| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. வப்பஸுத்தவண்ணனா
5. Vappasuttavaṇṇanā
195. பஞ்சமே பிஹிதத்தாதி அகுஸலஸ்ஸ பவேஸனத்³வாரங் பித³ஹித்வா டி²தத்தா. காயேன ஸங்வரிதப்³ப³ஞ்ஹி அபிஹிதேன த்³வாரேன பவத்தனகங் பாபத⁴ம்மங் ஸங்வரித்வா டி²தோ காயேன ஸங்வுதோ நாம. க²யவிராகே³னாதி அச்சந்தக²யஸங்கா²தேன விரஜ்ஜனேன, அனுப்பாத³னிரோதே⁴னாதி அத்தோ². கிங் விஜ்ஜா புப்³பே³ உப்பன்னாதி? உப⁴யமேதங் ந வத்தப்³ப³ங். பஹானாபி⁴ஸமயபா⁴வனாபி⁴ஸமயானங் அபி⁴ன்னகாலத்தா பதீ³புஜ்ஜலனேன அந்த⁴காரங் விய விஜ்ஜுப்பாதே³ன அவிஜ்ஜா நிருத்³தா⁴வ ஹோதி, வத்தப்³ப³ங் வா ஹேதுப²லத்தமுபசாரவஸேன. யதா² ஹி பதீ³புஜ்ஜலனஹேதுகோ அந்த⁴காரவிக³மோ, ஏவங் விஜ்ஜுப்பாத³ஹேதுகோ அவிஜ்ஜானிரோதோ⁴. ஹேதுப²லத⁴ம்மா ச ஸமானகாலாபி புப்³பா³பரகாலா விய வோஹரீயந்தி யதா² ‘‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாண’’ந்தி (ம॰ நி॰ 1.400; 3.421, 425, 426; ஸங்॰ நி॰ 2.43-44; 2.4.60; கதா²॰ 465, 467) பச்சயாதா³னுப்பஜ்ஜனகிரியா. சித்தஸ்ஸ காயஸ்ஸ ச விஹனநதோ விகா⁴தோ, து³க்க²ங். பரித³ஹனதோ பரிளாஹோ.
195. Pañcame pihitattāti akusalassa pavesanadvāraṃ pidahitvā ṭhitattā. Kāyena saṃvaritabbañhi apihitena dvārena pavattanakaṃ pāpadhammaṃ saṃvaritvā ṭhito kāyena saṃvuto nāma. Khayavirāgenāti accantakhayasaṅkhātena virajjanena, anuppādanirodhenāti attho. Kiṃ vijjā pubbe uppannāti? Ubhayametaṃ na vattabbaṃ. Pahānābhisamayabhāvanābhisamayānaṃ abhinnakālattā padīpujjalanena andhakāraṃ viya vijjuppādena avijjā niruddhāva hoti, vattabbaṃ vā hetuphalattamupacāravasena. Yathā hi padīpujjalanahetuko andhakāravigamo, evaṃ vijjuppādahetuko avijjānirodho. Hetuphaladhammā ca samānakālāpi pubbāparakālā viya voharīyanti yathā ‘‘cakkhuñca paṭicca rūpe ca uppajjati cakkhuviññāṇa’’nti (ma. ni. 1.400; 3.421, 425, 426; saṃ. ni. 2.43-44; 2.4.60; kathā. 465, 467) paccayādānuppajjanakiriyā. Cittassa kāyassa ca vihananato vighāto, dukkhaṃ. Paridahanato pariḷāho.
நிச்சவிஹாராதி ஸப்³ப³தா³ பவத்தனகவிஹாரா. ட²பெத்வா ஹி ஸமாபத்திவேலங் ப⁴வங்க³வேலஞ்ச கீ²ணாஸவா இமினா ச²ளங்கு³பெக்கா²விஹாரேன ஸப்³ப³காலங் விஹரந்தி. சக்கு²னா ரூபங் தி³ஸ்வாதி சக்கு²விஞ்ஞாணேன ரூபங் தி³ஸ்வா. சக்கு²னா ரூபங் தி³ஸ்வாதி ஹி நிஸ்ஸயவோஹாரேன வுத்தங். ஸஸம்பா⁴ரகதா² ஹேஸா யதா² ‘‘த⁴னுனா விஜ்ஜ²தீ’’தி, தஸ்மா நிஸ்ஸயஸீஸேன நிஸ்ஸிதஸ்ஸ க³ஹணங் த³ட்ட²ப்³ப³ங். ராக³வஸேன ந ஸோமனஸ்ஸஜாதோ ஹோதீதி கே³ஹஸிதபேமவஸேனபி ஜவனக்க²ணே ஸோமனஸ்ஸஜாதோ ந ஹோதி மக்³கே³ன ஸமுச்சி²ன்னத்தா, ந தோ³மனஸ்ஸஜாதோ பஸாத³ஞ்ஞத²த்தவஸேனபி. உபெக்க²கோ மஜ்ஜ²த்தோ ஹுத்வா விஹரதீதி அஸமபெக்க²னேன மோஹங் அனுப்பாதெ³ந்தோ ஞாணுபெக்கா²வஸேனேவ உபெக்க²கோ விஹரதி மஜ்ஜ²த்தோ. கீ²ணாஸவோ ஹி இட்டே²பி அனிட்டே²பி மஜ்ஜ²த்தேபி ஆரம்மணே யோ அஸமபெக்க²னேன ஸமஸமா அயோனிஸோக³ஹணே அகீ²ணாஸவானங் மோஹோ உப்பஜ்ஜதி, தங் அனுப்பாதெ³ந்தோ மக்³கே³னேவ தஸ்ஸ ஸமுக்³கா⁴திதத்தா ஞாணுபெக்கா²வஸேனேவ உபெக்க²கோ விஹரதி, அயஞ்சஸ்ஸ படிபத்தி ஸதிவேபுல்லபத்தியா பஞ்ஞாவேபுல்லபத்தியா சாதி வுத்தங் ‘‘ஸதிஸம்பஜஞ்ஞபரிக்³க³ஹிதாயா’’தி.
Niccavihārāti sabbadā pavattanakavihārā. Ṭhapetvā hi samāpattivelaṃ bhavaṅgavelañca khīṇāsavā iminā chaḷaṅgupekkhāvihārena sabbakālaṃ viharanti. Cakkhunā rūpaṃ disvāti cakkhuviññāṇena rūpaṃ disvā. Cakkhunā rūpaṃ disvāti hi nissayavohārena vuttaṃ. Sasambhārakathā hesā yathā ‘‘dhanunā vijjhatī’’ti, tasmā nissayasīsena nissitassa gahaṇaṃ daṭṭhabbaṃ. Rāgavasena na somanassajāto hotīti gehasitapemavasenapi javanakkhaṇe somanassajāto na hoti maggena samucchinnattā, na domanassajāto pasādaññathattavasenapi. Upekkhako majjhatto hutvā viharatīti asamapekkhanena mohaṃ anuppādento ñāṇupekkhāvaseneva upekkhako viharati majjhatto. Khīṇāsavo hi iṭṭhepi aniṭṭhepi majjhattepi ārammaṇe yo asamapekkhanena samasamā ayonisogahaṇe akhīṇāsavānaṃ moho uppajjati, taṃ anuppādento maggeneva tassa samugghātitattā ñāṇupekkhāvaseneva upekkhako viharati, ayañcassa paṭipatti sativepullapattiyā paññāvepullapattiyā cāti vuttaṃ ‘‘satisampajaññapariggahitāyā’’ti.
எத்த² ச ‘‘ச²ஸு த்³வாரேஸு உபெக்க²கோ விஹரதீ’’தி இமினா ச²ளங்கு³பெக்கா² கதி²தா. ‘‘ஸம்பஜானோ’’தி வசனதோ பன சத்தாரி ஞாணஸம்பயுத்தசித்தானி லப்³ப⁴ந்தி தேஹி வினா ஸம்பஜானதாய அஸம்ப⁴வதோ. ‘‘ஸததவிஹாரா’’தி வசனதோ அட்ட²பி மஹாகிரியசித்தானி லப்³ப⁴ந்தி ஞாணுப்பத்திபச்சயரஹிதகாலேபி பவத்திஜோதனதோ. ‘‘அரஜ்ஜந்தோ அது³ஸ்ஸந்தோ’’தி வசனதோ ஹஸிதுப்பாத³வொட்ட²ப்³ப³னேஹி ஸத்³தி⁴ங் த³ஸ சித்தானி லப்³ப⁴ந்தி. அரஜ்ஜனாது³ஸ்ஸனவஸேன பவத்தி ஹி தேஸம்பி ஸாதா⁴ரணாதி. நனு செத்த² ‘‘உபெக்க²கோ விஹரதீ’’தி ச²ளங்கு³பெக்கா²வஸேன இமேஸங் ஸததவிஹாரானங் ஆக³தத்தா ஸோமனஸ்ஸங் கத²ங் லப்³ப⁴தீதி? ஆஸேவனதோதி. கிஞ்சாபி ஹி கீ²ணாஸவோ இட்டா²னிட்டே²பி ஆரம்மணே மஜ்ஜ²த்தே விய ப³ஹுலங் உபெக்க²கோ விஹரதி அத்தனோ பரிஸுத்³த⁴ப்பகதிபா⁴வாவிஜஹனதோ, கதா³சி பன ததா² சேதோபி⁴ஸங்கா²ரபா⁴வே யங் தங் ஸபா⁴வதோ இட்ட²ங் ஆரம்மணங் , தஸ்ஸ யாதா²வதோ ஸபா⁴வக்³க³ஹணவஸேனபி அரஹதோ சித்தங் ஸோமனஸ்ஸஸஹக³தங் ஹுத்வா பவத்ததேவ, தஞ்ச கோ² புப்³பா³ஸேவனவஸேன.
Ettha ca ‘‘chasu dvāresu upekkhako viharatī’’ti iminā chaḷaṅgupekkhā kathitā. ‘‘Sampajāno’’ti vacanato pana cattāri ñāṇasampayuttacittāni labbhanti tehi vinā sampajānatāya asambhavato. ‘‘Satatavihārā’’ti vacanato aṭṭhapi mahākiriyacittāni labbhanti ñāṇuppattipaccayarahitakālepi pavattijotanato. ‘‘Arajjanto adussanto’’ti vacanato hasituppādavoṭṭhabbanehi saddhiṃ dasa cittāni labbhanti. Arajjanādussanavasena pavatti hi tesampi sādhāraṇāti. Nanu cettha ‘‘upekkhako viharatī’’ti chaḷaṅgupekkhāvasena imesaṃ satatavihārānaṃ āgatattā somanassaṃ kathaṃ labbhatīti? Āsevanatoti. Kiñcāpi hi khīṇāsavo iṭṭhāniṭṭhepi ārammaṇe majjhatte viya bahulaṃ upekkhako viharati attano parisuddhappakatibhāvāvijahanato, kadāci pana tathā cetobhisaṅkhārabhāve yaṃ taṃ sabhāvato iṭṭhaṃ ārammaṇaṃ , tassa yāthāvato sabhāvaggahaṇavasenapi arahato cittaṃ somanassasahagataṃ hutvā pavattateva, tañca kho pubbāsevanavasena.
காயோதி (ஸங்॰ நி॰ டீ॰ 2.2.51) பஞ்சத்³வாரகாயோ, ஸோ அந்தோ அவஸானங் ஏதிஸ்ஸாதி காயந்திகா, தங் காயந்திகங். தேனாஹ – ‘‘யாவ பஞ்சத்³வாரகாயோ பவத்ததி, தாவ பவத்த’’ந்தி. ஜீவிதந்திகந்தி எத்தா²பி ஏஸேவ நயோ. பச்சா² உப்பஜ்ஜித்வாதி ஏதஸ்மிங் அத்தபா⁴வே மனொத்³வாரிகவேத³னாதோ பச்சா² உப்பஜ்ஜித்வா ததோ பட²மங் நிருஜ்ஜ²தி, ததோ ஏவ அத்த²ஸித்³த⁴மத்த²ங் ஸரூபேனேவ த³ஸ்ஸேதுங் ‘‘மனொத்³வாரிகவேத³னா பட²மங் உப்பஜ்ஜித்வா பச்சா² நிருஜ்ஜ²தீ’’தி வுத்தங். இதா³னி தமேவ ஸங்கே²பேன வுத்தங் விவரிதுங் ‘‘ஸா ஹீ’’திஆதி³மாஹ. யாவ தெத்திங்ஸவஸ்ஸானி பட²மவயோ. பஞ்ஞாஸவஸ்ஸகாலேதி பட²மவயதோ யாவ பஞ்ஞாஸவஸ்ஸகாலா, தாவ. டி²தா ஹோதீதி வட்³டி⁴ஹானியோ அனுபக³ந்த்வா ஸமரூபேனேவ டி²தா ஹோதி. மந்தா³தி முது³கா அதிகி²ணா. ததா³தி அஸீதினவுதிவஸ்ஸகாலே வத³ந்தேபி ததா²சிரபரிசிதேபீதி அதி⁴ப்பாயோ. ப⁴க்³கா³தி தேஜோப⁴க்³கே³ன ப⁴க்³கா³ து³ப்³ப³ண்ணா. ஹத³யகோடிங்யேவாதி சக்கா²தி³வத்தூ²ஸு அப்பவத்தித்வா தேஸங் ஆதி³அந்தகோடிபூ⁴தங் ஹத³யவத்து²ங்யேவ. தாவாதி யாவ வேத³னா வத்ததி, தாவ.
Kāyoti (saṃ. ni. ṭī. 2.2.51) pañcadvārakāyo, so anto avasānaṃ etissāti kāyantikā, taṃ kāyantikaṃ. Tenāha – ‘‘yāva pañcadvārakāyo pavattati, tāva pavatta’’nti. Jīvitantikanti etthāpi eseva nayo. Pacchā uppajjitvāti etasmiṃ attabhāve manodvārikavedanāto pacchā uppajjitvā tato paṭhamaṃ nirujjhati, tato eva atthasiddhamatthaṃ sarūpeneva dassetuṃ ‘‘manodvārikavedanā paṭhamaṃ uppajjitvā pacchā nirujjhatī’’ti vuttaṃ. Idāni tameva saṅkhepena vuttaṃ vivarituṃ ‘‘sā hī’’tiādimāha. Yāva tettiṃsavassāni paṭhamavayo. Paññāsavassakāleti paṭhamavayato yāva paññāsavassakālā, tāva. Ṭhitā hotīti vaḍḍhihāniyo anupagantvā samarūpeneva ṭhitā hoti. Mandāti mudukā atikhiṇā. Tadāti asītinavutivassakāle vadantepi tathāciraparicitepīti adhippāyo. Bhaggāti tejobhaggena bhaggā dubbaṇṇā. Hadayakoṭiṃyevāti cakkhādivatthūsu appavattitvā tesaṃ ādiantakoṭibhūtaṃ hadayavatthuṃyeva. Tāvāti yāva vedanā vattati, tāva.
வாபியாதி மஹாதளாகேன. பஞ்சஉத³கமக்³க³ஸம்பன்னந்தி பஞ்சஹி உத³கஸ்ஸ பவிஸனநிக்க²மனமக்³கே³ஹி யுத்தங். ததோ ததோ விஸ்ஸந்த³மானங் ஸப்³ப³ஸோ புண்ணத்தா. பட²மங் தே³வே வஸ்ஸந்தேதிஆதி³ உபமாஸங்ஸந்த³னங். இமங் வேத³னங் ஸந்தா⁴யாதி இமங் யதா²வுத்தங் பரியோஸானப்பத்தங் மனொத்³வாரிகவேத³னங் ஸந்தா⁴ய.
Vāpiyāti mahātaḷākena. Pañcaudakamaggasampannanti pañcahi udakassa pavisananikkhamanamaggehi yuttaṃ. Tato tato vissandamānaṃ sabbaso puṇṇattā. Paṭhamaṃ deve vassantetiādi upamāsaṃsandanaṃ. Imaṃ vedanaṃ sandhāyāti imaṃ yathāvuttaṃ pariyosānappattaṃ manodvārikavedanaṃ sandhāya.
காயஸ்ஸ பே⁴தா³தி அத்தபா⁴வஸ்ஸ வினாஸனதோ. பரதோ அக³ந்த்வாதி பரலோகவஸேன அக³ந்த்வா. வேத³னானங் ஸீதிபா⁴வோ நாம ஸங்கா²ரத³ரத²பரிளாஹாபா⁴வோ. ஸோ பனாயங் ஸப்³ப³ஸோ அப்பவத்திவஸேனேவாதி ஆஹ ‘‘அப்பவத்தனத⁴ம்மானி ப⁴விஸ்ஸந்தீ’’தி.
Kāyassa bhedāti attabhāvassa vināsanato. Parato agantvāti paralokavasena agantvā. Vedanānaṃ sītibhāvo nāma saṅkhāradarathapariḷāhābhāvo. So panāyaṃ sabbaso appavattivasenevāti āha ‘‘appavattanadhammāni bhavissantī’’ti.
அத்தபா⁴வங் நாஸேதுகாமஸ்ஸ த³ள்ஹங் உப்பன்னங் ஸங்வேக³ஞாணங் ஸந்தா⁴யாஹ ‘‘குதா³லோ விய பஞ்ஞா’’தி. ததோ நிப்³ப³த்திதஜ்ஜா²னஸமாதி⁴ங் ஸந்தா⁴ய ‘‘பிடகங் விய ஸமாதீ⁴’’தி. தன்னிஸ்ஸாய பவத்தேதப்³ப³விபஸ்ஸனாரம்ப⁴ஞாணங் ஸந்தா⁴ய ‘‘க²னித்தி விய விபஸ்ஸனா’’தி ச வுத்தங். ஸேஸமெத்த² உத்தானமேவ.
Attabhāvaṃ nāsetukāmassa daḷhaṃ uppannaṃ saṃvegañāṇaṃ sandhāyāha ‘‘kudālo viya paññā’’ti. Tato nibbattitajjhānasamādhiṃ sandhāya ‘‘piṭakaṃ viya samādhī’’ti. Tannissāya pavattetabbavipassanārambhañāṇaṃ sandhāya ‘‘khanitti viya vipassanā’’ti ca vuttaṃ. Sesamettha uttānameva.
வப்பஸுத்தவண்ணனா நிட்டி²தா.
Vappasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. வப்பஸுத்தங் • 5. Vappasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. வப்பஸுத்தவண்ணனா • 5. Vappasuttavaṇṇanā
