| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[47] 7. வாருணிதூ³ஸகஜாதகவண்ணனா
[47] 7. Vāruṇidūsakajātakavaṇṇanā
ந வே அனத்த²குஸலேனாதி இத³ங் ஸத்தா² ஜேதவனே விஹரந்தோ வாருணிதூ³ஸகங் ஆரப்³ப⁴ கதே²ஸி. அனாத²பிண்டி³கஸ்ஸ கிர ஸஹாயோ ஏகோ வாருணிவாணிஜோ திகி²ணங் வாருணிங் யோஜெத்வா ஹிரஞ்ஞஸுவண்ணாதீ³னி க³ஹெத்வா விக்கிணந்தோ மஹாஜனே ஸன்னிபதிதே ‘‘தாத, த்வங் மூலங் க³ஹெத்வா வாருணிங் தே³ஹீ’’தி அந்தேவாஸிகங் ஆணாபெத்வா ஸயங் ந்ஹாயிதுங் அக³மாஸி. அந்தேவாஸிகோ மஹாஜனஸ்ஸ வாருணிங் தெ³ந்தோ மனுஸ்ஸே அந்தரந்தரா லோணஸக்க²ரா ஆஹராபெத்வா கா²த³ந்தே தி³ஸ்வா ‘‘அயங் ஸுரா அலோணிகா ப⁴விஸ்ஸதி, லோணமெத்த² பக்கி²பிஸ்ஸாமீ’’தி ஸுராசாடியங் நாளிமத்தங் லோணங் பக்கி²பித்வா தேஸங் ஸுரங் அதா³ஸி. தே முக²ங் பூரெத்வா பூரெத்வா ச²ட்³டெ³த்வா ‘‘கிங் தே கத’’ந்தி புச்சி²ங்ஸு. ‘‘தும்ஹே ஸுரங் பிவித்வா லோணங் ஆஹராபெந்தே தி³ஸ்வா லோணேன யோஜேஸி’’ந்தி. ‘‘ஏவரூபங் நாம மனாபங் வாருணிங் நாஸேஸி பா³லா’’தி தங் க³ரஹித்வா உட்டா²யுட்டா²ய பக்கந்தா. வாருணிவாணிஜோ ஆக³ந்த்வா ஏகம்பி அதி³ஸ்வா ‘‘வாருணிபாயகா கஹங் க³தா’’தி புச்சி², ஸோ தமத்த²ங் ஆரோசேஸி. அத² நங் ஆசரியோ ‘‘பா³ல, ஏவரூபா நாம தே ஸுரா நாஸிதா’’தி க³ரஹித்வா இமங் காரணங் அனாத²பிண்டி³கஸ்ஸ ஆரோசேஸி. அனாத²பிண்டி³கோ ‘‘அத்தி²தா³னி மே இத³ங் கதா²பாப⁴த’’ந்தி ஜேதவனங் க³ந்த்வா ஸத்தா²ரங் வந்தி³த்வா ஏதமத்த²ங் ஆரோசேஸி. ஸத்தா² ‘‘ந ஏஸ, க³ஹபதி, இதா³னேவ வாருணிதூ³ஸகோ, புப்³பே³பி வாருணிதூ³ஸகோயேவா’’தி வத்வா தேன யாசிதோ அதீதங் ஆஹரி.
Na ve anatthakusalenāti idaṃ satthā jetavane viharanto vāruṇidūsakaṃ ārabbha kathesi. Anāthapiṇḍikassa kira sahāyo eko vāruṇivāṇijo tikhiṇaṃ vāruṇiṃ yojetvā hiraññasuvaṇṇādīni gahetvā vikkiṇanto mahājane sannipatite ‘‘tāta, tvaṃ mūlaṃ gahetvā vāruṇiṃ dehī’’ti antevāsikaṃ āṇāpetvā sayaṃ nhāyituṃ agamāsi. Antevāsiko mahājanassa vāruṇiṃ dento manusse antarantarā loṇasakkharā āharāpetvā khādante disvā ‘‘ayaṃ surā aloṇikā bhavissati, loṇamettha pakkhipissāmī’’ti surācāṭiyaṃ nāḷimattaṃ loṇaṃ pakkhipitvā tesaṃ suraṃ adāsi. Te mukhaṃ pūretvā pūretvā chaḍḍetvā ‘‘kiṃ te kata’’nti pucchiṃsu. ‘‘Tumhe suraṃ pivitvā loṇaṃ āharāpente disvā loṇena yojesi’’nti. ‘‘Evarūpaṃ nāma manāpaṃ vāruṇiṃ nāsesi bālā’’ti taṃ garahitvā uṭṭhāyuṭṭhāya pakkantā. Vāruṇivāṇijo āgantvā ekampi adisvā ‘‘vāruṇipāyakā kahaṃ gatā’’ti pucchi, so tamatthaṃ ārocesi. Atha naṃ ācariyo ‘‘bāla, evarūpā nāma te surā nāsitā’’ti garahitvā imaṃ kāraṇaṃ anāthapiṇḍikassa ārocesi. Anāthapiṇḍiko ‘‘atthidāni me idaṃ kathāpābhata’’nti jetavanaṃ gantvā satthāraṃ vanditvā etamatthaṃ ārocesi. Satthā ‘‘na esa, gahapati, idāneva vāruṇidūsako, pubbepi vāruṇidūsakoyevā’’ti vatvā tena yācito atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ பா³ராணஸியங் ஸெட்டி² அஹோஸி. தங் உபனிஸ்ஸாய ஏகோ வாருணிவாணிஜோ ஜீவதி. ஸோ திகி²ணங் ஸுரங் யோஜெத்வா ‘‘இமங் விக்கிணாஹீ’’தி அந்தேவாஸிகங் வத்வா ந்ஹாயிதுங் க³தோ. அந்தேவாஸிகோ தஸ்மிங் க³தமத்தேயேவ ஸுராய லோணங் பக்கி²பித்வா இமினாவ நயேன ஸுரங் வினாஸேஸி. அத²ஸ்ஸ ஆசரியோ ஆக³ந்த்வா தங் காரணங் ஞத்வா ஸெட்டி²ஸ்ஸ ஆரோசேஸி. ஸெட்டி² ‘‘அனத்த²குஸலா நாம பா³லா ‘அத்த²ங் கரிஸ்ஸாமா’தி அனத்த²மேவ கரொந்தீ’’தி வத்வா இமங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto bārāṇasiyaṃ seṭṭhi ahosi. Taṃ upanissāya eko vāruṇivāṇijo jīvati. So tikhiṇaṃ suraṃ yojetvā ‘‘imaṃ vikkiṇāhī’’ti antevāsikaṃ vatvā nhāyituṃ gato. Antevāsiko tasmiṃ gatamatteyeva surāya loṇaṃ pakkhipitvā imināva nayena suraṃ vināsesi. Athassa ācariyo āgantvā taṃ kāraṇaṃ ñatvā seṭṭhissa ārocesi. Seṭṭhi ‘‘anatthakusalā nāma bālā ‘atthaṃ karissāmā’ti anatthameva karontī’’ti vatvā imaṃ gāthamāha –
47.
47.
‘‘ந வே அனத்த²குஸலேன, அத்த²சரியா ஸுகா²வஹா;
‘‘Na ve anatthakusalena, atthacariyā sukhāvahā;
ஹாபேதி அத்த²ங் து³ம்மேதோ⁴, கொண்ட³ஞ்ஞோ வாருணிங் யதா²’’தி.
Hāpeti atthaṃ dummedho, koṇḍañño vāruṇiṃ yathā’’ti.
தத்த² கொண்ட³ஞ்ஞோ வாருணிங் யதா²தி யதா² அயங் கொண்ட³ஞ்ஞனாமகோ அந்தேவாஸிகோ ‘‘அத்த²ங் கரிஸ்ஸாமீ’’தி லோணங் பக்கி²பித்வா வாருணிங் ஹாபேஸி பரிஹாபேஸி வினாஸேஸி, ஏவங் ஸப்³போ³பி அனத்த²குஸலோ அத்த²ங் ஹாபேதீதி போ³தி⁴ஸத்தோ இமாய கா³தா²ய த⁴ம்மங் தே³ஸேஸி.
Tattha koṇḍañño vāruṇiṃ yathāti yathā ayaṃ koṇḍaññanāmako antevāsiko ‘‘atthaṃ karissāmī’’ti loṇaṃ pakkhipitvā vāruṇiṃ hāpesi parihāpesi vināsesi, evaṃ sabbopi anatthakusalo atthaṃ hāpetīti bodhisatto imāya gāthāya dhammaṃ desesi.
ஸத்தா²பி ‘‘ந ஏஸ க³ஹபதி இதா³னேவ வாருணிதூ³ஸகோ, புப்³பே³பி வாருணிதூ³ஸகோயேவா’’தி வத்வா அனுஸந்தி⁴ங் க⁴டெத்வா ஜாதகங் ஸமோதா⁴னேஸி – ‘‘ததா³ வாருணிதூ³ஸகோ இதா³னிபி வாருணிதூ³ஸகோவ அஹோஸி, பா³ராணஸிஸெட்டி² பன அஹமேவ அஹோஸி’’ந்தி.
Satthāpi ‘‘na esa gahapati idāneva vāruṇidūsako, pubbepi vāruṇidūsakoyevā’’ti vatvā anusandhiṃ ghaṭetvā jātakaṃ samodhānesi – ‘‘tadā vāruṇidūsako idānipi vāruṇidūsakova ahosi, bārāṇasiseṭṭhi pana ahameva ahosi’’nti.
வாருணிதூ³ஸகஜாதகவண்ணனா ஸத்தமா.
Vāruṇidūsakajātakavaṇṇanā sattamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 47. வாருணிதூ³ஸகஜாதகங் • 47. Vāruṇidūsakajātakaṃ
