| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
5. ваббасуд̇д̇аван̣н̣анаа
5. Vappasuttavaṇṇanā
195. бан̃жамз ваббод̇и д̣̇асаб̣аласса жуул̣абид̇аа сагяарааж̇аа. ниг̇ан̣тасаавагод̇и взсаалияам̣ сийхасзнаабад̇и вияа наал̣анд̣̇ааяам̣ убаалиг̇ахабад̇и вияа жа ниг̇ан̣тасса наадабуд̇д̇асса убадтааго. гааязна сам̣вуд̇од̇и гааяад̣̇ваарасса сам̣вуд̇ад̇д̇аа бихид̇ад̇д̇аа гааязна сам̣вуд̇о наама. сзсад̣̇ваязби зсзва наяо. авиж̇ж̇аавирааг̇аад̇и авиж̇ж̇ааяа каяавирааг̇зна. виж̇ж̇уббаад̣̇аад̇и маг̇г̇авиж̇ж̇ааяа уббаад̣̇зна. д̇ам̣ таананд̇и д̇ам̣ гааран̣ам̣. авибаггавибааганд̇и алад̣̇д̇хавибаагаваарам̣. д̇ад̇онид̣̇аананд̇и д̇ам̣хзд̇у д̇аббажжаяаа. д̣̇угкавзд̣̇анияаа аасаваа ассавзяяунд̇и д̣̇угкавзд̣̇анааяа бажжаяабхууд̇аа гилзсаа ассавзяяум̣, д̇асса бурисасса уббаж̇ж̇зяяунд̇и ад̇т̇о. абхисамбарааяанд̇и д̣̇уд̇ияз ад̇д̇абхаавз. гааяасамаарамбхабажжаяаад̇и гааяагаммабажжаязна. аасаваад̇и гилзсаа. вигхаад̇абарил̣аахаад̇и зд̇т̇а вигхаад̇од̇и д̣̇угкам̣. барил̣ааход̇и гааяигажзд̇асиго барил̣аахо. пусса пусса б̣яанд̇ийгарод̇ийд̇и н̃аан̣аваж̇жхам̣ гаммам̣ н̃аан̣апассзна пусид̇ваа пусид̇ваа каяам̣ г̇амзд̇и, вибаагаваж̇жхам̣ гаммам̣ вибаагапассзна пусид̇ваа пусид̇ваа каяам̣ г̇амзд̇и. ниж̇ж̇араад̇и гилзсаж̇ийран̣агабадибад̣̇аа. сзсаваарзсуби зсзва наяо. ид̇ха тад̇ваа аяам̣ бхигку кийн̣аасаво гаад̇аб̣б̣о, жад̇д̇аари махаабхууд̇аани нийхарид̇ваа жад̇усажжававад̇т̇аанам̣ д̣̇ассзд̇ваа яаава арахад̇д̇апалам̣ гаммадтаанам̣ гат̇зд̇аб̣б̣ам̣.
195. Pañcame vappoti dasabalassa cūḷapitā sakyarājā. Nigaṇṭhasāvakoti vesāliyaṃ sīhasenāpati viya nāḷandāyaṃ upāligahapati viya ca nigaṇṭhassa nāṭaputtassa upaṭṭhāko. Kāyena saṃvutoti kāyadvārassa saṃvutattā pihitattā kāyena saṃvuto nāma. Sesadvayepi eseva nayo. Avijjāvirāgāti avijjāya khayavirāgena. Vijjuppādāti maggavijjāya uppādena. Taṃ ṭhānanti taṃ kāraṇaṃ. Avipakkavipākanti aladdhavipākavāraṃ. Tatonidānanti taṃhetu tappaccayā. Dukkhavedaniyā āsavā assaveyyunti dukkhavedanāya paccayabhūtā kilesā assaveyyuṃ, tassa purisassa uppajjeyyunti attho. Abhisamparāyanti dutiye attabhāve. Kāyasamārambhapaccayāti kāyakammapaccayena. Āsavāti kilesā. Vighātapariḷāhāti ettha vighātoti dukkhaṃ. Pariḷāhoti kāyikacetasiko pariḷāho. Phussa phussa byantīkarotīti ñāṇavajjhaṃ kammaṃ ñāṇaphassena phusitvā phusitvā khayaṃ gameti, vipākavajjhaṃ kammaṃ vipākaphassena phusitvā phusitvā khayaṃ gameti. Nijjarāti kilesajīraṇakapaṭipadā. Sesavāresupi eseva nayo. Idha ṭhatvā ayaṃ bhikkhu khīṇāsavo kātabbo, cattāri mahābhūtāni nīharitvā catusaccavavatthānaṃ dassetvā yāva arahattaphalaṃ kammaṭṭhānaṃ kathetabbaṃ.
ид̣̇аани бана д̇асса кийн̣аасавасса сад̇ад̇авихаарз д̣̇ассзд̇ум̣ звам̣ саммаа вимуд̇д̇ажид̇д̇ассаад̇иаад̣̇имааха. д̇ад̇т̇а саммаа вимуд̇д̇ажид̇д̇ассаад̇и хзд̇унаа гааран̣зна саммаа вимуд̇д̇асса. сад̇ад̇авихаараад̇и нижжавихаараа ниб̣ад̣̇д̇хавихаараа. нзва сумано ход̇ийд̇и идтаарамман̣з рааг̇авасзна на соманассаж̇аад̇о ход̇и. на д̣̇умманод̇и анидтаарамман̣з бадигхавасзна на д̣̇оманассаж̇аад̇о ход̇и. убзгкаго вихарад̇и сад̇о самбаж̇аанод̇и сад̇исамбаж̇ан̃н̃абариг̇г̇ахид̇ааяа маж̇жхад̇д̇аагааралагкан̣ааяа убзгкааяа д̇зсу аарамман̣зсу убзгкаго маж̇жхад̇д̇о худ̇ваа вихарад̇и.
Idāni pana tassa khīṇāsavassa satatavihāre dassetuṃ evaṃ sammā vimuttacittassātiādimāha. Tattha sammā vimuttacittassāti hetunā kāraṇena sammā vimuttassa. Satatavihārāti niccavihārā nibaddhavihārā. Neva sumano hotīti iṭṭhārammaṇe rāgavasena na somanassajāto hoti. Na dummanoti aniṭṭhārammaṇe paṭighavasena na domanassajāto hoti. Upekkhako viharati sato sampajānoti satisampajaññapariggahitāya majjhattākāralakkhaṇāya upekkhāya tesu ārammaṇesu upekkhako majjhatto hutvā viharati.
гааяабарияанд̇иганд̇и гааяанд̇игам̣ гааяабарижчиннам̣, яаава бан̃жад̣̇ваарагааяо бавад̇д̇ад̇и, д̇аава бавад̇д̇ам̣ бан̃жад̣̇вааригавзд̣̇ананд̇и ад̇т̇о. ж̇ийвид̇абарияанд̇иганд̇и ж̇ийвид̇анд̇игам̣ ж̇ийвид̇абарижчиннам̣, яаава ж̇ийвид̇ам̣ бавад̇д̇ад̇и, д̇аава бавад̇д̇ам̣ манод̣̇вааригавзд̣̇ананд̇и ад̇т̇о. д̇ад̇т̇а бан̃жад̣̇вааригавзд̣̇анаа бажчаа уббаж̇ж̇ид̇ваа батамам̣ нируж̇жхад̇и, манод̣̇вааригавзд̣̇анаа батамам̣ уббаж̇ж̇ид̇ваа бажчаа нируж̇жхад̇и. саа хи бадисанд̇хигкан̣з вад̇т̇уруубасмим̣язва бад̇идтаад̇и. бан̃жад̣̇вааригаа бавад̇д̇з бан̃жад̣̇вааравасзна бавад̇д̇амаанаа батамаваяз вийсад̇ивассагаалз раж̇ж̇анад̣̇уссанамуяханавасзна ад̇химад̇д̇аа б̣алавад̇ий ход̇и, бан̣н̣аасавассагаалз тид̇аа ход̇и, садтивассагаалад̇о бадтааяа барихааяамаанаа, асийд̇инавуд̇ивассагаалз манд̣̇аа ход̇и. д̇ад̣̇аа хи сад̇д̇аа ‘‘жирарад̇д̇ам̣ згад̇о нисийд̣̇имхаа нибаж̇ж̇имхаа’’д̇и вад̣̇анд̇зби на ж̇аанаамаад̇и вад̣̇анд̇и. ад̇химад̇д̇ааниби руубаад̣̇иаарамман̣аани на бассаама, суг̇анд̇хад̣̇уг̇г̇анд̇хам̣ ваа саад̣̇уасаад̣̇ум̣ ваа т̇ад̣̇д̇хамуд̣̇угам̣ ваад̇и на ж̇аанаамаад̇иби вад̣̇анд̇и. ид̇и нзсам̣ бан̃жад̣̇вааригавзд̣̇анаа бхаг̇г̇аа ход̇и, манод̣̇вааригаа бавад̇д̇ад̇и. сааби анубуб̣б̣зна барихааяамаанаа маран̣асамаяз хад̣̇аяагодим̣язва ниссааяа бавад̇д̇ад̇и. яаава банзсаа бавад̇д̇ад̇и, д̇аава сад̇д̇о ж̇ийвад̇ийд̇и вужжад̇и. яад̣̇аа наббавад̇д̇ад̇и, д̇ад̣̇аа ‘‘мад̇о нируд̣̇д̇хо’’д̇и вужжад̇и.
Kāyapariyantikanti kāyantikaṃ kāyaparicchinnaṃ, yāva pañcadvārakāyo pavattati, tāva pavattaṃ pañcadvārikavedananti attho. Jīvitapariyantikanti jīvitantikaṃ jīvitaparicchinnaṃ, yāva jīvitaṃ pavattati, tāva pavattaṃ manodvārikavedananti attho. Tattha pañcadvārikavedanā pacchā uppajjitvā paṭhamaṃ nirujjhati, manodvārikavedanā paṭhamaṃ uppajjitvā pacchā nirujjhati. Sā hi paṭisandhikkhaṇe vatthurūpasmiṃyeva patiṭṭhāti. Pañcadvārikā pavatte pañcadvāravasena pavattamānā paṭhamavaye vīsativassakāle rajjanadussanamuyhanavasena adhimattā balavatī hoti, paṇṇāsavassakāle ṭhitā hoti, saṭṭhivassakālato paṭṭhāya parihāyamānā, asītinavutivassakāle mandā hoti. Tadā hi sattā ‘‘cirarattaṃ ekato nisīdimhā nipajjimhā’’ti vadantepi na jānāmāti vadanti. Adhimattānipi rūpādiārammaṇāni na passāma, sugandhaduggandhaṃ vā sāduasāduṃ vā thaddhamudukaṃ vāti na jānāmātipi vadanti. Iti nesaṃ pañcadvārikavedanā bhaggā hoti, manodvārikā pavattati. Sāpi anupubbena parihāyamānā maraṇasamaye hadayakoṭiṃyeva nissāya pavattati. Yāva panesā pavattati, tāva satto jīvatīti vuccati. Yadā nappavattati, tadā ‘‘mato niruddho’’ti vuccati.
свааяамад̇т̇о ваабияаа д̣̇ийбзд̇аб̣б̣о – яат̇аа хи бурисо бан̃жауд̣̇агамаг̇г̇асамбаннам̣ ваабим̣ гарзяяа. батамам̣ д̣̇звз вудтз бан̃жахи уд̣̇агамаг̇г̇зхи уд̣̇агам̣ бависид̇ваа анд̇оваабияам̣ ааваадз буурзяяа. бунаббунам̣ д̣̇звз вассанд̇з уд̣̇агамаг̇г̇з буурзд̇ваа г̇аавуд̇ад̣дхаяож̇анамад̇д̇ам̣ од̇т̇арид̇ваа уд̣̇агам̣ д̇идтзяяа д̇ад̇о д̇ад̇о виссанд̣̇амаанам̣. ат̇а нид̣̇д̇хаманад̇умб̣з виварид̇ваа кзд̇д̇зсу гаммз гаяирамаанз уд̣̇агам̣ нигкаманд̇ам̣, сассабаагагаалз уд̣̇агам̣ нигканд̇ам̣ уд̣̇агам̣ барихийнам̣, ‘‘мажчз г̇ан̣хаамаа’’д̇и вад̇д̇аб̣б̣ад̇ам̣ аабаж̇ж̇зяяа. д̇ад̇о гад̇ибаахзна ааваадзсуязва уд̣̇агам̣ сан̣тахзяа. яаава бана д̇ам̣ ааваадзсу ход̇и, д̇аава махааваабияам̣ уд̣̇агам̣ ад̇т̇ийд̇и сан̇кам̣ г̇ажчад̇и. яад̣̇аа бана д̇ад̇т̇а чиж̇ж̇ад̇и, д̇ад̣̇аа ‘‘ваабияам̣ уд̣̇агам̣ над̇т̇ий’’д̇и вужжад̇и. звам̣ самбад̣̇амид̣̇ам̣ взд̣̇ид̇аб̣б̣ам̣.
Svāyamattho vāpiyā dīpetabbo – yathā hi puriso pañcaudakamaggasampannaṃ vāpiṃ kareyya. Paṭhamaṃ deve vuṭṭhe pañcahi udakamaggehi udakaṃ pavisitvā antovāpiyaṃ āvāṭe pūreyya. Punappunaṃ deve vassante udakamagge pūretvā gāvutaḍḍhayojanamattaṃ ottharitvā udakaṃ tiṭṭheyya tato tato vissandamānaṃ. Atha niddhamanatumbe vivaritvā khettesu kamme kayiramāne udakaṃ nikkhamantaṃ, sassapākakāle udakaṃ nikkhantaṃ udakaṃ parihīnaṃ, ‘‘macche gaṇhāmā’’ti vattabbataṃ āpajjeyya. Tato katipāhena āvāṭesuyeva udakaṃ saṇṭhaheya. Yāva pana taṃ āvāṭesu hoti, tāva mahāvāpiyaṃ udakaṃ atthīti saṅkhaṃ gacchati. Yadā pana tattha chijjati, tadā ‘‘vāpiyaṃ udakaṃ natthī’’ti vuccati. Evaṃ sampadamidaṃ veditabbaṃ.
батамам̣ д̣̇звз вассанд̇з бан̃жахи маг̇г̇зхи уд̣̇агз бависанд̇з ааваадаанам̣ бууран̣агаало вияа хи батамамзва бадисанд̇хигкан̣з манод̣̇вааригавзд̣̇анааяа вад̇т̇уруубз бад̇идтид̇агаало, бунаббунам̣ д̣̇звз вассанд̇з бан̃жамаг̇г̇аанам̣ бууран̣агаало вияа бавад̇д̇з бан̃жад̣̇вааригавзд̣̇анааяа бавад̇д̇и, г̇аавуд̇ад̣дхаяож̇анамад̇д̇ам̣ аж̇жход̇т̇аран̣ам̣ вияа батамаваяз вийсад̇ивассагаалз раж̇ж̇анаад̣̇ивасзна д̇асса ад̇химад̇д̇аб̣алавабхааво, яаава ваабид̇о уд̣̇агам̣ на ниг̇г̇ажчад̇и, д̇аава буурааяа ваабияаа тид̇агаало вияа бан̃н̃аасавассагаалз д̇асса тид̇агаало, нид̣̇д̇хаманад̇умб̣зсу вивадзсу гаммз гаяирамаанз уд̣̇агасса нигкаманагаало вияа садтивассагаалад̇о бадтааяа д̇асса барихаани, уд̣̇агз бхадтз уд̣̇агамаг̇г̇зсу барид̇д̇ауд̣̇агасса тид̇агаало вияа асийд̇инавуд̇игаалз бан̃жад̣̇вааригавзд̣̇анааяа манд̣̇агаало, ааваадзсуязва уд̣̇агасса бад̇идтид̇агаало вияа хад̣̇аяавад̇т̇угодим̣ ниссааяа манод̣̇ваарз взд̣̇анааяа бавад̇д̇игаало, ааваадзсу барид̇д̇зби уд̣̇агз сад̇и ‘‘ваабияам̣ уд̣̇агам̣ ад̇т̇ий’’д̇и вад̇д̇аб̣б̣агаало вияа яаава саа бавад̇д̇ад̇и, д̇аава ‘‘сад̇д̇о ж̇ийвад̇ий’’д̇и вужжад̇и. яат̇аа бана ааваадзсу уд̣̇агз чиннз ‘‘над̇т̇и ваабияам̣ уд̣̇ага’’нд̇и вужжад̇и, звам̣ манод̣̇вааригавзд̣̇анааяа аббавад̇д̇амаанааяа сад̇д̇о мад̇од̇и вужжад̇и. имам̣ взд̣̇анам̣ санд̇хааяа вуд̇д̇ам̣ – ‘‘ж̇ийвид̇абарияанд̇игам̣ взд̣̇анам̣ взд̣̇ияамаано’’д̇и.
Paṭhamaṃ deve vassante pañcahi maggehi udake pavisante āvāṭānaṃ pūraṇakālo viya hi paṭhamameva paṭisandhikkhaṇe manodvārikavedanāya vatthurūpe patiṭṭhitakālo, punappunaṃ deve vassante pañcamaggānaṃ pūraṇakālo viya pavatte pañcadvārikavedanāya pavatti, gāvutaḍḍhayojanamattaṃ ajjhottharaṇaṃ viya paṭhamavaye vīsativassakāle rajjanādivasena tassa adhimattabalavabhāvo, yāva vāpito udakaṃ na niggacchati, tāva pūrāya vāpiyā ṭhitakālo viya paññāsavassakāle tassa ṭhitakālo, niddhamanatumbesu vivaṭesu kamme kayiramāne udakassa nikkhamanakālo viya saṭṭhivassakālato paṭṭhāya tassa parihāni, udake bhaṭṭhe udakamaggesu parittaudakassa ṭhitakālo viya asītinavutikāle pañcadvārikavedanāya mandakālo, āvāṭesuyeva udakassa patiṭṭhitakālo viya hadayavatthukoṭiṃ nissāya manodvāre vedanāya pavattikālo, āvāṭesu parittepi udake sati ‘‘vāpiyaṃ udakaṃ atthī’’ti vattabbakālo viya yāva sā pavattati, tāva ‘‘satto jīvatī’’ti vuccati. Yathā pana āvāṭesu udake chinne ‘‘natthi vāpiyaṃ udaka’’nti vuccati, evaṃ manodvārikavedanāya appavattamānāya satto matoti vuccati. Imaṃ vedanaṃ sandhāya vuttaṃ – ‘‘jīvitapariyantikaṃ vedanaṃ vediyamāno’’ti.
гааяасса бхзд̣̇аад̇и гааяасса бхзд̣̇зна. уд̣̇д̇хам̣ ж̇ийвид̇абарияаад̣̇аанаад̇и ж̇ийвид̇агкаяад̇о уд̣̇д̇хам̣. ид̇хзваад̇и бадисанд̇хивасзна барад̇о аг̇анд̇ваа ид̇хзва. сийд̇ий бхависсанд̇ийд̇и бавад̇д̇ивибпанд̣̇анад̣̇арат̇арахид̇аани сийд̇аани аббавад̇д̇анад̇хаммаани бхависсанд̇и.
Kāyassa bhedāti kāyassa bhedena. Uddhaṃ jīvitapariyādānāti jīvitakkhayato uddhaṃ. Idhevāti paṭisandhivasena parato agantvā idheva. Sītībhavissantīti pavattivipphandanadaratharahitāni sītāni appavattanadhammāni bhavissanti.
т̇уун̣ам̣ бадижжаад̇и ругкам̣ бадижжа. гуд̣̇д̣̇аалабидагам̣ аад̣̇ааяаад̇и гуд̣̇д̣̇аалан̃жа кан̣ид̇д̇ин̃жа бажчин̃жа г̇ахзд̇ваад̇и ад̇т̇о. д̣̇зсанаа бана гуд̣̇д̣̇аалавасзнзва гад̇аа. муулз чинд̣̇зяяаад̇и мууламхи гуд̣̇д̣̇аалзна чинд̣̇зяяа. баликан̣зяяаад̇и кан̣ид̇д̇ияаа саманд̇аа кан̣зяяа.
Thūṇaṃ paṭiccāti rukkhaṃ paṭicca. Kuddālapiṭakaṃ ādāyāti kuddālañca khaṇittiñca pacchiñca gahetvāti attho. Desanā pana kuddālavaseneva katā. Mūle chindeyyāti mūlamhi kuddālena chindeyya. Palikhaṇeyyāti khaṇittiyā samantā khaṇeyya.
звамзва код̇и зд̇т̇а ид̣̇ам̣ обаммасам̣санд̣̇анам̣ – ругко вияа хи ад̇д̇абхааво д̣̇адтаб̣б̣о, ругкам̣ бадижжа чааяаа вияа гусалаагусалам̣ гаммам̣, чааяам̣ аббавад̇д̇ам̣ гаад̇угаамо бурисо вияа яог̇ааважаро, гуд̣̇д̣̇аало вияа бан̃н̃аа, бидагам̣ вияа самаад̇хи, кан̣ид̇д̇и вияа вибассанаа, кан̣ид̇д̇ияаа муулаанам̣ баликан̣анагаало вияа арахад̇д̇амаг̇г̇зна авиж̇ж̇ааяа чзд̣̇анагаало, кан̣д̣аакан̣д̣ам̣ гаран̣агаало вияа канд̇хавасзна д̣̇идтагаало, пааланагаало вияа ааяад̇анавасзна д̣̇идтагаало, сагалийгаран̣агаало вияа д̇хаад̇увасзна д̣̇идтагаало, ваад̇аад̇абзна висосанагаало вияа гааяигажзд̇асигасса вийрияасса гаран̣агаало, аг̇г̇инаа д̣аханагаало вияа н̃аан̣зна гилзсаанам̣ д̣аханагаало, масигаран̣агаало вияа вад̇д̇амаанага-бан̃жагканд̇хагаало, махааваад̇з опунанагаало вияа над̣̇ийсод̇з бавааханагаало вияа жа чиннамуулагаанам̣ бан̃жаннам̣ канд̇хаанам̣ аббадисанд̇хиганирод̇хо, опунанаббавааханзхи абан̃н̃ад̇д̇игабхаавуубаг̇амо вияа бунаб̣бхавз вибаагагканд̇хаанам̣ ануббаад̣̇зна абан̣н̣ад̇д̇игабхааво взд̣̇ид̇аб̣б̣о.
Evamevakhoti ettha idaṃ opammasaṃsandanaṃ – rukkho viya hi attabhāvo daṭṭhabbo, rukkhaṃ paṭicca chāyā viya kusalākusalaṃ kammaṃ, chāyaṃ appavattaṃ kātukāmo puriso viya yogāvacaro, kuddālo viya paññā, piṭakaṃ viya samādhi, khaṇitti viya vipassanā, khaṇittiyā mūlānaṃ palikhaṇanakālo viya arahattamaggena avijjāya chedanakālo, khaṇḍākhaṇḍaṃ karaṇakālo viya khandhavasena diṭṭhakālo, phālanakālo viya āyatanavasena diṭṭhakālo, sakalīkaraṇakālo viya dhātuvasena diṭṭhakālo, vātātapena visosanakālo viya kāyikacetasikassa vīriyassa karaṇakālo, agginā ḍahanakālo viya ñāṇena kilesānaṃ ḍahanakālo, masikaraṇakālo viya vattamānaka-pañcakkhandhakālo, mahāvāte ophunanakālo viya nadīsote pavāhanakālo viya ca chinnamūlakānaṃ pañcannaṃ khandhānaṃ appaṭisandhikanirodho, ophunanappavāhanehi apaññattikabhāvūpagamo viya punabbhave vipākakkhandhānaṃ anuppādena apaṇṇattikabhāvo veditabbo.
бхаг̇аванд̇ам̣ зд̇ад̣̇авожаад̇и сад̇т̇ари д̣̇зсанам̣ виниваддзнд̇з сод̇аабад̇д̇ипалам̣ бад̇ваа зд̇ам̣ ‘‘сзяяат̇ааби, бханд̇з’’д̇иаад̣̇иважанам̣ авожа. д̇ад̇т̇а уд̣̇аяад̇т̇игод̇и вад̣дхиад̇т̇иго. ассабан̣ияам̣ босзяяаад̇и бан̃жа ассабод̇асад̇аани гин̣ид̇ваа бажчаа виггин̣иссаамийд̇и босзяяа. сахассаг̇гханагасса ассасса бан̃жасад̇амад̇д̇ам̣ убагаран̣ам̣ г̇анд̇хамаалаад̣̇ивасзна босааванигам̣язва аг̇амааси. ат̇асса д̇з ассаа згад̣̇ивасзнзва рог̇ам̣ пусид̇ваа саб̣б̣з ж̇ийвид̇агкаяам̣ баабун̣зяяунд̇и иминаа ад̇хиббааязна звамааха. уд̣̇аяан̃жзва наад̇хиг̇ажчзяяаад̇и вад̣дхин̃жа г̇зхад̇о нийхарид̇ваа д̣̇иннамуулан̃жа гин̃жи на лабхзяяа. баяирубаасинд̇и жад̇уухи бажжаязхи убадтахим̣. сваахам̣ уд̣̇аяан̃жзва наад̇хиг̇ажчинд̇и со ахам̣ нзва уд̣̇аяам̣ на г̇зхад̇о д̣̇иннад̇ханам̣ ад̇хиг̇ажчим̣, бан̣ияаассаж̇аг̇г̇анаго наама ж̇аад̇осмийд̇и д̣̇ассзд̇и. сзсамзд̇т̇а уд̇д̇аанамзваад̇и.
Bhagavantaṃ etadavocāti satthari desanaṃ vinivaṭṭente sotāpattiphalaṃ patvā etaṃ ‘‘seyyathāpi, bhante’’tiādivacanaṃ avoca. Tattha udayatthikoti vaḍḍhiatthiko. Assapaṇiyaṃ poseyyāti pañca assapotasatāni kiṇitvā pacchā vikkiṇissāmīti poseyya. Sahassagghanakassa assassa pañcasatamattaṃ upakaraṇaṃ gandhamālādivasena posāvanikaṃyeva agamāsi. Athassa te assā ekadivaseneva rogaṃ phusitvā sabbe jīvitakkhayaṃ pāpuṇeyyunti iminā adhippāyena evamāha. Udayañceva nādhigaccheyyāti vaḍḍhiñca gehato nīharitvā dinnamūlañca kiñci na labheyya. Payirupāsinti catūhi paccayehi upaṭṭhahiṃ. Svāhaṃ udayañceva nādhigacchinti so ahaṃ neva udayaṃ na gehato dinnadhanaṃ adhigacchiṃ, paṇiyaassajagganako nāma jātosmīti dasseti. Sesamettha uttānamevāti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 5. ваббасуд̇д̇ам̣ • 5. Vappasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 5. ваббасуд̇д̇аван̣н̣анаа • 5. Vappasuttavaṇṇanā
