Varaha Upanishad

varāhopaniṣat

śrīmadvārāhopaniṣadvedyākhaṇḍasukhākṛti ।
tripānnārāyaṇākhyaṃ tadrāmacandrapadaṃ bhaje ॥

oṃ saha nāvavatu saha nau bhunaktu saha vīryaṃ karavāvahai ।
tejasvināvadhī tamastu mā vidviṣāvahai ।
oṃ śāntiḥ śāntiḥ śāntiḥ ॥

hariḥ oṃ ॥ atha ṛbhurvai mahāmunirdevamānena dvādaśavatsaraṃ
tapaścacāra । tadavasāne varāharūpī bhagavānprādurabhūt ।
sa hovācottiṣṭhottiṣṭha varaṃ vṛṇīśveti । sodatiṣṭhat ।
tasmai namaskṛtyovāca bhagavankāmibhiryadyatkāmitaṃ
tattattvatsakāśātsvapne'pi na yāce । samastavedaśāstretihāsapurāṇāni
samastavidyājālāni brahmādayaḥ surāḥ sarve tvadrūpajñānānmuktimāhuḥ ।
atastvadrūpapratipādikāṃ brahmavidyāṃ brūhīti hovāca । tatheti sa hovāca
varāharūpī bhagavān । caturviṃśatitattvāni kecidicchanti vādinaḥ ।
kecitṣaṭtriṃśattattvāni kecitṣaṇṇavatīni ca ॥ 1॥

teṣāṃ kramaṃ pravakṣyāmi sāvadhānamanāḥ śṛṇu ।
jñānendriyāṇi pañcaiva śrotratvaglocanādayaḥ ॥ 2॥

karmendriyāṇi pañcaiva vākpāṇyaṅghryādayaḥ kramāt ।
prāṇādatastu pañcaiva pañca śabdādayastathā ॥ 3॥

manobuddhirahaṅkāraścittaṃ ceti catuṣṭayam ।
caturviṃśatitattvāni tāni brahmavido viduḥ ॥ 4॥

etaistattvaiḥ samaṃ pañcīkṛtabhūtāni pañca ca ।
pṛthivyāpastathā tejo vāyurākāśameva ca ॥ 5॥

dehatrayaṃ sthūlasūkṣmakāraṇāni vidurbudhāḥ ।
avasthātritayaṃ caiva jāgratsvapnasuṣuptayaḥ ॥ 6॥

āhatya tattvajātānāṃ ṣaṭtriṃśanmunayo viduḥ ।
pūrvoktaistattvajātaistu samaṃ tattvāni yojayet ॥ 7॥

ṣaḍbhāvavikṛtiścāsti jāyate vardhate'pi ca ।
pariṇāmaṃ kṣayaṃ nāśaṃ ṣaḍbhāvavikṛtiṃ viduḥ ॥ 8॥

aśanā ca pipāsā ca śokamohau jarā mṛtiḥ ।
ete ṣaḍūrmayaḥ proktāḥ ṣaṭkośānatha vacmi te ॥ 9॥

tvakca raktaṃ māṃsamedomajjāsthīni nibodhata ।
kāmakrodhau lobhamohau mado mātsaryameva ca ॥ 10॥

ete'riṣaḍvā viśvaśca taijasaḥ prājña eva ca ।
jīvatrayaṃ sattvarajastamāṃsi ca guṇatrayam ॥ 11॥

prārabdhāgāmyarjitāni karmatrayamitīritam ।
vacanādānagamanavisargānandapañcakam ॥ 12॥

saṅkalpo'dhyavasāyaśca abhimāno'vadhāraṇā ।
muditā karuṇā maitrī upekṣā ca catuṣṭayam ॥ 13॥

digvātārkapraceto'śvivahnīndropendramṛtyukāḥ ।
tathā candraścaturvaktro rudraḥ kṣetrajña īśvaraḥ ॥ 14॥

āhatya tattvajātānāṃ ṣaṇṇavatyastu kīrtitāḥ ।
pūrvoktatattvajātānāṃ vailakṣaṇyamanāmayam ॥ 15॥

varāharūpiṇaṃ māṃ ye bhajanti mayi bhaktitaḥ ।
vimuktājñānatatkāryā jīvanmuktā bhavanti te ॥ 16॥

ye ṣaṇṇavatitattvajñā yatra kutrāśrame ratāḥ ।
jaṭī muṇḍī śikhī vāpi mucyate nātra saṃśayaḥ ॥ 17॥ iti॥

iti prathamo'dhyāyaḥ ॥ 1॥

ṛbhurnāma mahāyogī kroḍarūpaṃ ramāpatim ।
variṣṭhāṃ brahmavidyāṃ tvamadhīhi bhagavanmama ।
evaṃ sa spṛṣṭo bhagavānprāha bhaktārtibhañjanaḥ ॥ 1॥

svavarṇāśramadharmeṇa tapasā gurutoṣaṇāt ।
sādhanaṃ prabhavetpuṃsāṃ vairāgyādicatuṣṭayam ॥ 2॥

nityānityavivekaśca ihāmutra virāgatā ।
śamādiṣaṭkasampattirmumukṣā tāṃ samabhyaset ॥ 3॥

evaṃ jitendriyo bhūtvā sarvatra mamatāmatim ।
vihāya sākṣicaitanye mayi kuryādahaṃmatim ॥ 4॥

durlabhaṃ prāpya mānuṣyaṃ tatrāpi naravigraham ।
brāhmaṇyaṃ ca mahāviṣṇorvedāntaśravaṇādinā ॥ 5॥

ativarṇāśramaṃ rūpaṃ saccidānandalakṣaṇam ।
yo na jānāti so'vidvānkadā mukto bhaviṣyati ॥ 6॥

ahameva sukhaṃ nānyadanyaccennaiva tatsukham ।
amadarthaṃ na hi preyo madarthaṃ na svataḥpriyam ॥ 7॥

parapremāspadatayā mā na bhūvamahaṃ sadā ।
bhūyāsamiti yo draṣṭā so'haṃ viṣṇurmunīśvara ॥ 8॥

na prakāśo'hamityuktiryatprakāśaikabandhanā ।
svaprakāśaṃ tamātmānamaprakāśaḥ kathaṃ spṛśet ॥ 9॥

svayaṃ bhātaṃ nirādhāraṃ ye jānanti suniścitam ।
te hi vijñānasampannā iti me niścitā matiḥ ॥ 10॥

svapūrṇātmātirekeṇa jagajjīveśvarādayaḥ ।
na santi nāsti māyā ca tebhyaścāhaṃ vilakṣaṇaḥ ॥ 11॥

ajñānāndhatamorūpaṃ karmadharmādilakṣaṇam ।
svayaṃprakāśamātmānaṃ naiva māṃ spraṣṭumārhati ॥ 12॥

sarvasākṣiṇamātmānaṃ varṇāśramavivarjitam ।
brahmarūpatayā paśyanbrahmaiva bhavati svayam ॥ 13॥

bhāsamānamidaṃ sarvaṃ mānarūpaṃ paraṃ padam ।
paśyanvedāntamānena sadya eva vimucyate ॥ 14॥

dehātmajñānavajjñānaṃ dehātmajñānabādhakam ।
ātmanyeva bhavedyasya sa necchannapi mucyate ॥ 15॥

satyajñānānandapūrṇalakṣaṇaṃ tamasaḥ param ।
brahmānandaṃ sadā paśyankathaṃ badhyeta karmaṇā ॥ 16॥

tridhāmasākṣiṇaṃ satyajñānānandādilakṣaṇam ।
tvamahaṃśabdalakṣyārthamasaktaṃ sarvadoṣataḥ ॥ 17॥

sarvagaṃ saccidātmānaṃ jñānacakṣurnirīkṣate ।
ajñānacakṣurnekṣeta bhāsvantaṃ bhānumandhavat ॥ 18॥

prajñānameva tadbrahma satyaprajñālakṣaṇam ।
evaṃ brahmaparijñānādeva martyo'mṛto bhavet ॥ 19॥

tadbrahmānandamadvandvaṃ nirguṇaṃ satyacidghanam ।
viditvā svātmano rūpaṃ na bibheti kutaścana ॥ 20॥

cinmātraṃ sarvagaṃ nityaṃ sampūrṇaṃ sukhamadvayam ।
sākṣādbrahmaiva nānyo'stītyevaṃ brahmavidāṃ sthitiḥ ॥ 21॥

ajñasya duḥkhaughamayaṃ jñasyānandamayaṃ jagat ।
andhaṃ bhuvanamandhasya prakāśaṃ tu sucakṣuṣām ॥ 22॥

anante saccidānande mayi vārāharūpiṇī ।
sthite'dvitīyabhāvaḥ syātko bandhaḥ kaśca mucyate ॥ 23॥

svasvarūpaṃ tu cinmātraṃ sarvadā sarvadehinām ।
naiva dehādisaṅghāto ghaṭavaddṛśigocaraḥ ॥ 24॥

svātmano'nyadivābhātaṃ carācaramidaṃ jagat ।
svātmamātratayā buddhvā tadasmīti vibhāvaya ॥ 25॥

svasvarūpaṃ svayaṃ bhuṅkte nāsti bhojyaṃ pṛthak svataḥ ।
asti cedastitārūpaṃ brahmaivāstitvalakṣaṇam ॥ 26॥

brahmavijñānasampannaḥ pratītamakhilaṃ jagat ।
paśyannapi sadā naiva paśyati svātmanaḥ pṛthak ॥ 27॥

matsvarūpaparijñānātkarmabhirna sa badhyate ॥ 28॥

yaḥ śarīrendriyādibhyo vihīnaṃ sarvasākṣiṇam ।
paramārthaikavijñānaṃ sukhātmānaṃ svayaṃprabham ॥ 29॥

svasvarūpatayā sarvaṃ veda svānubhavena yaḥ ।
sa dhīraḥ sa tu vijñeyaḥ so'haṃ tattvaṃ ṛbho bhava ॥ 30॥

ataḥ prapañcānubhavaḥ sadā na hi
svarūpabodhānubhavaḥ sadā khalu ।
iti prapaśyanparipūrṇavedano
na bandhamukto na ca baddha eva tu ॥ 31॥

svasvarūpānusandhānānnṛtyantaṃ sarvasākṣiṇam ।
muhūrtaṃ cintayenmāṃ yaḥ sarvabandhaiḥ pramucyate ॥ 32॥

sarvabhūtāntarasthāya nityamuktacidātmane ।
pratyakcaitanyarūpāya mahyameva namonamaḥ ॥ 33॥

tvaṃ vahamasmi bhagavo devate'haṃ vai tvamasi ।
tubhyaṃ mahyamanantāya mahyaṃ tubhyaṃ cidātmane ॥ 34॥

namo mahyaṃ pareśāya namastubhyaṃ śivāya ca ।
kiṃ karomi kva gacchāmi kiṃ gṛhṇāmi tyajāmi kim ॥ 35॥

yanmayā pūritaṃ viśvaṃ mahākalpāṃbunā yathā ।
antaḥsaṅgaṃ bahiḥsaṅgamātmasaṅgaṃ ca yastyajet ।
sarvasaṅganivṛttātmā sa māmeti na saṃśayaḥ ॥ 36॥

ahiriva janayogaṃ sarvadā varjayedyaḥ
kuṇapamiva sunārīṃ tyaktukāmo virāgī ।
viṣamiva viṣayādīnmanyamāno durantā-
ñjagati paramahaṃso vāsudevo'hameva ॥ 37॥

idaṃ satyamidaṃ satyaṃ satyametadihocyate ।
ahaṃ satyaṃ paraṃ brahma mattaḥ kiñcinna vidyate ॥ 38॥

upa samīpe yo vāso jīvātmaparamātmanoḥ ।
upavāsaḥ sa vijñeyo na tu kāyasya śoṣaṇam ॥ 39॥

kāyaśoṣaṇamātreṇa kā tatra hyavivekinām ।
valmīkatāḍanādeva mṛtaḥ kiṃ nu mahoragaḥ ॥ 40॥

asti brahmeti cedveda parokṣajñānameva tat ।
ahaṃ brahmeti cedveda sākṣātkāraḥ sa ucyate ॥ 41॥

yasminkāle svamātmānaṃ yogī jānāti kevalam ।
tasmātkālātsamārabhya jīvanmukto bhayedasau ॥ 42॥

ahaṃ brahmeti niyataṃ mokṣaheturmahātmanām ।
dve pade bandhamokṣāya nirmameti mameti ca ॥ 43॥

mameti badhyate janturnirmameti vimucyate ।
bāhyacintā na kartavyā tathaivāntaracintikā ।
sarvacintāṃ samutsṛjya svastho bhava sadā ṛbho ॥ 44॥

saṅkalpamātrakalanena jagatsamagraṃ
saṅkalpamātrakalane hi jagadvilāsaḥ ।
saṅkalpamātramidamutsṛja nirvikalpa-
māśritya māmakapadaṃ hṛdi bhāvayasva ॥ 45॥

maccintanaṃ matkathanamanyonyaṃ matprabhāṣaṇam ।
madekaparamo bhūtvā kālaṃ naya mahāmate ॥ 46॥

cidihāstīti cinmātramidaṃ cinmayameva ca ।
cittvaṃ cidahamete ca lokāściditi bhāvaya ॥ 47॥

rāgaṃ nīrāgatāṃ nītvā nirlepo bhava sarvadā ।
ajñānajanyakartrādikārakotpannakarmaṇā ॥ 48॥

śrutyutpannātmavijñānapradīpo bādhyate katham ।
anātmanāṃ parityajya nirvikāro jagatsthitau ॥ 49॥

ekaniṣṭhatayāntasthasaṃvinmātraparo bhava ।
ghaṭākāśamaṭhākāśau mahākāśe pratiṣṭhitau ॥ 50॥

evaṃ mayi cidākāśe jīveśau parikalpitau ।
yā ca prāgātmano māyā tathānte ca tiraskṛtā ॥ 51॥

brahmavādibhirudgītā sā māyeti vivekataḥ ।
māyātatkāryavilaye neśvaratvaṃ na jīvatā ॥ 52॥

tataḥ śuddhaścidevāhaṃ vyomavannirupādhikaḥ ।
jīveśvarādirūpeṇa cetanācetanātmakam ॥ 53॥

īkṣaṇādipraveśāntā sṛṣṭirīśena kalpitā ।
jāgradādivimokṣāntaḥ saṃsāro jīvakalpitaḥ ॥ 54॥

triṇācikādiyogāntā īśvarabhrāntimāśritāḥ ।
lokāyatādisāṅkhyāntā jīvaviśrāntimāśritāḥ ॥ 55॥

tasmānmumukṣibhirnaiva matirjīveśavādayoḥ ।
kāryā kintu brahmatattvaṃ niścalena vicāryatām ॥ 56।
advitīyabrahmatattvaṃ na jānanti yathā tathā ।
bhrāntā evākhilāsteṣāṃ kva muktiḥ kveha vā sukham ॥ 57॥

uttamādhamabhāvaścetteṣāṃ syādasti tena kim ।
svapnastharājyabhikṣābhyāṃ prabuddhaḥ spṛśate khalu ॥ 58॥

ajñāne buddhivilaye nidrā sā bhaṇyate budhaiḥ ।
vilīnājñānatatkārye mayi nidrā kathaṃ bhavet ॥ 59॥

buddheḥ pūrṇavikāso'yaṃ jāgaraḥ parikīrtyate ।
vikārādivihīnatvājjāgaro me na vidyate ॥ 60॥

sūkṣmanāḍiṣu sañcāro buddheḥ svapnaḥ prajāyate ।
sañcāradharmarahite mayi svapno na vidyate ॥ 61॥

suṣuptikāle sakale vilīne tamasāvṛte ।
svarūpaṃ mahadānandaṃ bhuṅkte viśvavivarjitaḥ ॥ 62॥

aviśeṣeṇa sarvaṃ tu yaḥ paśyati cidanvayāt ।
sa eva sākṣādvijñānī sa śivaḥ sa harirvidhiḥ ॥ 63॥

dīrghasvapnamidaṃ yattaddīrghaṃ vā cittavibhramam ।
dīrghaṃ vāpi manorājyaṃ saṃsāraṃ duḥkhasāgaram ।
supterutthāya suptyantaṃ brahmaikaṃ pravicintyatām ॥ 64॥

āropitasya jagataḥ pravilāpanena
cittaṃ madātmakatayā parikalpitaṃ naḥ ।
śatrūnnihatya guruṣaṭkagaṇānnipātā-
dgandhadvipo bhavati kevalamadvitīyaḥ ॥ 65॥

adyāstametu vapurāśaśitāramāstāṃ
kastāvatāpi mama cidvapuṣo viśeṣaḥ ।
kumbhe vinaśyati ciraṃ samavasthite vā
kumbhāmbarasya nahi ko'pi viśeṣaleśaḥ ॥ 66॥

ahinirlvayanī sarpanirmoko jīvavarjitaḥ ।
valmīke patitastiṣṭhettaṃ sarpo nābhimanyate ॥ 67॥

evaṃ sthūlaṃ ca sūkṣmaṃ ca śarīraṃ nābhimanyate ।
pratyagjñānaśikhidhvaste mithyājñāne sahetuke ।
neti netīti rūpatvādaśarīro bhavatyayam ॥ 68॥

śāstreṇa na syātparamārthadṛṣṭiḥ
kāryakṣamaṃ paśyati cāparokṣam ।
prārabdhanāśātpratibhānanāśa
evaṃ tridhā naśyati cātmamāyā ॥ 69॥

brahmatve yojite svāmiñjīvabhāvo na gacchati ।
advaite bodhite tattve vāsanā vinivartate ॥ 70॥

prārabdhānte dehahānirmāyeti kṣīyate'khilā ।
astītyukte jagatsarvaṃ sadrasaṃ brahma tadbhavet ॥ 71॥

bhātītyukte jagatsarvaṃ bhānaṃ brahmaiva kevalam ।
marubhūmau jalaṃ sarvaṃ marubhūmātrameva tat ।
jagattrayamidaṃ sarvaṃ cinmātraṃ svavicārataḥ ॥ 72॥

ajñānameva na kuto jagataḥ prasaṅgo
jīveśadeśikavikalpakathātidūre ।
ekāntakevalacidekarasasvabhāve
brahmaiva kevalamahaṃ paripūrṇamasmi ॥ 73॥

bodhacandramasi pūrṇavigrahe
moharāhumuṣitātmatejasi ।
snānadānayajanādikāḥ
kriyā mocanāvadhi vṛthaiva tiṣṭhate ॥ 74॥

salile saindhavaṃ yadvatsāmyaṃ bhavati yogataḥ ।
tathātmamanasoraikyaṃ samādhiriti kathyate ॥ 75॥

durlabho viṣayatyāgo durlabhaṃ tattvadarśanam ।
durlabhā sahajāvasthā sadguroḥ karuṇāṃ vinā ॥ 76॥

utpannaśaktibodhasya tyaktaniḥśeṣakarmaṇaḥ ।
yoginaḥ sahajāvasthā svayameva prakāśate ॥ 77॥

rasasya manasaścaiva cañcalatvaṃ svabhāvataḥ ।
raso baddho mano baddhaṃ kiṃ na siddhyati bhūtale ॥ 78॥

mūrcchito harati vyādhiṃ mṛto jīvayati svayam ।
baddhaḥ khecaratāṃ dhatte brahmatvaṃ rasacetasi ॥ 79॥

indriyāṇāṃ mano nātho manonāthastu mārutaḥ ।
mārutasya layo nāthastannāthaṃ layamāśraya ॥ 80॥

niśceṣṭo nirvikāraśca layo jīvati yoginām ।
ucchinnasarvasaṅkalpo niḥśeṣāśeṣaceṣṭitaḥ ।
svāvagamyo layaḥ ko'pi manasāṃ vāgagocaraḥ ॥ 81॥

puṅkhānupuṅkhaviṣayekṣaṇatatparo'pi
brahmāvalokanadhiyaṃ na jahāti yogī ।
saṅgītatālalayavādyavaśaṃ gatāpi
maulisthakumbhaparirakṣaṇadhīrnaṭīva ॥ 82॥

sarvacintāṃ parityajya sāvadhānena cetasā ।
nāda evānusandheyo yogasāmrājyamicchatā ॥ 83॥

iti dvitīyo'dhyāyaḥ ॥ 2॥

nahi nānāsvarūpaṃ syādekaṃ vastu kadācana ।
tasmādakhaṇḍa evāsmi yanmadanyanna kiñcana ॥ 1॥

dṛśyate śrūyate yadyadbrahmaṇo'nyanna tadbhavet ।
nityaśuddha vimuktaikamakhaṇḍānandamadvayam ।
satyaṃ jñānamanantaṃ yatparaṃ brahmāhameva tat ॥ 2॥

ānandarūpo'hamakhaṇḍabodhaḥ
parātparo'haṃ ghanacitprakāśaḥ ।
meghā yathā vyoma na ca spṛśanti
saṃsāraduḥkhāni na māṃ spṛśanti ॥ 3॥

sarvaṃ sukhaṃ viddhi suduḥkhanāśā-
tsarvaṃ ca sadrūpamasatyanāśāt ।
cidrūpameva pratibhānayuktaṃ
tasmādakhaṇḍaṃ mama rūpametat ॥ 4॥

na hi janirmaraṇaṃ gamanāgamau
na ca malaṃ vimalaṃ na ca vedanam ।
cinmayaṃ hi sakalaṃ virājate
sphuṭataraṃ paramasya tu yoginaḥ ॥ 5॥

satyacidghanamakhaṇḍamadvayaṃ
sarvadṛśyarahitaṃ nirāmayam ।
yatpadaṃ vimalamadvayaṃ śivaṃ
tatsadāhamiti maunamāśraya ॥ 6॥

janmamṛtyusukhaduḥkhavarjitaṃ
jātinītikulagotradūragam ।
cidvivartajagato'sya kāraṇaṃ
tatsadāhamiti maunamāśraya ॥ 7॥

pūrṇamadvayamakhaṇḍacetanaṃ
viśvabhedakalanādivarjitam ।
advitīyaparasaṃvidaṃśakaṃ
tatsadāhamiti maunamāśraya ॥ 8॥

kenāpyabādhitatvena trikāle'pyekarūpataḥ ।
vidyamānatvamastyetatsadrūpatvaṃ sadā mama ॥ 9॥

nirupādhikanityaṃ yatsuptau sarvasukhātparam ।
sukharūpatvamastyetadānandatvaṃ sadā mama ॥ 10॥

dinakarakiraṇairhi śārvaraṃ tamo
nibiḍataraṃ jhaṭiti praṇāśameti ।
ghanatarabhavakāraṇaṃ tamo yadd-
haridinakṛtprabhayā na cāntareṇa ॥ 11॥

mama caraṇasmaraṇena pūjayā ca
svakatamasaḥ parimucyate hi jantuḥ ।
na hi maraṇaprabhavapraṇāśahetu-
rmama caraṇasmaraṇādṛte'sti kiñcit ॥ 12॥

ādareṇa yathā stauti dhanavantaṃ dhanecchayā ।
tathā cedviśvakartāraṃ ko na mucyeta bandhanāt ॥ 13॥

ādityasannidhau lokaśceṣṭate svayameva tu ।
tathā matsannidhāveva samastaṃ ceṣṭate jagat ॥ 14॥

śuktikāyā yathā tāraṃ kalpitaṃ māyayā tathā ।
mahadādi jaganmāyāmayaṃ mayyeva kevalam ॥ 15॥

caṇḍāladehe paśvādisthāvare brahmavigrahe ।
anyeṣu tāratamyena sthiteṣu na tathā hyaham ॥ 16॥

vinaṣṭadigbhramasyāpi yathāpūrvaṃ vibhāti dik ।
tathā vijñānavidhvastaṃ jaganme bhāti tanna hi ॥ 17॥

na deho nendriyaprāṇo na manobuddhyahaṃkṛti ।
na cittaṃ naiva māyā ca na ca vyomādikaṃ jagat ॥ 18॥

na kartā naiva bhoktā ca na ca bhojayitā tathā ।
kevalaṃ citsadānandabrahmaivāhaṃ janārdanaḥ ॥ 19॥

jalasya calanādeva cañcalatvaṃ yathā raveḥ ।
tathāhaṅkārasambadhādeva saṃsāra ātmanaḥ ॥ 20॥

cittamūlaṃ hi saṃsārastatprayatnena śodhayet ।
hanta cittamahattāyāṃ kaiṣā viśvāsatā tava ॥ 21॥

kva dhanāni mahīpānāṃ brahmaṇaḥ kva jaganti vā ।
prāktanāni prayātāni gatāḥ sargaparamparaḥ ।
koṭayo brahmaṇāṃ yātā bhūpā naṣṭāḥ parāgavat ॥ 22॥

sa cādhyātmābhimāno'pi viduṣo'yāsuratvataḥ ।
viduṣo'pyāsuraścetsyānniṣphalaṃ tattvadarśanam ॥ 23॥

utpādyamānā rāgādyā vivekajñānavahninā ।
yadā tadaiva dahyante kutasteṣāṃ prarohaṇam ॥ 24॥

yathā sunipuṇaḥ samyak paradoṣekṣaṇe rataḥ ।
tathā cennipuṇaḥ sveṣu ko na mucyeta bandhanāt ॥ 25॥

anātmavidamukto'pi siddhijālāni vāñchati ।
dravyamantrakriyākālayuktyāpnoti munīśvara ॥ 26॥

nātmajñasyaiṣa viṣaya ātmajño hyātmamātradṛk ।
ātmanātmani santṛpto nāvidyāmanudhāvati ॥ 27॥

ye kecana jagadbhāvāstānavidyāmayānviduḥ ।
kathaṃ teṣu kilātmajñastyaktāvidyo nimajjati ॥ 28॥

dravyamantrakriyākālayuktayaḥ sādhusiddhidāḥ ।
paramātmapadaprāptau nopakurvanti kāścana ॥ 29॥

sarvecchākalanāśāntāvātmalābhodayābhidhaḥ ।
sa punaḥ siddhivāñchāyāṃ kathamarhatyacittataḥ ॥ 30॥ iti॥

iti tṛtīyodhyāyaḥ ॥ 3॥

atha ha ṛbhuṃ bhagavantaṃ nidāghaḥ papraccha jīvanmuktilakṣaṇamanubrūhīti ।
tatheti sa hovāca । saptabhūmiṣu jīvanmuktāścatvāraḥ ।
śubhecchā prathamā bhūmikā bhavati । vicāraṇā dvitīyā । tanumānasī tṛtīyā ।
sattvāpattisturīyā । asaṃsaktiḥ pañcamī । padārthabhāvanā ṣaṣṭhī । turīyagā saptamī ।
praṇavātmikā bhūmikā akārokāramakārārdhamātrātmikā । sthūlasūkṣmabījasākṣibhedenākārādayaścaturvidhāḥ ।
tadavasthā jāgratsvapnasuṣuptiturīyāḥ ।
akārasthūlāṃśe jāgradviśvaḥ ।
sūkṣmāṃśe tattaijasaḥ । bījāṃśe tatprājñaḥ । sākṣyaṃśe tatturīyaḥ ।
ukārasthūlāṃśe svapnaviśvaḥ ।
sūkṣmāṃśe tattaijasaḥ । bījāṃśe tatprājñaḥ । sākṣyaṃśe tatturīyaḥ ।
makārasthūlāṃśe suṣuptaviśvaḥ ।
sūkṣmāṃśe tattaijasaḥ । bījāṃśe tatprājñaḥ । sākṣyaṃśe tatturīyaḥ ।
ardhamātrāsthūlāṃśe turīyaviśvaḥ ।
sūkṣmāṃśe tattaijasaḥ । bījāṃśe tatprājñaḥ । sākṣyaṃśe turīyaturīyaḥ ।
akāraturīyāṃśāḥ prathamadvitīyatṛtīyabhūmikāḥ ।
ukāraturīyāṃśā caturthī bhūmikā ।
makāraturīyāṃśā pañcamī ।
ardhamātrāturīyāṃśā ṣaṣṭhī ।
tadatītā saptamī ।
bhūmitrayeṣu viharanmumukṣurbhavati ।
turīyabhūmyāṃ viharanbrahmavidbhavati ।
pañcamabhūmyāṃ viharanbrahmavidvaro bhavati ।
ṣaṣṭhabhūmyāṃ viharanbrahmavidvarīyānbhavati ।
saptamabhūmyāṃ viharanbrahmavidvariṣṭho bhavati ।
tatraite ślokā bhavanti ।
jñānabhūmiḥ śubhecchā syātprathamā samudīritā ।
vicāraṇā dvitīyā tu tṛtīyā tanumānasā ॥ 1॥

sattvāpattiścaturthī syāttato'saṃsaktināmikā ।
padārthabhāvanā ṣaṣṭhī saptamī turyagā smṛtā ॥ 2॥

sthitaḥ kiṃ mūḍha evāsmi prekṣyo'haṃ śāstrasajjanaiḥ ।
vairāgyapūrṇamiccheti śubhecchetyucyate budhaiḥ ॥ 3॥

śāstrasajjanasamparkavairāgyābhyāsapūrvakam ।
sadācārapravṛttiryā procyate sā vicāraṇā ॥ 4॥

vicāraṇāśubhecchābhyāmindriyārtheṣu raktatā ।
yatra sā tanutāmeti procyate tanumānasī ॥ 5॥

bhūmikātritayābhyāsācitte'rthaviratervaśāt ।
satvātmani sthite śuddhe sattvāpattirudāhṛtā ॥ 6॥

daśācatuṣṭayābhyāsādasaṃsargaphalā tu yā ।
rūḍhasattvacamatkārā proktā saṃsaktināmikā ॥ 7॥

bhūmikāpañcakābhyāsātsvātmārāmatayā bhṛśam ।
ābhyantarāṇāṃ bāhyānāṃ padārthānāmabhāvanāt ॥ 8॥

paraprayuktena ciraṃ pratyayenāvabodhanam ।
padārthabhāvanānāma ṣaṣṭhī bhavati bhūmikā ॥ 9॥

ṣaḍbhūmikācirābhyāsadbhedasyānupalambhanāt ।
yatsvabhāvaikaniṣṭhatvaṃ sā jñeyā turyagā gatiḥ ॥ 10॥

śubhecchāditrayaṃ bhūmibhedābhedayutaṃ smṛtam ।
yathāvadveda buddhyedaṃ jagajjāgrati dṛśyate ॥ 11॥

advaite sthairyamāyāte dvaite ca praśamaṃ gate ।
paśyanti svapnavallokaṃ turyabhūmi suyogataḥ ॥ 12॥

vicchinnaśaradabhrāṃśavilayaṃ pravilīyate ।
satvāvaśeṣa evāste hi nidāgha dṛḍhīkuru ॥ 13॥

pañcabhūmiṃ samāruhya suṣuptipadanāmikām ।
śāntāśeṣaviśeṣāṃśastiṣṭhatyadvaitamātrake ॥ 14॥

antarmukhatayā nityaṃ bahirvṛttiparo'pi san ।
pariśrāntatayā nityaṃ nidrāluriva lakṣyate ॥ 15॥

kurvannabhyāsametasyāṃ bhūmyāṃ samyagvivāsanaḥ ।
saptamī gāḍhasuptākhyā kramaprāptā purātanī ॥ 16॥

yatra nāsanna sadrūpo nāhaṃ nāpyanahaṃkṛtiḥ ।
kevalaṃ kṣīṇamanana āste'dvaite'tinirbhayaḥ ॥ 17॥

antaḥśūnyo bahiḥśūnyaḥ śūnyakumbha ivāmbare ।
antaḥpūrṇo bahiḥpūrṇaḥ pūrṇakumbha ivārṇave ॥ 18॥

mā bhava grāhyabhāvātmā grāhakātmā ca mā bhava ।
bhāvanāmakhilāṃ tyaktvā yacchiṣṭaṃ tanmayo bhava ॥ 19॥

drṣṭṛdarśanadṛśyāni tyaktvā vāsanayā saha ।
darśanaprathamābhāsamātmānaṃ kevalaṃ bhaja ॥ 20॥

yathāsthitamidaṃ yasya vyavahārayato'pi ca ।
astaṅgataṃ sthitaṃ vyoma sa jīvanmukta ucyate ॥ 21॥

nodeti nāstamāyāti sukhe duḥkhe manaḥprabhā ।
yathāprāptasthitiryasya sa jīvanmukta ucyate ॥ 22॥

yo jāgarti suṣuptistho yasya jāgranna vidyate ।
yasya nirvāsano bodhaḥ sa jīvanmukta ucyate ॥ 23॥

rāgadveṣabhayādīnāmanurūpaṃ carannapi ।
yo'ntarvyomavadacchannaḥ sa jīvanmukta ucyate ॥ 24॥

yasya nāhaṃkṛto bhāvo buddhiryasya na lipyate ।
kurvato'kurvato vāpi sa jīvanmukta ucyate ॥ 25॥

yasmānnodvijate loko lokānnodvijate ca yaḥ ।
harṣāmarṣabhayonmuktaḥ sa jīvanmukta ucyate ॥ 26॥

yaḥ samastārthajāleṣu vyavahāryapi śītalaḥ ।
parārtheṣviva pūrṇātmā sa jīvanmukta ucyate ॥ 27॥

prajahāti yadā kāmānsarvāṃścittagatānmune ।
mayi sarvātmake tuṣṭaḥ sa jīvanmukta ucyate ॥ 28॥

caityavarjitacinmātre pade paramapāvane ।
akṣubdhacitto viśrāntaḥ sa jīvanmukta ucyate ॥ 29॥

idaṃ jagadahaṃ so'yaṃ dṛśyajātamavāstavam ।
yasya citte na sphurati sa jīvanmukta ucyate ॥ 30॥

sadbrahmaṇi sthire sphāre pūrṇe viṣayavarjite ।
ācāryaśāstramārgeṇa praviśyāśu sthiro bhava ॥ 31॥

śivo guruḥ śivo vedaḥ śiva devaḥ śivaḥ prabhuḥ ।
śivo'smyahaṃ śivaḥ sarvaṃ śivadanyanna kiñcana ॥ 32॥

tameva dhīro vijñāya prajñāṃ kurvīta brāhmaṇaḥ ।
nānudhyāyādbahūñchabdānvāco viglāpanaṃ hi tat ॥ 33॥

śuko mukto vāmadevo'pi mukta-
stābhyāṃ vinā muktibhājo na santi ।
śukamārgaṃ ye'nusaranti dhīrāḥ
sadyo muktāste bhavantīha loke ॥ 34॥

vāmadevaṃ ye'nusaranti nityaṃ
mṛtvā janitvā ca punaḥpunastat ।
te vai loke kramamuktā bhavanti
yogaiḥ sāṅkhyaiḥ karmabhiḥ sattvayuktaiḥ ॥ 35॥

śukaśca vāmadevaśca dve sṛtī devanirmite ।
śukaḥ vihaṅgamaḥ prokto vāmadevaḥ pipīlikā ॥ 36॥

atadvyāvṛttirūpeṇa sākṣādvidhimukhena vā ।
mahāvākyavicāreṇa sāṅkhyayogasamādhinā ॥ 37॥

viditvā svātmano rūpaṃ samprajñātasamādhitaḥ ।
śukamārgeṇa virajāḥ prayānti paramaṃ padam ॥ 38॥

yamādyāsanajāyāsahaṭhābhyāsātpunaḥpunaḥ ।
vighnabāhulyasañjāta aṇimādivaśādiha ॥ 39॥

alabdhvāpi phalaṃ samyakpunarbhūtvā mahākule ।
punarvāsanayaivāyaṃ yogābhyāsaṃ punaścaran ॥ 40॥

anekajanmābhyāsena vāmadevena vai pathā ।
so'pi muktiṃ samāpnoti tadviṣṇoḥ paramaṃ padam ॥ 41॥

dvāvimāvapi panthānau brahmaprāptikarau śivau ।
sadyomuktipradaścaikaḥ kramamuktipradaḥ paraḥ ।
atra ko mohaḥ kaḥ śoka ekatvamanupaśyataḥ ॥ 42॥

yasyānubhavaparyantā buddhistattve pravartate ।
taddṛṣṭigocarāḥ sarve mucyante sarvapātakaiḥ ॥ 43॥

khecarā bhūcarāḥ sarve brahmaviddṛṣṭigocarāḥ ।
sadya eva vimucyante koṭijanmārjitairaghaiḥ ॥ 44॥ iti॥

iti caturtho'dyāyaḥ ॥ 4॥

atha hainaṃ ṛbhuṃ bhagavantaṃ nidāghaḥ papraccha
yogābhyāsavidhimanubrūhīti । tatheti sa hovāca ।
pañcabhūtātmako dehaḥ pañcamaṇḍalapūritaḥ ।
kāṭhinyaṃ pṛthivīmekā pānīyaṃ taddravākṛti ॥ 1॥

dīpanaṃ ca bhavettejaḥ pracāro vāyulakṣaṇam ।
ākāśaḥ sattvataḥ sarvaṃ jñātavyaṃ yogamicchatā ॥ 2॥

ṣaṭśatānyadhikānyatra sahasrāṇyekaviṃśatiḥ ।
ahorātravahiḥ śvāsairvāyumaṇḍalaghātataḥ ॥ 3॥

tatpṛthvīmaṇḍale kṣīṇe valirāyāti dehinām ।
tadvadāpo gaṇāpāye keśāḥ syuḥ pāṇḍurāḥ kramāt ॥ 4॥

tejaḥkṣaye kṣudhā kāntirnaśyate mārutakṣaye ।
vepathuḥ saṃbhavennityaṃ nāmbhasenaiva jīvati ॥ 5॥

itthaṃbhūtaṃ kṣayānnityaṃ jīvitaṃ bhūtadhāraṇam ।
uḍḍyāṇaṃ kurute yasmādaviśrāntaṃ mahākhagaḥ ॥ 6॥

uḍḍiyāṇaṃ tadeva syāttatra bandho'bhidhīyate ।
uḍḍiyāṇo hyasau bandho mṛtyumātaṅgakeśarī ॥ 7॥

tasya muktistanoḥ kāyāttasya bandho hi duṣkaraḥ ।
agnau tu cālite kukṣau vedanā jāyate bhṛśam ॥ 8॥

na kāryā kṣudhi tenāpi nāpi viṇmūtraveginā ।
hitaṃ mitaṃ ca bhoktavyaṃ stokaṃ stokamanekadhā ॥ 9॥

mṛdumadhyamamantreṣu kramānmantraṃ layaṃ haṭham ।
layamantrahaṭhā yogā yogo hyaṣṭāṅgasaṃyutaḥ ॥ 10॥

yamaśca niyamaścaiva tathā cāsanameva ca ।
prāṇāyamastathā paścātpratyāhārastathā param ॥ 11॥

dhāraṇā ca tathā dhyānaṃ samadhiścāṣṭamo bhavet ।
ahiṃsā satyamasteyaṃ brahmacaryaṃ dayārjavam ॥ 12॥

kṣamā dhṛtirmitāhāraḥ śaucaṃ ceti yamā daśa ।
tapaḥ santoṣamāstikyaṃ dānamīśvarapūjanam ॥ 13॥

siddhāntaśravaṇaṃ caiva hrīrmatiśca japo vratam ।
ete hi niyamāḥ proktā daśadhaiva mahāmate ॥ 14॥

ekādaśāsanāni syuścakrādi munisattama ।
cakraṃ padmāsanaṃ kūrmaṃ mayūraṃ kukkuṭaṃ tathā ॥ 15॥

vīrāsanaṃ svastikaṃ ca bhadraṃ siṃhāsanaṃ tathā ।
muktāsanaṃ gomukhaṃ ca kīrtitaṃ yogavittamaiḥ ॥ 16॥

savyoru dakṣiṇe gulphe dakṣiṇaṃ dakṣiṇetare ।
nidadhyādṛjukāyastu cakrāsanamidaṃ matam ॥ 17॥

pūrakaḥ kumbhakastadvadrecakaḥ pūrakaḥ punaḥ ।
prāṇāyāmaḥ svanāḍībhistasmānnāḍīḥ pracakṣate ॥ 18॥

śarīraṃ sarvajantūnāṃ ṣaṇṇavatyaṅgulātmakam ।
tanmadhye pāyudeśāttu dvyaṅgulātparataḥ param ॥ 19॥

meḍhradeśādadhastāttu dvyaṅgulānmadhyamucyate ।
meḍhrānnavāṅgulādūrdhvaṃ nāḍīnāṃ kandamucyate ॥ 20॥

caturaṅgulamutsedhaṃ caturaṅgulamāyatam ।
aṇḍākāraṃ parivṛtaṃ medomajjāsthiśoṇitaiḥ ॥ 21॥

tatraiva nāḍīcakraṃ tu dvādaśāraṃ pratiṣṭhitam ।
śarīraṃ dhriyate yena vartate tatra kuṇḍalī ॥ 22॥

brahmarandhraṃ suṣumṇā yā vadanena pidhāya sā ।
alambusā suṣumṇāyāḥ kuhūrnāḍī vasatyasau ॥ 23॥

anantarārayugme tu vāruṇā ca yaśasvinī ।
dakṣiṇāre suṣumṇāyāḥ piṅgalā vartate kramāt ॥ 24॥

tadantarārayoḥ pūṣā vartate ca payasvinī ।
suṣumnā paścime cāre sthitā nāḍī sarasvatī ॥ 25॥

śaṅkhinī caiva gāndhārī tadanantarayoḥ sthite ।
uttare tu suṣumnāyā iḍākhyā nivasatyasau ॥ 26॥

anantaraṃ hastijihvā tato viśvodarī sthitā ।
pradakṣiṇakrameṇaiva cakrasyāreṣu nāḍayaḥ ॥ 27॥

vartante dvādaśa hyetā dvādaśānilavāhakāḥ ।
paṭavatsaṃsthitā nāḍyo nānāvarṇāḥ samīritāḥ ॥ 28॥

paṭamadhyaṃ tu yatsthānaṃ nābhicakraṃ taducyate ।
nādādhārā samākhyātā jvalantī nādarūpiṇī ॥ 29॥

pararandhrā suṣumnā ca catvāro ratnapūritāḥ ।
kuṇḍalyā pihitaṃ śaśvadbrahmarandhrasya madhyamam ॥ 30॥

evametāsu nāḍīṣu dharanti daśavāyavaḥ ।
evaṃ nāḍīgatiṃ vāyugatiṃ jñātvā vicakṣaṇaḥ ॥ 31॥

samagrīvaśiraḥ kāyaḥ saṃvṛtāsyaḥ suniścalaḥ ।
nāsāgre caiva hṛnmadhye bindumadhye turīyakam ॥ 32॥

sravantamamṛtaṃ paśyennetrābhyāṃ susamāhitaḥ ।
apānaṃ mukulīkṛtya pāyumākṛṣya conmukham ॥ 33॥

praṇavena samutthāpya śrībījena nivartayet ।
svātmānaṃ ca śriyaṃ dhyāyedamṛtaplāvanaṃ tathā ॥ 34॥

kālavañcanametaddhi sarvamukhyaṃ pracakṣate ।
manasā cintitā kāryaṃ manasā yena sidhyati ॥ 35॥

jale'gnijvalanācchākhāpallavāni bhavanti hi ।
nādhanyaṃ jāgataṃ vākyaṃ viparītā bhavetkriyā ॥ 36॥

mārge binduṃ samābadhya vahniṃ prajvālya jīvane ।
śoṣayitvā tu salilaṃ tena kāyaṃ dṛḍhaṃ bhavet ॥ 37॥

gudayonisamāyukta ākuñcatyekakālataḥ ।
apānamūrdhvagaṃ kṛtvā samānonne niyojayet ॥ 38॥

svātmānaṃ ca śriyaṃ dhyāyedamṛtaplāvanaṃ tataḥ ।
balaṃ samārabhedyogaṃ madhyamadvārabhāgataḥ ॥ 39॥

bhāvayedūrdhvagatyarthaṃ prāṇāpānasuyogataḥ ।
eṣa yogo varo dehe siddhimārgaprakāśakaḥ ॥ 40॥

yathaivāpāṅgataḥ setuḥ pravāhasya nirodhakaḥ ।
tathā śarīragā cchāyā jñātavyā yogibhiḥ sadā ॥ 41॥

sarvāsāmeva nāḍīnāmeṣa bandhaḥ prakīrtitaḥ ।
bandhasyāsya prasādena sphuṭībhavati devatā ॥ 42॥

evaṃ catuṣpatho bandho mārgatrayanirodhakaḥ ।
ekaṃ vikāsayanmārgaṃ yena siddhāḥ susaṅgatāḥ ॥ 43॥

udānamūrdhvagaṃ kṛtvā prāṇena saha vegataḥ ।
bandho'yaṃ sarvanāḍīnāmūrdhvaṃ yāti nirodhakaḥ ॥ 44॥

ayaṃ ca sampuṭo yogo mūlabandho'pyayaṃ mataḥ ।
bandhatrayamanenaiva siddhyatyabhyāsayogataḥ ॥ 45॥

divārātramavicchinnaṃ yāmeyāme yadā yadā ।
anenābhyāsayogena vāyurabhyasito bhavet ॥ 46॥

vāyāvabhyasite vahniḥ pratyahaṃ vardhate tanau ।
vahnau vivardhamāne tu sukhamannādi jīryate ॥ 47॥

annasya paripākena rasavṛddhiḥ prajāyate ।
rase vṛddhiṃ gate nityaṃ vardhante dhātavastathā ॥ 48॥

dhātūnāṃ vardhanenaiva prabodho vartate tanau ।
dahyante sarvapāpāni janmakoṭyarjitāni ca ॥ 49॥

gudameḍhrāntarālasthaṃ mūlādhāraṃ trikoṇakam ।
śivasya bindurūpasya sthānaṃ taddhi prakāśakam ॥ 50॥

yatra kuṇḍalinī nāma parā śaktiḥ pratiṣṭhitā ।
yasmādutpadyate vāyuryasmādvahniḥ pravardhate ॥ 51॥

yasmādutpadyate binduryasmānnādaḥ pravardhate ।
yasmādutpadyate haṃso yasmādutpadyate manaḥ ॥ 52॥

mūlādhārādiṣaṭcakraṃ śaktisthānamudīritam ।
kaṇṭhādupari mūrdhāntaṃ śāṃbhavaṃ sthānamucyate ॥ 53॥

nāḍīnāmāśrayaḥ piṇḍo nāḍyaḥ prāṇasya cāśrayaḥ ।
jīvasya nilayaḥ prāṇo jīvo haṃsasya cāśrayaḥ ॥ 54॥

haṃsaḥ śakteradhiṣṭhānaṃ carācaramidaṃ jagat ।
nirvikalpaḥ prasannātmā prāṇāyāṃ samabhyaset ॥ 55॥

samyagbandhatrayastho'pi lakṣyalakṣaṇakāraṇam ।
vedyaṃ samuddharennityaṃ satyasandhānamānasaḥ ॥ 56॥

recakaṃ pūrakaṃ caiva kumbhamadhye nirodhayet ।
dṛśyamāne pare lakṣye brahmaṇi svayamāśritaḥ ॥ 57॥

bāhyasthaviṣayaṃ sarvaṃ recakaḥ samudāhṛtaḥ ।
pūrakaṃ śāstravijñānaṃ kumbhakaṃ svagataṃ smṛtam ॥ 58॥

evamabhyāsacittaścetsamukto nātra saṃśayaḥ ।
kumbhakena samāropya kumbhakena pūrayet ॥ 59॥

kumbhena kumbhayetkumbhaṃ tadantasthaḥ paraṃ śivam ।
punarāsphālayedadya susthiraṃ kaṇṭhamudrayā ॥ 60॥

vāyūnāṃ gatimāvṛtya dhṛtvā pūrakakumbhakau ।
samahastayugaṃ bhūmau samaṃ pādayugaṃ tathā ॥ 61॥

vedhakakramayogena catuṣpīṭhaṃ tu vāyunā ।
āsphālayenmahāmeruṃ vāyuvaktre prakoṭibhiḥ ॥ 62॥

puṭadvayaṃ samākṛṣya vāyuḥ sphurati satvaram ।
somasūryāgnisaṃbadhājjānīyādamṛtāya vai ॥ 63॥

merumadhyagatā devāścalante merucālanāt ।
ādau sañjāyate kṣipraṃ vedho'sya brahmagranthitaḥ ॥ 64॥

brahmagranthiṃ tato bhittvā viṣṇugranthiṃ bhinattyasau ।
viṣṇugranthiṃ tato bhittvā rudragranthiṃ bhinattyasau ॥ 65॥

rudragranthiṃ tato bhittvā chitvā mohamalaṃ tathā ।
anekajanmasaṃskāragurudevaprasādataḥ ॥ 66॥

yogābhyāsāttato vedho jāyate tasya yoginaḥ ।
iḍāpiṅgalayormadhye suṣumnānāḍimaṇḍale ॥ 67॥

mudrābandhaviśeṣeṇa vāyumūrdhvaṃ ca kārayet ।
hasvo dahati pāpāni dīrgho mokṣapradāyakaḥ ॥ 68॥

āpyāyanaḥ pluto vāpi trividhoccāraṇena tu ।
tailadhārāmivacchinnaṃ dīrghaghaṇṭāninādavat ॥ 69॥

avācyaṃ praṇavasyāgraṃ yastaṃ veda sa vedavit ।
hasvaṃ bindugataṃ dairghyaṃ brahmarandhragataṃ plutam ।
dvādaśāntagataṃ mantraṃ prasādaṃ mantrasiddhaye ॥ 70
sarvavighnaharaścāyaṃ praṇavaḥ sarvadoṣahā ।
āraṃbhaśca ghaṭaścaiva punaḥ paricayastathā ॥ 71॥

niṣpattiśceti kathitāścatasrastasya bhūmikāḥ ।
kāraṇatrayasaṃbhūtaṃ bāhyaṃ karma parityajan ॥ 72॥

āntaraṃ karma kurute yatrāraṃbhaḥ sa ucyate ।
vāyuḥ paścimato vedhaṃ kurvannāpūrya susthiram ॥ 73॥

yatra tiṣṭhati sā proktā ghaṭākhyā bhūmikā budhaiḥ ।
na sajīvo na nirjīvaḥ kāye tiṣṭhati niścalam ।
yatra vāyuḥ sthiraḥ khe syātseyaṃ prathamabhūmikā ॥ 74॥

yatrātmanā sṛṣṭilayau jīvanmuktidaśāgataḥ ।
sahajaḥ kurute yogaṃ seyaṃ niṣpattibhūmikā ॥ 75॥ iti॥

etadupaniṣadaṃ yo'dhīte so'gnipūto bhavati ।
sa vāyupūto bhavati । surāpānātpūto bhavati ।
svarṇasteyātpūto bhavati । sa jīvanmukto bhavati ।
tadetadṛcābhyuktam । tadviṣṇoḥ paramaṃ padaṃ sadā paśyanti sūrayaḥ ।
divīva cakṣurātatam । tadviprāso vipanyavo jāgṛvāṃsaḥ samindhate ।
viṣṇoryatparamaṃ padamityupaniṣat ॥

iti pañcamo'dhyāyaḥ ॥ 5॥

oṃ saha nāvavatu saha nau bhunaktu saha vīryaṃ karavāvahai ।
tejasvināvadhī tamastu mā vidviṣāvahai ।
oṃ śāntiḥ śāntiḥ śāntiḥ ॥ hariḥ oṃ tatsat ॥

iti varāhopaniṣatsamāptā ॥