| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༡༠. ཝརཡཱཙནཱཀཐཱ
210. Varayācanākathā
༣༣༧. ཨཐ ཁོ བྷགཝཏོ ཀཱཡོ ནཙིརསྶེཝ པཀཏཏྟོ ཨཧོསི། ཨཐ ཁོ ཛཱིཝཀོ ཀོམཱརབྷཙྩོ ཏཾ སིཝེཡྻཀཾ དུསྶཡུགཾ ཨཱདཱཡ ཡེན བྷགཝཱ ཏེནུཔསངྐམི , ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཛཱིཝཀོ ཀོམཱརབྷཙྩོ བྷགཝནྟཾ ཨེཏདཝོཙ – ‘‘ཨེཀཱཧཾ, བྷནྟེ, བྷགཝནྟཾ ཝརཾ ཡཱཙཱམཱི’’ཏི། ‘‘ཨཏིཀྐནྟཝརཱ ཁོ, ཛཱིཝཀ, ཏཐཱགཏཱ’’ཏི། ‘‘ཡཉྩ, བྷནྟེ, ཀཔྤཏི ཡཉྩ ཨནཝཛྫ’’ནྟི། ‘‘ཝདེཧི, ཛཱིཝཀཱ’’ཏི། ‘‘བྷགཝཱ, བྷནྟེ, པཾསུཀཱུལིཀོ, བྷིཀྑུསངྒྷོ ཙ། ཨིདཾ མེ, བྷནྟེ, སིཝེཡྻཀཾ དུསྶཡུགཾ རཉྙཱ པཛྫོཏེན པཧིཏཾ – བཧཱུནཾ དུསྶཱནཾ བཧཱུནཾ དུསྶཡུགཱནཾ བཧཱུནཾ དུསྶཡུགསཏཱནཾ བཧཱུནཾ དུསྶཡུགསཧསྶཱནཾ བཧཱུནཾ དུསྶཡུགསཏསཧསྶཱནཾ ཨགྒཉྩ སེཊྛཉྩ མོཀྑཉྩ ཨུཏྟམཉྩ པཝརཉྩ། པཊིགྒཎྷཱཏུ མེ, བྷནྟེ, བྷགཝཱ སིཝེཡྻཀཾ དུསྶཡུགཾ; བྷིཀྑུསངྒྷསྶ ཙ གཧཔཏིཙཱིཝརཾ ཨནུཛཱནཱཏཱུ’’ཏི། པཊིགྒཧེསི བྷགཝཱ སིཝེཡྻཀཾ དུསྶཡུགཾ། ཨཐ ཁོ བྷགཝཱ ཛཱིཝཀཾ ཀོམཱརབྷཙྩཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ ཛཱིཝཀོ ཀོམཱརབྷཙྩོ བྷགཝཏཱ དྷམྨིཡཱ ཀཐཱཡ སནྡསྶིཏོ སམཱདཔིཏོ སམུཏྟེཛིཏོ སམྤཧཾསིཏོ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, གཧཔཏིཙཱིཝརཾ། ཡོ ཨིཙྪཏི, པཾསུཀཱུལིཀོ ཧོཏུ། ཡོ ཨིཙྪཏི, གཧཔཏིཙཱིཝརཾ སཱདིཡཏུ། ཨིཏརཱིཏརེནཔཱཧཾ 1, བྷིཀྑཝེ, སནྟུཊྛིཾ ཝཎྞེམཱི’’ཏི།
337. Atha kho bhagavato kāyo nacirasseva pakatatto ahosi. Atha kho jīvako komārabhacco taṃ siveyyakaṃ dussayugaṃ ādāya yena bhagavā tenupasaṅkami , upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho jīvako komārabhacco bhagavantaṃ etadavoca – ‘‘ekāhaṃ, bhante, bhagavantaṃ varaṃ yācāmī’’ti. ‘‘Atikkantavarā kho, jīvaka, tathāgatā’’ti. ‘‘Yañca, bhante, kappati yañca anavajja’’nti. ‘‘Vadehi, jīvakā’’ti. ‘‘Bhagavā, bhante, paṃsukūliko, bhikkhusaṅgho ca. Idaṃ me, bhante, siveyyakaṃ dussayugaṃ raññā pajjotena pahitaṃ – bahūnaṃ dussānaṃ bahūnaṃ dussayugānaṃ bahūnaṃ dussayugasatānaṃ bahūnaṃ dussayugasahassānaṃ bahūnaṃ dussayugasatasahassānaṃ aggañca seṭṭhañca mokkhañca uttamañca pavarañca. Paṭiggaṇhātu me, bhante, bhagavā siveyyakaṃ dussayugaṃ; bhikkhusaṅghassa ca gahapaticīvaraṃ anujānātū’’ti. Paṭiggahesi bhagavā siveyyakaṃ dussayugaṃ. Atha kho bhagavā jīvakaṃ komārabhaccaṃ dhammiyā kathāya sandassesi samādapesi samuttejesi sampahaṃsesi. Atha kho jīvako komārabhacco bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gahapaticīvaraṃ. Yo icchati, paṃsukūliko hotu. Yo icchati, gahapaticīvaraṃ sādiyatu. Itarītarenapāhaṃ 2, bhikkhave, santuṭṭhiṃ vaṇṇemī’’ti.
ཨསྶོསུཾ ཁོ རཱཛགཧེ མནུསྶཱ – ‘‘བྷགཝཏཱ ཀིར བྷིཀྑཱུནཾ གཧཔཏིཙཱིཝརཾ ཨནུཉྙཱཏ’’ནྟི། ཏེ ཙ མནུསྶཱ ཧཊྛཱ ཨཧེསུཾ ཨུདགྒཱ ‘‘ཨིདཱནི ཁོ མཡཾ དཱནཱནི དསྶཱམ པུཉྙཱནི ཀརིསྶཱམ, ཡཏོ བྷགཝཏཱ བྷིཀྑཱུནཾ གཧཔཏིཙཱིཝརཾ ཨནུཉྙཱཏ’’ནྟི། ཨེཀཱཧེནེཝ རཱཛགཧེ བཧཱུནི ཙཱིཝརསཧསྶཱནི ཨུཔྤཛྫིཾསུ།
Assosuṃ kho rājagahe manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Ekāheneva rājagahe bahūni cīvarasahassāni uppajjiṃsu.
ཨསྶོསུཾ ཁོ ཛཱནཔདཱ མནུསྶཱ – ‘‘བྷགཝཏཱ ཀིར བྷིཀྑཱུནཾ གཧཔཏིཙཱིཝརཾ ཨནུཉྙཱཏ’’ནྟི། ཏེ ཙ མནུསྶཱ ཧཊྛཱ ཨཧེསུཾ ཨུདགྒཱ – ‘‘ཨིདཱནི ཁོ མཡཾ དཱནཱནི དསྶཱམ པུཉྙཱནི ཀརིསྶཱམ, ཡཏོ བྷགཝཏཱ བྷིཀྑཱུནཾ གཧཔཏིཙཱིཝརཾ ཨནུཉྙཱཏ’’ནྟི། ཛནཔདེཔི ཨེཀཱཧེནེཝ བཧཱུནི ཙཱིཝརསཧསྶཱནི ཨུཔྤཛྫིཾསུ།
Assosuṃ kho jānapadā manussā – ‘‘bhagavatā kira bhikkhūnaṃ gahapaticīvaraṃ anuññāta’’nti. Te ca manussā haṭṭhā ahesuṃ udaggā – ‘‘idāni kho mayaṃ dānāni dassāma puññāni karissāma, yato bhagavatā bhikkhūnaṃ gahapaticīvaraṃ anuññāta’’nti. Janapadepi ekāheneva bahūni cīvarasahassāni uppajjiṃsu.
ཏེན ཁོ པན སམཡེན སངྒྷསྶ པཱཝཱརོ ཨུཔྤནྣོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, པཱཝཱརནྟི།
Tena kho pana samayena saṅghassa pāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, pāvāranti.
ཀོསེཡྻཔཱཝཱརོ ཨུཔྤནྣོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཀོསེཡྻཔཱཝཱརནྟི།
Koseyyapāvāro uppanno hoti. Bhagavato etamatthaṃ ārocesuṃ. Anujānāmi, bhikkhave, koseyyapāvāranti.
ཀོཛཝཾ ཨུཔྤནྣཾ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཀོཛཝནྟི།
Kojavaṃ uppannaṃ hoti. Bhagavato etamatthaṃ ārocesuṃ. Anujānāmi, bhikkhave, kojavanti.
ཝརཡཱཙནཱཀཐཱ ནིཊྛིཏཱ།
Varayācanākathā niṭṭhitā.
པཋམབྷཱཎཝཱརོ ནིཊྛིཏོ།
Paṭhamabhāṇavāro niṭṭhito.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཝརཡཱཙནཀཐཱ • Varayācanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཝརཡཱཙནཀཐཱཝཎྞནཱ • Varayācanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཝརཡཱཙནཀཐཱཝཎྞནཱ • Varayācanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཛཱིཝཀཝཏྠུཀཐཱདིཝཎྞནཱ • Jīvakavatthukathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢༡༠. ཝརཡཱཙནཀཐཱ • 210. Varayācanakathā
