| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៩. វណិជ្ជសុត្តវណ្ណនា
9. Vaṇijjasuttavaṇṇanā
៧៩. នវមេ តាទិសា វាតិ តំសទិសាវ តំសរិក្ខកាវ។ ឆេទគាមិនី ហោតីតិ ឆេទំ គច្ឆតិ។ យំ បត្ថិតំ, តំ សព្ពំ នស្សតីតិ អត្ថោ។ ន យថាធិប្បាយា ហោតីតិ យថាជ្ឈាសយា ន ហោតិ។ បរាធិប្បាយា ហោតីតិ បរជ្ឈាសយា អជ្ឈាសយតោ អធិកតរផលា ហោតិ។ សមណំ វា ព្រាហ្មណំ វាតិ ឯត្ថ សមិតបាបពាហិតបាបតាហិ សមណព្រាហ្មណតា វេទិតព្ពា។ វទតុ, ភន្តេ, បច្ចយេនាតិ, ភន្តេ, ចតុព្ពិធេន ចីវរាទិនា បច្ចយេន វទេយ្យាសីតិ ឯវំ បវារេតិ និមន្តេតិ។ យេន បវារេតីតិ បរិច្ឆិន្ទិត្វា យត្តកេន បវារេតិ។ តំ ន ទេតីតិ តំ សព្ពសោវ ន ទេតិ។ ន យថាធិប្បាយំ ទេតីតិ យថា តស្ស អជ្ឈាសយោ, ឯវំ ទាតុំ ន សក្កោតិ, ហាបេត្វា អប្បកំ ទេតិ។ យថាធិប្បាយំ ទេតីតិ យត្តកំ សោ ឥច្ឆតិ, តត្តកមេវ ទេតិ។ បរាធិប្បាយំ ទេតីតិ អប្បកំ បវារេត្វា អវត្ថរិត្វា ពហុំ ទេតិ។
79. Navame tādisā vāti taṃsadisāva taṃsarikkhakāva. Chedagāminī hotīti chedaṃ gacchati. Yaṃ patthitaṃ, taṃ sabbaṃ nassatīti attho. Na yathādhippāyā hotīti yathājjhāsayā na hoti. Parādhippāyā hotīti parajjhāsayā ajjhāsayato adhikataraphalā hoti. Samaṇaṃ vā brāhmaṇaṃ vāti ettha samitapāpabāhitapāpatāhi samaṇabrāhmaṇatā veditabbā. Vadatu, bhante, paccayenāti, bhante, catubbidhena cīvarādinā paccayena vadeyyāsīti evaṃ pavāreti nimanteti. Yena pavāretīti paricchinditvā yattakena pavāreti. Taṃ na detīti taṃ sabbasova na deti. Na yathādhippāyaṃ detīti yathā tassa ajjhāsayo, evaṃ dātuṃ na sakkoti, hāpetvā appakaṃ deti. Yathādhippāyaṃ detīti yattakaṃ so icchati, tattakameva deti. Parādhippāyaṃ detīti appakaṃ pavāretvā avattharitvā bahuṃ deti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៩. វណិជ្ជសុត្តំ • 9. Vaṇijjasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៩-១០. វណិជ្ជសុត្តាទិវណ្ណនា • 9-10. Vaṇijjasuttādivaṇṇanā
