| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၁၀. ဝရယာစနာကထာ
210. Varayācanākathā
၃၃၇. အထ ခော ဘဂဝတော ကာယော နစိရသ္သေဝ ပကတတ္တော အဟောသိ။ အထ ခော ဇီဝကော ကောမာရဘစ္စော တံ သိဝေယ္ယကံ ဒုသ္သယုဂံ အာဒာယ ယေန ဘဂဝာ တေနုပသင္ကမိ , ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော ဇီဝကော ကောမာရဘစ္စော ဘဂဝန္တံ ဧတဒဝောစ – ‘‘ဧကာဟံ, ဘန္တေ, ဘဂဝန္တံ ဝရံ ယာစာမီ’’တိ။ ‘‘အတိက္ကန္တဝရာ ခော, ဇီဝက, တထာဂတာ’’တိ။ ‘‘ယဉ္စ, ဘန္တေ, ကပ္ပတိ ယဉ္စ အနဝဇ္ဇ’’န္တိ။ ‘‘ဝဒေဟိ, ဇီဝကာ’’တိ။ ‘‘ဘဂဝာ, ဘန္တေ, ပံသုကူလိကော, ဘိက္ခုသင္ဃော စ။ ဣဒံ မေ, ဘန္တေ, သိဝေယ္ယကံ ဒုသ္သယုဂံ ရညာ ပဇ္ဇောတေန ပဟိတံ – ဗဟူနံ ဒုသ္သာနံ ဗဟူနံ ဒုသ္သယုဂာနံ ဗဟူနံ ဒုသ္သယုဂသတာနံ ဗဟူနံ ဒုသ္သယုဂသဟသ္သာနံ ဗဟူနံ ဒုသ္သယုဂသတသဟသ္သာနံ အဂ္ဂဉ္စ သေဋ္ဌဉ္စ မောက္ခဉ္စ ဥတ္တမဉ္စ ပဝရဉ္စ။ ပဋိဂ္ဂဏ္ဟာတု မေ, ဘန္တေ, ဘဂဝာ သိဝေယ္ယကံ ဒုသ္သယုဂံ; ဘိက္ခုသင္ဃသ္သ စ ဂဟပတိစီဝရံ အနုဇာနာတူ’’တိ။ ပဋိဂ္ဂဟေသိ ဘဂဝာ သိဝေယ္ယကံ ဒုသ္သယုဂံ။ အထ ခော ဘဂဝာ ဇီဝကံ ကောမာရဘစ္စံ ဓမ္မိယာ ကထာယ သန္ဒသ္သေသိ သမာဒပေသိ သမုတ္တေဇေသိ သမ္ပဟံသေသိ။ အထ ခော ဇီဝကော ကောမာရဘစ္စော ဘဂဝတာ ဓမ္မိယာ ကထာယ သန္ဒသ္သိတော သမာဒပိတော သမုတ္တေဇိတော သမ္ပဟံသိတော ဥဋ္ဌာယာသနာ ဘဂဝန္တံ အဘိဝာဒေတ္ဝာ ပဒက္ခိဏံ ကတ္ဝာ ပက္ကာမိ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဂဟပတိစီဝရံ။ ယော ဣစ္ဆတိ, ပံသုကူလိကော ဟောတု။ ယော ဣစ္ဆတိ, ဂဟပတိစီဝရံ သာဒိယတု။ ဣတရီတရေနပာဟံ 1, ဘိက္ခဝေ, သန္တုဋ္ဌိံ ဝဏ္ဏေမီ’’တိ။
337. Atha kho bhagavato kāyo nacirasseva pakatatto ahosi. Atha kho jīvako komārabhacco taṃ siveyyakaṃ dussayugaṃ ādāya yena bhagavā tenupasaṅkami , upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘ekāhaṃ, bhante, bhagavantaṃ varaṃ yācāmī’’ti. ‘‘Atikkantavarā kho, jīvaka, tathāgatā’’ti. ‘‘Yañca, bhante, kappati yañca anavajja’’nti. ‘‘Vadehi, jīvakā’’ti. ‘‘Bhagavā, bhante, paṃsukūliko, bhikkhusaṅgho ca. Idaṃ me, bhante, siveyyakaṃ dussayugaṃ raññā pajjotena pahitaṃ – bahūnaṃ dussānaṃ bahūnaṃ dussayugānaṃ bahūnaṃ dussayugasatānaṃ bahūnaṃ dussayugasahassānaṃ bahūnaṃ dussayugasatasahassānaṃ aggañca seṭṭhañca mokkhañca uttamañca pavarañca. Paṭiggaṇhātu me, bhante, bhagavā siveyyakaṃ dussayugaṃ; bhikkhusaṅghassa ca gahapaticīvaraṃ anujānātū’’ti. Paṭiggahesi bhagavā siveyyakaṃ dussayugaṃ. Atha kho bhagavā jīvakaṃ komārabhaccaṃ dhammiyā kathāya sandassesi samādapesi samuttejesi sampahaṃsesi. Atha kho jīvako komārabhacco bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gahapaticīvaraṃ. Yo icchati, paṃsukūliko hotu. Yo icchati, gahapaticīvaraṃ sādiyatu. Itarītarenapāhaṃ 2, bhikkhave, santuṭṭhiṃ vaṇṇemī’’ti.
အသ္သောသုံ ခော ရာဇဂဟေ မနုသ္သာ – ‘‘ဘဂဝတာ ကိရ ဘိက္ခူနံ ဂဟပတိစီဝရံ အနုညာတ’’န္တိ။ တေ စ မနုသ္သာ ဟဋ္ဌာ အဟေသုံ ဥဒဂ္ဂာ ‘‘ဣဒာနိ ခော မယံ ဒာနာနိ ဒသ္သာမ ပုညာနိ ကရိသ္သာမ, ယတော ဘဂဝတာ ဘိက္ခူနံ ဂဟပတိစီဝရံ အနုညာတ’’န္တိ။ ဧကာဟေနေဝ ရာဇဂဟေ ဗဟူနိ စီဝရသဟသ္သာနိ ဥပ္ပဇ္ဇိံသု။
Assosuṃ kho rājagahe manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Ekāheneva rājagahe bahūni cīvarasahassāni uppajjiṃsu.
အသ္သောသုံ ခော ဇာနပဒာ မနုသ္သာ – ‘‘ဘဂဝတာ ကိရ ဘိက္ခူနံ ဂဟပတိစီဝရံ အနုညာတ’’န္တိ။ တေ စ မနုသ္သာ ဟဋ္ဌာ အဟေသုံ ဥဒဂ္ဂာ – ‘‘ဣဒာနိ ခော မယံ ဒာနာနိ ဒသ္သာမ ပုညာနိ ကရိသ္သာမ, ယတော ဘဂဝတာ ဘိက္ခူနံ ဂဟပတိစီဝရံ အနုညာတ’’န္တိ။ ဇနပဒေပိ ဧကာဟေနေဝ ဗဟူနိ စီဝရသဟသ္သာနိ ဥပ္ပဇ္ဇိံသု။
Assosuṃ kho jānapadā manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā – ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Janapadepi ekāheneva bahūni cīvarasahassāni uppajjiṃsu.
တေန ခော ပန သမယေန သင္ဃသ္သ ပာဝာရော ဥပ္ပန္နော ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ပာဝာရန္တိ။
Tena kho pana samayena saṅghassa pāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, pāvāranti.
ကောသေယ္ယပာဝာရော ဥပ္ပန္နော ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ကောသေယ္ယပာဝာရန္တိ။
Koseyyapāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, koseyyapāvāranti.
ကောဇဝံ ဥပ္ပန္နံ ဟောတိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ကောဇဝန္တိ။
Kojavaṃ uppannaṃ hoti. Bhagavato etamatthaṃ ārocesuṃ. Anujānāmi, bhikkhave, kojavanti.
ဝရယာစနာကထာ နိဋ္ဌိတာ။
Varayācanākathā niṭṭhitā.
ပဌမဘာဏဝာရော နိဋ္ဌိတော။
Paṭhamabhāṇavāro niṭṭhito.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ဝရယာစနကထာ • Varayācanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဝရယာစနကထာဝဏ္ဏနာ • Varayācanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဝရယာစနကထာဝဏ္ဏနာ • Varayācanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဇီဝကဝတ္ထုကထာဒိဝဏ္ဏနာ • Jīvakavatthukathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၁၀. ဝရယာစနကထာ • 210. Varayācanakathā
