| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. ৰণিজ্জসুত্তং
9. Vaṇijjasuttaṃ
৭৯. অথ খো আযস্মা সারিপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা সারিপুত্তো ভগৰন্তং এতদৰোচ – ‘‘কো নু খো, ভন্তে, হেতু কো পচ্চযো, যেন মিধেকচ্চস্স তাদিসাৰ ৰণিজ্জা পযুত্তা ছেদগামিনী হোতি? কো পন, ভন্তে, হেতু কো পচ্চযো, যেন মিধেকচ্চস্স তাদিসাৰ ৰণিজ্জা পযুত্তা ন যথাধিপ্পাযা 1 হোতি? কো নু খো, ভন্তে হেতু কো পচ্চযো, যেন মিধেকচ্চস্স তাদিসাৰ ৰণিজ্জা পযুত্তা যথাধিপ্পাযা 2 হোতি? কো পন, ভন্তে, হেতু কো পচ্চযো, যেন মিধেকচ্চস্স তাদিসাৰ ৰণিজ্জা পযুত্তা পরাধিপ্পাযা হোতী’’তি?
79. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘ko nu kho, bhante, hetu ko paccayo, yena midhekaccassa tādisāva vaṇijjā payuttā chedagāminī hoti? Ko pana, bhante, hetu ko paccayo, yena midhekaccassa tādisāva vaṇijjā payuttā na yathādhippāyā 3 hoti? Ko nu kho, bhante hetu ko paccayo, yena midhekaccassa tādisāva vaṇijjā payuttā yathādhippāyā 4 hoti? Ko pana, bhante, hetu ko paccayo, yena midhekaccassa tādisāva vaṇijjā payuttā parādhippāyā hotī’’ti?
‘‘ইধ, সারিপুত্ত, একচ্চো সমণং ৰা ব্রাহ্মণং ৰা উপসঙ্কমিত্ৰা পৰারেতি – ‘ৰদতু, ভন্তে, পচ্চযেনা’তি। সো যেন পৰারেতি তং ন দেতি। সো চে ততো চুতো ইত্থত্তং আগচ্ছতি, সো যঞ্ঞদেৰ ৰণিজ্জং পযোজেতি, সাস্স হোতি ছেদগামিনী।
‘‘Idha, sāriputta, ekacco samaṇaṃ vā brāhmaṇaṃ vā upasaṅkamitvā pavāreti – ‘vadatu, bhante, paccayenā’ti. So yena pavāreti taṃ na deti. So ce tato cuto itthattaṃ āgacchati, so yaññadeva vaṇijjaṃ payojeti, sāssa hoti chedagāminī.
‘‘ইধ পন, সারিপুত্ত, একচ্চো সমণং ৰা ব্রাহ্মণং ৰা উপসঙ্কমিত্ৰা পৰারেতি – ‘ৰদতু , ভন্তে, পচ্চযেনা’তি। সো যেন পৰারেতি তং ন যথাধিপ্পাযং দেতি। সো চে ততো চুতো ইত্থত্তং আগচ্ছতি, সো যঞ্ঞদেৰ ৰণিজ্জং পযোজেতি, সাস্স ন হোতি যথাধিপ্পাযা 5।
‘‘Idha pana, sāriputta, ekacco samaṇaṃ vā brāhmaṇaṃ vā upasaṅkamitvā pavāreti – ‘vadatu , bhante, paccayenā’ti. So yena pavāreti taṃ na yathādhippāyaṃ deti. So ce tato cuto itthattaṃ āgacchati, so yaññadeva vaṇijjaṃ payojeti, sāssa na hoti yathādhippāyā 6.
‘‘ইধ পন, সারিপুত্ত, একচ্চো সমণং ৰা ব্রাহ্মণং ৰা উপসঙ্কমিত্ৰা পৰারেতি – ‘ৰদতু, ভন্তে, পচ্চযেনা’তি। সো যেন পৰারেতি তং যথাধিপ্পাযং দেতি। সো চে ততো চুতো ইত্থত্তং আগচ্ছতি, সো যঞ্ঞদেৰ ৰণিজ্জং পযোজেতি, সাস্স হোতি যথাধিপ্পাযা 7।
‘‘Idha pana, sāriputta, ekacco samaṇaṃ vā brāhmaṇaṃ vā upasaṅkamitvā pavāreti – ‘vadatu, bhante, paccayenā’ti. So yena pavāreti taṃ yathādhippāyaṃ deti. So ce tato cuto itthattaṃ āgacchati, so yaññadeva vaṇijjaṃ payojeti, sāssa hoti yathādhippāyā 8.
‘‘ইধ, সারিপুত্ত, একচ্চো সমণং ৰা ব্রাহ্মণং ৰা উপসঙ্কমিত্ৰা পৰারেতি – ‘ৰদতু, ভন্তে, পচ্চযেনা’তি। সো যেন পৰারেতি তং পরাধিপ্পাযং দেতি। সো চে ততো চুতো ইত্থত্তং আগচ্ছতি, সো যঞ্ঞদেৰ ৰণিজ্জং পযোজেতি, সাস্স হোতি পরাধিপ্পাযা 9।
‘‘Idha, sāriputta, ekacco samaṇaṃ vā brāhmaṇaṃ vā upasaṅkamitvā pavāreti – ‘vadatu, bhante, paccayenā’ti. So yena pavāreti taṃ parādhippāyaṃ deti. So ce tato cuto itthattaṃ āgacchati, so yaññadeva vaṇijjaṃ payojeti, sāssa hoti parādhippāyā 10.
‘‘অযং খো, সারিপুত্ত, হেতু অযং পচ্চযো, যেন মিধেকচ্চস্স তাদিসাৰ ৰণিজ্জা পযুত্তা ছেদগামিনী হোতি। অযং পন, সারিপুত্ত, হেতু অযং পচ্চযো, যেন মিধেকচ্চস্স তাদিসাৰ ৰণিজ্জা পযুত্তা ন যথাধিপ্পাযা হোতি। অযং খো পন, সারিপুত্ত, হেতু অযং পচ্চযো, যেন মিধেকচ্চস্স তাদিসাৰ ৰণিজ্জা পযুত্তা যথাধিপ্পাযা হোতি। অযং পন, সারিপুত্ত, হেতু অযং পচ্চযো, যেন মিধেকচ্চস্স তাদিসাৰ ৰণিজ্জা পযুত্তা পরাধিপ্পাযা হোতী’’তি। নৰমং।
‘‘Ayaṃ kho, sāriputta, hetu ayaṃ paccayo, yena midhekaccassa tādisāva vaṇijjā payuttā chedagāminī hoti. Ayaṃ pana, sāriputta, hetu ayaṃ paccayo, yena midhekaccassa tādisāva vaṇijjā payuttā na yathādhippāyā hoti. Ayaṃ kho pana, sāriputta, hetu ayaṃ paccayo, yena midhekaccassa tādisāva vaṇijjā payuttā yathādhippāyā hoti. Ayaṃ pana, sāriputta, hetu ayaṃ paccayo, yena midhekaccassa tādisāva vaṇijjā payuttā parādhippāyā hotī’’ti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. ৰণিজ্জসুত্তৰণ্ণনা • 9. Vaṇijjasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৯-১০. ৰণিজ্জসুত্তাদিৰণ্ণনা • 9-10. Vaṇijjasuttādivaṇṇanā
