| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
9. වණිජ්‌ජසුත්‌තවණ්‌ණනා
9. Vaṇijjasuttavaṇṇanā
79. නවමෙ තාදිසා වාති තංසදිසාව තංසරික්‌ඛකාව. ඡෙදගාමිනී හොතීති ඡෙදං ගච්‌ඡති. යං පත්‌ථිතං, තං සබ්‌බං නස්‌සතීති අත්‌ථො. න යථාධිප්‌පායා හොතීති යථාජ්‌ඣාසයා න හොති. පරාධිප්‌පායා හොතීති පරජ්‌ඣාසයා අජ්‌ඣාසයතො අධිකතරඵලා හොති. සමණං වා බ්‍රාහ්‌මණං වාති එත්‌ථ සමිතපාපබාහිතපාපතාහි සමණබ්‍රාහ්‌මණතා වෙදිතබ්‌බා. වදතු, භන්‌තෙ, පච්‌චයෙනාති, භන්‌තෙ, චතුබ්‌බිධෙන චීවරාදිනා පච්‌චයෙන වදෙය්‍යාසීති එවං පවාරෙති නිමන්‌තෙති. යෙන පවාරෙතීති පරිච්‌ඡින්‌දිත්‌වා යත්‌තකෙන පවාරෙති. තං න දෙතීති තං සබ්‌බසොව න දෙති. න යථාධිප්‌පායං දෙතීති යථා තස්‌ස අජ්‌ඣාසයො, එවං දාතුං න සක්‌කොති, හාපෙත්‌වා අප්‌පකං දෙති. යථාධිප්‌පායං දෙතීති යත්‌තකං සො ඉච්‌ඡති, තත්‌තකමෙව දෙති. පරාධිප්‌පායං දෙතීති අප්‌පකං පවාරෙත්‌වා අවත්‌ථරිත්‌වා බහුං දෙති.
79. Navame tādisā vāti taṃsadisāva taṃsarikkhakāva. Chedagāminī hotīti chedaṃ gacchati. Yaṃ patthitaṃ, taṃ sabbaṃ nassatīti attho. Na yathādhippāyā hotīti yathājjhāsayā na hoti. Parādhippāyā hotīti parajjhāsayā ajjhāsayato adhikataraphalā hoti. Samaṇaṃ vā brāhmaṇaṃ vāti ettha samitapāpabāhitapāpatāhi samaṇabrāhmaṇatā veditabbā. Vadatu, bhante, paccayenāti, bhante, catubbidhena cīvarādinā paccayena vadeyyāsīti evaṃ pavāreti nimanteti. Yena pavāretīti paricchinditvā yattakena pavāreti. Taṃ na detīti taṃ sabbasova na deti. Na yathādhippāyaṃ detīti yathā tassa ajjhāsayo, evaṃ dātuṃ na sakkoti, hāpetvā appakaṃ deti. Yathādhippāyaṃ detīti yattakaṃ so icchati, tattakameva deti. Parādhippāyaṃ detīti appakaṃ pavāretvā avattharitvā bahuṃ deti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 9. වණිජ්‌ජසුත්‌තං • 9. Vaṇijjasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9-10. වණිජ්‌ජසුත්‌තාදිවණ්‌ණනා • 9-10. Vaṇijjasuttādivaṇṇanā
