| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၉. ဝရာဟင္ဂပဉ္ဟော
9. Varāhaṅgapañho
၉. ‘‘ဘန္တေ နာဂသေန, ‘ဝရာဟသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဝရာဟော သန္တတ္တကဌိတေ 1 ဂိမ္ဟသမယေ သမ္ပတ္တေ ဥဒကံ ဥပဂစ္ဆတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဒောသေန စိတ္တေ အာလုဠိတခလိတဝိဗ္ဘန္တသန္တတ္တေ သီတလာမတပဏီတမေတ္တာဘာဝနံ ဥပဂန္တဗ္ဗံ။ ဣဒံ, မဟာရာဇ, ဝရာဟသ္သ ပဌမံ အင္ဂံ ဂဟေတဗ္ဗံ။
9. ‘‘Bhante nāgasena, ‘varāhassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, varāho santattakaṭhite 2 gimhasamaye sampatte udakaṃ upagacchati, evameva kho, mahārāja, yoginā yogāvacarena dosena citte āluḷitakhalitavibbhantasantatte sītalāmatapaṇītamettābhāvanaṃ upagantabbaṃ. Idaṃ, mahārāja, varāhassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, ဝရာဟော စိက္ခလ္လမုဒကမုပဂန္တ္ဝာ နာသိကာယ ပထဝိံ ခဏိတ္ဝာ ဒောဏိံ ကတ္ဝာ ဒောဏိကာယ သယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန မာနသေ ကာယံ နိက္ခိပိတ္ဝာ အာရမ္မဏန္တရဂတေန သယိတဗ္ဗံ။ ဣဒံ, မဟာရာဇ, ဝရာဟသ္သ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ပိဏ္ဍောလဘာရဒ္ဝာဇေန –
‘‘Puna caparaṃ, mahārāja, varāho cikkhallamudakamupagantvā nāsikāya pathaviṃ khaṇitvā doṇiṃ katvā doṇikāya sayati, evameva kho, mahārāja, yoginā yogāvacarena mānase kāyaṃ nikkhipitvā ārammaṇantaragatena sayitabbaṃ. Idaṃ, mahārāja, varāhassa dutiyaṃ aṅgaṃ gahetabbaṃ. Bhāsitampetaṃ, mahārāja, therena piṇḍolabhāradvājena –
ဧကာကိယော အဒုတိယော၊ သေတိ အာရမ္မဏန္တရေ’’’တိ။
Ekākiyo adutiyo, seti ārammaṇantare’’’ti.
ဝရာဟင္ဂပဉ္ဟော နဝမော။
Varāhaṅgapañho navamo.
Footnotes:
