Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༥. ཝཔྤསུཏྟཾ

    5. Vappasuttaṃ

    ༡༩༥. ཨེཀཾ སམཡཾ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཨཐ ཁོ ཝཔྤོ སཀྐོ ནིགཎྛསཱཝཀོ ཡེནཱཡསྨཱ མཧཱམོགྒལླཱནོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ མཧཱམོགྒལླཱནཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཝཔྤཾ སཀྐཾ ནིགཎྛསཱཝཀཾ ཨཱཡསྨཱ མཧཱམོགྒལླཱནོ ཨེཏདཝོཙ –

    195. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho vappo sakko nigaṇṭhasāvako yenāyasmā mahāmoggallāno tenupasaṅkami; upasaṅkamitvā āyasmantaṃ mahāmoggallānaṃ abhivādetvā ekamantaṃ nisīdi. Ekamantaṃ nisinnaṃ kho vappaṃ sakkaṃ nigaṇṭhasāvakaṃ āyasmā mahāmoggallāno etadavoca –

    ‘‘ཨིདྷསྶ , ཝཔྤ, ཀཱཡེན སཾཝུཏོ ཝཱཙཱཡ སཾཝུཏོ མནསཱ སཾཝུཏོ ཨཝིཛྫཱཝིརཱགཱ ཝིཛྫུཔྤཱདཱ། པསྶསི ནོ ཏྭཾ, ཝཔྤ, ཏཾ ཋཱནཾ ཡཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ 1 ཨབྷིསམྤརཱཡ’’ནྟི? ‘‘པསྶཱམཧཾ, བྷནྟེ, ཏཾ ཋཱནཾ། ཨིདྷསྶ, བྷནྟེ, པུབྦེ པཱཔཀམྨཾ ཀཏཾ ཨཝིཔཀྐཝིཔཱཀཾ། ཏཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’’ནྟི། ཨཡཉྩེཝ ཁོ པན ཨཱཡསྨཏོ མཧཱམོགྒལླཱནསྶ ཝཔྤེན སཀྐེན ནིགཎྛསཱཝཀེན སདྡྷིཾ ཨནྟརཱཀཐཱ ཝིཔྤཀཏཱ ཧོཏི།

    ‘‘Idhassa , vappa, kāyena saṃvuto vācāya saṃvuto manasā saṃvuto avijjāvirāgā vijjuppādā. Passasi no tvaṃ, vappa, taṃ ṭhānaṃ yatonidānaṃ purisaṃ dukkhavedaniyā āsavā assaveyyuṃ 2 abhisamparāya’’nti? ‘‘Passāmahaṃ, bhante, taṃ ṭhānaṃ. Idhassa, bhante, pubbe pāpakammaṃ kataṃ avipakkavipākaṃ. Tatonidānaṃ purisaṃ dukkhavedaniyā āsavā assaveyyuṃ abhisamparāya’’nti. Ayañceva kho pana āyasmato mahāmoggallānassa vappena sakkena nigaṇṭhasāvakena saddhiṃ antarākathā vippakatā hoti.

    ཨཐ ཁོ བྷགཝཱ སཱཡནྷསམཡཾ པཊིསལླཱནཱ ཝུཊྛིཏོ ཡེན ཨུཔཊྛཱནསཱལཱ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ནིསཛྫ ཁོ བྷགཝཱ ཨཱཡསྨནྟཾ མཧཱམོགྒལླཱནཾ ཨེཏདཝོཙ –

    Atha kho bhagavā sāyanhasamayaṃ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi. Nisajja kho bhagavā āyasmantaṃ mahāmoggallānaṃ etadavoca –

    ‘‘ཀཱཡ ནུཏྠ, མོགྒལླཱན, ཨེཏརཧི ཀཐཱཡ སནྣིསིནྣཱ; ཀཱ ཙ པན ཝོ ཨནྟརཱཀཐཱ ཝིཔྤཀཏཱ’’ཏི? ‘‘ཨིདྷཱཧཾ, བྷནྟེ, ཝཔྤཾ སཀྐཾ ནིགཎྛསཱཝཀཾ ཨེཏདཝོཙཾ – ‘ཨིདྷསྶ, ཝཔྤ, ཀཱཡེན སཾཝུཏོ ཝཱཙཱཡ སཾཝུཏོ མནསཱ སཾཝུཏོ ཨཝིཛྫཱཝིརཱགཱ ཝིཛྫུཔྤཱདཱ། པསྶསི ནོ ཏྭཾ, ཝཔྤ, ཏཾ ཋཱནཾ ཡཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’ནྟི? ཨེཝཾ ཝུཏྟེ, བྷནྟེ, ཝཔྤོ སཀྐོ ནིགཎྛསཱཝཀོ མཾ ཨེཏདཝོཙ – ‘པསྶཱམཧཾ, བྷནྟེ, ཏཾ ཋཱནཾ། ཨིདྷསྶ, བྷནྟེ, པུབྦེ པཱཔཀམྨཾ ཀཏཾ ཨཝིཔཀྐཝིཔཱཀཾ། ཏཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’ནྟི ། ཨཡཾ ཁོ ནོ, བྷནྟེ , ཝཔྤེན སཀྐེན ནིགཎྛསཱཝཀེན སདྡྷིཾ ཨནྟརཱཀཐཱ ཝིཔྤཀཏཱ; ཨཐ བྷགཝཱ ཨནུཔྤཏྟོ’’ཏི།

    ‘‘Kāya nuttha, moggallāna, etarahi kathāya sannisinnā; kā ca pana vo antarākathā vippakatā’’ti? ‘‘Idhāhaṃ, bhante, vappaṃ sakkaṃ nigaṇṭhasāvakaṃ etadavocaṃ – ‘idhassa, vappa, kāyena saṃvuto vācāya saṃvuto manasā saṃvuto avijjāvirāgā vijjuppādā. Passasi no tvaṃ, vappa, taṃ ṭhānaṃ yatonidānaṃ purisaṃ dukkhavedaniyā āsavā assaveyyuṃ abhisamparāya’nti? Evaṃ vutte, bhante, vappo sakko nigaṇṭhasāvako maṃ etadavoca – ‘passāmahaṃ, bhante, taṃ ṭhānaṃ. Idhassa, bhante, pubbe pāpakammaṃ kataṃ avipakkavipākaṃ. Tatonidānaṃ purisaṃ dukkhavedaniyā āsavā assaveyyuṃ abhisamparāya’nti . Ayaṃ kho no, bhante , vappena sakkena nigaṇṭhasāvakena saddhiṃ antarākathā vippakatā; atha bhagavā anuppatto’’ti.

    ཨཐ ཁོ བྷགཝཱ ཝཔྤཾ སཀྐཾ ནིགཎྛསཱཝཀཾ ཨེཏདཝོཙ – ‘‘སཙེ མེ ཏྭཾ, ཝཔྤ, ཨནུཉྙེཡྻཉྩེཝ ཨནུཛཱནེཡྻཱསི, པཊིཀྐོསིཏབྦཉྩ པཊིཀྐོསེཡྻཱསི, ཡསྶ ཙ མེ བྷཱསིཏསྶ ཨཏྠཾ ན ཛཱནེཡྻཱསི མམེཝེཏྠ ཨུཏྟརི པཊིཔུཙྪེཡྻཱསི – ‘ཨིདཾ, བྷནྟེ, ཀཐཾ, ཨིམསྶ ཀོ ཨཏྠོ’ཏི, སིཡཱ ནོ ཨེཏྠ ཀཐཱསལླཱཔོ’’ཏི། ‘‘ཨནུཉྙེཡྻཉྩེཝཱཧཾ, བྷནྟེ, བྷགཝཏོ ཨནུཛཱནིསྶཱམི, པཊིཀྐོསིཏབྦཉྩ པཊིཀྐོསིསྶཱམི, ཡསྶ ཙཱཧཾ བྷགཝཏོ བྷཱསིཏསྶ ཨཏྠཾ ན ཛཱནིསྶཱམི བྷགཝནྟཾཡེཝེཏྠ ཨུཏྟརི པཊིཔུཙྪིསྶཱམི – ‘ཨིདཾ བྷནྟེ, ཀཐཾ, ཨིམསྶ ཀོ ཨཏྠོ’ཏི? ཧོཏུ ནོ ཨེཏྠ ཀཐཱསལླཱཔོ’’ཏི།

    Atha kho bhagavā vappaṃ sakkaṃ nigaṇṭhasāvakaṃ etadavoca – ‘‘sace me tvaṃ, vappa, anuññeyyañceva anujāneyyāsi, paṭikkositabbañca paṭikkoseyyāsi, yassa ca me bhāsitassa atthaṃ na jāneyyāsi mamevettha uttari paṭipuccheyyāsi – ‘idaṃ, bhante, kathaṃ, imassa ko attho’ti, siyā no ettha kathāsallāpo’’ti. ‘‘Anuññeyyañcevāhaṃ, bhante, bhagavato anujānissāmi, paṭikkositabbañca paṭikkosissāmi, yassa cāhaṃ bhagavato bhāsitassa atthaṃ na jānissāmi bhagavantaṃyevettha uttari paṭipucchissāmi – ‘idaṃ bhante, kathaṃ, imassa ko attho’ti? Hotu no ettha kathāsallāpo’’ti.

    ‘‘ཏཾ ཀིཾ མཉྙསི, ཝཔྤ, ཡེ ཀཱཡསམཱརམྦྷཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, ཀཱཡསམཱརམྦྷཱ པཊིཝིརཏསྶ ཨེཝཾས ཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། སོ ནཝཉྩ ཀམྨཾ ན ཀརོཏི, པུརཱཎཉྩ ཀམྨཾ ཕུསྶ ཕུསྶ བྱནྟཱིཀརོཏི, སནྡིཊྛིཀཱ ནིཛྫརཱ ཨཀཱལིཀཱ ཨེཧིཔསྶིཀཱ ཨོཔནེཡྻིཀཱ པཙྩཏྟཾ ཝེདིཏབྦཱ ཝིཉྙཱུཧི 3། པསྶསི ནོ ཏྭཾ, ཝཔྤ, ཏཾ ཋཱནཾ ཡཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’’ནྟི? ‘‘ནོ ཧེཏཾ, བྷནྟེ’’།

    ‘‘Taṃ kiṃ maññasi, vappa, ye kāyasamārambhapaccayā uppajjanti āsavā vighātapariḷāhā, kāyasamārambhā paṭiviratassa evaṃsa te āsavā vighātapariḷāhā na honti. So navañca kammaṃ na karoti, purāṇañca kammaṃ phussa phussa byantīkaroti, sandiṭṭhikā nijjarā akālikā ehipassikā opaneyyikā paccattaṃ veditabbā viññūhi 4. Passasi no tvaṃ, vappa, taṃ ṭhānaṃ yatonidānaṃ purisaṃ dukkhavedaniyā āsavā assaveyyuṃ abhisamparāya’’nti? ‘‘No hetaṃ, bhante’’.

    ‘‘ཏཾ ཀིཾ མཉྙསི, ཝཔྤ, ཡེ ཝཙཱིསམཱརམྦྷཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, ཝཙཱིསམཱརམྦྷཱ པཊིཝིརཏསྶ ཨེཝཾས ཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། སོ ནཝཉྩ ཀམྨཾ ན ཀརོཏི, པུརཱཎཉྩ ཀམྨཾ ཕུསྶ ཕུསྶ བྱནྟཱིཀརོཏི། སནྡིཊྛིཀཱ ནིཛྫརཱ ཨཀཱལིཀཱ ཨེཧིཔསྶིཀཱ ཨོཔནེཡྻིཀཱ པཙྩཏྟཾ ཝེདིཏབྦཱ ཝིཉྙཱུཧི། པསྶསི ནོ ཏྭཾ, ཝཔྤ, ཏཾ ཋཱནཾ ཡཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’’ནྟི? ‘‘ནོ ཧེཏཾ, བྷནྟེ’’།

    ‘‘Taṃ kiṃ maññasi, vappa, ye vacīsamārambhapaccayā uppajjanti āsavā vighātapariḷāhā, vacīsamārambhā paṭiviratassa evaṃsa te āsavā vighātapariḷāhā na honti. So navañca kammaṃ na karoti, purāṇañca kammaṃ phussa phussa byantīkaroti. Sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Passasi no tvaṃ, vappa, taṃ ṭhānaṃ yatonidānaṃ purisaṃ dukkhavedaniyā āsavā assaveyyuṃ abhisamparāya’’nti? ‘‘No hetaṃ, bhante’’.

    ‘‘ཏཾ ཀིཾ མཉྙསི, ཝཔྤ, ཡེ མནོསམཱརམྦྷཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, མནོསམཱརམྦྷཱ པཊིཝིརཏསྶ ཨེཝཾས ཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། སོ ནཝཉྩ ཀམྨཾ ན ཀརོཏི, པུརཱཎཉྩ ཀམྨཾ ཕུསྶ ཕུསྶ བྱནྟཱིཀརོཏི། སནྡིཊྛིཀཱ ནིཛྫརཱ ཨཀཱལིཀཱ ཨེཧིཔསྶིཀཱ ཨོཔནེཡྻིཀཱ པཙྩཏྟཾ ཝེདིཏབྦཱ ཝིཉྙཱུཧི། པསྶསི ནོ ཏྭཾ, ཝཔྤ, ཏཾ ཋཱནཾ ཡཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’’ནྟི? ‘‘ནོ ཧེཏཾ, བྷནྟེ’’།

    ‘‘Taṃ kiṃ maññasi, vappa, ye manosamārambhapaccayā uppajjanti āsavā vighātapariḷāhā, manosamārambhā paṭiviratassa evaṃsa te āsavā vighātapariḷāhā na honti. So navañca kammaṃ na karoti, purāṇañca kammaṃ phussa phussa byantīkaroti. Sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Passasi no tvaṃ, vappa, taṃ ṭhānaṃ yatonidānaṃ purisaṃ dukkhavedaniyā āsavā assaveyyuṃ abhisamparāya’’nti? ‘‘No hetaṃ, bhante’’.

    ‘‘ཏཾ ཀིཾ མཉྙསི, ཝཔྤ, ཡེ ཨཝིཛྫཱཔཙྩཡཱ ཨུཔྤཛྫནྟི ཨཱསཝཱ ཝིགྷཱཏཔརིལཱ༹ཧཱ, ཨཝིཛྫཱཝིརཱགཱ ཝིཛྫུཔྤཱདཱ ཨེཝཾས ཏེ ཨཱསཝཱ ཝིགྷཱཏཔརིལཱ༹ཧཱ ན ཧོནྟི། སོ ནཝཉྩ ཀམྨཾ ན ཀརོཏི, པུརཱཎཉྩ ཀམྨཾ ཕུསྶ ཕུསྶ བྱནྟཱིཀརོཏི། སནྡིཊྛིཀཱ ནིཛྫརཱ ཨཀཱལིཀཱ ཨེཧིཔསྶིཀཱ ཨོཔནེཡྻིཀཱ པཙྩཏྟཾ ཝེདིཏབྦཱ ཝིཉྙཱུཧི། པསྶསི ནོ ཏྭཾ, ཝཔྤ, ཏཾ ཋཱནཾ ཡཏོནིདཱནཾ པུརིསཾ དུཀྑཝེདནིཡཱ ཨཱསཝཱ ཨསྶཝེཡྻུཾ ཨབྷིསམྤརཱཡ’’ནྟི? ‘‘ནོ ཧེཏཾ, བྷནྟེ’’།

    ‘‘Taṃ kiṃ maññasi, vappa, ye avijjāpaccayā uppajjanti āsavā vighātapariḷāhā, avijjāvirāgā vijjuppādā evaṃsa te āsavā vighātapariḷāhā na honti. So navañca kammaṃ na karoti, purāṇañca kammaṃ phussa phussa byantīkaroti. Sandiṭṭhikā nijjarā akālikā ehipassikā opaneyyikā paccattaṃ veditabbā viññūhi. Passasi no tvaṃ, vappa, taṃ ṭhānaṃ yatonidānaṃ purisaṃ dukkhavedaniyā āsavā assaveyyuṃ abhisamparāya’’nti? ‘‘No hetaṃ, bhante’’.

    ‘‘ཨེཝཾ སམྨཱ ཝིམུཏྟཙིཏྟསྶ ཁོ, ཝཔྤ, བྷིཀྑུནོ ཚ སཏཏཝིཧཱརཱ ཨདྷིགཏཱ ཧོནྟི། སོ ཙཀྑུནཱ རཱུཔཾ དིསྭཱ ནེཝ སུམནོ ཧོཏི ན དུམྨནོ; ཨུཔེཀྑཀོ ཝིཧརཏི སཏོ སམྤཛཱནོ། སོཏེན སདྡཾ སུཏྭཱ…པེ॰… གྷཱནེན གནྡྷཾ གྷཱཡིཏྭཱ…པེ॰.. ཛིཝ྄ཧཱཡ རསཾ སཱཡིཏྭཱ…པེ॰… ཀཱཡེན ཕོཊྛབྦཾ ཕུསིཏྭཱ…པེ॰… མནསཱ དྷམྨཾ ཝིཉྙཱ ནེཝ སུམནོ ཧོཏི ན དུམྨནོ; ཨུཔེཀྑཀོ ཝིཧརཏི སཏོ སམྤཛཱནོ། སོ ཀཱཡཔརིཡནྟིཀཾ ཝེདནཾ ཝེདིཡམཱནོ ‘ཀཱཡཔརིཡནྟིཀཾ ཝེདནཾ ཝེདིཡཱམཱི’ཏི པཛཱནཱཏི; ཛཱིཝིཏཔརིཡནྟིཀཾ ཝེདནཾ ཝེདིཡམཱནོ ‘ཛཱིཝིཏཔརིཡནྟིཀཾ ཝེདནཾ ཝེདིཡཱམཱི’ཏི པཛཱནཱཏི; ‘ཀཱཡསྶ བྷེདཱ ཨུདྡྷཾ ཛཱིཝིཏཔརིཡཱདཱནཱ ཨིདྷེཝ སབྦཝེདཡིཏཱནི ཨནབྷིནནྡིཏཱནི སཱིཏཱི བྷཝིསྶནྟཱི’ཏི པཛཱནཱཏི’’།

    ‘‘Evaṃ sammā vimuttacittassa kho, vappa, bhikkhuno cha satatavihārā adhigatā honti. So cakkhunā rūpaṃ disvā neva sumano hoti na dummano; upekkhako viharati sato sampajāno. Sotena saddaṃ sutvā…pe… ghānena gandhaṃ ghāyitvā…pe... jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññā neva sumano hoti na dummano; upekkhako viharati sato sampajāno. So kāyapariyantikaṃ vedanaṃ vediyamāno ‘kāyapariyantikaṃ vedanaṃ vediyāmī’ti pajānāti; jīvitapariyantikaṃ vedanaṃ vediyamāno ‘jīvitapariyantikaṃ vedanaṃ vediyāmī’ti pajānāti; ‘kāyassa bhedā uddhaṃ jīvitapariyādānā idheva sabbavedayitāni anabhinanditāni sītī bhavissantī’ti pajānāti’’.

    ‘‘སེཡྻཐཱཔི, ཝཔྤ, ཐཱུཎཾ པཊིཙྩ ཚཱཡཱ པཉྙཱཡཏི། ཨཐ པུརིསོ ཨཱགཙྪེཡྻ ཀུདྡཱལཔིཊཀཾ ཨཱདཱཡ། སོ ཏཾ ཐཱུཎཾ མཱུལེ ཚིནྡེཡྻ; མཱུལེ ཚིནྡིཏྭཱ པལིཁཎེཡྻ; པལིཁཎིཏྭཱ མཱུལཱནི ཨུདྡྷརེཡྻ, ཨནྟམསོ ཨུསཱིརནཱལི༹མཏྟཱནིཔི 5། སོ ཏཾ ཐཱུཎཾ ཁཎྜཱཁཎྜིཀཾ ཚིནྡེཡྻ། ཁཎྜཱཁཎྜིཀཾ ཚེཏྭཱ ཕཱལེཡྻ། ཕཱལེཏྭཱ སཀལིཀཾ སཀལིཀཾ ཀརེཡྻ། སཀལིཀཾ སཀལིཀཾ ཀཏྭཱ ཝཱཏཱཏཔེ ཝིསོསེཡྻ། ཝཱཏཱཏཔེ ཝིསོསེཏྭཱ ཨགྒིནཱ ཌཧེཡྻ། ཨགྒིནཱ ཌཧེཏྭཱ མསིཾ ཀརེཡྻ ། མསིཾ ཀརིཏྭཱ མཧཱཝཱཏེ ཝཱ ཨོཕུཎེཡྻ ནདིཡཱ ཝཱ སཱིགྷསོཏཱཡ པཝཱཧེཡྻ། ཨེཝཾ ཧིསྶ, ཝཔྤ, ཡཱ ཐཱུཎཾ པཊིཙྩ ཚཱཡཱ སཱ ཨུཙྪིནྣམཱུལཱ ཏཱལཱཝཏྠུཀཏཱ ཨནབྷཱཝཾཀཏཱ ཨཱཡཏིཾ ཨནུཔྤཱདདྷམྨཱ།

    ‘‘Seyyathāpi, vappa, thūṇaṃ paṭicca chāyā paññāyati. Atha puriso āgaccheyya kuddālapiṭakaṃ ādāya. So taṃ thūṇaṃ mūle chindeyya; mūle chinditvā palikhaṇeyya; palikhaṇitvā mūlāni uddhareyya, antamaso usīranāḷimattānipi 6. So taṃ thūṇaṃ khaṇḍākhaṇḍikaṃ chindeyya. Khaṇḍākhaṇḍikaṃ chetvā phāleyya. Phāletvā sakalikaṃ sakalikaṃ kareyya. Sakalikaṃ sakalikaṃ katvā vātātape visoseyya. Vātātape visosetvā agginā ḍaheyya. Agginā ḍahetvā masiṃ kareyya . Masiṃ karitvā mahāvāte vā ophuṇeyya nadiyā vā sīghasotāya pavāheyya. Evaṃ hissa, vappa, yā thūṇaṃ paṭicca chāyā sā ucchinnamūlā tālāvatthukatā anabhāvaṃkatā āyatiṃ anuppādadhammā.

    ‘‘ཨེཝམེཝཾ ཁོ, ཝཔྤ, ཨེཝཾ སམྨཱ ཝིམུཏྟཙིཏྟསྶ བྷིཀྑུནོ ཚ སཏཏཝིཧཱརཱ ཨདྷིགཏཱ ཧོནྟི། སོ ཙཀྑུནཱ རཱུཔཾ དིསྭཱ ནེཝ སུམནོ ཧོཏི ན དུམྨནོ; ཨུཔེཀྑཀོ ཝིཧརཏི སཏོ སམྤཛཱནོ། སོཏེན སདྡཾ སུཏྭཱ…པེ॰… གྷཱནེན གནྡྷཾ གྷཱཡིཏྭཱ…པེ॰… ཛིཝ྄ཧཱཡ རསཾ སཱཡིཏྭཱ…པེ॰… ཀཱཡེན ཕོཊྛབྦཾ ཕུསིཏྭཱ…པེ॰… མནསཱ དྷམྨཾ ཝིཉྙཱཡ ནེཝ སུམནོ ཧོཏི ན དུམྨནོ; ཨུཔེཀྑཀོ ཝིཧརཏི སཏོ སམྤཛཱནོ། སོ ཀཱཡཔརིཡནྟིཀཾ ཝེདནཾ ཝེདིཡམཱནོ ‘ཀཱཡཔརིཡནྟིཀཾ ཝེདནཾ ཝེདིཡཱམཱི’ཏི པཛཱནཱཏི; ཛཱིཝིཏཔརིཡནྟིཀཾ ཝེདནཾ ཝེདིཡམཱནོ ‘ཛཱིཝིཏཔརིཡནྟིཀཾ ཝེདནཾ ཝེདིཡཱམཱི’ཏི པཛཱནཱཏི; ‘ཀཱཡསྶ བྷེདཱ ཨུདྡྷཾ ཛཱིཝིཏཔརིཡཱདཱནཱ ཨིདྷེཝ སབྦཝེདཡིཏཱནི ཨནབྷིནནྡིཏཱནི སཱིཏཱི བྷཝིསྶནྟཱི’ཏི པཛཱནཱཏི’’།

    ‘‘Evamevaṃ kho, vappa, evaṃ sammā vimuttacittassa bhikkhuno cha satatavihārā adhigatā honti. So cakkhunā rūpaṃ disvā neva sumano hoti na dummano; upekkhako viharati sato sampajāno. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya neva sumano hoti na dummano; upekkhako viharati sato sampajāno. So kāyapariyantikaṃ vedanaṃ vediyamāno ‘kāyapariyantikaṃ vedanaṃ vediyāmī’ti pajānāti; jīvitapariyantikaṃ vedanaṃ vediyamāno ‘jīvitapariyantikaṃ vedanaṃ vediyāmī’ti pajānāti; ‘kāyassa bhedā uddhaṃ jīvitapariyādānā idheva sabbavedayitāni anabhinanditāni sītī bhavissantī’ti pajānāti’’.

    ཨེཝཾ ཝུཏྟེ ཝཔྤོ སཀྐོ ནིགཎྛསཱཝཀོ བྷགཝནྟཾ ཨེཏདཝོཙ – ‘‘སེཡྻཐཱཔི, བྷནྟེ, པུརིསོ ཨུདཡཏྠིཀོ ཨསྶཔཎིཡཾ པོསེཡྻ། སོ ཨུདཡཉྩེཝ ནཱདྷིགཙྪེཡྻ, ཨུཏྟརིཉྩ ཀིལམཐསྶ ཝིགྷཱཏསྶ བྷཱགཱི ཨསྶ། ཨེཝམེཝཾ ཁོ ཨཧཾ, བྷནྟེ, ཨུདཡཏྠིཀོ བཱལེ ནིགཎྛེ པཡིརུཔཱསིཾ། སྭཱཧཾ ཨུདཡཉྩེཝ ནཱདྷིགཙྪིཾ, ཨུཏྟརིཉྩ ཀིལམཐསྶ ཝིགྷཱཏསྶ བྷཱགཱི ཨཧོསིཾ། ཨེསཱཧཾ, བྷནྟེ, ཨཛྫཏགྒེ ཡོ མེ བཱལེསུ ནིགཎྛེསུ པསཱདོ ཏཾ མཧཱཝཱཏེ ཝཱ ཨོཕུཎཱམི ནདིཡཱ ཝཱ སཱིགྷསོཏཱཡ པཝཱཧེམི། ཨབྷིཀྐནྟཾ, བྷནྟེ…པེ॰… ཨུཔཱསཀཾ མཾ, བྷནྟེ , བྷགཝཱ དྷཱརེཏུ ཨཛྫཏགྒེ པཱཎུཔེཏཾ སརཎཾ གཏ’’ནྟི། པཉྩམཾ།

    Evaṃ vutte vappo sakko nigaṇṭhasāvako bhagavantaṃ etadavoca – ‘‘seyyathāpi, bhante, puriso udayatthiko assapaṇiyaṃ poseyya. So udayañceva nādhigaccheyya, uttariñca kilamathassa vighātassa bhāgī assa. Evamevaṃ kho ahaṃ, bhante, udayatthiko bāle nigaṇṭhe payirupāsiṃ. Svāhaṃ udayañceva nādhigacchiṃ, uttariñca kilamathassa vighātassa bhāgī ahosiṃ. Esāhaṃ, bhante, ajjatagge yo me bālesu nigaṇṭhesu pasādo taṃ mahāvāte vā ophuṇāmi nadiyā vā sīghasotāya pavāhemi. Abhikkantaṃ, bhante…pe… upāsakaṃ maṃ, bhante , bhagavā dhāretu ajjatagge pāṇupetaṃ saraṇaṃ gata’’nti. Pañcamaṃ.




    Next: ༦. སཱལ༹ྷསུཏྟཾ • 6. Sāḷhasuttaṃ




    Footnotes:
    1. ཨནྭཱསྶཝེཡྻུཾ (ཀ॰)
    2. anvāssaveyyuṃ (ka.)
    3. ཝིཉྙཱུཧཱིཏི (སཱི॰ པཱི॰ ཀ॰) སཾ॰ ནི॰ ༤.༣༦༤ པསྶིཏབྦཾ
    4. viññūhīti (sī. pī. ka.) saṃ. ni. 4.364 passitabbaṃ
    5. ཨུསཱིརནཱལ༹མཏྟཱནིཔི (སཱི॰)
    6. usīranāḷamattānipi (sī.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. ཝཔྤསུཏྟཝཎྞནཱ • 5. Vappasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥. ཝཔྤསུཏྟཝཎྞནཱ • 5. Vappasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact