| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၉. ဝဏိဇ္ဇသုတ္တဝဏ္ဏနာ
9. Vaṇijjasuttavaṇṇanā
၇၉. နဝမေ တာဒိသာ ဝာတိ တံသဒိသာဝ တံသရိက္ခကာဝ။ ဆေဒဂာမိနီ ဟောတီတိ ဆေဒံ ဂစ္ဆတိ။ ယံ ပတ္ထိတံ, တံ သဗ္ဗံ နသ္သတီတိ အတ္ထော။ န ယထာဓိပ္ပာယာ ဟောတီတိ ယထာဇ္ဈာသယာ န ဟောတိ။ ပရာဓိပ္ပာယာ ဟောတီတိ ပရဇ္ဈာသယာ အဇ္ဈာသယတော အဓိကတရဖလာ ဟောတိ။ သမဏံ ဝာ ဗ္ရာဟ္မဏံ ဝာတိ ဧတ္ထ သမိတပာပဗာဟိတပာပတာဟိ သမဏဗ္ရာဟ္မဏတာ ဝေဒိတဗ္ဗာ။ ဝဒတု, ဘန္တေ, ပစ္စယေနာတိ, ဘန္တေ, စတုဗ္ဗိဓေန စီဝရာဒိနာ ပစ္စယေန ဝဒေယ္ယာသီတိ ဧဝံ ပဝာရေတိ နိမန္တေတိ။ ယေန ပဝာရေတီတိ ပရိစ္ဆိန္ဒိတ္ဝာ ယတ္တကေန ပဝာရေတိ။ တံ န ဒေတီတိ တံ သဗ္ဗသောဝ န ဒေတိ။ န ယထာဓိပ္ပာယံ ဒေတီတိ ယထာ တသ္သ အဇ္ဈာသယော, ဧဝံ ဒာတုံ န သက္ကောတိ, ဟာပေတ္ဝာ အပ္ပကံ ဒေတိ။ ယထာဓိပ္ပာယံ ဒေတီတိ ယတ္တကံ သော ဣစ္ဆတိ, တတ္တကမေဝ ဒေတိ။ ပရာဓိပ္ပာယံ ဒေတီတိ အပ္ပကံ ပဝာရေတ္ဝာ အဝတ္ထရိတ္ဝာ ဗဟုံ ဒေတိ။
79. Navame tādisā vāti taṃsadisāva taṃsarikkhakāva. Chedagāminī hotīti chedaṃ gacchati. Yaṃ patthitaṃ, taṃ sabbaṃ nassatīti attho. Na yathādhippāyā hotīti yathājjhāsayā na hoti. Parādhippāyā hotīti parajjhāsayā ajjhāsayato adhikataraphalā hoti. Samaṇaṃ vā brāhmaṇaṃ vāti ettha samitapāpabāhitapāpatāhi samaṇabrāhmaṇatā veditabbā. Vadatu, bhante, paccayenāti, bhante, catubbidhena cīvarādinā paccayena vadeyyāsīti evaṃ pavāreti nimanteti. Yena pavāretīti paricchinditvā yattakena pavāreti. Taṃ na detīti taṃ sabbasova na deti. Na yathādhippāyaṃ detīti yathā tassa ajjhāsayo, evaṃ dātuṃ na sakkoti, hāpetvā appakaṃ deti. Yathādhippāyaṃ detīti yattakaṃ so icchati, tattakameva deti. Parādhippāyaṃ detīti appakaṃ pavāretvā avattharitvā bahuṃ deti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. ဝဏိဇ္ဇသုတ္တံ • 9. Vaṇijjasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၉-၁၀. ဝဏိဇ္ဇသုတ္တာဒိဝဏ္ဏနာ • 9-10. Vaṇijjasuttādivaṇṇanā
