| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. වපකාසසුත්‌තං
7. Vapakāsasuttaṃ
127. ‘‘පඤ්‌චහි, භික්‌ඛවෙ, ධම්‌මෙහි සමන්‌නාගතො භික්‌ඛු නාලං සඞ්‌ඝම්‌හා වපකාසිතුං 1. කතමෙහි පඤ්‌චහි? ඉධ, භික්‌ඛවෙ, භික්‌ඛු අසන්‌තුට්‌ඨො හොති ඉතරීතරෙන චීවරෙන, අසන්‌තුට්‌ඨො හොති ඉතරීතරෙන පිණ්‌ඩපාතෙන, අසන්‌තුට්‌ඨො හොති ඉතරීතරෙන සෙනාසනෙන, අසන්‌තුට්‌ඨො හොති ඉතරීතරෙන ගිලානප්‌පච්‌චයභෙසජ්‌ජපරික්‌ඛාරෙන, කාමසඞ්‌කප්‌පබහුලො ච විහරති. ඉමෙහි ඛො, භික්‌ඛවෙ, පඤ්‌චහි ධම්‌මෙහි සමන්‌නාගතො භික්‌ඛු නාලං සඞ්‌ඝම්‌හා වපකාසිතුං.
127. ‘‘Pañcahi, bhikkhave, dhammehi samannāgato bhikkhu nālaṃ saṅghamhā vapakāsituṃ 2. Katamehi pañcahi? Idha, bhikkhave, bhikkhu asantuṭṭho hoti itarītarena cīvarena, asantuṭṭho hoti itarītarena piṇḍapātena, asantuṭṭho hoti itarītarena senāsanena, asantuṭṭho hoti itarītarena gilānappaccayabhesajjaparikkhārena, kāmasaṅkappabahulo ca viharati. Imehi kho, bhikkhave, pañcahi dhammehi samannāgato bhikkhu nālaṃ saṅghamhā vapakāsituṃ.
‘‘පඤ්‌චහි, භික්‌ඛවෙ, ධම්‌මෙහි සමන්‌නාගතො භික්‌ඛු අලං සඞ්‌ඝම්‌හා වපකාසිතුං. කතමෙහි පඤ්‌චහි? ඉධ , භික්‌ඛවෙ, භික්‌ඛු සන්‌තුට්‌ඨො හොති ඉතරීතරෙන චීවරෙන, සන්‌තුට්‌ඨො හොති ඉතරීතරෙන පිණ්‌ඩපාතෙන, සන්‌තුට්‌ඨො හොති ඉතරීතරෙන සෙනාසනෙන, සන්‌තුට්‌ඨො හොති ඉතරීතරෙන ගිලානප්‌පච්‌චයභෙසජ්‌ජපරික්‌ඛාරෙන , නෙක්‌ඛම්‌මසඞ්‌කප්‌පබහුලො 3 ච විහරති. ඉමෙහි ඛො, භික්‌ඛවෙ, පඤ්‌චහි ධම්‌මෙහි සමන්‌නාගතො භික්‌ඛු අලං සඞ්‌ඝම්‌හා වපකාසිතු’’න්‌ති. සත්‌තමං.
‘‘Pañcahi, bhikkhave, dhammehi samannāgato bhikkhu alaṃ saṅghamhā vapakāsituṃ. Katamehi pañcahi? Idha , bhikkhave, bhikkhu santuṭṭho hoti itarītarena cīvarena, santuṭṭho hoti itarītarena piṇḍapātena, santuṭṭho hoti itarītarena senāsanena, santuṭṭho hoti itarītarena gilānappaccayabhesajjaparikkhārena , nekkhammasaṅkappabahulo 4 ca viharati. Imehi kho, bhikkhave, pañcahi dhammehi samannāgato bhikkhu alaṃ saṅghamhā vapakāsitu’’nti. Sattamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. වපකාසසුත්‌තවණ්‌ණනා • 7. Vapakāsasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (13) 3. ගිලානවග්‌ගො • (13) 3. Gilānavaggo
