོཏི། ཏེ ཙ ཝིམོཀྑཱ སུཉྙཏཱདཱིཧི ཨནིཙྩཱནུཔསྶནཱདཱིཧི ཏཱིཧི ཨནུཔསྶནཱཧི ཨདྷིགནྟབྦཱ། ཨཱདིཏོ ཧི ཨནིཙྩཱདཱིསུ ཡེན ཀེནཙི ཨཱཀཱརེན ཝིཔསྶནཱབྷིནིཝེསོ ཧོཏི། ཡདཱ པན ཝུཊྛཱནགཱམིནིཡཱ ཝིཔསྶནཱཡ ཨནིཙྩཱཀཱརཏོ སངྑཱརེ སམྨསནྟིཡཱ མགྒཝུཊྛཱནཾ ཧོཏི, ཏདཱ ཝིཔསྶནཱ སཏིཔི རཱགནིམིཏྟཱདཱིནཾ སམུགྒྷཱཊནེ སངྑཱརནིམིཏྟཾ པན སཱ ན ཝིསྶཛྫེཏཱིཏི ནིཔྤརིཡཱཡེན ཨནིམིཏྟནཱམཾ ཨལབྷམཱནཱ ཨཏྟནོ མགྒསྶ ཨནིམིཏྟནཱམཾ དཱཏུཾ ན སཀྐོཏཱིཏི། ཀིཉྩཱཔི ཨབྷིདྷམྨེ ཨནིམིཏྟཝིམོཀྑོ ན ཨུདྡྷཊོ, སུཏྟནྟེ པན རཱགཱདིནིམིཏྟཱནཾ སམུགྒྷཱཊེན ལབྦྷཏཱིཏི།

    Evaṃ tividhāpi te animittavimokkhādibhedato tividhā, vimokkhasamadhigamavasenapi tividhā. Tayo hi ime vimokkhā suññato vimokkho, animitto vimokkho, appaṇihito vimokkhoti. Te ca vimokkhā suññatādīhi aniccānupassanādīhi tīhi anupassanāhi adhigantabbā. Ādito hi aniccādīsu yena kenaci ākārena vipassanābhiniveso hoti. Yadā pana vuṭṭhānagāminiyā vipassanāya aniccākārato saṅkhāre sammasantiyā maggavuṭṭhānaṃ hoti, tadā vipassanā satipi rāganimittādīnaṃ samugghāṭane saṅkhāranimittaṃ pana sā na vissajjetīti nippariyāyena animittanāmaṃ alabhamānā attano maggassa animittanāmaṃ dātuṃ na sakkotīti. Kiñcāpi abhidhamme animittavimokkho na uddhaṭo, suttante pana rāgādinimittānaṃ samugghāṭena labbhatīti.

    ‘‘ཨནིམིཏྟཉྩ བྷཱཝེཧི, མཱནཱནུསཡམུཛྫཧ།

    ‘‘Animittañca bhāvehi, mānānusayamujjaha;

    ཏཏོ མཱནཱབྷིསམཡཱ, ཨུཔསནྟོ ཙརིསྶསཱི’’ཏི༎ (སཾ॰ ནི॰ ༡.༢༡༢) –

    Tato mānābhisamayā, upasanto carissasī’’ti. (saṃ. ni. 1.212) –

    ཨཱདིནཱ ཧི ཝིཔསྶནཱཡ ཨནིམིཏྟཝིམོཀྑབྷཱཝོ ཨནུཏྟརསྶ ཨནིམིཏྟཝིམོཀྑབྷཱཝོ ཙ ཝུཏྟོ། ཡདཱ ཝུཊྛཱནགཱམིནིཡཱ ཝིཔསྶནཱཡ དུཀྑཏོ སངྑཱརེ སམྨསནྟིཡཱ མགྒཝུཊྛཱནཾ ཧོཏི, ཏདཱ ཝིཔསྶནཱ རཱགཔཎིདྷིཨཱདཱིནཾ སམུགྒྷཱཊནེན ཨཔྤཎིཧིཏནཱམཾ ལབྷཏཱིཏི ཨཔྤཎིཧིཏཝིམོཀྑཾ ནཱམ ཧོཏི། ཏདནནྟརོ ཙ མགྒོ ཨཔྤཎིཧིཏཝིམོཀྑོ། ཡདཱ པན ཝུཊྛཱནགཱམིནིཡཱ ཝིཔསྶནཱཡ ཨནཏྟཱཀཱརེན སམྨསནྟིཡཱ མགྒཝུཊྛཱནཾ ཧོཏི, ཏདཱ ཝིཔསྶནཱ ཨཏྟདིཊྛིཡཱ སམུགྒྷཱཊནེན སུཉྙཏནཱམཾ ལབྷཏཱིཏི སུཉྙཏཝིམོཀྑཾ ནཱམ ཧོཏི། ཏདནནྟརོ ཙ མགྒོ སུཉྙཏཝིམོཀྑོ ནཱམ ཧོཏི། ཨིམེསུ ཨགྒམགྒབྷཱུཏེསུ ཏཱིསུ ཝིམོཀྑེསུ ཨིམེསཾ ཐེརཱནཾ ཀེཙི ཨནིམིཏྟཝིམོཀྑེན མུཏྟཱ, ཀེཙི ཨཔྤཎིཧིཏཝིམོཀྑེན, ཀེཙི སུཉྙཏཝིམོཀྑེན། ཏེན ཝུཏྟཾ – ‘‘ཨནིམིཏྟཝིམོཀྑཱདིབྷེདཏོ ཏིཝིདྷཱ, ཝིམོཀྑསམདྷིགམེནཔི ཏིཝིདྷཱ’’ཏི།

    Ādinā hi vipassanāya animittavimokkhabhāvo anuttarassa animittavimokkhabhāvo ca vutto. Yadā vuṭṭhānagāminiyā vipassanāya dukkhato saṅkhāre sammasantiyā maggavuṭṭhānaṃ hoti, tadā vipassanā rāgapaṇidhiādīnaṃ samugghāṭanena appaṇihitanāmaṃ labhatīti appaṇihitavimokkhaṃ nāma hoti. Tadanantaro ca maggo appaṇihitavimokkho. Yadā pana vuṭṭhānagāminiyā vipassanāya anattākārena sammasantiyā maggavuṭṭhānaṃ hoti, tadā vipassanā attadiṭṭhiyā samugghāṭanena suññatanāmaṃ labhatīti suññatavimokkhaṃ nāma hoti. Tadanantaro ca maggo suññatavimokkho nāma hoti. Imesu aggamaggabhūtesu tīsu vimokkhesu imesaṃ therānaṃ keci animittavimokkhena muttā, keci appaṇihitavimokkhena, keci suññatavimokkhena. Tena vuttaṃ – ‘‘animittavimokkhādibhedato tividhā, vimokkhasamadhigamenapi tividhā’’ti.

    པཊིཔདཱཝིབྷཱགེན ཙཏུབྦིདྷཱ། ཙཏསྶོ ཧི པཊིཔདཱ – དུཀྑཔཊིཔདཱ དནྡྷཱབྷིཉྙཱ, དུཀྑཔཊིཔདཱ ཁིཔྤཱབྷིཉྙཱ, སུཁཔཊིཔདཱ དནྡྷཱབྷིཉྙཱ, སུཁཔཊིཔདཱ ཁིཔྤཱབྷིཉྙཱཏི། ཏཏྠ རཱུཔམུཁཱདཱིསུ ཝིཔསྶནཱབྷིནིཝེསེསུ ཡོ རཱུཔམུཁེན ཝིཔསྶནཾ ཨབྷིནིཝིསིཏྭཱ ཙཏྟཱརི མཧཱབྷཱུཏཱནི པརིགྒཧེཏྭཱ ཨུཔཱདཱརཱུཔཾ པརིགྒཎྷཱཏི ཨརཱུཔཾ པརིགྒཎྷཱཏི, རཱུཔཱརཱུཔཾ པན པརིགྒཎྷནྟོ དུཀྑེན ཀསིརེན ཀིལམནྟོ པརིགྒཧེཏུཾ སཀྐོཏི, ཏསྶ དུཀྑཔཊིཔདཱ ནཱམ ཧོཏི, པརིགྒཧིཏརཱུཔཱརཱུཔསྶ པན ཝིཔསྶནཱཔརིཝཱསེ མགྒཔཱཏུབྷཱཝདནྡྷཏཱཡ དནྡྷཱབྷིཉྙཱ ནཱམ ཧོཏི། ཡོཔི རཱུཔཱརཱུཔཾ པརིགྒཧེཏྭཱ ནཱམརཱུཔཾ ཝཝཏྠཔེནྟོ དུཀྑེན ཀསིརེན ཀིལམནྟོ ཝཝཏྠཔེཏི, ཝཝཏྠཔིཏེ ཙ ནཱམརཱུཔེ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏུཾ སཀྐོཏི, ཏསྶཔི དུཀྑཔཊིཔདཱ དནྡྷཱབྷིཉྙཱ ནཱམ ཧོཏི། ཨཔརོ ནཱམརཱུཔམྤི ཝཝཏྠཔེཏྭཱ པཙྩཡེ པརིགྒཎྷནྟོ དུཀྑེན ཀསིརེན ཀིལམནྟོ པརིགྒཎྷཱཏི། པཙྩཡེ ཙ པརིགྒཧེཏྭཱ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏི, ཨེཝམྤི དུཀྑཔཊིཔདཱ དནྡྷཱབྷིཉྙཱ ནཱམ ཧོཏི། ཨཔརོ པཙྩཡེཔི པརིགྒཧེཏྭཱ ལཀྑཎཱནི པཊིཝིཛ྄ཛྷནྟོ དུཀྑེན ཀསིརེན ཀིལམནྟོ པཊིཝིཛ྄ཛྷཏི, པཊིཝིདྡྷལཀྑཎོ ཙ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏི, ཨེཝམྤི དུཀྑཔཊིཔདཱ དནྡྷཱབྷིཉྙཱ ནཱམ ཧོཏི། ཨཔརོ ལཀྑཎཱནིཔི པཊིཝིཛ྄ཛྷིཏྭཱ ཝིཔསྶནཱཉཱཎེ ཏིཀྑེ སཱུརེ པསནྣེ ཝཧནྟེ ཨུཔྤནྣཝིཔསྶནཱནིཀནྟིཾ པརིཡཱདིཡམཱནོ དུཀྑེན ཀསིརེན ཀིལམནྟོ པརིཡཱདིཡཏི, ནིཀནྟིཉྩ པརིཡཱདིཡིཏྭཱ ཝིཔསྶནཱཔརིཝཱསཾ ཝསནྟོ ཙིརེན མགྒཾ ཨུཔྤཱདེཏི, ཨེཝམྤི དུཀྑཔཊིཔདཱ དནྡྷཱབྷིཉྙཱ ནཱམ ཧོཏི། ཡཐཱཝུཏྟཱསུཡེཝ པཊིཔདཱསུ མགྒཔཱཏུབྷཱཝསྶ ཁིཔྤཏཱཡ དུཀྑཔཊིཔདཱ ཁིཔྤཱབྷིཉྙཱ, ཏཱསཾ པན པཊིཔདཱནཾ ཨཀིཙྪསིདྡྷིཡཾ མགྒཔཱཏུབྷཱཝསྶ དནྡྷཏཱཡ ཁིཔྤཏཱཡ ཙ ཡཐཱཀྐམཾ སུཁཔཊིཔདཱ དནྡྷཱབྷིཉྙཱ, སུཁཔཊིཔདཱ ཁིཔྤཱབྷིཉྙཱ ཙ ཝེདིཏབྦཱ། ཨིམཱསཾ ཙཏསྶནྣཾ པཊིཔདཱནཾ ཝསེན ཨགྒམགྒཔྤཏྟིཡཱ ཐེརཱནཾ ཙཏུབྦིདྷཏཱ ཝེདིཏབྦཱ། ན ཧི པཊིཔདཱཧི ཝིནཱ ཨརིཡམགྒཱདྷིགམོ ཨཏྠི། ཏཐཱ ཧི ཨབྷིདྷམྨེ ‘‘ཡསྨིཾ སམཡེ ལོཀུཏྟརཾ ཛྷཱནཾ བྷཱཝེཏི ནིཡྻཱནིཀཾ ཨཔཙཡགཱམིཾ…པེ॰… དུཀྑཔཊིཔདཾ དནྡྷཱབྷིཉྙ’’ནྟིཨཱདིནཱ (དྷ॰ ས॰ ༢༧༧) པཊིཔདཱཡ སདྡྷིཾཡེཝ ཨརིཡམགྒོ ཝིབྷཏྟོ, ཏེན ཝུཏྟཾ ‘‘པཊིཔདཱཝིབྷཱགེན ཙཏུབྦིདྷཱ’’ཏི།

    Paṭipadāvibhāgena catubbidhā. Catasso hi paṭipadā – dukkhapaṭipadā dandhābhiññā, dukkhapaṭipadā khippābhiññā, sukhapaṭipadā dandhābhiññā, sukhapaṭipadā khippābhiññāti. Tattha rūpamukhādīsu vipassanābhinivesesu yo rūpamukhena vipassanaṃ abhinivisitvā cattāri mahābhūtāni pariggahetvā upādārūpaṃ pariggaṇhāti arūpaṃ pariggaṇhāti, rūpārūpaṃ pana pariggaṇhanto dukkhena kasirena kilamanto pariggahetuṃ sakkoti, tassa dukkhapaṭipadā nāma hoti, pariggahitarūpārūpassa pana vipassanāparivāse maggapātubhāvadandhatāya dandhābhiññā nāma hoti. Yopi rūpārūpaṃ pariggahetvā nāmarūpaṃ vavatthapento dukkhena kasirena kilamanto vavatthapeti, vavatthapite ca nāmarūpe vipassanāparivāsaṃ vasanto cirena maggaṃ uppādetuṃ sakkoti, tassapi dukkhapaṭipadā dandhābhiññā nāma hoti. Aparo nāmarūpampi vavatthapetvā paccaye pariggaṇhanto dukkhena kasirena kilamanto pariggaṇhāti. Paccaye ca pariggahetvā vipassanāparivāsaṃ vasanto cirena maggaṃ uppādeti, evampi dukkhapaṭipadā dandhābhiññā nāma hoti. Aparo paccayepi pariggahetvā lakkhaṇāni paṭivijjhanto dukkhena kasirena kilamanto paṭivijjhati, paṭividdhalakkhaṇo ca vipassanāparivāsaṃ vasanto cirena maggaṃ uppādeti, evampi dukkhapaṭipadā dandhābhiññā nāma hoti. Aparo lakkhaṇānipi paṭivijjhitvā vipassanāñāṇe tikkhe sūre pasanne vahante uppannavipassanānikantiṃ pariyādiyamāno dukkhena kasirena kilamanto pariyādiyati, nikantiñca pariyādiyitvā vipassanāparivāsaṃ vasanto cirena maggaṃ uppādeti, evampi dukkhapaṭipadā dandhābhiññā nāma hoti. Yathāvuttāsuyeva paṭipadāsu maggapātubhāvassa khippatāya dukkhapaṭipadā khippābhiññā, tāsaṃ pana paṭipadānaṃ akicchasiddhiyaṃ maggapātubhāvassa dandhatāya khippatāya ca yathākkamaṃ sukhapaṭipadā dandhābhiññā, sukhapaṭipadā khippābhiññā ca veditabbā. Imāsaṃ catassannaṃ paṭipadānaṃ vasena aggamaggappattiyā therānaṃ catubbidhatā veditabbā. Na hi paṭipadāhi vinā ariyamaggādhigamo atthi. Tathā hi abhidhamme ‘‘yasmiṃ samaye lokuttaraṃ jhānaṃ bhāveti niyyānikaṃ apacayagāmiṃ…pe… dukkhapaṭipadaṃ dandhābhiñña’’ntiādinā (dha. sa. 277) paṭipadāya saddhiṃyeva ariyamaggo vibhatto, tena vuttaṃ ‘‘paṭipadāvibhāgena catubbidhā’’ti.

    ཨིནྡྲིཡཱདྷིཀཝིབྷཱགེན པཉྩཝིདྷཱ། སཏིཔི ནེསཾ སཙྩཱབྷིསམྦོདྷསཱམཉྙེ ཨེཀཙྩེ ཐེརཱ སདྡྷུཏྟརཱ, སེཡྻཐཱཔི ཐེརོ ཝཀྐལི; ཨེཀཙྩེ ཝཱིརིཡུཏྟརཱ, སེཡྻཐཱཔི ཐེརོ མཧཱསོཎོ, ཀོལི༹ཝཱིསོ; ཨེཀཙྩེ སཏུཏྟརཱ, སེཡྻཐཱཔི ཐེརོ སོབྷིཏོ, ཨེཀཙྩེ སམཱདྷུཏྟརཱ, སེཡྻཐཱཔི ཐེརོ ཙཱུལ༹པནྠཀོ, ཨེཀཙྩེ པཉྙུཏྟརཱ, སེཡྻཐཱཔི ཐེརོ ཨཱནནྡོ། ཏཐཱ ཧི སོ གཏིམནྟཏཱཡ ཨཏྠཀོསལླཱདིཝནྟཏཱཡ ཙ པསཾསིཏོ, ཨཡཉྩ ཝིབྷཱགོ པུབྦབྷཱགེ ལབྦྷམཱནཝིསེསཝསེན ཝུཏྟོ། ཨགྒམགྒཀྑཎེ པན སེསཱནམྤི ཨིནྡྲིཡཱནཾ ཨེཀསབྷཱཝཱ ཨིཙྪིཏཱཏི།

    Indriyādhikavibhāgena pañcavidhā. Satipi nesaṃ saccābhisambodhasāmaññe ekacce therā saddhuttarā, seyyathāpi thero vakkali; ekacce vīriyuttarā, seyyathāpi thero mahāsoṇo, koḷivīso; ekacce satuttarā, seyyathāpi thero sobhito, ekacce samādhuttarā, seyyathāpi thero cūḷapanthako, ekacce paññuttarā, seyyathāpi thero ānando. Tathā hi so gatimantatāya atthakosallādivantatāya ca pasaṃsito, ayañca vibhāgo pubbabhāge labbhamānavisesavasena vutto. Aggamaggakkhaṇe pana sesānampi indriyānaṃ ekasabhāvā icchitāti.

    ཏཐཱ པཱརམིཔྤཏྟཱ, པཊིསམྦྷིདཱཔྤཏྟཱ, ཚལ༹བྷིཉྙཱ, ཏེཝིཛྫཱ, སུཀྑཝིཔསྶཀཱཏི པཉྩཝིདྷཱ། སཱཝཀེསུ ཧི ཨེཀཙྩེ སཱཝཀཔཱརམིཡཱ མཏྠཀཔྤཏྟཱ, ཡཐཱ ཏཾ ཨཱཡསྨཱ སཱརིཔུཏྟོ, ཨཱཡསྨཱ ཙ མཧཱམོགྒལླཱནོ; ཨེཀཙྩེ ཨཏྠཔཊིསམྦྷིདཱ དྷམྨཔཊིསམྦྷིདཱ ནིརུཏྟིཔཊིསམྦྷིདཱ པཊིབྷཱནཔཊིསམྦྷིདཱཏི ཨིམཱསཾ ཙཏུནྣཾ པཊིསམྦྷིདཱནཾ ཝསེན པཊིསམྦྷིདཱཔྤཏྟཱ; ཨེཀཙྩེ ཨིདྡྷིཝིདྷཉཱཎཱདཱིནཾ ཨབྷིཉྙཱནཾ ཝསེན ཚལ༹བྷིཉྙཱ; ཨེཀཙྩེ པུབྦེནིཝཱསཉཱཎཱདཱིནཾ ཏིསྶནྣཾ ཝིཛྫཱནཾ ཝསེན ཏེཝིཛྫཱ། ཡེ པན ཁཎིཀསམཱདྷིམཏྟེ ཋཏྭཱ ཝིཔསྶནཾ པཊྛཔེཏྭཱ ཨདྷིགཏཨགྒམགྒཱ, ཏེ ཨཱདིཏོ ཨནྟརནྟརཱ ཙ སམཱདྷིཛེན ཛྷཱནངྒེན ཝིཔསྶནཱབྦྷནྟརཾ པཊིསནྡྷཱནཱནཾ ཨབྷཱཝཱ སུཀྑཱ ཝིཔསྶནཱ ཨེཏེསནྟི སུཀྑཝིཔསྶཀཱ ནཱམ། ཨཡཉྩ ཝིབྷཱགོ སཱཝཀཱནཾ སཱདྷཱརཎབྷཱཝཾ ཨུཔཔརིཀྑིཏྭཱ ཝུཏྟོ། ཨིདྷ པཱལི༹ཡཾ ཨཱགཏཱ ནཏྠེཝ སུཀྑཝིཔསྶཀཱ། ཏེནེཝཱཧ –

    Tathā pāramippattā, paṭisambhidāppattā, chaḷabhiññā, tevijjā, sukkhavipassakāti pañcavidhā. Sāvakesu hi ekacce sāvakapāramiyā matthakappattā, yathā taṃ āyasmā sāriputto, āyasmā ca mahāmoggallāno; ekacce atthapaṭisambhidā dhammapaṭisambhidā niruttipaṭisambhidā paṭibhānapaṭisambhidāti imāsaṃ catunnaṃ paṭisambhidānaṃ vasena paṭisambhidāppattā; ekacce iddhividhañāṇādīnaṃ abhiññānaṃ vasena chaḷabhiññā; ekacce pubbenivāsañāṇādīnaṃ tissannaṃ vijjānaṃ vasena tevijjā. Ye pana khaṇikasamādhimatte ṭhatvā vipassanaṃ paṭṭhapetvā adhigataaggamaggā, te ādito antarantarā ca samādhijena jhānaṅgena vipassanābbhantaraṃ paṭisandhānānaṃ abhāvā sukkhā vipassanā etesanti sukkhavipassakā nāma. Ayañca vibhāgo sāvakānaṃ sādhāraṇabhāvaṃ upaparikkhitvā vutto. Idha pāḷiyaṃ āgatā nattheva sukkhavipassakā. Tenevāha –

    ‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ།

    ‘‘Paṭisambhidā catasso, vimokkhāpi ca aṭṭhime;

    ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསན’’ནྟིཨཱདི༎ (ཨཔ॰ ཐེར ༡.༡.༣༧༤; ༢.༤༣.༡༤)།

    Chaḷabhiññā sacchikatā, kataṃ buddhassa sāsana’’ntiādi. (apa. thera 1.1.374; 2.43.14);

    ཨེཝཾ པཱརམིཔྤཏྟཱདིཝསེན པཉྩཝིདྷཱ།

    Evaṃ pāramippattādivasena pañcavidhā.

    ཨནིམིཏྟཱདིཝསེན ཚབྦིདྷཱ ཨནིམིཏྟཝིམུཏྟོཏིཨཱདཡོ།

    Animittādivasena chabbidhā animittavimuttotiādayo.

    སདྡྷཱདྷུརོ , པཉྙཱདྷུརོཏི དུཝིདྷཱ། ཏཐཱ ཨཔྤཎིཧིཏཝིམུཏྟོ པཉྙཱཝིམུཏྟོ ཙཱཏི། ཨེཝཾ ཨནིམིཏྟཝིམུཏྟཱདིཝསེན ཙ པརིཡཱཡཝིམུཏྟབྷེདེན སཏྟཝིདྷཱ། ཙཏཱུསུ ཧི ཨརཱུཔསམཱཔཏྟཱིསུ ཨེཀམེཀཾ པཱདཀཾ ཀཏྭཱ ཝིཔསྶནཾ ཨཱརབྷིཏྭཱ ཨརཧཏྟཾ པཏྟཱ ཙཏྟཱརོ, ནིརོདྷཏོ ཝུཊྛཱཡ ཨརཧཏྟཾ པཏྟོ ཙཱཏི པཉྩ, ཨུབྷཏོབྷཱགཝིམུཏྟཱ, སདྡྷཱདྷུརཔཉྙཱདྷུརཝསེན དྭེ པཉྙཱཝིམུཏྟཱཏི ཨེཝཾ ཝིམུཏྟིབྷེདེན སཏྟཝིདྷཱ།

    Saddhādhuro , paññādhuroti duvidhā. Tathā appaṇihitavimutto paññāvimutto cāti. Evaṃ animittavimuttādivasena ca pariyāyavimuttabhedena sattavidhā. Catūsu hi arūpasamāpattīsu ekamekaṃ pādakaṃ katvā vipassanaṃ ārabhitvā arahattaṃ pattā cattāro, nirodhato vuṭṭhāya arahattaṃ patto cāti pañca, ubhatobhāgavimuttā, saddhādhurapaññādhuravasena dve paññāvimuttāti evaṃ vimuttibhedena sattavidhā.

    དྷུརཔཊིཔདཱཝིབྷཱགེན ཨཊྛཝིདྷཱ། ཡོ ཧི དུཀྑཔཊིཔདཱཡ དནྡྷཱབྷིཉྙཱཡ ནིཡྻཱཏི, སོ སདྡྷཱདྷུརཔཉྙཱདྷུརཝསེན དུཝིདྷཱ, ཏཐཱ སེསཔཊིཔདཱསུཔཱིཏི ཨེཝཾ དྷུརཔཊིཔདཱཝིབྷཱགེན ཨཊྛཝིདྷཱ།

    Dhurapaṭipadāvibhāgena aṭṭhavidhā. Yo hi dukkhapaṭipadāya dandhābhiññāya niyyāti, so saddhādhurapaññādhuravasena duvidhā, tathā sesapaṭipadāsupīti evaṃ dhurapaṭipadāvibhāgena aṭṭhavidhā.

    ཝིམུཏྟིབྷེདེན ནཝཝིདྷཱ། པཉྩ ཨུབྷཏོབྷཱགཝིམུཏྟཱ, དྭེ པཉྙཱཝིམུཏྟཱ, པཉྙཱཝིམུཏྟིཡཾ ཙེཏོཝིམུཏྟིཡཉྩ པཱརམིཔྤཏྟཱ དྭེ ཨགྒསཱཝཀཱ ཙཱཏི ཨེཝཾ ནཝཝིདྷཱ།

    Vimuttibhedena navavidhā. Pañca ubhatobhāgavimuttā, dve paññāvimuttā, paññāvimuttiyaṃ cetovimuttiyañca pāramippattā dve aggasāvakā cāti evaṃ navavidhā.

    ཝིམུཏྟིཝསེནེཝ དསཝིདྷཱ། ཙཏཱུསུ ཨརཱུཔཱཝཙརཛ྄ཛྷཱནེསུ ཙ ཨེཀམེཀཾ པཱདཀཾ ཀཏྭཱ ཨརཧཏྟཾ པཏྟཱ ཙཏྟཱརོ, སུཀྑཝིཔསྶཀོཏི པཉྩ པཉྙཱཝིམུཏྟཱ, ཡཐཱཝུཏྟཱ ཙ ཨུབྷཏོབྷཱགཝིམུཏྟཱ ཙཱཏི ཨེཝཾ ཝིམུཏྟིབྷེདེནེཝ དསཝིདྷཱ། ཏེ ཡཐཱཝུཏྟེན དྷུརབྷེདེན བྷིཛྫམཱནཱ ཝཱིསཏི ཧོནྟི། པཊིཔདཱབྷེདེན བྷིཛྫམཱནཱ ཙཏྟཱལཱིསཾ ཧོནྟི། པུན པཊིཔདཱབྷེདེན དྷུརབྷེདེན ཙ བྷིཛྫམཱནཱ ཨསཱིཏི ཧོནྟི། ཨཐ ཏེ སུཉྙཏཝིམུཏྟཱདིཝིབྷཱགེན བྷིཛྫམཱནཱ ཙཏྟཱལཱིསཱདྷིཀཱ དྭེ སཏཱནི ཧོནྟི། པུན ཨིནྡྲིཡཱདྷིཀབྷཱཝེན བྷིཛྫམཱནཱ དྭིསཏུཏྟརཾ སཧསྶཾ ཧོནྟཱིཏི། ཨེཝཾ ཨཏྟནོ གུཎཝསེན ཨནེཀབྷེདཝིབྷཏྟེསུ མགྒཊྛཕལཊྛེསུ ཨརིཡསཱཝཀེསུ ཡེ ཨཏྟནོ པཊིཔཏྟིཔཝཏྟིཨཱདིཀེ ཙ ཝིབྷཱཝེནྟི། ཡེ ‘‘ཚནྣཱ མེ ཀུཊིཀཱ’’ཏིཨཱདིཀཱ (ཐེརགཱ॰ ༡) གཱཐཱ ཨུདཱནཱདིཝསེན ཨབྷཱསིཾསུ། ཏེ ཙ ཨིདྷ གཱཐཱམུཁེན སངྒཧཾ ཨཱརཱུལ༹ྷཱ། ཏེནཱཧ – ‘‘སཱིཧཱནཾཝ ནདནྟཱནཾ…པེ॰… ཕུསིཏྭཱ ཨཙྩུཏཾ པད’’ནྟི (ཐེརགཱ॰ ནིདཱནགཱཐཱ)། ཨེཝམེཏྠ པཀིཎྞཀཀཐཱ ཝེདིཏབྦཱ།

    Vimuttivaseneva dasavidhā. Catūsu arūpāvacarajjhānesu ca ekamekaṃ pādakaṃ katvā arahattaṃ pattā cattāro, sukkhavipassakoti pañca paññāvimuttā, yathāvuttā ca ubhatobhāgavimuttā cāti evaṃ vimuttibhedeneva dasavidhā. Te yathāvuttena dhurabhedena bhijjamānā vīsati honti. Paṭipadābhedena bhijjamānā cattālīsaṃ honti. Puna paṭipadābhedena dhurabhedena ca bhijjamānā asīti honti. Atha te suññatavimuttādivibhāgena bhijjamānā cattālīsādhikā dve satāni honti. Puna indriyādhikabhāvena bhijjamānā dvisatuttaraṃ sahassaṃ hontīti. Evaṃ attano guṇavasena anekabhedavibhattesu maggaṭṭhaphalaṭṭhesu ariyasāvakesu ye attano paṭipattipavattiādike ca vibhāventi. Ye ‘‘channā me kuṭikā’’tiādikā (theragā. 1) gāthā udānādivasena abhāsiṃsu. Te ca idha gāthāmukhena saṅgahaṃ ārūḷhā. Tenāha – ‘‘sīhānaṃva nadantānaṃ…pe… phusitvā accutaṃ pada’’nti (theragā. nidānagāthā). Evamettha pakiṇṇakakathā veditabbā.

    ཝངྒཱིསཏྠེརགཱཐཱཝཎྞནཱ ནིཊྛིཏཱ།

    Vaṅgīsattheragāthāvaṇṇanā niṭṭhitā.

    མཧཱནིཔཱཏཝཎྞནཱ ནིཊྛིཏཱ།

    Mahānipātavaṇṇanā niṭṭhitā.

    བདརཏིཏྠམཧཱཝིཧཱརཝཱསིནཱ ཨཱཙརིཡདྷམྨཔཱལཏྠེརེན ཀཏཱ

    Badaratitthamahāvihāravāsinā ācariyadhammapālattherena katā

    ཐེརགཱཐཱཝཎྞནཱ ནིཊྛིཏཱ།

    Theragāthāvaṇṇanā niṭṭhitā.




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཐེརགཱཐཱཔཱལི༹ • Theragāthāpāḷi / ༡. ཝངྒཱིསཏྠེརགཱཐཱ • 1. Vaṅgīsattheragāthā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact