| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
210. වරයාචනාකථා
210. Varayācanākathā
337. අථ ඛො භගවතො කායො නචිරස්‌සෙව පකතත්‌තො අහොසි. අථ ඛො ජීවකො කොමාරභච්‌චො තං සිවෙය්‍යකං දුස්‌සයුගං ආදාය යෙන භගවා තෙනුපසඞ්‌කමි , උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ජීවකො කොමාරභච්‌චො භගවන්‌තං එතදවොච – ‘‘එකාහං, භන්‌තෙ, භගවන්‌තං වරං යාචාමී’’ති. ‘‘අතික්‌කන්‌තවරා ඛො, ජීවක, තථාගතා’’ති. ‘‘යඤ්‌ච, භන්‌තෙ, කප්‌පති යඤ්‌ච අනවජ්‌ජ’’න්‌ති. ‘‘වදෙහි, ජීවකා’’ති. ‘‘භගවා, භන්‌තෙ, පංසුකූලිකො, භික්‌ඛුසඞ්‌ඝො ච. ඉදං මෙ, භන්‌තෙ, සිවෙය්‍යකං දුස්‌සයුගං රඤ්‌ඤා පජ්‌ජොතෙන පහිතං – බහූනං දුස්‌සානං බහූනං දුස්‌සයුගානං බහූනං දුස්‌සයුගසතානං බහූනං දුස්‌සයුගසහස්‌සානං බහූනං දුස්‌සයුගසතසහස්‌සානං අග්‌ගඤ්‌ච සෙට්‌ඨඤ්‌ච මොක්‌ඛඤ්‌ච උත්‌තමඤ්‌ච පවරඤ්‌ච. පටිග්‌ගණ්‌හාතු මෙ, භන්‌තෙ, භගවා සිවෙය්‍යකං දුස්‌සයුගං; භික්‌ඛුසඞ්‌ඝස්‌ස ච ගහපතිචීවරං අනුජානාතූ’’ති. පටිග්‌ගහෙසි භගවා සිවෙය්‍යකං දුස්‌සයුගං. අථ ඛො භගවා ජීවකං කොමාරභච්‌චං ධම්‌මියා කථාය සන්‌දස්‌සෙසි සමාදපෙසි සමුත්‌තෙජෙසි සම්‌පහංසෙසි. අථ ඛො ජීවකො කොමාරභච්‌චො භගවතා ධම්‌මියා කථාය සන්‌දස්‌සිතො සමාදපිතො සමුත්‌තෙජිතො සම්‌පහංසිතො උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, ගහපතිචීවරං. යො ඉච්‌ඡති, පංසුකූලිකො හොතු. යො ඉච්‌ඡති, ගහපතිචීවරං සාදියතු. ඉතරීතරෙනපාහං 1, භික්‌ඛවෙ, සන්‌තුට්‌ඨිං වණ්‌ණෙමී’’ති.
337. Atha kho bhagavato kāyo nacirasseva pakatatto ahosi. Atha kho jīvako komārabhacco taṃ siveyyakaṃ dussayugaṃ ādāya yena bhagavā tenupasaṅkami , upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘ekāhaṃ, bhante, bhagavantaṃ varaṃ yācāmī’’ti. ‘‘Atikkantavarā kho, jīvaka, tathāgatā’’ti. ‘‘Yañca, bhante, kappati yañca anavajja’’nti. ‘‘Vadehi, jīvakā’’ti. ‘‘Bhagavā, bhante, paṃsukūliko, bhikkhusaṅgho ca. Idaṃ me, bhante, siveyyakaṃ dussayugaṃ raññā pajjotena pahitaṃ – bahūnaṃ dussānaṃ bahūnaṃ dussayugānaṃ bahūnaṃ dussayugasatānaṃ bahūnaṃ dussayugasahassānaṃ bahūnaṃ dussayugasatasahassānaṃ aggañca seṭṭhañca mokkhañca uttamañca pavarañca. Paṭiggaṇhātu me, bhante, bhagavā siveyyakaṃ dussayugaṃ; bhikkhusaṅghassa ca gahapaticīvaraṃ anujānātū’’ti. Paṭiggahesi bhagavā siveyyakaṃ dussayugaṃ. Atha kho bhagavā jīvakaṃ komārabhaccaṃ dhammiyā kathāya sandassesi samādapesi samuttejesi sampahaṃsesi. Atha kho jīvako komārabhacco bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gahapaticīvaraṃ. Yo icchati, paṃsukūliko hotu. Yo icchati, gahapaticīvaraṃ sādiyatu. Itarītarenapāhaṃ 2, bhikkhave, santuṭṭhiṃ vaṇṇemī’’ti.
අස්‌සොසුං ඛො රාජගහෙ මනුස්‌සා – ‘‘භගවතා කිර භික්‌ඛූනං ගහපතිචීවරං අනුඤ්‌ඤාත’’න්‌ති. තෙ ච මනුස්‌සා හට්‌ඨා අහෙසුං උදග්‌ගා ‘‘ඉදානි ඛො මයං දානානි දස්‌සාම පුඤ්‌ඤානි කරිස්‌සාම, යතො භගවතා භික්‌ඛූනං ගහපතිචීවරං අනුඤ්‌ඤාත’’න්‌ති. එකාහෙනෙව රාජගහෙ බහූනි චීවරසහස්‌සානි උප්‌පජ්‌ජිංසු.
Assosuṃ kho rājagahe manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Ekāheneva rājagahe bahūni cīvarasahassāni uppajjiṃsu.
අස්‌සොසුං ඛො ජානපදා මනුස්‌සා – ‘‘භගවතා කිර භික්‌ඛූනං ගහපතිචීවරං අනුඤ්‌ඤාත’’න්‌ති. තෙ ච මනුස්‌සා හට්‌ඨා අහෙසුං උදග්‌ගා – ‘‘ඉදානි ඛො මයං දානානි දස්‌සාම පුඤ්‌ඤානි කරිස්‌සාම, යතො භගවතා භික්‌ඛූනං ගහපතිචීවරං අනුඤ්‌ඤාත’’න්‌ති. ජනපදෙපි එකාහෙනෙව බහූනි චීවරසහස්‌සානි උප්‌පජ්‌ජිංසු.
Assosuṃ kho jānapadā manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā – ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Janapadepi ekāheneva bahūni cīvarasahassāni uppajjiṃsu.
තෙන ඛො පන සමයෙන සඞ්‌ඝස්‌ස පාවාරො උප්‌පන්‌නො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, පාවාරන්‌ති.
Tena kho pana samayena saṅghassa pāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, pāvāranti.
කොසෙය්‍යපාවාරො උප්‌පන්‌නො හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, කොසෙය්‍යපාවාරන්‌ති.
Koseyyapāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, koseyyapāvāranti.
කොජවං උප්‌පන්‌නං හොති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, කොජවන්‌ති.
Kojavaṃ uppannaṃ hoti. Bhagavato etamatthaṃ ārocesuṃ. Anujānāmi, bhikkhave, kojavanti.
වරයාචනාකථා නිට්‌ඨිතා.
Varayācanākathā niṭṭhitā.
පඨමභාණවාරො නිට්‌ඨිතො.
Paṭhamabhāṇavāro niṭṭhito.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / වරයාචනකථා • Varayācanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / වරයාචනකථාවණ්‌ණනා • Varayācanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / වරයාචනකථාවණ්‌ණනා • Varayācanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ජීවකවත්‌ථුකථාදිවණ්‌ණනා • Jīvakavatthukathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 210. වරයාචනකථා • 210. Varayācanakathā
