| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
2. ван̣н̣убат̇аж̇аад̇агаван̣н̣анаа
2. Vaṇṇupathajātakavaṇṇanā
агилаасунод̇и имам̣ д̇хаммад̣̇зсанам̣ бхаг̇аваа саавад̇т̇ияам̣ вихаранд̇о гат̇зси. гам̣ бана аараб̣бхаад̇и? згам̣ оссадтавийрияам̣ бхигкум̣. д̇ат̇ааг̇ад̇з гира саавад̇т̇ияам̣ вихаранд̇з зго саавад̇т̇иваасий гулабуд̇д̇о ж̇зд̇аванам̣ г̇анд̇ваа сад̇т̇у санд̇игз д̇хаммад̣̇зсанам̣ суд̇ваа басаннажид̇д̇о гаамзсу аад̣̇ийнавам̣ д̣̇исваа баб̣б̣аж̇ид̇ваа убасамбад̣̇ааяа бан̃жавассиго худ̇ваа д̣̇вз маад̇игаа уг̇г̇ан̣хид̇ваа вибассанаажаарам̣ сигкид̇ваа сад̇т̇у санд̇игз ад̇д̇ано жид̇д̇аружияам̣ гаммадтаанам̣ г̇ахзд̇ваа згам̣ аран̃н̃ам̣ бависид̇ваа вассам̣ убаг̇анд̇ваа д̇змаасам̣ вааяаманд̇оби обхаасамад̇д̇ам̣ ваа нимид̇д̇амад̇д̇ам̣ ваа уббаад̣̇зд̇ум̣ наасагки.
Akilāsunoti imaṃ dhammadesanaṃ bhagavā sāvatthiyaṃ viharanto kathesi. Kaṃ pana ārabbhāti? Ekaṃ ossaṭṭhavīriyaṃ bhikkhuṃ. Tathāgate kira sāvatthiyaṃ viharante eko sāvatthivāsī kulaputto jetavanaṃ gantvā satthu santike dhammadesanaṃ sutvā pasannacitto kāmesu ādīnavaṃ disvā pabbajitvā upasampadāya pañcavassiko hutvā dve mātikā uggaṇhitvā vipassanācāraṃ sikkhitvā satthu santike attano cittaruciyaṃ kammaṭṭhānaṃ gahetvā ekaṃ araññaṃ pavisitvā vassaṃ upagantvā temāsaṃ vāyamantopi obhāsamattaṃ vā nimittamattaṃ vā uppādetuṃ nāsakkhi.
ат̇асса зд̇ад̣̇ахоси ‘‘сад̇т̇аараа жад̇д̇ааро буг̇г̇алаа гат̇ид̇аа, д̇зсу маяаа бад̣̇абарамзна бхавид̇аб̣б̣ам̣, над̇т̇и ман̃н̃з маяхам̣ имасмим̣ ад̇д̇абхаавз маг̇г̇о ваа палам̣ ваа, гим̣ гариссаами аран̃н̃аваасзна, сад̇т̇у санд̇игам̣ г̇анд̇ваа руубасобхаг̇г̇аббад̇д̇ам̣ б̣уд̣̇д̇хасарийрам̣ ологзнд̇о мад̇хурам̣ д̇хаммад̣̇зсанам̣ сун̣анд̇о вихариссаамий’’д̇и буна ж̇зд̇аванамзва бажжааг̇амааси. ат̇а нам̣ санд̣̇идтасамбхад̇д̇аа аахам̣су – ‘‘аавусо, д̇вам̣ сад̇т̇у санд̇игз гаммадтаанам̣ г̇ахзд̇ваа ‘саман̣ад̇хаммам̣ гариссаамий’д̇и г̇ад̇о, ид̣̇аани бана ааг̇анд̇ваа сан̇г̇ан̣игааяа абхирамамаано жараси, гим̣ ну ко д̇з баб̣б̣аж̇ид̇агижжам̣ мад̇т̇агам̣ бад̇д̇ам̣, аббадисанд̇хиго ж̇аад̇осий’’д̇и? аавусо, ахам̣ маг̇г̇ам̣ ваа палам̣ ваа алабхид̇ваа ‘‘абхаб̣б̣абуг̇г̇алзна маяаа бхавид̇аб̣б̣а’’нд̇и вийрияам̣ оссаж̇ид̇ваа ааг̇ад̇омхийд̇и. ‘‘агааран̣ам̣ д̇з, аавусо, гад̇ам̣ д̣̇ал̣хавийрияасса сад̇т̇у саасанз баб̣б̣аж̇ид̇ваа вийрияам̣ оссаж̇анд̇зна, аяуд̇д̇ам̣ д̇з гад̇ам̣, зхи д̇ат̇ааг̇ад̇асса д̣̇ассзмаа’’д̇и д̇ам̣ аад̣̇ааяа сад̇т̇у санд̇игам̣ аг̇амам̣су.
Athassa etadahosi ‘‘satthārā cattāro puggalā kathitā, tesu mayā padaparamena bhavitabbaṃ, natthi maññe mayhaṃ imasmiṃ attabhāve maggo vā phalaṃ vā, kiṃ karissāmi araññavāsena, satthu santikaṃ gantvā rūpasobhaggappattaṃ buddhasarīraṃ olokento madhuraṃ dhammadesanaṃ suṇanto viharissāmī’’ti puna jetavanameva paccāgamāsi. Atha naṃ sandiṭṭhasambhattā āhaṃsu – ‘‘āvuso, tvaṃ satthu santike kammaṭṭhānaṃ gahetvā ‘samaṇadhammaṃ karissāmī’ti gato, idāni pana āgantvā saṅgaṇikāya abhiramamāno carasi, kiṃ nu kho te pabbajitakiccaṃ matthakaṃ pattaṃ, appaṭisandhiko jātosī’’ti? Āvuso, ahaṃ maggaṃ vā phalaṃ vā alabhitvā ‘‘abhabbapuggalena mayā bhavitabba’’nti vīriyaṃ ossajitvā āgatomhīti. ‘‘Akāraṇaṃ te, āvuso, kataṃ daḷhavīriyassa satthu sāsane pabbajitvā vīriyaṃ ossajantena, ayuttaṃ te kataṃ, ehi tathāgatassa dassemā’’ti taṃ ādāya satthu santikaṃ agamaṃsu.
сад̇т̇аа д̇ам̣ д̣̇исваа звамааха ‘‘бхигкавз, д̇умхз зд̇ам̣ бхигкум̣ анижчамаанам̣ аад̣̇ааяа ааг̇ад̇аа, гим̣ гад̇ам̣ иминаа’’д̇и? ‘‘бханд̇з, аяам̣ бхигку зваруубз нияяаанигасаасанз баб̣б̣аж̇ид̇ваа саман̣ад̇хаммам̣ гаронд̇о вийрияам̣ оссаж̇ид̇ваа ааг̇ад̇о’’д̇и аахам̣су. ат̇а нам̣ сад̇т̇аа ааха ‘‘сажжам̣ гира д̇аяаа бхигку вийрияам̣ оссадта’’нд̇и? ‘‘сажжам̣, бхаг̇аваа’’д̇и. ‘‘гим̣ бана д̇вам̣ бхигку зваруубз мама саасанз баб̣б̣аж̇ид̇ваа ‘аббижчо’д̇и ваа ‘санд̇удто’д̇и ваа ‘бавивид̇д̇о’д̇и ваа ‘аарад̣̇д̇хавийрияо’д̇и ваа звам̣ ад̇д̇аанам̣ аж̇аанаабзд̇ваа ‘оссадтавийрияо бхигкуу’д̇и ж̇аанаабзси. нану д̇вам̣ буб̣б̣з вийрияаваа ахоси, д̇аяаа згзна гад̇ам̣ вийрияам̣ ниссааяа маруганд̇аарз бан̃жасу сагадасад̇зсу мануссаа жа г̇он̣аа жа баанийяам̣ лабхид̇ваа сукид̇аа ж̇аад̇аа , ид̣̇аани гасмаа вийрияам̣ оссаж̇асий’’д̇и. со бхигку зд̇д̇агзна важанзна убад̇т̇амбхид̇о ахоси.
Satthā taṃ disvā evamāha ‘‘bhikkhave, tumhe etaṃ bhikkhuṃ anicchamānaṃ ādāya āgatā, kiṃ kataṃ iminā’’ti? ‘‘Bhante, ayaṃ bhikkhu evarūpe niyyānikasāsane pabbajitvā samaṇadhammaṃ karonto vīriyaṃ ossajitvā āgato’’ti āhaṃsu. Atha naṃ satthā āha ‘‘saccaṃ kira tayā bhikkhu vīriyaṃ ossaṭṭha’’nti? ‘‘Saccaṃ, bhagavā’’ti. ‘‘Kiṃ pana tvaṃ bhikkhu evarūpe mama sāsane pabbajitvā ‘appiccho’ti vā ‘santuṭṭho’ti vā ‘pavivitto’ti vā ‘āraddhavīriyo’ti vā evaṃ attānaṃ ajānāpetvā ‘ossaṭṭhavīriyo bhikkhū’ti jānāpesi. Nanu tvaṃ pubbe vīriyavā ahosi, tayā ekena kataṃ vīriyaṃ nissāya marukantāre pañcasu sakaṭasatesu manussā ca goṇā ca pānīyaṃ labhitvā sukhitā jātā , idāni kasmā vīriyaṃ ossajasī’’ti. So bhikkhu ettakena vacanena upatthambhito ahosi.
д̇ам̣ бана гат̇ам̣ суд̇ваа бхигкуу бхаг̇аванд̇ам̣ яаажим̣су – ‘‘бханд̇з, ид̣̇аани иминаа бхигкунаа вийрияасса оссадтабхааво амхаагам̣ баагадо, буб̣б̣з банасса згасса вийрияам̣ ниссааяа маруганд̇аарз г̇он̣амануссаанам̣ баанийяам̣ лабхид̇ваа сукид̇абхааво бадижчанно, д̇умхаагам̣ саб̣б̣ан̃н̃уд̇ан̃н̃аан̣ассзва баагадо, амхаагамбзд̇ам̣ гааран̣ам̣ гат̇зт̇аа’’д̇и. ‘‘д̇зна хи, бхигкавз, сун̣аат̇аа’’д̇и бхаг̇аваа д̇зсам̣ бхигкуунам̣ сад̇уббаад̣̇ам̣ ж̇анзд̇ваа бхаванд̇арзна бадижчаннагааран̣ам̣ баагадамагааси.
Taṃ pana kathaṃ sutvā bhikkhū bhagavantaṃ yāciṃsu – ‘‘bhante, idāni iminā bhikkhunā vīriyassa ossaṭṭhabhāvo amhākaṃ pākaṭo, pubbe panassa ekassa vīriyaṃ nissāya marukantāre goṇamanussānaṃ pānīyaṃ labhitvā sukhitabhāvo paṭicchanno, tumhākaṃ sabbaññutaññāṇasseva pākaṭo, amhākampetaṃ kāraṇaṃ kathethā’’ti. ‘‘Tena hi, bhikkhave, suṇāthā’’ti bhagavā tesaṃ bhikkhūnaṃ satuppādaṃ janetvā bhavantarena paṭicchannakāraṇaṃ pākaṭamakāsi.
ад̇ийд̇з гаасирадтз б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о сад̇т̇аваахагулз бадисанд̇хим̣ г̇ахзд̇ваа ваяаббад̇д̇о бан̃жахи сагадасад̇зхи ван̣иж̇ж̇ам̣ гаронд̇о вижарад̇и. со згад̣̇аа садтияож̇анигам̣ маруганд̇аарам̣ бадибаж̇ж̇и. д̇асмим̣ ганд̇аарз сукумаваалугаа мудтинаа г̇ахид̇аа хад̇т̇з на д̇идтад̇и, суурияуг̇г̇аманад̇о бадтааяа ан̇г̇аарарааси вияа ун̣хаа ход̇и, на саггаа аггамид̇ум̣. д̇асмаа д̇ам̣ бадибаж̇ж̇анд̇аа д̣̇ааруд̣̇агад̇илад̇ан̣д̣улаад̣̇ийни сагадзхи аад̣̇ааяа рад̇д̇имзва г̇анд̇ваа арун̣уг̇г̇аманз сагадаани бариваддам̣ гад̇ваа мад̇т̇агз ман̣д̣абам̣ гаарзд̇ваа гаалассзва аахаарагижжам̣ нидтаабзд̇ваа чааяааяа нисиннаа д̣̇ивасам̣ кзбзд̇ваа ад̇т̇ан̇г̇ад̇з суурияз сааяамаасам̣ бхун̃ж̇ид̇ваа бхуумияаа сийд̇алааяа ж̇аад̇ааяа сагадаани яож̇зд̇ваа г̇ажчанд̇и, самуд̣̇д̣̇аг̇аманасад̣̇исамзва г̇аманам̣ ход̇и. т̇аланияаамаго наама лад̣̇д̇хум̣ ваддад̇и, со д̇аарагасан̃н̃аа сад̇т̇ам̣ д̇аарзд̇и.
Atīte kāsiraṭṭhe bārāṇasiyaṃ brahmadatte rajjaṃ kārente bodhisatto satthavāhakule paṭisandhiṃ gahetvā vayappatto pañcahi sakaṭasatehi vaṇijjaṃ karonto vicarati. So ekadā saṭṭhiyojanikaṃ marukantāraṃ paṭipajji. Tasmiṃ kantāre sukhumavālukā muṭṭhinā gahitā hatthe na tiṭṭhati, sūriyuggamanato paṭṭhāya aṅgārarāsi viya uṇhā hoti, na sakkā akkamituṃ. Tasmā taṃ paṭipajjantā dārudakatilataṇḍulādīni sakaṭehi ādāya rattimeva gantvā aruṇuggamane sakaṭāni parivaṭṭaṃ katvā matthake maṇḍapaṃ kāretvā kālasseva āhārakiccaṃ niṭṭhāpetvā chāyāya nisinnā divasaṃ khepetvā atthaṅgate sūriye sāyamāsaṃ bhuñjitvā bhūmiyā sītalāya jātāya sakaṭāni yojetvā gacchanti, samuddagamanasadisameva gamanaṃ hoti. Thalaniyāmako nāma laddhuṃ vaṭṭati, so tārakasaññā satthaṃ tāreti.
соби сад̇т̇аваахо д̇асмим̣ гаалз иминаава нияаамзна д̇ам̣ ганд̇аарам̣ г̇ажчанд̇о згуунасадти яож̇анаани г̇анд̇ваа ‘‘ид̣̇аани згарад̇д̇знзва маруганд̇аараа нигкаманам̣ бхависсад̇ий’’д̇и сааяамаасам̣ бхун̃ж̇ид̇ваа саб̣б̣ам̣ д̣̇ааруд̣̇агам̣ кзбзд̇ваа сагадаани яож̇зд̇ваа бааяааси. нияаамаго бана буримасагадз аасанам̣ бад̇т̇араабзд̇ваа аагаасз д̇аарагам̣ ологзнд̇о ‘‘ид̇о бааж̇зт̇а, ид̇о бааж̇зт̇аа’’д̇и вад̣̇амаано нибаж̇ж̇и. со д̣̇ийгхамад̣̇д̇хаанам̣ анид̣̇д̣̇ааяанабхаавзна гиланд̇о нид̣̇д̣̇ам̣ оггами, г̇он̣з нивад̇д̇ид̇ваа ааг̇ад̇амаг̇г̇амзва г̇ан̣ханд̇з на ан̃н̃ааси. г̇он̣аа саб̣б̣арад̇д̇им̣ аг̇амам̣су. нияаамаго арун̣уг̇г̇аманавзлааяа баб̣уд̣̇д̇хо нагкад̇д̇ам̣ ологзд̇ваа ‘‘сагадаани нивад̇д̇зт̇а нивад̇д̇зт̇аа’’д̇и ааха. сагадаани нивад̇д̇зд̇ваа бадибаадим̣ гаронд̇аанан̃н̃зва арун̣о уг̇г̇ад̇о. мануссаа ‘‘хияяо амхаагам̣ нивидтаканд̇хааваарадтаанамзвзд̇ам̣, д̣̇ааруд̣̇агамби но кийн̣ам̣, ид̣̇аани надтамхаа’’д̇и сагадаани можзд̇ваа бариваддагзна табзд̇ваа мад̇т̇агз ман̣д̣абам̣ гад̇ваа ад̇д̇ано ад̇д̇ано сагадасса хздтаа анусожанд̇аа нибаж̇ж̇им̣су.
Sopi satthavāho tasmiṃ kāle imināva niyāmena taṃ kantāraṃ gacchanto ekūnasaṭṭhi yojanāni gantvā ‘‘idāni ekaratteneva marukantārā nikkhamanaṃ bhavissatī’’ti sāyamāsaṃ bhuñjitvā sabbaṃ dārudakaṃ khepetvā sakaṭāni yojetvā pāyāsi. Niyāmako pana purimasakaṭe āsanaṃ pattharāpetvā ākāse tārakaṃ olokento ‘‘ito pājetha, ito pājethā’’ti vadamāno nipajji. So dīghamaddhānaṃ aniddāyanabhāvena kilanto niddaṃ okkami, goṇe nivattitvā āgatamaggameva gaṇhante na aññāsi. Goṇā sabbarattiṃ agamaṃsu. Niyāmako aruṇuggamanavelāya pabuddho nakkhattaṃ oloketvā ‘‘sakaṭāni nivattetha nivattethā’’ti āha. Sakaṭāni nivattetvā paṭipāṭiṃ karontānaññeva aruṇo uggato. Manussā ‘‘hiyyo amhākaṃ niviṭṭhakhandhāvāraṭṭhānamevetaṃ, dārudakampi no khīṇaṃ, idāni naṭṭhamhā’’ti sakaṭāni mocetvā parivaṭṭakena ṭhapetvā matthake maṇḍapaṃ katvā attano attano sakaṭassa heṭṭhā anusocantā nipajjiṃsu.
б̣од̇хисад̇д̇о ‘‘маяи вийрияам̣ оссаж̇анд̇з саб̣б̣з винассиссанд̇ий’’д̇и баад̇о сийд̇алавзлааяамзва аахин̣д̣анд̇о згам̣ д̣̇аб̣б̣ад̇ин̣аг̇ажчам̣ д̣̇исваа ‘‘имаани д̇ин̣аани хздтаа уд̣̇агасинзхзна удтид̇аани бхависсанд̇ий’’д̇и жинд̇зд̇ваа гуд̣̇д̣̇аалам̣ г̇аахаабзд̇ваа д̇ам̣ бад̣̇зсам̣ кан̣аабзси, д̇з садтихад̇т̇адтаанам̣ кан̣им̣су. зд̇д̇агам̣ таанам̣ кан̣ид̇ваа бахаранд̇аанам̣ гуд̣̇д̣̇аало хздтаабаасаан̣з бадихан̃н̃и, бахадамад̇д̇з саб̣б̣з вийрияам̣ оссаж̇им̣су. б̣од̇хисад̇д̇о бана ‘‘имасса баасаан̣асса хздтаа уд̣̇агзна бхавид̇аб̣б̣а’’нд̇и од̇арид̇ваа баасаан̣з тид̇о он̣амид̇ваа сод̇ам̣ од̣̇ахид̇ваа сад̣̇д̣̇ам̣ ааваж̇ж̇знд̇о хздтаа уд̣̇агасса бавад̇д̇анасад̣̇д̣̇ам̣ суд̇ваа уд̇д̇арид̇ваа жуул̣убадтаагам̣ ааха – ‘‘д̇аад̇а, д̇аяаа вийрияз оссадтз саб̣б̣з винассиссаама, д̇вам̣ вийрияам̣ аноссаж̇анд̇о имам̣ аяагуудам̣ г̇ахзд̇ваа ааваадам̣ од̇арид̇ваа зд̇асмим̣ баасаан̣з бахаарам̣ д̣̇зхий’’д̇и. со д̇асса важанам̣ самбадижчид̇ваа саб̣б̣зсу вийрияам̣ оссаж̇ид̇ваа тид̇зсуби вийрияам̣ аноссаж̇анд̇о од̇арид̇ваа баасаан̣з бахаарам̣ ад̣̇ааси. баасаан̣о маж̇жхз бхиж̇ж̇ид̇ваа хздтаа бад̇ид̇ваа сод̇ам̣ саннирумбхид̇ваа адтааси, д̇аалагканд̇хаббамаан̣аа уд̣̇агавадди уг̇г̇ан̃чи. саб̣б̣з баанийяам̣ бивид̇ваа нхааяим̣су, ад̇ирзгаани агкаяуг̇аад̣̇ийни паалзд̇ваа яааг̇убхад̇д̇ам̣ бажид̇ваа бхун̃ж̇ид̇ваа г̇он̣з жа бхож̇зд̇ваа суурияз ад̇т̇ан̇г̇ад̇з уд̣̇агааваадасамийбз д̇хаж̇ам̣ б̣анд̇хид̇ваа ижчид̇адтаанам̣ аг̇амам̣су. д̇з д̇ад̇т̇а бхан̣д̣ам̣ виггин̣ид̇ваа д̣̇иг̇ун̣ам̣ д̇иг̇ун̣ам̣ жад̇уг̇г̇ун̣ам̣ лаабхам̣ лабхид̇ваа ад̇д̇ано васанадтаанамзва аг̇амам̣су. д̇з д̇ад̇т̇а яаавад̇ааяугам̣ тад̇ваа яат̇аагаммам̣ г̇ад̇аа, б̣од̇хисад̇д̇оби д̣̇аанаад̣̇ийни бун̃н̃аани гад̇ваа яат̇аагаммамзва г̇ад̇о.
Bodhisatto ‘‘mayi vīriyaṃ ossajante sabbe vinassissantī’’ti pāto sītalavelāyameva āhiṇḍanto ekaṃ dabbatiṇagacchaṃ disvā ‘‘imāni tiṇāni heṭṭhā udakasinehena uṭṭhitāni bhavissantī’’ti cintetvā kuddālaṃ gāhāpetvā taṃ padesaṃ khaṇāpesi, te saṭṭhihatthaṭṭhānaṃ khaṇiṃsu. Ettakaṃ ṭhānaṃ khaṇitvā paharantānaṃ kuddālo heṭṭhāpāsāṇe paṭihaññi, pahaṭamatte sabbe vīriyaṃ ossajiṃsu. Bodhisatto pana ‘‘imassa pāsāṇassa heṭṭhā udakena bhavitabba’’nti otaritvā pāsāṇe ṭhito oṇamitvā sotaṃ odahitvā saddaṃ āvajjento heṭṭhā udakassa pavattanasaddaṃ sutvā uttaritvā cūḷupaṭṭhākaṃ āha – ‘‘tāta, tayā vīriye ossaṭṭhe sabbe vinassissāma, tvaṃ vīriyaṃ anossajanto imaṃ ayakūṭaṃ gahetvā āvāṭaṃ otaritvā etasmiṃ pāsāṇe pahāraṃ dehī’’ti. So tassa vacanaṃ sampaṭicchitvā sabbesu vīriyaṃ ossajitvā ṭhitesupi vīriyaṃ anossajanto otaritvā pāsāṇe pahāraṃ adāsi. Pāsāṇo majjhe bhijjitvā heṭṭhā patitvā sotaṃ sannirumbhitvā aṭṭhāsi, tālakkhandhappamāṇā udakavaṭṭi uggañchi. Sabbe pānīyaṃ pivitvā nhāyiṃsu, atirekāni akkhayugādīni phāletvā yāgubhattaṃ pacitvā bhuñjitvā goṇe ca bhojetvā sūriye atthaṅgate udakāvāṭasamīpe dhajaṃ bandhitvā icchitaṭṭhānaṃ agamaṃsu. Te tattha bhaṇḍaṃ vikkiṇitvā diguṇaṃ tiguṇaṃ catugguṇaṃ lābhaṃ labhitvā attano vasanaṭṭhānameva agamaṃsu. Te tattha yāvatāyukaṃ ṭhatvā yathākammaṃ gatā, bodhisattopi dānādīni puññāni katvā yathākammameva gato.
саммаасамб̣уд̣̇д̇хо имам̣ д̇хаммад̣̇зсанам̣ гат̇зд̇ваа абхисамб̣уд̣̇д̇хова имам̣ г̇аат̇ам̣ гат̇зси –
Sammāsambuddho imaṃ dhammadesanaṃ kathetvā abhisambuddhova imaṃ gāthaṃ kathesi –
2.
2.
‘‘агилаасуно ван̣н̣убат̇з кан̣анд̇аа, уд̣̇ан̇г̇ан̣з д̇ад̇т̇а бабам̣ авинд̣̇ум̣;
‘‘Akilāsuno vaṇṇupathe khaṇantā, udaṅgaṇe tattha papaṃ avinduṃ;
звам̣ муний вийрияаб̣алуубабанно, агилаасу винд̣̇з хад̣̇аяасса санд̇и’’нд̇и.
Evaṃ munī vīriyabalūpapanno, akilāsu vinde hadayassa santi’’nti.
д̇ад̇т̇а агилаасунод̇и ниггосаж̇ж̇аа аарад̣̇д̇хавийрияаа. ван̣н̣убат̇зд̇и ван̣н̣у вужжад̇и ваалугаа, ваалугаамаг̇г̇зд̇и ад̇т̇о. кан̣анд̇аад̇и бхуумим̣ кан̣амаанаа. уд̣̇ан̇г̇ан̣зд̇и зд̇т̇а уд̣̇аад̇и нибаад̇о, ан̇г̇ан̣зд̇и мануссаанам̣ сан̃жаран̣адтаанз, анааваадз бхуумибхааг̇зд̇и ад̇т̇о. д̇ад̇т̇аад̇и д̇асмим̣ ван̣н̣убат̇з. бабам̣ авинд̣̇унд̇и уд̣̇агам̣ бадилабхим̣су. уд̣̇аган̃хи бабийяанабхаавзна ‘‘бабаа’’д̇и вужжад̇и. бавад̣̇д̇хам̣ ваа аабам̣ бабам̣, маход̣̇аганд̇и ад̇т̇о.
Tattha akilāsunoti nikkosajjā āraddhavīriyā. Vaṇṇupatheti vaṇṇu vuccati vālukā, vālukāmaggeti attho. Khaṇantāti bhūmiṃ khaṇamānā. Udaṅgaṇeti ettha udāti nipāto, aṅgaṇeti manussānaṃ sañcaraṇaṭṭhāne, anāvāṭe bhūmibhāgeti attho. Tatthāti tasmiṃ vaṇṇupathe. Papaṃ avindunti udakaṃ paṭilabhiṃsu. Udakañhi papīyanabhāvena ‘‘papā’’ti vuccati. Pavaddhaṃ vā āpaṃ papaṃ, mahodakanti attho.
званд̇и обаммабадибаад̣̇анам̣. мунийд̇и монам̣ вужжад̇и н̃аан̣ам̣, гааяамонзяяаад̣̇ийсу ваа ан̃н̃ад̇арам̣, д̇зна саманнааг̇ад̇ад̇д̇аа буг̇г̇ало ‘‘муний’’д̇и вужжад̇и. со банзса аг̇аарияамуни, анаг̇аарияамуни , сзгкамуни, асзгкамуни, бажжзгаб̣уд̣̇д̇хамуни, мунимунийд̇и анзгавид̇хо. д̇ад̇т̇а аг̇аарияамунийд̇и г̇ихий ааг̇ад̇апало вин̃н̃аад̇асаасано. анаг̇аарияамунийд̇и д̇ат̇ааруубова баб̣б̣аж̇ид̇о. сзгкамунийд̇и сад̇д̇а сзгкаа. асзгкамунийд̇и кийн̣аасаво. бажжзгаб̣уд̣̇д̇хамунийд̇и бажжзгасамб̣уд̣̇д̇хо. мунимунийд̇и саммаасамб̣уд̣̇д̇хо. имасмим̣ банад̇т̇з саб̣б̣асан̇г̇аахагавасзна монзяяасан̇каад̇ааяа бан̃н̃ааяа саманнааг̇ад̇о ‘‘муний’’д̇и взд̣̇ид̇аб̣б̣о. вийрияаб̣алуубабаннод̇и вийриязна жзва гааяаб̣алан̃аан̣аб̣алзна жа саманнааг̇ад̇о. агилаасууд̇и ниггосаж̇ж̇о –
Evanti opammapaṭipādanaṃ. Munīti monaṃ vuccati ñāṇaṃ, kāyamoneyyādīsu vā aññataraṃ, tena samannāgatattā puggalo ‘‘munī’’ti vuccati. So panesa agāriyamuni, anagāriyamuni , sekkhamuni, asekkhamuni, paccekabuddhamuni, munimunīti anekavidho. Tattha agāriyamunīti gihī āgataphalo viññātasāsano. Anagāriyamunīti tathārūpova pabbajito. Sekkhamunīti satta sekkhā. Asekkhamunīti khīṇāsavo. Paccekabuddhamunīti paccekasambuddho. Munimunīti sammāsambuddho. Imasmiṃ panatthe sabbasaṅgāhakavasena moneyyasaṅkhātāya paññāya samannāgato ‘‘munī’’ti veditabbo. Vīriyabalūpapannoti vīriyena ceva kāyabalañāṇabalena ca samannāgato. Akilāsūti nikkosajjo –
‘‘гаамам̣ д̇ажо жа нхаару жа, адти жа авасиссад̇у;
‘‘Kāmaṃ taco ca nhāru ca, aṭṭhi ca avasissatu;
убасуссад̇у ниссзсам̣, сарийрз мам̣салохид̇а’’нд̇и. –
Upasussatu nissesaṃ, sarīre maṃsalohita’’nti. –
звам̣ вуд̇д̇зна жад̇уран̇г̇асаманнааг̇ад̇зна вийриязна саманнааг̇ад̇ад̇д̇аа аналасо. винд̣̇з хад̣̇аяасса санд̇инд̇и жид̇д̇ассаби хад̣̇аяаруубассаби сийд̇алабхаавагаран̣зна ‘‘санд̇и’’нд̇и сан̇кам̣ г̇ад̇ам̣ жхаанавибассанаабхин̃н̃ааарахад̇д̇амаг̇г̇ан̃аан̣асан̇каад̇ам̣ арияад̇хаммам̣ винд̣̇ад̇и бадилабхад̇ийд̇и ад̇т̇о. бхаг̇авад̇аа хи –
Evaṃ vuttena caturaṅgasamannāgatena vīriyena samannāgatattā analaso. Vinde hadayassa santinti cittassapi hadayarūpassapi sītalabhāvakaraṇena ‘‘santi’’nti saṅkhaṃ gataṃ jhānavipassanābhiññāarahattamaggañāṇasaṅkhātaṃ ariyadhammaṃ vindati paṭilabhatīti attho. Bhagavatā hi –
‘‘д̣̇угкам̣, бхигкавз, гусийд̇о вихарад̇и вогин̣н̣о баабагзхи агусалзхи д̇хаммзхи, маханд̇ан̃жа сад̣̇ад̇т̇ам̣ барихаабзд̇и. аарад̣̇д̇хавийрияо жа ко, бхигкавз, сукам̣ вихарад̇и бавивид̇д̇о баабагзхи агусалзхи д̇хаммзхи, маханд̇ан̃жа сад̣̇ад̇т̇ам̣ барибуурзд̇и, на, бхигкавз, хийнзна аг̇г̇асса бад̇д̇и ход̇ий’’д̇и (сам̣. ни. 2.22) –
‘‘Dukkhaṃ, bhikkhave, kusīto viharati vokiṇṇo pāpakehi akusalehi dhammehi, mahantañca sadatthaṃ parihāpeti. Āraddhavīriyo ca kho, bhikkhave, sukhaṃ viharati pavivitto pāpakehi akusalehi dhammehi, mahantañca sadatthaṃ paripūreti, na, bhikkhave, hīnena aggassa patti hotī’’ti (saṃ. ni. 2.22) –
звам̣ анзгзхи суд̇д̇зхи гусийд̇асса д̣̇угкавихааро, аарад̣̇д̇хавийрияасса жа сукавихааро сам̣ван̣н̣ид̇о. ид̇хааби аарад̣̇д̇хавийрияасса агад̇аабхинивзсасса вибассагасса вийрияаб̣алзна ад̇хиг̇анд̇аб̣б̣ам̣ д̇амзва сукавихаарам̣ д̣̇ассзнд̇о ‘‘звам̣ муний вийрияаб̣алуубабанно, агилаасу винд̣̇з хад̣̇аяасса санд̇и’’нд̇и ааха. ид̣̇ам̣ вуд̇д̇ам̣ ход̇и – яат̇аа д̇з ваан̣иж̇аа агилаасуно ван̣н̣убат̇з кан̣анд̇аа уд̣̇агам̣ лабхим̣су, звам̣ имасмимби саасанз агилаасу худ̇ваа вааяамамаано бан̣д̣ид̇о бхигку имам̣ жхаанаад̣̇ибхзд̣̇ам̣ хад̣̇аяасса санд̇им̣ лабхад̇и. со д̇вам̣ бхигку буб̣б̣з уд̣̇агамад̇д̇асса ад̇т̇ааяа вийрияам̣ гад̇ваа ид̣̇аани зваруубз маг̇г̇апалад̣̇ааяагз нияяаанигасаасанз гасмаа вийрияам̣ оссаж̇асийд̇и звам̣ имам̣ д̇хаммад̣̇зсанам̣ д̣̇ассзд̇ваа жад̇д̇аари сажжаани багаасзси, сажжабарияосаанз оссадтавийрияо бхигку аг̇г̇апалз арахад̇д̇з бад̇идтааси.
Evaṃ anekehi suttehi kusītassa dukkhavihāro, āraddhavīriyassa ca sukhavihāro saṃvaṇṇito. Idhāpi āraddhavīriyassa akatābhinivesassa vipassakassa vīriyabalena adhigantabbaṃ tameva sukhavihāraṃ dassento ‘‘evaṃ munī vīriyabalūpapanno, akilāsu vinde hadayassa santi’’nti āha. Idaṃ vuttaṃ hoti – yathā te vāṇijā akilāsuno vaṇṇupathe khaṇantā udakaṃ labhiṃsu, evaṃ imasmimpi sāsane akilāsu hutvā vāyamamāno paṇḍito bhikkhu imaṃ jhānādibhedaṃ hadayassa santiṃ labhati. So tvaṃ bhikkhu pubbe udakamattassa atthāya vīriyaṃ katvā idāni evarūpe maggaphaladāyake niyyānikasāsane kasmā vīriyaṃ ossajasīti evaṃ imaṃ dhammadesanaṃ dassetvā cattāri saccāni pakāsesi, saccapariyosāne ossaṭṭhavīriyo bhikkhu aggaphale arahatte patiṭṭhāsi.
сад̇т̇ааби д̣̇вз вад̇т̇ууни гат̇зд̇ваа анусанд̇хим̣ гхадзд̇ваа ж̇аад̇агам̣ самод̇хаанзд̇ваа д̣̇ассзси ‘‘д̇асмим̣ самаяз вийрияам̣ аноссаж̇ид̇ваа баасаан̣ам̣ бхинд̣̇ид̇ваа махааж̇анасса уд̣̇агад̣̇ааяаго жуул̣убадтааго аяам̣ оссадтавийрияо бхигку ахоси, авасзсабарисаа ид̣̇аани б̣уд̣̇д̇хабарисаа ж̇аад̇аа, сад̇т̇аваахаж̇здтаго бана ахамзва ахоси’’нд̇и д̣̇зсанам̣ нидтаабзси.
Satthāpi dve vatthūni kathetvā anusandhiṃ ghaṭetvā jātakaṃ samodhānetvā dassesi ‘‘tasmiṃ samaye vīriyaṃ anossajitvā pāsāṇaṃ bhinditvā mahājanassa udakadāyako cūḷupaṭṭhāko ayaṃ ossaṭṭhavīriyo bhikkhu ahosi, avasesaparisā idāni buddhaparisā jātā, satthavāhajeṭṭhako pana ahameva ahosi’’nti desanaṃ niṭṭhāpesi.
ван̣н̣убат̇аж̇аад̇агаван̣н̣анаа д̣̇уд̇ияаа.
Vaṇṇupathajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 2. ван̣н̣убат̇аж̇аад̇агам̣ • 2. Vaṇṇupathajātakaṃ
