| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
210. வரயாசனகதா²
210. Varayācanakathā
337. கதங் ப⁴த்தகிச்சங் யேனாதி கதப⁴த்தகிச்சோ, தஸ்மிங் ஸதீதி ஸம்ப³ந்தோ⁴. வுத்தனயேனேவாதி ராஹுலவத்து²ம்ஹி (மஹாவ॰ அட்ட²॰ 105) வுத்தனயேனேவ. இத³ங் வத்த²ந்தி இத³ங் ஸிவெய்யகங் வத்த²ங், உப்பன்னந்தி ஸம்ப³ந்தோ⁴. ‘‘தாவா’’தி அஜ்ஜா²ஹரிதப்³போ³. எத்த²ந்தரேதி ஏதஸ்மிங் வத்து²ப்பன்னகாலமஜ்ஜே². கோசி பி⁴க்கூ²தி ஸம்ப³ந்தோ⁴. தேனாதி பங்ஸுகூலிகஹேதுனா. அயந்தி ஜீவகோ. க³ஹபதிசீவரந்தி எத்த² க³ஹபதீனங் சீவரந்தி அத்த²ங் படிக்கி²பந்தோ ஆஹ ‘‘க³ஹபதீஹி தி³ன்னங் சீவர’’ந்தி . வத்த²தா³னானிஸங்ஸபடிஸங்யுத்தாயாதி ‘‘வத்த²தோ³ ஹோதி வண்ணதோ³’’திஆதி³காய (ஸங்॰ நி॰ 1.42) வத்த²தா³னஸ்ஸ ஆனிஸங்ஸேன படிஸங்யுத்தாய. விச்சா²வஸேன வுத்தோ ‘‘இதரீதரேனா’’தி ஸப்³ப³னாமஸத்³தோ³ அனியமத்தோ²தி ஆஹ ‘‘அப்பக்³கே⁴னபி மஹக்³கே⁴னபி யேன கேனசீ’’தி. பாவாரோதி உத்தராஸங்கோ³. ஸோ ஹி பாருபனத்தா²ய வரியதி இச்சி²யதீதி பாவாரோதி வுச்சதி. ‘‘கப்பாஸாதி³பே⁴தோ³’’தி இமினா தஸ்ஸ ஸரூபங் த³ஸ்ஸேதி. பகதிகோஜவமேவாதி பகதியா பி⁴க்கூ²னங் ஸாருப்பங் கோஜவமேவ. ஸோளஸனாடகித்தீ²னங் ட²த்வா நச்சயொக்³யத்தா மஹதீ பிட்டி² ஏதஸ்ஸாதி மஹாபிட்டி²யங், தமேவ கோஜவங் மஹாபிட்டி²யகோஜவங். தஸ்ஸ கிர லோமானி சதுரங்கு³லாதி⁴கானி ஹொந்தி.
337. Kataṃ bhattakiccaṃ yenāti katabhattakicco, tasmiṃ satīti sambandho. Vuttanayenevāti rāhulavatthumhi (mahāva. aṭṭha. 105) vuttanayeneva. Idaṃ vatthanti idaṃ siveyyakaṃ vatthaṃ, uppannanti sambandho. ‘‘Tāvā’’ti ajjhāharitabbo. Etthantareti etasmiṃ vatthuppannakālamajjhe. Koci bhikkhūti sambandho. Tenāti paṃsukūlikahetunā. Ayanti jīvako. Gahapaticīvaranti ettha gahapatīnaṃ cīvaranti atthaṃ paṭikkhipanto āha ‘‘gahapatīhi dinnaṃ cīvara’’nti . Vatthadānānisaṃsapaṭisaṃyuttāyāti ‘‘vatthado hoti vaṇṇado’’tiādikāya (saṃ. ni. 1.42) vatthadānassa ānisaṃsena paṭisaṃyuttāya. Vicchāvasena vutto ‘‘itarītarenā’’ti sabbanāmasaddo aniyamatthoti āha ‘‘appagghenapi mahagghenapi yena kenacī’’ti. Pāvāroti uttarāsaṅgo. So hi pārupanatthāya variyati icchiyatīti pāvāroti vuccati. ‘‘Kappāsādibhedo’’ti iminā tassa sarūpaṃ dasseti. Pakatikojavamevāti pakatiyā bhikkhūnaṃ sāruppaṃ kojavameva. Soḷasanāṭakitthīnaṃ ṭhatvā naccayogyattā mahatī piṭṭhi etassāti mahāpiṭṭhiyaṃ, tameva kojavaṃ mahāpiṭṭhiyakojavaṃ. Tassa kira lomāni caturaṅgulādhikāni honti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 210. வரயாசனாகதா² • 210. Varayācanākathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / வரயாசனகதா² • Varayācanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வரயாசனகதா²வண்ணனா • Varayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வரயாசனகதா²வண்ணனா • Varayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஜீவகவத்து²கதா²தி³வண்ணனா • Jīvakavatthukathādivaṇṇanā
