| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২১০. ৰরযাচনাকথা
210. Varayācanākathā
৩৩৭. অথ খো ভগৰতো কাযো নচিরস্সেৰ পকতত্তো অহোসি। অথ খো জীৰকো কোমারভচ্চো তং সিৰেয্যকং দুস্সযুগং আদায যেন ভগৰা তেনুপসঙ্কমি , উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো জীৰকো কোমারভচ্চো ভগৰন্তং এতদৰোচ – ‘‘একাহং, ভন্তে, ভগৰন্তং ৰরং যাচামী’’তি। ‘‘অতিক্কন্তৰরা খো, জীৰক, তথাগতা’’তি। ‘‘যঞ্চ, ভন্তে, কপ্পতি যঞ্চ অনৰজ্জ’’ন্তি। ‘‘ৰদেহি, জীৰকা’’তি। ‘‘ভগৰা, ভন্তে, পংসুকূলিকো, ভিক্খুসঙ্ঘো চ। ইদং মে, ভন্তে, সিৰেয্যকং দুস্সযুগং রঞ্ঞা পজ্জোতেন পহিতং – বহূনং দুস্সানং বহূনং দুস্সযুগানং বহূনং দুস্সযুগসতানং বহূনং দুস্সযুগসহস্সানং বহূনং দুস্সযুগসতসহস্সানং অগ্গঞ্চ সেট্ঠঞ্চ মোক্খঞ্চ উত্তমঞ্চ পৰরঞ্চ। পটিগ্গণ্হাতু মে, ভন্তে, ভগৰা সিৰেয্যকং দুস্সযুগং; ভিক্খুসঙ্ঘস্স চ গহপতিচীৰরং অনুজানাতূ’’তি। পটিগ্গহেসি ভগৰা সিৰেয্যকং দুস্সযুগং। অথ খো ভগৰা জীৰকং কোমারভচ্চং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো জীৰকো কোমারভচ্চো ভগৰতা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গহপতিচীৰরং। যো ইচ্ছতি, পংসুকূলিকো হোতু। যো ইচ্ছতি, গহপতিচীৰরং সাদিযতু। ইতরীতরেনপাহং 1, ভিক্খৰে, সন্তুট্ঠিং ৰণ্ণেমী’’তি।
337. Atha kho bhagavato kāyo nacirasseva pakatatto ahosi. Atha kho jīvako komārabhacco taṃ siveyyakaṃ dussayugaṃ ādāya yena bhagavā tenupasaṅkami , upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘ekāhaṃ, bhante, bhagavantaṃ varaṃ yācāmī’’ti. ‘‘Atikkantavarā kho, jīvaka, tathāgatā’’ti. ‘‘Yañca, bhante, kappati yañca anavajja’’nti. ‘‘Vadehi, jīvakā’’ti. ‘‘Bhagavā, bhante, paṃsukūliko, bhikkhusaṅgho ca. Idaṃ me, bhante, siveyyakaṃ dussayugaṃ raññā pajjotena pahitaṃ – bahūnaṃ dussānaṃ bahūnaṃ dussayugānaṃ bahūnaṃ dussayugasatānaṃ bahūnaṃ dussayugasahassānaṃ bahūnaṃ dussayugasatasahassānaṃ aggañca seṭṭhañca mokkhañca uttamañca pavarañca. Paṭiggaṇhātu me, bhante, bhagavā siveyyakaṃ dussayugaṃ; bhikkhusaṅghassa ca gahapaticīvaraṃ anujānātū’’ti. Paṭiggahesi bhagavā siveyyakaṃ dussayugaṃ. Atha kho bhagavā jīvakaṃ komārabhaccaṃ dhammiyā kathāya sandassesi samādapesi samuttejesi sampahaṃsesi. Atha kho jīvako komārabhacco bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gahapaticīvaraṃ. Yo icchati, paṃsukūliko hotu. Yo icchati, gahapaticīvaraṃ sādiyatu. Itarītarenapāhaṃ 2, bhikkhave, santuṭṭhiṃ vaṇṇemī’’ti.
অস্সোসুং খো রাজগহে মনুস্সা – ‘‘ভগৰতা কির ভিক্খূনং গহপতিচীৰরং অনুঞ্ঞাত’’ন্তি। তে চ মনুস্সা হট্ঠা অহেসুং উদগ্গা ‘‘ইদানি খো মযং দানানি দস্সাম পুঞ্ঞানি করিস্সাম, যতো ভগৰতা ভিক্খূনং গহপতিচীৰরং অনুঞ্ঞাত’’ন্তি। একাহেনেৰ রাজগহে বহূনি চীৰরসহস্সানি উপ্পজ্জিংসু।
Assosuṃ kho rājagahe manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Ekāheneva rājagahe bahūni cīvarasahassāni uppajjiṃsu.
অস্সোসুং খো জানপদা মনুস্সা – ‘‘ভগৰতা কির ভিক্খূনং গহপতিচীৰরং অনুঞ্ঞাত’’ন্তি। তে চ মনুস্সা হট্ঠা অহেসুং উদগ্গা – ‘‘ইদানি খো মযং দানানি দস্সাম পুঞ্ঞানি করিস্সাম, যতো ভগৰতা ভিক্খূনং গহপতিচীৰরং অনুঞ্ঞাত’’ন্তি। জনপদেপি একাহেনেৰ বহূনি চীৰরসহস্সানি উপ্পজ্জিংসু।
Assosuṃ kho jānapadā manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā – ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Janapadepi ekāheneva bahūni cīvarasahassāni uppajjiṃsu.
তেন খো পন সমযেন সঙ্ঘস্স পাৰারো উপ্পন্নো হোতি। ভগৰতো এতমত্থং আরোচেসুং। অনুজানামি, ভিক্খৰে, পাৰারন্তি।
Tena kho pana samayena saṅghassa pāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, pāvāranti.
কোসেয্যপাৰারো উপ্পন্নো হোতি। ভগৰতো এতমত্থং আরোচেসুং। অনুজানামি, ভিক্খৰে, কোসেয্যপাৰারন্তি।
Koseyyapāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, koseyyapāvāranti.
কোজৰং উপ্পন্নং হোতি। ভগৰতো এতমত্থং আরোচেসুং। অনুজানামি, ভিক্খৰে, কোজৰন্তি।
Kojavaṃ uppannaṃ hoti. Bhagavato etamatthaṃ ārocesuṃ. Anujānāmi, bhikkhave, kojavanti.
ৰরযাচনাকথা নিট্ঠিতা।
Varayācanākathā niṭṭhitā.
পঠমভাণৰারো নিট্ঠিতো।
Paṭhamabhāṇavāro niṭṭhito.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ৰরযাচনকথা • Varayācanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৰরযাচনকথাৰণ্ণনা • Varayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৰরযাচনকথাৰণ্ণনা • Varayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / জীৰকৰত্থুকথাদিৰণ্ণনা • Jīvakavatthukathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২১০. ৰরযাচনকথা • 210. Varayācanakathā
